ᐃᓯᑭᐊᓕᐅᑉ ᐊᒡᓚᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᕿᒃᓵᖕᓂᕐᒧᑦ ᐃᓐᖏᕈᓯᖅ

¹ “ᐃᓐᖏᕈᓯᓕᐅᓚᐅᕆᑦ ᐅᒡᒍᐊᕈᑎᒥᒃ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖓᑕ ᐃᕐᓂᖏᓐᓄᑦ,

² ᐅᖃᕐᓗᑎᑦ: ᐊᓈᓁᑦ ᓲᖑᔫᓚᐅᕐᐳᖅ ᓛᔧᑦ ᐊᑯᕐᖓᓐᓂ! ᕿᑐᕐᖓᒥᓂᒃ ᓴᕐᓕᐊᓚᐅᕐᐳᖅ ᓛᔭᑦ ᐊᖑᑎᑦ ᐃᕐᓯᓇᕐᑐᑦ ᐊᑯᕐᖓᓐᓂ.

³ ᕿᑐᕐᖓᒥ ᐃᓚᖓᑦ ᐱᕈᕐᓴᓚᐅᕐᐹ; ᐃᓅᓱᒃᑐᕈᕋᒥ ᓂᕿᒃᓴᕐᓯᐅᕈᓐᓇᕐᓯᓚᐅᕐᐳᖅ; ᐃᓄᒃᑐᓲᖑᓕᕐᓗᓂ.

⁴ ᐃᓅᖃᑎᒌᒡᔪᐊᑦ ᑐᓴᐅᒪᑎᑦᓯᓕᓚᐅᕐᐳᑦ ᐃᕐᓯᓇᕐᓂᖓᓂᒃ; ᐃᑎᕐᓴᓕᐅᕈᑎᓪᓗᒍ ᑕᕝᕗᖓ ᑲᑕᒃᑎᑉᐹᑦ; ᓂᒃᓯᒃᓯᒪᓪᓗᒍ ᐄᑦᔨᑉᑎᒧᐊᕈᑎᕚᑦ.

⁵ ᐊᕐᓇᓪᓗᖅ ᐱᕖᕈᑎᒐᒥ ᓂᕆᐅᖕᓂᖃᕈᓐᓃᓚᐅᕐᐳᖅ, ᑕᕝᕙ ᕿᑐᕐᖓᒥ ᐃᓚᖓᓐᓂᒃ ᐱᕈᕐᓮᓕᓚᐅᕆᕗᖅ, ᑖᓐᓇᓗ ᐃᓅᓱᒃᑐᕈᕋᒥ ᐃᕐᓯᓇᕐᑐᓐᖑᓚᐅᕐᐳᖅ.

⁶ ᐱᕈᕇᕋᒥ ᓛᔭᐅᖃᑎᒥᑐᑦ ᐱᓇᓱᐊᖃᑦᑕᓕᕐᐳᖅ; ᐃᓅᓱᒃᑐᕈᕋᒥ ᓂᕿᒃᓴᕐᓯᐅᕈᓐᓇᕐᓯᓚᐅᕐᐳᖅ; ᐃᓄᒃᑐᓲᖑᓕᕐᓗᓂ.

⁷ ᓄᓇᓖᑦ ᐱᔭᐅᑦᔧᕐᓯᒪᔪᑦ ᓯᖁᑦᑎᓚᐅᕐᐰᑦ, ᐃᒡᓗᒐᓮᓪᓗ ᓱᓇᐅᔪᓐᓁᕐᑎᓪᓗᒋᑦ; ᖃᓕᖑᐊᓕᕌᖓᑦ ᐃᓅᓕᒫᑦ ᑕᑕᒥᖃᑦᑕᓚᐅᕐᐳᑦ.

⁸ ᑕᕝᕙ ᐃᓅᖃᑎᒌᒡᔪᐊᑦ ᑲᑐᑦᔨᓪᓗᑎᒃ ᐱᓇᓱᐊᓕᓚᐅᕐᐳᑦ ᓇᒧᓕᒫᖅ ᓄᓗᐊᒥᖕᓂᒃ ᐃᓯᕕᑦᓯᓪᓗᑎᒃ; ᐃᑎᕐᓴᓕᐊᕆᓯᒪᔭᒥᓂᓗ ᐱᔭᕆᕚᑦ.

⁹ ᐆᒪᔪᓂᒡᓗ ᑎᒍᓯᑦᔪᑎᒥᖕᓄᑦ ᐊᕙᓗᓕᖕᒧᑦ ᐴᕐᓗᒍ, ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐂᑦᑑᑎᒋᕙᑦ; ᑎᒍᔭᐅᓯᒪᕕᖕᒧᐊᓚᐅᕐᐹᑦ ᖃᓕᖑᐊᕐᓂᖓ ᑐᓴᕐᑕᐅᒃᑲᓐᓂᖁᓇᒍ ᐃᓴᕆᐊᓕᐅᑉ ᖃᖅᑲᖏᓐᓂ.

¹⁰ ᐊᓈᓁᑦ ᐊᑦᔨᖃᕐᐳᖅ ᐅᕐᐱᒐᕐᓂᒃ ᕔᓂᓕᒃᓴᓂᒃ ᑰᑉ ᖃᓂᒋᔮᓂ ᐃᓕᐅᕋᕐᓯᒪᔪᑎᑐᑦ ᐃᒪᖃᑦᓯᐊᕐᑐᒦᖁᓪᓗᒍ, ᕔᓂᓕᒃᓴᕐᓗ ᐸᐅᕐᖓᖃᑦᓯᐊᕐᐳᖅ ᐅᖃᐅᔭᖃᑦᓯᐊᕐᓗᓂᒡᓗ ᐃᒪᖃᑦᓯᐊᕋᒥ.

¹¹ ᓇᑲᖓᑕ ᓯᓕᖕᓂᕐᐹᖓ ᐊᖓᔪᖅᑳᕐᔪᐊᑉ ᑎᒃᑯᐊᕐᓯᑦᔪᑎᑖᕆᕚ; ᖁᒻᒧᑦ ᑕᑭᒡᓕᕗᖅ ᐊᕙᓚᖓᔪᐃᑦ ᑲᑎᓐᖓᓂᖏᓐᓂ; ᐳᕐᑐᓂᖓ ᑕᑯᔭᐅᕗᖅ ᐊᕙᓚᖓᔪᖏᑦ ᓯᓕᒃᑑᑕᐅᓪᓗᑎᒃ.

¹² ᓂᓐᖓᐅᒪᔪᓄᓪᓕ ᓄᓱᒃᑕᐅᓪᓗᓂ ᐅᕐᕈᑎᑕᐅᕗᖅ ᒪᓂᖅᑲᒧᑦ; ᐆᓇᕐᑐᒥᒃ ᓯᕿᓂᐅᑉ ᓄᐊᕕᐊᓂᑦ ᐊᓄᕌᓕᕐᒪᑦ ᐸᓂᕐᐳᖅ; ᐸᐅᕐᖓᖏᑦ ᐲᔭᕐᑕᐅᓪᓗᑎᒃ, ᓇᑲᖓᓗ ᓯᓕᖕᓂᕐᐹᖅ ᑐᖁᓕᕗᖅ; ᐃᑯᒪᒧᓪᓗ ᓄᖑᑕᐅᓪᓗᓂ.

¹³ ᐱᕈᕐᓯᐊᕆᔭᐅᓕᕆᕗᕐᓕ ᐃᓄᖃᔪᐃᑦᑐᒥ, ᐸᓂᕐᑐᒥ ᐃᒪᖃᖏᑦᑐᒥ.

¹⁴ ᑕᕝᕙ ᓇᑲᖓᒍᑦ ᐃᑯᐊᓪᓚᒃᐳᖅ, ᐊᕙᓚᖓᔪᖏᑦ ᐸᐅᕐᖓᖏᓪᓗ ᓄᖑᓪᓗᑎᒃ, ᑕᕝᕙ ᓇᑲᖃᕈᓐᓃᕐᐳᖅ ᓯᓕᒃᑐᒥᒃ, ᐊᖓᔪᖅᑳᕐᔪᐊᓪᓗ ᑎᒃᑯᐊᕐᓯᑦᔪᑎᒃᓴᖓᓄᑦ ᐊᑐᕐᑕᐅᓂᐊᕈᓐᓃᕐᓗᓂ.” ᑖᒃᑯᐊ ᐅᖃᐅᓰᑦ ᐅᒡᒍᐊᕐᓂᐅᖕᒪᑕ, ᐅᒡᒍᐊᕐᑐᓄᑦ ᐊᑐᕐᑕᐅᖃᑦᑕᓕᓚᐅᕐᐳᖅ.