ᐃᓯᑭᐊᓕᐅᑉ ᐊᒡᓚᖏᑦ 38 - ᐊᒡᓔᑦ ᐃᑦᔪᕐᖕᓁᑦᑐᑦ

ᒑᒡᒥᐅᑦ ᒎᑎᒧᑦ ᐊᑐᕐᑕᐅᓂᖓᑦ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᒑᒡ ᓵᕝᕕᒋᒍᒃ, ᒪᒑᒡ ᓄᓇᖓᓃᑦᑐᖅ, ᐊᖓᔪᖅᑳᖑᔪᖅ ᒥᓯᑭᒥᐅᓄᑦ ᑐᐸᐅᓪᒥᐅᓄᓪᓗ, ᓵᓐᖓᓗᒍ ᐅᖃᕐᑕᐅᖁᔭᓐᓂᒃ ᐅᖃᕐᕕᒋᒍᒃ,

³ ᐅᖃᕐᓗᑎᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᓵᓐᖓᓕᕐᐸᒋᑦ ᒑᒡ, ᒥᓯᑭᒥᐅᓄᑦ ᑐᐸᐅᓪᒥᐅᓄᓪᓗ ᐊᖓᔪᖅᑳᖑᔪᑎᑦ;

⁴ ᑐᓄᒻᒧᑦ ᓵᑎᑦᓱᒫᕐᐸᒋᑦ, ᐊᒃᓕᕈᒃᑯᓪᓗ ᓂᒃᓯᒡᓗᑎᑦ ᐅᓂᐊᕈᒫᕐᐸᒋᑦ, ᐅᓇᑕᕐᑎᖁᑎᓕᒫᑎᓪᓗ, ᕿᒻᒥᕐᔪᐊᑦ ᕿᒻᒥᕐᔪᐊᒃᑰᕐᑐᓪᓗ, ᐊᓐᓄᕌᕐᓯᒪᔪᓕᒫᑦ ᐅᓇᑕᕐᑐᕐᓯᐅᑎᓂᒃ, ᐃᓄᒋᐊᒃᑐᕐᔪᐊᑦ, ᐊᑕᖏᕐᓗᑎᒃ ᐊᒡᕖᕋᐅᑎᓕᔭᕐᑐᑦ ᓴᐴᓗᑕᖃᕐᓗᑎᒡᓗ, ᓴᕕᒡᔪᐊᓕᔭᕐᑐᑦ.

⁵ ᐅᓇᑕᕐᑏᓪᓗ ᐴᕐᓯᐊᒥᐅᑦ ᑯᔅᒥᐅᑦ ᐳᑎᒥᐅᓪᓗ ᐃᓚᒋᔭᓕᒫᖏᑦ ᓇᓴᓖᑦ ᓯᑎᔪᓂᒃ ᓴᐴᓗᑕᖃᕐᑐᓪᓗ.

⁶ ᐅᓇᑕᕐᑏᓪᓗ ᓄᓇᓂᑦ ᒎᒪᒥᑦ ᐃᓄᒋᐊᒃᑐᕐᔪᐊᖁᑎᖏᓪᓗ; ᐱᑦ-ᑐᒐᕐᒪᒥᓪᓗ ᐅᓐᓄᐊᓪᓗᐊᒥᑦ ᐅᖓᓯᒃᑐᒥᑦ ᐱᓯᒪᔪᓕᒫᑦ ᐃᓄᒋᐊᒃᑐᕐᔪᐊᖁᑎᖏᓪᓗ ᐊᓯᖏᓪᓗ ᐃᓄᒐᓴᒡᔪᐊᑦ ᐃᓚᒋᕚᑎᑦ.

⁷ ᐅᐸᓗᖎᔭᓕᕆᑦ ᐊᑐᐃᓐᓇᐅᖏᓐᓇᓕᕐᓗᑎᓪᓗ, ᐅᓇᑕᕐᑎᖁᑎᑎᓪᓗ, ᐃᓚᒋᔭᓕᒫᑎᓪᓗ ᑲᑎᖃᑕᐅᓯᒪᔪᑦ; ᐊᖓᔪᖅᑲᐅᕕᒋᔭᑎᑦ.

⁸ ᐅᓪᓗᐃᑦ ᐅᓄᕐᑐᑦ ᓈᒃᐸᑕ ᐅᓇᑕᕆᐊᖁᔪᒫᕋᒃᑭᑦ; ᐊᕐᕌᒎᓛᕐᑐᓂ ᐅᓇᑕᕆᐊᖁᔪᒫᕋᒃᑭᑦ ᐅᓇᑕᕋᓱᒍᓐᓃᕐᑐᓂᒃ, ᐃᓴᕆᐊᓕᒥᐅᑦ ᖃᖅᑲᖏᓐᓂᕐᒥᐅᓂᒃ ᑲᑎᕐᓱᕐᓯᒪᔪᓂᒃ ᐃᓅᖃᑎᒌᒡᔪᐊᓂᑦ, ᐊᑯᓂ ᓱᓇᐅᔪᓐᓃᕐᓯᒪᔪᓂᒃ; ᐃᓄᖃᕐᑐᓂᒃ ᐃᓅᖃᑎᒌᒡᔪᐊᓂᓐᖔᕐᓯᒪᔪᓂᒃ ᒫᓐᓇᓗ ᐃᓂᓪᓚᑦᑎᐊᕐᓯᒪᓕᕐᑐᓂᒃ, ᑖᒃᑯᓂᖓᓕᒫᖅ.

⁹ ᓵᓚᒋᔪᒫᕐᐸᑎᑦ, ᐊᓄᕆᕐᔪᐊᑎᑐᑦ ᑎᑭᕝᕕᒋᓗᒋᑦ, ᓄᓇᖓᓪᓗ ᓄᕗᔭᒧᑦ ᑖᓪᓕᕐᑕᐅᔪᑎᑐᑦ ᑍᒤᑦᓱᒫᕐᐸᑦ, ᐃᓚᒋᔭᓕᒫᑎᓪᓗ ᐃᓚᒋᓗᒋᑦ ᐃᓄᒋᐊᒃᑐᕐᔪᐊᑦ.

¹⁰ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑖᓐᓇ ᐅᓪᓗᖅ ᓇᓪᓕᐅᑎᒃᐸᑦ ᐃᓱᒪᒧᑦ ᑎᑭᑕᐅᔪᒫᕐᐳᑎᑦ, ᐱᐅᖏᑦᑐᒥᒃ ᐱᓇᓱᐊᕈᒪᓗᑎᑦ.

¹¹ ᐅᖃᕐᓗᑎᓪᓗ, ‘ᓄᓇᓕᖕᓄᑦ ᐊᕙᓗᕐᔪᐊᖃᖏᑦᑐᓄᐊᕈᒪᕗᖓ; ᐃᓄᖕᓄᑦ ᐃᓂᓪᓚᖓᑦᓯᐊᕐᑐᓄᑦ, ᓄᓇᓕᖕᓄᑦ ᐊᕙᓗᕐᔪᐊᖃᖏᑦᑐᓄᑦ, ᓴᕕᕋᔭᖕᓄᓪᓗ ᐅᑯᐊᕐᔪᐊᓄᑦ ᐱᔭᐅᑦᔧᕐᓯᒪᖏᑦᑐᓄᑦ ᐃᑎᕐᑕᕐᕕᖃᖏᑦᑐᓄᑦ’;

¹² ᐃᓄᖏᑦ ᐃᑖᕐᓗᒋᑦ ᐊᕐᓵᕈᒫᕐᐸᑎᑦ ᐱᒋᔭᖏᓐᓂᒃ ᓄᖑᕈᑎᓗᒋᓪᓗ; ᓄᓇᑖᕐᓯᒪᔪᑦ ᐃᒡᓗᒐᓴᒡᔪᐊᕕᓂᑐᐃᓐᓇᐅᓚᐅᕐᑐᓂ, ᑲᑎᕐᓱᕐᑕᐅᓯᒪᔪᑦ ᐃᓅᖃᑎᒌᒡᔪᐊᓂᑦ, ᐆᒪᔪᖁᑎᖃᓕᕐᑐᓂᒃ ᐱᖁᑎᖃᓕᕐᑐᓂᒡᓗ, ᓄᓇᖃᕐᑐᓄᑦ ᓇᑭᑐᐃᓐᓇᖅ ᐊᖅᑯᓵᕐᑕᐅᕙᒃᑐᒥᒃ.

¹³ ᓰᐸᒥᐅᑦ ᑎᑖᓂᒥᐅᓪᓗ ᓂᐅᕕᕋᕐᑏᓪᓗ ᑖᕐᓯᓯᒥᐅᑍᑦ ᐊᐱᕆᔪᒫᕐᐹᓯ, ‘ᐅᓇᑕᕐᑎᖁᑎᓯ ᐅᓇᑕᕆᐊᕐᑎᑉᐱᓯᐅᒃ ᐊᕐᓵᕐᓯᒋᐊᕐᑎᑐᐃᓐᓇᕐᓗᒋᑦ? ᐃᑖᕆᐊᕐᑐᕐᑎᓪᓗᒋᓪᓗ ᓄᓇᓕᖕᓂᒃ? ᓯᐅᓪᕕᕆᓂᒃ ᒎᓗᓂᒡᓗ ᐆᒪᔪᖁᑎᖏᓐᓂᒡᓗ ᑎᒎᖅᑬᓗᓯ ᐊᐅᓪᓚᕈᑦᔨᔪᒪᑐᐃᓐᓇᕐᓗᓰ?’

¹⁴ ᑍᒤᒻᒪᑦ, ᐃᓅᑉ ᐃᕐᓂᖓ, ᐅᖃᕐᑕᐅᖁᔭᓐᓂᒃ ᐅᖃᐅᑎᒃᑭᑦ, ᐅᖃᕐᓗᑎᑦ, ᒑᒡᒥᐅᓄᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐅᓇᑕᕐᑕᐅᓂᐊᕋᓱᒋᓐᖏᑎᓪᓗᒋᑦ, ᑲᐅᔨᒪᒐᓗᐊᕐᐱᒌᑦ?

¹⁵ ᓄᓇᒋᔭᑦᓯᓐᓂᑦ ᐅᓐᓄᐊᓪᓗᐊᑉ ᓇᓛᓂᑦ ᐅᓇᑕᕐᑐᒃᓴᒐᓴᒡᔪᐊᓂᒃ ᐱᔪᓐᓇᕐᑐᕐᔪᐊᓂᒃ ᑕᓯᐅᕐᓯᔪᒫᕐᐳᓯ ᐃᓅᖃᑎᒌᒡᔪᐊᒐᓴᖕᓂᑦ ᐱᓯᒪᔪᓂᒃ ᕿᒥᕐᔪᐊᓂ ᐃᑭᒪᔪᓂᒃ.

¹⁶ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐅᓇᑕᕆᐊᕈᒫᕐᐸᓯ, ᓄᕗᔭᒧᑦ ᓄᓇ ᐅᓕᒃᑕᐅᔪᑎᑐᑦ ᑍᒤᑦᓱᒫᕐᐸᓯ. ᑖᒃᑯᓇᓂ ᐅᓪᓗᐃᑦ ᑭᖑᓪᓕᖏᓐᓂ ᑎᓕᔪᒫᕐᐸᒋᑦ ᑎᒍᓯᔭᕐᑐᕐᑎᓪᓗᓯ ᓄᓇᖁᑎᓐᓂᒃ, ᐃᓅᖃᑎᒌᒡᔪᐊᑦ ᖃᐅᔨᓕᖁᓪᓗᒋᑦ ᐅᕙᓐᓂᒃ, ᐃᓕᖕᓂᒃ ᐊᑐᕐᓗᖓ ᒑᒡ, ᐃᑦᔪᕐᓁᑦᑑᓂᕋ ᖃᐅᔨᔭᐅᑎᑦᓱᒫᕐᐸᕋ ᑖᒃᑯᐊ ᑕᒃᑯᐊᓂ.

¹⁷ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑍᑦᓱᒪᓂᐊᓗᒃ ᐅᖃᕐᑎᒃᑲ ᐅᖃᐅᓯᖃᕐᐸᓚᐅᕐᐳᑦ ᐃᓴᕆᐊᓕᒥᐅᑦ ᐅᓇᑕᕐᑕᐅᔪᒫᕐᓂᖏᓐᓂᒃ; ᑖᒃᑯᐊᖑᓕᕐᐳᓯ ᑕᕝᕙ ᑎᑭᑦᓱᒫᕐᑐᒃᓮᑦ.”

ᒎᑎᐅᑉ ᓱᒋᐊᕐᓯᓂᖓ ᒑᒡᒥᐅᓂᒃ

¹⁸ “ᑕᕝᕙᓂᓗ ᐅᓪᓗᒥ, ᒑᒡ ᐃᓴᕆᐊᓕᒥᐅᓂᒃ ᐅᓇᑕᕆᐊᓕᕐᐸᑦ, ᐊᑕᓂᖅ ᒎᑎ ᐅᖃᕐᐳᖅ, ᓂᓐᖓᕕᒡᔪᐊᕈᒫᕐᐳᖓ.

¹⁹ ᓯᖕᓇᓂᕐᒧᑦ ᓂᓐᖓᕕᒡᔪᐊᓛᕐᓂᕋ ᓇᓗᓁᕐᐸᕋ, ᐅᓪᓗᖅ ᑕᒪᓐᓇ ᓇᓪᓕᐅᑎᒃᐸᑦ ᐃᓴᕆᐊᓕᒥᐅᑦ ᓄᓇᖓᓂ ᓴᔪᒃᐱᓗᒡᔪᐊᕐᑐᖃᕈᒫᕐᐳᖅ.

²⁰ ᐃᖃᓗᐃᑦ ᐃᒫᓃᑦᑐᑦ, ᑎᖕᒥᐊᓪᓗ ᖃᖓᑕᕙᒃᑐᑦ, ᐆᒪᔪᓪᓗ ᓇᑎᕐᓇᒦᑦᑐᑦ, ᐹᕐᖑᕐᐸᒃᑐᓕᒫᓪᓗ ᓄᓇᒥ, ᐃᓄᓕᒫᓪᓗ ᓄᓇᒦᑦᑐᑦ, ᓴᔪᒍᒫᕐᐳᑦ ᓇᔫᑎᓂᓐᓄᑦ, ᖃᖅᑬᓪᓗ ᓯᖁᑦᑎᕈᒫᕐᐳᑦ, ᐃᓐᓈᕈᐃᓪᓗ ᑲᑕᒑᔪᒫᕐᐳᑦ, ᐊᕙᓗᓕᒫᓪᓗ ᐅᕐᕉᕋᕈᒫᕐᐳᑦ ᒪᓂᖅᑲᒧᑦ.

²¹ ᒑᒡᒥᐅᓪᓗ ᑲᑉᐱᐊᓱᒃᑎᑦᓱᒫᕐᐸᒃᑲ ᑲᑉᐱᐊᓇᕐᑐᓄᑦ ᐊᑦᔨᒌᖏᑦᑐᓄᑦ, ᐊᑕᓂᖅ ᒎᑎ ᐅᖃᕐᐳᖅ; ᐅᓇᑕᕐᑎᖁᑎᓕᒫᖏᑦ ᐃᒻᒥᖕᓄᑦ ᑐᖁᕋᖃᑦᑕᐅᑎᓕᕈᒫᕐᐳᑦ.

²² ᓱᒋᐊᕈᒫᕐᐸᒃᑲ ᖃᓂᒪᓇᕐᑐᓄᑦ ᑐᖁᕋᐅᑎᓂᕐᓄᓪᓗ; ᓯᓚᓗᒡᕕᐅᑎᑦᓱᒫᕐᐸᒃᑲ ᐅᓇᑕᕐᑎᖁᑎᖏᓪᓗ ᐃᓅᖃᑎᒌᒡᔪᐊᓂᓪᓗ ᑕᐱᕐᑖᕆᓯᒪᔭᖏᑦ ᐃᓚᒋᔭᖏᑦ, ᓯᓚᓗᒡᔪᐊᒧᑦ ᓇᑕᖅᑯᕐᓇᓄᓪᓗ, ᐃᑯᒪᓄᑦ ᐊᐅᒪᓄᓪᓗ.

²³ ᑍᒫᒡᓗ ᐊᔪᖏᑦᑐᕐᔪᐊᖑᓂᕋ ᐃᑦᔪᕐᓁᓐᓂᕋᓗ ᖃᐅᔨᔭᐅᑎᑦᓱᒫᕐᐸᕋ ᐃᓅᖃᑎᒌᒡᔪᐊᓄᑦ ᑕᑯᔭᐅᑎᓪᓗᒍ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.”