ᐃᓯᑭᐊᓕᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᒎᑎ ᐅᕙᓐᓄᑦ ᐅᖃᕐᐳᖅ, “ᐃᓅᑉ ᐃᕐᓂᖓ, ᓂᕆᒋᑦ ᐃᓕᖕᓄᑦ ᑐᓂᔭᐅᔪᓂᒃ; ᐊᒡᓔᑦ ᑖᒃᑯᐊ ᐃᒧᓯᒪᔪᑦ ᓂᕆᒃᑭᑦ, ᐂᓕᕆᑦ, ᐃᓴᕆᐊᓕᐅᑉ ᑭᖑᕚᖏᑦ ᐅᖃᓪᓚᒡᕕᒋᔭᕐᑐᕐᓗᒋᑦ.”

² ᐂᑦᑕᕋᒪ, ᐊᒡᓚᖕᓂᒃ ᐃᒧᓯᒪᔪᓂᒃ ᓂᕆᑎᑉᐹᖓ.

³ ᐅᖃᕐᓗᓂᓗ, “ᐃᓅᑉ ᐃᕐᓂᖓ ᐊᒡᓔᑦ ᐃᓕᖕᓄᐊᕐᑕᒃᑲ ᓂᕆᒃᑭᑦ ᐊᕿᐊᑦᑐᕈᑎᒋᓗᒋᑦ.” ᓂᕆᒐᒃᑭᑦ ᐃᒍᑦᑕᐅᑉ ᓰᕐᓇᐅᑎᖓᑐᑦ ᒪᒪᕐᑎᒋᕗᑦ.

⁴ ᐅᖃᐅᑎᒋᕚᖓᓗ, “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᓄᐊᕐᓗᑎᑦ ᐅᖃᐅᓯᒃᑲ ᑖᒃᑯᓄᖓ ᐅᖃᐅᓯᕆᒃᑭᑦ.

⁵ ᐅᖃᐅᓯᖃᖃᑎᒋᓐᖏᑕᕐᓄᑦ ᑎᓕᖏᓐᓇᒃᑭᑦ ᓇᓗᓇᕐᑐᒥᒡᓘᓐᓃᑦ ᐅᖃᐅᓯᓕᖕᓄᑦ, ᐃᓴᕆᐊᓕᐅᓪᓕ ᑭᖑᕚᖏᓐᓄᑦ.

⁶ ᑎᓕᒐᔭᕈᒃᑭᑦ ᐅᖃᐅᓯᖃᑎᒋᓐᖏᑕᕐᓄᑦ ᓇᓗᓇᕐᑐᓂᒡᓘᓐᓃᑦ ᐅᖃᐅᓯᓕᖕᓄᑦ, ᐅᖃᐅᓯᖏᑦ ᑐᑭᓯᔪᓐᓇᖏᒃᑲᓗᐊᕈᕕᒋᑦ, ᑎᓕᒍᒃᑭᓪᓕ ᑖᒃᑯᓄᖓ, ᑖᒃᑯᐊ ᓈᓚᒃᑲᔭᕐᐳᑦ ᐅᖃᐅᓯᕆᔭᕐᓂᒃ.

⁷ ᐃᓴᕆᐊᓕᐅᓪᓕ ᑭᖑᕚᖏᑦ ᐃᓕᖕᓂᒃ ᓈᓚᖕᓂᐊᓐᖏᓚᑦ; ᐅᕙᓐᓂᒃ ᓈᓚᒍᒪᖏᒻᒪᑕ; ᐃᓴᕆᐊᓕᐅᑦ ᑭᖑᕚᖏᑦ ᐱᔭᕐᓂᖏᑦᑑᕗᑦ ᓯᑎᔪᒥᒡᓗ ᐆᒻᒪᑎᖃᕐᓗᑎᒃ.

⁸ ᑕᑯᒋᑦ, ᑍᒫᑦᓮᓐᓇᕐᑕᐅᖅ ᓯᑎᔫᑎᓐᓂᐊᕆᕙᒋᑦ, ᑍᒃᑯᑎᑐᓇᕐᓗ ᐱᔭᕐᓂᖏᑦᑑᑎᓪᓗᑎᑦ.

⁹ ᓴᖑᑎᑕᒃᓴᐅᑎᓐᓂᐊᓐᖏᓚᒋᑦ ᐅᔭᕋᒃᑎᑐᑦ ᓯᑎᔪᑎᑐᑦ ᐊᐅᒫᒡᒋᓲᑎᑐᑦ ᓯᑎᑎᒋᑎᓪᓗᑎᑦ; ᑍᒤᒻᒪᑦ ᓯᕘᕋᒋᓂᐊᕐᓇᒋᑦ, ᑕᐅᑦᑐᖏᓐᓄᓪᓗ ᓴᐱᓕᕐᑎᑕᐅᑦᑍᓕᒋᑦ, ᑖᒃᑯᐊ ᐊᑭᕋᕐᑐᕐᑎᐅᖕᒪᑕ.”

¹⁰ ᓱᓕ ᐅᖃᐅᑎᒃᑲᓐᓂᕐᐹᖓ, “ᐃᓅᑉ ᐃᕐᓂᖓ, ᐅᖃᐅᓰᑦ ᐃᓕᖕᓄᑦ ᐅᖃᐅᓯᕆᔭᓕᒫᒃᑲ ᐆᒻᒪᑎᖕᓄᐊᒃᑭᑦ, ᑐᓴᕐᓗᒋᓪᓗ ᓯᐅᑎᖕᓄᑦ.

¹¹ ᐂᓕᕆᑦ, ᐃᓅᖃᑎᖕᓄᑦ ᐊᐅᓪᓚᕈᑦᔭᐅᓯᒪᔪᓄᑦ, ᐅᖃᐅᑎᓗᒋᓪᓗ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ’; ᓈᓚᖕᓂᐊᕐᐸᑕ ᓈᓚᖏᒃᑲᓗᐊᕐᐸᑕᓘᓐᓃᑦ ᑲᔪᓯᓂᐊᕐᐳᑎᑦ.”

¹² ᑕᕝᕙ ᐊᓂᕐᓂᐅᑉ ᖃᖓᑦᑕᕐᑎᑉᐹᖓ, ᐊᑕᓂᐅᑉ ᓂᕐᑐᕐᓇᕐᓂᖓᑕ ᐃᓂᒥᓂᑦ ᖁᒻᒧᒃᑎᑕᐅᓂᖓᑐᑦ, ᓂᐱᕐᔪᐊᒥᒡᓗ ᑐᓴᕐᐳᖓ ᑐᓄᓐᓂᑦ ᑲᓪᓕᐅᑉ ᓂᐱᕐᔪᐊᖓᑐᑦ ᑍᒤᑦᑐᒥᒃ;

¹³ ᑐᓴᕆᕗᖓᓗ ᐆᒪᔪᐊᓗᐃᑦ ᐃᓴᕈᖏᑕ ᐃᒻᒥᖕᓄᑦ ᐊᒃᑐᕐᑕᕐᕙᓗᖏᓐᓂᒃ, ᓴᓂᐊᓃᑦᑐᓪᓗ ᐊᒃᓴᓗᐊᑦ ᑐᓴᕐᓴᐅᓂᖏᓐᓂᒃ, ᑖᒃᑯᐊᓗ ᑲᓪᓕᐅᑉ ᐃᒃᑑᓕᔮᕐᓂᖓᑐᑦ ᑐᓴᕐᓴᐅᕗᑦ.

¹⁴ ᐊᓂᕐᓂᐅᓪᓗ ᖃᖓᑦᑕᕐᑎᓪᓗᓂᖓ ᐊᐅᓪᓚᕈᑎᕚᖓ, ᑕᕝᕙ ᖁᕕᐊᓇᖏᑦᑐᕐᔪᐊᕐᒧᑦ ᓂᓐᖓᐅᒪᓇᕐᑐᒧᑦ ᐊᓂᕐᓂᒃᑯᑦ ᑎᑭᑕᐅᕗᖓ, ᐊᑕᓂᐅᓪᓕ ᐊᒡᒐᖏᑕ ᓲᖑᔪᕐᔪᐊᓄᑦ ᑎᒍᒥᐊᕐᐹᖓ;

¹⁵ ᐊᐅᓪᓚᕈᑦᔭᐅᓯᒪᔪᓪᓗ ᓇᔪᕐᑕᖓᓐᓄᐊᕐᐳᖓ ᑎᐅᓪ-ᐋᐱᑉᒧᑦ, ᑰᑉ ᓰᐸᕆᐅᑉ ᓴᓂᐊᓃᑦᑐᓄᑦ. ᐅᓪᓗᓂᒃ 7ᓂᒃ ᑕᕝᕙᓂ ᐃᒃᓯᕙᓚᐅᕐᐳᖓ ᑲᒪᓂᐊᒻᒪᕆᒃᓗᖓ.

ᐃᓯᑭᐊᓕᐅᑉ ᖃᐅᔨᓴᕐᑎᓐᖑᕐᑎᑕᐅᓂᖓ

¹⁶ ᐅᓪᓗᐃᑦ 7 ᐊᓂᒍᕐᑎᓪᓗᒋᑦ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

¹⁷ “ᐃᓅᑉ ᐃᕐᓂᖓ, ᖃᐅᔨᓴᕐᑎᓐᖑᕐᑎᑉᐸᒋᑦ ᐃᓴᕆᐊᓕᐅᑉ ᑭᖑᕚᖏᓐᓄᑦ; ᑍᒤᒻᒪᑦ ᐅᖃᐅᓯᒃᑲ ᑐᓴᕈᕕᒋᑦ ᖃᓂᓐᓂᑦ ᐊᓂᔪᑦ, ᐃᓂᕐᑎᒃᑭᑦ ᐅᕙᓐᓂᑦ ᐱᔪᓂᒃ.

¹⁸ ᐱᐅᖏᑦᑐᓕᔪᒧᑦ ᐅᖃᕈᒪ, ‘ᑐᖁᓂᐊᓕᕐᐳᑎᑦ,’ ᐃᓂᕐᑎᖏᒃᑯᕕᐅᒃ ᐱᐅᖏᑦᑐᓕᓂᕐᒥᓂᑦ ᖃᕿᐊᓕᖁᓗᒍ, ᐃᓅᖁᓪᓗᒍᓗ, ᐊᔪᕐᑐᓕᓂᕐᒥᓂᑦ ᖃᕿᐊᓕᓚᐅᕋᓂ ᑐᖁᑐᐃᓐᓇᕐᐸᑦ; ᑐᖁᓂᖓᓄᑦ ᐸᓯᔭᒃᓴᐅᑎᒃᑲᔭᕐᐸᒋᑦ.

¹⁹ ᐊᔪᕐᑐᓕᔪᕐᓕ ᐃᓂᕐᑎᕈᕕᐅᒃ, ᑐᓴᕈᒪᖏᓐᓂᕐᒥᓄᑦ ᐊᔪᕐᑐᓕᓂᕐᒥᓂᒃ ᖃᕿᐊᓕᖏᓪᓗᓂ ᑐᖁᒃᐸᑦ; ᐸᓯᔭᒃᓴᐅᒐᔭᓐᖏᓚᑎᑦ.

²⁰ “ᓇᓛᒎᕐᑐᕐᓕ ᐊᑲᐅᔪᒥᒃ ᕿᒤᓗᓂ ᐊᔪᕐᑐᓕᒃᐸᑦ, ᐹᓪᓚᒍᑎᒃᓴᒧᑦ ᑎᑭᑎᒃᑯᒃᑯ, ᑐᖁᒃᐸᑦ ᐊᔪᕐᑐᓕᓂᕐᒦᓪᓗᓂ, ᐃᓂᕐᑎᓚᐅᖏᒃᑯᕕᐅᒃ, ᐱᐅᔪᑦ ᐱᓂᐊᓚᐅᕐᑕᖏᑦ ᐃᖅᑲᐅᒪᔭᐅᓂᐊᓐᖏᓚᑦ; ᑐᖁᓂᖓᓄᑦ ᐸᓯᔭᒃᓴᐅᑎᒃᑲᔭᕐᐸᒋᑦ.

²¹ ᓇᓛᒎᕐᑐᕐᓕ ᐃᓂᕐᑎᕈᕕᐅᒃ ᐊᔪᕐᑐᓕᖁᓇᒍ, ᐊᔪᕐᑐᓕᔪᓐᓃᕐᐸᑦ, ᑖᓐᓇ ᐃᓅᔪᒫᕐᐳᖅ, ᐃᓂᕐᑎᕐᑕᐅᓂᕐᒥᒃ ᓈᓚᖕᓂᕐᒥᓄᑦ; ᐃᕝᕕᓪᓗ ᐸᓯᔭᒃᓴᐅᒐᔭᓐᖏᓚᑎᑦ.”

ᐃᓯᑭᐊᓕᐅᑉ ᐅᖃᕈᓐᓁᓪᓕᓂᖓ

²² ᐊᑕᓂᐅᓪᓗ ᐱᔪᓐᓇᕐᓂᖓᑕ ᑕᕝᕙᓂ ᓇᔪᕐᐹᖓ; ᐅᖃᐅᑎᓪᓗᖓᓗ, “ᒪᑭᓪᓗᑎᑦ ᓇᑎᕐᓇᒧᑦ ᐂᓕᕆᑦ, ᑍᑲᓂ ᐅᖃᐅᑎᓂᐊᕐᐸᒋᑦ.”

²³ ᒪᑭᓐᓇᒪ ᓇᑎᕐᓇᒧᓐᖓᐅᕗᖓ; ᑕᑯᒋᓪᓗ, ᐊᑕᓂᐅᑉ ᐱᓐᓇᕐᓇᕐᓂᖓ ᑕᑯᓕᕆᕙᕋ, ᑰᑉ ᓰᐸᕆᐅᑉ ᖃᓂᒋᔮᓂ ᑕᑯᓚᐅᕐᑕᑦᑐᑦ ᐱᓐᓇᕐᓇᕐᑎᒋᔪᖅ; ᑕᕝᕙ ᓄᓇᒧᑦ ᐹᒻᒪᒃᐳᖓ ᑮᓇᕋ ᓄᓇᒧᑦ ᐳᓪᓗᒍ,

²⁴ ᐊᓂᕐᓂᐅᓪᓕ ᐃᑎᕐᕕᒋᓪᓗᖓ ᓂᑯᕕᑎᑉᐹᖓ; ᐅᖃᐅᑎᓪᓗᖓᓗ, “ᐊᖏᕐᕋᕐᓗᑎᑦ ᐃᒡᓗᖕᓂ ᐅᒃᑯᐊᕈᑎᔭᕐᑐᕆᑦ.

²⁵ ᐃᓅᑉ ᐃᕐᓂᖓ, ᑕᑯᒋᑦ, ᐃᒡᓗᖕᓃᓪᓗᑎᑦ ᐊᒃᓱᓈᓄᑦ ᕿᓚᒃᓱᕐᑕᐅᔪᒫᕐᐳᑎᑦ, ᐊᓂᔪᓐᓁᓪᓕᓗᑎᑦ ᐃᓄᖕᓄᐊᕈᓐᓁᓪᓕᔪᒫᕐᐳᑎᑦ.

²⁶ ᐅᕾᑦ ᖃᓂᕐᐱᑦ ᕿᓚᖓᓄᑦ ᓂᐱᑎᑦᓱᒫᕐᐸᕋ, ᑕᕝᕙ ᐅᖃᕈᓐᓁᓪᓕᔪᒫᕐᐳᑎᑦ ᐃᓅᖃᑎᒌᒡᔪᐊᓪᓗ ᐊᑭᕋᕐᑐᕐᑐᑦ ᐃᓂᕐᑎᕈᓐᓇᕐᓂᐊᓐᖏᓚᑎᑦ.

²⁷ ᐅᖃᕐᕕᒋᓕᕐᒥᒍᒃᑭᓪᓕ, ᐅᖃᕈᓐᓇᕐᓯᑎᑦᓱᒫᕐᐸᒋᑦ, ᑕᕝᕙ ᐅᖃᐅᑎᓕᕈᒫᕐᐸᑎᑦ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ’; ᑐᓴᕈᓐᓇᕐᑐᑦ ᑐᓴᕐᓂᐊᕐᐹᑎᑦ; ᑐᓴᕈᒪᖏᑦᑐᓪᓗ ᑐᓴᕐᓂᐊᓐᖏᓛᑎᑦ; ᐊᑭᕋᕐᑐᕐᑎᐅᓪᓗᑎᒃ ᐃᓅᖃᑎᒌᖑᖕᒪᑕ.”