ᒨᓯᓯ ᐂᑉᐸᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᕾᖁᔨᓂᖓ ᒨᓯᓯᒥᒃ

¹ ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ, “ᒫᓐᓇ ᑕᑯᓂᐊᕐᐳᑎᑦ ᐰᕉᒧᑦ ᖃᓄᐃᓕᐅᕐᓂᕆᓂᐊᕐᑕᓐᓂᒃ; ᐱᔪᓐᓇᕐᓂᕐᔪᐊᒥᓄᑦ ᐃᓄᖁᑎᒃᑲ ᐊᐅᓪᓚᕐᑎᓐᓂᐊᕐᐰᑦ, ᐱᔪᓐᓇᕐᓂᕐᔪᐊᒥᓄᑦ ᓄᓇᒥᓂᑦ ᐊᐅᓪᓚᕐᑎᓐᓂᐊᕐᐰᑦ.”

² ᒎᑎᓗ ᐅᖃᕐᐳᖅ ᒨᓯᓯᒧᑦ, “ᐅᕙᖓ ᐊᑕᓂᐅᕗᖓ.

³ ᓴᖅᑭᓚᐅᕐᐳᖓᓗ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ, ᐊᔪᒐᖃᖏᑦᑑᓪᓗᖓ ᒎᑎᐅᒐᒪ, ᑭᓯᐊᓂᓕ ᐊᑕᓂᕐᒥᒃ ᐊᑎᖃᕐᓂᓐᓂᒃ ᐊᑎᕐᒪᓗ ᐃᑦᔪᕐᓁᓐᓂᖓᓂᒡᓗ ᓇᓗᓁᕐᓯᓚᐅᓐᖏᓚᖓ ᑖᒃᑯᓄᖓ.

⁴ ᑖᒃᑯᓄᖓᓗ ᐊᖏᕈᑎᖃᓚᐅᕐᐳᖓ, ᓄᓇᒥᒃ ᑬᓇᓂᒥᒃ ᑐᓂᓯᕕᒋᔪᒪᓪᓗᒋᑦ, ᑕᒪᑐᒥᖓ ᓄᓇᒥᒃ ᓂᐅᕐᕈᐊᖑᓪᓗᑎᒃ ᓇᔪᓚᐅᕐᑕᖓᓐᓂᒃ.

⁵ ᒫᓐᓇᓗ ᐃᓴᕆᐊᓕᒥᐅᑦ ᑲᑉᐱᐊᓱᐊᑎᑕᐅᓂᕐᒧᑦ ᐃᓗᖏᕐᓱᐊᓂᕆᔭᖏᑕ ᓂᐱᖏᑦ ᑐᓴᕐᓯᒪᕙᒃᑲ, ᐄᑦᔨᑉᑎᒥᐅᑦ ᓱᒃᑯᔨᐊᕆᓪᓗᒋᑦ ᓯᐊᓛᖃᕐᓂᖏᓐᓄᑦ; ᐊᖏᕈᑎᒋᓯᒪᔭᕋᓗ ᐃᖅᑲᐅᒪᓕᕐᐸᕋ.

⁶ ᑍᒤᒻᒪᑦ ᐃᓴᕆᐊᓕᒥᐅᓄᑦ ᐅᖃᓚᐅᕆᑦ ᐅᖃᕐᑕᐅᖁᔭᓐᓂᒃ, ‘ᐅᕙᖓ ᐊᑕᓂᐅᕗᖓ, ᐄᑦᔨᑉᑎᒥᐅᓪᓗ ᐅᖁᒤᒃᓴᕐᑎᑦᓯᓂᖏᓐᓂᑦ ᐊᐅᓪᓚᕐᑎᑦᓱᒪᕙᑦᓯ, ᓴᐳᑎᔪᒪᕙᑦᓯᓗ ᓯᐊᓛᕆᔭᐅᓂᑦᓯᓐᓂᑦ, ᐱᐅᓕᔪᒪᕙᑦᓯᓗ ᑕᓕᕐᒧᑦ ᐱᔪᓐᓇᕐᓂᕐᔪᐊᖃᕐᑐᒧᑦ ᓱᒋᐊᕐᓯᓂᕐᒧᓪᓗ ᓴᓐᖏᔪᕐᔪᐊᒧᑦ,

⁷ ᐃᓄᖁᑎᑖᕆᓂᐊᕐᐸᑦᓯᓗ, ᐃᓕᑦᓯᓐᓄᓪᓗ ᒎᑎᒋᔭᐅᓂᐊᕐᐳᖓ; ᖃᐅᔨᓕᖁᓪᓗᓯ ᐅᕙᖓ ᐊᑕᓂᐅᒐᒪ ᒎᑎᒋᔭᓯ, ᐊᐅᓪᓚᕐᑎᑦᓯᔨᒋᓚᐅᕐᑕᓯ ᐄᑦᔨᑉᑎᒥᐅᑦ ᐅᖁᒤᒃᓴᕐᑎᑦᓯᓂᖏᓐᓂᑦ.

⁸ ᓄᓇᒧᓪᓗ ᑎᑭᑎᑦᓱᒪᕙᑦᓯ ᐊᖏᕈᑎᒋᓯᒪᓚᐅᕐᑕᓐᓄᑦ ᑐᓂᔪᒪᓪᓗᒍ ᐂᑉᕋᕼᐋᒧᑦ, ᐂᓴᑭᒧᓪᓗ, ᔧᑯᒧᓪᓗ; ᑕᒪᓐᓇᓗ ᐃᓕᑦᓯᓐᓄᑦ ᑐᓂᓂᐊᕐᐸᕋ ᓄᓇᑖᕆᔭᐅᖁᓪᓗᒍ ᐃᓕᑦᓯᓐᓄᑦ. ᐅᕙᖓ ᐊᑕᓂᐅᒐᒪ.’”

⁹ ᒨᓯᓯᓗ ᑕᒪᑐᒥᖓ ᐅᖃᐅᓯᖃᕐᐳᖅ ᐃᓴᕆᐊᓕᒥᐅᓄᑦ; ᑖᒃᑯᐊᓕ ᒨᓯᓯᒥᒃ ᓈᓚᓚᐅᓐᖏᓚᑦ, ᐊᓂᕐᓂᕐᒥᒍᑦ ᓯᖁᒥᑕᐅᓯᒪᓂᕐᒧᑦ ᓱᒃᑯᔨᐊᖑᓪᓗᑎᒃ ᐋᓐᓂᕐᓯᕐᑕᐅᖃᑦᑕᕐᓂᕐᒧᑦ.

¹⁰ ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

¹¹ “ᐰᕉᒧᑦ ᐅᐸᒍᑎᓕᕆᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ, ᐅᖃᐅᑎᓗᒍᓗ ᑖᑦᓱᒪ ᓄᓇᖓᓂᑦ ᐃᓴᕆᐊᓕᒥᐅᑦ ᐊᐅᓪᓚᕐᑎᑕᐅᖁᓪᓗᒋᑦ.”

¹² ᒨᓯᓯᓕ ᐅᖃᕐᐳᖅ ᐊᑕᓂᕐᒧᑦ, “ᑕᑯᒋᑦ, ᐃᓴᕆᐊᓕᒥᐅᓄᑦ ᓈᓚᒃᑕᐅᓯᒪᓐᖏᓚᖓ; ᖃᓄᕐᓕ ᑕᕝᕙ ᐰᕉᒧᑦ ᓈᓚᒃᑕᐅᔪᓐᓇᕋᔭᕐᐳᖔ? ᐅᖃᓪᓚᑦᓯᐊᕈᓐᓇᖏᑦᑑᒐᒪ.”

¹³ ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, ᐱᔪᓐᓇᕐᓂᕐᒥᒡᓗ ᑐᓂᓯᕕᒋᓪᓗᒋᒃ ᐃᓴᕆᐊᓕᒥᐅᓄᑦ ᐰᕉᒧᓪᓗ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᓴᕆᐊᓕᒥᐅᓂᒃ ᐊᐅᓪᓚᕐᑎᑦᓯᖁᓪᓗᒋᒃ ᐄᑦᔨᑉᑎᐅᑉ ᓄᓇᖓᓂᑦ.

ᒨᓯᓯᐅᑉ ᐂᕉᓂᐅᓪᓗ ᐃᓚᖏᑕ ᓇᓗᓁᕐᓯᒪᓂᖏᑦ

¹⁴ ᐅᑯᐊ ᑕᕝᕙ ᑭᖑᕚᕇᖑᔪᑦ ᓇᓗᓁᕐᓯᒪᓂᖏᑦ: ᕉᐱᓂᐅᑉ ᐃᕐᓂᖏᑦ ᐃᓴᕆᐊᓕᐅᑉ ᐊᖓᔪᒃᓯᕐᐹᖁᑎᖓᑕ ᐅᑯᐊᖑᕗᑦ: ᕼᐊᓅᒃ, ᐸᓪᓗ, ᕼᐃᔅᕋᓐ, ᑳᕐᒥᓗ; ᑖᒃᑯᐊ ᑕᕝᕙ ᕉᐱᓂᐅᑉ ᕿᑐᕐᖓᖏᑦ.

¹⁵ ᓯᒥᐅᓂᐅᓪᓕ ᐅᑯᐊ ᐃᕐᓂᕆᕔᑦ: ᔨᒧᐃᐅᓪ, ᔭᒥᓐ, ᐅᕼᐋᑦ, ᔭᑭᓐ, ᔪᕼᐊᕆ, ᓴᕼᐊᐅᓗ, ᐃᕐᓂᕐᑖᕆᓚᐅᕐᑕᖏᑦ ᐊᕐᓇᒥᑦ ᑬᓇᓂᒥᐅᑕᕐᒥᑦ; ᑖᒃᑯᐊ ᑕᕝᕙ ᓯᒥᐅᓂᐅᑉ ᕿᑐᕐᖓᕆᔭᖏᑦ.

¹⁶ ᐅᑯᐊᓕ ᓕᕔᑉ ᐃᕐᓂᖏᑕ ᐊᑎᖏᑦ ᑭᖑᕚᕇᒃᐸᓪᓕᐊᓯᒪᓂᖏᑦ ᒪᓕᒡᓗᒋᑦ: ᒌᕐᓲᓐ, ᑯᕼᐋᑦ, ᒥᕋᕆᓗ, ᓕᕔᓗ ᐊᕐᕌᒍᓂᒃ 137ᓂᒃ ᐃᓅᓚᐅᕐᐳᖅ.

¹⁷ ᐅᑯᐊᓕ ᒌᕐᓲᓂᐅᑉ ᐃᕐᓂᕆᕔᑦ: ᓕᑉᓂᓗ ᓯᒥᐂᓗ, ᑭᖑᕚᖃᕐᓗᑎᒡᓗ ᐅᓄᕐᑐᓂᒃ.

¹⁸ ᐅᑯᐊᓕ ᑯᕼᐊᑦᑎᐅᑉ ᐃᕐᓂᕆᕔᑦ: ᐊᒪᕌᒻ, ᐃᔾᕼᐊᕆ, ᕼᐃᐸᕋᓐ, ᐊᑦᔧᐅᓪ, ᑯᕼᐋᑦᑎᓗ ᐃᓅᓚᐅᕐᐳᖅ ᐊᕐᕌᒍᓂᒃ 133ᓂᒃ.

¹⁹ ᐅᑯᐊᓕ ᒥᕋᕆᐅᑉ ᐃᕐᓂᕆᕔᑦ: ᒪᕼᐊᓔᓗ ᒧᓮᓗ. ᑖᒃᑯᐊ ᑕᕝᕙ ᓕᕔᑉ ᑭᖑᕚᕆᓚᐅᕐᐰᑦ.

²⁰ ᐊᒪᕌᒻᓗ ᓄᓕᐊᕐᑖᓚᐅᕐᐳᖅ ᐊᑖᑕᖓᑕ ᓇᔭᖓᓂᒃ ᔫᑭᐱᑎᒥᒃ ᑖᑦᓱᒨᓇᓗ ᕿᑐᕐᖓᕐᑖᓚᐅᕐᐳᖅ ᐂᕉᓂᒥᒃ ᒨᓯᓯᒥᒡᓗ, ᐊᒻᒪᕋᒻᓗ ᐃᓅᓚᐅᕐᐳᖅ ᐊᕐᕌᒍᓂᒃ 137ᓂᒃ.

²¹ ᐅᑯᐊᓕ ᐃᔾᕼᐊᕆᐅᑉ ᐃᕐᓂᕆᕔᑦ; ᑰᕋ, ᓂᑉᕼᐃᒡ, ᔨᒃᕆᓗ.

²² ᐅᑯᐊᓕ ᐊᑦᔧᐆᑉ ᐃᕐᓂᕆᕔᑦ; ᒥᓮᐅᓪ, ᐃᐅᓪᓴᕚᓐ, ᓯᑎᕆᓗ.

²³ ᐂᕉᓂᓗ ᓄᓕᐊᓂᒃᐳᖅ ᐃᓕᓯᐸᒥᒃ, ᐊᒥᓇᑕᐱᐅᑉ ᐸᓂᖓᓂᒃ ᓈᓲᓂᐅᑉ ᓇᔭᖓᓂᒃ; ᑖᒃᑯᐊᒡᓗ ᕿᑐᕐᖓᕐᑖᓚᐅᕐᐳᒃ ᐅᑯᓂᖓ, ᓁᑖᑉ, ᐊᐱᕼᐅ, ᐃᓕᓯᕆ, ᐃᑕᒫᕐᓗ.

²⁴ ᑰᕋᐅᓪᓕ ᐃᕐᓂᖏᑦ ᐅᑯᐊᖑᕗᑦ; ᐊᓯᕆ, ᐃᐅᓪᑳᓇ, ᐊᐰᐊᓴᐸᓗ; ᑖᒃᑯᐊ ᑕᕝᕙ ᑰᕋᐅᑉ ᑭᖑᕚᕆᓚᐅᕐᑕᖏᑦ.

²⁵ ᐃᓕᓯᕆᓕ ᐂᕉᓂᐅᑉ ᐃᕐᓂᖓ ᓄᓕᐊᓂᓚᐅᕐᐳᖅ ᐳᑎᐅᓕᐅᑉ ᐸᓂᖏᑕ ᐃᓚᖓᓐᓂᒃ; ᑖᒃᑯᐊᒡᓗ ᕿᑐᕐᖓᕐᑖᓚᐅᕐᐳᒃ ᐱᓂᕼᐋᓯᒥᒃ. ᑖᒃᑯᐊ ᑕᕝᕙ ᐃᓚᒌᖑᔪᓄᑦ ᓂᐊᖁᕆᔭᐅᓚᐅᕐᑐᑦ ᑭᖑᕚᕆᔭᐅᓪᓗᑎᒡᓗ ᓕᕔᑎᓄᑦ.

²⁶ ᑖᒃᑯᖕᓄᖓ ᑕᕝᕙ ᐂᕉᓂᒧᑦ ᒨᓯᓯᒧᓪᓗ ᐊᑕᓂᖅ ᐅᖃᓚᐅᕐᐳᖅ: “ᐃᓴᕆᐊᓕᒥᐅᑦ ᐃᓅᖃᑎᒌᑦ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᓯᒋᒃ.”

²⁷ ᑖᒃᑯᐊᒡᓗ ᒨᓯᓯᒃᑯᒃ ᐂᕉᓂᒃᑯᒃ ᐰᕉᒧᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐅᖃᕆᐊᕐᑐᓚᐅᕐᐴᒃ ᐃᓴᕆᐊᓕᒥᐅᑦ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᖁᓪᓗᒋᑦ.

ᐊᑕᓂᐅᑉ ᐊᑐᕐᑕᐅᖁᔭᒥᓂᒃ ᐅᖃᐅᑦᔨᓂᖓ ᒨᓯᓯᒥᒃ ᐂᕉᓂᒥᒡᓗ

²⁸ ᐊᑕᓂᐅᑉ ᒨᓯᓯ ᐅᖃᕐᕕᒋᒐᒥᐅᒃ ᐄᑦᔨᑉᑎᐅᑉ ᓄᓇᖓᓂ,

²⁹ ᒨᓯᓯᒧᑦ ᐅᖃᓚᐅᕐᐳᖅ ᐃᒫᒃ, “ᐅᕙᖓ ᐊᑕᓂᐅᕗᖓ, ᐄᑦᔨᑉᑎᒥᐅᑉ ᐊᖓᔪᖅᑳᕐᔪᐊᖓᑦ ᐅᖃᐅᑎᒍᒃ ᐅᖃᐅᓯᕆᓚᐅᕐᑕᓕᒫᓐᓂᒃ ᐃᓕᖕᓄᑦ.”

³⁰ ᒨᓯᓯᓕ ᐊᑕᓂᕐᒧᑦ ᑭᐅᕗᖅ, “ᖃᐅᔨᒪᕗᑎᑦ ᐅᖃᕈᓐᓇᑦᓯᐊᖏᓐᓂᓐᓂᒃ, ᐊᖓᔪᖅᑳᕐᔪᐊᖅ ᐅᖃᐅᓯᕆᔭᓐᓂᒃ ᓈᓚᒃᑲᔭᕋᓗᐊᕐᒫᑦ?”