ᐃᓯᑭᐊᓕᐅᑉ ᐊᒡᓚᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᕐᓈᒃ ᓄᑲᕇᒃ ᐊᔪᕐᑐᓕᔩᒃ

¹ ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐊᕐᓇᕐᑕᖃᓚᐅᕐᐳᖅ ᓄᑲᕇᖕᓂᒃ, ᐊᓈᓇᖃᕐᑑᖕᓂᒃ ᑖᑦᓱᒥᖓᑦᓮᓐᓇᖅ.

³ ᑖᒃᑯᐊᒃ ᐊᖑᓐᓂᐊᕐᑎᐅᓚᐅᕐᐴᒃ ᐄᑦᔨᑉᑎᒥ; ᐃᓅᓱᒃᑑᓂᕐᒥᖕᓂᑦ ᐊᖑᓐᓂᐊᕐᑎᐅᓕᓚᐅᕐᐴᒃ; ᑕᕝᕙᓂᓗ ᐃᕕᐊᖏᖏᒃ ᐊᒃᑐᐊᔭᐅᓚᐅᕐᐴᒃ ᐱᖃᑎᖃᓚᐅᕐᓯᒪᖏᑦᑑᒡᓗ ᓈᖏᒃ ᐊᒃᑐᐊᔭᐅᓪᓗᑎᒃ.

⁴ ᐊᖓᔪᒃᓯᖅ ᐊᑎᖃᕐᐳᖅ ᐅᕼᐅᓚᒥᒃ, ᓄᑲᕐᓕᕐᓗ ᐊᑎᖃᕐᓗᓂ ᐅᕼᐅᓕᐸᒥᒃ, ᑕᒪᖏᒃ ᓄᓕᐊᕐᑖᕆᓚᐅᕐᐹᒃᑲᒃ, ᐸᓂᒃᑖᕐᕕᒋᓪᓗᒋᒃ ᐃᕐᓂᕐᑖᕐᕕᒋᓪᓗᒋᒡᓗ. ᐊᑎᖏᒃ ᐃᒤᓕᖓᕘᒃ, ᓴᒥᐊᕆᐊ ᐅᕼᐅᓚᐅᕗᖅ, ᔨᕉᓴᓕᒻᓗ ᐅᕼᐅᓕᐸᐅᓪᓗᓂ.

⁵ ᐅᕼᐅᓚ ᓄᓕᐊᕆᓕᕋᓗᐊᕋᒃᑯ ᑲᔪᓯᑐᐃᓐᓇᓚᐅᕐᐳᖅ ᐊᖑᓐᓂᐊᕐᑎᐅᓂᕐᒥᓂᒃ; ᐃᒃᓯᒍᕐᓂᖃᓗᐊᕋᒥ ᐅᖓᒋᔭᒥᓂᒃ ᐊᓯᕆᐊᒥᐅᓂᒃ,

⁶ ᑖᒃᑯᐊ ᐅᓇᑕᕐᑎᐅᕗᑦ ᐊᐅᐸᓪᓚᕆᒃᑐᓂᒃ ᐊᓐᓄᕌᖃᕐᓗᑎᒃ, ᓄᓇᓕᖕᓂ ᐊᖓᔪᖅᑳᖑᕗᑦ ᐅᓇᑕᕐᑎᓄᓪᓗ ᐊᖓᔪᖅᑳᖑᓪᓗᑎᒃ, ᑕᒪᕐᒥᒃ ᐊᖑᑎᑦᓯᐊᕙᐅᕗᑦ ᐃᓅᓱᒃᑑᓪᓗᑎᒃ, ᕿᒻᒥᕐᔪᐊᒃᑰᕐᑎᐅᕗᑦ ᕿᒻᒥᔪᐊᓂ ᐃᑭᒪᓪᓗᑎᒃ.

⁷ ᐃᒻᒥᓂᒃ ᐂᑦᑑᑎᒋᕗᖅ ᑖᒃᑯᓄᖓ ᐊᖑᓐᓂᐊᕐᓂᒃᑯᑦ, ᐊᓯᕆᐊᒥᐅᑦ ᐊᖑᑎᑦᓯᐊᖁᑎᖏᑕ ᐱᔪᒥᓇᕐᓂᕐᐹᓕᒫᖏᓐᓄᑦ; ᐃᒻᒥᓂᒡᓗ ᓇᕐᕈᓇᕐᓯᑎᓯᒪᕗᖅ ᐃᒃᓯᒎᕐᓂᒃᑯᑦ ᐱᓇᓱᐊᖃᑎᒋᖃᑦᑕᕐᑕᓕᒫᖏᑕ ᒎᑎᓐᖑᐊᖏᓐᓄᑦ.

⁸ ᐄᑦᔨᑉᑎᒥᓗ ᐊᖑᓐᓂᐊᕐᑎᓐᖑᓚᐅᕐᓂᓂ ᑲᔪᓯᑎᑉᐹ; ᓂᕕᐊᕐᓵᖑᓂᕐᒥᓂᑦ ᐊᖑᑎᓄᑦ ᐃᓐᓇᖓᖃᑕᐅᕙᓕᓚᐅᕐᐳᖅ ᐱᖃᑎᖃᓚᐅᕐᓯᒪᖏᓐᓂᓂ ᐊᒃᑐᐊᔭᐅᑎᑦᓱᒍ ᐃᒃᓯᒎᕐᓂᖏᓪᓗ ᐃᓱᒤᓐᓇᕐᕆᑎᓪᓗᒋᑦ ᐃᒻᒥᓄᑦ.

⁹ ᑍᒤᒻᒪᑦ ᐅᖓᒋᓕᕐᑕᖏᓐᓄᑦ ᑐᓂᑦᔪᑎᒋᓚᐅᕐᐸᕋ, ᐊᓯᕆᐊᒥᐅᑦ ᐱᔪᓐᓇᕐᓂᖏᓐᓄᑦ, ᐃᒃᓯᒎᕐᓂᕐᒥᓄᑦ ᑍᒤᑦᑐᒪᖕᒪᑦ.

¹⁰ ᑖᒃᑯᐊ ᐊᓐᓄᕅᔭᕐᑎᓚᐅᕐᐹᑦ; ᐃᕐᓂᖏᑦ ᐸᓂᖏᓪᓗ ᑎᒍᔭᐅᓪᓗᑎᒃ; ᓴᕕᒡᔪᐊᒧᓪᓗ ᑐᖁᑕᐅᓪᓗᓂ; ᐊᕐᓇᓄᑦ ᐅᓂᒃᑳᕆᔭᐅᕙᓕᓚᐅᕐᐳᖅ, ᐊᑭᒋᐊᕐᑕᐅᓂᒃᑯᑦ ᑐᖁᑕᐅᓂᕋᕐᑕᐅᓪᓗᓂ.

¹¹ ᓄᑳᑕ ᐅᕼᐅᓕᐸᐅᑉ ᑕᒪᓐᓇ ᖃᐅᔨᓚᐅᕋᓗᐊᕐᐹ, ᐱᐅᖏᑦᑐᓕᓂᕐᓴᐅᓂᕐᒥᓄᓪᓕ ᐃᒃᓯᒎᕐᓂᕐᒥᓄᑦ ᐊᖑᓐᓂᐊᓚᐅᕐᐳᖅ ᓱᓕ, ᐱᓂᕐᓴᐅᓪᓗᓂ ᐊᖓᔪᒋᓚᐅᕐᑕᒥᓂᑦ.

¹² ᑖᑦᓱᒪ ᐊᓯᕆᐊᒥᐅᑦ ᐃᒃᓯᒋᓚᐅᕆᕔᑦ, ᐊᐅᓚᑦᓯᔨᖏᑦ ᐅᓇᑕᕐᑎᖏᑕᓗ ᐊᖓᔪᖅᑳᖏᑦ, ᐅᓇᑕᕐᑎᖁᑎᖏᓪᓗ ᐅᓇᑕᐅᑎᓂᒃ ᐊᓐᓄᕌᓯᒪᔪᑦ, ᕿᒻᒥᕐᔪᐊᕐᑎᖏᓪᓗ, ᐃᓂᖁᓇᕐᑑᓚᐅᕐᒪᑕ ᐃᓅᓱᒃᑑᓪᓗᑎᒃ.

¹³ ᑕᑯᓚᐅᕐᐸᕋᓗ ᓇᕐᕈᓇᕐᓯᑎᑕᐅᓯᒪᔪᖅ; ᑖᒃᑯᐊᒃ ᐊᖓᔪᒌᒃ ᐊᑦᔨᒌᒥᒃ ᐱᓂᐊᕐᓂᖃᓚᐅᕐᒪᑎᒃ.

¹⁴ ᑭᓯᐊᓂᓕ ᐱᕙᓪᓕᐊᑐᐃᓐᓇᓚᐅᕐᐳᖅ ᐊᖑᓐᓂᐊᕐᓂᕐᒥᓂᒃ; ᑕᑯᓚᐅᕐᐳᖅ ᐊᖑᑎᓐᖑᐊᓂᒃ ᐃᒡᓘᑉ ᐊᑭᓐᓇᖓᓂ ᑲᐅᓪᑎᐊᒥᐅᓂᒃ, ᐊᒥᐊᕐᓯᒪᔪᓂᒃ ᐊᐅᐸᑦᓯᐊᕐᑐᒧᑦ.

¹⁵ ᑕᑦᓯᕈᑎᖃᕐᓗᑎᒃ ᕿᑎᕐᒥᒃᑎᒍᑦ, ᓂᐊᖁᖏᓪᓗ ᓂᒥᕐᓯᒪᔪᒥᒃ ᓇᓴᖃᕐᓗᑎᒃ ᓂᕕᖓᔪᓕᖕᓂᒃ, ᐊᖓᔪᖅᑳᖏᓐᓇᐅᔮᕐᐳᑦ, ᐹᐱᓘᓂᒥᐅᑦ ᐊᑦᔨᓐᖑᐊᖏᑦ ᓄᓇᖃᕐᑐᑦ ᑲᐅᓪᑎᐊᒥ.

¹⁶ ᑕᑯᑐᐊᕋᒥᒋᑦ ᐃᒃᓯᒎᓕᓚᐅᕐᐰᑦ, ᑲᐅᓪᑎᐊᒥᐅᓄᓪᓗ ᐅᖃᕆᐊᕐᑐᕐᑎᑦᓯᓕᕐᓗᓂ.

¹⁷ ᑲᐅᓪᑎᐊᒥᐅᓪᓗ ᑎᑭᑉᐳᑦ ᑖᓐᓇ ᐃᓐᓇᖓᖃᑎᒋᔭᕐᑐᕐᓗᒍ, ᐃᒃᓯᒎᕐᓂᒃᑯᓪᓗ ᓇᕐᕈᓇᕐᓯᑎᑕᐅᓚᐅᕐᐳᖅ; ᑭᖑᓂᖓᒍᑦ ᑖᒃᑯᓄᖓ ᓴᓗᒤᓕᑎᑕᐅᒐᒥ, ᑐᓄᓚᐅᕐᐰᑦ ᓇᕐᕈᒋᓕᕐᓗᒋᑦ.

¹⁸ ᐊᖑᓐᓂᐊᕐᓂᓂᓕ ᑲᔪᓯᑎᓐᓇᒥᐅᒃ ᑲᓐᖑᓱᒐᓂ ᐊᓐᓄᕌᖃᖏᓐᓂᓂ ᓴᖅᑭᔮᕐᑎᓕᕐᒪᒍ, ᑐᓄᓚᐅᕐᐸᕋ ᓇᕐᕈᒋᓕᕐᓗᒍ, ᐊᖓᔪᐊᑦᑕᐅᖅ ᑍᒤᓚᐅᕐᒥᒐᒃᑯ.

¹⁹ ᐊᖑᓐᓂᐊᕐᐸᓪᓕᐊᑐᐃᓐᓇᓚᐅᕐᐳᕐᓕ, ᓂᕕᐊᕐᓵᖑᓪᓗᓂ ᐊᖑᓐᓂᐊᕐᑎᐅᓚᐅᕐᓂᓂ ᐃᖅᑲᐅᒪᓪᓗᒍ, ᐄᑦᔨᑉᑎᒥ ᐊᖑᓐᓂᐊᕐᑎᐅᓂᕆᓚᐅᕐᑕᓂ.

²⁰ ᐃᒃᓯᒎᕐᓂᖃᓕᓚᐅᕐᐳᖅ ᐊᖑᑎᓂᒃ ᐂᑉᐸᓕᖕᓂᒃ, ᓯᐅᑎᖅᑯᕐᑐᔪᑎᑐᑦ ᐅᓱᓕᖕᓂᒃ, ᕿᒻᒥᕐᔪᐊᑎᑐᓪᓗ ᖃᐸᓕᖕᓂᒃ.

²¹ ᓄᓕᐊᕐᓂᕐᒧᑦ ᐃᓕᒎᕐᓂᕆᓚᐅᕐᑍᑦ ᓂᕕᐊᕐᓵᖑᓪᓗᑎᑦ ᓱᓕ ᑲᑦᔮᕆᕙᒃᐸᑦ, ᐄᑦᔨᑉᑎᒥᐅᓄᑦ ᓈᓕᕆᔭᐅᕙᒃᑎᓪᓗᑎᑦ ᐃᕕᐊᖐᒃᑭᒡᓗ ᓇᕿᑕᐅᕙᒃᑎᓪᓗᒋᒃ.”

ᒎᑎᐅᑉ ᐃᖅᑲᕐᑐᐃᓂᖓ ᐊᕐᓇᒥᒃ ᓄᑲᕐᓯᕐᒥᒃ

²² “ᑍᒤᒻᒪᑦ ᐅᕼᐅᓕᐹ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐅᖓᒋᔨᑎᑦ ᒪᑭᑎᓐᓂᐊᕐᐸᒃᑲ ᐃᓕᖕᓂᒃ ᐊᑭᕋᕐᑐᓕᖁᓪᓗᒋᑦ ᓇᕐᕈᒋᓕᕐᓯᒪᔭᑎᑦ, ᐊᑭᓂᐊᕐᕕᐅᑎᑦᓱᒫᕐᐸᒋᑦ ᑖᒃᑯᓄᖓ ᐃᓗᒪᔭᐅᓕᕐᓗᑎᑦ ᐊᕙᑎᓕᒫᕐᓂᑦ.

²³ ᐹᐱᓘᓂᒥᐅᑦ ᑲᐅᓪᑎᐊᒥᐅᓕᒫᓪᓗ, ᐱᑳᑦᒥᐅᑦ ᓱᐊᒥᐅᑦ ᑯᐊᒥᐅᓪᓗ, ᐊᓯᕆᐊᒥᐅᓕᒫᓪᓗ ᐱᖃᑕᐅᓗᑎᒃ ᑎᑭᑎᑦᓱᒫᕐᐸᒃᑲ, ᐃᓅᓱᒃᑐᑦ ᐊᖑᑎᑦᓯᐊᕔᑦ ᐃᒃᓕᒋᖃᑦᑕᓚᐅᕐᑕᑎᑦ, ᐊᐅᓚᑦᓯᔩᑦ ᐅᓇᑕᕐᑏᓪᓗ ᐊᖓᔪᖅᑳᓕᒫᖏᑦ, ᐅᓇᑕᕐᑏᓪᓗ ᐱᓯᑎᐅᓂᕐᐹᖏᑦ, ᕿᒥᕐᔪᐊᕐᑎᖏᓪᓗ.

²⁴ ᐅᓇᑕᕆᐊᕈᒫᕐᐹᑎᑦ ᐅᓐᓄᐊᓪᓗᐊᑉ ᓇᓛᓂᑦ ᐅᓇᑕᕐᑎᖁᑎᒐᓴᒡᔪᐊᒥᖕᓂᒃ ᐃᓚᖃᕐᓗᑎᒃ ᕿᒧᒃᓯᐅᑎᓂᒃ ᐊᒃᓴᓗᐊᓕᖕᓂᒃ ᑲᓕᒐᓂᒡᓗ ᐃᓄᒐᓴᒡᔪᐊᓂᒡᓗ; ᑖᒃᑯᐊ ᐃᓕᖕᓂᒃ ᐊᑭᕋᕐᑐᓕᕈᒫᕐᐳᑦ ᐊᕙᑎᓕᒫᕐᓂᑦ ᐊᒡᕖᕋᐅᑎᖃᕐᓗᑎᒃ, ᓴᐴᓗᑕᖃᕐᓗᑎᒃ, ᓯᑎᔪᓂᒡᓗ ᓇᓴᕐᓯᒪᓗᑎᒃ, ᑖᒃᑯᐊ ᐃᖅᑲᕐᑐᐃᑎᑦᓱᒫᕐᐸᒃᑲ, ᐃᖅᑲᕐᑐᕐᑕᐅᔪᒫᕐᐳᑎᑦ ᐃᖅᑲᕐᑐᐃᑦᔪᓯᕐᒥᒍᑦ.

²⁵ ᓂᓐᖓᐅᑎᓯᒪᒐᒃᑭᑦ ᑖᒃᑯᓄᖓ ᐱᓇᓱᐊᕐᕕᐅᑎᑦᓱᒫᕐᐸᒋᑦ, ᓂᓐᖓᐅᒪᓂᕐᒥᒍᑦ ᐱᓇᓱᐊᕕᐅᖁᓪᓗᑎᑦ. ᕿᖎᕐᑕᐅᔪᒫᕐᐳᑎᑦ ᓯᐅᑍᕐᑕᐅᓗᑎᓪᓗ, ᐊᒥᐊᒃᑰᔪᓪᓗ ᑐᖁᕋᕐᑕᐅᔪᒫᕐᐳᑦ ᓴᕕᒡᔪᐊᒧᑦ. ᐃᓛᒃ ᐃᕐᓂᑎᑦ ᐸᓂᑎᓪᓗ ᑎᒍᔭᐅᔪᒫᕐᐳᑦ, ᐃᓚᖕᓂᓗ ᐊᒥᐊᒃᑰᔪᑦ ᐃᑯᐊᓪᓚᒃᑕᐅᓗᑎᒃ ᓄᖑᑕᐅᔪᒫᕐᐳᑦ.

²⁶ ᐊᓐᓄᕅᔭᕐᑕᐅᔪᒫᕐᐳᑎᑦ ᐱᐅᓴᐅᑎᑎᓪᓗ ᐊᑭᑐᔪᑦ ᐱᐅᕋᕐᑕᐅᔪᒫᕐᐳᑦ.

²⁷ ᐃᒃᓯᒎᕐᓂᕆᖃᑦᑕᓚᐅᕐᑍᑦ ᐊᖑᓐᓂᐊᕐᑎᐅᓂᕆᓯᒪᔧᓪᓗ ᐄᑦᔨᑉᑎᒥᑦ ᐱᒋᐊᕐᓗᑎᑦ ᓄᖅᑲᕐᑎᑦᓱᒫᕐᐸᕋ; ᑕᑯᓴᕈᓐᓁᓪᓕᔪᒫᕐᐳᑎ ᐄᑦᔨᑉᑎᒥᐅᓂᒃ ᐃᖅᑲᐅᒪᔪᓐᓁᕐᓗᒋᓪᓘᓐᓃᑦ.

²⁸ “ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ: ᑕᑯᒋᑦ, ᑐᓂᑦᔪᑎᒋᔪᒫᕐᐸᒋᑦ ᐃᓄᖕᓄᑦ ᐆᒥᒋᔭᕐᓄᑦ, ᓇᕐᕈᒋᓕᕐᓯᒪᔭᕐᓄᓪᓗ ᐱᓇᓱᐊᕐᑕᐅᖁᓪᓗᑎᑦ;

²⁹ ᐆᒥᓱᖕᓂᕐᒥᖕᓄᑦ ᐱᓇᓱᐊᕐᕕᒋᔪᒫᕐᐹᑎᑦ, ᐊᒃᓱᕈᕐᓂᒃᑯᓪᓗ ᐱᕈᕐᑎᓯᒪᔭᓕᒫᑎᑦ ᑎᒍᔪᒫᕐᐰᑦ, ᓱᓁᕈᓪᓗᑎᑦ ᐊᓐᓄᕅᑦᑑᑎᓪᓗᑎᑦ ᕿᒪᒃᑕᐅᔪᒫᕐᐳᑎᑦ, ᐊᓐᓄᕌᖃᖏᓪᓗᑎᑦ ᐊᖑᓐᓂᐊᕐᓂᕆᕙᓚᐅᕐᑍᑦ ᓴᖅᑭᑎᑕᐅᔪᒫᕐᐳᖅ. ᐃᒃᓯᒎᕐᓃᑦ ᐊᖑᓐᓂᐊᕐᑎᐅᓃᓪᓗ.

³⁰ ᑍᒤᓕᐅᕐᓯᒪᓂᕐᓄᑦ ᑎᑭᑕᐅᕗᑎᑦ, ᐊᖑᓐᓂᐊᕐᑎᐅᓯᒪᒐᕕᑦ ᐃᓅᖃᑎᒌᒡᔪᐊᓄᑦ, ᓴᓗᒤᓕᑎᓯᒪᓪᓗᑎᓪᓗ ᒎᑎᓐᖑᐊᖏᓐᓄᑦ.

³¹ ᐊᖓᔪᕕᑦ ᐊᑐᓚᐅᕐᑕᖓ ᒪᓕᓚᐅᕋᕕᐅᒃ; ᑍᒤᒻᒪᑦ ᑍᒫᓪᓗᐊᖅ ᐊᑭᓂᐊᕈᑎᒋᓚᐅᕐᑕᓐᓂᒃ ᑖᑦᓱᒧᖓ ᐊᑭᓂᐊᕆᕙᒋᑦ.

³² ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ: ᐊᖓᔪᕕᑦ ᐃᒥᐅᑎᖓᓂᑦ ᐃᒥᕈᒫᕐᐳᑎᑦ ᐃᓗᑐᓪᓗᓂ ᐊᖏᔫᖕᒪᑦ; ᐃᓄᖕᓄᑦ ᒥᑕᐅᑎᒋᔭᐅᓗᑎᑦ ᐃᔪᕿᑕᐅᑕᐅᔪᒫᕐᐳᑎᑦ, ᐃᒥᐅᑦ ᐃᒪᖅᑯᕐᑐᖕᒪᑦ;

³³ ᐃᒥᕈᕕᑦ ᐋᖓᔮᓕᕈᒫᕐᐳᑎᑦ ᕿᒃᓵᓕᕐᓗᑎᓪᓗ. ᐃᒥᐅᑦ ᐃᓗᓕᖃᕐᒪᑦ ᑲᑉᐱᐊᓇᕐᑐᒥᒃ ᐊᓯᕈᕐᑕᐅᓂᕐᒥᒡᓗ, ᐊᖓᔪᕕᑦ ᓴᒥᐊᕆᐊᑉ ᐃᒥᐅᑎᒋᖕᒪᒍ;

³⁴ ᐃᒥᕈᒫᕐᐸᑦ ᐃᒤᑦᓯᐊᕐᓗᒍ, ᐃᒥᐅᑎᖓᓗ ᓯᖁᒥᓪᓗᒍ ᓯᖁᒻᒪᖏᓐᓄᑦ ᐃᕕᐊᖐᒃᑭᒃ ᑭᓪᓕᐊᔪᒫᕐᐹᒃᑭᒃ; ᑕᒪᑐᒥᖓ ᐅᖃᕐᓯᒪᕗᖓ, ᐅᖃᕐᐳᖅ ᐊᑕᓂᖅ ᒎᑎ.

³⁵ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᕙᓐᓂᒃ ᐳᐃᒍᕐᓗᑎᑦ ᑐᓄᐃᓚᐅᕋᕕᑦ, ᑍᒤᒻᒪᑦ ᐊᑭᓕᕐᑕᐅᓂᐊᓕᕐᐳᑎᑦ ᐃᒃᓯᒎᕐᓂᕆᓚᐅᕐᑕᕐᓄᑦ ᐊᖑᓐᓂᐊᕐᑎᐅᓂᕆᓚᐅᕐᑕᕐᓄᓪᓗ.”

ᒎᑎᐅᑉ ᐃᖅᑲᕐᑐᐃᓂᖓ ᓄᑲᕇᖕᓂᒃ

³⁶ ᐊᑕᓂᐅᑉ ᐅᖃᐅᑎᕚᖓ: “ᐃᓅᑉ ᐃᕐᓂᖓ, ᐃᖅᑲᕐᑐᐃᔪᒪᕖᑦ ᐅᕼᐅᓚᒥᒃ ᐅᕼᐅᓕᐸᒥᒡᓗ? ᐊᑏ ᐅᖃᐅᑎᓕᒃᑭᒃ ᒎᑎᐅᑉ ᓇᕐᕈᒋᔭᖏᓐᓂᒃ ᐱᓇᓱᐊᖃᑦᑕᕐᓯᒪᓂᖏᖕᓂᒃ.

³⁷ ᐊᓯᓐᓂᐊᖃᑦᑕᕐᓯᒪᕘᒃ, ᐃᓄᐊᕐᑎᑦᓯᖃᑦᑕᕐᓗᑎᒡᓗ; ᒎᑎᓐᖑᐊᓄᑦ ᐊᓯᓐᓂᐊᖃᑦᑕᕐᓯᒪᕘᒃ; ᑐᖁᑕᐅᑎᑦᓯᖃᑦᑕᕐᓯᒪᓪᓗᑎᒡᓗ ᐃᕐᓂᕐᑖᕆᓯᒪᔭᓐᓂᒃ, ᑐᓂᕐᕈᑕᐅᑎᓪᓗᒋᓪᓗ ᐃᑯᐊᓪᓚᒡᓗᒋᑦ ᒎᑎᓐᖑᐊᓄᑦ.

³⁸ ᓱᓕᓗ ᐱᓂᐊᕐᓯᒪᕘᒃ ᐃᑦᔪᕐᓁᑦᑐᕕᖁᑎᒐ ᐃᑦᔪᕐᓇᕐᓯᑎᓚᐅᕐᐹᒃ ᐅᓪᓗᒥᓗ ᑕᕝᕙᓂᑦᓮᓐᓇᖅ ᓴᐸᑎᖁᑎᒃᑲ ᓇᕐᕈᓇᕐᓯᑎᑦᓱᒋᑦ.

³⁹ ᕿᑐᕐᖓᑎᒃ ᑐᖁᓪᓗᒋᑦ ᑐᓂᕐᕈᑎᖃᕋᒥᒃ ᒎᑎᓐᖑᐊᓄᑦ, ᐅᓪᓗᒥ ᑕᕝᕙᓂᑦᓮᓐᓇᖅ ᐃᑦᔪᕐᓁᑦᑐᕕᖁᑎᒐ ᓇᕐᕈᓇᕐᓯᑎᓚᐅᕐᐹᒃ; ᑕᕝᕙ ᑍᒫᒃ ᐃᒡᓗᓐᓂ ᑍᒤᓕᐅᖃᑦᑕᓚᐅᕐᐴᒃ.

⁴⁰ ᐊᒡᓛᑦ ᑎᑭᖁᔨᕙᓚᐅᕐᐴᒃ ᐊᖑᑎᓂᒃ ᐅᖓᓯᒃᑐᒥᐅᓂᒃ, ᐅᖃᕆᐊᕐᑐᕐᑎᑦᓯᓪᓗᑎᒃ, ᑕᑯᒋᓪᓗ ᑎᑭᑕᐅᕙᓚᐅᕐᐴᒃ. ᑎᑭᑦᑕᕌᖓᑕ ᐅᕕᓂᖕᓂᐊᕐᐸᓚᐅᕐᐳᓯᒃ, ᐃᔨᓯᒡᓗ ᒥᖑᐊᕐᓗᒋᒃ, ᐱᐅᓴᐅᑎᓂᒡᓗ ᐊᑎᓪᓗᓯᒃ;

⁴¹ ᐱᐅᔪᐊᓗᖕᒥ ᐃᒃᓯᕙᕙᓚᐅᕐᐳᓯᒃ ᐃᓐᓇᖓᕕᖕᒥ, ᓵᒥᐅᑕᖃᕐᓗᓯᒃ ᓂᕿᓂᒃ ᑕᕝᕙᓂᓗ ᑎᐱᑦᓯᐊᕆᒃᑐᖁᑎᓐᓂᒃ ᐳᔫᕐᑎᑕᒐᕐᓂᒃ ᐅᕐᓱᖁᑎᓐᓂᒡᓗ ᓵᒦᑎᑦᓯᒋᓪᓗᓯᒃ.

⁴² ᐃᓄᒐᓮᑦ ᐅᐃᒪᔮᕐᑐᑦ ᑕᕝᕙᓂ ᓂᐹᕿᔭᒃᐳᑦ; ᐃᓄᐃᑦ ᓱᓇᓱᐊᕐᑎᐅᖏᑦᑐᑦ ᐋᖓᔮᕐᑏᑦ ᓄᓇᖃᕐᕕᐅᕙᖏᑦᑐᒥᑦ ᑎᑭᑎᑕᐅᓯᒪᔪᑦ; ᑖᒃᑯᐊᓗ ᐊᕐᓇᓂᒃ ᐊᒡᒐᐅᒻᒥᐅᑦᑎᕐᓱᐃᕗᑦ, ᓂᐊᖂᓯᕐᓯᓪᓗᑎᒡᓗ ᑕᑯᒥᓇᕐᑐᓂᒃ.”

⁴³ ᑕᕝᕙ ᐅᖃᓕᕐᐳᖓ, “ᐅᑯᐊ ᐊᓯᓐᓂᐊᖃᑎᖃᓕᓐᖏᓛᑦ ᐃᕿᐊᓐᖑᕐᓂᑰᓕᕐᑐᒥᒃ? ᐊᖑᓐᓂᐊᕐᑎᑎᑐᑦ ᐱᓕᕆᖃᑎᒋᖕᒪᑦᔪᒃ?

⁴⁴ ᑖᒃᑯᐊ ᐊᖑᑎᑦ ᐅᐸᒍᑎᕗᑦ ᑖᒃᑯᖕᓄᖓ, ᐊᑭᓕᕐᓱᕐᓗᒋᑦ ᓄᓕᐊᒐᕐᓄᐊᕐᑐᑎᑐᑦ. ᑍᒫᒃ ᐅᕼᐅᓚᒧᐊᕐᐳᑦ ᐅᕼᐅᓕᐸᒧᓪᓗ ᐃᒃᓯᒎᕐᓂᒃᑯᑦ ᑲᓐᖑᓇᕐᑐᓕᔫᖕᓄᑦ.

⁴⁵ ᐊᖑᑎᓄᓪᓕ ᐃᓱᐊᕐᑐᓕᔪᓄᑦ ᐃᖅᑲᕐᑐᕐᑕᐅᓗᑎᒃ ᑐᑭᑖᕈᑕᐅᔪᒫᓕᕐᐴᒃ ᐊᓯᓐᓂᐊᕐᑎᐅᓂᕋᕐᑕᐅᓗᑎᒃ, ᐃᓄᐊᕐᑎᐅᓂᕋᕐᑕᐅᓗᑎᒡᓗ; ᐊᓯᓐᓂᐊᕐᑎᐅᖕᒪᑎᒃ ᐃᓄᐊᕐᑎᐅᓪᓗᑎᒡᓗ.

⁴⁶ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓄᒐᓴᒡᔪᐊᓄᑦ ᑎᑭᑕᐅᓕᕐᓕᒃ, ᑲᑉᐱᐊᓵᕐᑕᐅᖁᓪᓗᒋᒃ ᐱᖁᑍᕐᑕᐅᓗᑎᒡᓗ.

⁴⁷ ᐃᓄᒐᓴᒡᔪᐊᓄᑦ ᒥᓪᓗᕐᑕᐅᖁᓪᓗᒋᒃ ᐅᔭᖅᑲᓄᑦ ᑲᐳᕐᑕᐅᓗᑎᒡᓗ ᓴᕕᒡᔪᐊᓄᑦ; ᐃᕐᓂᖏᑦ ᐸᓂᖏᓪᓗ ᑐᖁᕋᕐᑕᐅᓕᕐᓕᑦ, ᐃᒡᓗᖏᓪᓗ ᐃᑯᐊᓪᓚᒃᑕᐅᓗᑎᒃ.

⁴⁸ ᑍᒫᒃ ᑕᕝᕙ ᓄᓇᓕᒫᒥ ᐃᒃᓯᒎᕐᓂᖅ ᓄᖅᑲᕐᑎᑦᓱᒫᕐᐸᕋ, ᐊᕐᓇᓕᒫᑦ ᓯᕘᕋᓕᖁᓪᓗᒋᑦ ᐃᒃᓯᒎᕐᓂᕐᒥᒃ ᐊᑐᕐᓯᒪᔭᕐᓂᒃ.

⁴⁹ ᐊᑭᓂᐊᕐᕕᐅᔪᒫᕐᐳᓯᒃ ᐃᒃᓯᒎᕐᑎᐅᓯᒪᓂᑦᓯᓐᓄᑦ, ᓱᒋᐊᕐᑕᐅᔪᒫᕐᐳᓯᓗ ᐊᔪᕐᑐᓕᓯᒪᒐᑦᓯ ᒎᑎᓐᖑᐊᖃᕐᓂᕐᒧᑦ; ᑕᕝᕙ ᑐᑭᓯᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ ᒎᑎ.”