ᐃᓯᑭᐊᓕᐅᑉ ᐊᒡᓚᖏᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᑦᔨᐅᑎᑕᐅᓂᖓ ᑐᕌᒍᓂᒧᑦ

¹ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᐃᑦ 12ᖏᓕᕐᑕᖓᓐᓂ, ᑕᖅᑮᑦ 12ᖓᓐᓂ, ᐅᓪᓗᖏᑕ ᓯᕗᓪᓕᕐᐹᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐰᕉ ᐅᒡᒍᐊᕈᑎᒥᒃ, ᐅᖃᐅᑎᒍᒃ: ᓛᔭᑎᑑᕋᓱᒋᓯᒪᕗᑎᑦ ᐃᓅᖃᑎᒌᒡᔪᐊᓄᑦ, ᑐᕌᒍᓂᑐᓪᓕ ᑍᒤᑉᐳᑎᑦ; ᑰᖕᒥ ᓯᕐᐹᕿᔭᕐᑎᑦᓯᕗᑎᑦ, ᐃᑎᒐᖕᓄᑦ ᐃᒪᖅ ᐃᓱᕐᓯᑎᓪᓗᒍ, ᑰᒃ ᓴᓗᒤᓕᑎᑉᐸᑦ.

³ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓄᓗᐊᓂᒃ ᐃᒋᑦᓯᕕᒋᔪᒫᕐᐸᒋᑦ ᐃᓄᒐᓴᒡᔪᐊᑦ ᑕᑯᓐᓇᕐᑎᓪᓗᒋᑦ; ᓄᓗᐊᕐᓯᒪᑎᓪᓗᑎᓪᓗ ᓄᓇᒧᑦ ᖃᑭᑦᓱᒫᕐᐸᒋᑦ.

⁴ ᓄᓇᒧᑦ ᐃᐱᕅᓐᓇᕈᒫᕐᐸᒋᑦ, ᒪᓂᖅᑲᒧᑦ ᕿᒤᓐᓇᕐᓗᑎᑦ, ᑎᖕᒥᐊᓕᒫᓄᑦ ᐃᓂᒋᔭᐅᓕᕈᒫᕐᐳᑎᑦ, ᐆᒪᔪᓄᓪᓗ ᓄᓇᕐᔪᐊᕐᒦᑦᑐᓄᑦ ᓂᕿᒋᔭᐅᓕᕈᒫᕐᐳᑎᑦ.

⁵ ᑎᒦᑦ ᖃᖅᑲᓄᑦ ᓯᐊᒻᒪᕐᑕᐅᑎᑦᓱᒫᕐᐸᕋ, ᓇᕐᓮᓪᓗ ᓈᔭᐅᑎᓪᓗᒋᑦ ᓂᕿᕕᓂᕐᓄᑦ.

⁶ ᐊᐅᑦ ᓄᓇᒧᑦ ᑯᕕᔪᒫᕐᐸᕋ ᖃᖅᑲᓄᓪᓗ ᐊᒡᓛᑦ; ᑰᓪᓗ ᐊᐅᖏᓐᓇᐅᓕᕈᒫᕐᐳᑦ ᐃᓕᖕᓂᑦ.

⁷ ᐃᓕᖕᓂᒃ ᐊᓯᕈᐃᓕᕈᒪ, ᕿᓚᒃ ᑕᓕᑎᑦᓱᒫᕐᐸᕋ, ᐅᓪᓗᕆᐊᓪᓗ ᑖᕐᓯᓗᑎᒃ; ᓯᕿᓂᖅ ᓄᕗᔭᓄᑦ ᑕᓕᑎᑦᓱᒫᕐᐸᕋ, ᑕᖅᑭᕐᓗ ᖃᐅᒪᔪᓐᓁᕐᓗᓂ.

⁸ ᕿᓚᖕᒥ ᖃᐅᒪᔪᓕᒫᑦ ᐃᓕᖕᓄᑦ ᑖᕐᓯᔪᒫᕐᐳᑦ, ᓄᓇᒋᔧᓪᓗ ᑖᕐᓯᑎᑦᓱᒫᕐᐸᕋ, ᐊᑕᓂᖅ ᒎᑎ ᐅᖃᕐᐳᖅ.

⁹ “ᐃᓅᖃᑎᒌᒡᔪᐊᑦ ᐅᓄᕐᑐᑦ ᐃᓱᒫᓗᓕᕐᑎᑦᓱᒫᕐᐸᒃᑲ, ᐃᓅᖃᑎᒌᒡᔪᐊᓂᑦ ᐊᐅᓪᓚᐅᑎᓕᕈᒃᑭᑦ, ᓄᓇᓕᒡᔪᐊᓄᑦ ᖃᐅᔨᒪᓚᐅᕐᓯᒪᓐᖏᑕᕐᓄᑦ.

¹⁰ ᐃᓅᖃᑎᒌᒡᔪᐊᓄᑦ ᑲᒪᓂᐊᕈᑕᐅᔪᒫᕐᐳᑎᑦ, ᐊᖓᔪᖅᑳᕐᔪᐊᖏᑦ ᑲᑉᐱᐊᓱᖕᓂᕐᒧᑦ ᓴᔪᒍᒫᕐᐳᑦ ᐱᑦᔪᑎᒋᓗᑎᑦ, ᓴᕕᒡᔪᐊᕋ ᓴᓂᒧᑦ ᓱᓗᕋᕐᑕᕐᑎᓕᕈᒃᑯ ᑖᒃᑯᐊ ᓯᕗᕌᓐᓂ; ᓴᔪᓕᕈᒫᕐᐳᑦ, ᐊᑐᓂᑦ ᑐᖁᑕᐅᓂᐊᕋᓱᒋᓗᑎᒃ, ᑐᖁᕕᒃᓮᑦ ᐅᓪᓗᖅ ᓇᓪᓕᐅᑎᒃᐸᑦ.

¹¹ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᓴᕕᒡᔪᐊᖓᓄᑦ ᑎᑭᑕᐅᔪᒫᕐᐳᑎᑦ.

¹² ᐊᔪᖏᑦᑐᕐᔪᐊᑦ ᓴᕕᒡᔪᐊᖏᓐᓄᑦ ᐃᓄᒋᐊᒃᑐᕐᔪᐊᖁᑎᑦᑎᑦ ᑐᖁᕋᕐᑕᐅᑎᑦᓱᒫᕐᐸᒃᑲ, ᐃᓅᖃᑎᒌᒡᔪᐊᓂᑦ ᓂᑲᒋᔭᖃᖏᓐᓂᕐᐹᓄᑦ. ᐄᑦᔨᑉᑎᒥᐅᑦ ᐅᐱᓐᓇᐅᑎᖏᓐᓂᒃ ᓵᓚᖃᕈᒫᕐᐳᑦ, ᐃᓄᒐᓴᒡᔪᐊᓪᓗ ᓄᖑᑕᐅᔪᒫᕐᐳᑦ ᑐᖁᑕᐅᓗᑎᒃ.

¹³ ᐆᒪᔪᖁᑎᓕᒫᓯ ᐃᒥᕐᕕᒋᕙᒃᑕᖏᑕ ᖃᓂᒋᔮᓂ ᑐᖁᕋᕈᒫᕐᐸᒃᑲ; ᐃᓄᖕᓄᑦ ᐆᒪᔪᓄᓪᓗ ᑐᓪᓕᕋᕐᑕᐅᓗᓂ ᐃᒪᖅ ᐃᓱᕐᓯᑎᑕᐅᕙᒍᓐᓃᕈᒫᕐᐳᖅ.

¹⁴ ᑕᕝᕙ ᐃᒪᖏᑦ ᑲᑭᐊᒃᓯᔪᒫᕐᐳᑦ, ᑰᖁᑎᖏᓪᓗ ᐅᕐᓱᑎᑐᑦ ᑰᓕᕈᒫᕐᐳᑦ, ᐊᑕᓂᖅ ᒎᑎ ᐅᖃᕐᐳᖅ.

¹⁵ ᐄᑦᔨᑉᑎᒥᐅᑦ ᓄᓇᖓᑦ ᓱᓁᕈᑎᑎᒃᑯᒃᑯ ᑕᕝᕙᓃᑦᑐᓕᒫᓪᓗ ᓄᖑᓪᓗᑎᒃ ᑐᖁᑕᐅᓯᒪᓕᕐᐸᑕ, ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.

¹⁶ ᑕᒪᓐᓇ ᐅᒡᒍᐊᕈᑎᐅᓗᓂ ᐃᓐᖏᕈᓯᐅᓕᕈᒫᕐᐳᖅ; ᐃᓅᖃᑎᒌᒡᔪᐊᑦ ᐊᕐᓇᖏᑕ ᐃᓐᖏᕈᓯᕆᓕᕈᒫᕐᐹᑦ ᐅᒍᐊᕐᓗᑎᒃ ᐄᑦᔨᑉᑎᒥᒃ, ᐃᓄᒐᓴᓕᒫᖏᓐᓂᒡᓗ, ᐃᓐᖏᐅᑎᖃᕐᓗᑎᒃ, ᐊᑕᓂᖅ ᒎᑎ ᐅᖃᕐᐳᖅ.”

ᑐᖁᖓᔪᑦ ᐃᓂᖓᑦ

¹⁷ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᐃᑦ 12ᒋᓕᕐᑕᖓᓐᓂ, ᑕᖅᑮᑦ ᓯᕗᓪᓕᕐᐹᖓᑕ, ᐅᓪᓗᖏᑕ 15ᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ, ᐅᖃᕐᓗᓂ:

¹⁸ “ᐃᓅᑉ ᐃᕐᓂᖓ, ᐄᑦᔨᑉᑎᒥᐅᑦ ᐃᓄᒐᓴᒡᔪᐊᖏᑦ ᕿᐊᑦᔪᑎᒋᒃᑭᑦ, ᑐᖁᖓᔪᓪᓗ ᐃᓂᖓᓄᑦ ᐂᑎᓪᓗᒋᑦ, ᐃᓅᖃᑎᒌᒡᔪᐊᓄᑦ ᐱᔪᓐᓇᕐᑐᕐᔪᐊᖑᓚᐅᕐᑐᓄᑦ, ᓄᓇᕐᔪᐊᑉ ᐊᑖᓃᓕᕐᑐᓄᑦ, ᑐᖁᖓᔪᑦ ᐃᓂᖓᓂ:

¹⁹ ᐅᖃᐅᑎᓗᒋᓪᓗ, ‘ᑕᑯᒥᓇᕐᓂᕐᓴᐅᓇᓱᒋᕕᓰ ᐊᓯᑦᓯᓐᓂᑦ? ᑐᖁᖓᔪᑦ ᐃᓂᖓᓄᐊᓕᕆᑦᓯ ᐃᓕᔭᐅᖃᑎᖃᕐᓗᓯ ᑭᐱᓯᒪᖏᑦᑐᓂᒃ.’

²⁰ “ᑐᖁᖃᑕᐅᔪᒫᕐᐳᑦ ᐅᓇᑕᕐᑐᓂ ᓴᕕᒡᔪᐊᕐᒧᑦ ᑐᖁᑕᐅᔪᓄᑦ, ᐃᓄᒋᐊᒃᑐᕐᔪᐊᓪᓗ ᐃᓚᒋᓗᒋᑦ ᑐᖁᑕᐅᔪᒫᕐᐳᑦ.

²¹ ᐱᓯᑎᐅᓂᕐᐹᖑᓚᐅᕐᑐᓂᒃ ᐅᖃᐅᓯᐅᔪᒫᕐᐳᑦ, ᑕᐱᕆᓚᐅᕐᑕᑎᒃ ᐃᓚᒋᓗᒋᑦ, ᑐᖁᖓᔪᑦ ᐃᓂᖓᓂᑦ: ‘ᐊᖅᑲᓚᐅᕐᐳᑦ, ᓇᓪᓚᖓᓕᕐᓗᑎᒃ, ᑭᐱᓯᒪᖏᑦᑐᑦ ᐃᓚᒋᓗᒋᑦ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ.’

²² “ᐊᓯᕆᐊᒥᐅᑦᑕᐅᖅ ᑕᒫᓃᒃᑭᕗᑦ, ᐃᓚᓕᒫᖏᓪᓗ, ᐃᓗᕕᕐᑕᐅᖃᑕᐅᓯᒪᕗᑦ, ᑐᖁᑕᐅᓯᒪᔪᓕᒫᑦ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ;

²³ ᐃᓗᕕᕐᓯᒪᕗᑦ ᑐᖁᖓᔪᑦ ᓇᔪᕐᑕᖏᑦᑕ ᐃᑎᓂᕐᐹᖓᓐᓂ, ᐃᓚᓕᒫᖏᓪᓗ ᑕᒫᓂ ᐃᓗᕕᖃᖃᑕᐅᕗᑦ; ᑐᖁᑕᐅᓯᒪᔪᓕᒫᑦ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ, ᑲᑉᐱᐊᓱᒃᑎᑦᓯᖃᑦᑕᓚᐅᕐᑐᑦ ᓄᓇᕐᔪᐊᕐᒥ ᐃᓅᑎᓪᓗᒋᑦ.

²⁴ “ᐃᓛᒥᐅᑦᑕᐅᖅ ᑕᕝᕙᓃᒃᑭᕗᑦ ᐃᓚᓕᒫᕕᓂᖏᓪᓗ ᐊᕙᑖᓂ ᐃᓗᕕᕐᓯᒪᒋᕗᑦ; ᑐᖁᑕᐅᓯᒪᔪᓕᒫᑦ ᓴᕕᒡᔪᐊᒧᑦ ᑐᖁᑕᐅᓯᒪᔪᑦ, ᑭᐱᓯᒪᖏᑦᑐᓄᑦ ᐃᓚᒋᔭᐅᓕᕐᐳᑦ ᓄᓇᐅᑉ ᐊᑖᓂ, ᐃᓅᓪᓗᑎᒃ ᑲᑉᐱᐊᓱᒃᑎᑦᓯᕙᓚᐅᕐᑐᑦ ᐃᓅᖃᑎᒥᖕᓂᒃ, ᑲᓐᖑᓲᑎᒃᓴᒥᖕᓂᒃ ᓇᔪᕐᑎᖃᕐᓗᑎᒃ ᑐᖁᖓᔪᓄᑦ ᐃᓚᒋᔭᐅᕗᑦ.

²⁵ ᐃᓛᒥᒥᐅᑦ ᑐᖁᖓᔪᓃᖃᑕᐅᕗᑦ ᐅᓇᑕᕐᑐᓂ ᑐᖁᑕᕕᓂᕐᓂ ᐃᓚᓕᒫᕕᓂᓂ ᐃᓚᒋᓪᓗᒋᑦ, ᐊᕙᑖᓂ ᐃᓗᕕᕐᓯᒪᖃᑕᐅᕗᑦ ᑖᒃᑯᓄᖓ ᑭᐱᓯᒪᖏᑦᑐᓄᑦ ᐃᓚᒋᔭᐅᓪᓗᑎᒃ, ᐅᓇᑕᕐᑐᓂ ᑐᖁᑕᐅᔪᕕᓃ; ᐃᓅᓪᓗᑎᒃ ᑲᑉᐱᐊᓱᒃᑎᑦᓯᖃᑦᑕᓚᐅᕐᑐᑦ ᐃᓅᖃᑎᒥᖕᓂᒃ, ᑲᓐᖑᓲᑎᒃᓴᒥᖕᓂᒃ ᓇᔪᕐᑎᖃᕐᓗᑎᒃ ᑐᖁᓯᒪᔪᓄᑦ ᐃᓚᒋᔭᐅᕗᑦ; ᐃᓂᖃᕐᓗᑎᒃ ᑐᖁᑕᐅᓯᒪᔪᑦ ᐊᑯᕐᖓᓐᓂ.

²⁶ “ᒪᓯᑭᒃᑯᑦ ᑐᐸᐅᓪᒥᐅᓪᓗ ᑕᕝᕙᓃᒃᑭᕗᑦ, ᐅᓇᑕᕐᑎᖁᑎᕕᓂᖏᑦ ᐃᓗᕕᕐᑕᐅᓯᒪᒋᕗᑦ ᓇᓂᓕᒫᖅ, ᑭᐱᓯᒪᖏᑦᑐᓄᑦ ᐃᓚᒋᔭᐅᓪᓗᑎᒃ, ᓴᕕᒡᔪᐊᒧᑦ ᑐᖁᑕᐅᓯᒪᔪᓄᑦ; ᐃᓅᓪᓗᑎᒃ ᑲᑉᐱᐊᓱᒃᑎᑦᓯᖃᑦᑕᕐᓯᒪᔪᑦ ᐃᓅᖃᑎᒥᖕᓂᒃ.

²⁷ ᐅᐱᒋᔭᐅᓪᓗᑎᒃ ᐃᓗᕕᕐᑕᐅᓂᑰᓐᖏᓚᑦ ᓯᕗᓕᑦᑕ ᐊᔪᖏᑦᑐᕐᔪᐊᖁᑎᒋᓚᐅᕐᑕᖏᑕ ᐃᓗᕕᕐᑕᐅᓯᒪᓂᖏᑎᑐᑦ, ᑖᒃᑯᐊ ᐅᓇᑕᐅᑎᖏᑦ ᐃᓗᕕᕐᑕᐅᖃᑕᐅᓯᒪᕗᑦ, ᓴᕕᒡᔪᐊᕕᓂᖏᓪᓗ ᓂᐊᖁᖏᑕ ᐊᑖᓃᓪᓗᑎᒃ, ᓴᐴᓗᑕᖏᓪᓗ ᓴᐅᓂᖏᑕ ᖄᖓᓃᓪᓗᑎᒃ; ᐊᔪᖏᑦᑐᕐᔪᐊᖑᓚᐅᕋᒥᒃ ᓯᕘᕋᒋᔭᐅᖃᑦᑕᓚᐅᕐᑐᑦ ᐃᓅᔪᓄᑦ.

²⁸ “ᑍᒫᒃᑕᐅᖅ ᐃᓕᑦᓯ ᑐᖁᕋᕐᑕᐅᔪᒫᕐᐳᓯ ᑭᐱᓯᒪᖏᑦᑐᓄᓪᓗ ᐃᓗᕕᕐᑕᐅᓯᒪᖃᑕᐅᓗᓯ, ᓴᕕᒡᔪᐊᒧᑦ ᑐᖁᑕᐅᓚᐅᕐᑐᕕᓂᕐᓄᑦ ᐃᓚᒋᔭᐅᓗᓯ.

²⁹ ᐄᑐᒥᐅᑦ ᑕᕝᕙᓃᖃᑕᐅᒋᕗᑦ, ᐊᖓᔪᖅᑳᕐᔪᐊᕕᓂᖏᑦ ᐊᖓᔪᖄᖁᑎᖏᓪᓗ ᐃᓚᒋᓪᓗᒋᑦ, ᑖᒃᑯᐊ ᐊᔪᖏᑦᑐᕐᔪᐊᖑᓚᐅᕐᑐᑦ ᓴᕕᒡᔪᐊᒧᑦ ᑐᖁᑕᐅᔪᕕᓂᕐᓄᑦ ᐃᓗᕕᕐᑕᐅᓯᒪᖃᑕᐅᓕᕐᐳᑦ; ᑭᐱᓯᒪᖏᑦᑐᓄᑦ ᐃᓚᒋᔭᐅᓪᓗᑎᒃ, ᑐᖁᓯᒪᔪᑦ ᐃᓂᖓᓃᖃᑕᐅᓕᕐᐳᑦ.

³⁰ “ᐅᓐᓄᐊᑉ ᓇᓛᓂᒥᐅᑦ ᐊᖓᔪᖅᑳᕕᓂᓕᒫᖏᑦ ᑕᕝᕙᓃᒃᑭᕗᑦ ᐊᑕᖏᕐᓗᑎᒃ, ᓮᑐᓂᒥᐅᓕᒫᓪᓗ ᑲᓐᖑᓲᑎᒃᓴᖃᕐᓗᑎᒃ ᑐᖁᑕᐅᓚᐅᕐᑐᕕᓂᕐᓄᑦ ᐃᓚᒋᔭᐅᕗᑦ, ᐱᔪᓐᓇᕐᓂᓕᒫᒥᖕᓄᑦ ᑲᑉᐱᐊᓱᒃᑎᑦᓯᖃᑦᑕᐅᓚᐅᕐᑐᑦ; ᑭᐱᓯᒪᖏᑦᑐᓄᑦ ᐃᓚᒋᔭᐅᕗᑦ ᓴᕕᒡᔪᐊᓄᑦ ᑐᖁᑕᐅᓯᒪᔪᓄᑦ, ᑲᓐᖑᓲᑎᒃᓴᒥᖕᓂᒃ ᓇᒃᓴᕐᓗᑎᒃ ᑐᖁᓯᒪᔪᑦ ᐃᓂᖓᓃᖃᑕᐅᓕᕐᐳᑦ.

³¹ “ᐰᕉᑉ ᑖᒃᑯᐊ ᑕᑯᒍᓂᒋᑦ, ᖁᕕᐊᓱᖕᓂᕐᓴᐅᓕᕈᒫᕐᐳᖅ ᐃᓄᒐᓴᒡᔪᐊᖁᑎᓂ ᐃᓚᒋᓗᒋᑦ, ᐰᕉᓗ ᐅᓇᑕᕐᑐᒃᓴᖁᑎᓕᒫᖏᓪᓗ, ᓴᕕᒡᔪᐊᒧᑦ ᑐᖁᑕᐅᓯᒪᔪᓄᑦ ᐃᓚᒋᔭᐅᓗᑎᒃ, ᐊᑕᓂᖅ ᒎᑎ ᐅᖃᕐᐳᖅ.

³² “ᑲᑉᐱᐊᓱᒃᑎᑦᓯᖃᑦᑕᓚᐅᕐᒪᑦ ᐃᓅᔪᓂᒃ; ᑍᒤᒻᒪᑦ ᑭᐱᓯᒪᖏᑦᑐᑦ ᐃᓚᒋᓗᒋᑦ ᑐᖁᖓᔪᑦ ᐃᓂᖓᓃᖃᑎᒋᔪᒫᕐᐰᑦ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ ᐃᓚᒋᓗᒋᑦ, ᐰᕉ ᐃᓄᒋᐊᒃᑐᕐᔪᐊᖁᑎᓕᒫᖏᓪᓗ, ᐊᑕᓂᖅ ᒎᑎ ᐅᖃᕐᐳᖅ.”