ᒨᓯᓯ ᐂᑉᐸᖏᑦ 40 - ᐊᒡᓔᑦ ᐃᑦᔪᕐᖕᓁᑦᑐᑦᐊᑕᓂᐅᑉ ᓇᔪᒐᖓᑕ ᑐᐱᐅᑉ ᓇᑉᐸᕐᑕᐅᓂᖓ ᑐᓂᔭᐅᓂᖓ ᑐᒃᓯᐅᑦᔭᐅᓂᖓᓗ 1 ᐊᑕᓂᖅ ᐅᖃᕐᐳᖅ ᒨᓯᓯᒧᑦ, 2 “ᑕᖅᑮᑦ ᓯᕗᓪᓕᕐᐹᖓᑕ ᐅᓪᓗᖏᑕ ᓯᕗᓪᓕᕐᐹᖓᓐᓂ ᑐᐱᖅ ᐊᑕᓂᐅᑉ ᓇᔪᒐᒃᓴᖓ ᓇᑉᐸᕐᑕᒃᓴᕆᕙᑦ. 3 ᑕᕝᕗᖓᓗ ᐃᓕᔭᒃᓴᕆᕙᑦ ᐊᖏᕈᑕᐅᓯᒪᔪᕐᑕᓕᐅᑉ ᐃᒃᓯᕐᕕᖁᑎᖓ ᐃᓗᓕᖃᕐᑐᖅ ᐱᖁᔭᓂᒃ ᖁᓕᓂᒃ ᑖᑦᓱᒪᓗ ᐃᒃᓯᕐᕕᐅᑉ ᓯᕗᕌᒍᑦ ᑖᓗᑕᓕᕐᑕᒃᓴᕆᕙᑦ. 4 ᑕᕝᕗᖓ ᐋᖅᑭᒃᓯᔪᒃᓴᐅᒋᕗᑎᑦ ᓵᒥᒃ ᓱᓇᑐᐃᓐᓇᒃᓴᖏᓪᓗ ᐱᖃᓯᐅᑎᓗᒋᑦ. ᓇᓂᕈᐊᖃᕐᕖᓪᓗ ᑕᕝᕗᓐᖓᕐᒥᓗᒋᑦ ᓇᓂᕈᐊᓪᓗ ᓇᓂᕈᐊᖃᕐᕕᖕᓄᑦ ᐃᓕᓗᒋᑦ. 5 ᑐᓂᕐᕈᓯᕐᕕᒃ ᒎᓗ ᑕᕝᕗᓐᖓᕐᑕᒃᓴᕆᒋᕙᑦ ᐃᓯᕐᓗᐊᕐᓂᑎᑦᓯᕕᒃᓴᖅ ᐊᖏᕈᑕᐅᓯᒪᔪᕐᑕᓕᐅᑉ ᐃᒃᓯᕐᕕᐅᑉ ᓯᕗᕌᓄᑦ, ᑐᐱᐅᓪᓗ ᐃᑎᕐᑕᕐᕕᖓᓄᑦ ᑖᓗᑕᒃᓴᖓ ᐃᓕᓗᒍ. 6 ᑐᐱᐅᓪᓗ ᐃᑎᕐᑕᕐᕕᖓᑕ ᑐᑭᐊᓄᑦ ᓯᓚᑖᓄᑦ ᑐᓂᕐᕈᓯᕐᕕᒃ ᐃᑯᐊᓚᑦᓯᕕᒃᓴᖅ ᐋᖅᑭᒃᑕᒃᓴᕆᕙᑦ. 7 ᐴᒍᑕᕐᓗ ᐅᐊᓴᕐᕕᒃᓴᖅ ᐃᒥᕐᒥᒃ ᐃᒻᒥᕐᓗᒍ ᑐᐱᐅᓪᓗ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓄᑦ ᐃᓕᔭᒃᓴᕆᕙᑦ. 8 ᐊᕙᑖᓄᓪᓗ ᑖᓗᑕᖏᑦ ᐋᖅᑭᒃᓗᒋᑦ ᐃᑎᕐᑕᕐᕕᖓᓄᓪᓗ ᑖᓗᑕᖓ ᐋᖅᑭᓪᓗᒍ. 9 “ᑕᕝᕙ ᑐᐱᖅ ᑐᓂᕐᕈᑎᒋᔭᒃᓴᕆᕙᑦ ᓱᓇᑐᐃᓐᓇᓕᒫᖏᓪᓗ ᒥᖑᐊᕐᓗᒍᓗ ᒥᖑᐊᕈᑎᒃᓴᒧᑦ ᐅᕐᓱᒧᑦ ᐃᑦᔪᕐᓁᑦᑐᒧᑦ, ᑕᕝᕙ ᐃᑦᔪᕐᓁᓕᓂᐊᕐᐳᖅ. 10 ᑭᖑᓂᖓᒍᑦ ᑐᓂᕐᕈᓯᕐᕕᒃ ᐃᑯᐊᓚᑦᓯᕕᒃᓴᖅ ᑐᓂᔭᒃᓴᕆᕙᑦ ᓱᓇᑐᐃᓐᓇᓕᒫᖏᓪᓗ, ᒥᖑᐊᕐᓗᒍ ᐅᕐᓱᒧᑦ, ᑕᕝᕙ ᐊᑕᖏᕐᓗᓂ ᐃᑦᔪᕐᓁᓕᓂᐊᕐᐳᖅ. 11 ᐊᒻᒪᑦᑕᐅᖅ ᐴᒍᑕᖅ ᐅᐊᓴᕐᕕᒃ ᐊᓪᓕᕋᖓᓗ ᐱᖃᓯᐅᑎᓗᒍ ᑍᒫᑦᓮᓐᓇᖅ ᑐᓂᕐᕈᑎᒋᓗᒍ ᒥᖑᐊᕐᓗᒍᓗ ᐃᑦᔪᕐᓁᑎᑕᒃᓴᕆᒋᕙᑦ. 12 “ᑕᕝᕙ ᐂᕉᓂ ᐃᕐᓂᖏᓪᓗ ᕾᖁᔭᒃᓴᕆᕙᑎᑦ ᑐᐱᐅᑉ ᐃᑎᕐᑕᕐᕕᖓᑕ ᓯᕗᕌᓄᑦ, ᐅᖃᐅᑎᔭᒃᓴᕆᕙᑎᑦ ᑎᒥᓕᒫᒥᖕᓂᒃ ᐅᐊᓴᖁᓗᒋᑦ ᐃᑦᔪᕐᓁᑎᑕᐅᒃᔪᑎᒃᓴᖏᓐᓄᑦ. 13 ᑕᕝᕙ ᐂᕉᓂ ᐊᓐᓄᕌᕐᑎᑕᒃᓴᕆᕙᑦ ᐊᓐᓄᕌᓂᒃ ᐃᑦᔪᕐᓁᑦᑐᓂᒃ, ᒥᖑᐊᕐᓗᒍᓗ ᐅᕐᓱᒧᑦ, ᑕᕝᕙ ᑍᒫᒃ ᐃᑦᔪᕐᓁᑎᑕᒃᓴᕆᕙᑦ, ᐅᕙᓐᓂᒃ ᐱᔨᑦᓯᕈᓐᓇᖁᓪᓗᒍ ᑐᓂᕐᕈᓯᕐᑎᑦᓯᔨᐅᓂᕐᒧᑦ. 14 ᑕᕝᕙ ᐃᕐᓂᖏᑦ ᕾᖁᔭᒃᓴᕆᒋᕙᑎᑦ ᐊᓐᓄᕌᕐᑎᓪᓗᒋᓪᓗ. 15 ᒥᖑᐊᕐᑕᒃᓴᕆᕙᑎᑦ ᑕᕝᕙ, ᐊᑖᑕᖓᑦᑎᑐᑦ, ᐅᕙᓐᓂᒃ ᐱᔨᑦᓯᕈᓐᓇᖁᓪᓗᒋᑦ ᑐᓂᕐᕈᓯᕐᑎᑦᓯᔨᐅᓂᒃᑯᑦ. ᒥᖑᐊᕐᑕᐅᓂᕆᔭᖓᓗ ᑕᒪᓐᓇ ᐊᑑᑎᓂᐊᕐᐳᖅ ᑕᐅᕗᖓᓕᒫᖅ ᑭᖑᕚᖏᓐᓄᑦ ᑎᑭᓪᓗᒍ.” 16 ᒨᓯᓯᓗ ᐱᓇᓱᐊᕐᐳᖅ ᐊᑕᓂᐅᑉ ᐱᓇᓱᐊᕐᑕᐅᖁᔭᓕᒫᖏᓐᓂᒃ. 17 ᑕᕝᕙ ᑕᖅᑭᐅᑉ ᓯᕗᓪᓕᕐᐹᑉ ᐅᓪᓗᖏᑕ ᓯᕗᓪᓕᕐᐹᖓᓂ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖏᑕ ᐊᕐᕌᒍᖓᑕ ᐂᑉᐸᕆᓕᕐᑕᖓᓂ, ᐊᑕᓂᐅᑉ ᓇᔪᒐᖓ ᑐᐱᖅ ᓇᑉᐸᕐᑕᐅᕗᖅ. 18 ᒨᓯᓯᐅᑉ ᑐᐱᖅ ᓇᑉᐸᕐᐹ, ᓇᐸᔪᖏᑕ ᑐᓐᖓᕕᖏᑦ ᐋᖅᑭᖄᕐᓗᒋᑦ, ᓯᓇᕐᔪᒃᓯᐅᑎᖏᑦ ᐋᖅᑭᓕᕆᓪᓗᒋᑦ, ᐃᑳᖓᔪᖏᓪᓗ ᐃᓕᐅᕋᕐᓗᖏᑦ, ᓇᐸᔪᖏᓪᓗ ᓇᑉᐸᓕᕆᓪᓗᒋᑦ. 19 ᑕᕝᕙ ᑐᐱᐅᑉ ᓯᓚᑉᐱᐊᖓ ᐃᓯᕕᓕᓚᐅᕐᐹ ᑐᐱᐅᓪᓗ ᓯᓚᓪᓕᕐᐹᒃᓴᖓ ᓯᓚᑉᐱᐊᖅ ᐋᖅᑭᓕᕆᓪᓗᒍ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 20 ᑕᕝᕙ ᐅᔭᕌᒃ ᒪᕐᕉᒃ ᑎᑎᕋᕐᕕᒋᓯᒪᔫᒃ ᐊᖏᕈᑕᐅᓯᒪᔫᑉ ᐃᒃᓯᕐᕕᖁᑎᖓᓄᑦ ᐴᕐᐰᑦ. ᐃᒃᓯᕐᕕᐅᓪᓗ ᐊᑭᕋᐅᑎᒃᓴᖏᒃ ᑕᑭᔪᑯᑖᒃ ᐃᒃᓯᕐᕕᐅᑉ ᐊᑭᕋᐅᓯᕐᕕᖏᓐᓄᑦ ᓱᓪᓗᓕᖕᓄᑦ ᑲᐅᑎᑎᑉᐰᑦ ᐃᒃᓯᕐᕕᒡᓗ ᒪᑐᖓᓄᑦ ᒪᑐᕚ. 21 ᑕᕝᕙ ᐃᒃᓯᕐᕕᒃ ᑐᐱᐅᑉ ᐃᓗᐊᓄᐊᕈᑎᕚ ᐊᕙᑖᒍᓪᓗ ᑖᓗᑕᓕᐅᕐᓗᓂᐅᒃ. ᑕᕝᕙ ᑍᒤᓕᐅᕐᓗᓂᐅᒃ ᐊᖏᕈᑕᐅᓯᒪᔪᕐᑕᓕ ᐃᒃᓯᕐᕕᒃ ᑕᓕᑎᑉᐹ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 22 ᑕᕝᕙ ᓵ ᑐᐱᕐᒧᐊᕈᑎᒋᕚ, ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓄᑦ ᑖᓗᑕᖏᑕ ᓯᓚᑖᓄᑦ, 23 ᑕᕝᕗᖓᓗ ᓂᐊᖂᔭᓂᒃ ᐃᓕᓯᕗᖅ ᐊᑕᓂᕐᒧᑦ ᑐᓂᕐᕈᑕᐅᓯᒪᔪᓂᒃ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 24 ᓇᓂᕈᐊᒃᑯᕕᒡᓗ ᑐᐱᕐᒧᐊᕈᑎᕚ, ᐋᖅᑭᒡᓗᒍᓗ ᑐᐱᐅᑉ ᐅᓪᓗᓪᓗᐊᖓᑕ ᓇᓛᓄᑦ, ᓵᑉ ᐃᓂᖓᑕ ᐊᑭᓪᓗᐊᖓᓄᑦ. 25 ᑕᕝᕙᓂᓗ ᐊᑕᓂᐅᑉ ᓇᔪᒐᖓᓂ ᓇᓂᕈᐊᑦ ᐃᑭᑉᐰᑦ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 26 ᑐᓂᕐᕈᓯᕐᕕᒡᓗ ᒎᓗ ᑐᐱᐅᑉ ᐃᓗᐊᓄᑦ ᐃᓕᒋᕚ, ᑖᓗᑕᐅᑉ ᓯᕗᕌᓄᑦ, 27 ᑕᕝᕙᓂᓗ ᑎᐱᑦᓯᐊᕆᒃᓴᐅᑏᑦ ᐃᓯᕐᓗᐊᕐᓂᑎᑕᒃᓮᑦ ᐃᑯᐊᓪᓚᒃᐰᑦ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 28 ᑐᐱᐅᓪᓗ ᐃᑎᕐᑕᕐᕕᖓᑕ ᑖᓗᑕᖓ ᐋᖅᑭᒃᐹ, 29 ᑕᕝᕙᓂᓗ ᐃᑎᕐᑕᕐᕕᐅᑉ ᑖᓗᑕᖓᑕ ᓯᕗᕌᓂ ᐃᑯᐊᓚᑎᑕᒃᓴᓄᑦ ᑐᓂᕐᕈᓯᕐᕕᒃ ᐋᖅᑭᒃᐹ. ᑕᕝᕙᓂᓗ ᑐᓂᕐᕈᓯᕐᕕᖕᒥ ᐃᑯᐊᓚᑎᑕᒃᓴᒥᒃ ᑐᓂᕐᕈᓯᕐᐳᖅ ᓂᕿᒃᓴᓂᒡᓗ ᑐᓂᕐᕈᓯᕆᓪᓗᓂ, ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ. 30 ᐴᒍᑕᐅᔭᕐᓗ ᐅᐊᓴᕐᕕᒃᓴᖅ ᑐᐱᐅᓪᓗ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓄᑦ ᐋᖅᑭᒃᑭᕚ, ᐃᒥᕐᒥᒡᓗ ᐃᒻᒥᕐᓗᓂᐅᒃ. 31 ᑖᑦᓱᒧᖓᓗ ᒨᓯᓯ ᐂᕉᓂᓗ ᐃᕐᓂᖏᓪᓗ ᐊᒡᒐᖕᒥᖕᓂᒃ ᐃᑎᒐᖕᒥᖕᓂᒡᓗ ᐅᐊᓴᕐᐳᑦ; 32 ᑐᐱᕐᒧᓪᓗ ᐃᑎᕐᓂᐊᑐᐊᕈᑎᒃ, ᑐᓂᕐᕈᓯᕐᕕᖕᒧᐊᕐᓂᐊᑐᐊᕈᑎᒡᓗ, ᐅᐊᓴᖃᑦᑕᕐᐳᑦ; ᐊᑕᓂᐅᑉ ᒨᓯᓯ ᑍᒫᒃ ᐱᖁᓚᐅᕐᒪᒍ. 33 ᑕᕝᕙ ᑐᐱᐅᑉ ᑐᓂᕐᕈᓯᕐᕕᐅᓪᓗ ᓯᓚᑖᒍᑦ ᐊᕙᓗᓕᐅᕆᕚ, ᑕᒪᑐᒪᓗ ᑐᐱᐅᑉ ᐊᕙᓗᐊᑕ ᐃᑎᕐᑕᕐᕕᖓᑕ ᑖᓗᑕᒃᓴᖓᓂ ᐋᖅᑭᒃᓯᒋᕗᖅ. ᑕᕝᕙ ᒨᓯᓯᐅᑉ ᐱᓇᓱᐊᕆᐊᓕᓕᒫᓂ ᐱᔭᕇᕐᐰᑦ. ᑐᐱᐅᑉ ᖁᓛᓂ ᓄᕗᔭᑕᖃᕐᓂᖓ ᐊᑕᓂᐅᑉ ᓇᔪᒐᖓ ᒨᓯᓯ ᓯᑕᒪᖏᑦ 9:15-23 34 ᑕᕝᕙ ᑐᐱᖅ ᓄᕗᔭᐅᑉ ᐅᓕᒃᐹ ᐊᑕᓂᐅᓪᓗ ᓇᔫᑎᓂᖓᑕ ᖃᐅᒪᓂᖓᓄᑦ ᑐᐱᐅᑉ ᐃᓗᐊ ᓇᔪᕐᑕᐅᓕᕐᐳᖅ. 35 ᒨᓯᓯᓗ ᑐᐱᐅᑉ ᐃᓗᐊᓄᐊᕆᐊᒃᓴᖅ ᐊᔪᓕᕐᐳᖅ, ᓄᕗᔭᒧᑦ ᓇᔪᕐᑕᐅᓕᕐᒪᑦ, ᐊᑕᓂᐅᓪᓗ ᓂᕐᑐᕐᓇᕐᓂᕐᔪᐊᖓᑕ ᑐᐱᖅ ᓇᔪᓕᕐᒪᒍ. 36 ᑍᒫᓐᖓᓕᒫᕐᓗ ᐃᓴᕆᐊᓕᒥᐅᑦ ᐃᖏᕐᕋᓂᓕᒫᖏᓐᓂ, ᓄᕗᔭ ᑐᐱᕐᒥᑦ ᖃᖓᑦᑕᑐᐊᕌᖓᑦ ᑭᓯᐊᓂ, ᐃᓴᕆᐊᓕᒥᐅᑦ ᐃᓄᖏᑦ ᑕᖕᒫᕐᓯᒪᕕᖕᒥᓐᓂᑦ ᓅᓕᕐᐸᓚᐅᕐᐳᑦ. 37 ᓄᕗᔭᐅᑉ ᖁᒻᒧᐊᓚᐅᖏᓐᓂᓕᒫᖓᓂ, ᑕᖕᒫᕐᓯᒪᕕᖕᒥᖕᓂᑦ ᐃᖏᕐᕋᓯᕙᓚᐅᓐᖏᓚᑦ. 38 ᑍᒫᓐᖓᓪᓕ ᐃᖏᕐᕋᓂᓕᒫᖏᓐᓂ ᐊᑕᓂᐅᑉ ᓄᕗᔭᖁᑎᖓ ᐅᓪᓗᒃᑯᑦ ᑐᐱᐅᑉ ᖁᓛᓃᑉᐸᓚᐅᕐᐳᖅ, ᐅᓐᓄᒃᑯᓪᓕ ᐃᑯᒪᐅᓕᖃᑦᑕᕐᓗᓂ, ᐃᓴᕆᐊᓕᒥᐅᓕᒫᓂᑦ ᑕᑯᔭᐅᖃᑦᑕᓚᐅᕐᐳᖅ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society