ᐃᓯᑭᐊᓕᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᓂᑯᕕᓕᕆᑦ, ᐅᖃᐅᓯᒃᓴᖃᕐᕕᒋᒐᒃᑭᑦ.”

² ᐅᖃᓪᓚᒃᑎᓪᓗᒍ ᓱᓕ, ᒎᑎᐅᑉ ᐊᓂᕐᓂᖓᓄᑦ ᐃᑎᕐᕕᐅᓪᓗᖓ ᓂᑯᕕᑎᑕᐅᕗᖓ; ᑐᓵᕙᕋᓗ ᐅᕙᓐᓄᑦ ᐅᖃᓪᓚᒃᑎᓪᓗᒍ.

³ ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑎᓕᕙᒋᑦ ᐃᓴᕆᐊᓕᒥᐅᓄᑦ, ᐃᓅᖃᑎᒌᒡᔪᐊᓄᑦ ᐊᑭᕋᕐᑐᕐᑎᓄᑦ, ᐅᕙᓐᓂᒃ ᐊᑭᕋᕐᑐᕐᑎᑐᖃᐅᒐᒥᒃ; ᑖᒃᑯᐊᓗ ᓯᕗᓕᕕᓂᖏᓪᓗ ᐅᕙᓐᓄᑦ ᐱᐅᖏᑦᑐᓕᓯᒪᕗᑦ ᐅᓪᓗᒥᒧᑦ ᐊᒡᓛᑦ ᑎᑭᓪᓗᒍ.

⁴ ᓯᑎᔪᓄᑦ ᑐᓵᖏᑦᑐᓄᓪᓗ: ᑖᒃᑯᓄᖓ ᑎᓕᕙᒋᑦ; ᑖᒃᑯᓄᖓ ᐅᖃᕐᑐᒃᓴᐅᕗᑎᑦ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ.’

⁵ ᓈᓚᖕᓂᐊᕐᐸᑕ ᓈᓚᖕᓂᐊᖏᑉᐸᑕᓘᓐᓃᑦ ᐊᑭᕋᕐᑐᕐᑎᐅᓂᕐᒥᖕᓄᑦ ᖃᐅᔨᔪᒫᕐᐳᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᓄᑦ ᑎᑭᑕᐅᕐᓯᒪᔪᕕᓂᐅᓂᕐᒥᖕᓂᒃ.

⁶ “ᐃᕝᕕᓪᓕ, ᐃᓅᑉ ᐃᕐᓂᖓ, ᑲᑉᐱᐊᒋᓂᐊᕐᓇᒋᑦ, ᐅᖃᐅᓯᖏᓪᓗ ᓯᕘᕋᒋᓇᒋᑦ, ᑲᑭᓪᓚᕐᓇᕐᑐᑎᑐᑦ ᑲᐱᔭᐅᓐᓇᕐᑐᑎᑐᓪᓗ ᓯᑯᐊᕐᐱᐅᓃᑦ ᐊᑯᓐᓂᖓᓃᑦᑐᑎᑐᑦ ᑍᒤᑦᑑᖃᑦᑕᕐᓂᐊᕐᐳᑎᑦ, ᑍᒤᒃᑲᓗᐊᕐᐸᑕ ᑲᑉᐱᐊᒋᑦᑍᓕᒃᑭᑦ ᐅᖃᐅᓯᖏᓪᓘᓐᓃᑦ ᓯᕘᕋᒋᑦᑍᓕᓗᒋᑦ, ᑕᐅᑦᑐᖏᓐᓄᑦ ᓴᐱᓕᕐᑎᑕᐅᑦᑍᓕᒋᑦ, ᑖᒃᑯᐊ ᐊᑭᕋᕐᑐᕐᑎᐅᖕᒪᑕ.

⁷ ᐅᖃᕐᑕᐅᖁᔭᓂᒃ ᐅᖃᐅᓯᖃᕐᑐᒃᓴᐅᕗᑎᑦ, ᓈᓚᒃᑕᐅᓂᐊᕈᕕᑦ ᓈᓚᒃᑕᐅᔮᖏᒃᑯᕕᓪᓘᓐᓃᑦ, ᑖᒃᑯᐊ ᐊᑭᕋᕐᑐᕐᑎᐅᖕᒪᑕ.

⁸ “ᐃᕝᕕᓪᓕ ᐃᓅᑉ ᐃᕐᓂᖓ, ᐃᓕᖕᓄᑦ ᐅᖃᐅᓯᕆᔭᒃᑲ ᓈᓚᒃᑭᑦ; ᑍᒃᑯᑎᑐᓇᖅ ᐊᑭᕋᕐᑐᕐᑐᑎᑐᑦ ᐊᑭᕋᕐᑐᕐᑍᓕᒋᑦ; ᖃᓃᑦ ᐂᑦᑕᓕᕈᒃ, ᓂᕆᓂᐊᕋᕕᑦ ᑐᓂᔭᓐᓂᒃ.”

⁹ ᑕᑯᓴᕋᒪ, ᑕᑯᒋᑦ ᐊᒡᒐᓂᒃ ᑕᑯᓕᕐᐳᖓ ᐅᕙᓐᓄᑦ ᑐᓂᒻᒥᔪᓂᒃ, ᑎᒍᒥᐊᕐᓗᑎᒃ ᐊᒡᓚᖕᓂᒃ ᐃᒧᓯᒪᔪᓂᒃ;

¹⁰ ᓯᕗᕋᓐᓄᑦ ᐃᓯᕕᒻᒪᒋᑦ; ᐃᒡᓗᒃᑐᑦ ᑎᑎᕋᕐᕕᒋᓯᒪᕗᑦ, ᑕᕝᕙᓂᓗ ᑎᑎᕋᕐᓯᒪᕗᑦ ᐅᒡᒍᐊᕐᓂᖅ, ᕿᒃᓵᒃᓗᑎᒃ ᕿᐊᓂᖅ, ᑲᑉᐱᐊᓱᖕᓂᕐᓗ.