ᐃᓯᑭᐊᓕᐅᑉ ᐊᒡᓚᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐰᕐᓯᔨᖏᑦ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᑦ ᐰᕐᓯᔨᖏᑦ ᓵᓪᓗᒋᑦ ᐱᔪᒫᕐᑐᓂᒃ ᓇᓗᓁᕐᓯᕕᒋᓗᒋᑦ, ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᒥᐅᓄᑦ ᐰᕐᓯᔨᐅᔪᓯ ᐃᓕᑦᓯᓐᓂᑐᐊᖅ ᓂᕆᑎᑉᐳᓯ! ᐰᕐᓯᔩᑦ ᓰᐱᖁᑎᒥᖕᓂᒃ ᓂᕆᑎᑦᓯᔭᕆᐊᖃᓐᖏᓛᑦ?

³ ᑐᓐᓄᖏᑦ ᓂᕆᕙᓯ, ᒥᖅᑯᕕᓂᖏᓐᓂᒡᓗ ᐊᓐᓄᕌᖃᕐᓗᓯ, ᖁᐃᒃᓯᑦᓯᐊᖑᓯᒪᔪᓂᒡᓗ ᑐᖁᑦᓯᕙᒃᓗᓯ; ᓰᐱᓂᒡᓕ ᓂᕆᑎᑦᓯᖃᑦᑕᓐᖏᓚᓯ.

⁴ ᓴᓐᖐᑦᑐᑦ ᓄᑭᒃᑖᑎᓐᖏᓚᓯ, ᖃᓂᒪᔪᓪᓗ ᐋᖅᑭᖕᓇᒋᑦ, ᑭᓕᕐᓯᒪᔪᑦ ᒪᑦᑐᓯᕐᐸᓐᖏᓚᓯ, ᐊᕝᕗᑎᔪᑦ ᐅᑎᕐᑎᑉᐸᓐᖏᓚᓯ, ᐊᓯᐅᔪᑦ ᕿᓂᕐᐸᖕᓇᒋᑦ; ᐃᓱᒪᓯᐅᕐᓇᒋᓪᓗ ᐊᐅᓚᑉᐸᒃᐸᓯ ᐃᓴᒋᖏᑦᓯᐊᕐᓗᒋᑦ.

⁵ ᑍᒤᒻᒪᑦ ᓯᐊᒻᒪᕐᓯᒪᓕᕐᐳᑦ, ᐰᕐᓯᔨᖃᖏᓐᓇᒥᒃ; ᐆᒪᔪᓕᒫᓄᓪᓗ ᓄᔪᐊᕐᑐᓄᑦ ᓂᕿᒋᔭᐅᓕᕐᓗᑎᒃ.

⁶ ᓰᐱᖁᑎᒃᑲ ᓯᐊᒻᒪᕐᓯᒪᓕᕐᐳᑦ, ᖃᖅᑲᓂᓗ ᐱᖑᕐᓂᓗ ᐳᕐᑐᔪᓂ ᐃᓂᖃᓕᕐᓗᑎᒃ; ᓰᐱᖁᑎᒃᑲᓗ ᓄᓇᕐᔪᐊᓕᒫᒧᑦ ᓯᐊᒻᒪᕐᓯᒪᓕᕐᐳᑦ, ᕿᓂᕐᑕᐅᖏᓐᓇᒥᒃ ᕿᓂᕆᐊᕐᑕᐅᓯᒪᓇᑎᒡᓗ.

⁷ ᑍᒤᒻᒪᑦ, ᐰᕐᓯᔨᐅᔪᓯ, ᑐᓴᕆᑦᓯ ᐊᑕᓂᐅᑉ ᐅᖃᐅᓯᖓᓂᒃ:

⁸ ᐃᓅᒐᒪ, ᐊᑕᓂᖅ ᒎᑎ ᐅᖃᕐᐳᖅ, ᓰᐱᖁᑎᒃᑲ ᑐᖁᑕᐅᖃᑦᑕᓕᕐᐳᑦ, ᐆᒪᔪᓄᓪᓗ ᐃᕐᓯᓇᕐᑐᓄᑦ ᖃᓄᐃᑦᑐᑐᐃᓐᓇᓄᑦ ᓂᕿᒋᔭᐅᖃᑦᑕᓕᕐᐳᑦ, ᐰᕐᓯᔨᖃᖏᓐᓇᒥᒃ; ᐰᕐᓯᔨᖁᑎᒃᑲ ᕿᓂᕆᐊᓚᐅᕐᓯᒪᖏᒻᒪᑕ ᓰᐱᖁᑎᓐᓂᒃ, ᐰᕐᓯᔩᑦ ᐃᒥᖕᓃᓐᓇᖅ ᓂᕆᑎᑐᐃᓐᓇᖃᑦᑕᕐᒪᑕ, ᓰᐱᖁᑎᒃᑲᓗ ᓂᕆᑎᓚᐅᕐᓯᒪᓇᒋᑦ;

⁹ ᑍᒤᒻᒪᑦ, ᐰᕐᓯᔨᐅᔪᓯ ᐊᑕᓂᐅᑉ ᐅᖃᐅᓯᖓᓂᒃ ᑐᓴᕆᑦᓯ:

¹⁰ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᑕᑯᒋᑦ, ᐰᕐᓯᔩᑦ ᓵᓐᖓᓕᕐᐸᒃᑲ; ᓰᐱᖁᑎᒃᑲ ᑎᒍᓂᐊᓕᕐᐸᒃᑲ ᑖᒃᑯᓇᓐᖓᑦ, ᓂᕆᑎᑦᓯᔨᐅᔪᓐᓃᕐᑎᓪᓗᒋᓪᓗ ᓰᐱᖁᑎᓐᓂᒃ; ᐰᕐᓯᔩᑦ ᐃᒻᒥᓃᓐᓇᖅ ᓂᕆᑎᖃᑦᑕᕐᓂᐊᕈᓐᓃᕐᐳᑦ. ᓰᐱᖁᑎᒃᑲ ᓴᐳᑎᓂᐊᓕᕐᐸᒃᑲ ᖃᓂᖏᓐᓂᑦ, ᓂᕿᒋᔭᐅᑦᔮᔪᓐᓃᕐᓗᑎᒡᓗ ᑖᒃᑯᓄᖓ.”

ᐰᕐᓯᔨᑦᓯᐊᕙᒃ

¹¹ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᑕᑯᒋᑦ, ᐅᕙᖓ ᓇᖕᒥᓂᖅ ᓰᐱᖁᑎᒃᑲ ᕿᓂᕐᓂᐊᓕᕐᐸᒃᑲ, ᕿᓂᕆᐊᕐᓂᐊᓕᕐᓗᒋᓪᓗ.

¹² ᐰᕐᓯᔩᑦ ᕿᓂᑦᓯᐊᓲᖑᖕᒪᑕ ᓰᐱᖁᑎᖏᑕ ᐃᓚᖏᓐᓂᒃ ᓇᒧᑐᐃᓐᓇᖅ ᓯᐊᒻᒪᕐᑐᖃᕐᑎᓪᓗᒍ, ᑍᒫᒃᑕᐅᖅ ᓰᐱᖁᑎᒃᑲ ᕿᓂᕐᓂᐊᓕᕐᐸᒃᑲ; ᓴᐳᑎᔪᒫᕐᐸᒃᑲ ᓇᓂᓕᒫᖅ ᓯᐊᒻᒪᕐᓯᒪᕕᒋᓚᐅᕐᑕᖏᓐᓂᑦ ᐅᓪᓗᖅ ᓄᕗᔭᑎᓪᓗᒍ ᑖᕐᑑᑎᓪᓗᒍᓗ.

¹³ ᐂᔪᒫᕐᐸᒃᑲ ᐃᓄᖕᓂᑦ, ᑲᑎᕐᓱᕐᓗᒋᓪᓗ ᓄᓇᓕᒡᔪᐊᓂᑦ, ᓄᓇᖏᓐᓄᐊᕐᑎᓪᓗᒋᓪᓗ; ᓂᕆᑎᑦᓱᒫᕐᐸᒃᑲᓗ ᐃᓴᕆᐊᓕᐅᑉ ᖃᖅᑲᖏᓐᓂ, ᓄᓇᐅᓪᓗ ᐃᓗᐊᓂᑦ ᑰᒃᑐᒥᑦ ᐃᒥᕐᑎᓪᓗᒋᑦ, ᐃᓄᖃᕐᑐᓕᒫᓂ ᓄᓇᓕᖕᓂ.

¹⁴ ᓂᕿᒃᓴᖃᑦᓯᐊᕐᑐᒥ ᓂᕆᑎᑦᓱᒫᕐᐸᒃᑲ, ᐃᓴᕆᐊᓕᐅᓪᓗ ᓄᓇᑦᓯᐊᕆᖕᓂᖏᓐᓂ ᖃᖅᑲᓂ ᓂᕿᒃᓴᖃᑦᓯᐊᕐᑐᒦᑦᓱᒫᕐᐳᑦ; ᐃᕕᒃᓱᒐᖃᑦᓯᐊᕐᑐᒥᓗ ᓄᓇᑦᓯᐊᕆᒃᑐᒥ ᐃᓂᓪᓚᖓᔪᒫᕐᐳᑦ, ᓂᕿᒃᓴᖃᑦᓯᐊᕐᑐᒥᓗ ᐃᓴᕆᐊᓕᐅᑉ ᖃᖅᑲᖏᓐᓂ ᓂᕆᔪᒫᕐᐳᑦ.

¹⁵ ᓇᖕᒥᓂᖅ ᐰᕐᓯᔨᐅᔪᒫᕐᐳᖓ ᓰᐱᖁᑎᓐᓄᑦ, ᐃᓂᓪᓚᑦᓯᐊᖁᓪᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ.

¹⁶ ᐊᓯᐅᓯᒪᔪᑦ ᕿᓂᕈᒫᕐᐸᒃᑲ, ᐊᕝᕗᑎᓯᒪᔪᓪᓗ ᐅᑎᕐᑎᓪᓗᒋᑦ, ᑭᓕᕐᓯᒪᔪᓪᓗ ᒪᑐᓯᕐᑐᕐᓗᒋᑦ, ᓴᓐᖐᑦᑐᓪᓗ ᓄᑭᒃᑖᕐᑎᓪᓗᒋᑦ, ᖁᐃᓂᔪᓪᓕ ᓄᑭᖃᑦᓯᐊᕐᑐᓪᓗ ᑐᖁᑦᓱᒫᕐᐸᒃᑲ; ᓈᒻᒪᓈᕐᓯᒪᔪᒥᒃ ᐱᓇᓱᐊᕐᕕᒋᓗᒋᑦ.

¹⁷ ᐃᓕᑦᓯᓕ ᓰᐱᖁᑎᒃᑲ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᖅᑲᕐᑐᕈᒫᕐᐸᒃᑲ ᓰᐲᑦ ᐊᑐᓂᑦ, ᓰᐲᓪᓗ ᐊᖑᓴᓪᓗᖏᑦ ᒎᑦᓰᓪᓗ ᐊᖑᓴᓪᓗᖏᑦ.

¹⁸ ᓂᕿᒃᓴᖃᑦᓯᐊᕐᑐᒥᒡᓕ ᓂᕆᓇᓱᒃᓗᓯ ᓈᒻᒪᒃᓯᕙᓐᖏᓚᓯ? ᓂᕿᒃᓴᓯᓗ ᐃᓚᖏᑦ ᑐᓪᓕᕋᕐᐸᒃᓗᒋᑦ; ᑲᑭᐊᒃᑐᒥᒡᓗ ᐃᒥᓚᐅᕐᓗᓯ, ᐃᒥᕇᕋᑦᓯ ᑐᓪᓕᕋᕐᓗᒍ ᐃᓱᕐᓯᑎᑉᐸᒃᐸᓯ.

¹⁹ ᓰᐱᖁᑎᒪᓗ ᓂᕿᒃᓮᑦ ᑐᓪᓕᕋᕐᓂᑯᓯ ᓂᕆᕕᒋᓕᖃᑦᑕᕐᐰᑦ, ᑐᓪᓕᕋᕐᓗᒍᓗ ᐃᓱᕐᓯᑎᑕᑦᓯᓐᓂᒃ ᐃᒥᓕᕐᐸᒃᓗᑎᒃ.

²⁰ ᑍᒤᒻᒪᑦ, ᑖᒃᑯᓄᖓ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐅᕙᖓ ᓇᖕᒥᓂᖅ ᐊᕕᑎᑦᓯᓂᐊᕐᐳᖓ ᓰᐱᓂᒃ ᖁᐃᓂᔪᓂᒃ ᓴᓗᒃᑐᓂᒡᓗ.

²¹ ᐊᔭᐅᕆᕙᒃᑲᑦᓯ ᐱᖑᔭᕐᓗᓯᓗ, ᓴᓐᖐᑦᑐᓕᒫᓪᓗ ᓇᒡᔪᖕᒥᒑᕆᓪᓗᒋᑦ ᐊᕙᓚᒃᑎᑉᐸᒃᐸᓯ, ᓰᐱᒃᑯᕕᖕᒥᑦ ᐊᓂᑎᑦᓯᖏᓐᓂᓕᒫᑦᓯᓐᓂ.

²² ᓰᐱᖁᑎᒃᑲ ᓴᐳᑎᓂᐊᓕᕐᐸᒃᑲ, ᓂᕿᒃᓴᐅᑐᐃᓐᓇᖁᔪᓐᓁᕋᒃᑭᑦ; ᓰᐲᓪᓗ ᐊᑐᓂᑦ ᑐᑭᑖᕈᑎᒋᓂᐊᓕᕐᐸᒃᑲ.

²³ ᐊᑕᐅᓯᕐᒥᒃ ᐰᕐᓯᔨᑖᕐᑎᑦᓱᒫᕐᐸᒃᑲ, ᐱᔨᓐᓂᒃ ᑍᕕᑎᒥᒃ, ᑖᑦᓱᒪᓗ ᓂᕆᑎᑦᓱᒫᕐᐰᑦ; ᑲᒪᒋᔪᒫᕐᐰᑦ ᑖᒃᑯᓇᓐᖓᓪᓗ ᐰᕐᓯᔨᒋᔭᐅᔪᒫᕐᐳᖅ.

²⁴ ᐅᕙᖓᓗ ᐊᑕᓂᖅ, ᑖᒃᑯᓄᖓ ᒎᑎᒋᔭᐅᓂᐊᕐᐳᖓ, ᐱᔨᒐᓗ ᑍᕕᑎ ᑖᒃᑯᓄᖓ ᐊᖓᔪᖅᑳᖑᔪᒫᕐᐳᖅ; ᐅᕙᖓ ᐊᑕᓂᖅ, ᑍᒫᒃ ᐅᖃᕐᐳᖓ.

²⁵ ᐊᖏᖃᑎᒌᒍᑎᓕᐅᕈᒫᕐᐳᖓ ᐸᒡᕕᓴᒃᑕᐅᓇᖏᑦᑐᒥᒃ ᐃᓅᓯᖃᕈᑎᒋᓛᕐᑕᖓᓐᓂᒃ, ᐆᒪᔪᓪᓗ ᐃᕐᓯᓇᕐᑐᑦ ᓄᓇᒥᑦ ᐲᔭᕈᒫᕐᐸᒃᑲ, ᓰᐱᖁᑎᒃᑲ ᐃᓱᒫᓗᒋᔭᖃᖏᓪᓗᑎᒃ ᐃᓄᖃᖏᑦᑐᒦᖃᑦᑕᓛᕐᒪᑕ ᓯᓂᖃᑦᑕᕐᓗᑎᒡᓗ ᓇᐹᕐᑐᓕᖕᓂ.

²⁶ ᓮᒻᒪᕐᑎᓪᓗᒋᓪᓗ ᓄᓇᖃᕐᑎᑦᓱᒫᕐᐸᒃᑲ ᖃᖅᑲᖁᑎᒪ ᐃᑦᔪᕐᓁᑦᑑᑉ ᐊᕙᑖᓂ; ᓮᒻᒪᕐᑎᑦᓯᓂᓐᓄᑦ ᓯᓚᓗᒃᑕᐅᑎᖃᑦᑕᕈᒫᕐᐸᒃᑲ ᓇᓪᓕᐅᓐᓂᖅ ᓈᒻᒪᒃᓯᔭᕌᖓᑦ; ᑕᒪᓐᓇ ᓯᓚᓗᒡᕕᐅᓂᖅ ᓮᒻᒪᕐᑎᑕᐅᓂᐅᔪᒫᕐᐳᖅ.

²⁷ ᓇᐹᕐᑐᑦ ᐱᕈᕐᓰᕕᖕᒦᑦᑐᑦ ᐱᕈᕐᑐᖃᕈᒫᕐᐳᑦ, ᓄᓇᓗ ᐱᕈᕐᕕᐅᒋᐊᓪᓚᒍᒫᕐᐳᖅ, ᐃᓱᒫᓗᖏᑦᓯᐊᕐᓗᑎᒃ ᓄᓇᒥᖕᓃᑦᓱᒫᕐᐳᑦ; ᑖᒃᑯᐊᓗ ᖃᐅᔨᔪᒫᕐᐳᑦ ᐅᕙᖓᐅᒐᒪ ᐊᑕᓂᖅ, ᐃᓄᖁᑎᒪ ᓇᖕᒪᐅᑕᖏᑕ ᐊᕐᓵᕐᑑᔭᖏᑦ ᓱᕋᒃᑯᒃᑭᑦ, ᐱᐅᓕᓗᒋᓪᓗ ᑖᒃᑯᓂᖓ ᓯᐊᓛᖃᕐᑐᓂᑦ.

²⁸ ᐃᓅᖃᑎᒌᒡᔪᐊᓄᑦ ᓂᑭᒃᓴᐅᕙᒍᓐᓁᕈᒫᕐᐳᑦ, ᐆᒪᔪᓄᓪᓗ ᓄᔪᐊᕐᑐᓄᑦ ᓂᕆᔭᐅᕙᒍᓐᓃᕐᓗᑎᒃ; ᓄᓇᖃᕈᒫᕐᐳᑦ ᖃᓄᐃᑕᐅᓐᓇᖏᑦᑐᒥ, ᓇᓪᓕᐊᓐᓄᓪᓘᓐᓃᑦ ᑲᑉᐱᐊᓱᒃᑎᑕᐅᕙᒍᓐᓁᕐᓗᑎᒃ.

²⁹ ᐱᕈᕐᓰᕕᖁᑎᑖᕐᑎᑦᓱᒫᕐᐸᒃᑲ ᐱᕈᕐᕕᐅᑦᓯᐊᕐᓇᕐᑐᓂᒃ ᓄᓇᖓᓐᓂ ᑳᒃᑐᖃᖃᑦᑕᕈᓐᓃᖁᓪᓗᒍ, ᐃᓅᖃᑎᒌᒡᔪᐊᓄᓪᓗ ᐊᒃᓱᕈᕐᑎᑕᐅᕙᒍᓐᓃᕈᒪᕐᐳᑦ ᒥᑕᐅᑎᒋᔭᐅᓗᑎᒃ.

³⁰ ᑖᒃᑯᐊᓗ ᖃᐅᔨᓕᕈᒫᕐᐳᑦ, ᐅᕙᖓ ᐊᑕᓂᖅ ᑖᒃᑯᐊ ᒎᑎᖓᑦᑕ ᐃᓚᒋᖕᒪᒋᑦ, ᐃᓴᕆᐊᓕᒥᐅᑦ, ᐃᓄᖁᑎᒋᒐᒃᑭᑦ, ᐊᑕᓂᖅ ᒎᑎ ᐅᖃᕐᐳᖅ.

³¹ ᓰᐱᖁᑎᒋᕙᑦᓯᓗ, ᓂᕆᑎᖃᑦᑕᕐᐸᑦᓯ, ᒎᑎᒋᕙᑦᓯᓐᖓᓗ, ᐊᑕᓂᖅ ᒎᑎ ᐅᖃᕐᐳᖅ.”