ᐃᓯᑭᐊᓕᐅᑉ ᐊᒡᓚᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦᔨᕉᓴᓕᒥᐅᑦ ᐊᓯᓐᓂᐊᕐᑎᐅᓂᖓᑦ 1 ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᒃᑭᕚᖓ ᐅᖃᕐᓗᓂ: 2 “ᐃᓅᑉ ᐃᕐᓂᖓ, ᔨᕉᓴᓕᒥᐅᑦ ᖃᐅᔨᑎᒃᑭᑦ ᓇᕐᕈᒋᓪᓚᕆᒃᑕᓐᓂᒃ ᐱᓇᓱᐊᕐᓯᒪᓂᖏᓐᓂᒃ. 3 ᐅᖃᐅᑎᓗᒋᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᔨᕉᓴᓕᒧᑦ: ᐱᒋᐊᕐᕕᖃᕐᐳᑎᑦ ᐃᓅᓕᕐᓯᒪᓪᓗᑎᓪᓗ ᑬᓇᓂᐅᑉ ᓄᓇᖓᓂ; ᐊᑖᑍᑦ ᐊᒧᕅᑎᐅᖕᒪᑦ, ᐊᓈᓁᓪᓗ ᕼᐃᑍᑎᒥᐅᑕᐅᓪᓗᓂ. 4 ᐃᓅᕋᑖᕐᑎᓪᓗᑎᑦ ᖃᓚᓰᑦ ᑭᐱᔭᐅᓚᐅᓐᖏᓚᖅ, ᐅᐊᓴᕐᑕᐅᓚᐅᕋᑎᓪᓗ, ᑕᕆᐅᕐᑎᕐᑕᐅᓚᐅᓐᖏᓚᑎᑦ, ᐃᒻᒧᓯᕐᑕᐅᓚᐅᕋᑎᓪᓗ. 5 ᓇᒡᓕᒋᔭᐅᓐᓂᖏᓐᓇᕕᑦ, ᑕᒪᒃᑯᓂᖓ ᐱᓇᓱᐊᕐᕕᐅᓚᐅᓐᖏᓚᑎᑦ; ᓇᒡᓕᒋᔭᐅᓐᖏᒧᑦ ᐃᓅᑎᓪᓗᑎᑦ ᓇᑎᕐᓇᒧᑦ ᐃᒋᑕᐅᓚᐅᕐᐳᑎᑦ, ᐆᒥᒋᔭᐅᓯᒪᒐᕕᑦ ᐃᓅᕕᒋᓚᐅᕐᑕᕕᑦ ᐅᓪᓗᖓᓂᑦ ᐱᒋᐊᕐᓗᒍ. 6 “ᐊᖅᑯᓵᕋᒃᑭᑦ, ᑕᑯᓚᐅᕐᐸᒋᑦ, ᐊᓈᓇᖕᓂᑦ ᐊᐅᖕᒥ ᐊᓂᖃᑎᖕᓂ ᓂᒪᒃᑎᓪᓗᑎᑦ, ᐊᐅᖏᓐᓇᕐᒦᑎᓪᓗᑎᑦ ᐅᖃᐅᑎᓚᐅᕐᐸᒋᑦ, ‘ᐃᓅᒋᑦ, 7 ᐱᕈᕐᓗᑎᓪᓗ ᐱᕈᕐᓰᕕᖕᒥ ᐱᕈᕐᑐᑎᑐᑦ.’ ᐱᕈᕋᕕᓪᓗ ᐊᖏᔫᓕᓚᐅᕐᐳᑎᑦ ᐊᕐᓇᑦᓯᐊᕙᐅᓪᓗᑎᑦ, ᐃᕕᐊᖏᕐᑖᓚᐅᕐᐳᑎᑦ, ᓄᔭᖅᑯᕐᑐᓯᓪᓗᑎᓪᓗ; ᐊᓐᓄᕌᖃᓚᐅᓐᖏᓚᑎᓪᓕ ᐅᕕᓃᓐᓇᐅᓪᓗᑎᓪᓗ. 8 “ᐊᖅᑯᓵᓕᕐᒥᒐᒃᑭᑦ ᑕᑯᓕᓚᐅᕆᕙᒋᑦ, ᑕᑯᒋᑦ, ᐂᑉᐸᖃᕈᓐᓇᓕᓚᐅᕐᐳᑎᑦ; ᐊᓐᓄᕌᖃᖏᓐᓇᕕᑦ ᐊᑐᕐᑕᓐᓂᒃ ᖃᓪᓕᕐᐹᒥᒃ ᐅᓕᓚᐅᕐᐸᒋᑦ ᐊᓐᓄᕌᖃᖏᓐᓃᑦ ᑕᓕᑎᑕᐅᖁᓪᓗᒍ: ᐃᓛᒃ, ᓄᓕᐊᕐᑖᕆᔪᒪᓪᓗᑎᑦ ᐊᖏᖃᑎᒌᒍᑎᓕᐅᓚᐅᕐᐳᖓ, ᐱᑖᕆᓚᐅᕐᐸᒋᓪᓗ, ᐊᑕᓂᖅ ᒎᑎ ᐅᖃᕐᐳᖅ. 9 “ᑕᕝᕙ ᐃᒪᕐᒧᑦ ᐅᐊᓴᓚᐅᕐᐸᒋᑦ ᐊᐅᖏᔭᑦᑎᐊᕐᓗᑎᓪᓗ; ᐸᐅᕐᖎᓪᓗ ᐅᕐᓱᖓᓄᑦ ᐅᕐᓱᕐᑎᕐᓗᑎᑦ. 10 ᐊᓐᓄᕌᕐᑎᓚᐅᕐᐸᒋᑦ ᑕᕐᓯᕐᑐᕐᓯᒪᔪᒥᒃ ᑲᒥᒃᑎᓪᓗᑎᓪᓗ ᐃᖃᕐᑎᐅᔮᖕᓂᒃ, ᐊᓐᓄᕌᕐᑎᓪᓗᑎᓪᓗ ᖃᓪᓗᓈᕐᑕᑦᓯᐊᒥᒃ ᓵᑦᑐᒥᒃ ᐱᐊᒃᑐᒥᒡᓗ ᖃᓪᓗᓈᕐᑕᒥᒃ ᓯᓚᓪᓕᕐᑖᕐᑎᓪᓗᑎᑦ. 11 ᐱᐅᓴᐅᓯᕐᓱᓚᐅᕐᐸᒋᓪᓗ, ᐊᒡᒐᐅᒻᒥᐅᑕᓂᒡᓗ ᐊᑎᑎᓪᓗᑎᑦ, ᖁᖓᓯᕐᒥᐅᑕᓂᒡᓗ ᐅᔭᒥᒃᓗᑎᑦ. 12 ᐱᐅᓴᐅᓯᓚᐅᕐᐸᒋᑦ ᕿᖓᕐᒥᐅᑕᕐᒥᒃ, ᓯᐅᑎᕈᓯᕐᓱᑎᓪᓗ, ᓂᐊᖂᓯᕐᓗᑎᓪᓗ ᑕᑯᒥᓇᕐᑐᐊᓗᖕᒥᒃ. 13 ᑍᒫᒃ ᐱᐅᓴᐅᓯᕐᓯᒪᓚᐅᕐᐳᑎᑦ ᒎᓗᓂᒃ ᓯᐅᓪᕕᕆᓂᒡᓗ; ᐊᓄᕌᖃᕐᓗᑎᓪᓗ ᖃᓪᓗᓈᕐᑕᒥᒃ ᓵᑦᑐᒥᒃ ᐱᐊᒃᑐᒥᒡᓗ, ᑕᕐᓯᕐᑐᕐᓯᒪᔪᒥᒡᓗ; ᓂᐊᖂᔭᒃᓴᑦᓯᐊᕙᐅᓂᕐᐹᓂᒡᓗ ᓂᐊᖂᔭᕐᑐᕐᐸᒡᓗᑎᑦ ᕼᐊᓂᑐᕐᐸᒡᓱᑎᑦ ᐸᐅᕐᖎᓪᓗ ᐅᕐᓱᖓᓂᒃ ᓂᕆᕙᒃᓱᑎᑦ. ᑕᑯᒥᓇᕐᓯᑦᓯᐊᓚᐅᕐᐳᑎᑦ, ᐊᖓᔪᖅᑳᕐᔪᐊᑎᑐᑦ ᐊᒡᓛᑦ ᑍᒤᓕᕐᓱᑎᑦ. 14 ᐃᓅᖃᑎᒌᒡᔪᐊᓄᓪᓗ ᐊᒡᓛᑦ ᖃᐅᔨᒪᔭᐅᓕᓚᐅᕐᐳᑎᑦ ᐃᓂᖁᓇᕐᓃᑦ ᐱᓪᓗᒍ, ᐃᓕᖕᓂᒃ ᐃᓂᖁᓇᕐᑐᓐᖑᕐᑎᑦᓯᓚᐅᕋᒪ, ᐊᑕᓂᖅ ᒎᑎ ᐅᖃᕐᐳᖅ. 15 “ᐃᓂᖁᓇᕐᓃᓪᓕ ᐱᔪᕆᑦᔪᑎᒋᓕᓚᐅᕐᐸᑦ, ᐊᖑᓐᓂᐊᕐᓂᕐᓄᑦ ᐊᑭᓕᕐᑐᕐᑕᐅᓪᓗᑎᑦ ᖃᐅᔨᒻᒫᕆᔭᐅᓃᑦ, ᐊᖅᑯᓵᕐᑐᐃᓐᓇᕐᑐᓄᑦ ᐊᒡᓛᑦ ᒪᓂᓴᕐᐸᓕᕐᓱᑎᑦ. 16 ᐊᓐᓄᕌᕕᓪᓗ ᐃᓚᖏᑦ ᑕᕐᓴᑦᓯᐊᕆᒃᑐᑦ ᑕᑯᒥᓇᕐᑐᓂᒃ ᐱᐅᓴᐅᑎᓕᐊᕆᕙᓚᐅᕐᐸᑎᑦ ᒎᑎᓐᖑᐊᖃᕐᕕᓯᓐᓂ, ᑕᕝᕙᓂᓗ ᐊᖑᓐᓂᐊᕐᓂᕐᒧᑦ ᐊᑭᓕᕐᑐᕐᑕᐅᕙᒃᓗᑎᑦ; ᑍᒤᑦᑐᖃᓚᐅᕐᓯᒪᑎᓐᓇᒍ, ᑭᖑᓂᖓᒍᓪᓗ ᑍᒤᑦᑐᖃᓚᐅᕐᓯᒪᓂᐊᕋᓂ. 17 ᐱᐅᓴᐅᑏᓪᓗ ᑕᑯᒥᓇᕐᑐᐊᓗᐃᑦ ᒎᓗᐃᑦ ᓯᐅᓪᕕᕇᓪᓗ ᐃᓕᖕᓄᑦ ᑐᓂᓯᒪᔭᒃᑲ, ᓴᓇᓚᐅᕐᐸᑎᑦ ᐊᖑᑎᓐᖑᐊᓕᐊᕆᓪᓗᒋᑦ, ᑕᒪᒃᑯᐊᓗ ᐊᓯᓐᓂᐊᕈᑎᒋᕙᒃᓗᒋᑦ; 18 ᐊᓐᓄᕌᓂᒡᓗ ᑕᕐᓯᕐᑐᕐᓯᒪᔪᓂᒃ ᐱᐅᔪᐊᓗᓂᒃ ᐅᓕᓚᐅᕐᐸᑎᑦ, ᐸᐅᕐᖎᓪᓗ ᐅᕐᓱᖏᑦ ᐃᓯᕐᓗᐊᕐᓂᑎᑦᓯᑎᑦᔪᑏᓪᓗ ᐱᖁᑎᒃᑲ ᓵᖏᓐᓄᑦ ᐃᓕᕙᑎᑦ. 19 ᓂᕿᓗ ᑐᓂᓚᐅᕐᑕᕋ ᐃᓕᖕᓄᑦ ᓂᐊᖂᔭᒃᓴᑦᓯᐊᕙᐅᓂᕐᐹᕐᓗ ᐅᕐᓱᒃᓮᓪᓗ ᕼᐊᓃᓪᓗ ᐃᓕᖕᓄᑦ ᓂᕿᒋᔭᐅᖁᓚᐅᕐᑕᒃᑲ; ᑐᓂᓚᐅᕐᐸᑎᑦ ᒪᒪᕆᔭᐅᑎᑦᑐᒪᓪᓗᒋᑦ ᑖᒃᑯᓄᖓ, ᐊᑕᓂᖅ ᒎᑎ ᐅᖃᕐᐳᖅ. 20 “ᐃᕐᓂᕐᑖᕐᑎᓐᓇᒃᑭᑦ ᐸᓂᒃᑖᕐᑎᓐᓇᒃᑭᓪᓗ ᑐᓂᕐᕈᑎᒋᓚᐅᕐᐸᑎᑦ ᑖᒃᑯᓄᖓ ᓂᕆᔭᐅᖁᓪᓗᒋᑦ. ᐊᓯᓐᓂᐊᖃᑦᑕᕐᓂᑏᑦ ᓱᓇᐅᓐᖏᓗᐊᕐᒪᑕ? 21 ᕿᑐᕐᖓᒃᑲ ᑐᖁᖃᑦᑕᓚᐅᕐᐸᑎᑦ ᑐᓂᕐᕈᑎᒋᓪᓗᒋᓪᓗ ᑖᒃᑯᓄᖓ ᐃᑯᐊᓚᑦᓯᓂᒃᑯᑦ. 22 ᑕᒪᒃᑯᓂᖓ ᓇᕐᕈᓇᕐᑐᓕᕆᑎᓪᓗᑎᑦ ᐊᖑᓐᓂᐊᕐᑎᓪᓗᑎᓪᓗ ᓄᑕᕋᐅᓂᕆᓚᐅᕐᑍᑦ ᐃᖅᑲᐅᒪᓐᖏᓚᑦ, ᐊᓐᓄᕌᖃᕋᑎᑦ ᐊᓈᓇᖕᓂᑦ ᐊᓂᖃᑎᖕᓂ ᐊᐅᖕᒥ ᓂᒪᑐᐃᓐᓇᓚᐅᕐᓃᑦ.” ᔨᕉᓴᓕᒥᐅᑦ ᐊᖑᓐᓂᐊᕐᓂᒃᑯᑦ ᑮᓇᐅᔭᓕᐅᕋᓱᒃᑐᑎᑐᑦ ᐃᓕᖅᑯᓯᖃᕐᓂᖓ 23 “ᐱᐅᖏᑦᑐᓕᓂᕐᓂᒃ ᐅᓄᕐᑐᓂᒃ ᐱᓇᓱᐊᓂᕐᐱᑦ ᑭᖑᓂᖓᒍᑦ ᑲᑉᐱᐊᓐᓇᒦᒃ, ᑲᑉᐱᐊᓐᓇᒦᖑᔪᑎᑦ! ᐊᑕᓂᖅ ᒎᑎ ᐅᖃᕐᐳᖅ, 24 ᓴᓇᓯᒪᕗᑎᑦ ᐊᑦᓱᖏᕈᓐᓇᕐᑐᓂᒃ ᐃᒡᓗᕈᓯᕐᓂᒃ, ᐳᕐᑐᔪᓂᒡᓗ ᑐᒃᓯᐊᕐᕕᓕᐅᕐᓯᒪᓪᓗᑎᑦ ᐊᖅᑯᑏᑦ ᑲᑎᓐᖓᓂᓕᒫᖏᓐᓂ; 25 ᐊᖅᑯᑎᓪᓚᕆᐅᔪᓕᒫᓂ ᒎᑎᓐᖑᐊᓄᑦ ᑐᒃᓯᐊᕐᕕᒃᓴᓕᐅᕐᓯᒪᕗᑎᑦ ᐃᓂᖁᓇᕐᓂᕐᓄᓪᓗ ᐊᖑᓐᓂᐊᕐᕕᓕᐅᕐᓯᒪᓪᓗᑎᑦ, ᐊᖅᑯᓵᕐᑐᓕᒫᓄᑦ ᒪᓂᓴᕐᐸᒃᓗᑎᑦ, ᐊᖑᓐᓂᐊᕐᓂᒃᑯᓪᓗ ᑮᓇᐅᔭᓕᐅᕐᑐᑐᑦ ᐱᕙᓪᓕᐊᑐᐃᓐᓇᕐᐳᑎᑦ. 26 ᐄᑦᔨᑉᑎᒥᐅᓂᒃ ᐊᓯᓐᓂᐊᖃᑎᖃᖃᑦᑕᓚᐅᕆᕗᑎᑦ, ᐃᒃᓯᒍᓗᐊᕐᒥᔪᓂᒃ ᖃᓂᒋᔭᑦᓯᓐᓃᑦᑐᓂᒃ, ᐊᖑᓐᓂᐊᕐᓂᕕᑦ ᓯᐊᒻᒪᒃᐸᓪᓕᐊᓂᖓᓄᑦ ᓂᓐᖓᒃᑎᑉᐸᓪᓕᐊᕙᕐᒪ. 27 “ᑕᑯᒋᑦ ᑍᒤᒻᒪᑦ, ᑕᓕᕋ ᐅᕐᓕᓕᕐᐳᖅ ᐃᓕᑦᓯᓐᓄᑦ, ᐱᑖᕆᔭᒃᓴᓯ ᒥᑭᒡᓕᒋᐊᕐᐸᒃᑲ, ᐱᓕᔅᑍᓂᒥᐅᓄᑦ ᑐᓂᕙᑦᓯ ᐱᑖᕈᒪᔪᓄᑦ ᐆᒥᒋᔨᑦᓯᓐᓄᑦ, ᐃᓕᖅᑯᓯᑦᓯᓐᓂᒃ ᓈᒻᒪᖏᑦᑐᓂᒃ ᑲᓐᖑᓲᑎᖃᕐᑐᓄᑦ. 28 “ᐊᓯᕆᐊᒥᐅᑦ ᓄᓕᐊᕐᓂᒃᑯᑦ ᐊᔪᕐᑐᓕᖃᑎᒋᓚᐅᕐᐸᓯ, ᓈᒻᒪᒃᓯᔪᓐᓇᖏᓐᓇᑦᓯ; ᓱᓕᓕ ᓈᒻᒪᒃᓯᑦᔪᑎᒋᖏᓐᓂᕙᓯ. 29 ᑲᐅᓪᑎᐊᒥᐅᓂᒃ ᓄᓕᐊᕐᓂᒃᑯᑦ ᐊᔪᕐᑐᓕᒃᑲᓐᓂᖃᑦᑕᓕᓚᐅᕆᕗᓯ ᑮᓇᐅᔭᓕᐅᕐᓂᕐᒧᑦ ᒪᑭᑕᓇᓱᐊᕐᑎᓂᒃ; ᓱᓕᓕ ᓈᒻᒪᒃᓯᑎᑕᐅᓚᐅᖏᓐᓂᕗᓯ.” 30 ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, “ᐆᒻᒪᑎᓯᒍᑦ ᐃᒃᓯᒎᕐᓂᕐᔪᐊᖃᕐᐳᓯ, ᑕᒪᒃᑯᓂᖓ ᐱᓇᓱᐊᖃᑦᑕᕐᓯᒪᒐᑦᓯ, ᓄᓕᐊᕐᓂᕐᒧᑦ ᑮᓇᐅᔭᓕᐅᕋᓱᐊᕐᑎᒻᒪᕆᒃᑎᑐᑦ; 31 ᐊᖅᑯᑎᓕᒫᓂ ᒎᑎᓐᖑᐊᓄᑦ ᑐᒃᓯᐊᕐᕕᓕᐅᕐᓯᒪᕗᓯ, ᑲᑎᑦᑕᕐᕕᓕᐅᕐᓯᒪᓪᓗᓯᓗ ᐳᕐᑐᔪᓂᒃ ᓄᓕᐊᕐᓂᒃᑯᑦ ᐱᓕᕆᕕᖕᓂᒃ ᐊᖅᑯᑏᑦ ᑲᑎᓐᖓᓂᖏᓐᓂ. ᐊᖑᓐᓂᐊᕐᑎᑎᑐᓪᓕ ᐱᖏᑦᔪᑎᑐᐊᕆᕙᓯ, ᑕᒪᑐᒧᖓ ᑮᓇᐅᔭᓕᐅᕋᓱᖃᑦᑕᖏᓐᓇᑦᓯ. 32 ᐊᓯᓐᓂᐊᕐᑎᐅᕗᓯ ᐊᕐᓇᑐᑦ ᓂᐅᕐᕈᐊᓂᒃ ᐱᖃᑎᖃᖃᑦᑕᕐᑐᑎᑐᑦ ᐅᐃᒥᖕᓂᒃ ᑲᒪᖏᑦᑐᑎᑐᑦ. 33 ᐊᖑᑎᑦ ᐊᖑᓐᓂᐊᕐᑎᓂᒃ ᐊᑭᓖᕙᒃᐳᑦ; ᐃᓕᑦᓯᓕ ᑐᓂᓯᖔᖃᑦᑕᕐᐳᓯ ᑐᓂᕐᕈᑎᓂᒃ ᐱᖃᑎᒋᖃᑦᑕᕐᑕᑦᓯᓐᓄᑦ, ᐃᓚᓐᓂᕐᓴᐅᑎᒋᓪᓗᒋᑦ ᓇᑭᑐᐃᓐᓇᖅ ᐅᐸᒃᑕᐅᖃᑦᑕᕈᒪᓂᕐᒧᑦ ᐃᓐᓇᖓᖃᑎᒋᓂᐊᕐᑕᑦᓯᓐᓂᒃ. 34 ᐊᖑᓐᓂᐊᕐᑎᐅᕗᓯ ᐊᖑᓐᓂᐊᕐᑎᓂᑦ ᐊᕐᓇᓂᑦ ᐊᑦᔨᒋᔭᐅᖏᑦᑐᒥᒃ; ᑍᒤᑦᑑᖁᔭᐅᓯᒪᖏᒃᑲᓗᐊᕐᑎᓪᓗᓯ, ᐊᑭᓖᖔᖃᑦᑕᕐᐳᓯᓕ ᑍᒤᑕᐅᔪᒪᓪᓗᓯ, ᑍᒤᒻᒪᑦ ᐊᑦᔨᒋᔭᐅᓐᖏᓚᓯ.” ᒎᑎᐅᑉ ᐃᖅᑲᕐᑐᐃᓂᖓ ᔨᕉᓴᓕᒥᒃ 35 “ᑍᒤᒻᒪᑦ ᐊᖑᓐᓂᐊᕐᑎᐅᔪᑎᑦ, ᐊᑕᓂᐅᑉ ᐅᖃᐅᓯᖓᓂᒃ ᑐᓴᕆᑦ. 36 “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᑲᓐᖑᓇᕐᑐᓕᓂᓯ ᓴᖅᑭᔮᑦᓯᐊᕐᐳᖅ ᐊᓐᓄᕅᔭᕐᑎᕐᓗᓯ ᐅᕕᓃᓐᓇᐅᓕᖃᑦᑕᕐᓂᑦᓯᑐᑦ ᐃᓐᓇᖓᖃᑎᖃᕐᓗᓯ ᐅᖓᒋᔨᑦᓯᓐᓂᒃ, ᒎᑎᓐᖑᐊᖃᕐᓂᓕᒫᓯᓗ, ᕿᑐᕐᖓᓯᓗ ᐊᐅᖏᓐᓂᒃ ᑐᓂᕐᕈᑎᖃᖃᑦᑕᕐᓂᓯ ᑖᒃᑯᓄᖓ, 37 ᑍᒤᒻᒪᑦ ᑕᑯᒋᑦ, ᑍᒤᑦᑐᒥᒃ ᐃᓕᖅᑯᓯᖃᕐᓂᑦᓯᓐᓄᑦ ᐅᖓᒋᔭᕐᑖᕆᖃᑦᑕᕐᑕᓯ ᑲᑎᕐᓱᕈᒫᕐᐸᒃᑲ, ᐊᓕᐊᓁᒋᖃᑦᑕᕐᓯᒪᔭᓯ, ᐱᐅᒋᖃᑦᑕᕐᓯᒪᔭᓯ ᓇᕐᕈᒋᖃᑦᑕᕐᓯᒪᔭᓯᓗ; ᑲᑎᕐᓱᕈᒫᕐᐸᒃᑲ ᐃᓕᑦᓯᓐᓂᒃ ᐊᑭᕋᕐᑐᓕᖁᓪᓗᒋᑦ ᐊᕙᑎᓕᒫᑦᓯᓐᓂᑦ ᐃᓗᒪᔭᐅᓕᕐᓗᓯ, ᑖᒃᑯᓇᓐᖓᓪᓗ ᐊᓐᓄᕅᔭᕐᑕᐅᔪᒫᕐᐳᓯ ᓱᓇᑕᖃᕈᓐᓃᕐᓗᓯ, ᑕᑯᔭᐅᖁᓪᓗᓯ. 38 ᐃᖅᑲᕐᑐᕈᒫᕐᐸᑦᓯ ᐊᕐᓁᑦ ᓄᓕᐊᕇᖕᓂᕐᒥᒃ ᐊᓯᕈᐃᓯᒪᔪᑦ ᐃᓄᐊᕐᑏᓪᓗ ᐃᖅᑲᕐᑐᕐᑕᐅᓂᖏᑎᑐᑦ, ᑎᑭᑕᐅᑎᑦᓱᒫᕐᐸᑦᓯ ᐊᐅᖕᒧᑦ ᓂᓐᖓᕕᒡᔪᐊᕐᓂᕐᒧᑦ ᓯᖕᓇᓂᕐᒧᓪᓗ. 39 ᓄᓕᐊᕐᓂᕐᒧᑦ ᐅᐃᕆᕝᕕᒋᓯᒪᔭᑦᓯᓐᓄᑦ ᑐᓂᔪᒫᕐᐸᑦᓯ, ᑖᒃᑯᓇᓐᖓᑦ ᒎᑎᓐᖑᐊᑦᓯᓐᓄᑦ ᑐᒃᓯᐊᕐᕕᒋᕙᒃᑕᓯ ᐊᔪᕐᑐᓕᕕᒋᕙᒃᑕᓯᓗ ᓯᖁᑦᑎᕐᑕᐅᔪᒫᕐᐳᑦ; ᐊᓐᓄᕌᓯ ᐊᓕᒃᑐᕐᓗᒋᑦ ᐊᓐᓄᕅᔭᕈᒫᕐᐹᓯ ᐱᐅᓴᐅᑎᒋᕙᒃᑕᓯᓗ ᐊᑭᑐᔪᑦ ᐱᔭᐅᓗᑎᒃ, ᐊᓐᓄᕌᖃᓐᖏᑎᓪᓗᓯ ᓱᓇᑕᖃᓐᖏᑎᓪᓗᓯᓗ ᕿᒪᒃᑕᐅᔪᒫᕐᐳᓯ. 40 “ᑖᒃᑯᓇᓐᖓᑦ ᐃᓄᒋᐊᒃᑐᕐᔪᐊᓄᑦ ᐅᐸᒃᑐᕐᑕᐅᑎᑕᐅᔪᒫᕐᐳᓯ, ᒥᓪᓗᕈᒫᕐᐹᓯᓗ ᓴᕕᒡᔪᐊᓄᓪᓗ ᑎᒥᓯ ᐊᕕᒃᑐᕐᓗᒋᑦ. 41 ᐃᒡᓗᓯᓗ ᐃᑯᐊᓪᓚᒍᒫᕐᐰᑦ ᐃᖅᑲᕐᑐᕐᑕᐅᔪᒫᕐᐳᓯᓗ ᐊᕐᓇᒐᓴᒡᔪᐊᓄᑦ ᑕᑯᓐᓇᕐᑕᐅᑎᓪᓗᓯ; ᐊᕐᓇᕐᓂᐊᕐᑎᐅᓂᓯ ᓄᖅᑲᕐᑎᑦᓱᒫᕐᐸᕋ, ᐊᔪᕐᑐᓕᓂᕐᒧᓪᓗ ᑐᓂᓯᖃᑦᑕᕐᓂᓯ ᓄᖅᑲᕐᑎᓪᓗᒍ. 42 ᑕᕝᕙ ᓂᓐᖓᐅᒪᓂᕋ ᐃᓕᑦᓯᓐᓄᑦ ᓈᒻᒪᒃᓯᔪᒫᕐᐳᖅ, ᓯᖕᓇᕕᒋᔪᓐᓁᕐᓗᓯᓗ ᓮᓪᓕᔪᒫᕐᐳᖓ, ᓂᓐᖓᐅᒪᔪᓐᓃᕐᓗᖓᓗ. 43 ᐃᖅᑲᐅᒪᔪᓐᓁᕋᑦᓯᐅᒃ ᐃᓅᓱᒃᑑᑎᓪᓗᓯ ᐱᐅᓯᕆᓚᐅᕐᑕᓯ, ᓂᓐᖓᒃᑎᓚᐅᕋᑦᓯᓐᖓ ᑕᒪᒃᑯᓂᖓ ᐱᐅᖏᑦᑐᓂᒃ ᐱᓂᐊᕐᓂᑦᓯᓐᓄᑦ; ᑍᒤᒻᒪᑦ ᑕᑯᒋᑦ, ᐱᓂᐊᕐᓂᕆᓚᐅᕐᑕᑦᓯᓐᓄᑦ ᐊᑭᓂᐊᕐᕕᒋᔪᒫᕐᐸᑦᓯ, ᐊᑕᓂᖅ ᒎᑎ ᐅᖃᕐᐳᖅ. “ᓱᖕᒪᑦ ᐃᒃᓯᒎᕐᓂᖅ ᐃᓚᐅᑎᓐᓇᓱᓚᐅᕐᐱᓯᐅᒃ ᓇᕐᕈᓇᕐᑐᓕᓂᑦᓯᓐᓄᑦ?” ᐸᓂᒌᒃ ᐊᓈᓇᒌᒃ ᐊᑦᔨᒌᓲᖑᓂᖏᒃ 44 “ᑕᑯᒋᑦ, ᐅᖃᐅᓯᐅᒐᔪᒃᑐᓂᒃ ᐅᖃᕐᐸᒃᑐᑦ ᐅᖃᐅᓯᖃᕐᐸᖕᓂᐊᓕᕐᐳᖅ ᐃᓕᑦᓯᓐᓂᒃ, ‘ᐸᓂᒃ ᐊᓈᓇᒥᓂᒃ ᐊᑦᔨᖃᕐᐳᖅ, ᐊᓈᓇᓗ ᐸᓂᖕᒥᓂᒃ ᐊᑦᔨᖃᕐᓗᓂ.’ 45 ᐊᓈᓇᕕᑦ ᐸᓂᒋᕚᑎᑦ, ᐅᐃᒥᓂᒃ ᓇᕐᕈᓕᓚᐅᕐᑐᒥᒃ ᕿᑐᕐᖓᒥᓂᒡᓗ; ᖃᑕᓐᖑᑎᖕᓄᓪᓗ ᖃᑕᓐᖑᑎᒋᔭᐅᕗᑎᑦ, ᐅᐃᒥᖕᓂᒃ ᓇᕐᕈᓕᕐᓯᒪᔪᓄᑦ ᕿᑐᕐᖓᒥᖕᓂᒡᓗ. ᐊᓈᓇᖃᕐᐳᑎᑦ ᕼᐃᑍᑎᒥᒃ ᐊᑖᑕᖃᕐᓗᑎᓪᓗ ᐊᒧᕅᑎᒥᒃ. 46 “ᓴᒥᐊᕆᐊᒥᒃ ᐊᖓᔪᖃᕐᐳᑎᑦ, ᐸᓂᓂ ᐃᓚᒋᓪᓗᒋᑦ ᓄᓇᖃᕐᑐᒥᒃ ᐅᓐᓄᐊᓪᓗᐊᑉ ᓇᓛᓂ; ᓄᑬᓪᓗ ᓄᓇᖃᕐᐳᖅ ᐸᓂᓂ ᐃᓚᒋᓪᓗᒋᑦ ᐅᓪᓗᓪᓗᐊᑉ ᓇᓛᓂ ᓱᑑᒪᒥ. 47 ᓈᒻᒪᒃᓯᓚᐅᓐᖏᓚᑎᑦ ᐊᑐᓚᐅᕐᑕᖓᓂᒃ ᐊᑐᕋᓗᐊᕋᕕᑦ, ᓇᕐᕈᓇᕐᑐᓂᒡᓗ ᐱᓇᓱᐊᓚᐅᕐᑕᖏᑕ ᐊᑦᔨᖏᓐᓂᒃ ᐊᑐᕐᓗᑎᑦ; ᐊᑯᓂᐅᖏᑦᑐᖅ ᑍᒃᑯᓇᓐᖓᑦ ᐱᐅᖏᓐᓂᕐᓵᓗᖕᓂᒃ ᐊᑐᓕᓚᐅᕐᐳᑎᑦ ᐃᓕᖅᑯᓯᕆᔭᓕᒫᒃᑯᑦ. 48 “ᓲᕐᓗ ᐆᒪᓪᓗᖓ ᒎᑎᐅᒐᒪ, ᐊᑕᓂᖅ ᒎᑎ ᐅᖃᕐᐳᖅ, ᓄᑬᑦ ᓱᑑᒪ ᐸᓂᖏᓪᓗ ᐃᓕᖕᓂᑦ ᐸᓂᖕᓂᓪᓗ ᐱᐅᖏᑦᑐᓕᖏᓐᓂᕐᓴᐅᓚᐅᕐᐳᑦ. 49 ᑕᑯᒋᑦ, ᓄᑲᓯ ᓱᑑᒪ ᐸᓯᔭᒃᓴᐅᑦᔪᑎᖃᓕᓚᐅᕐᐳᑦ ᐃᒤᑦᑐᒥᒃ: ᑖᓐᓇ ᐸᓂᖏᓪᓗ ᐱᐅᔪᕆᓕᓚᐅᕐᒪᑕ ᓂᕿᒃᓴᖃᓗᐊᕐᓂᕐᒥᖕᓄᑦ, ᐃᓱᕐᕆᑦᔪᑎᓂᒡᓗ ᐱᖃᓗᐊᕐᓂᕐᒥᖕᓄᑦ, ᐊᒃᓱᔪᓂᒃ ᐃᑲᔪᕆᐊᓕᖕᓂᒡᓗ ᐃᑲᔪᖃᑦᑕᓚᐅᓐᖏᓚᑦ. 50 ᐱᐅᔪᕆᔪᕐᔪᐊᖑᓚᐅᕐᐳᑦ ᓇᕐᕈᒋᔭᓐᓂᒡᓗ ᐱᓇᓱᐊᖃᑦᑕᕐᓗᑎᒃ ᓵᓐᓂ; ᑍᒤᒻᒪᑦ ᐊᐅᓪᓚᕐᑎᓚᐅᕐᐸᒃᑲ ᑍᒤᑕᐅᔭᕆᐊᖃᕐᓂᖏᑦ ᖃᐅᔨᒐᒃᑭᑦ. 51 “ᓴᒥᐊᕆᐊᕐᒥᐅᓪᓕ ᐃᓕᑦᓯᓐᓂᑦ ᐊᔪᕐᑐᓕᖏᓐᓂᕐᓴᐅᓚᐅᕋᓗᐊᕐᐳᑦ; ᓇᕐᕈᓇᕐᓂᕐᓴᓂᒃ ᐱᓇᓱᐊᕐᓯᒪᒐᑦᓯ ᑖᒃᑯᓇᓐᖓᑦ, ᖃᑕᓐᖑᑎᑎᑦ ᐃᓱᐊᕐᑑᔮᓕᓚᐅᕐᐳᑦ ᓇᕐᕈᓇᕐᑐᓂᒃ ᐱᓇᓱᐊᕐᓯᒪᓂᑦᓯᓐᓄᑦ. 52 ᑲᓐᖑᓇᕐᑐᒦᓐᓂᓯ ᕿᓄᐃᓵᕈᑎᒋᔭᕆᐊᖃᕐᐸᓯ, ᐊᔪᕐᑐᓕᓂᓯ ᖃᑕᓐᖑᑎᑦᓯᓐᓂᑦ ᓇᕐᕈᓇᕐᓂᕐᓴᐅᓂᖓᓄᑦ ᐸᓯᔭᒃᓴᐅᖏᓐᓂᕐᓴᐅᕗᑦ ᐃᓕᑦᓯᓐᓂᑦ; ᑲᓐᖑᓲᑎᒃᓴᐅᕗᖅ ᑕᒪᓐᓇ, ᑲᓐᖑᓇᕐᓂᖓᓗ ᐊᑐᕆᐊᖃᕐᐸᓯ, ᖃᑕᓐᖑᑎᓯ ᐃᓱᐊᕐᑐᓕᔪᑎᑐᑦ ᐃᓅᓯᖃᕐᑑᔮᓕᕐᑎᓐᓇᑦᓯᐅᒃ.” ᓱᑑᒪᒥᐅᑦ ᓴᒥᐊᕆᐊᕐᒥᐅᓪᓗ ᒪᑭᑎᑕᐅᒃᑲᓐᓂᕈᒫᕐᓂᖏᑦ 53 “ᒪᑭᑎᒃᑲᓐᓂᕈᒫᕐᐸᒃᑲ ᓱᑑᒪ ᐸᓂᖏᓪᓗ, ᓴᒥᐊᕆᐊᑉ ᐸᓂᖏᓪᓗ, ᒪᑭᑎᒃᑲᓐᓂᕈᒫᕆᕙᑦᓯᑦᑕᐅᖅ ᑖᒃᑯᐊ ᐊᑯᕐᖓᓐᓂ. 54 ᑲᓐᖑᓇᕐᑐᒦᓐᓂᕐᒥᒃ ᐊᑐᕆᐊᖃᕈᒫᕐᐳᓯ ᐱᓂᐊᕐᓂᕆᓚᐅᕐᑕᓕᒫᑦᓯᓐᓂᒃ ᑲᓐᖑᓲᑎᖃᓕᕈᒫᕋᑦᓯ, ᖃᑕᓐᖑᑎᓯ ᐱᑦᓯᐊᕐᓂᕐᓴᐅᓂᕐᒥᖕᓄᑦ ᐃᒻᒥᖕᓂᒃ ᐅᐱᒋᓕᕈᒫᕐᒪᑕ. 55 ᓄᑲᓯ, ᓱᑑᒪ ᐸᓂᖏᓪᓗ ᐱᐅᓯᕆᓚᐅᕐᑕᒥᖕᓄᑦ ᐅᑎᕈᒫᕐᐳᑦ, ᓴᒥᐊᕆᐊᑉ ᐸᓂᖏᓪᓗ ᐱᐅᓯᕆᓚᐅᕐᑕᒥᖕᓄᑦ ᐅᑎᕈᒫᕆᕗᑦ; ᐃᓕᑦᓯᓗᑦᑕᐅᖅ ᐸᓂᓯᓗ ᐱᐅᓯᕆᓚᐅᕐᑕᑦᓯᓐᓄᑦ ᐅᑎᕈᒫᕆᕗᓯ. 56 ᓄᑲᓯ ᓱᑑᒪ ᐅᖃᓐᖑᐊᕈᑎᒋᕙᓚᐅᕐᐸᓯ ᑍᑦᓱᒪᓂ ᐱᐅᔪᕆᑎᓪᓗᓯ, 57 ᐱᐅᖏᑦᑐᓕᓂᓯ ᓴᖅᑭᑎᑕᐅᓚᐅᖅᑳᕐᑎᓐᓇᒋᑦ, ᑖᓐᓇ ᐊᑦᔨᒋᓕᕐᐸᓯ ᒥᑕᐅᑎᒋᔭᒃᓴᑐᐃᓐᓇᐅᓕᕐᐳᓯ ᐄᑐᒥᐅᑉ ᐸᓂᖏᓐᓄᑦ ᐃᓅᖃᑎᓕᒫᖏᓐᓄᓪᓗ, ᐱᓕᔅᑍᓂᒥᐅᓪᓗ ᐸᓂᖏᓐᓄᑦ ᖃᓂᒋᔭᖏᓐᓃᑦᑐᓄᓪᓗ ᐃᓕᑦᓯᓐᓂᒃ ᓇᕐᕈᔪᓄᑦ. 58 ᑕᒪᓐᓇ ᓱᒋᐊᕐᑕᐅᓂᓯ ᐊᑐᕆᐊᖃᕐᐸᓯ ᐃᒃᓯᒎᖃᑦᑕᓚᐅᕋᑦᓯ ᓇᕐᕈᓇᕐᑐᓕᓪᓗᓯᓗ. ᐊᑕᓂᖅ ᐅᖃᕐᐳᖅ.” ᒎᑎᐅᑉ ᐊᖏᖃᑎᖃᕐᓂᖓ ᐃᓱᖃᖏᑦᑐᒧᑦ ᐊᑐᕐᑐᒃᓴᒥᒃ 59 ᐃᓛᒃ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᐱᓇᓱᐊᕐᕕᒋᓂᐊᕐᐸᑦᓯ ᐱᓂᐊᕐᓂᕆᓚᐅᕐᑕᓯ ᒪᓕᒡᓗᒋᑦ, ᐅᖃᕕᒍᑕᐅᓯᒪᔪᒥᒃ ᓯᖁᒥᑦᓯᓯᒪᒐᑦᓯ ᐊᖏᖃᑎᒌᒍᑕᐅᓯᒪᔪᒥᒃ. 60 ᐊᖏᖃᑎᖃᕐᓯᒪᓂᕋ ᐃᓕᑦᓯᓐᓄᑦ ᐃᓅᓱᒃᑑᑎᓪᓗᓯ ᐃᖅᑲᐅᒪᓂᐊᕐᐸᕋ, ᐊᖏᖃᑎᒌᒍᑎᓕᐅᕈᒪᕗᖓᓗ ᐃᓕᑦᓯᓐᓄᑦ ᐃᓱᖃᖏᑦᑐᒧᑦ ᐊᑐᕐᓂᐊᕐᑐᒥᒃ. 61 ᑕᕝᕙ ᐃᖅᑬᔪᒫᕐᐳᓯ ᐱᓂᐊᕐᓂᕆᓯᒪᔭᑦᓯᓐᓂᒃ, ᑲᓐᖑᓱᓕᕐᓗᓯᓗ ᐊᖓᔪᓯ ᓄᑲᓯᓗ ᐅᑎᕐᑎᒃᑯᒃᑭᑦ, ᐃᓕᑦᓯᓐᓄᑦ ᐸᓂᒋᔭᐅᔪᑎᑐᑦ ᑐᓂᔪᒫᕐᐸᒃᑲ, ᐊᖏᖃᑎᒌᒃᓯᒪᓂᕗᑦ ᐱᑦᔪᑎᒋᓇᒍ. 62 ᐊᖏᖃᑎᒌᒍᑎᒋᓯᒪᔭᕋ ᐊᑐᓕᕐᑎᑦᓱᒫᕐᐸᕋ ᐃᓕᑦᓯᓐᓄᑦ, ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ. 63 ᐱᓂᐊᕐᓂᕆᖃᑦᑕᓚᐅᕐᑕᓯᓐᓂᒃ ᐃᖅᑬᒍᑦᓯ ᐅᖃᐅᓯᕆᔭᕆᐊᖏᓪᓘᓐᓃᑦ ᑲᓐᖑᓇᓗᐊᓕᕈᒫᕐᐳᑦ, ᐃᓱᒪᒋᔪᓐᓁᕐᕕᒋᒍᑦᓯ ᑕᒻᒪᕈᑎᒋᓯᒪᔭᓕᒫᑦᓯᓐᓂᒃ. ᐊᑕᓂᖅ ᒎᑎ ᐅᖃᕐᐳᖅ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society