ᐃᓯᑭᐊᓕᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓚᐅᑦᑍᔩᑦ ᐊᖑᑎᑦ ᓱᓕᖏᑦᑐᑦ ᓱᒋᐊᕐᑕᐅᓂᖏᑦ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᑦ ᐱᔪᒫᕐᑐᒃᓴᓂᒃ ᐅᖃᕐᑎᖏᑦ ᐊᑭᕋᕐᑐᕐᓗᒋᑦ ᐅᖃᐅᑎᔭᕐᑐᒃᑭᑦ, ᓇᖕᒥᓂᖅ ᐃᓱᒪᒥᒍᑦ ᐋᖅᑭᒃᑕᒥᖕᓂᒃ ᐅᖃᓪᓚᖃᑦᑕᕐᑐᑦ: ‘ᑐᓴᕆᑦᓯ ᐊᑕᓂᐅᑉ ᐅᖃᐅᓯᖏᓐᓂᒃ!’

³ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ, ᑲᑉᐱᐊᓐᓇᒦᒃ ᓯᓔᑦᑐᑦ ᐱᔪᒫᕐᑐᒃᓴᓂᒃ ᐅᖃᓪᓚᒐᓱᖃᑦᑕᕐᑐᑦ ᐃᓱᒪᑐᐃᓐᓇᕐᒥᖕᓂᑦ ᐱᔪᓂᒃ, ᑕᑯᑎᑕᐅᓚᐅᕋᑎᒃ!

⁴ ᐃᓴᕆᐊᓕᒥᐅᖑᔪᓯ ᐱᔪᒫᕐᑐᒃᓴᓂᒃ ᐅᖃᕐᑎᖃᕐᐳᓯ ᑎᕆᒐᓂᐊᑎᑐᑦ ᐃᒡᓗᕕᓂᕐᓃᑦᑐᑎᑐᑦ ᑍᒤᑦᑐᓂᒃ.

⁵ ᐅᐸᒍᑎᔪᓐᓇᖏᓐᓇᑦᓯᓘᓐᓃᑦ ᓯᖁᑦᑎᕐᓯᒪᓂᖏᓐᓄᑦ, ᐊᕙᓗᕐᔪᐊᒥᒡᓘᓐᓃᑦ ᓴᓇᔪᓐᓇᖏᓐᓇᑦᓯ ᐃᓴᕆᐊᓕᐅᑉ ᑭᖑᕚᖏᓐᓄᑦ, ᓇᐸᔪᓐᓇᖁᓪᓗᒍ ᐅᓇᑕᓕᕐᐸᑕ ᐊᑕᓂᐅᑉ ᐅᓪᓗᖓᓂ.

⁶ ᓱᓕᖏᑦᑐᒥᒃ ᐅᖃᖃᑦᑕᕐᒪᑕ ᓴᒡᓗᓪᓚᕆᒃᓗᑎᒃ; ᐅᖃᖃᑦᑕᕐᐳᑦ, ‘ᐊᑕᓂᖅ ᐅᖃᕐᐳᖅ,’ ᐊᑕᓂᕐᒧᑦ ᑎᓕᔭᐅᓯᒪᓇᑎᒃ, ᐅᖃᐅᓯᕆᔭᒥᖕᓂᒃ ᓂᕆᐅᒋᔭᖃᕋᓱᖃᑦᑕᕐᐳᑦ ᓇᓚᐅᑦᓯᑎᑕᐅᓂᐊᕋᓱᒋᓪᓗᒋᑦ.

⁷ ᑕᑯᑎᑕᐅᓂᕋᕐᓂᑦᓯ ᓱᓕᖏᓐᓂᖏᑦ ᑕᑯᓯᒪᓐᖏᓚᓯᐅᒃ, ᓇᓚᐅᑦᑍᓂᕋᖃᑦᑕᕐᓗᓯᓗ ᓴᒡᓗᓪᓗᓯ, ᐅᖃᖃᑦᑕᕐᐳᓯ ‘ᐊᑕᓂᖅ ᐅᖃᕐᐳᖅ,’ ᐅᖃᓚᐅᕐᑎᓐᓇᖓᓘᓐᓃᑦ!”

⁸ ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᓱᓕᖏᑦᑐᓂᒃ ᐅᖃᓪᓚᖃᑦᑕᕋᑦᓯ ᑕᑯᑎᑕᐅᓂᕋᕐᓂᓯᓗ ᓴᒡᓗᕿᑦᓯᓂᐅᓪᓗᑎᒃ, ᑍᒤᒻᒪᑦ ᑕᑯᒋᑦ, ᐃᓕᑦᓯᓐᓂᒃ ᓵᓐᖓᓯᓂᐊᓕᕐᐳᖓ, ᐊᑕᓂᖅ ᒎᑎ ᐅᖃᕐᐳᖅ.

⁹ ᓱᒋᐊᕐᓯᓂᐊᕐᐳᖓ ᐱᔪᒫᕐᑐᓂᒃ ᓱᓕᖏᑦᑐᓂᒃ ᑕᑯᑎᑕᐅᓯᒪᓂᕋᕐᑐᓂᒃ ᓱᓕᖏᑦᑐᓂᒡᓗ ᓇᓚᐅᑦᑍᓂᕋᖃᑦᑕᕐᑐᓂᒃ; ᐃᓚᒋᔭᐅᑎᓐᓂᐊᕈᓐᓃᕐᐸᒃᑲ ᐃᓄᖁᑎᒪ ᑲᑎᒪᖃᑦᑕᕐᓂᖏᓐᓄᑦ, ᐃᓴᕆᐊᓕᐅᑉ ᑭᖑᕚᖏᑕ ᐊᑎᖃᕐᕕᖏᓐᓄᑦ ᐃᓚᒋᔭᐅᑎᓐᓂᐊᕈᓐᓃᕐᐸᒃᑲ, ᐃᓴᕆᐊᓕᐅᓪᓗ ᓄᓇᖓᓄᑦ ᐃᑎᕐᓂᐊᕈᓐᓃᕐᐳᑦ; ᑕᕝᕙ ᖃᐅᔨᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ ᒎᑎ.

¹⁰ “ᐃᓛᒃ ᑖᒃᑯᐊ, ᐃᓄᖁᑎᓐᓂᒃ ᑕᒻᒪᕐᑎᑦᓯᓚᐅᕐᐳᑦ, ᐅᖃᕐᓗᑎᒃ, ‘ᖃᓄᐃᓐᓇᕐᑐᖃᓐᖏᓚᖅ,’ ᐅᕝᕙ ᖃᓄᐃᓐᓇᕐᑐᑦ ᐊᑐᓕᕐᑎᓪᓗᒋᑦ; ᐃᓄᖁᑎᒃᑲ ᐊᕙᓗᕐᔪᐊᓕᐅᕐᑎᓪᓗᒋᑦ, ᑖᒃᑯᐊ ᓇᓚᐅᑦᑍᔨᐅᓂᕋᕐᑐᑦ ᖄᖓᒍᑦ ᖃᑯᕐᑕᒥᒃ ᒥᖑᐊᕆᔨᑐᐃᓐᓇᐅᕗᑦ;

¹¹ ᑖᒃᑯᐊ ᐅᖃᐅᑎᒃᑭᑦ ᖃᑯᕐᑕᓂᒃ ᒥᖑᐊᕆᕙᒃᑐᑦ ᐊᕙᓗᕐᔪᐊᓕᐊᖓᑦ ᓯᖁᑦᑎᕈᒫᕐᐳᖅ! ᓯᓚᓗᒡᔪᐊᖃᕈᒫᕐᒪᑦ, ᓇᑕᖅᑯᕐᓇᕐᔪᐊᕐᓗᓂᓗ, ᐊᓄᕆᕐᔪᐊᕈᒫᕐᒪᑦ;

¹² ᐊᕙᓗᕐᔪᐊᖅ ᐅᕐᕉᕋᑐᐃᓐᓇᓕᕐᐸᑦ, ᐅᖃᐅᑦᔭᐅᔪᒫᓐᖏᓚᓰ, ‘ᖃᓄᖅ ᒪᓐᓇ ᒪᕐᕋᕐᒧᑦ ᓂᐱᐅᓯᕐᑐᕐᑕᕕᓂᕐᓯ?’

¹³ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓂᓐᖓᐅᒪᓂᓐᓄᑦ ᐊᓄᕆᕐᔪᐊᖃᕐᑎᑦᓯᔪᒫᕋᒪ; ᓯᓚᓗᒡᔪᐊᕐᓗᓂᓗ ᓇᑕᖅᑯᕐᓇᕐᓗᓂᓗ ᓂᓐᖓᐅᒪᓂᓐᓄᑦ ᓯᖁᑦᑎᕈᒫᕐᐳᖅ.

¹⁴ ᐊᕙᓗᕐᔪᐊᕐᓗ ᓯᖁᑦᑎᕈᒫᕐᐸᕋ ᖃᑯᕐᑕᒧᑦ ᒥᖑᐊᓚᐅᕐᑕᓯ, ᐅᕐᕉᕋᕐᑎᑦᓱᒫᕐᐸᕋ ᒪᓂᖅᑲᒧᑦ, ᑐᓐᖓᕕᕕᓂᑐᐃᓐᓇᐅᓕᕐᓗᓂ; ᐅᕐᕉᒃᐸᑦ ᐃᓕᑦᓯᑦᑕᐅᖅ ᑐᖁᔪᒫᕐᐳᓯ ᐊᑯᕐᖓᓐᓂ; ᑕᕝᕙ ᖃᐅᔨᓕᕈᒫᕐᐳᓯ ᐅᕙᖓᐅᒐᒪ ᐊᑕᓂᖅ.

¹⁵ “ᑍᒫᒃ ᑕᕝᕙ ᐊᕙᓗᕐᔪᐊᖅ ᓂᓐᖓᐅᓯᓐᓄᑦ ᐱᓇᓱᐊᕐᕕᒋᔪᒫᕐᐸᕋ, ᑖᒃᑯᐊᓗ ᖃᑯᕐᑕᒥᒃ ᒥᖑᐊᕐᓯᓚᐅᕐᑐᑦ; ᑕᕝᕙ ᐅᖃᐅᑎᔪᒫᕐᐸᑦᓯ, ᐊᕙᓗᕐᔪᐊᖃᕈᓐᓃᕐᐳᖅ, ᒥᖑᐊᕐᓯᓚᐅᕐᑐᓪᓗ ᖃᑯᕐᑕᒥᒃ ᓄᖑᑉᐳᑦ,

¹⁶ ᑍᒃᑯᐊᓗ ᐱᔪᒫᕐᑐᓂᒃ ᐅᖃᕐᑎᐅᓂᕋᕐᓗᑎᒃ ᐃᓴᕆᐊᓕᒥ ᐅᖃᕐᐸᓚᐅᕐᑐᑦ ᔨᕉᓴᓕᒥᐅᓂᒃ ᖃᓄᐃᓛᖏᓐᓂᕅᓪᓗᑎᒃ, ᖃᓄᐃᓐᓇᕐᑐᑦ ᐊᑐᓕᕋᓗᐊᕐᑎᓪᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ.”

ᓇᓚᐅᑦᑍᓃᑦ ᐊᕐᓇᓄᑦ ᓱᓕᖏᑦᑐᒥᒃ ᓇᓚᐅᑦᑍᔨᓄᑦ

¹⁷ “ᐃᕝᕕᓪᓗ, ᐃᓅᑉ ᐃᕐᓂᖓ, ᐊᕐᓁᑦ ᐱᔪᒫᕐᑐᓂᒃ ᐅᖃᕐᑎᐅᓂᕋᕐᑐᑦ ᐃᓅᖃᑎᕕᑦ ᐸᓂᖏᑦ, ᐃᓱᒪᑐᐃᓐᓇᕐᒥᖕᓂᒃ ᓇᓚᐅᑦᑍᓇᓱᖃᑦᑕᕐᑐᑦ; ᓵᓐᖓᓗᒋᑦ ᐅᖃᐅᑦᔪᓕᒃᑭᑦ

¹⁸ ᐅᖃᐅᑎᓗᒋᓪᓗ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᑲᑉᐱᐊᓐᓇᒦᒃ ᐊᕐᓁᑦ ᒥᕐᓱᖃᑦᑕᕐᑐᑦ ᐊᒡᒐᐅᒻᒥᐅᑕᓕᐅᕐᓗᑎᒃ ᐊᖓᒃᑰᓵᕈᑎᒃᓴᒥᖕᓂᒃ, ᑮᓇᕐᓄᓪᓗ ᒪᑐᐊᓕᐅᖃᑦᑕᕐᑐᑦ ᐊᑦᔨᒌᖏᑦᑐᓂᒃ ᑕᒤᓐᓄᑦ ᐊᑐᕐᑕᐅᔪᒃᓴᓂᒃ, ᑕᕐᓂᖏᓐᓂᒃ ᐱᓇᓱᐊᕐᓗᑎᒃ! ᐊᐅᓚᑦᓯᓇᓱᖃᑦᑕᕐᓂᐊᕐᐱᓰ ᐃᓄᖁᑎᒪ ᑕᕐᓂᖏᓐᓂᒃ, ᐊᓯᖏᓪᓗ ᐆᒪᑎᓪᓗᒋᑦ ᑮᓇᐅᔭᓕᐅᕈᑎᒋᔪᒪᓪᓗᒋᑦ.

¹⁹ ᓇᕐᕈᓇᕐᑎᑉᐸᑦᓯᓐᖓ ᐃᓄᖁᑎᒪ ᐊᑯᕐᖓᓐᓂ ᓂᐊᖂᔭᒃᓴᓄᑦ ᑎᒍᒥᐊᓪᓗᐊᕐᑕᑦᓯᓐᓄᑦ ᓂᐊᖂᔭᓄᓪᓗ ᐊᒡᒍᕐᓂᑯᓄᑦ, ᑐᖁᒐᔭᖏᑦᑐᓂᒃ ᑐᖁᑎᑦᓯᖃᑦᑕᕐᐳᓯ ᐃᓅᔭᕆᐊᖃᖏᑦᑐᓂᒡᓗ ᐃᓅᑎᑦᓯᕙᒃᓗᓯ, ᓱᓕᖏᑦᑐᓂᒃ ᐃᓄᖁᑎᒃᑲ ᐅᖃᐅᑎᖃᑦᑕᕋᑦᓯᐅᒃ, ᓈᓚᒃᐸᒃᓗᑎᒡᓗ ᓴᒡᓗᓂᑦᓯᓐᓂᒃ.

²⁰ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᓵᓐᖓᓂᐊᓕᕐᐸᒃᑲ ᐊᒡᒐᐅᒻᒥᐅᑕᓕᐊᕆᕙᒃᑕᓯ ᐊᐅᓚᑦᓯᑦᔪᑎᒋᓇᓱᐊᕐᓗᒋᑦ ᐃᓅᓯᕐᒥᒃ ᑐᖁᒥᒡᓗ, ᐊᕐᓵᕈᒫᕐᐸᑦᓯ ᐊᒡᒐᐅᒻᒥᐅᑕᑦᓯᓐᓂᒃ; ᐃᓄᐃᓪᓗ ᑕᒪᒃᑯᓄᖓ ᐊᐅᓚᓐᓇᓱᐊᓚᐅᕐᑕᓯ ᕿᓚᕈᑦᔮᕐᓯᒪᓕᕈᒫᕐᐳᑦ ᑎᖕᒥᐊᑎᑐᑦ.

²¹ ᑮᓇᑦᓯᓐᓄᑦ ᒪᑐᐊᓯ ᐊᓕᒡᓗᒋᑦ ᐲᔭᕈᒫᕐᐸᒃᑲ, ᐃᓄᖁᑎᒃᑲᓗ ᐱᔪᓐᓇᐅᑎᑦᓯᓐᓂᑦ ᓴᐳᑎᓗᒋᑦ, ᐃᓕᑦᓯᓐᓄᓪᓗ ᓇᕆᐊᕆᔭᐅᔪᑎᑐᑦ ᑍᒤᑦᓱᓐᓁᕈᒫᕐᐳᑦ; ᖃᐅᔨᖁᓪᓗᓯ ᐅᕙᖓᐅᒐᒪ ᐊᑕᓂᖅ.

²² “ᓴᐱᓕᕐᑎᑦᓯᖃᑦᑕᕋᑦᓯ ᐃᓄᖕᓂᒃ ᐃᓱᐊᕐᑐᓕᔪᓂᒃ ᓱᓕᖏᑦᑐᓄᑦ, ᓴᐱᓕᕐᑎᓯᒪᓐᖏᑕᓐᓂᒃ, ᐱᐅᖏᑦᑐᓕᔪᓪᓗ ᐱᐅᖏᑦᑐᓕᓂᕐᒧᑦ ᑲᔪᖏᕐᓴᖃᑦᑕᕋᑦᓯᒋᒃ, ᕿᒤᖁᔨᖃᑦᑕᖏᓐᓇᑦᓯ ᐱᐅᖏᑦᑐᓕᓂᕐᒥᖕᓂᒃ ᐃᓅᓯᕐᒥᖕᓂᒃ ᐱᐅᓕᓯᖁᓇᒋᑦ;

²³ ᑍᒤᒻᒪᑦ ᑕᑯᑎᑕᐅᓐᖑᐊᕐᓂᕆᖃᑦᑕᕐᑕᓯ ᓄᖅᑲᕐᓂᐊᓕᕐᐳᖅ ᐱᔪᒫᕐᑐᒃᓴᓂᒡᓗ ᐅᖃᐅᓯᖃᕋᓱᖃᑦᑕᕐᓂᓯ ᐃᓱᓕᑉᐳᖅ; ᐃᓄᖁᑎᒃᑲ ᓴᐳᑎᓂᐊᓕᕐᐸᒃᑲ ᐱᔪᓐᓇᐅᑎᑦᓯᓐᓂᑦ. ᑕᕝᕙ ᖃᐅᔨᓂᐊᕐᐳᓯ ᐅᕙᖓᐅᒐᒪ ᐊᑕᓂᖅ.”