ᐃᓯᑭᐊᓕᐅᑉ ᐊᒡᓚᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᓮᒻᒪᕐᑎᑦᓯᓂᖓ ᐃᓴᕆᐊᓕᒥᐅᓂᒃ 1 “ᐃᕝᕕᓪᓕ ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᖃᖅᑲᖏᓐᓄᑦ ᐱᔪᖃᓛᕐᑐᓂᒃ ᐅᖃᓪᓚᒋᐊᕐᑐᕆᑦ, ᐅᖃᕐᓗᑎᓪᓗ, ᐃᓴᕆᐊᓕᐅᑉ ᖃᖅᑲᖏᑦ, ᑐᓴᕆᑦᓯ ᐊᑕᓂᐅᑉ ᐅᖃᐅᓯᖓᓂᒃ. 2 ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᑭᕋᕐᑐᕐᑎᓯ ᐃᓕᑦᓯᓐᓂᒃ ᐅᖃᐅᓯᖃᓚᐅᕐᐳᑦ, ‘ᐋᕼᐊ! ᓄᓇᖓᑕ ᖃᖅᑲᑐᖃᖏᑦ ᐱᑖᕆᕙᕗᑦ.’ 3 “ᑍᒤᒻᒪᑦ ᐱᔪᖃᓛᕐᑐᒥᒃ ᐅᖃᐅᑎᒃᑭᑦ, ᐅᖃᕐᓗᑎᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑖᒃᑯᓇᓐᖓᑦ ᓱᓁᕈᑦᔭᐅᓚᐅᕋᕕᑦ, ᐊᕙᑎᓕᒫᕐᓂᑦ ᑲᑐᑦᔭᐅᓪᓗᑎᑦ ᓵᓚᐅᓚᐅᕋᕕᑦ, ᐃᓅᖃᑎᒌᒡᔪᐊᓄᑦ ᐱᑖᕆᔭᐅᓚᐅᕐᐳᑎᑦ, ᐃᓄᖕᓄᓪᓗ ᐅᖃᐅᓯᐅᖃᑦᑕᓕᓚᐅᕐᐳᑎᑦ ᐅᖃᐅᓯᐅᓂᕐᓗᖃᑦᑕᓕᕐᓗᑎᓪᓗ; 4 ᑍᒤᒻᒪᑦ, ᐃᓴᕆᐊᓕᐅᑉ ᖃᖅᑲᖏᑦ, ᑐᓴᕆᑦᓯ ᐊᑕᓂᐅᑉ ᒎᑎᐅᑉ ᐅᖃᐅᓯᖓᓂᒃ: ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᖃᖅᑲᓄᑦ ᐱᖑᕐᓄᓪᓗ, ᑰᕈᖕᓄᑦ ᓇᕐᓴᓄᓪᓗ, ᓱᓁᕈᑦᔭᐅᓂᑯᓄᑦ ᓱᓇᐅᔪᓐᓃᕐᑐᓄᑦ ᐃᒡᓗᒐᓴᖕᓄᓪᓗ ᕿᒪᒃᑕᐅᓂᑯᓄᑦ, ᐱᖁᑍᕈᑦᔭᐅᓂᑯᓄᑦ ᒥᑕᐅᑎᒋᔭᐅᕙᓕᕐᑐᓄᓪᓗ ᐃᓅᖃᑎᒌᒡᔪᐊᓄᑦ ᖃᓂᒋᔮᓃᑦᑐᓄᑦ. 5 “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓯᖕᓇᕕᒡᔪᐊᕐᓂᕐᒧᑦ ᓂᓐᖓᐅᒪᓪᓗᖓ ᐃᓅᖃᑎᒌᒡᔪᐊᑦ, ᐄᑐᒥᐅᓕᒫᓪᓗ ᓵᓐᖓᓕᕐᐸᒃᑲ, ᖁᕕᐊᓲᑎᒋᓪᓗᒋᑦ ᒥᑕᐅᑎᒋᓪᓗᒋᓪᓗ ᑎᒍᓯᓚᐅᕐᒪᑕ ᓄᓇᖁᑎᓐᓂᒃ, ᓄᓇᑖᕆᔪᒪᓪᓗᒍ ᐱᓇᓱᐊᕐᕕᒋᔪᒪᓪᓗᒍᓗ. 6 “ᑍᒤᒻᒪᑦ ᐱᔪᒫᕐᑐᓂᒃ ᐅᖃᐅᑎᒃᑭᑦ ᐃᓴᕆᐊᓕᐅᑉ ᓄᓇᖓ, ᖃᖅᑬᑦ ᐱᖑᐃᓪᓗ, ᑰᕈᖏᑦ ᓇᕐᓴᖏᓪᓗ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᓯᖕᓇᓂᕐᒧᑦ ᓂᓐᖓᐅᒪᓪᓗᖓ ᐅᖃᐅᑎᕙᑦᓯ, ᐃᓅᖃᑎᒌᒡᔪᐊᑦ ᓱᓇᐅᒃᓴᖏᓐᓂᕐᒧᑦ ᒥᑕᐅᑎᒋᓪᓗᓯ ᐃᓗᖏᕐᓱᕐᑎᓚᐅᕐᒪᓯ; 7 ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᖃᕕᒃᐳᖓ ᐃᓅᖃᑎᒌᒡᔪᐊᑦ ᖃᓂᒋᔭᑦᓯᓐᓃᑦᑐᑦ ᓱᓇᐅᑎᖏᓐᓂᕐᒧᑦ ᒥᑕᐅᑎᒋᓗᒋᑦ ᐃᓗᖏᕐᓱᕐᑎᑦᓱᒫᕐᐸᒃᑲ. 8 ᐃᓕᑦᓯᓕ, ᐃᓴᕆᐊᓕᐅᑉ ᖃᖅᑲᖏᑦ, ᓇᐹᕐᑐᑎᑦ ᐱᕈᕐᕕᐅᓕᕈᒫᕆᕗᑦ, ᐸᐅᕐᖓᕐᑖᖃᑦᑕᓕᕐᓗᑎᒡᓗ ᐃᓄᖁᑎᒪ ᐃᓴᕆᐊᓕᒥᐅᑉ ᓂᕿᒃᓴᖏᓐᓂᒃ; ᒫᓐᓇᒃᑯᑦ ᐊᖏᕐᕋᕆᐊᒃᓕᖕᒪᑕ. 9 ᑕᑯᒋᑦ, ᑕᑉᐱᕐᓗᓯ, ᓵᕝᕕᒋᓂᐊᕐᐸᑦᓯ, ᐃᑎᕐᓴᓕᐅᕐᑕᐅᓗᓯ ᑲᓐᖓᕐᓱᐃᕕᐅᔪᒫᕐᐳᓯ; 10 ᐃᓅᖃᑎᓯᓗ ᐅᓄᕐᓯᕙᓪᓕᐊᑎᓐᓂᐊᓕᕐᐸᒃᑲ, ᐃᓴᕆᐊᓕᐅᑉ ᑭᖑᕚᓕᒫᖏᑦ, ᐊᑕᖏᕐᓗᒋᑦ; ᐃᒡᓗᒐᓴᒡᔪᐊᑦ ᐃᓄᖃᓕᕈᒫᕐᐳᑦ ᓯᖁᒥᑕᐅᓯᒪᔪᓪᓗ ᓴᓇᔭᐅᓕᕐᒥᓗᑎᒃ; 11 ᐃᓄᐃᓪᓗ ᐆᒪᔪᖁᑎᖏᓪᓗ ᐅᓄᕐᓯᕙᓪᓕᐊᑎᑦᓱᒫᕐᐸᒃᑲ ᐃᓕᖕᓂ; ᑖᒃᑯᐊᓗ ᐅᓄᕐᓯᕙᓪᓕᐊᔪᒫᕐᐳᑦ ᕿᑐᕐᖓᕐᑖᖃᑦᑕᕐᓗᑎᒃ; ᐃᓄᖃᓕᕐᑎᑦᓱᒫᕆᕙᑦᓯ ᓯᕗᓂᖓᓂ ᐃᓄᖃᕐᐸᓚᐅᕐᓂᑦᓯᑐᑦ, ᐱᕙᓪᓕᐊᓂᕐᓴᐅᓕᕈᒫᕐᐳᓯᓗ ᑍᒪᓐᖓᓂᑦ. ᑕᕝᕙ ᖃᐅᔨᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ. 12 ᐄᓛᒃ, ᐃᓄᖕᓄᑦ ᐱᓱᒡᕕᐅᖃᑦᑕᓕᕐᑎᑦᓱᒫᕆᕙᒋᑦ, ᐊᒡᓛᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ; ᓄᓇᑖᕆᔪᒫᕐᐹᑎᑦ, ᑖᒃᑯᓇᓐᖓᓪᓗ ᑭᖑᕐᖑᑎᔭᐅᓕᕐᓗᑎᑦ, ᕿᑐᕐᖓᖏᓪᓗ ᐱᕐᓚᓱᒃᑎᓚᐅᕐᓯᒪᓂᐊᕈᓐᓃᕐᐸᑎᑦ. 13 “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓄᐃᑦ ᐃᓕᖕᓂᒃ ᐅᖃᐅᓯᖃᕐᐸᓚᐅᕐᐳᑦ, ‘ᓄᓇ ᐃᓄᒃᑐᕐᑎᐅᕗᖅ, ᐃᓅᖃᑎᒌᒡᔪᐊᓪᓗ ᕿᑐᕐᖓᖏᓐᓂᒃ ᐱᕐᓚᓱᒃᑎᑦᓯᕙᒃᓗᓂ.’ 14 ᑍᒤᒻᒪᑦ ᒫᓐᓇ ᐃᓄᒃᑐᕐᑎᐅᓂᕋᕐᑕᐅᕙᖕᓂᐊᕈᓐᓁᕐᐳᑎᑦ ᐃᓅᖃᑎᒌᒡᔪᐊᓪᓗ ᕿᑐᕐᖓᖏᓐᓂᒃ ᐱᕐᓚᓱᒃᑎᑦᓯᕙᖕᓂᐊᕈᓐᓁᕐᐳᑎᑦ, ᐊᑕᓂᖅ ᒎᑎ ᐅᖃᕐᐳᖅ; 15 ᐃᓅᖃᑎᒌᒡᔪᐊᑦ ᒥᑕᐅᑎᒃᓴᕐᓂᖏᓐᓂᒃ ᑐᓵᑎᓐᓂᐊᕈᓐᓃᕐᐸᒋᑦ, ᐃᓄᐃᓪᓗ ᑲᓐᖑᓇᕐᑐᒦᑎᑕᐅᓂᖏᓐᓂᒃ ᑎᒍᒥᐊᕐᓂᐊᕈᓐᓃᕐᐳᑎᑦ ᐃᓅᖃᑎᒌᒡᔪᐊᓪᓗ ᕿᑐᕐᖎᔭᕐᐸᖕᓂᐊᕈᓐᓃᕐᐸᑎᑦ, ᐊᑕᓂᖅ ᒎᑎ ᐅᖃᕐᐳᖅ.” ᐃᓴᕆᐊᓕᒥᐅᑦ ᓄᑖᒥᒃ ᐃᓅᓯᕐᑖᕐᓂᖓᑦ 16 ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 17 “ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᑭᖑᕚᖏᑦ ᓄᓇᒥᖕᓃᓪᓗᑎᒃ, ᓄᓇᒥᖕᓂᒃ ᓇᕐᕈᓇᕐᓯᑎᑦᓯᓚᐅᕐᒪᑕ ᐃᓕᖅᑯᓯᕐᒥᒃᑎᒍᑦ ᐱᓂᐊᕐᓂᕐᒥᒃᑎᒍᓪᓗ; ᐃᓕᖅᑯᓯᖏᑦ ᓵᓐᓂ ᓴᓗᒤᑦᑑᓚᐅᕐᐳᑦ ᐊᕐᓇᐅᑉ ᐊᐅᓈᕐᕕᖕᒥᓄᑦ ᓇᓪᓕᐅᑎᕕᐅᓯᒪᓂᖓᑐᑦ. 18 ᑍᒤᒻᒪᑦ ᓂᓐᖓᕝᕕᒋᓚᐅᕐᐸᒃᑲ ᐃᓄᐊᕐᓗᑎᒃ ᐊᐅᖕᒥᒃ ᑯᕕᓯᖃᑦᑕᕐᒪᑕ ᓄᓇᒧᑦ, ᒎᑎᓐᖑᐊᓄᓪᓗ ᓄᓇᑎᒃ ᓇᕐᕈᓇᕐᓯᑎᓚᐅᕐᒪᑦᔪᒃ. 19 ᓯᐊᒻᒪᕐᑎᓚᐅᕐᐸᒃᑲ ᐃᓅᖃᑎᒌᒡᔪᐊᓄᑦ, ᓄᓇᓕᒡᔪᐊᓂᓗ ᓄᓇᑖᕐᑎᓪᓗᒋᑦ; ᐃᓕᖅᑯᓯᖏᑦ ᐱᓂᐊᕐᓂᖏᓪᓗ ᒪᓕᒡᓗᒋᑦ ᓵᓐᖓᓕᓚᐅᕐᐸᒃᑲ. 20 ᐃᓅᖃᑎᒌᒡᔪᐊᓄᓪᓕ ᑎᑭᑦᓴᕌᖓᑕ, ᓇᑭᑐᐃᓐᓈᕋᓗᐊᕐᐸᑕ, ᐊᑎᕋ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᖃᑦᑕᓚᐅᕐᐹᑦ, ᐃᓄᖕᓄᑦ ᐅᖃᐅᓯᐅᕙᓚᐅᕐᒪᑕ, ‘ᐅᑯᐊ ᐊᑕᓂᐅᑉ ᐃᓄᖁᑎᖏᑦ, ᓄᓇᖁᑎᖓᓂᓪᓕ ᐊᐅᓪᓚᕐᑎᑕᐅᔭᕆᐊᖃᓕᓚᐅᕐᐳᑦ.’ 21 ᐊᑎᕋᓕ ᐃᑦᔪᕐᓁᑦᑐᖅ ᐃᓱᒫᓗᒋᓕᓚᐅᕐᐸᕋ, ᐃᓴᕆᐊᓕᐅᑉ ᑭᖑᕚᖏᓐᓄᑦ ᐊᑎᕋ ᓇᕐᕈᓇᕐᓯᑎᑕᐅᖃᑦᑕᓕᓚᐅᕐᒪᑦ ᐃᓅᖃᑎᒌᒡᔪᐊᓄᑦ ᐅᐸᒃᑕᖏᓐᓄᑦ. 22 “ᑍᒤᒻᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐱᓂᐊᕐᓂᕆᓂᐊᕐᑕᕋ ᐃᓕᑦᓯᓐᓂᒃ ᐱᑦᔪᑎᖃᕐᓗᖓ ᐱᓇᓱᐊᕐᓂᐊᓐᖏᓚᕋ, ᐊᑎᕋᓕ ᐃᑦᔪᕐᓁᑦᑐᖅ ᐱᑦᔪᑎᒋᓗᒍ ᐱᓇᓱᐊᕐᕕᒋᓂᐊᕐᐸᑦᓯ, ᓄᓇᓂ ᐅᐸᒃᑕᑦᓯᓐᓂ ᐃᓅᖃᑎᒌᒡᔪᐊᓄᑦ ᓇᕐᕈᓇᕐᓯᑎᓚᐅᕋᑦᓯᐅᒃ. 23 ᐊᑎᕐᒪᓗ ᐃᑦᔪᕐᓁᑦᑐᕐᔪᐊᖑᓂᖓ ᖃᐅᔨᔭᐅᑎᓐᓂᐊᕐᐸᕋ, ᐃᓅᖃᑎᒌᒡᔪᐊᑦ ᐊᑯᕐᖓᓐᓂ ᓇᕐᕈᓇᕐᓯᑎᑕᐅᓚᐅᕐᑐᖅ, ᑖᒃᑯᓄᖓᓗ ᓇᕐᕈᓇᕐᓯᑎᓚᐅᕐᑕᑦᓯ; ᑕᕝᕙ ᐃᓅᖃᑎᒋᒡᔪᐊᑦ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ, ᐊᑕᓂᖅ ᒎᑎ ᐅᖃᕐᐳᖅ, ᐊᑐᕐᓂᐊᕐᐸᑦᓯ ᐃᑦᔪᕐᓁᑦᑑᓂᓐᓂᒃ ᖃᐅᔨᔭᐅᑎᓕᕈᒪ ᐃᓅᖃᑎᒌᒡᔪᐊᑦ ᑕᒃᑯᐊᓂ. 24 ᐃᓅᖃᑎᒌᒡᔪᐊᓂᑦ ᐂᔪᒫᕐᐸᑦᓯ, ᑲᑎᕐᓱᕈᒫᕐᐸᑦᓯᓗ ᓄᓇᓕᒡᔪᐊᓕᒫᓂᑦ, ᓇᖕᒥᓂᕐᓗ ᓄᓇᑦᓯᓐᓄᑦ ᐅᑎᕐᑎᑦᓱᒫᕐᐸᑦᓯ. 25 ᐃᒥᕐᒧᑦ ᓴᓗᒪᔪᒧᑦ ᓯᕐᐸᕐᓴᕈᒫᕐᐸᑦᓯ, ᓴᓗᒻᒪᕈᒫᕐᐳᓯᓗ ᓴᓗᒤᓐᓂᓕᒫᑦᓯᓐᓂᑦ, ᒎᑎᓐᖑᐊᓕᒫᑦᓯᓐᓂᓪᓗ ᓴᓗᒻᒪᕐᓴᕈᒫᕐᐸᑦᓯ. 26 ᐆᒻᒪᒻᒥᒃ ᓄᑖᒥᒃ ᑐᓂᓯᕕᒋᔪᒫᕐᐸᑦᓯ, ᐊᓂᕐᓂᕐᒥᒡᓗ ᓄᑖᒥᒃ ᐃᓗᒻᒥᕐᑎᑦᓱᒫᕐᐸᑦᓯ; ᑎᒥᑦᓯᓐᓂᑦ ᐆᒻᒪᑎᓯ ᐅᔭᕋᒃ ᐲᕈᒫᕐᐸᕋ ᐆᒻᒪᑎᑖᕐᑎᓪᓗᓯᓗ ᓈᓚᒍᓐᓇᕐᑐᒥᒃ. 27 ᐊᓂᕐᓂᕋᓗ ᐃᓗᑦᓯᓐᓄᐊᕈᒫᕐᐸᕋ, ᐃᓅᓯᕆᔭᐅᖁᔭᓐᓂᒃ ᐃᓅᔪᓐᓇᕐᓯᖁᓪᓗᓯ ᐊᑐᕐᑕᐅᖁᔭᒃᑲᓗ ᒪᓕᑦᓯᐊᕈᓐᓇᕐᓯᓗᓯᐅᒃ. 28 ᓄᓇᖃᓕᕈᒫᕐᐳᓯ ᓯᕗᓕᑦᓯᓐᓄᑦ ᓄᓇᑖᕆᔭᐅᑎᓚᐅᕐᓯᒪᔭᓐᓂᒃ; ᐃᓄᖁᑎᒋᓂᐊᕐᐸᑦᓯ, ᒎᑎᒋᓂᐊᕐᐸᑦᓯᓐᖓᓗ. 29 ᓴᓗᒤᑦᑑᓂᕆᓚᐅᕐᑕᓕᒫᑦᓯᓐᓂᑦ ᕿᓚᕈᑦᔮᕈᒫᕐᐸᑦᓯ; ᓂᐊᖂᔭᒃᓮᓪᓗ ᐱᕈᕐᑎᑦᓯᐊᕈᒫᕐᐸᒃᑲ ᐊᒥᒐᕐᓯᖏᑦᓯᐊᖁᓪᓗᓯ ᑳᖕᓇᕐᑐᒦᖁᓇᓯᓗ. 30 ᓇᐹᕐᑐᐃᑦ ᐱᕈᕐᕕᐅᑎᑦᓱᒫᕐᐸᒃᑲ ᐱᕈᕐᓰᕖᓪᓗ ᐱᕈᕐᕕᐅᑎᑦᓯᐊᕐᓗᒋᑦ ᐊᒥᒐᕐᓯᖏᑦᓯᐊᖁᓪᓗᓯ, ᐃᓅᖃᑎᒌᒡᔪᐊᓄᑦ ᑲᓐᖑᓱᒃᑎᑕᐅᓂᕐᒥᒃ ᐊᑐᒃᑲᓐᓂᖁᓇᓯ ᑳᖕᓇᕐᑐᒦᓐᓂᑦᓯᓐᓄᑦ. 31 ᑕᕝᕙ ᐃᖅᑬᔪᒫᕐᐳᓯ ᐱᐅᖏᑦᑐᒥᒃ ᐃᓅᓯᖃᓚᐅᕐᓂᑦᓯᓐᓂᒃ, ᐱᓂᐊᕐᓂᕆᓚᐅᕐᑕᓯᓗ ᐱᐅᖏᓐᓂᖏᓐᓂᒃ; ᐃᓕᑦᓯᓐᓂᒡᓗ ᓇᖕᒥᓂᖅ ᐱᐅᒋᔪᓐᓃᖁᓪᓗᓯ ᐊᔪᕐᑐᓕᓯᒪᓂᑦᓯᓐᓂᒃ, ᓇᕐᕈᓇᕐᑐᓂᒡᓗ ᐊᑐᕐᓯᒪᓂᑦᓯᓐᓂᒃ. 32 ᐃᓕᑦᓯᓕ ᐱᑦᔪᑎᒋᓗᓯ ᑍᒤᓕᐅᕐᓂᐊᓐᖏᓚᖓ, ᐊᑕᓂᖅ ᒎᑎ ᐅᖃᕐᐳᖅ; ᑕᒪᓐᓇ ᖃᐅᔨᑦᓯᐊᕐᓯᐅᒃ. ᑲᓐᖑᓲᑎᒋᓗᒋᑦ ᐅᒡᒍᐊᕈᑎᒋᓗᒋᓪᓗ ᐱᓂᐊᕐᓂᕆᓯᒪᔭᓯ ᐱᖁᓪᓗᓯ, ᐃᓴᕆᐊᓕᓄᑦ ᑭᖑᕚᖑᔪᓯ. 33 “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᓪᓗᖅ ᓇᓪᓕᐅᑎᒃᐸᑦ ᓴᓗᒻᒤᕕᒋᔪᒫᕐᑕᕋ ᐱᐅᖏᑦᑐᓕᓂᓕᒫᑦᓯᓐᓂᑦ, ᐃᒡᓗᒐᓴᒡᔪᐊᑦ ᐃᓄᖃᓕᕐᑎᑦᓱᒫᕆᕙᒃᑲ, ᓱᓇᐅᔪᓐᓃᕐᓯᒪᔪᓪᓗ ᐋᖅᑭᒃᓱᕐᓕᕐᒥᓗᒋᑦ. 34 ᐱᕈᕐᓰᕕᖁᑎᑦᓯᒍᑦ ᐊᖅᑯᓵᕐᑐᑦ ᑕᑯᕙᓚᐅᕐᐳᑦ ᑲᒪᒋᔭᐅᓯᒪᖏᓐᓂᕐᒧᑦ ᓱᓇᖃᕈᓐᓃᕐᑐᓂᒃ, ᓄᓇ ᓱᓇᖃᕐᐸᓚᐅᕈᓐᓃᕐᑐᖅ ᐱᕈᕐᓰᕕᐅᓕᕈᒫᕐᐳᖅ. 35 ᐃᓄᐃᓪᓗ ᐅᖃᕈᒫᕐᐳᑦ, ‘ᒪᓐᓇ ᓄᓇ ᓱᓇᖃᓚᐅᖏᑦᑐᖅ ᐄᑕᓂᐅᑉ ᐱᕈᕐᓰᕕᖓᑐᑦ ᑍᒤᓕᕐᐳᖅ; ᐃᒡᓗᒐᓴᒡᔪᐊᕕᓃᓪᓗ ᐃᓄᖃᓚᐅᖏᑦᑐᑦ ᓱᓇᑕᖃᓚᐅᕈᓐᓃᕐᑐᓪᓗ ᒫᓐᓇ ᐃᓄᖃᓕᕆᕗᖅ ᐊᕙᓗᕐᔪᐊᖃᓕᕐᓗᓂᓗ.’ 36 ᐃᓅᖃᑎᒌᒡᔪᐊᑦ ᐊᒥᐊᒃᑰᔪᑦ ᓄᓇᑦᓯ ᐊᕙᑖᓃᑦᑐᑦ ᖃᐅᔨᓕᖁᓪᓗᒋᑦ ᐅᕙᖓ, ᐊᑕᓂᖅ, ᐃᒡᓗᒐᓴᒡᔪᐊᕕᓂᕐᓂᒃ ᐋᖅᑭᒃᓱᐃᒃᑲᓐᓂᕐᓯᒪᓂᓐᓂᒃ, ᐱᕈᕐᓰᕕᕕᓂᕐᓂᒡᓗ ᓱᓇᖃᓚᐅᕈᓐᓃᕐᑐᓂᒃ ᐱᕈᕐᕕᐅᓕᕐᑎᑦᓯᒃᑲᓐᓂᕋᒪ; ᐅᕙᖓ, ᐊᑕᓂ, ᐅᖃᕐᓯᒪᒐᒪ, ᑕᒪᓐᓇᓗ ᐱᓇᓱᐊᕐᓂᐊᕐᐸᕋ. 37 “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᑦ ᐃᑲᔪᕐᑕᐅᔪᒪᓗᑎᒃ ᐅᕙᓐᓄᑦ ᐅᖃᕈᓐᓇᕐᑎᑦᓱᒫᕆᕙᒃᑲ: ᐅᓄᕐᓯᕙᓪᓕᐊᑎᓪᓗᒋᓪᓗ ᓰᐲᑎᑐᑦ. 38 ᓰᐱᑎᑐᑦ ᑐᓂᕐᕈᑎᒃᓴᑎᑐᑦ ᑲᑎᕐᓱᕐᑕᐅᓯᒪᔪᑎᑐᑦ, ᓲᕐᓗ ᓰᐱᑎᑐᑦ ᑲᑎᕐᓱᕐᑕᐅᓯᒪᔪᑎᑐᑦ ᔨᕉᓴᓕᒥ ᓇᓪᓕᐅᓐᓂᕐᓯᐅᕐᕕᖕᒥ ᓇᓪᓕᐅᓐᓂᕐᓯᐅᕐᑎᓪᓗᒋᑦ, ᑍᒫᒃᑕᐅᖅ ᐃᒡᓗᒐᓴᒡᔪᐊᕕᓃᑦ ᐃᓄᖕᓂᒃ ᑕᑕᓕᕈᒫᕐᐳᑦ ᓰᐱᑎᑐᑦ ᑲᑎᕐᓱᕐᑕᐅᓯᒪᔪᑎᑐᑦ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society