ᐃᓯᑭᐊᓕᐅᑉ ᐊᒡᓚᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᒧᓁᑎᒥᐅᑦ ᐱᐅᓯᕆᔪᒫᕐᑕᖏᓐᓂᒃ ᐅᖃᐅᑎᔭᐅᓂᖓᑦ

¹ ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐊᒧᓁᑎᒥᐅᑦ ᓄᓇᖓ ᐊᑭᕋᕐᑐᕐᓗᒍ ᐅᖃᓪᓚᒋᑦ.

³ ᐊᒧᓁᑎᒥᐅᑦ ᐅᖃᐅᑎᒃᑭᑦ, ᓈᓚᒋᑦᓯ ᐊᑕᓂᐅᑉ ᒎᑎᐅᑉ ᐅᖃᕐᑕᖏᓐᓂᒃ: ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᐅᖃᓚᐅᕋᑦᓯ ᐃᒫᒃ, ‘ᐋᕼᐊ!’ ᑐᒃᓯᐊᕐᕕᒡᔪᐊᖁᑎᒐ ᓇᕐᕈᓇᕐᓯᑎᑕᐅᑎᓪᓗᒍ, ᐃᓴᕆᐊᓕᐅᓪᓗ ᓄᓇᖓ ᐃᓄᖃᕈᓐᓃᕐᑎᕐᑕᐅᑎᓪᓗᒍ, ᔫᑕᐅᓪᓗ ᑭᖑᕚᖏᑦ ᐊᐅᓪᓚᕈᑦᔭᐅᑎᓪᓗᒋᑦ;

⁴ ᑍᒤᒻᒪᑦ ᓯᕿᓂᐅᑉ ᓄᐃᕕᐊᑕ ᓇᓛᓂᒥᐅᑦ ᐃᓅᖏᓐᓅᑦ ᐃᓄᖁᑎᑖᕆᔭᐅᔪᒫᕐᐳᓯ, ᑕᖕᒫᕐᑎᕐᓗᑎᒡᓗ ᐊᑯᓐᓇᑦᓯᓐᓂ ᓄᓇᖃᓕᕈᒫᕐᐳᑦ; ᐱᕈᕐᑐᖁᑎᓯ ᓂᕆᔪᒫᕐᐰᑦ, ᐃᒻᒧᖁᑎᓯᓗ ᐃᒥᕐᓗᒋᑦ.

⁵ ᕌᐸᒥᐅᑦ ᐃᒡᓗᒐᓴᒡᔪᐊᖏᑦ ᑳᒥᓕᖕᓄᑦ ᓂᕿᒃᓴᖃᕐᕕᓐᖑᕐᑎᑦᓱᒫᕐᐸᕋ ᐊᒧᓁᑎᒥᐅᓪᓗ ᓄᓇᓕᒫᖓ ᓰᐱᒃᑯᕕᓐᖑᕐᑎᓪᓗᒍ. ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ.

⁶ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᖁᕕᐊᓱᖕᓂᕐᒧᑦ ᐃᑎᒐᓯ ᑐᒃᑲᕐᑕᓚᐅᕐᐸᓯ ᐸᑎᒃᑕᕐᓗᓯᓗ ᐃᓴᕆᐊᓕᐅᑉ ᓄᓇᖓᓂᒃ ᒥᑕᐅᑎᖃᕈᓐᓇᕐᕕᓕᒫᑦᓯᓐᓄᑦ.

⁷ ᑍᒤᒻᒪᑦ, ᑕᑯᒋᑦ, ᐃᓅᖃᑎᒌᒡᔪᐊᓄᑦ ᐱᔭᐅᑎᑦᓱᒫᓕᕐᐸᑦᓯ, ᐱᖁᑎᑦᓯᓐᓂᒃ ᓇᒡᕚᕐᑕᕐᕕᐅᔪᒫᕐᐳᓯ; ᓄᖑᑕᐅᔪᒫᕐᐳᓯ ᓄᓇᒥᑦ; ᑍᒫᒃ ᐊᓯᕈᕈᒫᕐᐸᑦᓯ. ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ.”

ᒧᐊᐱᒥᐅᑦ ᐱᐅᓯᕆᔪᒫᕐᑕᖏᓐᓂᒃ ᐅᖃᑎᔭᐅᓂᖓᑦ

⁸ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᒧᐊᐱᒥᐅᑦ ᓰᐊᕆᒥᐅᓪᓗ ᐅᖃᓚᐅᕐᒪᑕ ᐃᓴᕆᐊᓕᒥᐅᓂᒃ ᐊᑦᔨᐅᑐᐃᓐᓇᕐᓂᕅᓪᓗᑎᒃ ᐃᓅᖃᑎᒌᒡᔪᐊᓕᒫᓄᑦ ᐊᓯᖏᓐᓄᑦ.

⁹ ᑍᒤᒻᒪᑦ ᒧᐊᐱᒥᐅᑦ ᓴᐴᓗᑕᖏᑦ ᐃᒡᓗᒐᓴᒡᔪᐊᖏᑕ ᓯᓈᓃᑦᑐᑦ ᐊᖕᒪᕈᒫᕐᐸᒃᑲ, ᓄᓇᓕᒡᔪᐊᑦ ᐅᐱᓐᓇᐅᑎᒋᔭᖏᑦ ᐱᑦ-ᔨᓯᒫᔅ, ᐰᓕ-ᒥᐅᓂᓗ, ᑭᕆᐊᑍᒥᓗ.

¹⁰ ᐃᓅᖃᑎᒌᓄᑦ ᓯᕿᓂᐅᑉ ᓄᐃᕕᐊᑕ ᓇᓛᓂᒥᐅᓄᑦ ᒧᐊᐱᒥᐅᑦ ᐊᒧᓁᒥᐅᓪᓗ ᐃᓄᖁᑎᑖᕆᔭᐅᑎᑦᓱᒫᕐᐸᒃᑲ, ᐃᓅᖃᑎᒌᒡᔪᐊᓄᑦ ᐃᖅᑲᐅᒪᔭᐅᔪᓐᓁᖁᓪᓗᒋᑦ,

¹¹ ᑍᒫᒃ ᒧᐊᐱ ᓱᒋᐊᕈᒫᕐᐸᕋ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ.”

ᐄᑐᒥᐅᑦ ᐱᐅᓯᕆᔪᒫᕐᑕᖏᓐᓂᒃ ᐅᖃᑎᔭᐅᓂᖓᑦ

¹² “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐄᑐᒥᐅᑦ ᔫᑕᐅᑉ ᑭᖑᕚᖏᓐᓂᒃ ᐊᑭᓂᐊᓚᐅᕐᒪᑕ ᑕᒪᓐᓇ ᐸᓯᔭᒃᓴᐅᑦᔪᑎᒋᓂᐊᓕᕐᐹᑦ,

¹³ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᓱᒋᐊᕈᒫᕐᐸᒃᑲ ᐄᑐᒥᐅᑦ, ᑐᖁᕅᔪᒫᕐᐳᖓ ᐃᓄᖕᓂᒃ ᐆᒪᔪᓂᒡᓗ; ᐃᓄᖃᕈᓐᓃᕐᑎᑦᓱᒫᕐᐸᕋ; ᑏᒪᓐᓂᒥᑦ ᐱᒋᐊᕐᓗᒍ ᑎᑖᓂᒥᐅᑦ ᑎᑭᓪᓗᒋᑦ ᓴᕕᒡᔪᐊᒧᑦ ᑐᖁᕋᕐᑕᐅᔪᒫᕐᐳᑦ.

¹⁴ ᐃᓄᖁᑎᒃᑲ ᐃᓴᕆᐊᓕᒥᐅᑦ ᐊᑭᓂᐊᕐᑎᑦᓱᒫᕐᐸᒃᑲ ᐄᑐᒥᒥᐅᓂᒃ; ᐱᓇᓱᐊᖁᓪᓗᒋᑦ ᓂᓐᖓᐅᑦᔨᓯᒪᓂᕋ ᒪᓕᒡᓗᒍ; ᖃᐅᔨᖁᓪᓗᒋᑦ ᐊᑭᓂᐊᕐᓂᓐᓂᒃ, ᐊᑕᓂᖅ ᒎᑎ ᐅᖃᕐᐳᖅ.”

ᐱᓕᔅᑍᓂᒥᐅᑦ ᐱᐅᓯᕆᔪᒫᕐᑕᖏᓐᓂᒃ ᐅᖃᐅᑦᔭᐅᓂᖓᑦ

¹⁵ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᐱᓕᔅᑍᓂᒥᐅᑦ ᐊᑭᓂᐊᓚᐅᕐᒪᑕ ᐆᒻᒪᑎᒥᒍᑦ ᒥᑕᐅᑎᖃᕐᓗᑎᒃ ᓄᖅᑲᔪᐃᑦᑐᒥᒃ ᐆᒥᓱᖕᓂᕐᒥᖕᓄᑦ;

¹⁶ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᑕᑯᒋᑦ, ᐱᓕᔅᑍᓂᒥᐅᑦ ᓱᒋᐊᕈᒫᕐᐸᒃᑲ, ᓯᕆᑍᑎᓪᓗ ᓄᖑᓪᓗᒋᑦ, ᐊᒥᐊᒃᑯᖏᓪᓗ ᑕᕆᐅᑉ ᓯᓈᓃᑦᑐᑦ ᓄᖑᑦᓱᒫᕐᐸᒃᑲ.

¹⁷ ᓱᒋᐊᕈᒫᕐᐸᒃᑲ ᐊᑭᓂᐊᕕᒡᔪᐊᕐᓗᒋᑦ ᓂᓐᖓᐅᒪᓂᓐᓄᑦ ᐋᖅᑭᒃᓱᕐᓗᒋᑦ, ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓᐅᒐᒪ ᐊᑕᓂᖅ, ᑖᒃᑯᓄᖓ ᐊᑭᓂᐊᕐᑐᖅ.”