ᒨᓯᓯ ᐂᑉᐸᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᒨᓯᓯ ᐱᔪᓐᓇᕐᓂᕐᒥᒃ ᐊᖏᔪᒥᒃ ᑐᓂᓯᕕᒋᕚ

¹ ᑕᕝᕙ ᒨᓯᓯ ᑭᐅᕗᖅ ᐅᖃᕐᓗᓂᓗ, “ᑕᑯᒋᑦ ᑍᒃᑯᐊ ᐅᕙᓐᓂᒃ ᐅᒃᐱᕈᓱᖕᓂᐊᓐᖏᓚᑦ, ᓂᐱᒐᓗ ᓈᓚᒍᒪᑦᔮᓐᖏᓛᑦ, ᐅᖃᕋᔭᕐᐳᓪᓕ, ‘ᐊᑕᓂᖅ ᓴᖅᑭᓚᐅᓐᖏᓚᖅ ᐃᓕᖕᓄᑦ.’”

² ᑕᕝᕙ ᐊᑕᓂᐅᑉ ᐅᖃᐅᑎᕚ, “ᓱᓇᒥᒃ ᑎᒍᒥᐊᕐᐲᑦ?” ᒨᓯᓯᐅᑉ ᑭᐅᕚ, “ᐊᔭᐅᑉᐱᐊᒥᒃ.”

³ ᐊᑕᓂᐅᑉ ᐅᖃᐅᑎᕚ, “ᓄᓇᒧᑦ ᐃᒋᓚᐅᕈᒃ.” ᑕᕝᕙ ᓄᓇᒧᑦ ᐃᒋᑉᐹ, ᖁᒡᓗᒋᐊᓐᖑᕐᐳᕐᓗ; ᒨᓯᓯᓗ ᕿᒪᒃᓯᕗᖅ ᑖᑦᓱᒥᖓ.

⁴ ᐊᑕᓂᕐᓕ ᐅᖃᕐᐳᖅ ᒨᓯᓯᒧᑦ, “ᐃᓴᒡᓗᑎᑦ, ᐸᒥᐅᖓᒍᑦ ᑎᒍᓚᐅᕈᒃ” ᑕᕝᕙ ᐃᓴᒡᓗᓂ ᐸᒥᐅᖓᒍᑦ ᑎᒍᕚ, ᑖᓐᓇᓗ ᐊᔭᐅᑉᐱᐊᓐᖑᕆᕗᖅ ᑎᒍᖕᒪᒍ.

⁵ ᑕᕝᕙ ᐊᑕᓂᖅ ᐅᖃᕐᐳᖅ, “ᑕᒪᓐᓇ ᐱᑦᔪᑎᒋᓗᒍ ᐅᒃᐱᕈᓱᓕᕈᒫᕐᐳᑦ ᐊᑕᓂᕐᒥᒃ, ᓯᕗᓕᕕᓂᖏᑦᑕ ᒎᑎᖓᑕ, ᐂᑉᕋᕼᐋᒻ, ᐂᓴᑭᐅᓪᓗ, ᔧᑰᓪᓗ ᒎᑎᖓᑕ, ᑖᑦᓱᒪ ᓴᖅᑭᕝᕕᒋᓚᐅᕐᒪᑎᑦ.”

⁶ ᐊᑕᓂᐅᓪᓗ ᓱᓕ ᐅᖃᐅᑎᒃᑲᓐᓂᕐᐹ: “ᐊᒡᒐᑎᑦ ᐅᓕᒡᔪᐊᕕᑦ ᐃᑭᐊᖓᓄᐊᕐᑎᒃᑭᑦ.” ᑕᕝᕙ ᐊᒡᒐᓂ ᐅᓕᒡᔪᐊᒥ ᐃᑭᐊᖓᓄᐊᕐᑎᑉᐰᑦ, ᐊᒧᒐᒥᒋᓪᓗ, ᑕᕝᕙ ᖃᑯᕐᓯᓯᒪᕗᑦ ᐸᕐᑎᕐᑐᑎᑐᑦ ᐊᐳᑎᑐᑦ ᖃᑯᕐᑎᒋᓕᕐᓗᑎᒃ.

⁷ ᑕᕝᕙ ᒎᑎ ᐅᖃᕐᐳᖅ, “ᐊᒡᒐᑎᑦ ᐅᓕᒡᔪᐊᕐᓄᑦ ᐅᑎᕐᑎᓚᐅᕐᒥᒃᑭᑦ.” ᑕᕝᕙ ᐊᒡᒐᓂ ᐅᓕᒡᔪᐊᒥ ᐃᑭᐊᖓᓄᑦ ᐅᑎᕐᑎᒃᑭᕔᑦ, ᐊᒧᒐᒥᒋᓪᓗ, ᑕᑯᒋᑦ ᑕᕝᕙ ᐅᕕᓂᖕᒥᓄᑦ ᐅᑎᑦᓯᐊᕆᕗᑦ.

⁸ ᒎᑎᓗ ᐅᖃᕐᐳᖅ, “ᑕᕝᕙ ᐅᒃᐱᕆᖏᑉᐸᑎᑦ, ᑲᒪᓇᕐᑐᕐᓗ ᑕᒪᓐᓇ ᓯᕗᓪᓕᐅᔪᖅ ᐃᒃᐱᒋᔭᐅᖏᑉᐸᑦ, ᑭᖑᓪᓕᕐᒧᑦ ᓇᓗᓁᒃᑯᑕᕐᒧᑦ ᐅᒃᐱᕈᓱᓕᕋᔭᕐᐳᑦ.

⁹ ᑖᒃᑯᐊᒡᓕ ᓇᓗᓁᒃᑯᑖᒃ ᒪᕐᕉᒃ ᓱᓕ ᐅᒃᐱᕆᖏᑉᐸᒋᑦ ᐅᕝᕙᓗ ᐅᖃᐅᓯᕐᓂᒃ ᓈᓚᖏᑉᐸᑕ, ᑕᕝᕙ ᑰᖕᒥᒃ ᓁᐅᓪᒥᑦ ᖃᓗᓯᓗᑎᑦ ᓄᓇᒧᑦ ᐸᓂᕐᑐᒧᑦ ᑯᕕᓯᓕᕆᑦ; ᑕᕝᕙ ᑕᒪᓐᓇ ᐃᒥᖅ ᖃᓗᓚᐅᕐᑍᑦ ᑰᖕᒥᑦ ᓁᐅᓪᒥᑦ ᐊᐅᓐᖑᕐᓂᐊᕐᐳᖅ ᓄᓇᒥ ᑕᒫᓂ ᐸᓂᕐᑐᒥ.”

¹⁰ ᒨᓯᓯᓕ ᐅᖃᕐᐳᖅ ᐊᑕᓂᕐᒧᑦ, “ᑕᑯᒋᑦ ᐊᑕᓃᖅ, ᐅᖃᓪᓚᑦᓯᐊᕈᓐᓇᖏᑦᑐᖓ, ᐊᒡᓛᓪᓗ ᐃᓕᖕᓄᑦ ᐅᖃᓪᓚᒡᕕᐅᓂᕐᒪ ᑭᖑᓂᖓᓂ ᓱᓕ ᐅᖃᓪᓚᒍᓐᓇᑦᓯᐊᓐᖏᓚᖓ, ᐅᖃᕈᓐᓁᓪᓕᖅᑲᑦᑕᓲᖑᒐᒪ ᐅᖃᕋᓗ ᐃᖃᓕᕐᐸᒃᓗᓂ.”

¹¹ ᐊᑕᓂᐅᓪᓕ ᐅᖃᐅᑎᕚ, “ᑭᐊᓕ ᐃᓅᑉ ᖃᓂᖓ ᓴᓇᓚᐅᕐᐸᐅᒃ? ᑭᐊᓗ ᐅᖃᕈᓐᓇᕈᓐᓃᕐᑎᑉᐸᐅᒃ, ᐅᕝᕙᓗ ᑭᐊ ᑐᓵᔪᓐᓃᕐᑎᑉᐸᐅᒃ, ᑭᐊᓗ ᑕᑯᔪᓐᓇᕐᑎᑉᐸᐅᒃ, ᑕᐅᑐᒍᓐᓃᕐᑎᓪᓗᓂᐅᒡᓘ? ᐅᕙᖓ ᐊᑕᓂᐅᔪᖓ ᑖᒃᑯᓂᖓ ᓴᓇᓚᐅᓐᖏᓚᖔ?

¹² ᑍᒤᒻᒪᑦ ᑍᑯᓐᖓᓕᕆᑦ, ᐅᕙᖓ ᐅᖃᐅᓯᑎᑦ ᐃᓚᒋᓂᐊᕐᐸᒃᑲ ᐊᔪᕆᕐᑐᕐᓂᐊᕐᐸᒋᓪᓗ ᖃᓄᖅ ᐅᖃᕐᑐᒃᓴᐅᖕᒪᖔᕐᐱᑦ.”

¹³ ᒨᓯᓯᓕ ᐅᖃᕐᐳᖅ, “ᐊᑕᓃᖅ, ᐊᓯᓐᓂᒃ ᑎᓕᓯᖔᓚᐅᕆᑦ.”

¹⁴ ᑕᕝᕙ ᐊᑕᓂᖅ ᓂᓐᖓᓕᕐᐳᖅ ᒨᓯᓯᒧᑦ ᐅᖃᕐᓗᓂᓗ, “ᐂᕉᓂᒥᒃ ᐊᖓᔪᖃᓐᖏᓚᑏᑦ ᓕᕔᑎᒥᐅᑕᕐᒥᒃ? ᑖᓐᓇ ᖃᐅᔨᒪᕙᕋ ᐅᖃᓪᓚᑦᓯᐊᕈᓐᓇᕐᒪᑦ; ᑕᑯᒋᓪᓗ ᐃᓕᖕᓄᐊᓕᕐᐳᖅ ᐸᕐᕆᐊᕐᓗᑎᑦ, ᑕᑯᒍᓂᑎᓪᓗ ᐃᓗᒥᒍᑦ ᖁᕕᐊᓱᖕᓂᐊᕐᐳᖅ.

¹⁵ ᑖᑦᓱᒧᖓᓗ ᐅᖃᓪᓚᒃᑐᒃᓴᐅᕗᑎᑦ, ᑖᓐᓇ ᐅᖃᐅᓯᖃᕈᓐᓇᖁᓪᓗᒍ ᐅᖃᐅᓯᕆᔭᐅᖁᔭᕐᓂᒃ; ᐅᕙᖓ ᐅᖃᐅᓯᑎᑦ ᐃᓚᒋᓂᐊᕐᐸᒃᑲ, ᑖᑦᓱᒪᓗᑦᑕᐅᖅ ᐅᖃᐅᓯᖏᑦ ᐃᓚᒋᓂᐊᕆᕙᒃᑲ, ᐊᔪᕆᕐᑐᕐᓂᐊᕐᐸᒋᓪᓗ ᖃᓄᐃᓕᐅᕐᑐᒃᓴᐅᖕᒪᖔᕐᐱᑦ.

¹⁶ ᑖᓐᓇᓗ ᐃᓕᖕᓂᒃ ᐃᓇᖐᓗᓂ ᐃᓄᖕᓄᑦ ᐅᖃᓪᓚᖃᑦᑕᕐᓂᐊᕐᐳᖅ; ᑖᓐᓇᓗ ᐃᓕᖕᓄᑦ ᖃᓂᕆᔭᐅᔪᑎᑐᑦ ᑍᒤᓐᓂᐊᕐᐳᖅ, ᑖᑦᓱᒧᖓᓗ ᒎᑎᒋᔭᐅᔪᑎᑐᑦ ᑍᒤᓐᓂᐊᕐᐳᑎᑦ.

¹⁷ ᐊᔭᐅᑉᐱᐊᕐᓗ ᑕᒪᓐᓇ ᑎᒍᒥᐊᒐᒃᓴᕆᕙᑦ, ᑕᒪᑐᒨᓇ ᓇᓗᓁᒃᑯᑕᕐᓂᒃ ᐱᓇᓱᐊᕆᐊᖃᓛᕋᕕᑦ.”

ᒨᓯᓯᐅᑉ ᐅᑎᕐᓂᖓ ᐄᑦᔨᑉᑎᒧᑦ

¹⁸ ᒨᓯᓯᓗ ᐅᑎᕐᐳᖅ ᔨᑐᕉᒧᑦ ᓴᑭᒥᓄᑦ, ᐅᖃᐅᑎᓪᓗᓂᐅᒡᓗ, “ᐅᑎᕈᓐᓇᕐᑎᓚᐅᓐᖓᑐᖅ ᐃᓚᓐᓄᑦ ᐄᑦᔨᑉᑎᒦᑦᑐᓄᑦ, ᑕᑯᔭᕐᑐᕐᓗᖓ ᓱᓕ ᐃᓅᖕᒪᖔᑕ.” ᔨᑐᕉᓗ ᐅᖃᕐᐳᖅ ᒨᓯᓯᒧᑦ, “ᐃᓱᒫᓗᖏᓪᓗᑎᑦ ᐊᐅᓪᓚᓕᕆᑦ.”

¹⁹ ᐊᑕᓂᕐᓗ ᐅᖃᓚᐅᕆᕗᖅ ᒨᓯᓯᒧᑦ ᒥᑎᐊᓂᒦᑎᓪᓗᒍ, “ᐄᑦᔨᑉᑎᒧᑦ ᐅᑎᓕᕆᑦ; ᐃᓕᖕᓂᒃ ᑐᖁᑦᓯᔪᒪᓚᐅᕐᑐᓕᒫᑦ ᑐᖁᖓᓕᕐᒪᑕ.”

²⁰ ᑍᒤᒻᒪᑦ ᑕᕝᕙ ᒨᓯᓯᐅᑉ ᓄᓕᐊᓂ ᐃᕐᓂᓂᓗ ᐸᕐᓇᒃᑎᓕᕐᐰᑦ ᓯᐅᑎᖅᑯᕐᑐᔫᓪᓗ ᖄᖓᓄᑦ ᐃᑭᑎᓪᓗᒋᑦ, ᐄᑦᔨᑉᑎᒧᓪᓗ ᐅᑎᓕᕐᐳᖅ; ᐊᔭᐅᑉᐱᐊᕐᓗ ᒎᑎᐅᑉ ᐊᔭᐅᑉᐱᐊᖁᑎᖓ ᒨᓯᓯᐅᑉ ᓇᒃᓴᕐᐹ.

²¹ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐄᑦᔨᑉᑎᒧᑦ ᐅᑎᕈᕕᑦ, ᑲᒪᑦᓯᐊᕐᓂᐊᕐᐳᑎᑦ ᐱᓇᓱᐊᕐᑐᒃᓴᐅᒐᕕᑦ ᐰᕉᑉ ᓵᖓᓂ ᑕᒤᓐᓂᒃ ᑲᒪᓇᕐᑐᓕᓂᕐᓂᒃ ᑐᓂᓚᐅᕐᑕᓐᓂᒃ ᐃᓕᖕᓄᑦ, ᐰᕉᓕ ᓯᑎᔫᑎᓐᓂᐊᕐᐸᕋ, ᐃᓄᒋᐊᒃᑐᕐᔪᐊᓂᒃ ᐊᐅᓪᓚᖁᔨᖁᓇᒍ.

²² ᐰᕉᒧᓪᓕ ᐅᖃᕐᑐᒃᓴᐅᕗᑎᑦ, ‘ᐊᑕᓂᖅ ᐅᖃᕐᐳᖅ ᐃᒫᒃ, ᐃᓴᕆᐊᓕ ᐊᖓᔪᒃᓯᕐᐹᖁᑎᒋᕙᕋ ᐃᕐᓂᓐᓂᑦ,

²³ ᐅᖃᐅᑎᕙᒋᓪᓗ, ᐃᕐᓂᕋ ᐊᐅᓪᓚᕈᓐᓇᕐᑎᓚᐅᕈᒃ ᐱᔨᑦᓯᕈᓐᓇᖁᓪᓗᒍ ᐅᕙᓐᓂᒃ. ᐊᐅᓪᓚᖁᓂᐊᖏᒃᑯᕕᐅᒃ, ᑕᕝᕙ ᐊᖓᔪᒃᓯᕐᐹᖁᑏᑦ ᐃᕐᓃᑦ ᑐᖁᑎᓐᓂᐊᕐᐸᕋ.’”

²⁴ ᓯᓂᒃᑕᕐᕕᒋᔭᖓᓂᓕ ᐄᑦᔨᑉᑎᒧᐊᕐᐸᓪᓕᐊᓕᕐᑎᓪᓗᒋᑦ, ᐊᑕᓂᐅᑉ ᒨᓯᓯ ᐅᐸᒃᐹ ᑐᖁᓐᓇᓱᐊᕈᒪᓪᓗᒍ.

²⁵ ᑕᕝᕙ ᓯᐴᕋ ᓴᕕᖕᒥᒃ ᐃᐱᒃᑐᒥᒃ ᑎᒍᓯᕗᖅ, ᐃᕐᓂᕐᒥᓗ ᐅᓱᐊᑕ ᓄᕗᐊ ᑭᐱᕚ, ᑭᐱᓂᑯᐊᓗ ᒨᓯᓯᐅᑉ ᐃᑎᒐᖏᓐᓄᑦ ᐊᒃᑐᕐᑎᓪᓗᒍ, ᐅᖃᕐᐳᖅ, “ᖁᓚᕐᓇᖏᑦᑐᒥᒃ ᐊᐅᖃᕐᓗᑎᑦ ᐅᐃᒋᕙᒋᑦ!”

²⁶ ᑕᕝᕙ ᐊᑕᓂᐅᑉ ᒨᓯᓯ ᓱᖁᑎᒋᔪᓐᓃᕐᐹ. ᑕᒪᓐᓇ ᑕᕝᕙ ᐱᑦᔪᑎᒋᓪᓗᒍ ᓯᐴᕋ ᐅᖃᓚᐅᕐᐳᖅ, “ᖁᓚᕐᓇᖏᑦᑐᒥᒃ ᐊᐅᖃᕐᓗᑎᑦ ᐅᐃᒋᕙᒋᑦ,” ᑭᐱᔭᐅᓂᖅ ᐱᑦᔪᑎᒋᓪᓗᒍ.

²⁷ ᐊᑕᓂᕐᓗ ᐅᖃᕐᐳᖅ ᐂᕉᓂᒧᑦ, “ᐃᓄᖃᖏᑦᑐᒧᐊᓕᕆᑦ ᒨᓯᓯ ᐸᕐᕆᐊᕐᓗᒍ.” ᑕᕝᕙ ᑖᕗᓐᖓᓕᕐᐳᖅ, ᑲᑎᕚᓗ ᒎᑎᐅᑉ ᖃᖅᑲᖁᑎᖓᓂ, ᑲᑎᒐᒥᐅᒡᓗ ᑯᓂᒃᐹ.

²⁸ ᒨᓯᓯᐅᓪᓗ ᐂᕉᓂ ᐅᓂᒃᑲᐅᑎᕚ ᑕᒤᓐᓂᒃ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ ᑎᓕᔭᐅᓯᒪᓂᕐᒥᓂᒡᓗ, ᓇᓗᓁᒃᑯᑕᕐᓂᒡᓗ ᐊᑐᖁᔭᐅᓂᕆᔭᒥᓂᒃ ᑕᒤᓐᓂᒃ.

²⁹ ᑕᕝᕙ ᒨᓯᓯᒃᑯᒃ ᐂᕉᓂᒃᑯᒃ ᐄᑦᔨᑉᑎᒧᐊᕐᐴᒃ, ᑕᕝᕗᓐᖓᕋᒥᒡᓗ ᐃᓴᕆᐊᓕᒥᐅᑦ ᐊᖓᔪᖅᑳᓕᒫᖏᑦ ᑲᑎᒪᖃᑎᒋᕔᑦ.

³⁰ ᐂᕉᓂᓗ ᐅᓂᒃᑳᕐᐳᖅ ᑕᒤᓐᓂᒃ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ ᒨᓯᓯᒧᑦ, ᓇᓗᓁᒃᑯᑕᕐᓂᒡᓗ ᐱᓇᓱᐊᕐᓗᓂ ᐃᓄᐃᑦ ᓵᖏᓐᓂ.

³¹ ᐃᓄᐃᓪᓗ ᐅᒃᐱᕈᓱᓕᕐᐳᑦ; ᑐᓴᕋᒥᒡᓗ ᐊᑕᓂᐅᑉ ᐅᐸᒍᑎᓂᕕᓂᖓᓂᒃ ᐃᓴᕆᐊᓕᒥᐅᓄᑦ ᐅᖁᒤᒃᓴᕐᑎᑕᐅᓂᖏᓐᓂᒡᓗ ᑕᑯᓯᒪᓂᖓᓂᒃ ᖃᐅᔨᒐᒥᒃ, ᐅᑯᓪᓗᑎᒃ ᑐᒃᓯᐊᓕᕐᐳᑦ.