ᐃᓯᑭᐊᓕᐅᑉ ᐊᒡᓚᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓴᕕᒡᔪᐊᖓ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᔨᕉᓴᓕᒥᐅᑦ ᓵᓪᓗᒋᑦ ᐅᖃᓪᓚᒡᕕᒋᒃᑭᑦ ᓈᒻᒪᒋᖏᓪᓗᒋᑦ ᑐᒃᓯᐊᕐᕕᒋᕙᒃᑕᖏᑦ; ᓈᒻᒪᒋᖏᓪᓗᒋᓪᓗ ᐅᖃᐅᓯᐅᖁᔭᓐᓂᒃ ᐅᖃᓪᓚᒡᕕᒋᒃᑭᑦ ᐃᓴᕆᐊᓕᒥ ᓄᓇᖃᕐᑐᓕᒫᑦ.

³ ᐃᓴᕆᐊᓕᐅᑉ ᓄᓇᖓᓃᑦᑐᑦ ᐅᖃᐅᑎᒃᑭᑦ, ᐊᑕᓂᖅ ᐃᒫᒃ ᐅᖃᕐᐳᖅ: ᑕᑯᒋᑦ, ᓈᒻᒪᒃᓴᓐᖏᓚᖓ ᐃᓕᑦᓯᓐᓂᒃ, ᓴᕕᒡᔪᐊᕋ ᐊᒧᓗᒍ ᑐᖁᕅᔪᒫᓕᕐᐳᖓ ᐊᑦᔨᒌᒃᑎᓪᓗᒋᑦ ᐃᓱᐊᕐᑐᓕᔪᑦ ᐱᐅᖏᑦᑐᓕᔪᓪᓗ.

⁴ ᐃᓕᑦᓯᓐᓂ ᑐᖁᕅᔪᒫᕐᐳᖓ ᐃᓱᐊᕐᑐᓕᔪᓂᒃ ᐱᐅᖏᑦᑐᓕᔪᓂᒡᓗ, ᑍᒤᒻᒪᑦ ᓴᕕᒡᔪᐊᕋ ᐊᒧᓗᒍ ᑐᖁᕅᔪᒫᕐᐳᖓ ᐃᓄᓕᒫᓂᒃ ᐅᓪᓗᓪᓗᐊᑉ ᓇᓛᓃᑦᑐᓂᑦ ᐅᓐᓄᐊᓪᓗᐊᑉ ᓇᓛᓃᑦᑐᑦ ᑎᑭᓪᓗᒋᑦ:

⁵ ᐃᓄᓕᒫᑦ ᖃᐅᔨᔪᐃᓐᓇᐅᖁᓪᓗᒋᑦ ᐅᕙᖓ ᐊᑕᓂᖅ ᓴᕕᒡᔪᐊᕋ ᐊᒧᒐᒃᑯ; ᐴᖓᓄᑦ ᐴᑲᓐᓂᑦᔮᔪᓐᓁᕐᓗᒍ.

⁶ ᑍᒤᒻᒪᑦ ᐊᓂᕐᓴᐅᒥᓗᑎᑦ ᐃᓅᑉ ᐃᕐᓂᖓ; ᐊᓂᕐᓴᐅᒥᒋᑦ ᐆᒻᒪᑎᒃᑯᑦ ᓯᖁᒥᓯᒪᓗᑎᑦ ᕿᒃᓵᒡᕕᒡᔪᐊᕐᓗᑎᓪᓗ ᐃᓄᖕᓄᑦ ᑕᑯᓐᓇᕐᑕᐅᓗᑎᑦ.

⁷ ᐊᐱᕆᔭᐅᒍᕕᑦ ᖃᓄᐃᒻᒪᑦ ᕿᒃᓵᖕᓂᕐᒧᑦ ᐊᓂᕐᓴᐅᒥᖕᒪᖔᕐᐱᑦ, ᐅᖃᕐᑐᒃᓴᐅᕗᑎᑦ, ‘ᑐᓴᕐᑕᐅᔭᕆᐊᓕᖕᓂᒃ ᐱᑦᔪᑎᖃᕐᐳᖓ. ᑐᓴᕐᑕᐅᓕᕈᑎᒃ ᐆᒻᒪᑎᖏᑦ ᑲᑉᐱᐊᓱᓕᕈᒫᕐᐳᑦ ᑲᑉᐱᐊᓱᖕᓂᕐᒧᑦ ᑕᓕᖏᑦ ᓄᑮᕈᑎᔪᒫᕐᐳᑦ, ᓴᐱᕐᓇᕐᑐᕐᔪᐊᒧᓪᓗ ᑎᑭᐅᑎᓗᑎᒃ ᓂᐅᖏᓪᓗ ᓴᓐᖐᓕᔪᒫᕐᐳᑦ ᐃᒥᕐᑎᑐᑦ. ᑕᑯᒋᑦ, ᑎᑭᓕᕐᐳᖅ ᓇᓪᓕᐅᑎᓂᐊᕐᓗᓂᓗ,’ ᐊᑕᓂᖅ ᒎᑎ ᐅᖃᕐᐳᖅ.”

⁸ ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

⁹ “ᐃᓅᑉ ᐃᕐᓂᖓ ᐱᔪᒫᕐᑐᒃᓴᓂᒃ ᐅᖃᓕᕆᑦ, ᐊᑕᓂᖅ ᐃᒫᒃ ᐅᖃᕐᐳᖅ, ᐅᖃᕐᓗᓂ: ᓴᕕᒡᔪᐊᖅ, ᓴᕕᒡᔪᐊᖅ ᐃᐱᒃᓴᕐᓯᒪᕗᖅ ᕿᓪᓚᕆᒃᓴᕐᓯᒪᓪᓗᓂᓗ.

¹⁰ ᐃᐱᒃᓴᕐᓯᒪᕗᖅ ᑐᖁᕅᑦᔪᑎᒃᓴᐅᓪᓗᓂ, ᕿᓪᓚᕆᒃᓴᕐᓯᒪᕗᖅ ᕿᓪᓛᒡᒋᕐᑕᖁᓪᓗᒍ ᖃᐅᒻᒪᓪᓚᒃᑎᑐᑦ! ᖁᕕᐊᓇᕐᑐᖃᓛᕈᓐᓁᕐᐳᖅ, ᐃᕐᓃᒃ ᓱᐊᒃᓯᓂᒃᑲ ᑐᓴᓚᐅᖏᓐᓇᕕᒋᑦ, ᐋᖅᑭᒋᐊᕐᓯᑦᔪᑎᒃᑲᓗ.

¹¹ ᓴᕕᒡᔪᐊᖅ ᕿᓪᓚᕆᒃᓴᕐᑕᐅᕗᖅ, ᐊᑐᕐᑕᐅᔪᒫᓕᕋᒥ; ᐃᐱᒃᓴᕐᑕᐅᓕᕐᐳᖅ ᕿᓪᓚᕆᒃᓴᕐᑕᐅᓪᓗᓂᓗ ᑐᖁᕅᔨᐅᑉ ᐊᑐᓛᓕᕐᒪᒍ.

¹² ᓂᐹᓕᕆᑦ ᐅᒡᒍᐊᕐᓗᑎᓪᓗ, ᐃᓅᑉ ᐃᕐᓂᖓ, ᐃᓄᖁᑎᒃᑲ ᓵᓐᖓᔭᐅᓕᕐᒪᑕ; ᐃᓴᕆᐊᓕᒥᐅᓪᓗ ᓯᕗᓕᕐᑎᓕᒫᖏᑦ; ᓴᕕᒡᔪᐊᖅ ᐊᑐᕐᑕᐅᓂᐊᓕᕐᒪᑦ ᐃᓄᖁᑎᓐᓄᑦ. ᑍᒤᒻᒪᑦ ᖁᒃᑐᕅᑦ ᑎᒡᓗᖃᑦᑕᓕᕈᒃ.

¹³ ᒫᓐᓇ ᐃᓄᖁᑎᒃᑲ ᖃᐅᔨᓴᓕᕐᐸᒃᑲ, ᖃᓄᐃᑦᑐᖃᕐᓂᐊᕐᐸ ᓱᐊᒃᓯᓂᒃᑲ ᓈᓚᒃᑕᐅᖏᑉᐸᑕ?” ᐊᑕᓂᖅ ᒎᑎ ᐅᖃᕐᐳᖅ.

¹⁴ “ᑍᒤᒻᒪᑦ ᐃᓅᑉ ᐃᕐᓂᖓ, ᐱᔪᒫᕐᑐᒃᓴᓂᒃ ᐅᖃᐅᑦᔪᐃᓕᕆᑦ; ᐸᑦᑕᒃᑐᕌᖓᕕᑦ ᓴᕕᒡᔪᐊᖅ ᐱᒋᐊᒃᑲᓐᓂᖃᑦᑕᕐᓂᐊᕐᐳᖅ, ᓴᕕᒡᔪᐊᖅ ᑖᓐᓇᐅᖕᒪᑦ ᑐᖁᕅᔪᕐᔪᐊᖅ, ᓇᒧᓐᖓᕐᕖᒡᒍᑦᔨᓗᓂᓗ.

¹⁵ ᓴᐱᓕᕐᑎᑦᓯᖁᓪᓗᒍ, ᐹᓪᓚᒃᑎᑦᓯᓗᓂᓗ ᐅᓄᕐᑐᓂᒃ ᐃᑎᕐᑕᕐᕕᓕᒫᖏᓐᓂ. ᓯᕗᕋᓵᕆᕗᖓ ᓴᕕᒡᔪᐊᕐᒧᑦ ᖃᐅᒻᒪᓪᓚᒃᑎᑐᑦ ᓴᖅᑭᖃᑦᑕᕐᑐᒥᒃ; ᕿᓪᓚᕆᒃᓴᕐᓯᒪᔪᒥᒃ ᑐᖁᕅᓂᐊᓕᕋᒥ.

¹⁶ ᐱᒋᐊᖃᑦᑕᓕᕆᑦ ᓱᑲᑦᑐᒥᒃ ᑕᓕᕐᐱᒧᑦ ᓴᐅᒥᒧᓪᓗ ᓴᕕᒡᔪᐊᑉ ᑮᓇᖓᑕ ᓵᕝᕕᒋᔭᓕᒫᖏᓐᓄᑦ.

¹⁷ ᐸᑦᑕᒃᑐᖃᑕᐅᔪᒫᕆᕗᖓ, ᓂᓐᖓᐅᒪᓂᕋᓗ ᑕᕝᕙ ᐊᓂᒍᕈᒫᕐᐳᖅ; ᐅᕙᖓ ᐊᑕᓂᐅᔪᖓ ᑍᒫᒃ ᐅᖃᕐᐳᖓ.”

ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᓴᕕᒡᔪᐊᖓ

¹⁸ ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᒃᑭᕚᖓ ᐅᖃᕐᓗᓂ:

¹⁹ “ᐃᓅᑉ ᐃᕐᓂᖓ, ᓇᓗᓁᒃᑯᑦᓰᒋᑦ ᐊᖅᑯᑏᖕᓂᒃ ᒪᕐᕉᖕᓂᒃ ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑕ ᓴᕕᒡᔪᐊᓕᔭᕐᓗᓂ ᑎᑭᕝᕕᒋᔪᓐᓇᕐᑕᖏᖕᓂᒃ; ᑖᒃᑯᐊᒃ ᐊᖅᑯᑏᒃ ᐱᒋᐊᕐᕕᖃᕐᑐᒃᓴᐅᕘᒃ ᓄᓇᒥᑦ ᑕᕝᕙᖓᑦᓮᓐᓇᖅ. ᐊᖅᑯᑎᐅᑉ ᓇᓗᓁᒃᑯᑕᖏᖕᓂᒃ ᓇᑉᐰᓗᑎᑦ ᐃᒡᓗᒐᓴᖕᓄᑦ ᐊᖅᑯᑕᐅᔪᓐᓇᕐᑑᖕᓂᒃ;

²⁰ ᐊᖅᑯᑎᐅᑉ ᐂᑉᐸᖓ ᓇᓗᓁᕐᓯᓯᒪᓗᓂ ᐊᖓᔪᖅᑳᕐᔪᐊᑉ ᐊᒧᓁᑎᒥᐅᓄᐊᕈᓐᓇᕐᓂᖓᓂᒃ ᕌᐸᒦᑦᑐᒧᑦ, ᐂᑉᐸᖓᓗ ᓇᓗᓁᕐᓯᓯᒪᓗᓂ ᔫᑕᐅᑉ ᓄᓇᖓᓄᐊᕈᓐᓇᕐᓂᖓᓂᒃ ᔨᕉᓴᓕᒧᓪᓗ ᐊᕙᓗᕐᔪᐊᖃᕐᑐᒧᑦ.

²¹ ᐹᐱᓘᓂᐅᑉ ᐊᖓᔪᖅᑳᕐᔪᐊᖓ ᓇᑉᐸᖅᑯᑎᐅᑉ ᓴᓂᐊᓃᓕᕐᓗᓂ ᐊᖅᑯᑏᒃ ᒪᕐᕈᐃᓕᖅᑲᖓᒋᐊᕐᓂᖓᓂ ᖃᐅᔨᓇᓱᐊᓕᕐᐳᖅ; ᓇᓪᓕᐊᓐᓄᑦ ᐂᕕᒋᔭᒃᓴᒥᓂᒃ ᖃᕐᔪᐃᑦ ᐊᐅᓚᑎᑉᐰᑦ, ᒎᑎᓐᖑᐊᓂᓗ ᐊᐱᕆᕔᑦ, ᐆᒪᔫᓪᓗ ᑎᖑᖓᓂᒃ ᖃᐅᔨᓴᕐᓗᓂ.

²² ᑕᓕᕐᐱᖕᒥᓄᓪᓗ ᖃᕐᔪᒥᒃ ᑎᒍᓯᕗᖅ ᓇᓗᓁᕐᓯᔪᒥᒃ ᔨᕉᓴᓕᒥᒃ, ᐅᓇᑕᕆᐊᕐᑐᓪᓗ ᐊᐅᓪᓚᕆᐊᕈᑎᒃᓴᖓᓂᒃ ᕾᒐᓛᕈᑕᐅᓂᐊᕐᑐᒥᒃ, ᐋᖅᑭᒃᓱᐃᕗᓪᓗ ᐅᑯᐊᕐᔪᐊᖏᓐᓄᑦ ᒪᑐᐃᕐᓯᓇᓱᐊᕈᑎᒃᓴᒥᖕᓂᒃ, ᓄᓇᒥᒡᓗ ᐳᕐᑐᓯᑎᑦᓯᑦᔪᑎᒃᓴᒥᖕᓂᒃ, ᐊᕙᓗᕐᔪᐊᖓᓄᑦ ᒪᔪᕈᓐᓇᕐᓯᑦᔪᑎᒃᓴᒥᖕᓂᒃ.

²³ ᔨᕉᓴᓕᒥᐅᓪᓕ ᐅᒃᐱᕈᓱᖕᓂᐊᓐᖏᓚᑦ ᑕᒪᑐᒥᖓ ᐊᖏᖃᑎᒌᒍᑎᓕᐅᕐᓯᒪᒐᒥᒃ ᐅᖃᕕᒃᓗᑎᒃ ᑖᒃᑯᓄᖓ; ᑕᒪᑐᒪᓕ ᐊᑐᓕᕐᓂᖓ ᐃᖅᑬᑦᔪᑎᒃᓴᐅᕗᖅ ᐸᓯᔭᒃᓴᐅᓂᕐᒥᖕᓄᑦ ᑎᒍᔭᐅᑐᐃᓐᓇᕆᐊᖃᕐᒪᑕ.

²⁴ ᑍᒤᒻᒪᑦ ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ: ᐸᓯᔭᒃᓴᐅᓂᓯ ᐃᖅᑲᐅᒪᔭᐅᑦᔪᑎᒃᓴᓕᐅᕋᑦᓯᐅᒃ, ᑕᒪᑐᒨᓇᓗ ᐊᔪᕐᑐᓕᓂᓯ ᓴᖅᑭᑎᑕᐅᕗᑦ, ᐱᓂᐊᕐᓂᕆᔭᓕᒫᑦᓯᒍᑦ ᓴᖅᑭᑎᑦᓯᕗᓯ ᐊᔪᕐᑐᓕᓂᑦᓯᓐᓂᒃ; ᐃᖅᑬᓯᒪᒐᑦᓯ, ᑕᕝᕙ ᐊᑭᕋᑦᓯᓐᓄᑦ ᑎᒍᔭᐅᔪᒃᓴᐅᓕᕐᐳᓯ.

²⁵ ᐱᐅᖏᑦᑐᕐᔪᐊᖑᓪᓗᑎᑦ ᐊᖓᔪᖅᑳᖑᒐᕕᑦ ᐃᓴᕆᐊᓕᒥᐅᓄᑦ, ᐅᓪᓗᖅ ᑭᖑᓪᓕᕐᐹᖅ ᓱᒋᐊᕐᑕᐅᕕᒃᓮᑦ ᓇᓪᓕᐅᑎᕗᖅ.

²⁶ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓂᐊᖁᕐᐱᑦ ᐃᒻᒧᑎᖓ ᐲᓕᕈᒃ, ᓂᐊᖂᑏᓪᓗ ᐊᖓᔪᖅᑳᕐᓯᐅᑦ ᐲᕐᓗᒍ; ᓱᓇᑐᐃᓐᓁᑦ ᒫᓐᓇᑐᑦ ᑍᒤᓕᖓᑦᓮᓐᓇᕐᓂᐊᕈᓐᓁᕐᐳᑦ; ᓇᓗᖅᑯᑎᔪᑦ ᐊᖏᔪᕈᕐᑎᒃᑭᑦ, ᐊᖏᔪᕈᕐᑎᑦᑐᓪᓗ ᓇᓗᖅᑯᑎᓕᕐᑎᓪᓗᒋᑦ.

²⁷ ᐊᓯᕈᕐᐳᑦ, ᐊᓯᕈᕐᐳᑦ, ᐊᓯᕈᕐᑕᐅᑎᓐᓂᐊᕐᐸᒃᑲ; ᑕᒪᓐᓇ ᓇᓪᓕᐅᑎᓂᐊᓐᖏᓚᖅ ᑍᒤᓕᐅᕈᓐᓇᕐᑐᖅ ᑎᑭᓚᐅᖏᓐᓂᖓᓂ; ᑖᑦᓱᒧᖓ ᑕᒪᓐᓇ ᑐᓂᔪᒫᕐᐸᕋ.”

ᓴᕕᒡᔪᐊᖅ ᐊᒧᓁᑎᒥᐅᓐᓄᑦ ᓵᓐᖓᔪᖅ

²⁸ “ᐃᓅᑉ ᐃᕐᓂᖓ, ᐱᔪᒫᕐᑐᒃᓴᓂᒃ ᐅᖃᐅᓯᖃᓕᕆᑦ, ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᐊᒧᓁᑎᒥᐅᓄᑦ, ᐃᓴᕆᐊᓕᒥᐅᓂᒃ ᐊᑭᕋᕐᑐᕐᓂᖏᓐᓄᑦ; ᑖᒃᑯᐊ ᐅᖃᐅᑎᒃᑭᑦ ᓴᕕᒡᔪᐊᖅ, ᓴᕕᒡᔪᐊᖅ ᐊᒧᔭᐅᕗᖅ ᑐᖁᕅᑦᔪᑕᐅᓂᐊᕐᑐᖅ, ᕿᓪᓕᕐᓴᕐᑕᐅᕗᖅ ᑐᖁᕅᑦᔪᑕᐅᖁᓪᓗᒍ ᕿᓪᓛᒡᒋᕐᑕᕐᐳᕐᓗ ᖃᐅᒻᒫᓪᓚᖃᑦᑕᕐᑐᑎᑐᑦ.

²⁹ ᑕᑯᑎᑕᐅᓂᐅᓂᕋᕐᑕᓯ ᓱᓕᓐᖏᓚᑦ, ᐱᔪᒫᕐᑐᒃᓴᓂᒡᓗ ᐅᖃᓪᓚᖕᓂᕆᔭᓯ ᓴᒡᓗᕿᑦᓯᓂᐅᕗᑦ, ᐱᐅᖏᑦᑑᒐᑦᓯ ᐱᐅᖏᑦᑐᓕᓪᓗᓯᓗ ᖁᖓᓯᓯ ᓇᑲᑕᐅᔪᒫᕐᐳᑦ ᓴᕕᒡᔪᐊᕐᒧᑦ, ᐅᓪᓗᕆᔭᒃᓴᓯ ᓇᓪᓕᐅᑎᕗᖅ, ᐅᓪᓗᖅ ᑭᖑᓪᓕᕐᐹᖅ ᓱᒋᐊᕐᑕᐅᕕᒃᓴᓯ.

³⁰ ᓴᕕᒡᔪᐊᓯ ᐴᖓᓄᑦ ᐴᓕᕐᓯᐅᒃ. ᐃᖅᑲᕐᑐᕈᒪᕙᑦᓯ ᐱᓐᖑᕐᑎᑕᐅᕕᒋᓚᐅᕐᑕᑦᓯᓐᓂ, ᓄᓇᒥ ᐃᓅᓕᕐᕕᒋᓯᒪᔭᑦᓯᓐᓂ.

³¹ ᓂᓐᖓᐅᒪᓂᕋ ᐃᒃᐱᒋᔪᒫᕐᐸᓯ; ᐃᑯᒪᑐᑦ ᐃᑯᐊᓪᓚᒃᑎᓐᓂᐊᕐᐸᕋ ᐃᓕᑦᓯᓐᓄᑦ; ᐊᑦᑕᕆᔭᖃᖏᑦᑐᓄᑦ ᑐᓂᔪᒫᕐᐸᑦᓯ, ᑐᖁᕅᓂᕐᒥᒃ ᖃᐅᔨᒪᑦᓯᐊᕐᑐᓄᑦ.

³² ᐃᑯᐊᓚᔪᒧᑦ ᐃᑯᐊᓪᓚᖅᑯᑎᒋᔭᐅᔪᒫᕐᐳᓯ; ᐊᐅᓯᓗ ᓄᓇᒥ ᓯᐊᒻᒪᖓᔪᒫᕐᐳᖅ; ᐃᖅᑲᐅᒪᔭᐅᔪᓐᓃᕐᓗᓯ ᐳᐃᒍᕐᑕᐅᔪᒫᕐᐳᓯ, ᐅᕙᖓ ᐊᑕᓂᖅ ᑕᒪᑐᒥᖓ ᐅᖃᕐᐳᖓ.”