ᐃᓯᑭᐊᓕᐅᑉ ᐊᒡᓚᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕆᒥᐅᑦ ᐃᓗᕕᕐᓯᐅᒻᒥᒃ ᐃᓐᖏᕐᕕᐅᓂᖓ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ ᐃᓐᖏᕆᑦ ᐅᒡᒍᐊᕈᑎᒥᒃ ᑍᕆᒥᐅᓄᑦ,

³ ᐅᖃᕐᕕᒋᒃᑭᑦ ᐅᖃᕐᓗᑎᑦ, ᑍᕆᒥᐅᑦ ᐃᒪᐅᑉ ᓯᓈᓃᑦᑐᑦ, ᓂᐅᕕᕆᐊᕐᕕᐅᕙᒃᑐᑦ ᐃᒪᐅᑉ ᓯᓈᓂᕐᒥᐅᓄᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ‘ᑍᕆᒥᐅᖑᔪᓯ ᐅᖃᕐᓯᒪᒐᑦᓯ, “ᐱᐅᓂᕐᐹᖑᕗᒍᑦ.”

⁴ ᐃᒪᐅᑉ ᓯᓈᓂ ᐊᖏᕋᖃᕋᑦᓯ; ᐃᒡᓗᓕᐅᕐᑎᖁᑎᑦᓯ ᑕᑯᒥᓇᕐᑐᒥᒃ ᓴᓇᓯᒪᕚᓯ.

⁵ ᐃᒡᓗᓕᐅᕐᑐᑦ ᕿᔪᒃᑖᕐᐸᖕᒪᑕ ᓇᐹᕐᑐᓂᒃ ᖃᖅᑲᒥᑦ ᓯᓂᐊᕐᒥᑦ, ᓇᐸᕈᑕᒃᓴᕐᑖᕐᐸᒃᓗᑎᒡᓗ ᓇᐹᕐᑐᓂᒃ ᓰᑕᕆᓂᒃ ᓕᐸᓇᓂᒥᑦ ᐱᓯᒪᔪᓂᒃ.

⁶ ᐃᐳᑎᑖᕐᐸᒡᓗᑎᒡᓗ ᓯᑎᔪᔭᓂᒃ ᐆᒃᓂᒃ ᓇᐹᕐᑐᓂᒃ ᐹᓴᓂᒥᑦ ᐱᔪᓂᒃ, ᐅᒥᐊᒥᒡᓗ ᓇᑎᓕᐅᕐᐸᒡᓗᑎᒃ ᕿᔪᑦᓯᐊᓂᒃ ᓮᐸᕋᓯᒥᑦ ᐱᔪᓂᒃ, ᑕᑯᒥᓇᐅᑎᖃᕐᓗᒍ ᑑᒑᓂᒃ.

⁷ ᐄᑦᔨᑉᑎᒥᑦ ᖃᓪᓗᓈᕐᑕᓂᒃ ᓵᑦᑐᓂᒃ ᑕᕐᓯᕐᑐᕐᓯᒪᔪᓂᒃ ᑎᖏᕐᕋᐅᑕᖃᕐᐸᒃᓗᓯ, ᐃᓕᑕᕆᔭᐅᔪᓐᓇᕐᑐᓂᒃ; ᑖᓗᑕᖃᕐᓗᓯᓗ ᖃᓪᓗᓈᕐᑕᑦᓯᐊᕙᖕᓂᒃ ᓵᑦᑐᓂᒃ ᑐᖑᔪᕐᑐᓂᒃ ᐊᐅᐸᓪᓚᕆᒃᑐᓂᒡᓗ ᕿᑭᕐᑕᒥᐅᓂᑦ ᐱᓯᒪᔪᓂᒃ ᓮᐸᕋᔅᒥᑦ.

⁸ ᐃᐳᑦᑐᒃᓴᓂᒡᓗ ᓮᑐᓂᒥᑦ ᐊᕐᕙᑦᒥᓪᓗ ᐱᕙᒃᐳᓯ; ᑍᕆᒥᐅᓂᒃ ᐃᓕᓯᒪᑦᓯᐊᕐᑐᓂᒃ ᐅᒥᐊᕐᑐᕐᑎᖃᕐᐳᓯ, ᑖᒃᑯᐊ ᐊᖁᑎᒋᓪᓗᓯᐅᒃ.

⁹ ᐊᖓᔪᖅᑳᖃᕐᐳᓯ ᕿᔪᓕᕆᔨᖁᑎᖃᕐᓗᓯᓗ ᐃᓕᓐᓂᐊᕐᓯᒪᑦᓯᐊᕐᑐᓂᒃ ᒋᐸᐅᓕᒥᑦ ᐱᓯᒪᔪᓂᒃ; ᐅᒥᐊᕐᑐᕐᑎᖁᑎᖃᐅᕐᓗᓯᓗ ᓇᑭᑐᐃᓐᓇᖅ ᐅᒥᐊᕐᑐᕐᑎᒋᔭᐅᕙᖕᓂᑯᓂᒃ, ᓂᐅᕕᕐᕕᖁᑎᑦᓯᓐᓂᒃ ᒪᑭᑕᑎᑦᓯᑦᓯᐊᕈᓐᓇᕐᑐᓂᒃ.

¹⁰ “‘ᐅᓇᑕᕐᑎᖁᑎᓯᓗ ᓄᓇᓂᑦ ᐊᑦᔨᒌᖏᑦᑐᓂᑦ ᐱᓯᒪᕗᑦ ᐴᕐᓯᐊᒥᑦ, ᓗᑦᒥᑦ, ᐳᑎᒥᓪᓗ, ᐅᓇᑕᐅᑎᖃᑦᓯᐊᕐᐳᑦ ᓇᓴᖃᕐᓗᑎᒃ ᓴᐴᓗᑕᖃᕐᓗᑎᒡᓗ; ᑖᒃᑯᓄᖓ ᐱᒃᑲᕈᕐᑎᑕᐅᖃᑦᑕᕐᐳᓯ.

¹¹ ᐊᕙᓗᕐᔪᐊᓯ ᑲᐅᔨᓴᕐᑎᖃᕐᐳᑦ ᐅᓇᑕᕐᑎᓂᒃ ᐊᕐᕙᑦᒥᑦ ᐱᓯᒪᔪᓂᒃ, ᒑᒪᒥᐅᓂᓪᓗ ᐱᓯᒪᔪᓂᒃ ᓇᐸᔪᖁᑎᓯ ᑲᐅᔨᓴᕐᑎᖃᕐᓗᑎᒃ; ᓴᐴᓗᑕᑎᒃ ᓂᕕᓐᖓᕕᖃᕐᑎᑉᐰᑦ ᐊᕙᓗᕐᔪᐊᑦᓯ ᐃᓗᐊᑕ ᐊᑭᓐᓇᖓᓂ; ᑖᒃᑯᓄᖓᓗ ᑕᑯᒥᓇᕐᑑᑎᑕᐅᕗᓯ.

¹² “‘ᑖᕐᓯᓯᒧᑦ ᓂᐅᕐᕈᑎᑲᕆᐊᕐᑐᖃᑦᑕᕐᐳᓯ ᐊᔪᕐᓴᖏᑦᑐᕐᔪᐊᖑᒐᑦᓯ ᓱᓇᓕᒫᓂᒃ; ᓯᐅᓪᕕᕆᓂᒃ, ᓴᕕᕋᔭᖕᓂᒃ, ᓴᕕᕋᔭᖕᓂᒡᓗ ᓵᑦᑐᓂᒃ, ᑯᓯᕐᓯᐊᓂᒡᓗ ᓱᓇᑐᐃᓐᓇᕐᑖᕈᑎᖃᖃᑦᑕᕐᐳᓯ ᐊᑭᓕᐅᑕᐅᔪᓂᒃ ᑕᐅᕐᓰᑦᔪᑎᒋᔭᑦᓯᓐᓄᑦ.

¹³ ᑕᐅᕐᓰᔭᕐᑐᖃᑦᑕᕐᐳᓯᓗ ᔭᕚᓇᒧᑦ, ᑐᐸᐅᓪᒧᑦ, ᒥᓯᑭᒧᓪᓗ; ᐃᓄᖁᑎᑖᕋᓱᐊᕐᓗᓯ ᓯᐊᓛᒃᓴᓂᒃ, ᑲᓐᓄᔭᓂᒡᓗ ᐃᒥᖃᐅᑎᓂᒃ ᓂᐅᕐᕈᑎᒃᓴᑦᓯᓐᓂᒃ.

¹⁴ ᐱᑦ-ᑐᒐᕐᒪᒥᐅᓂᒃ ᑕᐅᕐᓰᖃᑎᖃᕐᐸᒃᐳᓯ ᕿᒻᒥᕐᔪᐊᖁᑎᒃᓴᑦᓯᓐᓂᒃ ᐅᓇᑕᐅᑎᒃᓴᑦᓯᓐᓂᒡᓗ, ᓯᐅᑎᖅᑯᕐᑐᔪᓂᒡᓗ.

¹⁵ ᕉᑎᓯᒥᐅᑦ ᑕᐅᕐᓰᖃᑎᒋᕙᒃᐸᓯ; ᐃᒪᐅᓪᓗ ᓯᓈᓂᒥᐅᑦ ᑕᐅᕐᓰᖃᑎᒋᓂᕐᐹᕆᕙᒡᓗᒋᑦ, ᑖᒃᑯᓇᓐᖓᑦ ᐊᑭᓕᕐᑕᐅᕙᒃᓗᓯ ᑑᒑᕐᓂᒃ ᕿᔪᖕᓂᒡᓗ ᓯᑎᔪᔭᓂᒃ.

¹⁶ ᐱᖁᑎᓕᐊᓘᒐᑦᓯ ᓯᕆᐊᒥᐅᑦ ᓂᐅᕕᐊᕆᕙᒃᐰᑦ; ᑕᐅᕐᓯᐅᑎᔭᐅᕙᒃᐳᑦ ᐅᔭᕋᖕᓄᑦ ᑕᑯᒥᓇᕐᑐᓄᑦ ᐃᒧᕋᐅᓪᓄᑦ, ᖃᓪᓗᓈᕐᑕᑦᓯᐊᓄᓪᓗ ᐊᐅᐸᓪᓚᕆᒃᑐᓄᑦ, ᓵᑦᑐᓄᓪᓗ ᑕᕐᓯᕐᑐᕐᓯᒪᔪᓄᑦ ᖃᓪᓗᓈᕐᑕᓄᑦ ᓵᑦᑐᓄᑦ, ᐃᒪᕐᒥᐅᑕᓄᑦ ᐅᔭᕋᕈᕐᓂᑯᓄᑦ, ᐊᓕᒎᔭᕐᓄᑦ ᐊᐅᐸᕐᑐᓄᑦ ᐊᑭᓕᕐᑕᐅᓪᓗᑎᒃ.

¹⁷ ᔫᑕᒥᐅᑦ ᐃᓴᕆᐊᓕᒥᐅᓪᓗ ᑕᐅᕐᓰᖃᑎᒋᖃᑦᑕᕆᕙᓯ ᓂᐊᖂᔭᒃᓴᓂᒃ, ᐸᐅᕐᖓᓂᒃ ᐅᕐᓱᒃᓴᓂᒃ ᐸᐅᕐᖓᓂᒡᓗ ᐱᒋᓕᖕᓂᒃ, ᕼᐊᓂᒥᒃ, ᐅᕐᓱᒃᓴᓂᒃ, ᒥᖑᐊᕈᑎᒃᓴᓂᒡᓗ.

¹⁸ ᑕᒫᓯᑰᓯᒥᐅᑦ ᓂᐅᕕᕐᐸᒃᐳᑦ ᐱᖁᑎᓕᐊᓘᓂᑦᓯᓐᓄᑦ, ᓱᓇᓕᒫᓂᒃ ᐊᔪᕐᓴᖏᑦᑐᐊᓘᒐᑦᓯ; ᕔᓂᓄᑦ ᕼᐃᓪᐸᓐᒥᐅᑕᓄᑦ, ᓄᕕᕐᓵᒃᓴᓕᐊᕆᓯᒪᔪᓄᓪᓗ ᖃᑯᕐᑕᓄᑦ,

¹⁹ ᕔᓂᓂᒡᓗ ᐅᔧᓕᒥᑦ ᐱᓯᒪᔪᓄᑦ ᑕᐅᕐᓰᕙᒃᓗᓯ ᓂᕐᕆᑎᑖᕈᑎᒋᓪᓗᒋᑦ, ᓴᕕᕋᔭᖕᓂᒡᓗ ᒪᓐᖏᕈᓐᓇᖏᑦᑐᓂᒃ, ᓂᕿᓄᓪᓗ ᐃᓚᐅᕈᑎᒃᓴᓂᒃ ᑲᓯᐊᓂᒃ ᑲᓛᒪᓯᓂᒡᓗ ᐱᒃᓴᑦᓯᓐᓂᒃ.

²⁰ ᑎᑖᓂᒥᐅᓪᓗ ᐱᖁᑎᑦᓯᓐᓂᒃ ᑕᐅᕐᓰᕕᒋᕙᒃᐸᓯ ᕿᒻᒥᕐᔪᐊᑦ ᐃᒃᓯᕙᐅᑕᖏᑕ ᓂᕈᒻᒫᒃᑯᑎᒃᓴᖏᓐᓂᒃ.

²¹ ᐊᕋᐱᐊᒥᐅᑦ ᑭᑕᕆᒥᐅᓪᓗ ᐊᖓᔪᖅᑳᖏᑦ ᐱᖁᑎᑦᓯᓐᓂᒃ ᑕᐅᕐᓰᕕᒋᕙᒃᐸᓯ ᓄᕐᕋᐅᔭᓂᒃ, ᓰᐲᓪᓗ ᐊᖑᓴᓪᓗᖏᓐᓂᒃ, ᒎᑦᓯᓂᒡᓗ ᐱᑖᕐᕕᒋᖔᕐᓗᒋᑦ.

²² ᓰᐸᒥᐅᑦ ᕌᒪᒥᐅᓪᓗ ᓂᐅᕕᕋᕐᑎᖏᑕ ᑕᐅᕐᓰᕕᒋᕙᒃᐹᓯ ᐱᐅᓴᐅᑎᓂᒃ ᐅᔭᕋᖕᓂᒃ, ᒎᓗᓂᒃ ᓂᕿᓄᓪᓗ ᒪᒪᕐᓴᐅᑎᒃᓴᓂᒃ ᐱᐅᓂᕐᐹᓂᒃ.

²³ ᑕᐅᕐᓰᖃᑎᒋᕙᒃᑭᕙᓯ, ᕼᐊᕋᓐᒥᐅᑦ, ᑳᓂᒥᐅᑦ, ᐄᑕᒥᐅᑦ, ᓰᐸᒥᐅᑦ, ᐋᓱᕆᒥᐅᑦ ᓯᓕᒪᑦᒥᐅᓪᓗ.

²⁴ ᑕᐅᕐᓰᖃᑎᒋᕙᒃᐸᓯ ᖃᓪᓗᓈᕐᑕᓂᒃ ᐊᑭᑐᔪᒃᓴᔭᓂᒃ, ᐊᓐᓄᕌᓂᒡᓗ ᐊᐅᐸᓪᓚᕆᒃᑐᓂᒃ ᐱᐅᓴᕐᓯᒪᔪᓂᒃ, ᑕᕐᓯᕐᑐᕐᓯᒪᔪᓂᒡᓗ ᓇᑎᕌᓗᖕᓂᒃ, ᐊᒃᓱᓇᐅᔭᓄᑦ ᕿᓚᒃᓱᑦᓯᐊᕐᓯᒪᔪᓂᒃ ᐊᑦᑕᕐᓇᖏᑦᑐᓂᒃ; ᑕᒪᒃᑯᓂᖓ ᑕᐅᕐᓰᖃᑎᒋᕙᒃᐸᓯ.

²⁵ ᓂᐅᕕᐊᒃᓴᖁᑎᓯ ᐅᓯᔭᐅᕙᒃᐳᑦ ᑖᕐᓯᓯᒥᐅᓄᑦ. ᑍᒤᒻᒪᑦ ᐱᖁᑎᓕᐊᓘᓕᕐᐳᓯ ᐅᖁᒤᑦᑐᓂᒃ ᐅᓯᔭᐅᖃᑦᑕᕐᑐᓄᑦ ᐃᒪᕐᔪᐊᒃᑯᑦ.

²⁶ ᐅᒥᐊᕐᑐᕐᑎᖁᑎᑦᓯ ᐃᒪᕐᐱᖕᒨᕐᑎᑉᐹᓯ; ᐊᓄᕆᕐᔪᐊᕐᒧᓪᓕ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐱᔪᒧᑦ ᐅᒦᔭᕐᑎᑕᐅᔪᒫᕐᐳᓯ ᐃᒤᓐᓇᕐᒦᑎᓪᓗᓯ.

²⁷ ᐊᒃᓗᐃᑦᔪᑎᓯ, ᐱᖁᑎᓯ, ᓂᐅᕕᐊᒃᓴᓯ, ᐅᒥᐊᕐᑐᑎᖁᑎᓯ, ᐊᖁᑎᖏᓪᓗ, ᕿᔪᓕᕆᔨᖁᑎᓯ, ᓂᐅᕕᕐᑎᑦᓯᔨᖁᑎᓯᓗ, ᐅᓇᑕᕐᑎᖁᑎᓕᒫᓯᓗ ᓇᔪᕐᑎᒋᔭᓯ, ᐃᓚᒋᔭᓕᒫᓯᓗ ᐃᓕᑦᓯᓐᓃᑦᑐᑦ, ᑭᕕᔪᒫᕐᐳᑦ ᐃᒫᓂ ᐅᓪᓗᕐᒥ ᐅᒦᔭᕐᕕᑦᓯᓐᓂ.

²⁸ ᐊᖁᑎᓯ ᕾᒐᓛᕐᓂᖏᓐᓄᑦ ᓄᓇᒦᑦᑐᑦ ᓴᔪᒍᒫᕐᐳᑦ,

²⁹ ᐃᐳᑉᐸᒃᑐᑦ ᐅᒥᐊᕐᔪᐊᕐᒥᒃ ᕿᒤᔪᒫᕐᐳᑦ. ᐅᒥᐊᕐᑐᕐᑏᑦ ᐊᖁᑎᓕᒫᖏᓪᓗ ᓯᒡᔭᒥ ᓇᖏᕈᒫᕐᐳᑦ

³⁰ ᓂᐱᕐᔪᐊᒧᑦ ᐅᒡᒍᐊᕈᒫᕐᐳᑦ, ᕿᐊᕕᒡᔪᐊᕐᓗᑎᒡᓗ. ᓴᓂᕐᓂᒃ ᓂᐊᖁᕐᒥᖕᓄᐊᕐᓯᓪᓗᑎᒃ ᐊᕐᔭᓕᓂᕐᓂ ᐊᒃᓴᑳᖃᑦᑕᕈᒫᕐᐳᑦ;

³¹ ᓂᐊᖁᑎᒃ ᓴᓕᔪᒫᕐᐰᑦ ᐱᓪᓗᓯ, ᐳᑐᕐᓛᓂᒡᓗ ᐊᑎᔪᒫᕐᐳᑦ, ᑕᕐᓂᒃᑯᑦ ᐃᒃᐱᖕᓂᐊᓗᑎᒃ ᕿᐊᑦᔪᑎᒋᔪᒫᕐᐹᓯ, ᕿᒡᓵᕕᒡᔪᐊᕐᓗᑎᒃ.

³² ᕿᒃᓵᒡᓗᑎᒃ ᐃᓕᑦᓯᓐᓄᑦ ᐅᒡᒍᐊᕈᑎᖃᕈᒫᕐᐳᑦ, “ᐊᓯᕈᕐᑕᐅᔪᖃᓚᐅᕐᓯᒪᕚ ᑍᕆᒥᐅᑎᑐᑦ? ᐃᒪᕐᕕᐅᑉ ᐊᑯᕐᖓᓂ;

³³ ᓂᐅᕕᐊᒃᓮᑦ ᐅᒥᐊᕐᔪᐊᒃᑯᑦ ᑎᑭᐅᑦᔭᐅᔭᕌᖓᑕ, ᐃᓄᒐᓮᑦ ᑭᓐᖒᒪᔭᖏᓐᓂᒃ ᐱᑎᑉᐸᓚᐅᕐᐸᓯ; ᐊᖓᔪᖅᑳᕐᔪᐊᓪᓗ ᐊᒃᓗᐃᓕᑎᓪᓗᓯᐅᒃ ᐊᔪᕐᓴᖏᑦᑐᐊᓘᓂᑦᓯᓐᓄᑦ ᓂᐅᕕᐊᒃᓴᖁᑎᑦᓯᓐᓄᓪᓗ.

³⁴ ᒫᓐᓇᓕ ᐃᒪᕕᖕᒥ ᐆᒥᔭᕐᐳᓯ, ᐃᒪᕕᖕᒥ ᐃᑎᔪᒥ; ᓂᐅᕕᐊᒃᓴᖁᑎᓯ ᐅᒥᐊᕐᑐᕐᑎᓯᓗ ᑭᕕᖃᑕᐅᓪᓗᑎᒃ.”

³⁵ ᓯᒡᔭᒥᐅᓕᒫᑦ ᖁᐊᕐᓵᕈᑎᒋᕚᓯ; ᐊᖓᔪᖅᑳᕐᔪᐊᖏᓪᓗ ᑲᑉᐱᐊᓱᒻᒪᕆᓕᕐᐳᑦ, ᑲᑉᐱᐊᓱᖕᓂᖏᑦ ᑕᑯᒃᓴᐅᓕᕐᓗᑎᒃ ᑮᓇᖏᓐᓂ.

³⁶ ᓂᐅᕕᕋᕐᑎᓕᒫᑦ ᓯᓚᕐᔪᐊᕐᒥ ᓯᕘᕋᑦᔪᑎᒋᓕᕐᐹᓯ; ᑲᑉᐱᐊᓇᕐᑐᒥᒃ ᐃᓱᓕᒃᑲᑦᓯ ᐱᑕᖃᕐᓂᐊᕈᓐᓃᕐᓗᓯᓗ ᐃᓱᖃᖏᑦᑐᒧᑦ.’”