ᐃᓯᑭᐊᓕᐅᑉ ᐊᒡᓚᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕆᒥᐅᑦ ᐱᐅᓯᕆᔪᒫᕐᑕᖏᓐᓂᒃ ᐅᖃᐅᑦᔭᐅᓂᖓᑦ

¹ ᐊᐅᓪᓚᕈᑦᔭᐅᓯᒪᓂᑦᑕ ᐊᕐᕌᒍᐃᑦ 11ᖓᓐᓂ, ᑕᖅᑭᐅᑉ ᐅᓪᓗᖏᑕ ᓯᕗᓪᓕᕐᐹᖓᓂ, ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ, ᐅᖃᕐᓗᓂ:

² “ᐃᓅᑉ ᐃᕐᓂᖓ, ᑍᕆᒥᐅᑦ ᐅᖃᐅᓯᖃᓚᐅᕐᒪᑕ ᔨᕉᓴᓕᒥᒃ, ᐅᖃᕐᓗᑎᒃ ‘ᐋᕼᐊ, ᐃᓄᐃᑦ ᐃᑎᕐᑕᕐᕕᖓᑦ ᓯᖁᒥᑕᐅᕗᖅ, ᐅᕙᑦᑎᓐᓄᑦ ᒪᑐᐃᕐᐳᑦ; ᐱᑖᕈᓐᓇᕐᓂᐊᓕᕐᐳᒍᑦ ᑕᕝᕙᓐᖓᑦ, ᒫᓐᓇ ᐊᓯᕈᕐᑕᐅᓯᒪᓕᕐᒪᑕ.’

³ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᑍᕆ ᓵᓐᖓᓂᐊᓕᕐᐸᒋᑦ, ᐃᓅᖃᑎᒌᒡᔪᐊᓄᑦ ᐅᓄᕐᑐᓄᑦ ᐊᑭᕋᕐᑐᕐᑕᐅᑎᑦᓱᒫᕐᐸᑦᓯ, ᐃᒪᕕᐅᑉ ᒥᕿᑦᑕᕐᓂᖓᑐᑦ ᑎᑭᑕᐅᑦᑕᕐᓗᓯ.

⁴ ᑍᕆᐅᑉ ᐃᒡᓗᒐᓴᒡᔪᐊᖏᑕ ᐊᕙᓗᕐᔪᐊᖏᑦ ᓯᖁᒥᑕᐅᔪᒫᕐᐳᑦ, ᐳᕐᑐᔪᖁᑎᖏᓪᓗ ᒪᔪᕐᓯᒪᕖᑦ ᐅᕐᕈᑎᓪᓗᒋᑦ; ᓄᓇᖓ ᑭᓕᐅᕐᑐᕈᒫᕐᐸᕋ, ᕾᕐᑐᐃᓐᓇᐅᓕᕐᓗᓂ.

⁵ ᓄᓗᐊᓄᑦ ᐸᓂᕐᓰᕕᑐᐃᓐᓇᐅᓕᕈᒫᕐᐳᖅ ᐃᒪᐅᑉ ᑭᒡᓕᖓᓃᒻᒪᑦ; ᐅᕙᖓ ᑍᒫᒃ ᐅᖃᕐᐳᖓ, ᐊᑕᓂᖅ ᒎᑎ ᐅᖃᕐᐳᖅ; ᐃᓅᖃᑎᒌᒡᔪᐊᓄᑦ ᓱᓁᕈᑦᔭᐅᔪᒫᕐᐳᖅ ᓇᒡᕚᕐᑕᕐᕕᐅᓗᓂ;

⁶ ᓄᓁᓐᓇᕐᒦᑦᑐᑦ ᓴᕕᒡᔪᐊᒧᑦ ᑐᖁᕋᕐᑕᐅᔪᒫᕐᐳᑦ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.

⁷ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᑍᕆ ᑎᑭᕝᕕᐅᑎᑦᓱᒫᕐᐸᕋ ᐅᓐᓄᐊᓪᓗᐊᑉ ᓇᓛᓂᓐᖔᕐᑐᒧᑦ ᓂᐱᑯᓁᓴᒧᑦ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐊᖓᔪᖅᑳᕐᔪᐊᖑᔪᒧᑦ ᐊᖓᔪᖅᑳᕐᔪᐊᓄᑦ, ᐅᓇᑕᕐᑎᖁᑎᖃᕐᓗᓂ ᐅᓄᕐᑐᕐᔪᐊᓂᒃ ᕿᒻᒥᕐᔪᐊᖃᕐᑐᓂᒃ, ᕿᒧᒃᓯᐅᑎᓂᒡᓗ ᐊᒃᓴᓗᐊᓕᖕᓂᒃ, ᕿᒻᒥᕐᔪᐊᒃᑰᕐᑐᓂᒡᓗ.

⁸ ᓄᓁᓐᓇᕐᒦᑦᑐᑦ ᓴᕕᒡᔪᐊᒧᑦ ᑐᖁᕋᕐᑕᐅᔪᒫᕐᐳᑦ; ᓄᓇ ᖃᑦᑎᒃᓯᑎᓪᓗᒍ ᓴᐴᓗᑕᕆᔪᒫᕐᐹᑦ ᐊᕙᓗᕐᔪᐊᒧᑦ ᒪᔪᕐᕕᓕᐅᕐᓗᑎᒃ, ᒥᓗᕆᐊᖃᑦᑕᐅᑎᓕᐊᕆᓯᒪᔪᒥᒃ ᐊᑐᕐᓗᑎᒃ, ᓴᐴᓗᑕᖃᕐᓗᑎᒃ ᖁᓛᓕᖕᒥᒃ.

⁹ ᐊᕙᓗᕐᔪᐊᖁᑎᓯ ᓯᖁᑦᑎᕐᑕᐅᔪᒫᕐᐳᑦ ᑐᒐᐅᓯᐊᕆᓯᒪᔭᒥᖕᓄᑦ ᐅᖁᒤᑦᑐᓄᑦ, ᐳᕐᑐᔪᖁᑎᓯᓗ ᐅᕐᕈᑎᑦᓱᒫᕐᐰᑦ ᓯᖁᑦᑎᕆᐅᑎᓄᑦ.

¹⁰ ᕿᒻᒥᕐᔪᐊᖏᑕ ᐅᓄᕐᑐᕐᔪᐊᑦ ᐳᔫᕐᑎᑕᖏᓐᓄᑦ ᓂᑦᑍᑦᑐᕐᓯᐅᓕᕈᒫᕐᐳᓯ; ᕿᒻᒥᕐᔪᐊᒃᑰᕐᑐᑦ ᑲᓕᒐᖏᑕᓗ ᐊᒃᓴᓗᐊᓖᓪᓗ ᐃᒃᑑᓕᔮᕐᓂᖏᓐᓄᑦ ᐊᑭᓐᓇᓯ ᐊᐅᓚᑎᑕᐅᔪᒫᕐᐳᑦ, ᐃᑎᕐᑕᕐᕕᒃᑯᑦ ᐃᑎᕈᒫᕐᐳᑦ ᐃᒡᓗᒐᓴᒡᔪᐊᑦ ᓯᖁᒥᑕᐅᓯᒪᓕᕐᑎᓪᓗᒋᑦ.

¹¹ ᕿᒻᒥᕐᔪᐊᖏᑕ ᐃᑎᒐᖏᓐᓄᑦ ᐊᖅᑯᑎᓕᒫᓯ ᑐᓪᓕᕋᕐᑕᐅᔪᒫᕐᐳᑦ; ᐃᓅᖃᑎᓯ ᑐᖁᕋᕐᑕᐅᔪᒫᕐᐳᑦ ᓴᕕᒡᔪᐊᒧᑦ; ᐃᒡᓗᒐᓴᒡᔪᐊᓪᓗ ᓱᑲᖏᑦ ᐊᑦᑕᕐᓇᖏᑦᑐᑦ ᐅᕐᕈᔪᒫᕐᐳᑦ ᓄᓇᒧᑦ.

¹² ᑎᒎᖅᑬᔪᒫᕐᐳᑦ ᐊᒃᓗᐃᑦᔪᑎᑦᓯᓐᓂᒃ ᓂᐅᕕᐊᒃᓴᖁᑎᑦᓯᓐᓂᒡᓗ; ᐃᒡᓗᑦᓯ ᐊᑭᓐᓇᖏᑦ ᐅᕐᕈᑎᑦᓱᒫᕐᐰᑦ ᐃᒡᓗᑦᓯᐊᕙᓯ ᐊᓯᕈᕐᑕᐅᓗᑎᒃ; ᐅᔭᕋᖁᑎᓯ ᕿᔪᐃᓪᓗ ᓄᓇᔭᖁᑎᓯᓗ ᐃᒫᓄᑦ ᐃᒋᑕᐅᔪᒫᕐᐳᑦ.

¹³ ᑐᓴᕐᓂᕋᐅᑎᓄᑦ ᐃᓐᖏᕐᓂᓯ ᓄᖅᑲᕐᑎᑦᓱᒫᕐᐸᒃᑲ, ᑯᑭᑦᑕᐸᐅᑎᐅᔧᓪᓗ ᑐᓴᕐᓴᐅᔪᖃᕈᓐᓃᕈᒫᕐᐳᑦ.

¹⁴ ᓄᓇ ᕾᕐᑐᑐᐃᓐᓇᐅᓕᕈᒫᕐᐳᖅ; ᓄᓗᐊᓄᑦ ᐃᓯᕕᑦᓯᕕᐅᓕᕐᓗᓂ; ᐃᒡᓗᒐᓴᓕᐅᕐᕕᐅᒃᑲᓐᓂᕈᒫᓐᖏᓚᖅ; ᐅᕙᖓ ᐊᑕᓂᐅᔪᖓ ᐅᖃᕋᒪ, ᐅᖃᕐᐳᖅ ᐊᑕᓂᖅ ᒎᑎ.

¹⁵ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᑍᕆᒥᐅᓄᑦ: ᓯᒡᔭᒥ ᓄᓇᖃᕐᑐᑦ ᓴᔪᒍᒫᓐᖏᓛᑦ ᑐᓴᓕᕈᑎᒃ ᑐᖁᑕᐅᔪᓂᒃ, ᐃᑭᓖᓪᓗ ᓂᐹᓂᖏᓐᓂᒃ, ᑐᖁᕅᔪᖃᓕᕐᐸᑦ ᐊᑯᓐᓇᑦᓯᓐᓂ?

¹⁶ ᑕᕝᕙ ᓯᒡᔭᒥᐅᑦ ᐊᖓᔪᖅᑳᕐᔪᐊᖏᑦ ᐃᒃᓯᕙᐅᑕᕐᔪᐊᕐᒥᖕᓂᒃ ᕿᒤᔪᒫᕐᐳᑦ, ᐊᓐᓄᕌᒥᖕᓂᒡᓗ ᐊᖓᔪᖅᑳᕐᔪᐊᕐᓯᐅᑎᓂᒃ ᐲᔧᔪᒫᕐᐳᑦ, ᑕᑯᒥᓇᕐᓴᐅᑎᓖᓪᓗ ᐊᓐᓄᕌᑦ ᐲᔭᕐᓗᒋᑦ; ᓴᔪᖕᓂᕐᒥᒡᓗ ᐊᓐᓄᕌᖔᕈᒫᕐᐳᑦ; ᒪᓂᖅᑲᒥᓗ ᐃᒃᓯᕚᕈᒫᕐᐳᑦ ᓴᔪᑐᐃᓐᓇᓕᕐᓗᑎᒃ, ᐃᓕᑦᓯᓐᓂᒃ ᑲᒪᓂᐊᕐᓂᕐᒧᑦ.

¹⁷ ᐅᒡᒍᐊᕈᑎᓕᐅᕈᒫᕐᐳᓪᓗ ᐃᓕᑦᓯᓐᓄᑦ, ᐅᖃᕐᓗᑎᒃ, ‘ᐃᒫᓂᑦ ᑕᑯᒃᓴᐅᔪᓐᓃᕐᐳᑎᑦ, ᐃᒡᓗᒐᓮᑦ ᐅᐱᓐᓇᕐᑐᑦ, ᐃᒪᕕᖕᒥ ᐊᔪᖏᑦᑐᕐᔪᐊᖑᓚᐅᕐᑐᓯ, ᐃᓄᖁᑎᑎᓪᓗ ᓄᓇᖃᕐᑐᑦ ᑕᕝᕙᓂ, ᑲᑉᐱᐊᒋᔭᐅᓚᐅᕐᑐᓯ ᓄᓇᑐᐃᓐᓇᒥᐅᓕᒫᓄᑦ!

¹⁸ ᓵᓚᐅᕕᑦᓯ ᐅᓪᓗᖓᓂ ᕿᑭᕐᑍᑦ ᓴᔪᓚᐅᕐᐳᑦ; ᕿᑭᕐᑕᒥᐅᑦ ᑲᑉᐱᐊᓱᓕᓚᐅᕐᐳᑦ ᐊᓯᕈᕐᑕᐅᒐᑦᓯ.’

¹⁹ “ᑕᕝᕙ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᒡᓗᒐᓴᓯ ᓯᖁᑦᑎᕐᑕᐅᑎᒃᑯᒃᑭᑦ, ᐃᒡᓗᒐᓴᒃᑎᑐᑦ ᐃᓄᖃᕈᓐᓃᕐᑐᑎᑐᑦ, ᐃᑎᔪᒧᑦ ᑎᑭᑕᐅᑎᒃᑯᒃᑭᑦ, ᐃᒪᕐᔪᐊᕐᒧᓪᓗ ᐅᓕᒃᑕᐅᒍᕕᑦ,

²⁰ ᑐᖁᖓᔪᑦ ᐃᓂᖏᓐᓄᑦ ᑲᑕᒃᑎᑦᓱᒫᕐᐸᒋᑦ ᐃᑎᕐᓴᒧᑦ, ᐃᓄᖕᓄᑦ ᓯᕗᓪᓕᕕᓂᕐᓄᑦ, ᑕᕝᕙᓃᖁᓪᓗᑎᑦ ᓄᓇᕐᔪᐊᑉ ᐊᑖᓂ, ᑐᖁᖓᔪᑦ ᐊᑯᕐᖓᓐᓂ, ᐃᑎᕐᓴᒥ ᐃᓂᖃᕐᑐᓂ, ᓄᓇᓕᖕᓄᑦ ᐃᓚᒋᔭᐅᔪᓐᓃᑯᓪᓗᓯ ᐃᓅᔪᓂᓗ ᐃᓂᒃᓴᖃᕈᓐᓁᖁᓪᓗᓯ.

²¹ ᑲᑉᐱᐊᓱᖕᓂᕐᒥᒃ ᐃᓱᓕᓐᓂᖃᕐᑎᓐᓂᐊᕐᐸᑦᓯ, ᓄᖑᑕᐅᔪᒫᕐᐳᓯᓗ; ᕿᓂᕐᑕᐅᒐᓗᐊᕈᑦᓯ, ᓇᓂᔭᐅᔪᒫᓐᖏᓚᓯ, ᐊᑕᓂᖅ ᒎᑎ ᐅᖃᕐᐳᖅ.”