ᐃᓯᑭᐊᓕᐅᑉ ᐊᒡᓚᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᐱᔪᒪᔭᖓ ᐃᓄᐃᓪᓗ ᐊᑭᕋᕐᑐᕐᓂᖏᑦ 1 ᐊᕐᕌᒍᑦ 7ᒋᓕᕐᑕᖓᓐᓂ, ᑕᖅᑮᑦ ᑕᓪᓕᒪᖓᓐᓂ, ᐅᓪᓗᖏᑕ ᖁᓕᖓᓐᓂ, ᐃᓴᕆᐊᓕᒥᐅᑦ ᐊᖓᔪᖅᑳᖏᑕ ᐃᓚᖏᓐᓄᑦ ᐅᐸᒃᑕᐅᕗᖓ ᐊᐱᕐᓱᕈᒪᓪᓗᑎᒃ ᐊᑕᓂᕐᒧᑦ, ᐃᒃᓯᕙᖃᑎᒋᓕᕐᐸᒃᑲᓗ. 2 ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 3 “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᐅᕙᓐᓄᑦ ᕾᕕᓰ ᐊᐱᕐᓱᕆᐊᕐᑐᕐᓗᓯ? ᐆᒪᓪᓗᖓ ᒎᑎᐅᒐᒪ, ᐊᑕᓂᖅ ᒎᑎ ᐅᖃᕐᐳᖅ, ᐊᐱᕐᓱᕐᑕᐅᔪᒪᖏᑦᑐᖓ ᐃᓕᑦᓯᓐᓄᑦ. 4 ᐃᓅᑉ ᐃᕐᓂᖓ, ᐃᖅᑲᕐᑐᕈᓐᓇᕐᐱᒌᑦ? ᐃᖅᑲᕐᑐᕈᓐᓇᕈᕕᒋᑦ ᑍᒤᓕᐅᓕᕆᑦ, ᖃᐅᔨᑎᓚᐅᒃᑭᑦ ᓯᕗᓕᖏᑕ ᓇᕐᕈᓇᕐᑐᓂᒃ ᐱᓇᓱᐊᕐᓯᒪᓂᖏᓐᓂᒃ. 5 ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑍᑦᓱᒪᓂ ᐃᓴᕆᐊᓕᒥᐅᑦ ᓂᕈᐊᕋᒃᑭᑦ, ᐊᖏᒻᒪᕆᒡᕕᒋᓚᐅᕐᐸᒃᑲ ᔧᑰᑉ ᑭᖑᕚᖏᑕ ᓯᕗᓕᖏᑦ, ᐅᕙᓐᓂᒡᓗ ᖃᐅᔨᑎᓪᓗᒋᑦ ᐄᑦᔨᑉᑎᒦᑎᓪᓗᒋᑦ, ᐊᖏᕐᕕᒋᓪᓗᒋᑦ ᐅᖃᐅᑎᓚᐅᕐᐸᒃᑲ, ‘ᐅᕙᖓᐅᕗᖓ ᐊᑕᓂᖅ ᒎᑎᓯ.’ 6 ᑍᑦᓱᒪᓂ ᐅᓪᓗᒥ ᐅᖃᕕᒃᓗᖓ ᐊᖏᕐᕕᒋᓚᐅᕐᐸᒃᑲ ᐄᑦᔨᑉᑎᒥᑦ ᐊᐅᓪᓚᕐᑎᓛᕐᓂᕋᕐᓗᒋᑦ ᑕᓯᐅᕐᓗᒋᓪᓗ ᓄᓇᒧᑦ ᓄᓇᑖᕆᔭᐅᖁᓪᓗᒍ ᓂᕈᐊᕆᓯᒪᔭᓐᓄᑦ, ᓄᓇᑦᓯᐊᕙᐅᓂᕐᐹᒧᑦ ᓄᓇᒥ ᓂᕿᒃᓴᖃᑦᓯᐊᕐᓇᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ. 7 ᐅᖃᐅᑎᓚᐅᕐᐸᒃᑲᓗ, ᑕᑯᒥᒋᔭᓯ ᓇᕐᕈᓇᕐᑐᑦ ᐃᒋᓚᐅᕐᓯᐅᒃ, ᐊᑕᖏᕐᓗᓯ ᐃᓕᑦᓯᓐᓂᒃ ᐃᑦᔪᕐᓇᕐᑎᑐᓐᓃᕆᑦᓯ ᐄᑦᔨᑉᑎᒥᐅᑦ ᒎᑎᓐᖑᐊᖏᓐᓄᑦ; ᐅᕙᖓᐅᒐᒪ ᐊᑕᓂᖅ ᒎᑎᓯ. 8 ᐅᕙᓐᓂᒡᓕ ᐊᑭᕋᕐᑐᓕᓚᐅᕐᐳᑦ ᓈᓚᒍᒪᓇᑎᒃ; ᐊᑕᖏᕐᓗᑎᒡᓕ ᒎᑎᓐᖑᐊᒥᖕᓂᒃ ᓇᕐᕈᓇᕐᑐᓂᒃ ᐃᒋᑦᓯᔪᒪᓚᐅᓐᖏᓚᑦ ᑕᑯᒥᒋᔭᒥᖕᓂᒃ, ᐄᑦᔨᑉᑎᒥᐅᓪᓗ ᒎᑎᓐᖑᐊᖏᓐᓂᒃ ᖁᔭᓈᕐᓯᓚᐅᕋᑎᒃ. ᐄᑦᔨᑉᑎᒦᑎᓪᓗᒋᑦ ᓱᓕ ᓂᓐᖓᐅᒪᓂᓐᓂᒃ ᐃᓱᒪᖃᕐᕕᒋᓕᓚᐅᕐᐸᒃᑲ, ᑭᖑᓂᖓᒍᓪᓗ ᓂᐅᖓᒪᓂᓐᓄᑦ ᐱᓇᓱᐊᕐᕕᒋᔪᒪᓕᕐᓗᒋᑦ. 9 ᑲᔪᓯᑎᓚᐅᓐᖏᓚᕋᓕ ᐊᑎᕋ ᐱᓪᓗᒍ ᓇᕐᕈᓇᕐᓯᑎᑕᐅᖁᓇᒍ ᐃᓅᖃᑎᒌᒡᔪᐊᑦ ᓄᓇᖃᑎᒋᔭᖏᑕ ᓵᖏᓐᓂ, ᐅᖃᐅᑎᔭᕇᓚᐅᕋᒃᑭᑦ ᓄᓇᖃᑎᖏᑦ ᑕᑯᓐᓇᕐᑎᓪᓗᒋᑦ ᐊᐅᓪᓚᕐᑎᑦᓱᒪᓂᕋᕐᓗᒋᑦ ᐄᑦᔨᑉᑎᒥᐅᑦ ᓄᓇᖓᓐᓂᑦ. 10 ᑍᒤᒻᒪᑦ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᐸᒃᑲ ᓄᓇᒧᑦ ᐃᓄᖃᔪᐃᑦᑐᒧᑦ. 11 ᒪᓕᒐᒃᓴᐅᖁᔭᓐᓂᒃ ᑐᓂᓯᕕᒋᓪᓗᒋᑦ ᐊᑐᕐᑕᐅᖁᔭᓐᓂᒡᓗ ᐊᔪᕆᕐᑐᓚᐅᕐᐸᒃᑲ, ᑖᒃᑯᓂᖓ ᒪᓕᑦᓯᐊᕐᓂᕐᒥᓄᑦ ᐃᓄᒃ ᐃᓄᖁᓪᓗᒍ. 12 ᓴᐸᑎᖁᑎᓐᓂᒡᓗ ᑐᓂᓚᐅᕐᐸᒃᑲ, ᓇᓗᓁᒃᑯᑕᐅᖁᓪᓗᒍ ᐊᖏᖃᑎᒌᒃᓯᒪᓂᑦᑎᓐᓂᒃ, ᖃᐅᔨᖁᓪᓗᒋᑦ ᐅᕙᖓ ᐊᑕᓂᖅ ᐃᑦᔪᕐᓁᑎᑦᓯᓯᒪᓂᓐᓂᒃ ᑖᒃᑯᓂᖓ. 13 ᐃᓴᕆᐊᓕᐅᑉ ᑭᖑᕚᖏᑕ ᐃᓄᖃᖏᑦᑐᒦᓪᓗᑎᒃ ᐊᑭᕋᕐᑐᓕᓚᐅᕐᐹᖓ; ᐱᖁᔭᒃᑲ ᓯᖁᒥᓚᐅᕐᐰᑦ ᐱᓂᐊᕐᑕᐅᖁᔭᒃᑲᓗ ᓈᓚᓚᐅᕐᓇᒋᑦ, ᓈᓚᒃᑐᓄᑦ ᐃᓅᑦᔪᑕᐅᔪᓐᓇᕐᑎᓪᓗᒋᑦ; ᓴᐸᑎᖁᑎᒃᑲᓗ ᓇᕐᕈᓇᕐᓯᑎᓚᐅᕐᐰᑦ. ᓂᓐᖓᐅᒪᓂᓐᓄᑦ ᐱᒋᐊᕈᒪᓕᓚᐅᕋᓗᐊᕐᐸᒃᑲ ᐃᓄᖃᖏᑦᑐᒦᑎᓪᓗᒋᑦ, ᓄᖑᑦᓯᐊᒻᒪᕆᒍᒪᓪᓗᒋᓪᓗ. 14 ᑍᒤᓕᐅᓚᐅᓐᖏᓚᖓᓕ ᐊᑎᕋ ᐱᑦᔪᑎᒋᓪᓗᒍ, ᐃᓅᖃᑎᒌᒡᔪᐊᓄᑦ ᓇᕐᕈᓇᕐᓯᑎᑕᐅᖁᓇᒍ, ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓂᕆᓚᐅᕐᑕᓐᓂᒃ ᖃᐅᔨᒪᖕᒪᑕ. 15 “ᑍᒤᒻᒪᑦ ᐃᓄᖃᖏᑦᑐᒦᑎᓪᓗᒋᑦ ᐅᖃᕕᓚᐅᕐᐳᖓ ᓄᓇᑖᕆᔭᐅᖁᓯᒪᔭᓐᓄᑦ ᑎᑭᑎᓛᕈᒪᔪᓐᓁᕐᓗᒋᑦ, ᓄᓇᒃᓴᕆᓚᐅᕐᑕᖓᓐᓄᑦ ᓂᕿᒃᓴᖃᑦᓯᐊᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ ᓄᓇᑦᓯᐊᕙᐅᓂᕐᐹᒧᑦ. 16 ᐱᓂᐊᕐᑕᐅᖁᔭᓐᓂᒃ ᐊᑭᕋᕐᑐᓚᐅᕐᒪᑕ ᐊᑐᕐᑕᐅᖁᔭᒃᑲᓗ ᒪᓕᓚᐅᖏᒻᒪᒋᑦ, ᓴᐸᑎᖁᑎᒃᑲᓗ ᓇᕐᕈᓇᕐᓯᑎᓚᐅᕐᐰᑦ; ᐆᒻᒪᑎᒥᒃᑎᒍᑦ ᒎᑎᓐᖑᐊᒥᖕᓂᒃ ᐱᔭᑐᐊᖃᓕᓚᐅᕐᒪᑕ. 17 ᓂᑲᒋᓕᕋᒃᑭᑦ ᑐᖁᕋᓚᐅᓐᖏᓚᒃᑲ, ᓄᖑᑎᓚᐅᕐᓇᖏᓪᓗ ᐃᓄᖃᖏᑦᑐᒦᑎᓪᓗᒋᑦ. 18 ᕿᑐᕐᖓᖏᓪᓗ ᐅᖃᐅᑎᓚᐅᕐᐸᒃᑲ ᐃᓄᖃᖏᑦᑐᒦᑎᓪᓗᒋᑦ, ‘ᓯᕗᓕᑦᓯ ᐱᓂᐊᕐᑕᐅᖁᔭᖏᑦ ᒪᓕᒃᑍᓕᓯᐅᒃ, ᐊᑐᕐᑕᐅᖁᔭᖏᓪᓗ ᐊᑐᕐᑍᓕᓗᒋᑦ, ᓇᕐᕈᓇᕐᓯᑎᑦᑍᓕᒋᑦᓯᓗ ᒎᑎᓐᖑᐊᕆᓚᐅᕐᑕᖏᓐᓄᑦ. 19 ᐅᕙᖓ ᐊᑕᓂᖅ ᒎᑎᒋᒐᑦᓯᓐᖓ; ᐱᓂᐊᕐᑕᐅᖁᔭᒃᑲ ᒪᓕᓕᕐᓯᐅᒃ, ᐊᑐᕐᑕᐅᖁᔭᒃᑲᓗ ᐊᑐᕐᓗᒋᑦ, 20 ᓴᐸᑎᖁᑎᒃᑲ ᐃᑦᔪᕐᓁᑎᓯᒋᒃ ᓇᓗᓁᒃᑯᑕᐅᖁᓪᓗᒋᑦ ᐃᓕᑦᓯᓐᓄᑦ ᐅᕙᓐᓄᓪᓗ, ᖃᐅᔨᖁᓪᓗᓯ ᐅᕙᖓ ᐊᑕᓂᐅᒐᒪ ᒎᑎᓯ.’ 21 ᑭᖑᕚᖑᖃᑎᒌᓪᓕ ᐊᑭᕋᕐᑐᓕᓚᐅᕆᕗᑦ ᐅᕙᓐᓂᒃ; ᐱᓂᐊᕐᑕᐅᖁᔭᒃᑲ ᒪᓕᓚᐅᓐᖏᓔᑦ, ᐊᑐᕐᑕᐅᖁᔭᒃᑲᓗ ᐊᑐᓚᐅᓐᖏᓔᑦ, ᐃᓅᑉ ᓈᓚᒃᑯᓂᒋᑦ ᐃᓅᒐᔭᕐᑎᓪᓗᒍ; ᓴᐸᑎᖁᑎᒃᑲᓗ ᓇᕐᕈᓇᕐᓯᑎᓚᐅᕐᐰᑦ. ᑕᕝᕙ ᐅᖃᓚᐅᕐᐳᖓ ᓂᓐᖓᒡᕕᒋᓂᐊᓕᕐᐸᒃᑲ ᓂᓐᖓᐅᓯᓐᓄᓪᓗ ᑎᑭᑕᐅᓂᐊᓕᕐᐳᑦ ᐃᓄᖃᖏᑦᑐᒦᑎᓪᓗᒋᑦ. 22 ᑍᒤᑦᑐᒪᔪᓐᓁᓚᐅᕆᕙᒃᑲᓕ ᐊᑎᕋ ᐱᑦᔪᑎᒋᓪᓗᒍ, ᐃᓅᖃᑎᒌᒡᔪᐊᑦ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᑎᓪᓗᖓ ᖃᐅᔨᓚᐅᕐᑐᑦ ᓇᕐᕈᓇᕐᓯᑎᑦᓯᖁᓇᒋᑦ ᐅᕙᓐᓂᒃ. 23 ᑕᕝᕙ ᐅᖃᕕᓕᓚᐅᕆᕗᖓ ᐃᓄᖃᖏᑦᑐᒦᑎᓪᓗᒋᑦ ᐃᓅᖃᑎᒌᒡᔪᐊᓄᑦ ᓯᐊᒻᒪᕐᑎᓛᕈᒪᓪᓗᒋᑦ ᐊᐅᓪᓚᕐᑎᓪᓗᒋᓪᓗ ᓄᓇᓕᒡᔪᐊᓄᑦ ᓇᒧᑐᐃᓐᓇᖅ. 24 ᑍᒤᓕᐅᓚᐅᕐᐸᒃᑲ ᐱᓂᐊᕐᑕᐅᖁᔭᒃᑲ ᒪᓕᓚᐅᖏᒻᒪᒋᑦ, ᐊᑐᕐᑕᐅᖁᔭᒃᑲᓗ ᐊᑐᓚᐅᖏᒻᒪᒋᑦ, ᓴᐸᑎᖁᑎᒃᑲᓗ ᓇᕐᕈᓇᕐᓯᑎᑦᓱᒋᑦ, ᓯᕗᓕᕕᓂᖏᑕᓗ ᒎᑎᓐᖑᐊᖏᓐᓂᒃ ᐃᓱᒪᑐᐊᖃᓚᐅᕐᒪᑕ. 25 ᑍᒤᒻᒪᑦ ᐱᖁᔭᕐᑖᕐᑎᓕᓚᐅᕐᐸᒃᑲ ᐱᐅᖏᑦᑐᓂᒃ, ᐊᑐᒐᒃᓴᓕᐅᕐᓗᒋᓪᓗ ᐃᓅᓯᖃᕐᓇᖏᑦᑐᓂᒃ; 26 ᓴᓗᒤᓕᑎᓚᐅᕐᐸᒃᑲ ᑐᓂᕐᕈᓯᖃᑦᑕᕐᓂᖏᑎᒍᑦ ᕿᑐᕐᖓᕐᑖᕆᐅᕈᑎᒥᖕᓂᒃ ᐃᑯᐊᓚᑎᑦᓯᓂᒃᑯᑦ, ᑲᑉᐱᐊᓱᒃᑎᑦᓱᒪᓪᓗᒋᑦ; ᑍᒤᑎᓚᐅᕐᐸᒃᑲ ᖃᐅᔨᓕᖁᓪᓗᒋᑦ ᐅᕙᖓᐅᒐᒪ ᐊᑕᓂᖅ. 27 ᑍᒤᒻᒪᑦ, ᐃᓅᑉ ᐃᕐᓂᖓ ᐃᓴᕆᐊᓕᐅᑉ ᑭᖑᕚᖏᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑍᒫᒃᑕᐅᖅ ᓯᕗᓕᓯ ᐅᕙᓐᓂᒃ ᐅᖃᕐᓂᕐᓘᑎᖃᓚᐅᕆᕗᑦ, ᐅᕙᓐᓄᑦ ᓱᓕᖃᑦᑕᖏᓐᓂᕐᒥᖕᓄᑦ. 28 ᓄᓇᑖᕆᔭᐅᖁᓪᓗᒍᓕ ᐊᖏᕈᑎᒋᓚᐅᕐᑕᓐᓄᑦ ᑎᑭᑎᓐᓇᒃᑭᑦ, ᖃᖅᑲᓂᒃ ᐳᕐᑐᔪᓂᒃ ᓇᐹᕐᑐᓂᒡᓗ ᑐᖑᔪᕐᑐᓂᒃ ᑕᑯᓕᕋᒥᒃ ᑐᓂᕐᕈᓯᕐᕕᒋᓚᐅᕐᐰᑦ ᓇᕐᕈᓇᕐᑐᓂᒡᓗ ᑐᓂᕐᕈᓯᕐᕕᒋᓪᓗᒋᑦ; ᑕᕝᕙᓂ ᓂᓐᖓᒃᓮᑦᔪᑎᓂᒃ ᑐᓂᕐᕈᓯᖃᑦᑕᓚᐅᕐᐳᑦ ᐃᑯᐊᓚᑦᓯᓪᓗᑎᒃ; ᑎᐱᑦᓯᐊᕆᒃᑐᓂᒃ ᐳᔫᕐᑎᑦᓯᖃᑦᑕᓚᐅᕐᐳᑦ, ᕔᓂᒥᒡᓗ ᑐᓂᕐᕈᑎᒥᖕᓄᑦ ᐃᓚᓕᐅᑦᔨᕙᒃᓗᑎᒃ. 29 ᐅᖃᐅᑎᓚᐅᕐᐸᒃᑲ, ‘ᓇᒧᑦ ᐳᕐᑐᔪᓄᑦ ᑐᒃᓯᐊᕆᐊᕐᐸᒃᐱᓰ?’ ᑍᒪᓐᖓᓂᑦ ᐱᒋᐊᕐᓗᒍ ᐳᕐᑐᔪᓕᐊᕐᑐᓂᒃ ᑍᔭᐅᕙᓕᓚᐅᕐᐳᖅ ᐅᓪᓗᒥᒧᑦ ᑎᑭᓪᓗᒍ. 30 ᑍᒤᒻᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓱᖕᒪᑦ ᐃᓕᑦᓯᓐᓂᒃ ᓴᓗᒤᓕᑎᑉᐱᓰ ᓯᕗᓕᓯ ᐱᐅᓯᖏᑦ ᒪᓕᒡᓗᒋᑦ ᑕᒻᒪᕐᑎᑕᐅᓪᓗᓯᓗ ᓇᕐᕈᓇᕐᑐᓄᑦ? 31 ᑐᓂᕐᕈᓯᕌᖓᑦᓯ ᑐᓂᕐᕈᑎᒃᓴᓂᒃ ᐃᕐᓂᑦᓯᓐᓂᒡᓗ ᐃᑯᐊᓪᓔᓪᓗᓯ ᑐᓂᕐᕈᓯᕌᖓᑦᓯ, ᑕᕝᕙ ᐃᓕᑦᓯᓐᓂᒃ ᓴᓗᒤᓕᑎᑉᐳᓯ ᒎᑎᓐᖑᐊᓕᒫᓯᓗ ᐅᓪᓗᒥᒧᑦ ᑎᑭᓪᓗᒍ. ᐊᐱᕐᓱᕐᑕᐅᔭᕆᐊᖃᕐᐳᖔ ᐃᓕᑦᓯᓐᓄᑦ, ᐃᓴᕆᐊᓕᒧᑦ ᑭᖑᕚᖑᔪᓯ? ᐃᓅᒐᒪ, ᐊᑕᓂᖅ ᒎᑎ ᐅᖃᕐᐳᖅ, ᐃᓕᑦᓯᓐᓄᑦ ᐊᐱᕐᓱᕐᑕᐅᔪᒪᓐᖏᓚᖓ. 32 ᐃᓱᒪᒋᕙᒃᑕᓯ ᐊᑐᓕᓚᐅᕐᓯᒪᓂᐊᓐᖏᓚᑦ ᐃᒫᒃ ᐃᓱᒪᕙᒃᑲᑦᓯ, ‘ᐃᓅᖃᑎᒌᒡᔪᐊᑦ ᐊᑦᔨᒋᓚᐅᕐᓚᕗᑦ, ᓄᓇᓕᒡᔪᐊᓂ ᐊᕕᒃᑐᕐᓯᒪᔪᓃᑦᑐᑦ ᑐᒃᓯᐊᕐᕕᖃᕐᐸᒃᑐᑦ ᓇᐹᕐᑐᓂᒃ ᐅᔭᖅᑲᓂᒡᓗ.’” ᒎᑎᐅᑉ ᓱᒋᐊᕐᓯᓂᖓ ᐃᓱᒪᒋᔪᓐᓁᕐᓯᓂᖓᓗ 33 “ᐊᑕᓂᖅ ᒎᑎ ᐅᖃᕐᐳᖅ, ᐅᕙᓐᓂᓪᓚᕆᒃ ᐱᔪᒥᒃ, ᐅᖃᐅᑎᕙᑦᓯ ᐊᐅᓚᑦᓯᓛᕐᐳᖓ ᑕᓕᓐᓄᑦ ᓴᓐᖏᔪᒧᑦ, ᓂᓐᖓᐅᓯᕐᒥᒃ ᐃᓚᖃᕐᑐᒧᑦ, ᐊᖓᔪᖅᑳᕐᔪᐊᖑᓛᕋᒪ ᐃᓕᑦᓯᓐᓄᑦ. 34 ᓄᓇᓂᑦ ᓇᑭᑐᐃᓐᓇᖅ ᓯᐊᒻᒪᕐᑎᑕᐅᓯᒪᕕᑦᓯᓐᓂᑦ ᑲᑎᕐᓱᕈᒫᕐᐸᑦᓯ, ᐊᒡᒐᓐᓄᑦ ᓲᖑᔪᓄᑦ ᑕᓕᓐᓄᓪᓗ ᓴᓐᖏᔪᒧᑦ, ᓂᓐᖓᐅᓯᓐᓂᒃ ᐃᓚᖃᕐᑐᒧᑦ; 35 ᐃᓅᖃᑎᒌᒡᔪᐊᑦ ᓯᓚᑖᓄᑦ ᐃᓄᖃᔪᐃᑦᑐᒧᑦ ᐂᑎᑦᓱᒫᕐᐸᑦᓯ, ᑕᕝᕙᓂᓗ ᐃᖅᑲᕐᑐᕈᒫᕐᐸᑦᓯ ᑕᒃᑯᒧᓪᓚᕆᒃ. 36 ᓯᕗᓕᑦᓯᓐᓂᒃ ᐃᖅᑲᕐᑐᐃᓚᐅᕐᓯᒪᓂᑦᑐᑦ ᐄᑦᔨᑉᑎᐅᑉ ᐃᓄᖃᔪᐃᑦᑐᖓᓂ, ᑍᒫᒃᑕᐅᖅ ᐃᖅᑲᕐᑐᕈᒫᕆᕙᑦᓯ, ᐊᑕᓂᖅ ᒎᑎ ᐅᖃᕐᐳᖅ. 37 ᐃᓕᑦᓯᓐᓂᒃ ᓂᒍᕐᕕᖃᖏᑦᑐᒃᑯᑦ ᐱᓇᓱᐊᕐᑎᑦᓯᔪᒫᕐᐳᖓ ᐊᖏᕈᑎᒋᓯᒪᔭᓐᓂᒃ ᒪᓕᑦᓯᐊᓕᕐᑎᓪᓗᓯ. 38 ᐊᑭᕋᕐᑐᕐᑏᑦ ᐃᓕᑦᓯᓐᓂᑦ ᐲᔭᕈᒫᕐᐸᒃᑲ, ᐊᔪᕐᑐᓕᔪᓪᓗ ᐅᕙᓐᓄᑦ: ᓄᓇᒋᔭᖏᓐᓂᑦ ᐊᐅᓪᓚᕐᑎᓪᓗᒋᑦ, ᐅᑎᕐᑎᑦᓱᒫᓐᖏᓚᒃᑲ ᐃᓴᕆᐊᓕᒧᑦ. ᑕᕝᕙ ᖃᐅᔨᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ. 39 ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᒧᑦ ᑭᖑᕚᖑᔪᓯ, ᐅᕙᓐᓂᒃ ᓈᓚᖕᓂᐊᖏᒃᑯᑦᓯ; ᒎᑎᓐᖑᐊᓯ ᐊᑐᓂᑦ ᑭᒡᒐᕐᑐᓕᕐᓯᐅᒃ ᒫᓐᓇᒥᑦ ᐱᒋᐊᕐᓗᒍ ᑭᖑᓂᖓᒍᓪᓗ, ᐊᑎᕋᓕ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᖃᑦᑕᕐᓂᐊᕈᓐᓃᕐᐸᓯ ᑐᓂᕐᕈᑎᑦᓯᓐᓄᑦ ᒎᑎᓐᖑᐊᑦᓯᓐᓄᓪᓗ. 40 ᖃᖅᑲᖁᑎᓐᓂ ᐃᑦᔪᕐᓁᑦᑐᒥ, ᐃᓴᕆᐊᓕᒥᐅᑦ ᖃᖅᑲᖏᓐᓂ ᐳᕐᑐᓂᕐᐹᒥ, ᐊᑕᓂᖅ ᒎᑎ ᐅᖃᕐᐳᖅ, ᑕᕝᕙᓂ ᐃᓴᕆᐊᓕᐅᑉ ᑭᖑᕚᓕᒫᖏᑕ ᑐᒃᓯᐊᕐᕕᒋᔭᒃᓴᕆᕚᖓ; ᑕᕝᕙᓂ ᐃᓚᓕᐅᕈᒫᕐᐸᒃᑲ, ᑕᕝᕙᓂᓗ ᑐᓂᕐᕈᓯᖁᕙᑦᓯ ᑐᓂᔭᒃᓴᓂᒃ ᐱᐅᓂᕐᐹᓂᒃ ᑐᓂᕐᕈᑎᒃᓴᑦᓯᓐᓂᒃ ᐃᑦᔪᕐᓁᑦᑐᓂᒃ. 41 ᑐᓂᕐᕈᑏᑦ ᑎᐱᑦᓯᐊᕆᖕᓂᖏᓐᓄᑦ ᐃᓚᓕᐅᕈᒫᕐᐸᑦᓯ, ᓄᓇᓂᑦ ᓯᐊᒻᒪᕐᑎᑕᐅᓯᒪᕕᒋᔭᑦᓯᓐᓂᑦ ᐅᑎᕐᑎᒃᑯᑦᓯ; ᐃᑦᔪᕐᓁᓐᓂᕋ ᐃᓕᑦᓯᓐᓄᑦ ᓴᖅᑭᑎᑦᓱᒫᕐᐸᕋ ᐃᓅᖃᑎᒌᒡᔪᐊᑦ ᑕᒃᑯᐊᓂ. 42 ᑕᕝᕙ ᑐᑭᓯᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ, ᐃᓴᕆᐊᓕᐅᑉ ᓄᓇᖓᓄᑦ ᐅᑎᕐᑎᒃᑯᑦᓯ, ᓯᕗᓕᑦᓯᓐᓄᑦ ᓄᓇᒋᔭᐅᖁᓪᓗᒍ ᐊᖏᕈᑎᒋᓚᐅᕐᑕᓐᓄᑦ. 43 ᑕᕝᕙᓂᓗ ᐃᖅᑬᓕᕈᒫᕐᐳᓯ ᐃᓕᖅᑯᓯᕆᖃᑦᑕᓚᐅᕐᑕᑦᓯᓐᓄᑦ ᐱᐅᔪᓐᓃᕐᑎᑕᐅᓯᒪᓂᓯᓐᓂᒃ; ᐃᓕᑦᓯᓐᓂᒡᓗ ᓇᖁᔭᕆᓕᕈᒫᕐᐳᓯ ᐅᒡᒍᐊᓕᕐᓗᓯᓗ ᐱᐅᖏᑦᑐᓕᖃᑦᑕᓚᐅᕐᓂᓕᒫᓯᓐᓂᒃ. 44 ᖃᐅᔨᔪᒫᕐᐳᓯᓗ ᐅᕙᖓᐅᒐᒪ ᐊᑕᓂᖅ, ᐱᓂᐊᕐᕕᒋᓯᒪᒐᑦᓯ ᐊᑎᕋ ᐱᑦᔪᑎᒋᓪᓗᒍ, ᐱᐅᖏᑦᑐᓕᓂᓯ ᐱᑦᔪᑎᒋᓇᒋᑦ, ᐱᓂᐊᕐᓂᓯᓗ ᐊᓯᕈᕐᑕᐅᓇᕐᑐᑦ ᐱᑦᔪᑎᒋᓇᒋᑦ, ᐃᓴᕆᐊᓕᒧᑦ ᑭᖑᕚᖑᔪᓯ, ᐊᑕᓂᖅ ᒎᑎ ᐅᖃᕐᐳᖅ.” ᐅᓪᓗᓪᓗᐊᑉ ᓇᓛᓂ ᐃᑯᐊᓚᔪᖅ 45 ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 46 “ᐃᓅᑉ ᐃᕐᓂᖓ ᐅᓪᓗᓗᐊᑉ ᓇᓛᓄᑦ ᓵᓪᓗᑎᑦ, ᐅᓪᓗᓪᓗᐊᑉ ᓇᓛᓃᑦᑐᑦ ᓈᒻᒪᒋᖏᓪᓗᒋᑦ ᐊᔪᕆᕐᑐᒃᑭᑦ, ᓂᒋᑉᒧᓪᓗ ᓇᐹᕐᑐᒐᓴᓕᖕᒧᑦ ᐱᔪᒫᕐᑐᒃᓴᓂᒃ ᐅᖃᓪᓚᒋᑦ. 47 ᓂᒋᑉᒥ ᓇᐹᕐᑐᒐᓮᑦ ᐅᖃᐅᑎᓗᒋᑦ ᐊᑕᓂᐅᑉ ᐅᖃᐅᓯᖓᓂᒃ; ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ ᐃᑯᐊᓪᓔᓯᕗᖓ ᓇᐹᕐᑐᓂᒃ ᓇᐹᕐᑐᓕᒫᓪᓗ ᐆᒻᒪᐅᒐᓗᐊᑦ ᐸᓪᓕᐅᒐᓗᐊᓪᓗ ᐃᑯᐊᓪᓚᔪᒫᕐᐳᑦ, ᖃᒥᑕᐅᔪᓐᓇᕈᒫᓐᖏᓚᓪᓗ, ᐅᓪᓗᓪᓗᐊᒥᑦ ᐱᒋᐊᕐᓗᓂ ᐅᓐᓄᐊᓪᓗᐊᑉ ᓇᓛᓄᑦ ᓯᐊᒻᒪᒍᒫᕐᐳᖅ, ᐃᑯᐊᓚᔪᒧᓪᓗ ᓄᖑᑕᐅᓗᑎᒃ. 48 ᐃᓄᓕᒫᓪᓗ ᑐᑭᓯᔪᒫᕐᐳᑦ ᐅᕙᖓ ᐊᑕᓂᖅ ᐃᑯᐊᓪᓚᒃᑎᓚᐅᕋᒃᑯ; ᖃᒥᑕᐅᔪᓐᓇᕈᒫᓐᖏᓚᕐᓗ.” 49 ᑕᕝᕙ ᐅᖃᕐᐳᖓ, “ᐊᑕᓃᖅ ᒎᑏᒃ! ᐅᕙᓐᓂᒃ ᐊᑲᐅᒃᓴᕋᑎᒃ ᐅᖃᕐᑐᖃᖃᑦᑕᕐᒪᑦ, ‘ᐅᓇ ᑐᑭᓯᓇᓱᐊᕆᐊᓖᓐᓈᓗᖕᓂᒃ ᐅᖃᓪᓚᖃᑦᑕᕐᑐᖅ.’” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society