ᐃᓯᑭᐊᓕᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦᔨᕉᓴᓕᐅᑉ ᐊᓯᕈᕋᒃᓴᐅᓕᕐᓂᖓ 1 ᐊᓂᕐᓂᐅᑉ ᖃᖓᑦᑕᕐᑎᒃᑲᒥᖓ, ᐊᑕᓂᐅᑉ ᐃᒡᓗᖓᑕ ᐃᑎᕐᑕᕐᕕᖓᓄᐊᕐᑎᑉᐹᖓ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ. ᑕᑯᒋᓪᓗ, ᐃᑎᕐᑕᕐᕕᐅᑉ ᑖᑦᓱᒪ ᖃᓂᒋᔭᖓᓂ ᐊᖑᑎᓂᒃ 25ᓂᒃ ᑕᑯᕗᖓ; ᑕᑯᔭᒪᓗ ᐃᓚᖓᑦ ᔭ-ᐊᔭᓁᐊ ᐃᓚᒋᔭᐅᕗᖅ ᐊᔾᔪᕆᐅᑉ ᐃᕐᓂᖓ, ᐱᓚᑍᐊᓗ ᐱᓁᐊᐅᑉ ᐃᕐᓂᖓ, ᑖᒃᑯᐊᒃ ᐊᖓᔪᖅᑳᕆᔭᐅᕘᒃ ᐃᓅᖃᑎᒌᒡᔪᐊᓄᑦ. 2 ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑖᒃᑯᐊᒃ ᐱᐅᖏᑦᑐᓕᓂᕐᓂᒃ ᐋᖅᑭᒃᓱᐃᒍᑦᔨᖃᑦᑕᕐᐴᒃ ᐃᓱᒻᒥᕐᑐᐃᖃᑦᑕᕐᓗᑎᒡᓗ ᐃᒡᓗᒐᓴᒡᔪᐊᕐᒥᐅᓄᑦ ᓈᒻᒪᖏᑦᑐᓂᑦ; 3 ᐅᖃᖃᑦᑕᕐᒪᑎᒃ, ᐃᒡᓗᓕᐅᖃᑦᑕᕐᓂᒃᓴᖅ ᒫᓐᓇᒃᑯᑦ ᓇᓪᓕᐅᑎᓂᐊᓐᖏᓚᖅ; ᐃᒡᓗᒐᓴᒡᔪᐊᑦ ᐅᒃᑯᓯᒃᑐᑦ ᑍᒤᒻᒪᑕ, ᐅᕙᒍᓪᓗ ᐅᒃᑯᓯᐅᑉ ᐆᒋᖏᑎᑐᑦ ᑍᒤᑦᑑᓪᓗᑕ. 4 ᑍᒤᒻᒪᑦ ᐃᓅᑉ ᐃᕐᓂᖓ, ᓇᓪᓕᐅᑎᔪᒫᕐᑐᓂᒃ ᐅᖃᐅᑎᓕᒃᑭᑦ.” 5 ᐊᑕᓂᐅᓪᓗ ᐊᓂᕐᓂᖓᑕ ᑎᑭᑉᐹᖓ, ᐅᖃᐅᑎᓪᓗᖓᓗ, “ᐃᒫᒃ ᐅᖃᕆᑦ, ᐊᑕᓂᖅ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᑦ; ᐃᓱᒪᒋᔭᑦᓯᓐᓂᒃ ᖃᐅᔨᒪᕗᖓ. 6 ᐃᓄᐊᕐᓯᒪᓕᕋᑦᓯ ᐅᓄᕐᑐᓂᒃ ᑕᕝᕙᓂ ᐃᒡᓗᒐᓴᖕᓂ, ᐊᖅᑯᑎᓯᓗ ᑕᑕᓕᕐᐳᑦ ᑐᖁᖓᔪᓂᒃ. 7 “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓄᐊᕐᑕᕕᓂᓯ ᐃᒡᓗᒐᓴᖕᓃᑦᑐᑦ, ᑖᒃᑯᐊ ᐆᒋᒃᓴᐅᕗᑦ, ᑖᓐᓇ ᐃᒡᓗᒐᓴᒃ ᐅᒃᑯᓯᐅᓪᓗᓂ; ᐅᕙᖓᓕ ᐃᒡᓗᒐᓴᒡᔪᐊᓂᑦ ᐊᓂᑎᑦᓱᒫᕐᐸᑦᓯ. 8 ᓴᕕᒡᔪᐊᒥᒃ ᑲᑉᐱᐊᒋᔭᖃᓚᐅᕐᐳᓯ; ᑎᑭᑎᑦᓯᔪᒫᕐᐳᖓᓕ ᓴᕕᒡᔪᐊᒥᒃ ᐃᓕᑦᓯᓐᓄᑦ, ᐊᑕᓂᖅ ᒎᑎ ᐅᖃᕐᐳᖅ. 9 ᐃᒡᓗᒐᓴᒡᔪᐊᓂᑦ ᐊᓂᑎᑦᓱᒫᕐᐸᑦᓯ, ᐃᓅᖃᑎᒋᓐᖏᑕᑦᓯᓐᓄᑦ ᐂᑦᑑᑎᒋᓗᓯ, ᐃᖅᑲᕐᑐᐃᓂᕋ ᑲᔪᓯᑎᓪᓗᒍ ᐃᓕᑦᓯᓐᓄᑦ. 10 ᓴᕕᒡᔪᐊᒧᑦ ᑐᖁᑕᐅᔪᒫᕐᐳᓯ; ᐃᖅᑲᕐᑐᕈᒫᕐᐸᑦᓯ ᐃᓴᕆᐊᓕᒥᐅᑦ ᓄᓇᖓᑕ ᑭᒡᓕᖓᓂ; ᖃᐅᔨᔪᒫᕐᐳᓯᓗ ᐅᕙᖓᐅᒐᒪ ᐊᑕᓂᖅ. 11 ᐃᒡᓗᒐᓴᒡᔪᐊᓯ ᐃᓕᑦᓯᓐᓄᑦ ᐅᒃᑯᓯᐅᓂᐊᓐᖏᓚᖅ, ᐃᓕᑦᓯᓗ ᐆᒋᒃᓴᐅᖏᓐᓂᕗᓯ ᓂᕿᑎᑐᑦ; ᐃᖅᑲᕐᑐᕈᒫᕐᐸᑦᓯᓕ ᐃᓴᕆᐊᓕᒥᐅᑦ ᓄᓇᖓᑕ ᑭᒡᓕᖓᓂ. 12 ᖃᐅᔨᔪᒫᕐᐳᓯᓗ ᐅᕙᖓᐅᒐᒪ ᐊᑕᓂᖅ; ᐊᑐᕐᑕᐅᖁᔭᓐᓂᒃ ᐃᓅᓚᐅᖏᓐᓇᑦᓯ, ᐱᖁᔭᒃᑲᓗ ᒪᓕᓚᐅᕐᓇᒋᑦ, ᐃᓅᖃᑎᒌᒡᔪᐊᑦ ᖃᓂᒋᔭᑦᓯᓐᓃᑦᑐᑦ ᐱᖁᔭᖏᓐᓂᒃ ᒪᓕᖔᓕᓚᐅᕋᑦᓯ.” 13 ᑕᒪᒃᑯᓂᖓ ᐊᑐᕈᒫᕐᑐᓂᒃ ᐅᖃᓪᓚᒡᑎᓪᓗᖓ ᐱᓚᑍᐊ ᐱᓁᐊᐅᑉ ᐃᕐᓂᖓ ᑐᖁᕗᖅ. ᑕᕝᕙ ᒪᓂᖅᑲᒧᑦ ᐹᒻᒪᒃᓗᖓ ᕾᒐᓛᓕᕐᐳᖓ, ᐅᖃᕐᓗᖓ, “ᐊᑕᓃᖅ ᒎᑏᒃ! ᐃᓴᕆᐊᓕᒥᐅᓕᒫᑦ ᐊᒥᐊᒃᑯᖏᑦ ᓄᖑᓐᓂᐊᓕᕐᐱᒌᑦ?” ᒎᑎᐅᑉ ᐊᖏᕈᑎᖃᕐᓂᖓ ᐊᐅᓪᓚᕈᑦᔭᐅᓯᒪᔪᓄᑦ 14 ᐊᑕᓂᐅᓪᓗ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ: 15 “ᐃᓅᑉ ᐃᕐᓂᖓ, ᖃᑕᓐᖑᑎᑎᑦ ᐊᒡᓛᑦ ᐃᓚᑎᑦ, ᐊᐅᓪᓚᕈᑦᔭᐅᓯᒪᔪᓯᒍᑦ ᐃᓚᓯ, ᐃᓴᕆᐊᓕᐅᑉ ᑭᖑᕚᓕᒫᖏᑦ, ᑖᒃᑯᐊ ᔨᕉᓴᓕᒦᑦᑐᑦ ᐅᖃᕐᓯᒪᖕᒪᑕ, ‘ᐅᖓᓯᒃᑐᒦᓗᐊᓕᕐᐳᑦ ᐊᑕᓂᕐᒥᑦ; ᓄᓇ ᑕᒪᓐᓇ ᓇᖕᒥᓂᕆᓕᕐᐸᕗᑦ.’ 16 “ᑍᒤᒻᒪᑦ ᐅᖃᕆᑦ, ‘ᐊᑕᓂᖅ ᒎᑎ ᐅᖃᕐᐳᖅ: ᐊᐅᓪᓚᕈᑦᔭᐅᑎᓯᒪᒐᓗᐊᕐᐸᒃᑲ ᐅᖓᓯᒃᑐᒧᑦ ᐃᓅᖃᑎᒌᒡᔪᐊᓄᑦ, ᓄᓇᓕᒡᔪᐊᓄᓪᓗ ᓯᐊᒻᒪᕐᑎᓯᒪᓪᓗᒋᑦ, ᓱᓕᓕ ᐃᑦᔪᕐᓁᑦᑐᖁᑎᒋᔭᐅᕗᖓ ᑖᒃᑯᓄᖓ ᓄᓇᓕᒡᔪᐊᓂ ᐂᕕᒋᓯᒪᔭᖏᓐᓃᒐᓗᐊᕐᑎᓪᓗᒋᑦ.’ 17 “ᑍᒤᒻᒪᑦ ᐅᖃᕆᑦ, ‘ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓄᖕᓂᑦ ᐊᐅᓪᓚᕈᑦᔭᐅᕕᒋᓯᒪᔭᑦᓯᓐᓂᑦ ᑲᑎᕐᓱᕈᒫᕐᐸᑦᓯ, ᑲᑎᓪᓗᓯ ᐊᑕᐅᓯᕐᒧᑦ ᓄᓇᓂᑦ ᓯᐊᒻᒪᕐᑎᑕᐅᕕᒋᓯᒪᔭᑦᓯᓐᓂᑦ, ᐃᓴᕆᐊᓕᐅᓪᓗ ᓄᓇᖓᓂᒃ ᑐᓂᓯᕕᒋᔪᒫᕐᐸᑦᓯ.’ 18 ᑕᕝᕗᖓᕈᑎᒃ, ᐃᑦᔪᕐᓇᕐᑐᓂᒃ ᐲᔧᔪᒫᕐᐳᑦ ᒎᑎᒧᓪᓗ ᓇᕐᕈᓇᕐᑐᓕᒫᓂᒃ. 19 ᓄᑖᒥᒃ ᐆᒻᒪᑎᑖᕐᑎᑦᓱᒫᕐᐸᒃᑲ, ᐊᓂᕐᓂᕐᒥᒡᓗ ᓄᑖᒥᒃ ᐃᓗᒻᒥᕐᑎᓪᓗᒋᑦ; ᐆᒻᒪᑎᖏᓪᓗ ᐅᔭᕋᒃᑎᑐᑦ ᓯᑎᔪᑦ ᐲᕐᓗᒋᑦ ᑎᒥᖏᓐᓂᑦ ᐆᒻᒪᑎᑖᕐᑎᑦᓱᒫᕐᐸᒃᑲ ᐊᕿᑦᑐᒥᒃ ᓈᓚᒍᓐᓇᕐᑐᒥᒃ. 20 ᑕᕝᕙ ᒪᓕᒐᒃᓴᐅᖁᔭᒃᑲ ᐊᑐᓕᕈᒫᕐᐰᑦ ᐱᓂᐊᕐᑕᐅᖁᔭᒃᑲᓗ ᓈᓚᓕᕐᓗᒋᑦ; ᑕᕝᕙ ᐃᓄᖁᑎᒋᓕᕈᒫᕐᐸᒃᑲ, ᒎᑎᒋᔭᐅᓕᕐᓗᖓᓗ ᑖᒃᑯᓄᖓ. 21 ᐅᖓᒋᔭᖃᕐᑐᓪᓕ ᐱᐅᖏᑦᑐᓂᒃ ᒎᑎᒧᓪᓗ ᓇᕐᕈᓇᕐᑐᓂᒃ, ᐊᑭᓂᐊᕈᒫᕐᐸᒃᑲ ᐱᓂᐊᕐᓂᖏᑦ ᒪᓕᒡᓗᒋᑦ. ᐊᑕᓂᖅ ᒎᑎ ᐅᖃᕐᐳᖅ.” ᒎᑎᐅᑉ ᐱᓐᓇᕐᓇᕐᓂᖓᑕ ᕿᒤᓂᖓ ᔨᕉᓴᓕᒥᒃ 22 ᓯᕈᐲᒻᓗ ᐃᓴᕈᑎᒃ ᐃᓯᕕᒻᒪᒋᑦ, ᐊᒃᓴᓗᐊᑦ ᓴᓂᐊᓃᑉᐳᑦ; ᐃᓴᕆᐊᓕᐅᓪᓗ ᒎᑎᖓᑦᑕ ᐱᓐᓇᕐᓇᕐᓂᖓ ᖁᓚᖏᐅᑎᕗᖅ. 23 ᐊᑕᓂᐅᓪᓗ ᐱᓐᓇᕐᓇᕐᓂᖓ ᖁᒻᒧᐊᒃᐳᖅ ᐃᒡᓗᒐᓴᖕᓂᑦ, ᖃᖅᑲᒦᓕᕐᓗᓂᓗ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥ. 24 ᐊᓂᕐᓂᐅᓪᓗ ᖃᖓᑦᑕᕐᑎᓪᓗᓂᖓ ᑕᑯᑎᑕᐅᓂᒃᑯᑦ ᐂᑎᑉᐹᖓ ᒎᑎᐅᑉ ᐊᓂᕐᓂᖓᒍᑦ ᑲᐅᓪᑎᐊᒧᑦ ᐊᐅᓪᓚᕈᑦᔭᐅᓯᒪᔪᓄᑦ. ᑕᕝᕙ ᑕᑯᑎᑕᐅᓂᕋ ᐅᕙᓐᓂᑦ ᕿᒪᕉᑎᕗᖅ. 25 ᐊᐅᓪᓚᕈᑦᔭᐅᓯᒪᔪᓪᓗ ᐅᖃᐅᑎᕙᒃᑲ ᑕᒤᓐᓂᒃ ᐊᑕᓂᐅᑉ ᐅᕙᓐᓄᑦ ᑕᑯᑎᑦᓯᑦᔪᑎᒋᔭᖏᓐᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society