ᐃᓯᑭᐊᓕᐅᑉ ᐊᒡᓚᖏᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥᐅᑦ ᐊᑦᔨᐅᑎᑕᐅᓂᖓᑦ ᓇᐹᕐᑐᒧᑦ ᓰᑕᒧᑦ

¹ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᐃᑦ 11ᒋᓕᕐᑕᖓᓐᓂ, ᑕᖅᑮᑦ ᐱᖓᔪᖓᓐᓂ, ᐅᓪᓗᖏᑕ ᓯᕗᓪᓕᕐᐹᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐰᕉ ᐅᖃᐅᑎᒍᒃ ᐃᓄᒋᐊᒃᑐᕐᔪᐊᖁᑎᖏᓪᓗ: ᐊᔪᖏᑦᑐᐊᓘᓃᑦ ᓱᓇᒧᑦ ᐊᑦᔨᐅᔪᓐᓇᕐᐹ?

³ ᑕᑯᒋᑦ, ᓕᐸᓇᓂᒥ ᓇᐹᕐᑐᒥᒃ ᓰᑕᕆᒥᒃ ᐊᑦᔨᖃᕐᐳᑎᑦ, ᐊᕙᓚᖓᔪᖃᐅᑦᓯᐊᕐᑐᒥᒃ ᐅᖃᐅᔭᖃᕐᑐᒥᒡᓗ ᓯᐊᒻᒪᖓᑦᓯᐊᕐᑐᓂᒃ, ᑕᑭᔫᓂᕐᒥᓄᑦ ᓄᕗᔭᓄᑦ ᑎᑭᐅᓯᒪᔪᒥᒃ.

⁴ ᐃᒪᖃᑦᓯᐊᕐᑐᒦᓐᓇᒥ, ᐱᕈᑦᓯᐊᕐᓯᒪᕗᖅ ᑕᑭᔫᓕᕐᓗᓂ, ᑰᒃᑎᑦᓯᓪᓗᓂ ᓄᓇᐅᑉ ᐃᓗᐊᒍᑦ ᐱᕈᕐᕕᖏᑎᒍᑦ, ᐃᒪᖃᕐᑎᑦᓯᓪᓗᓂ ᓇᐹᕐᑐᓕᒫᓂᒃ ᑲᑎᓐᖓᔪᓂ.

⁵ ᓇᐹᕐᑑᖃᑎᒥᓂᑦ ᑕᑭᓂᕐᐹᖑᓕᕐᐳᖅ ᓇᐹᕐᑐᒐᓮᑦ ᐊᑯᕐᖓᓐᓂ; ᐊᕙᓚᖓᔪᖏᑦ ᐱᕈᕐᑐᖃᑦᓯᐊᕐᐳᑦ ᑕᑭᔫᓪᓗᑎᒡᓗ, ᐃᒪᕐᑐᑦᓯᐊᕋᒥ ᐊᒫᖏᑎᒍᑦ.

⁶ ᑎᖕᒥᐊᓄᑦ ᖃᓄᐃᑦᑐᑐᐃᓐᓇᕐᓄᑦ ᐊᕙᓚᖓᔪᖏᑕ ᐱᕈᕐᑐᖏᑦ ᐃᕙᕕᐅᕗᑦ; ᐊᕙᓚᖓᔪᖏᑕᓗ ᐊᑖᓂ ᐆᒪᔪᑦ ᓄᔪᐊᕐᑐᑦ ᕿᑐᕐᖏᐅᕐᐳᑦ; ᐃᓅᖃᑎᒌᒡᔪᐊᓕᒫᓪᓗ ᑕᕐᕋᓕᓂᖓᓂ ᐃᓂᖃᕐᓗᑎᒃ.

⁷ ᓇᐹᕐᑑᑉ ᐊᖏᔪᕐᔪᐊᖑᓂᖓ ᑕᑯᒥᓇᕐᐳᖅ, ᐊᕙᓚᖓᔪᖏᑦ ᑕᑭᔫᑕᐅᕗᑦ; ᐊᒫᖏᓪᓗ ᓄᓇᒧᑦ ᒪᖑᒃᓯᒪᑦᓯᐊᕋᒥᒃ ᐃᒪᖃᑦᓯᐊᕈᓐᓇᕐᐳᖅ.

⁸ ᓇᐹᕐᑐᐃᑦ ᓰᑕᕇᑦ ᐊᑭᒪᔪᓐᓇᓐᖏᓚᑦ ᒎᑎᐅᑉ ᐱᕈᕐᓰᕕᖁᑎᖓᓃᑦᑐᑦ, ᐊᕙᓚᖓᔪᖏᑕᓗ ᐅᖃᐅᔭᖃᕐᓂᖏᑦ ᐊᑦᔨᖃᕐᒥᓇᑎᒃ; ᓇᐹᕐᑐᑐᐃᓐᓁᑦ ᐊᕙᓚᖓᔪᖏᑦ ᓇᓪᓕᕐᓲᑎᔪᓐᓇᓐᖏᓚᑦ; ᑖᓐᓇ ᓇᐹᕐᑐᖅ ᑕᑯᒥᓇᕐᑐᖅ ᐊᑦᔨᖃᓐᖏᓚᖅ ᒎᑎᐅᑉ ᐱᕈᕐᓰᕕᖁᑎᖓᓂ.

⁹ ᑕᑯᒥᓇᕐᑑᑎᓚᐅᕐᐸᕋ ᓯᐊᒻᒪᖓᑦᓯᐊᕐᑐᓂᒃ ᐊᕙᓚᖓᔪᖃᕐᑎᓪᓗᒍ, ᓇᐹᕐᑐᓕᒫᓄᑦ ᐄᑕᓂᒥ ᒎᑎᐅᑉ ᐱᕈᕐᓰᕕᖁᑎᖓᓂ ᑐᓱᒋᔭᐅᕗᖅ.

¹⁰ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓇᐹᕐᑐᖅ ᑕᑭᔫᓕᕋᒥ ᓄᕗᔭᓄᓪᓗ ᑎᑭᐅᒪᔪᓐᓇᓕᕐᓗᓂ, ᐆᒻᒪᑎᖓ ᐱᐅᔪᕆᓕᕐᐳᖅ ᑕᑭᓂᕐᒥᓄᑦ.

¹¹ ᑍᒤᒻᒪᑦ ᐃᓅᖃᑎᒌᒡᔪᐊᑦ ᐊᔪᖏᓐᓂᕐᐹᖓᓐᓄᑦ ᑐᓂᓂᐊᓕᕐᐸᕋ; ᑖᑦᓱᒪ ᖁᓚᕐᓇᖏᑦᑐᒥᒃ ᐱᓂᐊᕐᕕᒋᔪᒫᕐᐹ ᐱᐅᖏᑦᑐᓕᓂᖓᓄᑦ ᐱᓇᓱᐊᕐᕕᐅᔭᕆᐊᖃᕐᓂᖓ ᒪᓕᒡᓗᒍ. ᖁᔭᓈᕐᓯᒪᓕᕋᒃᑯ.

¹² ᓄᓇᖃᑎᒋᔭᐅᖏᑦᑐᓄᑦ ᐃᓅᖃᑎᒌᒡᔪᐊᓄᑦ ᓂᑲᒋᔭᖃᖏᑦᑐᓄᑦ ᓇᑲᑕᐅᓗᓂ ᕿᒪᒃᑕᐅᔪᒫᕐᐳᖅ. ᐅᕐᕈᒍᓂ ᐊᕙᓚᖓᔪᖏᑦ ᐅᓕᒃᓯᔪᒫᕐᐳᑦ ᖃᖅᑲᓂᒃ ᓇᕐᓴᓂᒡᓗ, ᐊᕙᓚᖓᔪᖏᑕᓗ ᓇᑲᑎᕐᓂᑯᖏᑦ ᓄᓇᐅᑉ ᐃᒥᖏᓐᓄᐊᖅᑲᕈᒫᕐᐳᑦ; ᐃᓅᖃᑎᒌᒡᔪᐊᓪᓗ ᓄᓇᕐᔪᐊᕐᒥᐅᑦ ᑖᑦᓱᒪ ᑕᕐᕋᓕᓂᖓᓃᑦᑐᑦ ᕿᒤᔪᒫᕐᐳᑦ.

¹³ ᐅᕐᕈᓯᒪᓕᕐᐸᓪᓗ ᑎᖕᒥᐊᓕᒫᓄᑦ ᐃᓂᒋᔭᐅᓕᕈᒫᕐᐳᖅ, ᐊᕙᓚᖓᔪᖏᓪᓗ ᐆᒪᔪᓕᒫᓄᑦ ᓇᑎᕐᓇᒦᑦᑐᓄᑦ ᐃᓂᒋᔭᐅᓕᕐᓗᑎᒃ.

¹⁴ ᑕᒪᑐᒪ ᑭᖑᓂᖓᒍᑦ ᓇᐹᕐᑐᖃᕐᓂᐊᕈᓐᓁᕐᐳᖅ ᑍᒫᒃ ᑕᑭᑎᒋᔪᒥᒃ ᓄᕗᔭᓄᑦ ᑎᑭᐅᑎᔪᓐᓇᕐᑐᒥᒃ, ᐃᒪᖃᑦᓯᐊᕐᑐᒥ ᐱᕈᕋᓗᐊᕈᑎᒃ ᑍᒫᒃ ᑕᑭᑎᒋᔪᖃᓚᐅᕐᓯᒪᑦᔮᔪᓐᓃᕐᐳᖅ; ᑐᖁᔪᒃᓮᓐᓇᐅᓕᕐᒪᑕ, ᓄᓇᕐᔪᐊᕐᒥᐅᑦ ᐃᓄᖏᑎᑐᑦ, ᑐᖁᖓᔪᑦ ᐃᓂᖓᓄᐊᕐᐸᒃᑐᑎᑐᑦ.

¹⁵ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑐᖁᖓᔪᑦ ᐃᓂᖓᓄᐊᕐᓯᒪᓕᕐᐸᑦ ᐊᖏᔪᒥᒃ ᕿᒃᓵᒍᑕᐅᑎᑦᓱᒫᕐᐸᕋ, ᑰᖏᓪᓗ ᑰᒍᓐᓁᕈᒫᕐᐳᑦ, ᑰᒐᓛᓪᓗ ᑰᒍᓐᓃᕐᓗᑎᒃ; ᓕᐸᓇᓂ ᕿᒃᓵᒍᑎᖃᕐᑎᑦᓱᒫᕐᐸᕋ ᑖᑦᓱᒥᖓ, ᓇᐹᕐᑐᓕᒫᓪᓗ ᓇᑎᕐᓇᒦᑦᑐᑦ ᑖᑦᓱᒧᖓ ᑐᖁᓕᑎᑕᐅᔪᒫᕐᐳᑦ.

¹⁶ ᐅᕐᕈᑎᒃᑯᒃᑯ ᐅᕐᕈᕙᓗᖓᓄᑦ ᐃᓅᖃᑎᒌᒡᔪᐊᑦ ᐊᐅᓚᑦᔭᒃᑕᐅᔪᒫᕐᐳᑦ, ᑐᖁᖓᔪᑦ ᐃᓂᖓᓄᑦ ᐃᒋᒃᑯᒃᑯ; ᐄᑕᓂᒥᓗ ᓇᐹᕐᑐᓕᒫᑦ, ᓂᕈᐊᕆᔭᐅᕙᒃᑐᑦ ᐱᐅᓂᕐᐹᓪᓗ ᓕᐸᓇᓂᒥ, ᐃᒥᕐᒥᒃ ᐃᒥᖃᑦᑕᕐᑐᓕᒫᑦ, ᖁᕕᐊᓲᑎᖃᕈᒫᕐᐳᑦ ᓄᓇᐅᑉ ᐊᑖᓃᑦᑐᑦ.

¹⁷ ᒪᓕᒍᒫᕐᐹᓪᓗ ᑐᖁᓯᒪᔪᑦ ᐃᓂᖓᓄᐊᖃᑎᒋᓗᒍ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ; ᐃᓛᒃ, ᑕᕐᕋᓕᓂᖓᓂ ᐃᓂᖃᖃᑦᑕᓚᐅᕐᑐᓕᒫᑦ ᐃᓅᖃᑎᒌᒡᔪᐊᑦ ᑐᖁᖃᑕᐅᔪᒫᕐᐳᑦ.

¹⁸ ᓂᕐᑐᕐᓇᕐᑑᓚᐅᕐᐲᑦ ᐊᔪᓐᖏᑎᒋᓪᓗᑎᓪᓗ ᐄᑕᓂᐅᑉ ᓇᐹᕐᑐᖏᑎᑐᑦ? ᐄᑕᓂᐅᓪᓕ ᓇᐹᕐᑐᖏᓐᓄᑦ ᓇᑲᑕᐅᖃᑕᐅᓂᐊᕐᐳᑎᑦ ᑐᖁᖓᔪᑦ ᐃᓂᖓᓄᐊᖃᑕᐅᓗᑎᑦ ᓄᓇᐅᑉ ᐊᑖᓄᑦ; ᑭᐱᓯᒪᖏᑦᑐᑦ ᐃᓚᒋᓗᒋᑦ, ᓴᕕᒡᔪᐊᒧᑦ ᑐᖁᑕᐅᓯᒪᔪᑦ ᐃᓚᒋᓗᒋᑦ. ᑖᓐᓇᐅᕗᖅ ᑕᕝᕙ ᐰᕉᖅ ᐃᓄᒐᓴᒡᔪᐊᖁᑎᖏᓪᓗ, ᐊᑕᓂᖅ ᒎᑎ ᐅᖃᕐᐳᖅ.”