ᐃᓯᑭᐊᓕᐅᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐱᓐᓇᕐᓇᕐᓂᖓᑕ ᑐᒃᓯᐊᕐᕕᒡᔪᐊᕐᒥᒃ ᕿᒤᓂᖓ

¹ ᑕᑯᓴᕋᒪ ᑕᑯᕗᖓ, ᓯᕈᐱᒻ ᐃᓴᕈᖃᕐᑐᑦ ᖁᓛᓃᑦᑐᒥᒃ ᐃᒡᓗᕕᒐᕐᑎᑐᑦ ᐊᓂᖓᔪᒥᒃ, ᖁᓛᓂᓗ ᐃᒃᓯᕙᐅᑕᕐᔪᐊᖑᔮᕐᑐᖅ ᑕᐅᑦᑐᖃᕐᐳᖅ ᓴᐰᕆᑎᑐᑦ ᐱᐅᓂᕐᐹᑎᑐᑦ.

² ᑕᕝᕙ ᐅᖃᕐᐳᖅ ᐊᖑᒻᒧᑦ ᖃᓪᓗᓈᕐᑕᓂᒃ ᓵᑦᑐᓂᒃ ᐊᓐᓄᕌᕐᓯᒪᔪᒧᑦ, “ᐊᒃᓴᓗᐊᑦ ᑬᕙᑦᑐᑦ ᐊᑯᓐᓂᖓᓄᐊᕐᓗᑎᑦ ᓯᕈᐱᒻ ᐊᑖᓃᑦᑐᓄᑦ; ᕿᔪᒃᓴᓂᒃ ᐃᑯᒪᔪᓂᒃ ᑎᒍᓯᒋᑦ ᓯᕈᐱᒻ ᐊᑯᓐᓂᖓᓂᑦ, ᑖᒃᑯᐊᓗ ᑲᑕᒑᑎᓪᓗᒋᑦ ᐃᒡᓗᒐᓴᖕᓄᑦ.” ᑕᑯᓐᓇᕐᑎᓪᓗᖓᓗ ᑕᕝᕗᖓ ᐃᑎᕐᐳᖅ.

³ ᓯᕈᐱᒻᓗ ᑐᒃᓯᐊᕐᕕᒡᔪᐊᑉ ᐅᓪᓗᓪᓗᐊᖃᕐᕕᖓᑕ ᓇᓛᓂ ᓇᖏᕐᐳᑦ, ᐊᖑᑦ ᐃᑎᕐᑎᓪᓗᒍ; ᓄᕗᔭᒧᓪᓗ ᑕᑕᐅᕗᖅ ᑐᒃᓯᐊᕐᕕᒡᔪᐊᑉ ᑐᕐᓲᖓ ᐃᓗᓪᓕᖅ.

⁴ ᐊᑕᓂᐅᓪᓗ ᐱᓐᓇᕐᓇᕐᓂᖓ ᓯᕈᐱᒻᓂᑦ ᖁᒻᒧᐊᒃᐳᖅ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓄᐊᕐᓗᓂ; ᓄᕗᔭᐅᓪᓗ ᑐᒃᓯᐊᕐᕕᒡᔪᐊᖅ ᑕᑕᑉᐹ, ᐊᓃᕐᕕᖓᓗ ᖃᐅᒪᓂᕐᔪᐊᒧᑦ ᑕᑕᐅᕗᖅ ᐊᑕᓂᐅᑉ ᐱᓐᓇᕐᓇᕐᓂᖓᓄᑦ.

⁵ ᓯᕈᐱᒻᓗ ᐃᓴᕈᕐᓱᕐᓂᖏᑦ ᑐᓴᕐᓴᐅᕗᑦ ᑐᒃᓯᐊᕐᕕᒡᔪᐊᑉ ᓯᓚᑖᓄᑦ ᑎᑭᓪᓗᒍ, ᒎᑎᐅᑉ ᐊᔪᒐᖃᖏᑦᑑᑉ ᐅᖃᓪᓚᖕᓂᖓᑕ ᓂᐱᕐᔪᐊᖓᑐᑦ.

⁶ ᐊᖑᓪᓗ ᖃᓪᓗᓈᕐᑕᓂᒃ ᓵᑦᑐᓂᒃ ᐊᓐᓄᕌᓕᒃ ᑎᓕᕚ, “ᐂᒃᓯᓚᐅᕆᑦ ᐃᑯᒪᔪᒥᒃ ᐊᒃᓴᓗᐊᑦ ᐅᐃᑦᔮᕐᑐᑦ ᐊᑯᓐᓂᖏᓐᓂᑦ, ᓯᕈᐱᒻ ᐊᑯᓐᓂᖓᓃᑦᑐᓂᒃ,” ᐃᑎᕋᒥ ᐊᒃᓴᓗᐊᑦ ᓴᓂᐊᓂ ᓂᑯᕕᖓᓕᕐᐳᖅ.

⁷ ᓯᕈᐱᒻᓗ ᐃᓚᖓᑦ ᐃᑯᐊᓚᔪᒥᒃ ᑎᒍᓯᓪᓗᓂ ᐊᑯᓐᓂᕐᒥᓃᑦᑐᒥᑦ, ᑎᒍᔭᓂᓗ ᕿᔪᒃᓮᑦ ᐃᑯᒪᔪᑦ, ᐊᖑᒻᒧᑦ ᖃᓪᓗᓈᕐᑕᓂᒃ ᓵᑦᑐᓂᒃ ᐊᑐᕐᑐᒧᑦ ᑐᓂᕔᑦ, ᑖᑦᓱᒪᓗ ᑎᒍᒐᒥᒋᑦ ᑕᕝᕙᓐᖓᑦ ᐊᓂᕗᖅ.

⁸ ᓯᕈᐱᒻᓗ ᑖᒃᑯᐊ ᐃᓅᑉ ᐊᒡᒐᒋᔮᕐᑕᖏᓐᓂᒃ ᐃᓴᕈᕐᒥ ᐊᑖᒍᑦ ᐊᒡᒐᖃᕐᐳᑦ.

⁹ ᑕᑯᓴᕋᒪᓗ, ᑕᑯᒋᑦ, ᐊᒃᓴᓗᐊᓂᒃ ᓯᑕᒪᓂᒃ ᓯᕈᐱᒻ ᓴᓂᒥᐅᑕᕆᔭᖏᓐᓂᒃ ᑕᑯᕗᖓ, ᓯᕈᐱᒻ ᐊᑐᓂᑦ ᓴᓂᒥᐅᑕᕆᔭᖏᓐᓂᒃ; ᐊᒃᓴᓗᐊᓪᓗ ᑕᐅᑦᑐᖏᑦ ᕿᓪᓕᕐᐳᑦ ᐅᔭᕋᒃᑎᑐᑦ ᑯᕆᓱᓔᑎᑐᑦ.

¹⁰ ᑖᒃᑯᐊ ᐊᒃᓴᓗᐊᑦ ᑕᐅᑦᑐᖃᕐᐳᑦ ᓯᑕᒪᑦ ᐊᑦᔨᒌᓂᒃ, ᐊᒃᓴᓗᐊᑦ ᐃᓗᐊᒍᑦ ᐊᒃᓴᓗᐊᖃᒃᑲᓐᓂᕐᑑᔮᕐᓗᑎᒃ.

¹¹ ᑖᒃᑯᐊ ᐊᐅᓚᑦᔭᒑᖓᑕ ᓇᒧᑐᐃᓐᓇᖅ ᐊᒃᓴᓗᐊᑦ ᓵᖓᔭᒥᓄᑦ ᐃᖏᕐᕋᔪᓐᓇᕐᐳᑦ ᓴᖑᔭᕆᐊᖃᖏᓪᓗᑎᒃ, ᓯᕗᓪᓕᕐᐹᑦ ᓵᓐᖓᔭᒥᖕᓄᑦ ᐃᖏᕐᕋᓯᑐᐊᕌᖓᑕ ᐊᓯᖏᑦ ᒪᓕᒡᓴᖃᑦᑕᕐᐳᑦ ᓴᖑᔭᕆᐊᖃᕋᑎᒃ.

¹² ᑎᒥᖏᑦ ᑐᓄᖏᓪᓗ, ᐊᒡᒐᖏᓪᓗ, ᐃᓴᕈᖏᓪᓗ, ᐊᒃᓴᓗᐊᓪᓗ ᐃᔨᓂᒃ ᓈᓯᒪᕗᑦ, ᑖᒃᑯᐊ ᓯᑕᒪᑦ ᐊᒃᓴᓗᐊᖁᑎᖏᑦ.

¹³ ᑖᒃᑯᐊ ᐊᒃᓴᓗᐊᑦ, ᑐᓵᑎᓪᓗᖓ ᐅᖃᐅᓯᐅᕗᑦ, “ᐊᒃᓴᓗᐊᑦ ᑬᕙᑦᑐᑦ.”

¹⁴ ᑖᒃᑯᐊ ᓯᑕᒪᓂᒃ ᐊᑐᓂᑦ ᑮᓇᖃᕐᐳᑦ: ᓯᕗᓪᓕᕐᐹᖅ ᑮᓇᖓ ᑕᐅᑦᑐᖃᕐᐳᖅ ᓯᕈᐱᐅᑉ ᑮᓇᖓᓂᒃ, ᑮᓇᖓᑕ ᐂᑉᐸᖓ ᐃᓅᑉ ᑮᓇᖓᓂᒃ, ᐱᖓᔪᖓᑦ ᓛᔭᒥᒃ, ᓯᑕᒪᖓᑦ ᓇᒃᑐᕋᓕᖕᒥᒃ.

¹⁵ ᑖᓐᓇᓗ ᓯᕈᐱᒻ ᖃᖓᑦᑕᕐᐳᖅ. ᑖᒃᑯᐊ ᐆᒪᔪᑦ ᓯᕗᓪᓕᕐᒥᒃ ᑕᑯᑎᑕᐅᓪᓗᖓ ᑕᑯᓚᐅᕐᒥᔭᒃᑲ ᑰᑉ ᓰᐸᕆᐅᑉ ᓴᓂᐊᓂ.

¹⁶ ᓯᕈᐱᒻ ᐊᐅᓪᓚᑦᔭᒑᖓᑕ, ᐊᒃᓴᓗᐊᑦ ᑍᒫᓪᓗᐊᖅ ᐊᐅᓚᑦᔭᒃᐸᒃᑭᕗᑦ ᓴᓂᐊᓂ; ᓯᕈᐲᓪᓗ ᑎᖏᔭᕌᖓᑕ ᓄᓇᒥᑦ, ᐊᒃᓴᓗᐊᑦᑕᐅᖅ ᓴᓂᐊᓃᑦᑐᑦ ᓴᖑᓇᑎᒃ ᕿᒪᒃᑕᐅᕙᓐᖏᓚᑦ.

¹⁷ ᑖᒃᑯᐊ ᓄᖅᑲᕌᖓᑕ ᐊᒃᓴᓗᐊᑦᑕᐅᖅ ᓄᖅᑲᕐᐸᒃᑭᕗᑦ, ᖃᖓᑦᑕᕌᖓᑕᓗ ᐊᒃᓴᓗᐊᑦ ᒪᓕᒃᐸᒃᓗᑎᒃ; ᐊᒃᓴᓗᐊᑦ ᐆᒪᔪᐊᓘᑉ ᐊᓂᕐᓂᖓᑕ ᓇᔪᕐᒪᒋᑦ.

¹⁸ ᐊᑕᓂᐅᑉ ᐱᓐᓇᕐᓇᕐᓂᖓ ᑐᒃᓯᐊᕐᕕᒡᔪᐊᑉ ᐃᑎᕐᕕᖓᓂᑦ ᓅᒃᑲᒥ, ᓯᕈᐱᒻ ᖁᓛᓄᑦ ᓄᖅᑲᕐᐳᖅ.

¹⁹ ᓱᓕ ᑕᑯᓐᓇᕐᑎᓪᓗᖓ ᑖᒃᑯᓂᖓ ᓯᕈᐱᒻ ᑎᖏᕗᑦ ᓄᓇᒥᑦ, ᐊᒃᓴᓗᐊᓪᓗ ᓴᓂᐊᓃᓪᓗᑎᒃ; ᑐᒃᓯᐊᕐᕕᒡᔪᐊᓪᓗ ᐃᑎᕐᑕᕐᕕᖓᓄᑦ ᓄᖅᑲᕐᐳᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒧᑦ; ᐃᓴᕆᐊᓕᒥᐅᓪᓗ ᒎᑎᓐᖓᑦᑕ ᐱᓐᓇᕐᓇᕐᓂᖓᑕ ᖁᓚᖏᐊᕐᐰᑦ.

²⁰ ᑖᒃᑯᐊ ᐆᒪᔪᑦ ᑕᑯᓚᐅᕐᑕᒃᑲ ᐃᓴᕆᐊᓕᐅᑉ ᒎᑎᓐᖓᑕ ᓵᖓᓂ ᑰᑉ ᓰᐸᕆᐅᑉ ᓴᓂᐊᓂ; ᖃᐅᔨᕗᖓᓗ ᑖᒃᑯᐊᖑᖕᒪᑕ ᓯᕈᐱᒻ.

²¹ ᐊᑐᓂᑦ ᑮᓇᖃᕐᒪᑕ ᓯᑕᒤᓂᒃ, ᐃᓴᕈᖃᕐᓗᑎᒡᓗ ᐊᑐᓂᑦ ᓯᑕᒤᓂᒃ, ᐊᒡᒐᖃᕐᓗᑎᒡᓗ ᐃᓅᑉ ᐊᒡᒐᒋᔮᕐᑕᖏᓐᓂᒃ ᐃᓴᕈᖏᑕ ᐊᑎᖔᖓᑦᑎᒍᑦ.

²² ᑖᒃᑯᐊᓗ ᑮᓇᖏᑕ ᑕᐅᑦᑐᖏᑦ, ᐊᑦᔨᖃᑦᓯᐊᕆᕗᑦ ᑰᑉ ᓰᐸᕆᐅᑉ ᓴᓂᐊᓂ ᑕᑯᓚᐅᕐᑕᓐᓂᒃ. ᑐᕌᕈᒪᔭᒥᖕᓄᓪᓗ ᐃᖏᕐᕋᓯᖃᑦᑕᕐᐳᑦ ᐊᑕᐅᑦᓯᒃᑯᑦ.