ᐃᓯᑭᐊᓕᐅᑉ ᐊᒡᓚᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᑯᓯᒃ ᓄᖑᓪᓛᓯᒪᔪᖅ

¹ ᐊᐅᓪᓚᕐᑎᑕᐅᓯᒪᓂᑦᑕ ᐊᕐᕌᒍᐃᑦ 9ᖓᓐᓂ, ᑕᖅᑮᑦ ᖁᓕᖓᓐᓂ, ᐅᓪᓗᖏᑕ ᖁᓕᖓᓐᓂ, ᐊᑕᓂᐅᑉ ᐅᖃᕐᕕᒋᕚᖓ, ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐅᓪᓗᖅ ᑎᑎᕋᕈᒃ ᑕᕝᕙᓂᓪᓚᕆᒃ ᐅᓪᓗᒥ. ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦ ᔨᕉᓴᓕᒥ ᐊᕙᑕᖏᕐᓯᓯᒪᓪᓗᓂ ᐱᕖᕈᑦᔨᓯᒪᓕᕐᒪᑦ.

³ ᐃᓄᖁᑎᒃᑲ ᐊᑭᕋᕐᑐᕐᑎᐅᓪᓗᑎᒃ ᑭᖑᕚᖑᖃᑎᒌᑦ ᐅᖃᐅᑎᒃᑭᑦ ᐊᑦᔨᐅᔪᒥᒃ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᒃᑯᓯᒃ ᓴᒡᕙᓕᕈᒃ, ᐃᒻᒥᕐᓗᒍᓗ;

⁴ ᓂᕿᑦᓯᐊᕙᐅᓂᕐᓂᒃ ᐆᒃᓯᕐᑐᕐᓗᒍ, ᐊᒃᓴᖅᑯᕐᓂᒃ ᖁᒃᑐᕋᕐᓂᒡᓗ; ᓴᐅᓂᖃᕐᑐᓂᒃ ᓂᕈᐊᕆᓲᑦᓯᓐᓂᒃ.

⁵ ᓰᐲᑦ ᓂᕿᑦᓯᐊᕙᐅᓂᕐᐹᖏᓐᓂᒃ ᐱᓗᑎᑦ, ᐃᒐ ᕿᔪᒃᑐᕈᒃ; ᐅᒃᑯᓯᒃ ᑎᕐᑎᓕᕐᑎᓪᓗᒍ, ᓴᐅᓂᖃᕐᑐᑦ ᑎᕐᑎᑦᑐᒦᖁᓪᓗᒋᑦ.

⁶ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑲᑉᐱᐊᓐᓇᒦᖑᕗᖅ ᐃᒡᓗᒐᓴᒡᔪᐊᕐᒥᐅᓄᑦ ᐃᓄᐊᕐᑎᓄᑦ, ᐅᒃᑯᓯᖕᒥᒃ ᒪᓐᖏᕐᑐᕆᓂᕐᒥᒃ ᓴᓗᒻᒪᕆᐊᕐᑕᐅᓚᐅᕐᓯᒪᖏᑦᑐᒥᒃ ᐊᑦᔨᖃᕐᐳᑦ, ᐆᒋᖏᑦ ᐊᑕᐅᓯᐅᓈᕐᑎᕐᓗᒋᑦ ᐲᔭᕐᑕᐅᕗᑦ, ᓂᕈᐊᕐᕕᐅᓇᑎᒃ.

⁷ ᐃᓄᐊᕐᑕᐅᖃᑦᑕᕐᑐᑦ ᐃᒡᓗᒐᓴᒡᔪᐊᓂ ᓱᓕ ᐊᐅᖏᑦ ᐃᒡᓗᒐᓴᖕᓃᑉᐳᑦ; ᐊᐅᓈᕐᑎᑕᐅᖃᑦᑕᕐᒪᑕ ᕾᕐᑐᒧᑦ; ᓄᓇᒧᑦ ᓴᐅᔭᐅᔪᓐᓇᕐᑐᒧᑦ ᐊᐅᓈᖃᑦᑕᖏᒻᒪᑕ.

⁸ ᓂᓐᖓᒃᑎᑕᐅᓂᒃᑯᑦ ᐊᑭᓂᐊᖁᓪᓗᖓ, ᑐᖁᑕᖏᑕ ᐊᐅᖏᑦ ᕾᕐᑐᒥ ᐊᐅᓈᕐᑎᑕᐅᑎᑉᐸᒃᑲ, ᓴᐅᔭᐅᔪᓐᓇᖁᓇᒋᑦ.

⁹ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑲᑉᐱᐊᓐᓇᒦᒃ ᐃᒡᓗᒐᓴᒡᔪᐊᕐᒥ ᐃᓄᐊᕐᑏᑦ! ᐅᕙᖓᑦᑕᐅᖅ ᕿᔪᒃᓴᓂᒃ ᖃᓕᕇᒃᑎᑦᓯᖃᑕᐅᓂᐊᓕᕐᐳᖓ.

¹⁰ ᐃᑯᐊᓚᔪᖅ ᕿᔪᒃᑐᕐᑕᐅᒋᐊᕐᓕ ᐃᑯᐊᓪᓚᒋᐊᕐᓂᐊᕐᒪᑦ; ᐆᒋᖏᑦ ᖃᓚᑦᓯᐊᕐᓂᐊᕐᒪᑕ, ᐃᓚᐅᕈᓯᕐᑐᑦᓯᐊᕐᓗᒍᓗ ᒪᒪᕐᓴᐅᑎᒃᓴᖏᓐᓂᒃ, ᑎᕐᑎᑎᑦᓯᐊᕐᓗᒍ ᓴᐅᓂᖏᑦ ᐆᑦᓯᐊᖁᓪᓗᒋᑦ.

¹¹ ᐅᒃᑯᓯᒃ ᑲᓐᓄᔭ ᐃᓗᓕᖃᕈᓐᓃᕐᑎᓪᓗᒍ ᕿᔪᒃᓴᑦ ᖄᖓᓄᑦ ᐃᓕᔭᐅᓕ, ᐊᐅᒪᕈᕐᑎᓪᓗᒍ ᓴᓗᒪᖏᓐᓂᖓ ᐊᐅᖕᓂᐊᕐᒪᑦ, ᒪᓐᖏᕐᑐᕆᐅᓂᖓᓗ ᐲᔭᕐᓗᓂ.

¹² ᓱᓇᐅᖏᑦᑐᒧᑦ ᑕᖃᓴᑦᔪᑕᐅᓕᕐᒪᑦ; ᒪᓐᖏᕐᑐᕆᐅᓂᖓᓗ ᐃᑦᔪᓗᐊᕐᒪᑦ ᐃᑯᒪᒧᑦ ᓄᖑᓐᓂᐊᓐᖏᓚᖅ.

¹³ ᓴᓗᒤᑦᑑᓂᓯ ᐃᒃᓯᒎᕐᓂᖅ ᒪᓐᖏᕐᑐᕆᐅᖕᒪᑦ. ᐃᓕᑦᓯᓐᓂᒃ ᓴᓗᒻᒤᔪᓐᓇᓚᐅᕋᓗᐊᕐᐳᖓ ᓴᓗᒻᒪᕈᒪᓚᐅᓐᖏᓚᓯᓕ ᓴᓗᒤᓐᓂᑦᓯᓐᓂᑦ, ᓴᓗᒻᒪᕐᓴᕐᑕᐅᓂᐊᕈᓐᓃᕐᐳᓯ ᓂᓐᖓᐅᓯᕋ ᐃᓕᑦᓯᓐᓄᑦ ᐃᓱᓕᓚᐅᖏᓐᓂᖓᓂ.

¹⁴ ᐅᕙᖓ ᐊᑕᓂᐅᔪᖓ ᐅᖃᕇᕐᐳᖓ; ᖃᓄᐃᓕᒋᐊᕐᕕᒃᓴᕋ ᓇᓪᓕᐅᑎᔪᒫᕐᐳᖅ; ᐅᑎᕆᐊᕐᓂᐊᓐᖏᓚᖓ, ᑲᒪᒋᓐᖏᑕᖃᑦᔮᓇᖓᓗ, ᓴᖑᑦᔮᓇᖓᓗ; ᐱᐅᓯᕆᔭᓯ ᐱᓂᐊᕐᓂᓯᓗ ᒪᓕᒡᓗᒋᑦ ᐃᖅᑲᕐᑐᕈᒫᓕᕐᐸᑦᓯ, ᐊᑕᓂᖅ ᒎᑎ ᐅᖃᕐᐳᖅ.”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᓄᓖᕐᓂᖓ

¹⁵ ᑕᕝᕙ ᐊᑕᓂᐅᑉ ᐅᖃᕐᕕᒋᒋᕚᖓ, ᐅᖃᕐᓗᓂ:

¹⁶ “ᐃᓅᑉ ᐃᕐᓂᖓ, ᑕᑯᒋᑦ, ᐅᐸᓗᕐᓇᕐᑐᒃᑯᑦ ᐅᖓᒋᓂᕐᐹᕐᓂᒃ ᐲᕐᓯᓂᐊᕐᐳᖓ; ᕿᒃᓵᒍᑎᒋᔭᕆᐊᖃᕐᓂᐊᓐᖏᓚᑦ ᐅᕝᕙᓗ ᕿᐊᑦᔪᑎᒋᔭᕆᐊᖃᕐᓂᐊᕐᓇᒍ ᖁᕝᕕᐅᕈᑎᒋᔭᕆᐊᖃᕐᓂᐊᓐᖏᓚᑦ.

¹⁷ ᐊᓂᕐᓴᐅᒥᒍᕕᑦ ᑐᓵᔭᐅᔭᕆᐊᖃᓐᖏᓚᖅ; ᑐᖁᔪᒧᑦ ᕿᒃᓵᒋᐊᖃᕐᓂᐊᓐᖏᓚᑎᑦ. ᓂᐊᖁᕐᐱᑦ ᓂᒥᕆᕙᒃᑕᖓᓂᒃ ᐊᑐᕆᐊᖃᕐᐳᑎᑦ, ᐃᑎᒐᒍᑏᒃᑭᒡᓗ ᐊᑎᓗᒋᒃ, ᖃᓃᓪᓗ ᒪᑐᓯᒪᑦᑍᓕᒍᒃ, ᕿᒃᓵᒃᑐᓪᓗ ᓂᕆᓲᖏᓐᓂᒃ ᓂᕆᑦᑍᓕᓗᑎᑦ.”

¹⁸ ᐅᓪᓛᒃᑯᑦ ᐃᓄᖕᓄᑦ ᐅᖃᓪᓚᓚᐅᕐᐳᖓ, ᐅᓐᓄᒃᑎᓪᓗᒍᓕ ᓄᓕᐊᕋ ᑐᖁᓚᐅᕐᐳᖅ. ᖃᐅᖕᒪᓪᓗ ᐅᓪᓛᒃᑯᑦ ᐊᑐᕐᑕᐅᖁᔭᐅᓚᐅᕐᑐᖅ ᐊᑐᓚᐅᕐᐸᕋ.

¹⁹ ᐃᓄᖕᓄᑦ ᐅᖃᐅᑦᔭᐅᓚᐅᕐᐳᖓ, “ᐅᖃᑦᔮᓐᖏᓚᑏᑦ ᖃᓄᖅ ᑕᒪᓐᓇ ᐅᕙᑦᑎᓐᓄᑦ ᑐᑭᖃᕐᒪᖔᑦ, ᓱᖕᒪᑦ ᑍᒤᓕᐅᕐᒪᖔᕐᐱᑦ?”

²⁰ ᑕᕝᕙ ᐅᖃᐅᑎᓕᕐᐸᒃᑲ, “ᐊᑕᓂᐅᑉ ᐅᖃᐅᓯᖓᑕ ᑎᑭᕝᕕᒋᓚᐅᕐᒪᖓ ᐅᖃᕐᓗᓂ:

²¹ ‘ᐃᓴᕆᐊᓕᐅᑉ ᑭᖑᕚᖏᑦ ᐅᖃᐅᑎᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐃᑦᔪᕐᓁᑦᑐᕕᖁᑎᒐ ᓇᕐᕈᓇᕐᓯᑎᓐᓂᐊᕐᐸᕋ, ᐱᔪᓐᓇᕐᓂᑦᓯᓐᓄᑦ ᐱᐅᔪᕆᑦᔪᑎᒋᓯᒪᔭᓯ, ᑕᑯᒥᒋᔭᓯᓗ, ᑕᕐᓂᑦᓯᓗ ᐱᔪᒪᔭᖓ; ᐃᕐᓂᓯ ᐸᓂᓯᓗ ᔨᕉᓴᓕᒧᑦ ᕿᒪᒃᓯᒪᔭᓯ ᓴᕕᒡᔪᐊᓄᑦ ᑐᖁᕋᕐᑕᐅᔪᒫᕐᐳᑦ.

²² ᐊᑐᕐᑕᓐᓂᒃ ᐊᑐᕆᐊᖃᕈᒫᕐᐳᓯ; ᖃᓂᓯ ᒪᑐᐊᕈᒫᓐᖏᓚᓯ, ᕿᒃᓵᒃᑐᓪᓗ ᓂᕆᕙᒃᑕᖏᓐᓂᒃ ᓂᕆᔭᕆᐊᖃᕈᒫᓐᖏᓚᓯ.

²³ ᓂᐊᖁᓯᓐᓂ ᓂᒥᕆᕙᒃᑕᑦᓯᓐᓂᒃ ᐊᑐᕆᐊᖃᕈᒫᕐᐳᓯ ᐃᑎᒐᒍᑎᓯᓗ ᐊᑐᕐᓗᒋᑦ; ᕿᐊᔪᒫᓐᖏᓚᓯ ᖁᕝᕕᐅᕈᑎᖃᖏᓪᓗᓯᓘᓐᓃᑦ, ᐊᔪᕐᑐᓕᓂᑦᓯᓐᓂᒃ ᐅᒡᒍᐊᕈᑎᖃᓕᕈᒫᕐᐳᓯ ᐃᓕᑦᓯᓐᓄᑦ ᐊᑐᓂᑦ.

²⁴ ᑕᕝᕙ ᐃᓯᑭᐊᓕ ᐃᓕᑦᓯᓐᓄᑦ ᓇᓗᓁᒃᑯᑕᐅᓕᕈᒫᕐᐳᖅ; ᐊᑐᕐᑕᓕᒫᖓᓂᒃ ᐊᑑᑎᔭᕆᐊᖃᕈᒫᕐᐳᓯ. ᑕᒪᓐᓇ ᓇᓪᓕᐅᑎᒃᐸᑦ, ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ ᒎᑎ.’

²⁵ “ᐃᕝᕕᓪᓕ ᐃᓅᑉ ᐃᕐᓂᖓ, ᐅᓪᓗᖅ ᓇᓪᓕᐅᑎᒃᐸᑦ ᓴᓐᖏᑦᔪᑎᒋᔭᖓᑦ ᐲᕈᒃᑯ, ᖁᕕᐊᒋᔭᖓᑦ ᓂᕐᑐᕐᓇᐅᑎᒋᔭᖓᓪᓗ, ᑕᑯᒥᓇᕆᔭᖓᑦ ᐆᒻᒪᑎᖏᑕᓗ ᐱᔪᒥᓇᕆᔭᖓᑦ, ᐃᕐᓂᖏᓐᓂᒃ ᐸᓂᖏᓐᓂᒡᓗ ᐊᕐᓵᕈᒃᑭᑦ.

²⁶ ᑕᒪᓐᓇ ᓇᓪᓕᐅᑎᒃᐸᑦ ᕿᒫᔪᒥᑦ ᑎᑭᑕᐅᒍᕕᑦ ᐅᖃᕆᐊᕐᑐᕐᑐᒥᒃ ᑕᒪᑐᒥᖓ.

²⁷ ᐅᓪᓗᒥ ᑕᕝᕙᓂᑦᓮᓐᓇᖅ ᕿᒫᔪᒧᑦ ᑎᑭᑕᐅᒍᕕᑦ ᐅᖃᕈᓐᓇᕐᓯᔪᒫᕐᐳᑎᑦ, ᐅᖃᓪᓚᓕᕐᓗᑎᓪᓗ ᐅᖃᕈᓐᓇᖏᑦᑑᔪᓐᓃᕐᓗᑎᑦ. ᑍᒤᒻᒪᑦ ᓇᓗᓁᒃᑯᑕᐅᔪᒫᕐᐳᑎᑦ ᐃᓄᖕᓄᑦ; ᖃᐅᔨᔪᒫᕐᐳᓪᓗ ᐅᕙᖓᐅᒐᒪ ᐊᑕᓂᖅ.”