ᐃᓯᑭᐊᓕᐅᑉ ᐊᒡᓚᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᑦᔨᑉᑎᒥᐅᑦ ᐊᑭᕋᕐᑐᕐᓗᒋᑦ ᐅᖃᐅᑦᔭᐅᓂᖏᑦ

¹ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᖏᑕ 10ᖓᓐᓂ, ᑕᖅᑮᓪᓗ 10ᖓᓐᓂ, ᐅᓪᓗᖏᑕ 12ᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᑦ ᐰᕉ ᐊᑭᕋᕐᑐᕐᓗᒍ ᐱᔪᖃᓛᕐᑐᒥᒃ ᐅᖃᐅᑎᒍᒃ, ᐄᑦᔨᑉᑎᒥᐅᓕᒫᑦ ᓱᒋᐊᕐᑕᐅᔪᒫᕐᓂᖏᓐᓂᒃ.

³ ᐅᖃᕐᓗᑎᑦ ᐃᒫᒃ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓ ᐰᕉ ᐊᑭᕋᕐᑐᕐᐸᒋᑦ, ᐆᒪᔪᕐᓘᔪᑎᑦ ᑐᕌᒍᓂ ᑰᖕᒥᐅᑕᐅᔪᑎᑦ, ᐅᖃᕐᐸᒃᓗᑎᓪᓗ, ᑰᒑᓗᒃ ᓁᓕ ᓇᖕᒥᓂᕆᕙᕋ ᓴᓇᓚᐅᕋᒃᑯ.’

⁴ ᐊᒡᓕᕈᒃᑯᑦ ᓂᒃᓯᒍᒫᕐᐸᒋᑦ, ᑰᖁᑎᕕᓪᓗ ᐃᖃᓗᖏᑦ ᑲᕕᓯᖕᓄᑦ ᓂᐱᑎᑦᓱᒫᕐᐸᒃᑲ; ᐊᒧᔪᒫᕐᐸᒋᑦ ᑰᖁᑎᖕᓂᑦ, ᑰᖁᑎᕕᓪᓗ ᐃᖃᓗᖏᑦ ᐱᖃᓯᐅᑎᓗᒋᑦ ᑲᕕᓯᖕᓄᑦ ᓂᐱᓐᖓᑎᓪᓗᒋᑦ.

⁵ ᐃᒋᑦᓱᒫᕐᐸᒋᓪᓗ ᓄᓇᒧᑦ ᐃᓄᖃᔪᐃᑦᑐᒧᑦ, ᑰᖁᑎᕕᑦ ᐃᖃᓗᖏᑦ ᐱᖃᓯᐅᑎᓗᒋᑦ; ᑎᒦᑦ ᒪᓂᖅᑲᒦᑐᐃᓐᓇᕈᒫᕐᐳᖅ ᐃᓗᕕᕐᓯᒪᖏᓪᓗᓂ. ᓂᕿᒋᔭᐅᑎᓕᕈᒫᕐᐸᒋᑦ ᑎᖕᒥᐊᓄᑦ ᐆᒪᔪᓄᓪᓗ ᓄᓇᒦᑦᑐᓄᑦ.

⁶ ᑕᕝᕙ ᐄᑦᔨᑉᑎᒥᐅᓕᒫᑦ ᑐᑭᓯᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ. ᐊᔭᐅᑉᐱᐊᕆᔭᐅᓚᐅᕋᕕᑦ ᓱᓪᓗᓕᒃ ᐃᓴᕆᐊᓕᐅᑉ ᑭᖑᕚᖏᓐᓄᑦ;

⁷ ᐊᒡᒐᖕᓂᒃ ᑎᒍᓯᖕᒪᑕ, ᑕᕝᕙ ᓇᐱᓚᐅᕐᐳᑎᑦ, ᑐᐃᖏᓪᓗ ᐱᓪᓗᐃᑎᓪᓗᒋᑦ; ᐄᒐᕐᕕᒋᖕᒪᑎᓪᓗ, ᓇᐱᓚᐅᕐᐳᑎᑦ, ᕿᑎᖏᓪᓗ ᓇᐱᑎᓪᓗᒋᑦ.

⁸ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐅᓇᑕᕐᑕᐅᑎᑦᓱᒫᕐᐸᑦᓯ ᓴᕕᒡᔪᐊᒧᑦ, ᑖᒃᑯᐊᓗ ᑐᖁᕅᔪᒫᕐᐳᑦ ᐃᓄᖕᓂᒃ ᐆᒪᔪᖁᑎᑦᓯᓐᓂᒡᓗ;

⁹ ᐄᑦᔨᑉᑎᐅᓪᓗ ᓄᓇᖓ ᓱᓁᕈᑎᔪᒫᕐᐳᖅ ᐊᓯᕈᕐᑕᐅᓗᓂᓗ. ᖃᐅᔨᖁᓪᓗᓯ ᐅᕙᖓᐅᒐᒪ ᐊᑕᓂᖅ. “ᐅᖃᓚᐅᕋᕕᑦ, ‘ᑰᒑᓗᒃ ᓁᓕ ᓇᖕᒥᓂᕆᕙᕋ ᓴᓇᓚᐅᕋᒃᑯ.’

¹⁰ ᑍᒤᒻᒪᑦ ᑕᑯᒋᑦ, ᓵᓐᖓᓕᕐᐸᒋᑦ, ᑰᖁᑎᑎᓪᓗ ᓵᓐᖓᓕᕐᐸᒃᑲ, ᐄᑦᔨᑉᑎᓕᒫᑉ ᓄᓇᖓ ᓱᓁᕈᑎᑎᑦᓱᒫᕐᐸᕋ ᐊᓯᕈᕐᑕᐅᓗᓂᓗ, ᒥᒡᑐᓕᒥᑦ ᐱᒋᐊᕐᓗᒍ ᓮᓂᒧᑦ ᑎᑭᓪᓗᒍ, ᐃᑎᐅᐱᐊᒥᐅᓪᓗ ᓄᓇᖓᑦᑕ ᑭᒡᓕᖓ ᑎᑭᓪᓗᒍ.

¹¹ ᐃᓄᖕᓄᑦ ᐆᒪᔪᓄᓪᓘᓐᓃᑦ ᐅᐸᒃᑕᐅᔪᓐᓁᓪᓕᔪᒫᕐᐳᖅ; ᐊᕐᕌᒍᓂᒃ 40ᓂᒃ ᐃᓄᖃᕈᒫᖏᒻᒪᑦ.

¹² ᐄᑦᔨᑉᑎᐅᑉ ᓄᓇᖓ ᓱᓇᖃᖏᓐᓂᕐᐹᓐᖑᕐᑎᑦᓱᒫᕐᐸᕋ ᓄᓇᓕᖕᓂᑦ ᓱᓇᖃᖏᑦᑐᓕᒫᓂᑦ; ᐊᕐᕌᒍᓂᒃ 40ᓂᒃ ᐃᒡᓗᒐᓴᒡᔪᐊᖏᑦ ᓱᓇᖃᖏᑦᑑᑎᑦᓱᒫᕐᐸᒃᑲ ᐃᒡᓗᒐᓴᒡᔪᐊᑦ ᓱᓇᖃᖏᑦᑐᑦ ᐊᑯᕐᖓᓐᓂ. ᐄᑦᔨᑉᑎᒥᐅᑦ ᐃᓅᖃᑎᒌᒡᔪᐊᓄᑦ ᓯᐊᒻᒪᕐᑎᑦᓱᒫᕐᐸᒃᑲ, ᕿᒫᔪᒫᕐᐳᑦ ᓄᓇᓕᖕᓄᑦ ᓇᒧᑐᐃᓐᓇᖅ.”

¹³ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᐊᕐᕌᒍᐃᑦ 40 ᐊᓂᒍᕐᐸᑕ ᐄᑦᔨᑉᑎᒥᐅᑦ ᑲᑎᕐᓱᓕᕈᒫᕐᐸᒃᑲ ᐃᓅᖃᑎᒌᒡᔪᐊᓂᑦ ᓯᐊᒻᒪᕐᓯᒪᕕᒋᓚᐅᕐᑕᖏᓐᓂᑦ.

¹⁴ ᐄᑦᔨᑉᑎᒥᐅᓪᓗ ᐅᑎᕐᑎᑦᓱᕐᐸᒃᑲ, ᓄᓇᖃᓕᕈᒫᕐᐳᓪᓗ ᓄᓇᒥ ᐹᑦᑐᕉᓯᒥ, ᓄᓇᑐᖃᕆᓚᐅᕐᑕᒥᖕᓂ, ᑕᕝᕙᓂᓗ ᐊᖓᔪᖅᑲᐅᕕᖓᑦ ᐊᖏᔫᔪᒫᓐᖏᓚᖅ.

¹⁵ ᓱᓇᐅᖏᓐᓂᕐᐸᐅᔪᒫᕐᐳᖅ ᐊᖓᔪᖅᑲᐅᕕᓕᒫᓂᑦ, ᐃᓅᖃᑎᒌᒡᔪᐊᓂᓪᓗ ᐊᓯᒥᖕᓂᑦ ᐊᖏᓂᕐᓴᐅᓚᐅᕐᓯᒪᔪᓐᓁᕈᒫᕐᐳᑦ; ᓱᓇᐅᓐᖏᓗᐊᕐᓂᕐᒥᖕᓄᑦ ᐊᒡᓛᑦ ᐃᓅᖃᑎᒌᒡᔪᐊᓂᒃ ᐊᓯᒥᖕᓂᒃ ᐊᐅᓚᑦᓯᓚᐅᕐᓯᒪᔪᓐᓁᕈᒫᕐᐳᑦ.

¹⁶ ᐄᑦᔨᑉᑎᒥᐅᓪᓗ ᑕᑎᒋᔭᐅᓇᓱᐊᒃᑲᓐᓂᕈᒫᓐᖏᓚᑦ ᐃᓴᕆᐊᓕᐅᑉ ᑭᖑᕚᖏᓐᓄᑦ, ᐄᑦᔨᑉᑎᒥᐅᓂᒃ ᑕᑎᒃᓴᕋᓱᐊᕐᐸᒡᓗᑎᒃ ᑕᒻᒪᓚᐅᕐᓯᒪᓂᕕᓂᕐᒥᖕᓂᒃ ᑐᑭᓯᔪᒫᕐᒪᑕ. ᑕᕝᕙ ᑐᑭᓯᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ ᒎᑎ.”

ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᓵᓚᖃᕈᒫᕐᓂᖓ ᐄᑦᔨᑉᑎᒥᐅᓂᒃ

¹⁷ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᐃᑦ 27ᒋᓕᕐᑕᖓᓂ, ᑕᖅᑮᑦ ᓯᕗᓪᓕᕐᐹᖓᓐᓂ, ᐅᓪᓗᖏᑕ ᓯᕗᓪᓕᕐᐹᖓᓐᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

¹⁸ “ᐃᓅᑉ ᐃᕐᓂᖓ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᓂᐱᑯᓁᓴ ᐅᓇᑕᕐᑎᖁᑎᒥᓂᒃ ᐊᒃᓱᕈᕐᑎᑦᓯᓪᓗᓂ ᐊᑐᐃᓐᓇᕈᕐᑎᓕᕐᐳᖅ ᐅᓇᑕᕆᐊᕈᒪᓪᓗᓂ ᑍᕆᒥᒃ; ᐅᓇᑕᕐᑎᖁᑎᓕᒫᖏᑦ ᓄᔧᔭᕐᑕᐅᓯᒪᓕᕐᐳᑦ ᑐᐃᖏᓪᓗ ᐊᒦᕈᑎᓪᓗᑎᒃ; ᐊᖓᔪᖅᑳᕐᔪᐊᖓᓪᓕ ᐅᓇᑕᕐᑎᖁᑎᖏᓪᓗ ᐊᒃᓱᕈᕈᑎᒋᓚᐅᕐᑕᒥᖕᓄᑦ ᓱᓕ ᐊᑭᓕᕐᑕᐅᓚᐅᓐᖏᓚᑦ.

¹⁹ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐄᑦᔨᑉᑎᒥᐅᑦ ᓄᓇᖓ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓂᐱᑯᓁᓴᒧᑦ ᑐᓂᓂᐊᓕᕐᐸᕋ; ᐄᑦᔨᑉᑎᒥᐅᑦ ᐊᔪᕐᓴᖏᑦᔪᑎᖏᑦ ᐱᑖᕆᓗᒋᑦ ᐊᐅᓪᓚᕈᑦᔨᖁᓪᓗᒍ ᓱᓇᓕᒫᓂᒃ; ᐅᓇᑕᕐᑎᖁᑎᖏᑦᑕᓗ ᐊᑭᓕᕐᑕᐅᑦᔪᑎᒋᔪᒫᕐᒪᒋᑦ.

²⁰ ᐄᑦᔨᑉᑎᒥᒃ ᐊᑭᓖᕕᒋᓂᐊᕐᐸᕋ ᐅᓇᑕᕆᐊᕐᓂᕆᓚᐅᕐᑕᖓ ᐱᑦᔪᑎᒋᓪᓗᒍ, ᐅᓇᑕᕐᑎᖁᑎᖏᑦ ᐱᓇᓱᐊᕐᑎᖁᑎᒋᓚᐅᕋᒃᑭᑦ, ᐅᖃᕐᐳᖅ ᐊᑕᓂᖅ ᒎᑎ.

²¹ “ᑕᒪᓐᓇ ᐊᑐᓕᕐᐸᑦ ᐃᓴᕆᐊᓕᒥᐅᑦ ᐱᔪᓐᓇᐅᑎᒃᓴᕐᑖᕐᑎᑦᓱᒫᕐᐸᒃᑲ, ᐅᖃᐅᑦᔪᐃᔪᓐᓇᖁᓪᓗᑎᓪᓗ ᑖᒃᑯᓄᖓ ᖃᓃᑦ ᒪᑐᐃᕈᒫᕐᐸᕋ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.”