ᒨᓯᓯ ᐂᑉᐸᖏᑦ 38 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᕕᒃᓴᒥᒃ ᓴᓇᓂᖓᑦ

¹ ᑐᓂᕐᕈᓯᕐᕕᒃᓴᓕᐅᓚᐅᕆᕗᖅ ᐃᑯᐊᓚᑦᓯᕕᒃᓴᒥᒃ, ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ. ᑖᓐᓇᓗ ᓯᒃᑭᑕᓪᓗᐊᖑᓪᓗᓂ ᑕᑭᓂᖃᕐᓗᓂ 2.2ᓂᒃ ᒦᑕᓂᒃ ᓯᓕᖕᓂᖃᕐᓗᓂᓗ 2.2ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 1.3ᓂᒃ ᒦᑕᓂᒃ.

² ᑎᕆᖅᑯᖏᑕᓗ ᖄᖏᑎᒍᑦ ᓯᑕᒪᑎᒍᑦ ᓇᒡᔪᓐᖑᐊᓕᐅᕆᕚ, ᑖᒃᑯᐊᓕ ᑐᓂᕐᕈᓯᕐᕕᐅᑉ ᐃᓚᒋᕔᑦ ᐃᓕᐅᕋᕐᓯᒪᖏᓪᓗᑎᒃ. ᑖᓐᓇᓗ ᓯᓚᑉᐱᐊᕐᐹ ᐊᑕᖏᕐᓗᒍ ᑲᓐᓄᔭᒥᒃ.

³ ᑐᓂᕐᕈᓯᕐᕕᖕᒧᑦ ᐊᓪᓕᕋᒃᓴᓕᐅᕆᕗᖅ ᑐᓐᓄᕕᓃᑦ ᐊᕐᔭᓕᓂᖏᓐᓄᑦ ᐊᓪᓕᕋᒃᓴᒥᒃ: ᑖᒃᑯᓄᖓᓗ ᖃᓗᓯᑦᔪᑎᒃᓴᒥᒃ ᓴᓇᒋᕗᖅ, ᐴᒍᑕᓂᒡᓗ, ᓂᒃᓯᒐᐅᑎᓂᒡᓗ, ᐃᑯᒪᓂᒡᓗ ᐊᒡᔭᕐᓯᑦᔪᑎᒃᓴᓂᒃ; ᑕᒪᒃᑯᐊᓗ ᑲᓐᓄᔭᐅᕗᑦ.

⁴ ᑐᓂᕐᕈᓯᕐᕕᐅᑦᑕᐅᖅ ᕿᔪᖏᑦᑕ ᐃᓂᒃᓴᖓᓂᒃ ᓄᓗᐊᓐᖑᐊᓕᕆᓯᒪᔪᒥᒃ ᓴᓇᒋᕗᖅ ᑲᓐᓄᔭᒥᒃ ᑖᓐᓇᓗ ᕿᔪᒃᑯᕕᒃ ᓄᓗᐊᓐᖑᐊᓕᐊᕆᓯᒪᔪᖅ ᑐᓂᕐᕈᓯᕐᕕᐅᑉ ᖁᓛᑕ ᐊᑖᓃᑉᐳᖅ.

⁵ ᑎᕆᖅᑯᖏᑎᒍᓪᓗ ᓯᑕᒪᓂᒃ ᓂᒃᓯᒡᕕᓕᐅᕐᐹ ᓄᕐᓗᓂᒃ ᑖᑦᓱᒪ ᑐᓂᕐᕈᓯᕐᕕᐅᑉ ᐃᓗᖔᖓᓃᓪᓗᓂ ᖁᓛᑕᓗ ᓇᑎᖓᑕᓗ ᐊᑯᓐᓂᖓᓂ ᐃᓂᖃᕐᑐᒥᒃ.

⁶ ᕿᔪᑯᑖᖕᓂᒡᓗ ᓴᓇᒋᕗᖅ ᐊᑭᕋᐅᑎᒃᓵᖕᓂᒃ ᑐᓂᕐᕈᓯᕐᕕᖕᒥᒃ ᑎᓴᒃᑕᓂᒃ ᐊᑬᑦᓯᐊᒥᑦ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᐰᑦ ᑲᓐᓄᔭᒥᒃ,

⁷ ᐊᑭᕋᐅᑎᖏᒡᓗ ᑐᓂᕐᕈᓯᕐᕕᐅᑉ ᓄᕐᓗᖏᑎᒍᑦ ᑲᐅᑎᓯᒪᕘᒃ. ᑖᓐᓇᓗ ᑐᓂᕐᕈᓯᕐᕕᒃ ᓴᓇᓯᒪᕗᖅ ᓵᑦᑐᔮᓂᑦ ᐃᓗᐊ ᐃᓗᓕᖃᖏᓪᓗᒍ ᓴᓇᕙᑦ.

ᐴᒍᑕᕐᒥᒃ ᑲᓐᓄᔭᒥᒃ ᓴᓇᓂᖓᑦ

⁸ ᐴᒍᑕᕐᒥᒃ ᑲᓐᓄᔭᒥᒃ ᓴᓇᒋᕗᖅ ᑲᓐᓄᔭᒥᒡᓗ ᐊᓪᓕᕋᖃᕐᓗᒍ ᐊᕐᓁᑦ ᑕᕐᕋᕐᑑᑎᖏᓐᓂᑦ ᓴᓇᓚᐅᕐᐳᖅ ᐊᑕᓂᐅᑉ ᓇᔪᒐᖓᑕ ᑐᐱᐅᑉ ᐃᑎᕐᑕᕐᕕᖓᓂ ᐱᓇᓱᐊᕐᑎᐅᔫᑉ ᐱᖁᑎᕕᓂᖓᓂᒃ.

ᑐᐱᐅᑉ ᐊᑕᓂᐅᑉ ᓇᔪᒐᖓᑕ ᓱᓇᑐᐃᓐᓇᒃᓴᖏᑕ ᓴᓇᔭᐅᓂᖏᑦ

⁹ ᑐᐱᕐᒥ ᐊᑕᓂᐅᑉ ᐃᓂᒃᓴᕆᓂᐊᕐᑕᖓᓂ ᐃᒡᓗᐊᕈᓯᓕᐅᓚᐅᕆᕗᖅ ᑲᓪᓗᓈᕐᑕᑦᓯᐊᕙᖕᓂᒃ ᓵᑦᑐᓂᒃ ᑖᓗᑕᖃᕐᓗᒍ. ᑐᐱᕐᒥ ᓯᕿᓂᐅᑉ ᓇᓛᓃᑦᑐᒃᑯᑦ ᐋᖅᑮᕗᖅ ᑖᓗᑕᕐᒥᒃ ᓴᓂᒧᑐᓂᖃᕐᑎᓪᓗᒍ 44ᓂᒃ ᒦᑕᓂᒃ,

¹⁰ ᓇᐸᔪᖃᕐᓗᓂᓗ 20ᓂᒃ ᑖᒃᑯᐊᓗ ᑐᓐᖓᕕᖃᕐᐳᑦ 20ᓂᒃ ᐊᑐᓂᑦ ᑲᓐᓄᔭᐅᓪᓗᑎᒃ, ᓇᐸᔪᖏᓪᓕ ᓂᒃᓯᖃᕐᐳᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᒋᓪᓗᑎᒃ.

¹¹ ᑍᒫᑦᓮᓐᓇᕐᑕᐅᖅ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓐᓂᕐᓴᖅ ᑖᓗᑕᖅ ᐃᒡᓗᐊᓃᑦᑐᑎᑐᑦ ᐋᖅᑭᒃᓯᒪᒋᕗᖅ; ᓇᐸᔪᖃᕐᓗᓂ 20ᓂᒃ ᑐᓐᖓᕕᖃᕐᓗᑎᒡᓗ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᐳᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᒋᓪᓗᑎᒃ.

¹² ᓯᕿᓂᐅᓪᓕ ᓂᐱᕕᐊᑕ ᓇᓛᓃᑦᑐᖅ ᑖᓗᑕᖅ ᓴᓂᒧᑐᓂᖃᕐᐳᖅ 22ᓂᒃ ᒦᑕᓂᒃ, ᓇᐸᔪᖃᕐᓗᓂᓗ 10ᓂᒃ ᑐᓐᖓᕕᖃᕐᓗᑎᒡᓗ ᐊᑐᓂᑦ 10ᓂᒃ.

¹³ ᓯᕿᓂᐅᓪᓕ ᓄᐃᕕᐊᑕ ᓇᓛᓃᑦᑐᖅ, ᐃᒡᓗᐊᕈᓯᐅᑉ ᐃᑎᕐᑕᕐᕕᒃᓴᖓ, ᓴᓂᒧᑐᓂᖃᕐᐳᖅ 22ᓂᒃ ᒦᑕᓂᒃ.

¹⁴ ᐃᑎᕐᑕᕐᕕᖓᓕ ᑖᓗᑕᖃᕐᐳᖅ ᐊᕙᒻᒧᑦ ᒪᑐᐃᕐᑕᕐᑐᒥᒃ ᐃᒡᓗᐊ ᓴᓂᒧᑦ ᓯᓕᖕᓂᖃᕐᓗᓂ 6.6ᓂᒃ ᒦᑕᓂᒃ, ᑖᒃᑯᐊᓗ ᓇᐸᔪᖃᕐᐳᑦ ᐱᖓᓱᓂᒃ ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ.

¹⁵ ᐃᒡᓗᐊᑦᑕᐅᖅ ᑍᒫᓪᓗᐊᖅ ᐊᖏᓂᖃᕆᕗᖅ ᓯᓕᖕᓂᖃᕐᓗᓂ 6.6ᓂᒃ ᒦᑕᓂᒃ, ᓇᐸᔪᖃᕐᓗᑎᒡᓗ ᐱᖓᓱᓂᒃ; ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ.

¹⁶ ᐊᕙᑎᓕᒫᖓᓂᓕ ᑖᓗᑕᖏᑦ ᓴᓇᓯᒪᓚᐅᕐᐳᑦ ᖃᓪᓗᓈᕐᑕᑦᓯᐊᕙᖕᒥᑦ ᓵᑦᑐᒥᑦ.

¹⁷ ᓇᐸᔪᓕᒫᖏᓪᓗ ᐃᑦᔪᕐᓁᑦᑐᕕᖕᒦᑦᑐᑦ ᑲᓱᕐᓯᒪᐅᑎᕗᑦ ᐃᑳᖓᔪᖃᕐᓗᑎᒃ ᓯᐅᓪᕕᕆᓂᒃ, ᓂᒃᓯᖏᓪᓗ ᓯᐅᓪᕕᕆᐅᖕᒥᓗᑎᒃ ᓇᐸᔪᖏᓪᓗ ᑐᓐᖓᕕᖃᕐᓗᑎᒃ ᑲᓐᓄᔭᓂᒃ.

¹⁸ ᐃᑎᕐᑕᕐᕕᓪᓚᕆᖓᓕ ᑖᓗᑕᖃᕐᐳᖅ ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᖃᕐᓗᓂ, ᐊᐅᐸᓪᓚᕆᒃᑐᖃᕐᓗᓂᓗ, ᐊᐅᐸᕐᑐᖃᕐᓗᓂᓗ ᓄᕕᕐᓵᒃᓴᔭᐅᓪᓗᓂ, ᑖᒃᑯᐊᓗ ᑕᕐᓯᕐᓱᕐᓯᒪᓪᓗᑎᒃ ᒥᕐᓱᕐᓯᒪᔪᓂᒃ. ᑐᑭᒧᓪᓕ ᑕᑭᓂᖃᕐᐳᖅ 9ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 2ᒦᑕᓂᒃ, ᑕᒪᒃᑯᐊ ᑖᓗᑍᑦ ᐊᖏᓂᕆᔭᖏᑎᑐᑦ.

¹⁹ ᑕᒪᒃᑯᐊᓗ ᓇᐸᑦᔪᑎᖃᕐᐳᑦ ᓯᑕᒪᓂᒃ ᓇᐸᔪᓂᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ. ᓂᒃᓯᖏᓪᓗ, ᖄᖓᓃᑦᑐᓪᓗ ᐅᓕᒋᔭᖏᑦ, ᓇᐸᔪᕆᔭᖏᓪᓗ ᓴᓇᓯᒪᓚᐅᕐᐳᑦ ᓯᐅᓪᕕᕆᒥᑦ.

²⁰ ᑐᐱᐅᓪᓕ ᓄᖃᕐᑑᑎᖏᑕ ᐸᐅᒍᐊᖏᑦ ᐊᕙᓗᖏᑕᓗ ᓄᖃᕐᑐᕐᕕᖏᑦ ᑲᓐᓄᔭᐅᕗᑦ.

ᓴᕕᕋᔧᑦ ᐊᑐᕐᑕᐅᓚᐅᕐᑐᑦ ᐊᑕᓂᐅᑉ ᓇᔪᒐᖓᓄᑦ ᑐᐱᕐᒧᑦ

²¹ ᒪᑯᐊ ᑕᕝᕙ ᐊᑐᕐᑕᐅᓚᐅᕐᑐᑦ ᓴᕕᕋᔧᑦ ᑐᐱᓕᐅᕐᑐᓄᑦ ᐊᑕᓂᐅᑉ ᓇᔪᒐᕆᔭᖓᓄᑦ, ᑕᕝᕙᓂ ᑖᒃᑯᐊᒃ ᐅᔭᕌᒃ ᐱᖁᔭᓂᒃ ᖁᓕᓂᒃ ᑎᑎᕋᕐᕕᐅᓯᒪᔪᑦ ᐃᓂᒃᓴᖃᕐᕕᒋᔭᖓᓂ. ᑕᒪᒃᑯᐊᓗ ᓇᓗᓁᕐᓯᒪᕗᑦ ᒨᓯᓯᐅᑉ ᐊᑐᒐᒃᓴᐅᓂᕋᓚᐅᕐᑕᖏᓐᓂᒃ ᒪᓕᒃᓯᒪᓪᓗᑎᒃ ᓕᕔᑎᒃᑯᓐᓂᑦ ᓴᓇᔭᐅᓚᐅᕐᑐᑦ ᐊᐅᓚᑦᓯᔨᖃᕐᑎᓪᓗᒋᑦ ᐃᑕᒫᕐᒥᒃ ᐂᕉᓂᐅᑉ ᐃᕐᓂᖓᓂᒃ.

²² ᐱᔭᓕᐅᓪᓕ, ᐅᕆᐅᑉ ᐃᕐᓂᖓ ᕼᐅᕆᐅᑉ ᐃᕐᖑᑕᖓ, ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᖅ, ᑕᒤᓐᓂᒃ ᓴᓇᓚᐅᕐᐳᖅ ᐊᑕᓂᐅᑉ ᓴᓇᔭᐅᖁᓚᐅᕐᑕᖏᓐᓂᒃ ᒨᓯᓯᒃᑯᑦ.

²³ ᐃᑲᔪᕐᑎᖓᓗ, ᐅᕼᐅᓕᐊᑉ ᐊᕼᐃᓴᒪᑭᐅᑉ ᐃᕐᓂᖓ, ᑖᓐ ᑭᖑᕚᖏᓐᓂᑦ ᐱᓯᒪᔪᖅ, ᑖᓐᓇ ᓴᓇᓐᖑᐊᕐᑎᐅᓚᐅᕐᐳᖅ, ᐃᒤᓕᖓᓂᒃᓴᖏᓐᓂᒡᓗ ᐋᖅᑭᒃᓱᐃᔨᐅᓪᓗᓂ, ᓄᕕᕐᓴᕐᑎᐅᓪᓗᓂᓗ ᖃᓪᓗᓈᕐᑕᑦᓯᐊᓂᒃ ᑐᖑᔪᕐᑐᓕᖕᓂᒃ, ᐊᐅᐸᓪᓚᕆᒃᑐᓂᒡᓗ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ.

²⁴ ᒎᓗᓕᒫᑦᓯᐊᑦ ᑲᑎᑦᓱᒋᑦ ᐊᑕᓂᕐᒧᑦ ᑐᓂᔭᐅᓚᐅᕐᑐᑦ ᑐᐱᕐᒧᑦ ᐃᑦᔪᕐᓁᑦᑐᒧᑦ ᐊᑐᕐᑐᒃᓴᐅᖁᓪᓗᒋᑦ ᐅᖁᒤᓐᓂᖃᓚᐅᕐᐳᑦ 1,000ᓂᒃ ᑭᓗᒍᕌᓂᒃ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ.

²⁵ ᓯᐅᓪᕕᕇᓪᓗ ᓄᓇᓕᓕᒫᑦ ᐃᓄᖏᓐᓄᑦ ᓈᓴᕐᑕᐅᓯᒪᔪᓄᑦ ᑐᓂᔭᐅᓯᒪᔪᑦ ᐅᖁᒤᓐᓂᖃᓚᐅᕐᐳᑦ 3,430ᓂᒃ ᑭᓗᒍᕌᓂᒃ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ.

²⁶ ᑖᒃᑯᐊ ᐃᓄᐃᑦ ᐅᓄᕐᓂᖏᑦ ᐊᑐᓂᑦ ᓈᓴᕐᑕᐅᓯᒪᔪᑦ ᐊᑦᔨᒌᒥᒃ ᐊᑭᓖᑎᑕᐅᔪᑦ ᒪᓕᒡᓗᒋᑦ ᑍᒫᒃ ᐊᑐᓂᑦ ᐊᑭᓕᐅᑎᒋᔭᐅᖁᔭᐅᔪᒥᒃ ᒪᓕᒡᓗᑎᒃ ᐊᑭᓖᓚᐅᕐᒪᑕ, ᐅᖁᒤᓐᓂᕐᓯᐅᑎᑦ ᐊᑐᕐᑕᐅᒐᔪᒃᐸᒃᑐᑦ ᒪᓕᒡᓗᒋᑦ. ᐊᖑᑎᑦ ᐊᕐᕌᒍᓖᑦ 20ᓂᒃ ᐱᒋᐊᕐᓗᒋᑦ ᐅᖓᑖᓄᑦ ᐊᕐᕌᒍᓖᑦ ᑎᑭᓪᓗᒋᑦ ᓈᓴᕐᑕᐅᓯᒪᔪᑦ ᐅᓄᕐᓂᖃᓚᐅᕐᐳᑦ 603,550ᓂᒃ.

²⁷ ᓯᐅᓪᕕᕇᓪᓕ, ᐅᖁᒤᓐᓂᖃᓚᐅᕐᐳᑦ 3,400ᓂᒃ ᑭᓗᒍᕌᓂᒃ 100ᓄᑦ ᑐᓐᖓᕕᒃᓴᓄᑦ ᐊᑐᕐᑕᐅᓚᐅᕐᑐᑦ ᑐᐱᕐᒧᑦ ᐃᑦᔪᕐᓁᑦᑐᒧᑦ ᑖᓗᑕᕆᔭᖏᓐᓄᓪᓗ, ᑐᓐᖓᕕᒡᓗ ᐊᑕᐅᓯᖅ ᐊᑐᓂᑦ ᐅᖁᒤᓐᓂᖃᕐᐳᖅ 34ᓂᒃ ᑭᓗᒍᕌᓂᒃ.

²⁸ ᐊᒥᐊᒃᑯᒋᔭᖏᓪᓗ ᓯᐅᓪᕕᕇᑦ 30ᓂᒃ ᑭᓗᒍᕌᓂᒃ ᐅᖁᒤᓐᓂᓖᑦ ᐸᔧᓕᐅᓪ ᓴᓇᓚᐅᕆᕔᑦ ᕿᕋᑦᑕᖅᑯᑎᒃᓴᐅᓪᓗᑎᒃ, ᓇᐸᔪᓄᓪᓗ ᓂᕕᓐᖓᕕᐅᔪᓄᑦ ᓂᒃᓯᒋᔭᐅᓪᓗᑎᒃ, ᐅᓕᒋᔭᐅᔫᓪᓗ ᖃᓕᐊᕈᑕᖓᑕ ᐋᖅᑭᒃᓯᒪᐅᑎᒋᓪᓗᓂᒋᑦ.

²⁹ ᑲᓐᓄᔧᓪᓕ ᐊᑕᓂᕐᒧᑦ ᑐᓂᕐᕈᑎᒋᔭᐅᓚᐅᕐᑐᑦ ᐅᖁᒤᓐᓂᖃᕐᐳᑦ 2,425ᓂᒃ ᑭᓗᒍᕌᓂᒃ.

³⁰ ᑕᒪᒃᑯᓄᖓᓗ ᑐᐱᐅᑉ ᐃᑎᕐᑕᕐᕕᖓᑕ ᑐᓐᖓᕕᒃᓴᖏᓐᓂᒃ ᓴᓇᓚᐅᕐᐳᖅ ᐊᑕᓂᐅᑉ ᓇᔪᒐᒃᓴᖓᓄᑦ, ᑐᓂᕐᕈᓯᕐᕕᒡᓗ ᑲᓐᓄᔭᖅ ᓴᒡᕙᓯᒡᕕᒋᔭᖏᓪᓗ ᑲᓐᓄᔭᐅᒋᓪᓗᑎᒃ, ᑐᓂᕐᕈᓯᕐᕕᐅᓪᓗ ᓱᓇᑐᐃᓐᓇᒃᓴᓕᒫᖏᓐᓄᑦ ᐊᑐᓚᐅᕆᕔᑦ.

³¹ ᐊᒻᒪᑦᑕᐅᖅ ᐊᕙᓗᓕᒫᖏᑕ ᓇᐸᔪᖏᓐᓄᑦ ᑐᓐᖓᕖᑦ; ᐊᕙᓗᖏᑕᓗ ᐃᑎᕐᑕᕐᕕᖏᓐᓄᑦ, ᑐᐱᐅᓪᓗ ᓄᖃᕐᑑᑎᖏᑕ ᐸᐅᒍᐊᒃᓴᖏᓐᓄᑦ ᑐᐱᐅᓪᓗ ᐊᕙᓗᓕᒫᖏᑕ ᓄᖃᕐᑑᓯᕐᕕᓕᒫᖏᓐᓄᑦ ᐊᑐᕐᑕᐅᓚᐅᕐᐳᑦ.