ᒨᓯᓯ ᐂᑉᐸᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᑕᓂᕐᓕ ᒨᓯᓯᒧᑦ ᐅᖃᕐᐳᖅ, “ᒎᑎᑐᑦ ᐃᓱᒪᒋᔭᐅᓕᕐᑎᓐᓂᐊᕐᐸᒋᑦ ᐊᖓᔪᖅᑳᕐᔪᐊᕐᒧᑦ, ᐊᖓᔪᐃᓪᓗ ᐂᕉᓂ ᐅᖃᕐᑎᐅᓂᐊᕐᐳᖅ ᐊᖓᔪᖅᑳᕐᔪᐊᕐᒧᑦ ᐃᓕᖕᓄᑦ ᐅᖃᕐᑎᒋᔭᐅᔪᑐᑦ.

² ᐂᕉᓂ ᐅᖃᐅᑎᓐᓂᐊᕐᐸᑦ ᐊᑐᕐᑕᐅᖁᔭᓕᒫᓐᓂᒃ ᐃᓕᖕᓄᑦ. ᐂᕉᓂᐅᓪᓗ ᐊᖓᔪᖅᑳᕐᔪᐊᖅ ᐅᖃᐅᑎᓂᐊᕐᐸᑦ ᐊᐅᓪᓚᕐᑎᑦᓯᖁᓗᒍ ᐃᓴᕆᐊᓕᒥᐅᓂᒃ, ᓄᓇᒥᓂᑦ.

³ ᐊᖓᔪᖅᑳᕐᔪᐊᕐᓕ ᐱᔭᕐᓂᕈᓐᓁᕐᑎᓐᓂᐊᕐᐸᕋ ᐄᑦᔨᑉᑎᒥᐅᓄᑦ ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒡᓗ ᐅᓄᕐᑐᓂᒃ ᑎᑭᑎᑦᓯᓯᒪᒐᓗᐊᕐᑎᓪᓗᖓ ᓈᓚᒍᓐᓇᖁᓇᒍ ᐅᖃᐅᓯᓐᓂᒃ.

⁴ ᑕᕝᕙ ᓂᑲᒋᖏᓪᓗᒋᑦ ᐄᑦᔨᑉᑎᒥᐅᑦ ᓱᒋᐊᕐᓂᐊᕐᐸᒃᑲ ᐃᓅᖃᑎᒌᒃᑐᓪᓗ ᐃᓄᖁᑎᒃᑲ ᐃᓴᕆᐊᓕᐅᑉ ᑭᖑᕚᖏᑦ ᐊᐅᓪᓚᕐᑎᓐᓂᐊᕐᐸᒃᑲ ᓄᓇᖓᓐᓂᑦ.

⁵ ᐄᑦᔨᑉᑎᒥᐅᓪᓗ ᖃᐅᔨᓕᕐᓂᐊᕐᐳᑦ ᐊᑕᓂᐅᓂᓐᓂᒃ ᓱᒋᐊᕈᒃᑭᑦ ᐃᓴᕆᐊᓕᒥᐅᓪᓗ ᓄᓇᖓᓐᓂᑦ ᐊᐅᓪᓚᕐᑎᒃᑯᒃᑭᑦ.”

⁶ ᒨᓯᓯᒃᑯᒃ ᐂᕉᓂᒃᑯᒃ ᐊᑕᓂᐅᑉ ᐊᑐᕐᑕᐅᖁᔭᖓᓂᒃ ᐱᓇᓱᐊᓚᐅᕐᐳᒃ.

⁷ ᐊᖓᔪᖅᑳᕐᔪᐊᕐᒧᓪᓗ ᐅᖃᓕᕆᐊᕈᑎᒥᖕᓂ ᒨᓯᓯ ᐊᕐᕌᒍᖃᓕᓚᐅᕐᐳᖅ 80ᓂᒃ ᐂᕉᓂᓗ 83ᓂᒃ.

ᐂᕉᓂᐅᑉ ᐊᔭᐅᑉᐱᐊᖓ

⁸ ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ,

⁹ “ᐰᕉᒧᑦ ᐅᖃᐅᑦᔭᐅᒍᑦᓯᒃ, ‘ᓱᓕᓂᑦᓯᖕᓂᒃ ᓇᓗᓁᕐᓯᓚᐅᕆᑦᓯᒃ ᑲᒪᓇᕐᑐᓕᓂᒃᑯᑦ.’ ᑕᕝᕙ ᐂᕉᓂᒧᑦ ᐅᖃᕐᑐᒃᓴᐅᕗᑎᑦ, ‘ᐊᔭᐅᑉᐱᐊᑦ ᐃᓕᓚᐅᕈᒃ ᐰᕉᑉ ᓵᖓᓄᑦ, ᖁᒡᓗᒋᐊᓐᖑᖁᓪᓗᒍ.’”

¹⁰ ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᐊᕐᐴᒃ ᐱᓇᓱᐊᕐᓗᑎᒡᓗ ᐊᑕᓂᕐᒧᑦ ᐱᓇᓱᐊᖁᔭᐅᓂᕆᔭᒥᖕᓂᒃ; ᐂᕉᓂᐅᓪᓗ ᐊᔭᐅᑉᐱᐊᓂ ᐃᓕᖕᒪᒍ ᐰᕉᑉ ᐱᔨᖏᑕᓗ ᓵᖓᓄᑦ, ᑕᕝᕙ ᖁᒡᓗᒋᐊᓐᖑᕐᐳᖅ.

¹¹ ᑕᕝᕙ ᐰᕉ ᐃᓕᓯᒪᔪᖁᑎᒥᓂᒃ ᐊᖓᒃᑯᖁᑎᒥᓂᒡᓗ ᐄᑦᔨᑉᑎᒥᐅᓂᒃ ᕾᖁᔨᓚᐅᕐᐳᖅ; ᑖᒃᑯᐊᑦᑕᐅᖅ ᑍᒤᓕᐅᓚᐅᕆᕗᑦ.

¹² ᐊᑐᓂᓪᓗ ᐊᔭᐅᑉᐱᐊᒥᖕᓂᒃ ᐃᓕᓯᖕᒪᑕ, ᑕᒪᕐᒥᒃ ᖁᒡᓗᒋᐊᓐᖑᕐᐳᑦ. ᐂᕉᓂᐅᓪᓕ ᐊᔭᐅᑉᐱᐊᖓᑕ ᑖᒃᑯᐊ ᐊᔭᐅᑉᐱᐊᖏᑦ ᓂᕆᕔᑦ.

¹³ ᑭᓯᐊᓂᓕ ᐰᕉᑉ ᐃᓱᒪᖓ ᓱᓕ ᓯᑎᔫᓚᐅᕐᐳᖅ, ᑖᒃᑯᓂᖓᓗ ᓈᓚᒐᓂ; ᓲᕐᓗ ᐊᑕᓂᐅᑉ ᑍᒤᓐᓂᐊᕐᓂᕋᓚᐅᕐᒪᒍ.

ᐄᑦᔨᑉᑎᒥᐅᑦ ᐊᓯᕈᕐᑕᐅᕙᓪᓕᐊᓯᒋᐊᕐᓂᖓ ᐊᐅᒃ

¹⁴ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᐰᕉᑉ ᐆᒻᒪᑎᖓ ᓯᑎᔫᑎᑕᐅᖕᒪᑦ, ᐃᓄᖕᓂᒃ ᐊᐅᓪᓚᖁᔨᓐᖏᓚᖅ.

¹⁵ ᑍᒤᒻᒪᑦ ᐅᓪᓛᒃᑯᑦ ᐰᕉ ᐅᐸᓛᕐᐸᑦ, ᑰᖕᒧᑦ ᐃᒪᕐᒧᐊᓕᕐᐸᑦ; ᑰᑉ ᑭᒡᓕᖓᓂ ᐃᒃᐱᐅᒐᕐᒥ ᐅᑕᖅᑭᓂᐊᕐᐸᑦ, ᐊᔭᐅᑉᐱᐊᖅ ᖁᒡᓗᒋᐊᓐᖑᓚᐅᕐᑐᖅ ᓇᒃᓴᕐᓗᒍ.

¹⁶ ᑖᑦᓱᒧᖓᓗ ᐅᖃᕐᑐᒃᓴᐅᕗᑎᑦ, ‘ᐊᑕᓂᐅᑉ ᐄᑉᐳᕈᐃᒃᑯᑦ ᒎᑎᖓᑦᑕ, ᑖᑦᓱᒪ ᐃᓕᖕᓄᑦ ᑎᓕᕚᖓ, ᐅᖃᕆᐊᕐᑐᖁᓪᓗᖓ, “ᐃᓄᖁᑎᒃᑲ ᐊᐅᓪᓚᕈᓐᓇᕐᑎᓚᐅᒃᑭᑦ, ᐃᓄᖃᖏᑦᑐᒥ ᐅᕙᓐᓂᒃ ᑐᒃᓯᐊᕐᕕᖃᕈᓐᓇᖁᓪᓗᒋᑦ; ᑭᓯᐊᓂᓕ ᓱᓕ ᑕᒪᑐᒥᖓ ᓈᓚᓚᐅᓐᖏᓚᑎᑦ.”

¹⁷ ᐊᑕᓂᖅ ᐅᖃᕐᐳᖅ, “ᐱᓇᓱᐊᕐᓂᕆᓂᐊᕐᑕᓐᓄᑦ ᑐᑭᓯᑎᑕᐅᓂᐊᕐᐳᑎᑦ ᐅᕙᖓ ᐊᑕᓂᐅᓂᓐᓂᒃ: ᑕᑯᒋᑦ ᑰᒃ ᐊᓇᐅᓂᐊᕐᐸᕋ ᐊᔭᐅᑉᐱᐊᓐᓄᑦ ᑎᒍᒥᐊᕐᑕᓐᓄᑦ, ᐃᒪᕐᓗ ᑕᕝᕙ ᐊᐅᓐᖑᕐᓂᐊᕐᐳᖅ.

¹⁸ ᑕᒪᑐᒪᓗ ᐃᖃᓗᖏᑦ ᑐᖁᓂᐊᕐᐳᑦ, ᑰᒡᓗ ᑕᒪᓐᓇ ᑎᐱᓗᓕᕐᓂᐊᕐᐳᖅ ᑎᐱᓗᓕᕐᓂᖓᓄᓪᓗ ᐄᑦᔨᑉᑎᒥᐅᑦ ᑕᒫᓐᖓᑦ ᐃᒥᕈᓐᓁᓪᓕᓂᐊᕐᐳᑦ.”’”

¹⁹ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐂᕉᓂ ᐅᖃᐅᑎᓚᐅᕈᒃ, ‘ᐊᔭᐅᑉᐱᐊᑦ ᑎᒍᓗᒍ ᐃᓵᓚᐅᕆᑦ ᐄᑦᔨᑉᑎᐅᑉ ᐃᒪᖏᓐᓄᑦ, ᑰᖏᓐᓄᑦ, ᑰᓕᐊᕆᓯᒪᔪᓄᓪᓗ, ᑕᓯᖏᓐᓄᓪᓗ, ᐃᒥᕐᑕᕐᕕᖁᑎᖏᓐᓄᓪᓗ ᑕᒤᓐᓄᑦ, ᑕᒪᕐᒥᒃ ᐊᐅᖑᓕᖁᓪᓗᒋᑦ; ᐄᑦᔨᑉᑎᐅᑉ ᓄᓇᖓ ᑕᒪᕐᒥᑦᓯᐊᖅ ᑕᕝᕙ ᐊᐅᓐᖑᕐᓂᐊᕐᐳᖅ, ᐊᒡᓛᑦ ᕿᔪᐃᑦ ᐃᒪᖃᐅᑏᑦ ᐅᔭᕅᓪᓗ ᐃᒪᖃᐅᑏᑦ ᑕᒪᕐᒥᒃ ᐊᐅᓐᖑᕐᓂᐊᕐᐳᑦ.’”

²⁰ ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᑕᒪᑐᒥᖓ ᐱᓇᓱᐊᓚᐅᕐᐳᒃ ᐊᑕᓂᐅᑉ ᐱᖁᓚᐅᕐᑕᖓᓂᒃ; ᐰᕉᑉ ᓵᖓᓂ ᐱᔨᒋᔭᖏᑕᓗ ᓵᖓᓂ, ᐊᔭᐅᑉᐱᐊᖁᑎᓂ ᐃᓴᐅᑎᓚᐅᕐᓗᒍ ᑰᑉ ᐃᒪᖓ ᐊᓇᐅᕚ, ᑕᕝᕙᓗ ᐃᒪᓕᒫᖅ ᑕᒪᓐᓇ ᐊᐅᓐᖑᕐᐳᖅ.

²¹ ᐃᖃᓗᐃᓪᓗ ᑰᖕᒦᑦᑐᑦ ᑐᖁᕗᑦ; ᑰᒡᓗ ᑎᐱᓗᓕᕐᒪᑦ, ᐄᑦᔨᑉᑎᒥᐅᑦ ᑕᒫᓐᖓᑦ ᑰᖕᒥᑦ ᐃᒥᕈᓐᓁᓪᓕᕗᑦ; ᐄᑦᔨᑉᑎᒥᐅᑦ ᓄᓇᓕᒫᖓ ᐊᐅᖑᖏᑦᑐᕐᑕᖃᕈᓐᓃᓚᐅᕐᒪᑦ.

²² ᐄᑦᔨᑉᑎᐅᓪᓕ ᐊᖓᒃᑯᖁᑎᖏᑦ ᑍᒤᓕᐅᕐᑎᑦᓯᔪᓐᓇᓚᐅᕆᕗᑦ; ᑍᒤᒻᒪᑦ ᐰᕉᑉ ᐆᒻᒪᑎᖓ ᓱᓕ ᓯᑎᔫᒋᐊᓪᓚᑐᐃᓐᓇᓚᐅᕐᐳᖅ, ᑖᒃᑯᓂᖓᓗ ᓈᓚᒍᒪᓇᓂ, ᓲᕐᓗ ᐊᑕᓂᐅᑉ ᑍᒫᒃ ᐅᖃᐅᓯᕆᓚᐅᕐᒪᒍ ᑍᒤᓐᓂᐊᕐᓂᕋᕐᓗᒍ.

²³ ᑍᒤᒻᒪᑦ ᐰᕉ ᑕᕝᕙᓐᖓᑦ ᕿᒪᕉᑎᓕᕋᒥ ᐊᖏᕐᕋᕐᐳᖅ, ᑕᒪᑐᒧᖓᓗ ᐊᒡᓛᑦ ᐃᓱᒪᖓ ᐊᐅᓚᑦᔭᒃᑕᐅᓚᐅᓐᖏᓚᖅ.

²⁴ ᐄᑦᔨᑉᑎᒥᐅᓪᓕ ᑰᑉ ᓯᓈᓂ ᐃᑎᕐᓴᓕᐅᕆᖃᑦᑕᓚᐅᕐᐳᑦ ᐃᒪᕐᓯᐅᕐᓗᑎᒃ, ᑕᒪᓐᓇ ᑰᒃ ᐃᒥᕐᕕᒃᓴᐅᔪᓐᓃᕐᒪᑦ.

²⁵ ᐅᓪᓗᓂᒡᓗ 7ᓂᒃ ᐃᒥᖅ ᑍᒤᑦᑑᓚᐅᕐᐳᖅ ᐊᑕᓂᐅᑉ ᑰᖕᒥᒃ ᐊᓇᐅᓯᓚᐅᕐᓂᖓᓂᑦ.