ᐃᓯᑭᐊᓕᐅᑉ ᐊᒡᓚᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᒥᐅᑦ ᐊᔪᕐᑐᓕᓂᖏᑦ

¹ ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᒃᑭᕚᖓ ᐅᖃᕐᓗᓂ,

² “ᐃᓅᑉ ᐃᕐᓂᖓ, ᐃᖅᑲᕐᑐᐃᔪᒪᓕᕐᐲᑦ ᐃᒡᓗᒐᓴᒡᔪᐊᕐᒥᐅᓂᒃ ᐃᓄᐊᕐᑎᓂᒃ? ᐊᑏ ᑐᑭᓯᑎᑦᓯᐊᓕᒃᑭᑦ ᒎᑎᒧᑦ ᓇᕐᕈᒋᔭᐅᔪᓂᒃ ᐱᓇᓱᐊᕐᓯᒪᔭᖏᓐᓂᒃ.

³ ᐅᖃᐅᑎᔪᒫᕐᐸᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓅᖃᑎᑦᓯᓐᓂᒃ ᐃᓄᐊᕐᓯᒪᒐᑦᓯ, ᐅᓪᓗᒃᓴᓯ ᓇᓪᓕᐅᑎᓕᕐᐳᖅ, ᓄᓇᓯᓗ ᓇᕐᕈᓇᕐᓯᑎᓯᒪᓪᓗᓯᐅᒃ ᒎᑎᓐᖑᐊᓄᑦ ᑐᒃᓯᐊᖃᑦᑕᕐᓂᑦᓯᓐᓄᑦ.

⁴ ᐸᓯᔭᒃᓴᐅᓕᕐᐳᓯ ᐃᓄᐊᖃᑦᑕᕐᓂᑦᓯᓐᓄᑦ, ᓇᕐᕈᓇᕐᓯᓪᓗᓯᓗ ᒎᑎᓐᖑᐊᑦᓯᓐᓄᑦ; ᐅᓪᓗᒃᓴᓯ ᓇᓪᓕᐅᑎᓂᒃᓴᖓ ᖃᒡᓕᒋᐊᕐᑎᑉᐸᓯ, ᐱᕕᒃᓴᑦᓯᓐᓄᑦ ᓈᒻᒪᒃᓯᑦᔪᑦᔭᐅᕗᓯ. ᑍᒤᒻᒪᑦ ᐃᓅᖃᑎᒌᒡᔪᐊᓄᑦ ᓇᕐᕈᒋᔭᐅᓕᕐᑎᑉᐸᑦᓯ, ᓄᓇᓕᒡᔪᐊᓕᒫᓄᓪᓗ ᒥᑕᐅᑎᒃᓴᐅᓕᕐᓗᓯ.

⁵ ᖃᓂᑦᑐᒦᑦᑐᓄᑦ ᐅᖓᓯᒃᑐᒦᑦᑐᓄᓪᓗ ᒥᑕᐅᑕᐅᓕᕈᒫᕐᐳᓯ, ᐅᐱᓐᓇᕈᓐᓁᕋᑦᓯ, ᐅᐃᒪᔮᕐᑎᑦᓯᔨᐅᓪᓗᓯᓗ.

⁶ ᑕᑯᒋᑦ, ᐃᓴᕆᐊᓕᓄᑦ ᐊᖓᔪᖅᑳᖑᔪᑦ, ᐱᔪᓐᓇᕐᓂᕐᒥᖕᓂᒃ ᐊᑐᓂᑦ ᐊᑐᕐᓗᑎᒃ, ᐃᓄᐊᖃᑦᑕᕐᓯᒪᕗᑦ.

⁷ ᐊᑖᑕᒥᖕᓂᒃ ᐊᓈᓇᒥᖕᓂᒡᓗ ᐅᐱᒍᓱᒃᑐᖃᓐᖏᓚᑦ ᓄᓇᑦᓯᓐᓂ; ᓄᓇᓕᑐᖃᐅᖏᑦᑐᑦ ᓯᓔᕐᕆᔭᐅᓪᓗᑎᒃ ᑎᒡᓕᒐᕐᕕᐅᕗᑦ ᑮᓇᐅᔭᓂᒃ; ᐃᓕᐊᕐᔪᐃᑦ ᐅᐃᒡᒐᕐᓃᓪᓗ ᐃᓖᔭᕆᔭᐅᖃᑦᑕᕐᐳᑦ ᓄᓇᑦᓯᓐᓂ.

⁸ ᐃᑦᔪᕐᓁᑦᑐᖁᑎᒃᑲ ᓇᕐᕈᒋᕙᓯ, ᓴᐸᑎᖁᑎᒃᑲᓗ ᓇᕐᕈᓇᕐᓯᑎᑦᓱᒋᑦ.

⁹ ᐃᓅᖃᑎᑦᓯ ᐃᓚᖏᑦ ᓴᒡᓗᑦᔪᑎᖃᕐᓗᑎᒃ ᑐᖁᑕᐅᑎᑦᓯᕙᒃᐳᑦ, ᐃᓚᖏᓪᓗ ᒎᑎᓐᖑᐊᓄᑦ ᑐᓂᕐᕈᑎᕕᓂᕐᓂᒃ ᓂᕆᖃᑦᑕᕐᐳᑦ; ᐃᓚᖏᓪᓗ ᐃᒃᓕᒎᕐᓂᕐᒥᖕᓄᑦ ᐱᓕᕆᕙᒃᓗᑎᒃ.

¹⁰ ᐃᓚᖏᑦ ᐊᑖᑕᒥᑕ ᓄᓕᐊᖏᓐᓂᒃ ᐃᓐᓇᖓᖃᑎᖃᖃᑦᑕᕐᐳᑦ; ᐃᓚᖏᓪᓗ ᐊᕐᓇᓂᒃ ᐊᐅᓈᕐᑐᓂᒃ ᐱᔪᒪᑎᓐᓇᖏᑦ ᐃᓐᓇᖓᖃᑎᖃᖃᑦᑕᕐᓗᑎᒃ.

¹¹ ᐃᓚᖏᑦ ᐃᓅᖃᑎᒥ ᓄᓕᐊᖓᓂᒃ ᐃᓐᓇᖓᖃᑎᖃᖃᑦᑕᕐᐳᑦ ᒎᑎᒧᑦ ᓇᕐᕈᓇᕐᓂᕋᕐᑕᐅᔪᒥᒃ; ᐃᓚᖏᓪᓗ ᐅᑯᐊᒥᖕᓂᒃ ᐃᒃᓕᒎᕐᓂᒃᑯᑦ ᓇᕐᕈᓇᕐᓯᑎᑦᓯᕙᒃᓗᑎᒃ ᐃᓐᓇᖓᖃᑎᖃᕐᓂᒃᑯᑦ; ᐃᓚᖏᓪᓗ ᓇᔭᖕᒥᖕᓂᒃ ᓇᕐᕈᓇᕐᓯᑎᑦᓯᕙᒃᓗᑎᒃ, ᐊᑖᑕᒥᑕ ᐸᓂᖏᓐᓂᒃ.

¹² ᐃᓅᖃᑎᓯ ᐃᓚᖏᑦ ᓯᓔᕐᕆᒃᓯᓂᒃᑯᑦ ᐊᑭᓖᓪᓗᑎᒃ ᑐᖁᑕᐅᑎᑦᓯᖃᑦᑕᕐᐳᑦ; ᐃᓚᖏᓪᓗ ᐊᑐᕐᑎᑕᒥᖕᓂᒃ ᐃᓅᖃᑎᒥᖕᓂᒃ ᖄᖏᕐᓂᑯᓕᐅᕐᐸᒃᐳᑦ ᐅᓄᕐᓯᒋᐊᕐᑎᑦᓯᓪᓗᑎᒃ ᑮᓇᐅᔭᓕᐅᕈᑎᖃᕐᓗᑎᒃ ᐃᓅᖃᑎᒥᓂᒃ ᑎᒡᓕᒃᓗᑎᒃ, ᐅᕙᓐᓂᒃ ᐳᐃᒍᕐᓯᒪᓕᕐᐳᓯ, ᐊᑕᓂᖅ ᒎᑎ ᐅᖃᕐᐳᖅ.

¹³ “ᑕᑯᒋᑦ, ᑍᒤᒻᒪᑦ ᑎᒡᓕᒐᕐᐸᒃᑐᓯ ᖄᖏᕐᓂᑯᓕᐅᕐᓂᒃᑯᑦ ᐱᒋᐊᕈᒫᕐᐸᑦᓯ ᐱᔪᓐᓇᕐᓂᓐᓄᑦ, ᑐᖁᕅᕙᒃᑐᓯᓗ ᐱᖃᓯᐅᑎᓗᓯ.

¹⁴ ᓴᐱᖏᓐᓂᑦᓯᓐᓄᑦ ᐊᓂᒍᐃᔪᓐᓇᕐᐱᓰ, ᐅᕝᕙᓗ ᐱᔪᓐᓇᕐᓂᕾᓐᓇᕐᓂᐊᕐᐱᓰ, ᓱᒋᐊᕐᓯᓂᕐᒪ ᐅᓪᓗᖏᓐᓂ? ᐅᕙᖓ ᐊᑕᓂᖅ ᐅᖃᕐᐳᖓ, ᑕᒪᑐᒥᖓᓗ ᐱᓇᓱᐊᕐᓂᐊᕐᓗᖓ.

¹⁵ ᓯᐊᒻᒪᒃᑎᑦᓱᒫᕐᐸᑦᓯ ᐃᓅᖃᑎᒌᒡᔪᐊᓄᑦ ᓇᒧᑐᐃᓐᓇᕐᓗ ᓄᓇᓕᒡᔪᐊᓄᐊᕐᑎᓪᓗᓯ, ᓴᓗᒤᑦᑐᓕᓂᓯ ᓄᖑᑎᑦᓱᒪᒐᒃᑯ.

¹⁶ ᐃᓅᖃᑎᒌᒡᔪᐊᓄᑦ ᓇᕐᕈᓇᕐᓯᑎᑕᐅᒍᒪ ᐃᓕᑦᓯᑎᒍᑦ; ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ.”

ᒎᑎᐅᑉ ᓴᓗᒻᒪᕐᓮᑦᔪᑎᖓ ᐊᐅᒃᑎᑦᓯᕕᒃ

¹⁷ ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂᓗ:

¹⁸ “ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᑭᖑᕚᖏᑦ ᐅᕙᓐᓄᑦ ᐱᐅᖏᓐᓂᕐᓗᑯᑐᐃᓐᓇᐅᓕᕐᐳᑦ; ᐃᓘᓐᓇᑎᒃ ᓯᐅᓪᕕᕆᑐᑦ ᑲᓐᓄᔭᑎᑐᓪᓗ ᓴᕕᕋᔭᒃᑐᑦ ᓵᑦᑐᑎᑐᑦ ᓴᕕᕋᔭᒃᑎᑐᓪᓗ ᑯᓯᕐᓯᐊᑎᑐᓪᓗ ᐊᐅᒃᑎᑕᐅᓚᐅᕐᑎᓪᓗᒋᑦ ᐊᐅᒃᑎᑦᓯᕕᖕᒥ ᐱᐅᖏᓐᓂᕐᓗᑯᖏᑎᑐᑦ ᑍᒤᓕᕐᐳᑦ.

¹⁹ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐱᐅᖏᓐᓂᕐᓗᑯᕕᓂᕐᑎᑐᑦ ᐊᑑᑎᖃᕈᓐᓃᕋᑦᓯ ᐃᓘᓐᓇᓯ, ᑍᒤᒻᒪᑦ ᑕᑯᒋᑦ, ᔨᕉᓴᓕᒧᑦ ᑲᑎᕐᓱᕈᒫᓕᕐᐸᑦᓯ.

²⁰ ᓯᐅᓪᕕᕇᑦ ᑲᓐᓄᔧᑦ ᓴᕕᕋᔧᑦ ᑯᓯᕐᓯᐊᑦ ᓵᑦᑐᓪᓗ ᓴᕕᕋᔧᑦ ᐴᖅᑲᕐᑕᐅᕙᖕᓂᖏᑎᑐᑦ ᐊᐅᒃᑎᑦᓯᕕᖕᒧᑦ, ᐃᑯᐊᓚᔪᒥ ᐊᐅᒃᑎᑕᐅᖁᓪᓗᒋᑦ; ᑍᒫᒃᑕᐅᖅ ᑲᑎᕐᓱᕈᒫᕆᕙᑦᓯ ᓂᓐᖓᐅᒪᓂᒃᑯᑦ ᓂᓐᖓᕕᒡᔪᐊᕐᓂᓐᓄᓪᓗ ᐴᖅᑲᕈᒫᕐᐸᑦᓯ ᐊᐅᒃᑎᑦᓯᕕᖕᒧᑦ ᐊᐅᒃᑎᑕᐅᖁᓪᓗᓯ.

²¹ ᑲᑎᕐᓱᕈᒫᕐᐸᑦᓯ ᓱᐱᓗᓯᓗ ᓂᓐᖓᐅᓯᕐᒪ ᐃᑯᒪᖓᓄᑦ, ᑕᕝᕙᓂᓗ ᓴᕕᕋᔭᒃᑎᑐᑦ ᐊᐅᒍᒫᕐᐳᓯ.

²² ᓯᐅᓪᕕᕇᑦ ᐊᐅᒃᑎᑦᓯᕕᖕᒥ ᐊᐅᒃᑎᑕᐅᓲᖑᖕᒪᑕ, ᐃᓕᑦᓯᑦᑕᐅᖅ ᐊᐅᒃᑎᑕᐅᔪᒫᕐᐳᓯ ᑕᕝᕙᓂ; ᑕᕝᕙ ᖃᐅᔨᔪᒫᕐᐳᓯ ᐅᕙᖓ ᐊᑕᓂᖅ, ᐃᓕᑦᓯᓐᓂᒃ ᓂᓐᖓᐅᑦᔨᓯᒪᓂᓐᓄᑦ ᑍᒤᓕᐅᕐᕕᒋᓚᐅᕋᑦᓯ.”

ᐃᓴᕆᐊᓕᒥᐅᑦ ᓯᕗᓕᕐᑎᖏᑕ ᐊᔪᕐᑐᓕᓂᖏᑦ

²³ ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

²⁴ “ᐃᓅᑉ ᐃᕐᓂᖓ, ᑖᒃᑯᐊ ᐅᖃᐅᑎᒃᑭᑦ ᓄᓇᐅᕗᑎᑦ ᓴᓗᒻᒪᕐᑕᐅᓯᒪᖏᑦᑐᖅ, ᑎᑭᓚᐅᕋᓯᓗ ᓱᓕ ᐅᓪᓗᒧᑦ ᓂᓐᖓᐅᑦᔭᐅᕕᖕᒧᑦ.

²⁵ ᓯᕗᓕᕐᑎᖏᑦ ᓛᔭᑎᑐᑦ ᑐᖁᕋᑖᕐᑕᒥᖕᓂᒃ ᐊᓕᒃᑐᐃᔪᑎᑐᑦ ᖃᓕᖑᐊᕐᐳᑦ; ᐃᓅᖃᑎᒥᖕᓂᒃ ᑐᑯᕅᕗᑦ; ᐃᓄᐊᕐᑕᒥ ᑮᓇᐅᔭᖏᓐᓂᒃ ᐱᓐᓇᕆᔭᖏᓐᓂᒡᓗ ᐱᑖᕐᐸᒃᐳᑦ; ᐅᓄᕐᑐᓂᒃ ᐅᐃᒡᒐᕐᓂᓐᖑᕐᑎᑦᓯᕗᑦ ᓄᓇᒥᖕᓂᒃ.

²⁶ ᑐᓂᕐᕈᓯᕐᑎᑦᓯᔩᑦ ᐱᖁᔭᓐᓂᒃ ᓯᖁᒥᑦᓯᓪᓗᑎᒃ ᐃᑦᔪᕐᓁᑎᑕᓐᓂᒡᓗ ᓇᕐᕈᓇᕐᓯᑎᑦᓯᖃᑦᑕᕐᐳᑦ; ᐃᑦᔪᕐᓁᑦᑐᓂᒃ ᖃᐅᑕᒫᕐᓯᐅᑎᓂᒡᓗ ᐊᑦᔨᒌᖏᑦᑑᑎᑦᓯᔪᓐᓃᕐᐳᑦ, ᐊᔪᕆᕐᑐᐃᖃᑦᑕᕋᑎᒡᓗ ᓇᕐᕈᓇᕐᑐᑦ ᓇᕐᕈᓇᖏᑦᑐᓪᓗ ᐊᑦᔨᒌᖏᓐᓂᖏᓐᓂᒃ, ᓴᐸᑎᖁᑎᒃᑲᓗ ᑲᒪᒋᔪᓐᓁᕐᓗᒋᑦ, ᑍᒤᒻᒪᑦ ᓇᕐᕈᓇᕐᑎᑕᐅᓕᕐᐳᖓ ᑖᒃᑯᓇᓂ.

²⁷ ᐊᖓᔪᖅᑳᖁᑎᖏᑦ ᐊᒪᕈᕐᑎᑐᑦ ᐆᒪᔪᕐᑕᒥᖕᓂᒃ ᐊᓕᒃᑐᐃᔪᑎᑐᑦ ᑍᒤᑉᐳᑦ, ᐃᓄᐊᖃᑦᑕᕐᐳᑦ, ᓈᒻᒪᓈᖏᑦᑐᒃᑯᑦ ᐊᒃᓗᐃᓕᓇᓱᐊᕐᐳᑦ ᑐᖁᑦᓯᕙᒃᓗᑎᒃ.

²⁸ ᐱᔪᒫᕐᑐᒃᓴᓂᒡᓗ ᐅᖃᕐᑎᖏᑕ ᐊᔪᕐᑐᓕᓃᑦ ᓴᖅᑭᑎᖃᑦᑕᓐᖏᓔᑦ ᐊᑭᓐᓇᕐᒥᒃ ᒥᖑᐊᕐᓯᔪᑎᑐᑦ ᖃᑯᕐᑕᒧᑦ ᑕᓕᑎᑦᓯᔪᑎᑐᑦ, ᓱᓕᖏᑦᑐᓂᒡᓗ ᑕᑯᑎᑕᐅᓂᕋᕐᐸᒃᓗᑎᒃ, ᐱᔪᒫᕐᑐᒃᓴᓂᒡᓗ ᓴᒡᓗᓪᓗᑎᒃ ᐅᖃᐅᓯᖃᕐᐸᒃᐳᑦ, ᐅᖃᕐᓗᑎᒃ, ‘ᑍᒫᒃ ᑕᕝᕙ ᐊᑕᓂᖅ ᒎᑎ ᐅᖃᕐᐳᖅ,’ ᐊᑕᓂᕐᒧᑦ ᐅᖃᐅᑦᔭᐅᓚᐅᕋᑎᒃ.

²⁹ ᑕᒫᓂ ᓄᓇᓖᑦ ᓯᕘᕋᓵᕆᓂᒃᑯᑦ ᑮᓇᐅᔭᕐᑖᕐᐸᒃᐳᑦ ᑎᒡᓕᒐᖃᑦᑕᕐᓗᑎᒡᓗ, ᐊᒃᓗᔪᓂᒃ ᐃᑲᔪᕐᑕᐅᔭᕆᐊᓕᖕᓂᒡᓗ ᓱᒃᑯᔨᐊᖃᕐᐸᒃᐳᑦ, ᓄᓇᓕᑐᖃᐅᖏᑦᑐᓂᒡᓗ ᑮᓇᐅᔧᕐᑎᑦᓯᕙᒃᐳᑦ ᓈᒻᒪᓈᕐᑐᒥᒃ ᐱᓂᐊᕐᕕᒋᓇᒋᑦ.

³⁰ ᑖᒃᑯᓇᓂᓗ ᐃᓄᖕᒥᒃ ᕿᓂᓚᐅᕐᐳᖓ ᐊᕙᓗᕐᔪᐊᒥᒃ ᓴᓇᔪᓐᓇᕐᑐᒥᒃ ᐱᓇᓱᐊᕈᓐᓇᕐᑐᒥᒡᓗ ᐊᕙᓗᕐᔪᐊᑉ ᓯᖁᑦᑎᕐᓯᒪᓂᖓᓂ ᓵᓐᓂ ᓇᖏᕈᓐᓇᕐᑐᒥᒃ ᓄᓇ ᓴᐳᑎᓇᓱᒡᓗᒍ, ᐊᓯᕈᐃᖁᓇᖓ; ᓇᓂᓯᓚᐅᓐᖏᓚᖓᓕ.

³¹ ᑍᒤᒻᒪᑦ ᓂᓐᖓᒡᕕᒋᓯᒪᓕᕐᐸᒃᑲ; ᓄᖑᓯᒪᓕᕐᐸᒃᑲᓗ ᓂᓐᖓᐅᓯᕐᒪ ᐃᑯᒪᖓᓄᑦ; ᐱᓂᐊᕐᓂᕆᓯᒪᔭᖏᑦ ᐊᑭᓕᕐᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ.”