ᒨᓯᓯ ᐂᑉᐸᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᐆᒪᔪᑦ ᑐᖁᕋᕐᑎᑕᐅᓂᖏᑦ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐰᕉᒧᐊᓕᕆᑦ ᐅᖃᐅᑎᓗᒍᓗ, ‘ᐊᑕᓂᖅ ᐅᑲᕐᐳᖅ ᐃᒫᒃ, ᐄᑉᕈᐃᑦ ᒎᑎᖓᑦ, ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐱᔨᑦᓯᕈᓐᓇᖁᓪᓗᒋᑦ ᐅᕙᓐᓂᒃ.

² ᓱᓕ ᐊᐅᓪᓚᖁᔨᓂᐊᖏᒃᑯᕕᑦ, ᓄᖅᑲᖓᑎᑦᓯᓇᓱᐊᕐᓂᐊᕈᕕᓪᓗ ᑖᒃᑯᓂᖓ,

³ ᑕᑯᒋᑦ ᐊᑕᓂᐅᑉ ᐊᒡᒐᖏᑕ ᐆᒪᔪᖁᑎᑎᑦ ᐋᓐᓂᐊᓇᕐᑐᒧᑦ ᐱᐅᖏᑦᑐᐊᓗᖕᒧᑦ ᑎᑭᑕᐅᑎᓐᓂᐊᕐᐰᑦ ᐃᒻᒧᒃᓯᐅᒐᖁᑎᑎᑦ ᐱᕈᕐᓰᕕᖕᒦᑦᑐᑦ, ᕿᒻᒥᕐᔪᐊᓪᓗ, ᓯᐅᑎᖅᑯᕐᑐᔪᓪᓗ, ᑳᒥᓖᓪᓗ, ᓰᐲᓪᓗ, ᒎᑦᓰᓪᓗ.

⁴ ᑭᓯᐊᓂᓕ ᐊᑕᓂᖅ ᐊᑦᔨᒌᖏᑦᑐᓂᒃ ᐱᓇᓱᐊᕐᓂᐊᕐᐳᖅ ᐄᑦᔨᑉᑎᒥᐅᑦ ᐃᒻᒧᒃᓯᐅᒐᖁᑎᖏᓐᓄᑦ, ᐃᓴᕆᐊᓕᒥᐅᓪᓗ ᐃᒻᒧᒃᓯᐅᒐᖁᑎᖏᓐᓄᑦ, ᐃᓴᕆᐊᓕᒥᐅᑦ ᐆᒪᔪᖁᑎᓕᒫᑦᓯᐊᖏᑦ ᑐᖁᔪᖃᕐᓂᐊᖏᒻᒪᑕ.

⁵ ᐊᑕᓂᕐᓗ ᐱᒋᐊᕐᕕᒃᓴᒥᒃ ᐋᖅᑭᒃᓯᓯᒪᕗᖅ, ᖃᐅᒃᐸᑦ ᐊᑕᓂᖅ ᑕᒪᑐᒥᖓ ᐱᒋᐊᕐᓂᐊᕐᐳᖅ ᑕᕝᕙᓂ ᓄᓇᒥ.’”

⁶ ᖃᐅᑎᓪᓗᒍᓗ ᐊᑕᓂᖅ ᑕᒪᑐᒥᖓ ᐱᓇᓱᐊᓕᓚᐅᕐᐳᖅ; ᐄᑦᔨᑉᑎᒥᐅᓪᓗ ᐆᒪᔪᖁᑎᓕᒫᖏᑦ ᑐᖁᕋᕐᐳᑦ, ᐃᓴᕆᐊᓕᒥᐅᓪᓕ ᐆᒪᔪᖁᑎᖏᓐᓂᒃ ᐊᑕᓯᐅᕐᒥᒡᓘᓐᓃᑦ ᑐᖁᔪᖃᓚᐅᓐᖏᓚᖅ.

⁷ ᐰᕉᓗ ᑕᑯᔭᕐᑐᖁᔨᕗᖅ ᐃᓴᕆᐊᓕᒥᐅᑦ ᐆᒪᔪᖁᑎᖏᓐᓂᒃ, ᑕᑯᒋᓪᓗ ᐃᓴᕆᐊᓕᒥᐅᑦ ᐆᒪᔪᖁᑎᖏᓐᓂᒃ ᐊᑕᐅᓯᕐᒥᒡᓘᓐᓃᑦ ᑐᖁᔪᖃᓚᐅᓐᖏᓚᖅ. ᑭᓯᐊᓂᓕ ᓱᓕ ᐰᕉᑉ ᐆᒻᒪᑎᖓ ᓯᑎᔫᓚᐅᕐᐳᖅ, ᐃᓄᐃᓪᓗ ᐊᐅᓪᓚᖁᓚᐅᓐᖏᓔᑦ.

ᐊᔪᐊᕐᓂᖅ

⁸ ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, “ᐊᒡᒐᓯ ᑕᑕᓪᓗᒋᑦ ᑎᒍᓯᓕᕆᑦᓯ ᑭᐊᒃᓴᐅᑎᐅᑉ ᐊᕐᔭᓕᓂᖓᓂᒃ, ᒨᓯᓯᐅᓪᓗ ᖁᒻᒧᑦ ᐃᒋᓐᓂᐊᕐᐹ ᐰᕉᑉ ᓇᓛᓄᑦ ᓵᖓᓗᓂ.

⁹ ᐄᑦᔨᑉᑎᐅᓪᓗ ᓄᓇᖓᓄᑦ ᑕᕝᕙ ᓯᐊᒻᒪᕐᑎᑕᐅᓂᐊᕐᐳᖅ ᐳᔪᕋᑐᐃᓐᓇᕐᑎᑐᑦ, ᓴᖅᑭᓕᕐᓗᑎᒡᓗ ᐊᔪᐊᖑᓗᑎᒃ ᐋᓐᓂᐊᕐᑎᑦᓯᓗᑎᒡᓗ ᐃᓄᖕᓂᑦ ᐆᒪᔪᓂᒡᓗ ᐄᑦᔨᑉᑎᐅᑉ ᓄᓇᓕᒫᖓᓂ.”

¹⁰ ᑕᕝᕙ ᑭᐊᒃᓴᐅᑎᒥᑦ ᐊᕐᔭᓕᓂᕐᓂᒃ ᑎᒍᓯᕘᒃ, ᐰᕉᒧᓪᓗ ᐅᐸᒍᑎᓪᓗᑎᒃ, ᒨᓯᓯᐅᓪᓗ ᖁᒻᒧᑦ ᐰᕉᑉ ᖁᓛᓄᑦ ᐃᒋᑉᐹ, ᐊᔪᐊᓐᖑᕐᓗᑎᒡᓗ ᐋᓐᓂᐊᓇᕐᓗᑎᒃ ᓴᖅᑭᓕᕐᐳᑦ ᐃᓄᖕᓂ ᐆᒪᔪᓂᓗ.

¹¹ ᐊᖓᒃᑯᐃᓪᓗ ᑕᕝᕙᓂ ᓇᖏᕈᓐᓁᓪᓕᓚᐅᕐᐳᑦ ᒨᓯᓯᐅᑉ ᓵᖓᓂ ᑕᒪᒃᑯᐊ ᐊᔪᐊᑦ ᐱᑦᔪᑎᒋᓪᓗᒋᑦ, ᑕᒪᒃᑯᐊ ᐊᔪᐊᑦ ᐊᖕᒪᕐᑎᓚᐅᕐᒪᑕ ᐊᖓᒃᑯᓂ ᐃᓄᓕᒫᓂᓗ ᐄᑦᔨᑉᑎᒥᐅᓂ.

¹² ᐊᑕᓂᐅᓪᓕ ᓱᓕ ᐰᕉᑉ ᐆᒻᒪᑎᖓ ᓯᑎᔫᑎᓚᐅᕐᐹ, ᑖᒃᑯᓂᖓᓗ ᓈᓚᓚᐅᓐᖏᓚᖅ; ᓲᕐᓗ ᐊᑕᓂᐅᑉ ᑍᒤᓐᓂᐊᕐᓂᕋᓚᐅᕐᒪᒍ ᒨᓯᓯᒧᑦ ᐅᖃᐅᓯᕆᓪᓗᓂᐅᒃ.

ᓇᑕᖅᑯᕐᓁᑦ

¹³ ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᖃᐅᒃᐸᑦ ᐅᓪᓛᕌᕐᔪᒃᑯᑦ ᒪᑭᓪᓗᑎᑦ ᐰᕉ ᐅᐸᓛᕐᐸᑦ, ᐅᖃᐅᑎᓗᒍᓗ; ᐊᑕᓂᖅ ᐄᑉᕈᐃᑦ ᒎᑎᖓᑦ ᐃᒫᒃ ᐅᖃᕐᐳᖅ, ‘ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ ᐅᕙᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᒋᑦ.

¹⁴ ᑕᒪᑐᒪᓂᓕ ᓱᓕ ᐱᖁᔨᓂᐊᖏᒃᑯᕕᑦ ᑕᕝᕙ ᐱᔨᑎᑦ ᐃᓄᖁᑎᑎᓪᓗ ᓱᒋᐊᕐᑕᑐᐊᕆᓂᐊᕈᓐᓃᕐᐸᒃᑲ ᐃᕝᕕᓪᓕ ᓱᒋᐊᖃᓯᐅᑎᓂᐊᓕᕐᐸᒋᑦ, ᖃᐅᔨᓕᖁᓪᓗᑎᑦ ᐅᕙᑦᑐᑦ ᑍᒤᑦᑐᒥᒃ ᐱᑕᖃᖏᓐᓂᖓᓂᒃ ᓄᓇᕐᔪᐊᓕᒫᒥ.

¹⁵ ᒫᓐᓇᒧᑦ ᑎᑭᓪᓗᒍ ᓱᒋᐊᕋᓱᐊᕋᔭᓚᐅᕈᒃᑭᑦ ᐃᓄᖁᑎᑎᓪᓗ ᐋᓐᓂᐊᓇᕐᑐᒧᑦ, ᑕᕝᕙ ᒫᓐᓇ ᑕᒫᓐᖓᑦ ᓄᓇᒥᑦ ᐲᕐᑕᐅᓯᒪᔪᑐᖃᐅᓕᕋᔭᕐᐳᑎᑦ;

¹⁶ ᑭᓯᐊᓂᓕ ᑕᒪᓐᓇ ᐱᑦᔪᑎᒋᓪᓗᒍ ᐃᓅᑎᓚᕿᓯᒪᕙᒋᑦ, ᖃᐅᔨᖁᓪᓗᑎᑦ ᐱᔪᓐᓇᕐᓂᓐᓂᒃ ᓂᕐᑐᕐᓇᕐᓂᕋᓗ ᓄᓇᕐᔪᐊᓕᒫᒥ ᐅᖃᐅᓯᐅᓕᖁᓪᓗᒍ.

¹⁷ ᑭᓯᐊᓂᓕ ᓱᓕ ᑐᓴᕈᓐᓇᓐᖏᓚᑎᑦ ᐃᓄᖁᑎᒃᑲᓗ ᓱᓇᐅᒋᓇᒋᑦ ᐊᐅᓪᓚᖁᓐᖏᓚᑎᑦ.

¹⁸ ᑕᑯᒋᑦ, ᖃᐅᒃᐸᑦ ᒫᓐᓇᑐᑦ ᑍᒤᓪᓗᐊᓕᕐᑎᓪᓗᒍ ᓇᑕᖅᑯᕐᓇᕐᓂᒃ ᐊᖏᔫᑎᐊᓗᖕᓂᒃ ᑲᑕᒐᕐᑎᑦᓯᓂᐊᕐᐳᖓ, ᑕᒪᑐᒪᓗ ᓯᕗᓂᖓᒍᑦ ᑍᒤᑦᑐᖃᓚᐅᕐᓯᒪᓐᖏᓚᖅ ᑕᒫᓂ ᐄᑦᔨᑉᑎᒥ ᒫᓐᓇᒧᑦ ᑎᑭᓪᓗᒍ.

¹⁹ ᑍᒤᒻᒪᑦ ᒫᓐᓇ ᑎᓕᓯᓕᕆᑦ, ᐆᒪᔪᑯᑎᓕᒫᑎᑦ ᐱᖁᑎᓕᒫᑎᓪᓗ ᐱᕈᕐᓰᕕᖕᒦᑦᑐᑦ ᐊᑦᑕᕐᓇᖏᑦᑐᒧᑦ ᐃᒡᓗᒧᐊᕐᑎᑕᒃᓴᕆᕙᑎᑦ; ᓇᑕᖅᑯᕐᓇᕐᓂᐊᕐᒪᑦ ᐃᓄᐃᓪᓗ ᐆᒪᔪᓪᓗ ᖃᓄᐃᑦᑐᑐᐃᓐᓁᑦ ᐱᕈᕐᓰᕕᖕᒦᑦᑐᑦ ᐊᑦᑕᕐᓇᖏᑦᑐᒧᐊᕈᑦᔭᐅᓐᖏᑐᐊᕐᐸᑕ, ᓇᑕᖅᑯᕐᓇᕐᓄᑦ ᑐᖁᑕᐅᓂᐊᕐᐳᑦ.’”

²⁰ ᑕᕝᕙ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᓯᕘᕋᓕᕐᑐᑦ ᐰᕉᑉ ᐱᔨᖏᑕ ᐃᓚᖏᑦ ᐆᒪᔪᖁᑎᒥᖕᓂᒃ ᓯᐊᓛᒥᖕᓂᒡᓗ ᐃᒡᓗᒧᑦ ᕿᒫᑎᑦᓯᕗᑦ;

²¹ ᐊᓯᖏᓪᓕ ᐊᑕᓂᐅᑉ ᐅᖃᐅᓯᕆᔭᖏᓐᓂᒃ ᐃᒃᐱᒍᓱᖏᑦᑐᑦ ᐆᒪᔪᖁᑎᒥᖕᓂᒃ ᓯᐊᓛᒥᖕᓂᒡᓗ ᐱᕈᕐᓰᕕᖕᒦᑐᐃᓐᓇᕐᑎᑦᓯᓚᐅᕐᐳᑦ.

²² ᐊᑕᓂᖅ ᑕᕝᕙ ᒨᓯᓯᒧᑦ ᐅᖃᕐᐳᖅ, “ᑕᓖᑦ ᕿᓚᖕᒧᑦ ᐃᓵᓚᐅᕈᒃ, ᓇᑕᖅᑯᕐᓇᓕᖁᓪᓗᒍ ᐄᑦᔨᑉᑎᐅᑉ ᓄᓇᓕᒫᖓᓂ, ᐃᓄᖕᓄᑦ ᐆᒪᔪᓄᓪᓗ ᐱᕈᕐᓰᕕᖕᓄᓪᓗ.”

²³ ᑕᕝᕙ ᒨᓯᓯᐅᑉ ᐊᔭᐅᑉᐱᐊᖅ ᕿᓚᖕᒧᑦ ᐃᓴᐅᑎᕚ; ᐊᑕᓂᕐᓗ ᖃᐅᒻᒪᓪᓚᖕᒥᒃ ᓇᑕᖅᑯᕐᓇᓂᒡᓗ ᑎᑭᑎᑦᓯᕗᖅ, ᐃᑯᒤᓪᓗ ᓄᓇᒧᑦ ᑲᑕᒐᓕᕐᐳᑦ. ᐊᑕᓂᕐᓗ ᐄᑦᔨᑉᑎᐅᑉ ᓄᓇᖓᓄᑦ ᓇᑕᖅᑯᕐᓇᕐᓂᒃ ᑲᑕᒐᓕᕐᑎᑦᓯᕗᖅ;

²⁴ ᑕᕝᕙ ᓇᑕᖅᑯᕐᓇᓕᕐᐳᖅ, ᐃᑯᒪᓂᒃ ᐊᑯᓕᖃᕐᑐᑦ ᑲᑕᒐᓕᕐᐳᑦ ᓇᑕᖅᑯᕐᓁᑦ, ᓇᑕᖅᑯᕐᓁᓪᓗ ᐅᖁᒤᑦᑐᕐᔪᐊᖑᕗᑦ, ᑕᒪᑐᒪᓗ ᓯᕗᓂᖓᒍᑦ ᑍᒤᑦᑐᖃᓚᐅᕐᓯᒪᓐᖏᓚᖅ ᓄᓇᒥ ᐄᑦᔨᑉᑎᒥ ᑍᒪᓐᖓᑦ ᐃᓄᖃᓕᓚᐅᕐᓂᖓᓂᑦ.

²⁵ ᓇᑕᖅᑯᕐᓁᓪᓗ ᑲᑕᒡᕕᖃᕐᐳᑦ ᐱᕈᕐᓰᕕᖕᒦᑦᑐᓂᒃ ᐄᑦᔨᑉᑎᐅᑉ ᓄᓇᓕᒫᖓᓂ, ᐃᓄᖕᓄᑦ ᐆᒪᔪᓄᓪᓗ; ᐱᕈᕐᑐᓕᒫᓪᓗ ᓱᕋᒃᑎᕐᑕᐅᕗᑦ ᐱᕈᕐᓰᕕᖕᒦᑦᑐᑦ, ᓇᐹᕐᑐᓕᒫᓪᓗ ᓇᑲᑎᕐᑕᐅᓪᓗᑎᒃ ᐱᕈᕐᓰᕕᖕᒦᑦᑐᑦ.

²⁶ ᑭᓯᐊᓂᓕ ᓄᓇᖃᕐᑐᑦ ᒎᓯᓂᒥ ᐃᓴᕆᐊᓕᒥᐅᑦ ᐃᓄᖏᑦ, ᑖᒃᑯᐊ ᓇᑕᖅᑯᕐᓇᕐᕕᐅᓚᐅᓐᖏᓚᑦ.

²⁷ ᑕᕝᕙ ᐰᕉ ᑎᓕᓯᓕᕐᐳᖅ ᒨᓯᓯᒃᑯᒃ ᐂᕉᓂᒃᑯᒃ ᕾᖁᔭᐅᖁᓪᓗᒋᒃ, ᐅᖃᐅᑎᓪᓗᒋᒡᓗ, “ᒫᓐᓇ ᖃᐅᔨᕗᖓ ᐊᔪᕐᑐᓕᓯᒪᒐᒪ; ᐊᑕᓂᕐᓕ ᓈᒻᒪᓈᕐᐳᖅ, ᐅᕙᖓᓕ ᐃᓄᖁᑎᒃᑲᓗ ᑕᒻᒪᕐᓯᒪᕗᒍᑦ.

²⁸ ᐊᑕᓂᕐᒧᑦ ᑐᒃᓯᐊᓚᐅᕆᑦᓯᒃ; ᑕᒪᓐᓇ ᓇᑕᖅᑯᕐᓇᕐᑐᖅ ᖃᐅᒻᒪᓪᓚᒡᓗ ᓄᖅᑲᖁᓕᕐᓗᒍ; ᑕᕝᕙ ᐊᐅᓪᓚᖁᓂᐊᓕᕐᐸᑦᓯ, ᑕᒫᓂ ᓄᓇᖃᑦᔮᔪᓐᓃᕐᐳᓯ.”

²⁹ ᒨᓯᓯᐅᑉ ᐅᖃᐅᑎᕚ, “ᑕᕝᕙᓐᖓᑦ ᐃᒡᓗᒐᓴᖕᓂᑦ ᕿᒪᕉᑎᑐᐊᕈᒪ ᑕᓕᕋ ᐃᓵᖕᓂᐊᕐᐸᕋ ᐊᑕᓂᕐᒧᑦ; ᑕᕝᕙ ᖃᐅᒻᒪᓪᓚᒃ ᓄᖅᑲᕐᓂᐊᕐᐳᖅ, ᓇᑕᖅᑯᕐᓇᕈᓐᓃᕐᓗᓂᓗ, ᖃᐅᔨᓕᖁᓪᓗᑎᑦ ᓄᓇ ᐊᑕᓂᐅᑉ ᐱᖁᑎᒋᖕᒪᒍ.

³⁰ ᖃᐅᔨᒪᕗᖓᓕ ᐃᕝᕕᑦ ᐱᔨᑎᓪᓗ, ᓱᓕ ᐊᑕᓂᖅ ᒎᑎ ᓈᓚᖏᓐᓇᑦᓯᐅᒃ.”

³¹ ᐱᕈᕐᑐᓪᓕ ᐊᓐᓄᕌᒃᓴᓕᐊᕆᔭᐅᓲᑦ ᓂᐊᖂᔭᒃᓮᓪᓗ ᓱᕋᒃᑎᕐᑕᐅᕗᑦ, ᓂᐊᖂᔭᒃᓮᑦ ᓇᑲᑎᕐᑕᐅᑐᐃᓐᓇᕆᐊᖃᓕᓚᐅᕐᒪᑕ, ᐱᕈᕐᑐᓪᓗ ᐊᓐᓄᕌᒃᓴᓕᐊᕆᔭᐅᓲᑦ ᐱᕈᕐᐸᓪᓕᐊᓇᓱᐊᓕᕐᑎᓪᓗᒋᑦ.

³² ᓂᐊᖂᔭᒃᓴᓐᖑᕐᐸᓪᓕᐊᔪᓪᓕ ᓱᕋᒃᑕᐅᓚᐅᓐᖏᓚᑦ, ᐱᕈᕐᐸᓪᓕᐊᓕᓵᕋᒥᒃ ᐱᔭᕇᕐᕕᒃᓴᖓᑦ ᓱᓕ ᓇᓪᓕᐅᑎᓯᒪᓚᐅᖏᒻᒪᑦ.

³³ ᑕᕝᕙ ᒨᓯᓯ ᐰᕉᒥᑦ ᕿᒪᕉᑎᒐᒥ ᐃᒡᓗᒐᓮᑦ ᓯᓚᑖᓄᐊᕐᐳᖅ, ᑕᓕᓂᓗ ᐃᓴᒃᐹ ᑐᒃᓯᐊᕐᓗᓂ ᐊᑕᓂᕐᒧᑦ; ᑕᕝᕙ ᖃᐅᒻᒪᓪᓚᒃ ᓄᖅᑲᕐᐳᖅ ᓇᑕᖅᑯᕐᓇᕈᓐᓃᓗᓂᓗ, ᓯᓚᓗᒍᓐᓃᕐᐳᕐᓗ ᓄᓇᒧᑦ.

³⁴ ᐰᕉᓕ ᑕᑯᒐᒥ ᓯᓚᓗᒍᓐᓃᕐᓗᓂ ᓇᑕᖅᑯᕐᓇᕈᓐᓃᕐᒪᑦ ᖃᐅᒻᒪᓪᓛᔪᓐᓃᕐᓗᓂᓗ, ᑕᕝᕙ ᐊᔪᕐᑐᓕᓕᕆᕗᖅ, ᐆᒻᒪᑎᓂᓗ ᓯᑎᔫᑎᓕᕆᕚ ᐱᔨᒋᔭᓂ ᐃᓚᒋᓪᓗᒋᑦ.

³⁵ ᑕᕝᕙ ᐰᕉᑉ ᐆᒻᒪᑎᖓ ᓯᑎᔫᓕᓚᐅᕆᕗᖅ, ᐃᓴᕆᐊᓕᒥᐅᓪᓗ ᐃᓄᖏᑦ ᐊᐅᓪᓚᖁᔪᓐᓃᓚᐅᕆᕔᑦ; ᓲᕐᓗ ᐊᑕᓂᐅᑉ ᐅᖃᐅᓯᕆᓚᐅᕐᒪᒍ ᒨᓯᓯᒃᑯᑦ.