ᐃᓯᑭᐊᓕᐅᑉ ᐊᒡᓚᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐊᑐᒐᒃᓴᐅᖏᓐᓂᕅᓂᖓ ᒎᑎᓐᖑᐊᖃᕐᓂᕐᒥᒃ

¹ ᑕᕝᕙ ᐃᓴᕆᐊᓕᒥᐅᑦ ᐊᖓᔪᖅᑳᖏᑕ ᐃᓚᖏᑕ ᐅᐸᒃᐹᖓ, ᐃᒃᓯᕙᖃᑎᒋᓕᕐᓗᖓᓗ.

² ᑕᕝᕙ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

³ “ᐃᓅᑉ ᐃᕐᓂᖓ, ᐊᖑᑏᑦ ᐅᑯᐊ ᒎᑎᓐᖑᐊᒥᖕᓂᒃ ᐅᒃᐱᕆᔭᖃᓪᓚᕆᒃᐳᑦ, ᐊᔪᕐᑐᓕᓂᕐᒥᖕᓂᒡᓗ ᐊᒡᕕᐊᕈᑎᖃᕐᓗᑎᒃ; ᖃᓄᑐᐃᓐᓇᖅ ᐊᐱᕆᔭᐅᑎᑦᑐᒃᓴᐅᕗᖔ ᑖᒃᑯᓄᖓ?

⁴ “ᑍᒤᒻᒪᑦ ᐅᖃᐅᑎᒃᑭᑦ, ᐅᖃᕐᓗᑎᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᓐᓂ ᒎᑎᓐᖑᐊᖃᕐᓂᕐᒧᑦ ᐅᒃᐱᕆᔭᖃᓪᓚᕆᓕᕐᑐᖃᕐᐸᑦ ᐊᔪᕐᑐᓕᓂᕐᒥᖕᓂᒡᓗ ᐊᒡᕕᐊᕈᑎᖃᕐᓗᓂ, ᐱᔪᖃᓛᕐᑐᒥᒡᓗ ᐅᖃᕐᑎᓐᓄᑦ ᐅᐸᒍᑎᒃᐸᑦ, ᐅᕙᖓ ᐊᑕᓂᖅ ᓇᖕᒥᓂᖅ ᑭᐅᒐᔭᕐᐸᕋ ᒎᑎᓐᖑᐊᖃᕐᓂᖓᓄᑦ ᐅᓄᓗᐊᕐᑐᓂᒃ.

⁵ ᐅᕙᓐᓄᑦ ᓵᑦᑎᐊᖁᒐᓗᐊᕐᐸᒃᑲ ᐃᓴᕆᐊᓕᐅᑉ ᑭᖑᕚᖏᑦ, ᐅᕙᓐᓂᒃ ᐊᕕᑦᑎᓯᒪᖕᒪᑕ ᒎᑎᓐᖑᐊᓅᕐᓂᕐᒥᖕᓄᑦ.

⁶ “ᑍᒤᒻᒪᑦ ᐃᓴᕆᐊᓕᐅᑉ ᑭᖑᕚᖏᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᖃᕿᐊᓕᕆᑦᓯ ᕿᒤᓗᓯᓗ ᒎᑎᓐᖑᐊᓯᓐᓂᒃ, ᒎᑎᒧᓪᓗ ᓇᕐᕈᓇᕐᑐᓕᕆᓂᓯ ᑕᒪᕐᒥᒃ ᕿᒪᒡᓗᒋᑦ.

⁷ “ᓇᓪᓕᐊᑦ ᐃᓴᕆᐊᓕᒧᑦ ᑭᖑᕚᖑᔪᖅ, ᐃᓴᕆᐊᓕᒥᐅᑕᐅᖏᑦᑐᓪᓘᓐᓃᑦ ᓄᓇᖃᖃᑕᐅᔪᑦ ᐃᓴᕆᐊᓕᒥᐅᓄᑦ, ᐅᕙᓐᓂᒃ ᕿᒤᓯᒪᓗᑎᒃ, ᒎᑎᓐᖑᐊᓄᑦ ᓵᓐᖓᖔᓕᕐᑐᑦ ᐊᔪᕐᑐᓕᓂᕐᒧᓪᓗ ᐊᒡᕕᐊᕈᑎᒃᓴᖃᓕᕐᑐᑦ, ᐱᔪᖃᓛᕐᑐᒥᒃ ᐅᖃᕐᑎᓐᓄᑦ ᐅᐸᒍᑎᓗᑎᒃ ᐊᐱᕐᓱᕆᐊᕐᑐᕐᐸᑕ ᖃᓄᖅ ᐃᓱᒪᖕᒪᖔᕐᒪ, ᐅᕙᖓ ᐊᑕᓂᖅ ᓇᖕᒥᓂᖅ ᑭᐅᒐᔭᕐᐸᒃᑲ.

⁸ ᑍᒤᓕᐅᕐᑐᖅ ᓵᓐᓂᐊᕐᐸᕋ, ᓇᓗᓁᒃᑯᑕᓐᖑᕐᑎᓪᓗᒍ ᐅᖃᐅᓯᐅᖃᑦᑕᕐᓗᓂ ᐅᓗᕆᐊᒋᔭᒃᓴᐅᖁᓪᓗᒍ ᐃᓄᖁᑎᓐᓄᓪᓗ ᐃᓚᒋᔭᐅᔪᓐᓃᕐᑎᓪᓗᒍ; ᑕᕝᕙ ᖃᐅᔨᓂᐊᕐᐳᓯ ᐅᕙᖓᐅᒐᒪ ᐊᑕᓂᖅ.

⁹ “ᓇᓪᓕᐊᑦ ᐱᔪᖃᓛᕐᑐᒥᒃ ᐅᖃᕐᑎ ᐅᐃᕖᕐᕆᔭᐅᓂᒃᑯᑦ ᐅᖃᐅᓯᕐᓂᒃ ᐅᖃᕐᐸᑦ, ᑕᕝᕙ ᐅᕙᖓ ᐊᑕᓂᖅ ᑖᓐᓇ ᐱᔪᖃᓛᕐᑐᒥᒃ ᐅᖃᕐᑎ ᐅᐃᕖᕐᕆᓯᒪᕙᕋ, ᑕᕝᕙ ᐱᔪᓐᓇᕐᓂᓐᓄᑦ ᓵᒃᑲᔭᕐᐸᕋ, ᑐᖁᓪᓗᒍᓗ ᐃᓄᖁᑎᒪ ᐃᓴᕆᐊᓕᒥᐅᑦ ᐊᑯᕐᖓᓐᓂ.

¹⁰ ᑖᒃᑯᐊᒃ ᐊᔪᕐᑐᓕᓂᕐᒧᑦ ᓵᑕᐅᒐᔭᕐᐴᒃ ᐱᔪᖃᓛᕐᑐᒥᒡᓗ ᐅᖃᕐᑎ ᐃᓱᒪᓯᐅᕆᔭᕐᑐᕐᑐᕐᓗ ᓱᒋᐊᕐᑕᐅᓗᑎᒃ ᐊᑦᔨᒌᖕᓂᒃ.

¹¹ ᑍᒤᓕᐅᕆᖃᑦᑕᕐᓂᐊᕐᐳᖓ ᐃᓴᕆᐊᓕᐅᑉ ᑭᖑᕚᖏᓐᓄᑦ ᐅᕙᓐᓂᒃ ᕿᒤᖁᓇᒋᑦ, ᐊᔪᕐᑐᓕᓂᕐᒥᖕᓄᓪᓗ ᓇᕐᕈᓇᕐᓯᑎᑕᐅᖃᑦᑕᖁᓇᒋᑦ, ᐅᕙᓐᓄᑦ ᐃᓄᖁᑎᒋᔭᐅᖁᓪᓗᒋᑦ ᒎᑎᒋᔭᐅᓗᖓᓗ ᑖᒃᑯᓄᖓ, ᐊᑕᓂᖅ ᒎᑎ ᐅᖃᕐᐳᖅ.”

ᓄᐊ, ᑖᓂᐊᓕ, ᔫᐱᓗ

¹² ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

¹³ “ᐃᓅᑉ ᐃᕐᓂᖓ, ᓄᓇᓕᐅᖃᑎᒌᒡᔪᐊᑦ ᐊᔪᕐᑐᓕᒃᐸᑕ ᐅᕙᓐᓂᒃ ᐅᒃᐱᕆᔭᖃᖏᓐᓂᕐᒧᑦ, ᐱᔪᓐᓇᕐᓂᓐᓄᓪᓗ ᐱᓇᓱᐊᕐᕕᒋᓕᕈᒃᑭᑦ, ᓂᕿᒃᓴᖃᐅᑎᖏᑦ ᓄᖑᑎᒐᔭᕐᐸᒃᑲ ᑳᖕᓇᕐᑐᕐᔪᐊᕐᒧᓪᓗ ᑎᑭᑎᓪᓗᒋᑦ, ᐃᓄᖏᓪᓗ ᑐᖁᕋᕐᑎᒃᑲᔭᕐᐸᒃᑲ ᐆᒪᔪᖁᑎᖏᓪᓗ.

¹⁴ ᐊᒡᓛᑦ ᐊᖑᑎᑦ ᑍᒃᑯᐊ ᐱᖓᓱᑦ, ᓄᐊ, ᑖᓂᐊᓕᓗ, ᔫᐱᓗ, ᓄᓇᖃᖃᑕᐅᒐᔭᕐᐸᑕ, ᐊᑲᐅᔪᒥᒃ ᐃᓅᓯᖃᕐᓂᕐᒥᖕᓄᑦ ᓇᖕᒥᖕᓂᑐᐊᖅ ᐱᐅᓕᒐᔭᕐᐳᑦ, ᐊᑕᓂᖅ ᒎᑎ ᐅᖃᕐᐳᖅ.

¹⁵ “ᐆᒪᔪᓂᒃ ᐃᕐᓯᓇᕐᑐᓂᒃ ᐊᖅᑯᓵᕐᑎᑦᓯᒍᒪ ᑖᒃᑯᐊ ᓱᕋᒃᑎᕆᒃᐸᑕ ᓄᓇᒥᒃ, ᓄᓇᖓᑦ ᐃᓄᖃᕈᓐᓃᕋᔭᕐᐳᖅ, ᐆᒪᔪᓂᒃ ᐃᕐᓯᓇᕐᑐᖃᕐᓂᖓᓄᑦ ᐃᓄᐃᑦ ᐊᖅᑯᓵᖃᑦᑕᕈᓐᓃᕋᔭᕐᐳᑦ;

¹⁶ ᐊᒡᓛᑦ ᑍᒃᑯᐊ ᐊᖑᑎᑦ ᐱᖓᓱᑦ ᑕᕝᕙᓃᒃᑲᔭᕐᐸᑕ, ᐅᕙᖓ ᐊᑕᓂᖅ ᒎᑎ ᐃᓅᑎᓪᓗᖓ, ᕿᑐᕐᖓᒥᖕᓂᒃ ᓴᐳᑦᔨᔪᓐᓇᕋᔭᓐᖏᓚᑦ; ᑖᒃᑯᑐᐊᕐᓕ ᐱᐅᓕᔭᐅᒐᔭᕐᐳᑦ, ᓄᓇᓕ ᐃᓄᖃᕈᓐᓃᕐᑎᓪᓗᒍ.

¹⁷ “ᐅᕝᕙᓗ ᓄᓇᖓᑦ ᓴᕕᒡᔪᐊᕐᒧᑦ ᑎᑭᑕᐅᑎᒃᑯᒃᑯ, ᐅᖃᕐᓗᖓᓗ, ‘ᓴᕕᒡᔪᐊᖅ ᓄᓇᒃᑯᑦ ᐊᖅᑯᓴᐅᑦᔭᐅᓕ;’ ᑕᕝᕙ ᐃᓄᐃᑦ ᐆᒪᔪᓪᓗ ᑕᒫᓃᑦᑐᑦ ᓄᖑᒃᑲᔭᕐᐸᒃᑲ.

¹⁸ ᑖᒃᑯᐊ ᐊᖑᑎᑦ ᐱᖓᓱᑦ ᑕᕝᕙᓂ ᐃᓅᖃᑕᐅᒐᔭᕐᐸᑕ, ᐅᕙᖓ ᐃᓅᑎᓪᓗᖓ, ᐊᑕᓂᖅ ᒎᑎ ᐅᖃᕐᐳᖅ, ᕿᑐᕐᖓᒥᖕᓂᒃ ᐊᒡᓛᑦ ᓴᐳᑦᔨᔪᓐᓇᕋᔭᓐᖏᓚᑦ; ᑖᒃᑯᑐᐊᕐᓕ ᐱᐅᓕᔭᐅᒐᔭᕐᐳᑦ.

¹⁹ “ᓄᓇᓖᓪᓗ ᖃᓄᐃᓐᓇᕐᑐᓄᑦ ᑎᑭᑕᐅᓂᕐᓗᒃᑎᒃᑲᔭᕈᒃᑭᑦ, ᓂᓐᖓᐅᒪᓂᓐᓄᓪᓗ ᑎᑭᑕᐅᓗᑎᒃ ᐅᓄᕐᑐᑦ ᑐᖁᒐᔭᕐᐳᑦ, ᐃᓄᐃᓪᓗ ᐆᒪᔪᓪᓗ.

²⁰ ᓄᐊ, ᑖᓂᐊᓕᓗ, ᔫᐱᓗ ᑕᕝᕙᓂ ᐊᒡᓛᑦ ᓄᓇᖃᖃᑕᐅᒐᔭᕐᐸᑕ, ᐅᕙᖓ ᐃᓅᑎᓪᓗᖓ, ᐊᑕᓂᖅ ᒎᑎ ᐅᖃᕐᐳᖅ, ᕿᑐᕐᖓᒥᖕᓂᒃ ᐊᒡᓛᑦ ᓴᐳᑦᔨᔪᓐᓇᕋᔭᓐᖏᓚᑦ; ᑖᒃᑯᑐᐊᕐᓕ ᐱᐅᓕᔭᐅᒐᔭᕐᐳᑦ ᐃᓱᐊᕐᑐᒥᒃ ᐃᓅᓂᕐᒥᖕᓄᑦ.

²¹ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓱᒋᐊᕐᓯᑦᔪᑎᓐᓂᒃ ᑎᑭᑎᑦᓯᒐᔭᕈᒪ ᓯᑕᒪᓂᒃ ᐱᐅᖏᓐᓂᕐᐹᓂᒃ ᔨᕉᓴᓕᒧᑦ, ᐅᓇᑕᕐᓂᕐᒥᒃ, ᑳᖕᓇᕐᑐᕐᔪᐊᕐᒥᒃ, ᐆᒪᔪᓂᒃ ᐃᕐᓯᓇᕐᑐᓂᒃ, ᖃᓄᐃᓐᓇᕐᑐᓄᓪᓗ ᑎᑭᑕᐅᓂᕐᓗᒃᑎᒃᑯᒃᑭᑦ, ᑖᒃᑯᐊ ᐊᓯᕈᐃᒐᔭᕐᐳᑦ ᐃᓄᖕᓂᒃ ᐆᒪᔪᓂᒡᓗ.

²² ᑕᒪᒃᑯᓇᓐᖓᓪᓕ ᐊᓐᓇᒍᓐᓇᕐᑐᖃᕋᔭᕐᐸᑦ ᕿᑐᕐᖓᓂᓗ ᑕᓯᐅᕐᓗᓂᒋᑦ, ᐃᓕᑦᓯᓐᓄᑦ ᑎᑭᑉᐸᑕ, ᐱᐅᓯᖏᓪᓗ ᐱᓂᐊᕐᓂᖏᓪᓗ ᑕᑯᓕᕈᑦᓯᒋᒃ, ᑕᕝᕙ ᔨᕉᓴᓕᐅᑉ ᓱᒋᐊᕐᑕᐅᓂᖓ ᐱᐅᖏᑦᑐᒧᑦ ᓈᒻᒪᓈᕐᑕᐅᓯᒪᓂᖓᓂᒃ ᖃᐅᔨᒐᔭᕐᐳᓯ ᒪᓂᒍᕐᑕᐅᓗᓯᓗ.

²³ ᑖᒃᑯᐊ ᐃᓕᑦᓯᓐᓂᒃ ᒪᓂᒍᐃᒃᐸᑕ, ᐱᐅᓯᖏᑦ ᐱᓂᐊᕐᓂᖏᓪᓗ ᑕᑯᒍᑦᓯᒋᒃ; ᖃᐅᔨᓕᕈᒫᕐᐳᓯ ᐱᓂᐊᕐᓂᕆᓯᒪᔭᓕᒫᒃᑲ ᐱᑦᔪᑎᖃᑦᓯᐊᖏᓪᓗᑎᒃ ᐱᓯᒪᖏᓐᓂᖏᓐᓂᒃ, ᐊᑕᓂᖅ ᒎᑎ ᐅᖃᕐᐳᖅ.”