ᐃᓯᑭᐊᓕᐅᑉ ᐊᒡᓚᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕆᒥᐅᑦ ᐊᖓᔪᖅᑳᕐᔪᐊᖓᑦᑕ ᐅᖃᐅᑦᔭᐅᓂᖓ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᑍᕆᒥᐅᑦ ᐊᖓᔪᖅᑳᖓ ᐅᖃᐅᑎᒍᒃ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐆᒻᒪᑎᒃᑯᑦ ᐱᐅᔪᕆᒐᕕᑦ, ᐅᖃᓚᐅᕐᐳᑎᑦ, ‘ᒎᑎᐅᕗᖓ, ᒎᑏᑦ ᐃᒃᓯᕙᐅᑕᖏᓐᓂ ᐃᒃᓯᕚᕐᓗᖓ, ᐃᒪᕕᖕᓂᒃ ᐊᕙᑎᒥᐅᑕᖃᕐᑐᒥᒃ,’ ᐃᓄᑐᐃᓐᓇᐅᕗᑎᓪᓕ, ᒎᑎᐅᓇᑎᑦ, ᐃᓕᖕᓂᒃ ᒎᑎᑐᑦ ᓯᓚᑐᓇᓱᒋᒐᓗᐊᕐᐳᑎᑦ;

³ ᓯᓚᑐᓂᕐᓴᐅᒐᓗᐊᕐᐳᑎᑦ ᑖᓂᐊᓕᒥᑦ; ᐃᓕᖕᓄᑦ ᓇᓗᓇᕐᑐᖃᖏᒻᒪᑦ;

⁴ ᓯᓚᑐᓂᕐᓄᑦ ᖃᐅᔨᒪᓂᕐᓄᓪᓗ ᐃᓕᖕᓂᒃ ᐊᔪᕐᓴᕈᓐᓃᕐᑎᓯᒪᒐᕕᑦ, ᒎᓗᓂᒃ ᓯᐅᓪᕕᕆᓂᒡᓗ ᑲᑎᕐᓱᐃᓯᒪᒐᕕᑦ ᐱᖁᑎᒃᑯᕕᖕᓄᑦ;

⁵ ᓯᓚᑐᓂᕐᓄᑦ ᑕᐅᕐᓰᔪᓐᓇᕐᓂᕐᓄᓪᓗ ᐊᔪᕐᓴᕈᓐᓃᕐᑎᓯᒪᒐᕕᑦ, ᐆᒻᒪᑎᒃᑯᓪᓗ ᐱᐅᔪᕆᑦᔪᑎᒋᓕᕐᐸᑦ ᐊᔪᕐᓴᖏᓐᓃᑦ.

⁶ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᒎᑎᑐᑦ ᓯᓚᑐᓇᓱᒋᓪᓗᑎᑦ ᐃᓕᖕᓂᒃ ᐃᓱᒪᒋᓯᒪᒐᕕᑦ,

⁷ ᑍᒤᒻᒪᑦ, ᑕᑯᒋᑦ, ᑎᑭᑕᐅᑎᑦᓱᒫᕐᐸᒋᑦ ᐃᓚᒋᓐᖏᑕᕐᓂᒃ, ᐃᓅᖃᑎᒌᒡᔪᐊᓂᑦ ᓂᑲᒍᓱᖏᓐᓂᕐᐹᓂᒃ; ᓴᕕᒡᔪᐊᒥᖕᓄᑦ ᓱᕋᒃᑎᕆᔪᒫᕐᐳᑦ ᓯᓚᑐᓂᕐᓄᑦ ᐱᐅᓯᑎᓯᒪᔭᕐᓂᒃ ᑕᑯᒥᓇᕐᓂᕐᔪᐊᓪᓗ ᓇᕐᕈᓇᕐᓯᑎᑕᐅᔪᒫᕐᐳᖅ.

⁸ ᑖᒃᑯᐊᓗ ᐃᑎᕐᓴᒧᑦ ᐃᒋᑦᓱᒫᕐᐹᑎᑦ, ᑕᕝᕙᓂᓗ ᑐᖁᔪᒫᕐᐳᑎᑦ ᑐᖁᑕᐅᓗᑎᑦ ᐃᒪᕐᕕᒡᔪᐊᕐᒥ.

⁹ ᑐᖁᑦᓯᔭᕐᑐᕐᑐᑦ ᓵᖏᓐᓂ ᓱᓕ ᒎᑎᐅᓂᕋᕈᒫᕐᐲᑦ? ᐃᓄᑐᐃᓐᓇᐅᒐᕕᑦ, ᒎᑎᐅᓇᒡᓗ, ᑐᖁᑦᓯᔭᕐᑐᕐᑐᑦ ᓵᖏᓐᓃᓕᕈᕕᑦ.

¹⁰ ᑐᖁᑕᐅᔪᒫᕐᐳᑎᑦ ᑭᐱᔭᐅᓯᒪᖏᑦᑐᓄᑦ ᐃᓅᖃᑎᒃᓴᔭᕆᓐᖏᑕᕐᓄᑦ; ᐅᕙᖓ ᐅᖃᕋᒪ, ᐊᑕᓂᖅ ᒎᑎ ᐅᖃᕐᐳᖅ.”

ᑍᕆᒥᐅᑦ ᐊᖓᔪᖅᑳᕐᔪᐊᖓᑕ ᑐᖁᑕᐅᓂᖓ

¹¹ ᐊᑕᓂᐅᑉ ᐅᖃᐅᓯᖓᑕ ᑎᑭᒃᑭᕚᖓ, ᐅᖃᕐᓗᓂ:

¹² “ᐃᓅᑉ ᐃᕐᓂᖓ ᑍᕆᒥᐅᑦ ᐊᖓᔪᖅᑳᕐᔪᐊᖓᓄᑦ ᐅᒡᒍᐊᕈᑎᓕᐅᕆᑦ, ᐅᖃᐅᑎᓗᒍᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐋᖅᑭᒃᓯᓯᒪᑦᓯᐊᕈᓐᓇᕐᓂᖅ ᐱᓯᒪᓚᐅᕐᐸᑦ, ᓯᓚᑐᓂᖃᑦᓯᐊᕐᓗᑎᑦ ᑕᑯᒥᓇᕐᑑᓪᓗᑎᓪᓗ.

¹³ ᐄᑕᓂᒥ ᓄᓇᖃᓚᐅᕐᐳᑎᑦ, ᒎᑎᐅᑉ ᐱᕈᕐᓰᕕᖁᑎᖓᓂ; ᐅᔭᕋᖕᓂᒃ ᐱᐅᔪᓂᒃ ᐊᑦᔨᒌᖏᑦᑐᓂᒃ ᐱᐅᓴᐅᑎᖃᕐᐸᒡᓗᑎᑦ, ᑲᕐᓃᓕᐊᓂᒃ, ᑑᐹᑦᓯᓂᒃ, ᔭᓯᐸᕆᓂᒡᓗ, ᑯᕅᓱᓕᐊᓂᒃ ᐳᕅᓕᓂᒃ, ᐆᓂᒡᓯᓂᒡᓗ, ᓴᐰᕋᓂᒃ, ᑳᐳᕐᓐᑯᓪᓂᒃ, ᐃᒪᕆᐅᓪᓂᒡᓗ; ᐊᓐᓄᕌᑎᑦ ᒎᓗᓂᒃ ᑕᕐᓴᖃᐅᕐᐸᒡᓗᑎᒃ ᓴᓇᓐᖑᐊᕐᓯᒪᔪᓂᒃ ᐃᑎᕐᓴᓕᐅᕈᑎᓯᒪᔪᓂᒃ. ᑕᒪᒃᑯᐊᓗ ᐊᓐᓄᕌᒃᓴᐅᑕᐅᓚᐅᕐᐳᑦ ᐃᓕᖕᓄᑦ ᐱᓐᖑᕐᑎᑕᐅᕕᖕᓂᑦ ᐱᒋᐊᕐᓗᑎᒃ.

¹⁴ ᓂᕈᐊᕐᓯᒪᓚᐅᕐᐳᖓ ᓴᐳᑦᔨᔨᒃᓴᕐᓂᒃ ᐂᓐᖏᓕᒥᒃ ᓯᕈᐱᒥᒃ; ᒎᑎᐅᓪᓗ ᐃᑦᔪᕐᓁᑦᑐᖁᑎᖓᓂ ᖃᖅᑲᒥ ᐃᓂᖃᓚᐅᕐᐳᑎᑦ; ᐱᓱᖃᑦᑕᓚᐅᕐᐳᑎᑦ ᐅᔭᕋᒃᑎᒍᑦ ᐱᐅᔪᕐᔪᐊᑎᒍᑦ ᕿᓪᓛᒡᒋᔭᕐᑐᑎᒍᑦ.

¹⁵ ᐃᓕᖅᑯᓰᑦ ᐸᓯᔭᒃᓴᐅᓂᖃᓚᐅᓐᖏᓚᖅ ᐱᓐᖑᕐᑎᑕᐅᕕᖕᓂᑦ ᐱᒋᐊᕐᓗᓂ, ᐅᓪᓗᖅ ᐱᐅᖏᑦᑐᓂᒃ ᐊᑐᖃᑦᑕᓯᒋᐊᕐᓃᑦ ᑎᑭᓪᓗᒍ.

¹⁶ ᑕᐅᕐᓰᖃᑎᖃᖃᑦᑕᕐᓂᕐᒧᓪᓗ ᑲᔪᓯᒻᒪᕆᓕᕐᑎᓪᓗᑎᑦ, ᐱᓂᕐᓗᖕᓂᕐᒧᑦ ᑎᑭᐅᑎᓚᐅᕐᐳᑎᑦ, ᐊᔪᕐᑐᓕᓕᕐᓗᑎᓪᓗ; ᐊᓂᑎᑦᓴᕆᐊᖃᓕᓚᐅᕐᐸᒋᑦ ᓇᕐᕈᓇᕐᓯᑎᑦᓯᒐᕕᑦ ᒎᑎᐅᑉ ᖃᖅᑲᖁᑎᖓᓂᒃ, ᐂᓐᖏᓕᐅᓪᓗ ᓯᕋᐱᐅᑉ ᓴᐳᑦᔨᔨᒋᓚᐅᕐᑕᕕᑦ ᐊᓂᑎᑦᓴᕆᐊᖃᓕᓚᐅᕐᐹᑎᑦ ᑕᕝᕙᓐᖓᑦ ᐅᔭᕋᖕᓂᑦ ᐱᐅᔪᓂᑦ ᕿᓪᓛᒡᒋᕐᑕᕐᑐᓂᑦ.

¹⁷ ᐆᒻᒪᑎᒃᑯᑦ ᐱᐅᔪᕆᓕᓚᐅᕋᕕᑦ ᑕᑯᒥᓇᕐᑑᓃᑦ ᐱᑦᔪᑎᒋᓪᓗᒍ; ᓯᓚᑐᓃᑦ ᐊᑐᕐᓂᕐᓗᓕᓚᐅᕐᐸᑦ ᑕᑯᒥᓇᕐᑐᐊᓘᓃᑦ ᐱᑦᔪᑎᒋᓪᓗᒍ. ᑕᕝᕙ ᓄᓇᒧᑦ ᐃᒋᓚᐅᕐᐸᒋᑦ; ᑕᑯᔭᒃᓴᕈᕐᑎᓪᓗᑎᑦ ᐊᖓᔪᖅᑳᕐᔪᐊᓄᑦ, ᐃᓕᖕᓂᒃ ᑕᑯᖁᓪᓗᒋᑦ.

¹⁸ ᐱᐅᖏᑦᑐᓂᒃ ᐱᓇᓱᐊᖃᑦᑕᓕᕋᕕᑦ, ᑕᐅᕐᓰᓂᕐᓗᖃᑦᑕᕐᓂᒃᑯᑦ ᐃᑦᔪᕐᓁᑦᑐᖁᑎᑎᑦᑕᐅᖅ ᓇᕐᕈᓇᕐᓯᑎᓚᐅᕐᐸᑎᑦ; ᐃᑯᐊᓪᓚᒃᑎᑦᓯᓕᓚᐅᕐᐳᖓ ᐊᑯᓐᓇᑦᓯᓐᓂ; ᑕᒪᑐᒧᖓ ᓄᖑᑕᐅᖁᓪᓗᓯ, ᐊᕐᔭᓕᓂᕈᕐᑎᓚᐅᕐᐸᒋᓪᓗ ᓄᓇᒥ ᐃᓄᓕᒫᓄᑦ ᑕᑯᔭᐅᖁᓪᓗᑎᑦ.

¹⁹ ᐃᓅᖃᑎᒌᒡᔪᐊᑦ ᓯᓚᕐᔪᐊᕐᒥ ᐃᓕᖕᓂᒃ ᑲᒪᓂᐊᕈᑎᖃᒻᒪᕆᓚᐅᕐᐳᑦ; ᑕᑯᒥᓁᑦᑐᕐᔪᐊᒥᒃ ᐃᓱᓕᓐᓂᖃᓚᐅᕋᕕᑦ ᐱᑕᖃᕐᓂᐊᕈᓐᓃᕐᓗᑎᓪᓗ ᐃᓱᖃᖏᑦᑐᒧᑦ.”

ᓮᑐᓂᒥᐅᑦ ᐊᑭᕋᕐᑐᕐᓗᒋᑦ ᐅᖃᐅᑦᔭᐅᓂᖓᑦ

²⁰ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

²¹ “ᐃᓅᑉ ᐃᕐᓂᖓ, ᓮᑐᓂᒥᐅᑦ ᐊᑭᕋᕐᑐᕐᓗᒋᑦ ᐅᖃᐅᑎᒃᑭᑦ.

²² ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᓮᑐᓃ ᐊᑭᕋᕐᑐᓕᕐᐸᒋᑦ, ᐊᑯᓐᓇᑦᓯᓐᓂ ᓂᕐᑐᕐᓇᕐᓂᕋ ᓴᖅᑭᑎᓐᓂᐊᕐᐸᕋ. ᖃᐅᔨᔪᒫᕐᐳᓪᓗ ᐅᕙᖓᐅᒐᒪ ᐊᑕᓂᖅ, ᐃᓕᑦᓯᓐᓂᒃ ᓱᒋᐊᕐᓯᓕᕈᒪ, ᐃᑦᔪᕐᓁᓐᓂᕋᓗ ᓴᖅᑭᑎᒃᑯᒃᑯ ᑖᒃᑯᓄᖓ.

²³ ᖃᓂᒪᓇᕐᑐᓂᒃ ᑎᑭᕝᕕᐅᑎᑦᓱᒫᐸᕋ, ᐊᐅᖕᒥᒡᓗ ᖁᕕᓯᔪᒫᕐᐳᖓ ᐊᖅᑯᑎᖏᓐᓄᑦ; ᓄᓇᖏᓐᓂ ᑐᖁᕋᕐᑕᐅᔪᒫᕐᐳᑦ, ᐅᓇᑕᕆᐊᕐᑐᓄᑦ ᐊᕙᑎᖏᓐᓂᑦ ᑎᑭᑦᑐᓄᑦ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.”

ᐃᓴᕆᐊᓕᒥᐅᑦ ᓮᒻᒪᕐᑎᑕᐅᔪᒫᕐᓂᖓᑦ

²⁴ “ᐃᓴᕆᐊᓕᐅᑉ ᑭᖑᕚᖏᑦ ᐋᓐᓂᕐᓯᑕᐅᕙᒍᓐᓃᕈᒫᕐᐳᑦ ᑲᑭᓪᓚᕐᓇᕐᑐᓄᑦ ᐊᕙᑖᓂ ᓄᓇᖃᕐᑐᓄᑦ ᐸᒡᕕᓴᕐᑕᐅᕙᖑᓐᓃᕐᓗᑎᒃ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ ᒎᑎ.

²⁵ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᑦ ᑲᑎᕐᓱᓕᕈᒃᑭᑦ ᐃᓄᖕᓂᑦ ᓯᐊᒻᒪᕐᑎᑕᐅᕕᖏᓐᓂᑦ, ᐃᑦᔪᕐᓁᓐᓂᕋᓗ ᑖᒃᑯᑎᒎᓇᖅ ᓴᖅᑭᑎᓕᕈᒃᑯ ᐃᓅᖃᑎᒌᒡᔪᐊᓄᑦ, ᑕᕝᕙ ᐃᓴᕆᐊᓕᒥᐅᑦ ᓇᖕᒥᓂᖅ ᓄᓇᒥᖕᓂ ᓄᓇᖃᓕᕈᒫᕐᐳᑦ ᐱᔨᓐᓄᑦ ᔧᑯᒧᑦ ᑐᓂᓚᐅᕐᑕᓐᓂ.

²⁶ ᓄᓇᖃᓕᕈᒫᕐᐳᑦ ᐃᓱᒫᓗᒋᔭᖃᖏᓪᓗᑎᒃ, ᐃᒡᓗᓕᐅᕈᒫᕐᐳᑦ ᐱᕈᕐᓰᕕᓕᐅᕐᓗᑎᒡᓗ ᕔᓂᖃᕐᕕᒃᓴᓂᒃ. ᓄᓇᖃᓕᕈᒫᕐᐳᑦ ᐃᓱᒫᓗᓇᖏᑦᑐᒥ, ᓄᓇᖃᑎᒌᑦ ᐋᓐᓂᕐᓯᔪᒪᔪᑦ ᑖᒃᑯᓂᖓ ᓱᒋᐊᖃᑦᑕᕈᒫᕐᐸᒃᑲ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ ᑖᒃᑯᐊ ᒎᑎᖓᑦ.”