ᐃᓯᑭᐊᓕᐅᑉ ᐊᒡᓚᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓ ᕿᒫᓯᒪᔪᖅ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᓄᓇᖃᕐᐳᑎᑦ ᐊᑭᕋᕐᑐᕈᒪᔪᓂᒃ ᐃᓄᖃᕐᑐᓂᒃ, ᐃᔨᖃᕋᓗᐊᕐᐳᑦ ᑕᑯᔪᓐᓇᓐᖏᓚᑦ, ᓯᐅᑎᖃᕋᓗᐊᕐᐳᑦ ᑐᓴᕈᓐᓇᓐᖏᓚᑦ; ᐊᑭᕋᕐᑐᕐᑎᐅᒐᒥᒃ ᑭᖑᕚᖑᖃᑎᒌᑦ.

³ “ᑍᒤᒻᒪᑦ ᐃᓅᑉ ᐃᕐᓂᖓ, ᓇᒃᓴᕐᓂᐊᕐᑕᕐᓂᒃ ᐴᖅᑬᓕᕆᑦ ᐅᓪᓘᓂᖓᓂ ᐊᐅᓪᓚᓕᕆᑦ ᐊᐅᓪᓚᕈᑦᔭᐅᓕᕐᑐᑐᑦ, ᐃᓄᐃᑦ ᑕᑯᓐᓇᕐᑎᓪᓗᒋᑦ; ᐊᐅᓪᓚᓕᕈᕕᑦ ᓄᓇᑦᓯ ᐊᓯᐊᓄᑦ ᐊᐅᓪᓚᕈᑦᔭᐅᓕᕐᑐᑎᑐᑦ ᓄᓇᑦᓯᓐᓂᑦ ᐱᓂᐊᕐᐳᑎᑦ ᑕᑯᓐᓈᕐᑎᓪᓗᒋᑦ. ᐃᒻᒪᖄ ᑐᑭᓯᓂᐊᕐᐳᑦ, ᐊᑭᕋᕐᑐᕐᑎᐅᒐᓗᐊᕐᓗᑎᒃ ᑭᖑᕚᖑᖃᑎᒌᑦ.

⁴ ᐅᓪᓘᓂᖓᓂ ᓇᒃᓴᕐᓂᐊᕐᑕᑎᑦ ᐊᓐᓂᓯᔭᒃᓴᕆᕙᑎᑦ ᐃᓄᐃᑦ ᑕᒃᑯᐊᓂ, ᐊᐅᓪᓚᕈᑦᔭᐅᔪᑦ ᓇᒃᓴᕐᐸᒃᑕᖏᑎᑐᑦ; ᐅᓐᓄᓕᕐᐸᑦ ᐊᐅᓪᓚᕐᑐᒃᓴᐅᕗᑎᑦ ᑕᑯᓐᓇᕐᑎᓪᓗᒋᑦ, ᐃᓄᐃᑦ ᐊᐅᓪᓚᕈᑦᔭᐅᓕᕐᑐᑦ ᐊᐅᓪᓚᕈᑦᔭᐅᕙᖕᓂᖏᑎᑐᑦ.

⁵ ᐊᑭᓐᓇᖅ ᐊᖕᒪᕐᓗᒍ ᑕᑯᓐᓇᕐᑎᓪᓗᒋᑦ, ᑕᕝᕘᓇ ᐊᓂᔪᒃᓴᐅᕗᑎᑦ.

⁶ ᑕᑯᓐᓇᕐᑎᓪᓗᒋᑦ ᓇᒃᓴᒐᒃᓴᑎᑦ ᐃᕐᓲᑎᔭᒃᓴᕆᕙᑎᑦ, ᑖᕐᑎᓪᓗᒍ ᐃᕐᓱᓕᕐᓗᒋᑦ; ᒪᑐᐊᕐᑐᒃᓴᐅᕗᑎᑦ ᓄᓇ ᑕᑯᓐᓇᕐᓂᐊᖏᓐᓇᕕᐅᒃ; ᓇᓗᓁᒃᑯᑕᒃᓴᓐᖑᕐᑎᓐᓇᒃᑭᑦ ᐃᓴᕆᐊᓕᐅᑉ ᑭᖑᕚᖏᓐᓄᑦ.”

⁷ ᑎᓕᔭᐅᓂᕋ ᒪᓕᒡᓗᒍ ᐱᓇᓱᐊᓚᐅᕐᐳᖓ. ᐅᓪᓘᑎᓪᓗᒍ ᓇᒃᓴᕐᓂᐊᕐᑕᒃᑲ ᐊᓐᓂᓯᓚᐅᕐᐸᒃᑲ, ᐊᐅᓪᓚᕈᑦᔭᐅᓕᕐᑐᑦ ᓇᒃᓴᕐᐸᒃᑕᖏᑦᑎᑐᑦ, ᐅᓐᓄᖕᒪᑦ ᐊᑭᓐᓇᖅ ᐊᖕᒪᕐᐸᕋ ᐊᒡᒐᓐᓄᑦ; ᑖᕐᓯᑎᓪᓗᒍ ᐊᐅᓪᓚᕐᐳᖓ, ᐃᓄᐃᑦ ᑕᑯᓐᓇᕐᑎᓪᓗᒋᑦ ᓇᒃᓴᕐᓂᐊᕐᑕᒃᑲ ᓇᖕᒥᐅᑎᓪᓗᒋᑦ ᐱᓱᓯᕗᖓ.

⁸ ᐅᓪᓛᖑᓕᕐᒪᑦ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ:

⁹ “ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᑭᖑᕚᖏᓐᓄᑦ ᐊᑭᕋᕐᑐᕐᑎᓄᑦ, ᐊᐱᕆᔭᐅᓚᐅᓐᖏᓚᑏᑦ, ‘ᖃᓄᐃᓕᐅᓕᕐᐱᑦ?’

¹⁰ ᐅᖃᐅᑎᒃᑭᑦ, ‘ᐊᑕᓂᖅ ᒎᑎ ᐅᖃᕐᐳᖅ: ᑕᒪᓐᓇ ᐅᖃᐅᓯᐅᖁᔭᕋ ᑐᕌᖓᕗᖅ ᐊᖓᔪᖅᑳᓄᑦ ᔨᕉᓴᓕᒦᑦᑐᓄᑦ ᐃᓴᕆᐊᓕᐅᓪᓗ ᑭᖑᕚᖏᓐᓄᑦ ᑕᒤᓐᓄᑦ ᑕᕝᕙᓃᑦᑐᓄᑦ.’

¹¹ ᐅᖃᐅᑎᒃᑭᑦ, ‘ᐊᑐᓚᐅᕐᑕᕋ ᓇᓗᓁᒃᑯᑕᐅᕗᖅ ᐃᓕᑦᓯᓐᓄᑦ: ᑍᒫᒃᑕᐅᖅ ᑖᒃᑯᐊ ᐱᓂᐊᕐᕕᐅᔪᒫᕐᐳᑦ; ᐊᐅᓪᓚᕈᑦᔭᐅᔪᒫᕐᐳᑦ ᑎᒍᔭᐅᓗᑎᒃ.’

¹² ᑖᒃᑯᓄᖓ ᐊᖓᔪᖅᑳᖑᔪᖅ ᓇᒃᓴᕐᓂᐊᕐᑕᒥᖕᓂᒃ ᐃᕐᓲᑦᔨᔪᒫᕐᐳᖅ ᑖᕐᑎᓪᓗᒍ, ᐊᓂᔪᒫᕐᐳᖅ; ᐊᑭᓐᓇᖅ ᐊᖕᒪᕐᓗᒍ ᑕᕝᕗᓇ ᐊᓂᔪᒫᕐᐳᖅ; ᒪᑐᐊᕐᓗᓂᓗ, ᓄᓇᒥᒃ ᑕᑯᓐᓇᕈᒪᓇᓂ.

¹³ ᓄᓗᐊᓐᓄᓪᓕ ᐅᓕᒍᒫᕐᐸᕋ, ᓂᒐᕐᑎᓪᓗᒍᓗ ᓂᒐᖁᑎᓐᓄᑦ; ᐹᐱᓘᓂᒧᐊᕈᑎᓗᒍᓗ ᓄᓇᒧᑦ ᑲᐅᓪᑎᐊᒧᑦ, ᑕᑯᔪᒫᓐᖏᓛᓕ; ᑕᕝᕙᓂᓗ ᑐᖁᔪᒫᕐᐳᖅ.

¹⁴ ᓇᒧᑐᐃᓐᓇᖅ ᓯᐊᒻᒪᕐᑎᑦᓱᒫᕐᐸᒃᑲ ᐊᓐᓄᕌᕐᕕᐅᕙᒃᑐᓕᒫᓄᑦ ᐃᓚᒋᔭᓕᒫᖏᑦ, ᐃᑲᔪᕐᑎᖏᑦ ᐅᓇᑕᕐᑐᒃᓴᖁᑎᖏᓪᓗ; ᓴᕕᒡᔪᐊᕐᓗ ᐊᒧᓗᒍ ᒪᓕᒍᒫᕐᐸᒃᑲ.

¹⁵ “ᖃᐅᔨᓕᕈᒫᕐᐳᓪᓗ ᐅᕙᖓᐅᒐᒪ ᐊᑕᓂᖅ, ᐊᐅᓪᓚᕐᑎᒃᑯᒃᑭᑦ ᐃᓅᖃᑎᒌᒡᔪᐊᓄᑦ ᓯᐊᒻᒪᕐᑎᒃᑯᒃᑭᓪᓗ ᓄᓇᓕᒡᔪᐊᓄᑦ.

¹⁶ ᐊᒥᐊᒃᑯᖃᕐᑎᑦᓱᒫᕐᐸᒃᑲᓕ ᐅᓄᖏᑦᑐᓂᒃ ᓴᕕᒡᔪᐊᒥᑦ ᐊᓐᓇᒃᑐᓂᒃ, ᑳᖕᓇᕐᑐᕐᔪᐊᒥᑦ ᐋᓐᓂᐊᓇᕐᑐᓂᓪᓗ, ᐅᓂᒃᑳᕈᓐᓇᕐᓯᖁᓪᓗᒋᑦ ᒎᑎᒧᑦ ᓇᕐᕈᓇᕐᑐᓂᒃ ᐱᓂᐊᕐᓂᕆᓚᐅᕐᑕᒥᖕᓂᒃ ᐃᓅᖃᑎᒌᒡᔪᐊᓃᓕᕈᑎᒃ ᓇᔪᓕᕐᑕᒥᖕᓂ, ᖃᐅᔨᓕᖁᓪᓗᒋᓪᓗ ᐅᕙᖓᐅᒐᒪ ᐊᑕᓂᖅ.”

ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖓᑕ ᓴᔪᖕᓂᖓ

¹⁷ ᓱᓕ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

¹⁸ “ᐃᓅᑉ ᐃᕐᓂᖓ, ᓴᔪᒃᓱᕐᓗᑎᑦ ᓂᕆᒋᑦ, ᐃᒥᕐᓗᑎᓪᓗ ᓴᔪᒡᓗᑎᑦ ᑲᑉᐱᐊᓱᖕᓂᕐᒧᑦ.

¹⁹ ᐃᓄᐃᑦ ᑕᕝᕙᓂ ᓄᓇᓖᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᔨᕉᓴᓕᒥᐅᑦ ᐱᑦᔪᑎᒋᓪᓗᒋᑦ ᐃᓴᕆᐊᓕᒥ ᓄᓇᓖᑦ: ᓂᕆᔪᒫᕐᐳᑦ ᑲᑉᐱᐊᓱᒡᓗᑎᒃ, ᐃᒥᕈᒫᕐᐳᓪᓗ ᐃᓱᒪᔮᕐᓗᑎᒃ, ᓄᓇᖓᑦ ᓱᓁᕈᑦᔭᐅᔪᒫᕐᒪᑦ, ᑕᕝᕙᓃᑦᑐᓕᒫᑦ ᐱᕋᔭᖕᓂᒃᑯᑦ ᐃᓅᓂᖏᓐᓄᑦ.

²⁰ ᐃᒡᓗᒐᓴᒡᔪᐊᑦ ᒫᓐᓇ ᐃᓄᓖᑦ ᓱᒃᑯᑎᕐᑕᐅᔪᒫᕐᐳᑦ, ᓄᓇᓗ ᑕᒪᓐᓇ ᓱᓇᑕᖃᕈᓐᓃᕐᓗᓂ; ᑕᕝᕙ ᖃᐅᔨᔪᒫᕐᐳᓯ ᐅᕙᖓᐅᒐᒪ ᐊᑕᓂᖅ.”

ᐅᖃᐅᓯᐅᒐᔪᒃᑐᖅ ᐱᐅᒋᔭᐅᔪᖅ ᐱᐅᒋᔭᐅᖏᑦᑐᓪᓗ ᐅᖃᐅᓰᑦ

²¹ ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ: ᐅᖃᕐᓗᓂ,

²² “ᐃᓅᑉ ᐃᕐᓂᖓ, ᖃᓄᐃᒻᒪᑦ ᐃᓴᕆᐊᓕᒥᐅᑦ ᐅᖃᐅᓯᐅᒐᔪᒃᑐᒥᒃ ᐅᖃᕐᐸᒃᐸᑦ ᐃᒤᓕᔪᒥᒃ, ‘ᐊᑯᓂᐊᓘᓕᕋᓗᐊᕐᒪᑦ ᑕᑯᑎᑕᐅᑦᔪᑎᓕᒫᑦ ᓱᓕ ᐊᑐᓕᓚᐅᕐᓯᒪᓐᖏᓚᑦ.’

²³ ᑍᒤᒻᒪᑦ ᐅᖃᐅᑎᓕᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᒥᐅᓂᑦ ᐅᖃᐅᓯᐅᒐᔪᒃᑐᖅ ᓄᖅᑲᕐᑎᓐᓂᐊᓕᕐᐸᕋ, ᐃᓴᕆᐊᓕᒥᐅᓄᑦ ᐅᖃᐅᓯᐅᒐᔪᖕᓂᐊᕈᓐᓃᕐᐳᖅ. ᐅᖃᐅᑎᓕᒃᑭᓪᓕ, ᐅᓪᓗᐃᑦ ᓇᓪᓕᐅᑎᕗᑦ ᑕᑯᑎᑕᐅᑦᔪᑎᓕᒫᑦ ᓇᓪᓕᐅᑎᓂᖏᑦ.

²⁴ “ᐃᓴᕆᐊᓕᐅᑉ ᑭᖑᕚᖏᓐᓂ ᓱᓕᖏᑦᑐᓂᒃ ᑕᑯᑎᑕᐅᔪᖃᕐᐸᖕᓂᐊᕈᓐᓁᕐᐳᖅ, ᓱᓕᖏᑦᑐᓂᒡᓗ ᑐᓴᕐᓂᕆᔭᐅᔪᓂᒃ ᓇᓚᐅᑦᑍᔪᖃᕐᐸᒍᓐᓁᕐᓗᓂ.

²⁵ ᐅᕙᖓᓕ ᐊᑕᓂᖅ ᐅᖃᐅᓯᕐᒥᒃ ᐅᖃᕐᓂᐊᓕᕐᐳᖓ, ᐅᖃᐅᓯᕆᔭᒃᑲᓗ ᐊᑑᑎᓂᐊᓕᕐᓗᑎᒃ. ᑭᖑᕙᕐᓂᐊᕈᓐᓃᕐᐳᖅ, ᐃᓅᑎᓪᓗᓯ ᓱᓕ, ᐊᑭᕋᕐᑐᕐᑎᐅᓪᓗᓯ ᑭᖑᕚᖑᔪᓯ, ᐅᖃᐅᓰᑦ ᐅᖃᐅᓯᕆᔭᒃᑲ ᐊᑑᑎᑎᓐᓂᐊᓕᕐᐸᒃᑲ, ᐊᑕᓂᖅ ᒎᑎ ᐅᖃᕐᐳᖅ.”

²⁶ ᓱᓕ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

²⁷ “ᐃᓅᑉ ᐃᕐᓂᖓ, ᑕᑯᒋᑦ, ᐃᓴᕆᐊᓕᐅᑉ ᑭᖑᕚᖏᑦ ᐅᖃᕐᐳᑦ, ‘ᑕᑯᑎᑕᐅᓃᑦ ᐊᑐᕈᒫᕐᑐᓪᓗ ᐅᖃᐅᓯᕆᔭᖏᑦ ᖃᖓᑐᖄᓗᒃ ᑭᓯᐊᓂ ᐊᑐᕈᒫᕐᐳᑦ.’

²⁸ ᑍᒤᒻᒪᑦ ᐅᖃᐅᑎᓕᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᖃᐅᓯᒃᑲ ᑭᖑᕙᕐᓂᐊᕈᓐᓃᕐᐳᑦ, ᐅᖃᐅᓰᑦ ᐅᖃᐅᓯᕆᔭᒃᑲ ᐊᑑᑎᓂᐊᓕᕐᐳᑦ, ᐊᑕᓂᖅ ᒎᑎ ᐅᖃᕐᐳᖅ.”