ᐃᓯᑭᐊᓕᐅᑉ ᐊᒡᓚᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᒃᑐᕋᓕᐅᑉ ᕔᓂᒃᓴᐅᓪᓗ ᐊᑦᔨᐅᑎᑕᐅᓂᖏᑦ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᓇᓚᐅᑦᓵᒐᒃᓴᓕᐅᕆᑦ, ᐊᑦᔨᐅᔪᒥᒡᓗ ᐅᖃᐅᑎᓗᒋᑦ ᐃᓴᕆᐊᓕᐅᑉ ᑭᖑᕚᖏᑦ.

³ ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓇᒃᑐᕋᓕᒃᔪᐊᕐᑕᖃᓚᐅᕐᐳᖅ ᐃᓴᕈᖅᑯᕐᑐᓪᓗᓂ ᓱᓗᒑᖏᓪᓗ ᑕᑭᓪᓗᑎᒃ, ᒥᖅᑯᖓᓗ ᐊᑦᔨᒌᖏᑦᑐᓂᒃ ᑕᕐᓴᖃᐅᕐᓗᓂ, ᖃᖓᑕᓪᓗᓂ ᓕᐸᓇᓂᒧᐊᕐᐳᖅ ᓇᐹᕐᑑᑉ ᓰᑕᕆᐅᑉ ᓄᕗᐊᓂᒃ ᑎᒍᓯᓪᓗᓂ;

⁴ ᐱᕈᓕᕋᑖᕐᑐᒥᒃ ᓇᑲᑦᓯᕗᖅ ᐊᐅᓪᓚᕈᑎᓪᓗᒍᓗ ᓄᓇᒧᑦ ᑕᐅᕐᓰᕕᐅᕙᒃᑐᒧᑦ, ᐃᒡᓗᒐᓴᒡᔪᐊᓄᓪᓗ ᓂᐅᕕᕐᑎᓕᖕᓄᐊᕈᑎᕚ.

⁵ ᓄᓇᑦᓯᓐᓂᑦ ᐱᕈᕐᓯᐊᒃᓴᒥᒃ ᐱᓪᓗᓂ ᐱᕈᕐᓰᕕᖕᒧᑦ ᐃᑦᔪᖃᑦᓯᐊᕐᑐᒧᑦ ᐃᓕᕚ; ᐃᒪᖃᑦᓯᐊᕐᑐᒧᑦ. ᐅᕐᐱᒐᕐᑎᑐᑦ ᐋᖅᑭᒡᓗᒍ,

⁶ ᐱᕈᕋᒥᓗ ᐸᐅᕐᖓᓕᒃᓴᐅᓪᓗᓂ ᕔᓂᒃᓴᓐᖑᕐᐳᖅ ᐳᒃᑭᑦᑑᓪᓗᓂ ᓯᐊᒻᒪᖓᓕᕐᐳᖅ ᓇᒧᑐᐃᓐᓇᖅ, ᐊᕙᓚᖓᔪᖏᓪᓗ ᓇᒃᑐᕋᓕᐅᑉ ᒥᒃᓵᓄᑦ ᐱᕈᓕᕐᐳᑦ, ᐊᒫᖏᓪᓕ ᐱᕈᕐᕕᖕᒥᓃᖏᓐᓇᕐᓗᑎᒃ. ᕔᓂᖃᕐᕕᒃᓴᑐᑦ ᐱᕈᓕᕐᐳᖅ, ᐊᕙᓚᖓᔪᖃᓕᕐᓗᓂ ᐅᓄᕐᑐᓂᒃ ᐅᖃᐅᔭᖃᑦᓯᐊᓕᕐᓗᓂᓗ.

⁷ “ᐊᒻᒪ ᓇᒃᑐᕋᓕᒡᔪᐊᕐᑕᖃᓚᐅᕆᕗᖅ ᐊᓯᐊᓂᒃ ᐃᓴᕈᖅᑯᕐᑐᔫᓪᓗᓂ ᒥᖅᑯᖓᓗ ᑐᕐᕈᑦᓯᐊᕐᓗᓂ; ᑕᕝᕙ ᕔᓂᓕᒃᓴᐅᑉ ᐊᒫᖏᑦ ᐱᕈᕐᐸᓪᓕᐊᒐᒥᒃ ᓴᖑᓪᓗᑎᒃ ᓇᒃᑐᕋᓕᖕᒧᐊᓕᕐᐳᑦ, ᑖᑦᓱᒧᖓ ᐃᒻᒥᕐᓱᕐᑕᐅᔪᓐᓇᕐᒪᖔᕐᒥᒃ. ᐱᕈᕐᕕᒋᔭᑐᐊᒥᓂᐅᖏᑦᑐᖅ

⁸ ᑖᑦᓱᒪᓕ ᕔᓂᓕᒃᓴᖅ ᐃᑦᔪᖃᑦᓯᐊᕐᑐᒧᐊᕐᐹ ᐃᒪᖃᑦᓯᐊᕐᑐᒧᑦ, ᐊᕙᓚᖓᔪᕐᑖᑦᓯᐊᖁᓪᓗᒍ, ᐸᐅᕐᖓᕐᑖᑦᓯᐊᕐᓗᓂᓗ, ᑕᑯᒥᓇᕐᓗᓂᓗ ᐱᕈᓕᕐᐳᖅ.

⁹ “ᐅᖃᕆᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑖᓐᓇ ᕔᓂᒃᓴᖅ ᐱᕈᕐᐸᓪᓕᐊᖏᓐᓇᕐᓂᐊᕐᐹ? ᑖᑦᓱᒪ ᓄᓱᒃᑲᔭᓐᖏᓚᐅᒃ ᐊᒫᖏᑎᒍᑦ? ᐊᕙᓚᖓᔪᖏᑦ ᓇᑲᑎᕐᓗᓂᒋᑦ, ᐱᕈᓕᓵᕐᑐᑦ ᑕᒪᕐᒥᒃ ᑐᖁᓕᒐᔭᓐᖏᓛᑦ? ᓴᓐᖏᔪᐊᓘᖏᑦᑑᒐᓗᐊᑦ ᖃᑦᓰᓐᓇᐅᒐᓗᐊᓪᓗ ᐊᒫᖏᑎᒍᑦ ᓄᓱᒃᓯᔪᓐᓇᕐᐳᑦ.

¹⁰ ᑕᑯᒋᑦ, ᐱᕈᕐᕕᖓᑕ ᐊᓯᐊᓄᑦ ᐱᕈᕐᓯᐊᕆᔭᐅᓕᕈᓂ, ᐱᕈᕐᐸᓪᓕᐊᖏᓐᓇᕋᔭᕐᐹ? ᓯᕿᓂᐅᑉ ᓄᐃᕕᐊᓂᑦ ᐊᓄᕌᕐᕕᐅᓕᕈᓂ ᑐᖁᓕᒐᔭᓐᖏᓛᖅ? ᐱᕈᕐᕕᒋᔭᖓᑕ ᑐᓐᖓᕕᖏᑎᒍᑦ ᑐᖁᓕᒐᔭᓐᖏᓛᖅ?”

ᐊᑦᔨᐅᔫᑉ ᑐᑭᓯᓇᕐᓯᑎᑕᐅᓂᖓ

¹¹ ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

¹² “ᐊᑭᕋᕐᑐᕐᑎᐅᔪᑦ ᑭᖑᕚᖑᖃᑎᒌᑦ ᑐᑭᓯᖕᒪᖔᑕ ᑕᒪᒃᑯᐊ ᑐᑭᖏᓐᓂᒃ ᐊᐱᕆᓚᐅᒃᑭᑦ, ᐅᖃᐅᑎᒃᑭᑦ ᑕᑯᒋᑦ, ᐹᐱᓘᓂᐅᑉ ᐊᖓᔪᖅᑳᕐᔪᐊᖓᑦ ᔨᕉᓴᓕᒧᐊᓚᐅᕐᐳᖅ, ᔨᕉᓴᓕᐅᓪᓗ ᐊᖓᔪᖅᑳᕐᔪᐊᖓᓐᓂᒃ ᐊᖓᔪᖅᑳᖁᑎᖏᓐᓂᒡᓗ ᑎᒍᓯᓪᓗᓂ ᐹᐱᓘᓂᒧᑦ ᐅᑎᐅᑎᓚᐅᕐᐰᑦ.

¹³ ᐊᖓᔪᖅᑳᕐᔪᐊᓪᓗ ᕿᑐᕐᖓᖏᑕ ᐃᓚᖓᓐᓄᑦ ᐊᖏᖃᑎᒌᒍᑎᓕᐅᓚᐅᕐᐳᖅ ᐅᖃᕕᖕᓂᒃᑯᑦ. ᐊᖓᔪᖅᑳᐅᓂᖏᓪᓗ ᓄᓇᒥ ᐊᐅᓪᓚᕈᑎᓚᐅᕆᕔᑦ,

¹⁴ ᑖᒃᑯᐊ ᐊᖓᔪᖅᑲᐅᕕᖏᑦ ᐱᔪᓐᓇᕐᓯᕙᓪᓕᐊᖁᓇᒋᑦ ᐃᒻᒥᖕᓂᒡᓗ ᒪᑭᑦᑐᓐᓇᕐᓯᖁᓇᒋᑦ, ᐊᖏᖃᑎᒌᒍᑎᓕᐊᖓ ᒪᓕᒃᑕᐅᖏᓐᓇᖁᓪᓗᒍ ᑖᒃᑯᓄᖓ.

¹⁵ ᑖᓐᓇᓕ ᐊᖓᔪᖅᑳᕐᔪᐊᖅ ᑖᑦᓱᒥᖓ ᐊᑭᕋᕐᑐᓕᕋᒥ ᐄᑦᔨᑉᑎᒥᐅᓄᑦ ᑎᓕᓯᓚᐅᕐᐳᖅ ᐅᖃᕐᑎᒋᓂᐊᕐᑕᒥᓂᒃ, ᑐᓂᓯᕕᐅᔪᒪᓪᓗᓂ ᕿᒻᒥᕐᔪᐊᓂᒃ ᐅᓇᑕᕐᑎᒐᓴᒡᔪᐊᓂᒡᓗ. ᓵᓚᖃᕈᓐᓇᕐᐹ? ᑍᒤᓕᐅᕐᑐᖅ ᐊᓐᓇᒍᓐᓇᕐᐹ? ᐊᖏᖃᑎᒌᒍᑎᓕᐊᕆᓚᐅᕐᑕᒥᓂᒃ ᓯᖁᑦᑎᕆᓯᒪᔪᖅ ᐊᓐᓇᒍᓐᓇᕐᐹ?

¹⁶ “ᐅᕙᖓ ᐆᒪᓪᓗᖓ ᒎᑎᐅᒐᒪ, ᐊᑕᓂᖅ ᒎᑎ ᐅᖃᕐᐳᖅ, ᑖᓐᓇ ᐊᖏᖃᑎᒌᒍᑎᓕᐊᒥᓂᒃ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᓯᖁᒥᑦᓯᓚᐅᕐᒪᑦ ᐊᖓᔪᖅᑳᕐᔪᐊᖑᑎᑦᓯᔨᒥᓂᒃ, ᑖᓐᓇ ᐹᐱᓘᓂᒥ ᑐᖁᔪᒫᕐᐳᖅ.

¹⁷ ᐄᑦᔨᑉᑎᒥᐅᑦ ᐅᓇᑕᕐᑎᖁᑎᕐᔪᐊᖏᑦ ᐊᔪᖏᑦᑐᕐᔪᐊᖑᒐᓗᐊᑦ ᐃᑲᔪᕈᓐᓇᕐᓂᐊᓐᖏᓚᑦ ᐅᓇᑕᕐᓂᒃᑯᑦ, ᐹᐱᓘᓂᒥᐅᑦ ᓄᓇᒥᒃ ᐃᑎᕐᓴᓕᐅᕆᓯᒪᖕᒪᑕ ᐊᕙᓗᕐᔪᐊᑉ ᓯᓚᑖᓂ ᐳᕐᑐᓯᑎᑦᓯᓯᒪᓪᓗᑎᒡᓗ ᐃᓄᖕᓂᒃ ᐅᓄᕐᑐᓂᒃ ᑐᖁᑦᓯᔪᒪᓪᓗᑎᒃ.

¹⁸ ᐅᖃᕕᒍᑎᒥᓂᒃ ᓇᕐᕈᓂᕐᒧᑦ ᐊᖏᖃᑎᒌᒍᑎᒋᓯᒪᔭᒥᓂᒃ ᓯᖁᒥᑦᓯᓚᐅᕐᒪᑦ, ᐃᒻᒥᓂᒃ ᐂᑦᑑᑎᒋᓚᐅᕐᓗᓂ ᑕᒪᒃᑯᓂᖓ ᐱᓇᓱᐊᓚᐅᕋᒥ, ᐊᓐᓇᖕᓂᐊᓐᖏᓚᖅ.

¹⁹ “ᑍᒤᒻᒪᑦ ᐊᑕᓂᖅ ᒎᑎ ᐅᖃᕐᐳᖅ: ᐅᕙᖓ ᐆᒪᓪᓗᖓ ᒎᑎᐅᒐᒪ, ᐅᖃᕕᒍᑎᒋᓯᒪᔭᓐᓂᒃ ᓇᕐᕈᓕᓚᐅᕐᒪᑦ, ᐊᖏᖃᑎᒌᒍᑎᒋᓯᒪᔭᑦᑎᓐᓂᒡᓗ ᓯᖁᒥᑦᑎᓯᒪᓪᓗᓂ, ᐱᓂᐊᕐᓂᖓ ᒪᓕᒡᓗᒍ ᐊᑭᔪᒫᕐᐸᕋ.

²⁰ ᓄᓗᐊᓐᓄᑦ ᐃᓯᕕᑦᓯᕕᒋᓗᒍ ᓄᓗᐊᕐᑎᑦᓱᒫᕐᐸᕋ, ᐹᐱᓘᓂᒧᐊᕈᑎᔪᒫᕐᐸᕋᓗ ᑍᑲᓂ ᐃᖅᑲᕐᑐᕈᒫᕐᐸᕋ ᐊᖏᖃᑎᒌᒍᑎᒥᓂᒃ ᐅᕙᓐᓄᑦ ᓯᖁᒥᑦᑎᓯᒪᓂᖓᓄᑦ.

²¹ ᐅᓇᑕᕐᑎᖁᑎᖏᑕ ᐊᔪᖏᓐᓂᕐᐹᖏᑦ ᑐᖁᕋᕐᑕᐅᔪᒫᕐᐳᑦ, ᐊᒥᐊᒃᑯᖏᓪᓗ ᓇᒧᑐᐃᓐᓈᕈᒫᕐᐳᑦ; ᑕᕝᕙ ᖃᐅᔨᓕᕈᒫᕐᐳᓯ ᐅᕙᖓ ᐊᑕᓂᖅ ᑍᒫᒃ ᐅᖃᕐᓯᒪᒐᒪ.”

ᒎᑎᐅᑉ ᓂᕆᐅᒋᔭᒃᓴᖃᕐᑎᑦᓯᓂᖓ

²² ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᓇᖕᒥᓂᕐᓗ ᓇᐹᕐᑐᑦ ᑕᑭᔪᑦ ᓰᑕᕇᑦ ᓄᕗᖏᓐᓂᑦ ᐲᕐᓯᓗᖓ, ᐊᐅᓪᓚᕈᑦᔨᔪᒪᕗᖓ; ᐳᕐᑐᓂᕐᐹᑉ ᓄᕗᐊᓂᑦ ᐱᕈᓕᓵᕐᑐᒥᒃ ᓇᑲᑦᓯᓗᖓ, ᓇᖕᒥᓂᕐᓗ ᖃᖅᑲᒧᑦ ᐳᕐᑐᔪᒧᑦ ᖁᑦᓯᖕᓂᕐᐹᒧᑦ ᓇᑉᐸᕈᒪᕙᕋ;

²³ ᐃᓴᕆᐊᓕᒥᐅᑦ ᖃᖅᑲᖏᑕ ᐳᕐᑐᓂᕐᐹᖓᓐᓂ ᓇᑉᐸᕐᓯᔪᒪᕗᖓ, ᐊᕙᓚᖓᔪᕐᔪᐊᖃᓕᕈᒫᕐᐳᖅ ᐸᐅᕐᖓᖃᓕᕐᓗᓂᓗ, ᓇᐹᕐᑐᕐᔪᐊᖑᓕᖁᓪᓗᒍ ᓰᑕᕆᐅᓕᕐᓗᓂ; ᐆᒪᔪᓪᓗ ᖃᓄᐃᑦᑐᑐᐃᓐᓁᑦ ᓇᐹᕐᑑᑉ ᐊᑖᓂ ᐃᓂᖃᓕᕈᒫᕐᐳᑦ, ᐊᕙᓚᖓᔪᖏᑕᓗ ᑕᕐᕋᓕᓂᖏᓐᓂ ᑎᖕᒥᐊᑦ ᐊᑦᔨᒌᖏᑦᑐᑦ ᐅᓪᓗᖃᓕᕐᓗᑎᒃ.

²⁴ ᐱᕈᕐᑐᓕᒫᑦ ᓇᐹᕐᑐᑦ ᓇᑎᕐᓇᒦᑦᑐᑦ ᖃᐅᔨᓕᖁᓪᓗᒋᑦ ᐅᕙᖓ ᐊᑕᓂᖅ ᓇᐹᕐᑐᒥᒃ ᑕᑭᔪᒥᒃ ᓇᑲᑦᓯᒐᒪ, ᓇᐹᕐᑐᕐᓗ ᐳᒃᑭᑦᑐᖅ ᐳᕐᑐᓯᑎᓪᓗᒍ, ᓇᐹᕐᑐᕐᓗ ᐆᒻᒪᐅᒐᓗᐊᖅ ᑐᖁᓕᑎᑉᐸᕋ, ᓇᐹᕐᑐᕐᓗ ᐸᓐᓇᑰᒐᓗᐊᖅ ᐆᒻᒪᕈᕐᑎᑉᐸᕋ. ᐅᕙᖓ ᐊᑕᓂᖅ ᑍᒫᒃ ᐅᖃᕐᓯᒪᒐᒪ, ᑍᒫᒡᓗ ᐱᓇᓱᐊᕐᓂᐊᕐᓗᖓ.”