ᒨᓯᓯ ᐂᑉᐸᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦ

¹ “ᐱᔭᓕᐅᓪ, ᐅᕼᐅᓕᐊᑉ, ᐊᓯᖏᓪᓗ ᓴᓇᓐᖑᐊᕈᓐᓇᕐᑐᑦ ᐊᑕᓂᐅᑉ ᓴᓇᔪᓐᓇᕐᓂᕐᒥᒃ ᑐᓂᓯᕕᒋᓯᒪᔭᖏᑦ ᐋᖅᑭᒃᓱᐃᔪᓐᓇᕐᓂᕐᒥᒃ ᖃᐅᔨᒪᓂᕐᒥᒡᓗ, ᖃᓄᐃᑦᑐᑐᐃᓐᓇᕐᓂᒃ ᖃᓄᕐᓗ ᓴᓇᔭᕆᐊᒃᓴᖏᓐᓂᒃ ᖃᐅᔨᒪᔪᓐᓇᕐᓂᕐᒥᒃ ᖃᓄᕐᓗ ᐋᖅᑭᒃᑕᐅᔭᕆᐊᖃᕐᓂᖏᓐᓂᒃ ᑐᐱᐅᑉ ᐃᑦᔪᕐᓁᑦᑑᑉ ᓱᓇᑐᐃᓐᓇᒃᓴᓕᒫᖏᓐᓂᒃ, ᐱᓇᓱᐊᕈᓐᓇᓚᐅᕐᐳᑦ ᐊᑕᓂᐅᑉ ᓴᓇᔭᐅᖁᓚᐅᕐᑕᓕᒫᖏᓐᓂᒃ.”

ᐃᓄᐃᑦ ᑐᓂᕐᕈᓯᕐᓂᖏᑦ ᐅᓄᕐᑐᓂᒃ

² ᒨᓯᓯᐅᑉ ᐱᔭᓕᐅᓪ ᕾᖁᕚ, ᐅᕼᐅᓕᐊᑉᓗ, ᐊᓯᖏᓪᓗ ᓴᓇᔪᓐᓇᑦᓯᐊᕐᑐᑦ ᐊᖑᑎᑦ ᑖᒃᑯᓄᖓ ᐊᑕᓂᐅᑉ ᓴᓇᔪᓐᓇᕐᓂᕐᒥᒃ ᑐᓂᓯᕕᒋᓯᒪᔭᖏᓐᓄᑦ ᐃᑲᔪᕈᒪᑦᓯᐊᕐᑐᓄᓪᓗ, ᒨᓯᓯᐅᓪᓗ ᐅᖃᐅᑎᕔᑦ ᓴᓇᒋᐊᖁᓕᕐᓗᒋᑦ.

³ ᒨᓯᓯᐅᑉ ᑐᓂᓯᕕᒋᓚᐅᕐᐰᑦ ᐃᓴᕆᐊᓕᒥᐅᑦ ᑐᓂᕐᕈᑎᒋᓯᒪᔭᓕᒫᖏᓐᓂᒃ ᑐᐱᓕᐅᕈᑎᒃᓴᓂᒃ ᐃᑦᔪᕐᓁᑦᑐᒥᒃ. ᐃᓴᕆᐊᓕᒥᐅᓪᓕ ᓱᓕ ᐃᓄᖏᑦ ᐅᓪᓛᑕᒫᑦ ᑐᓂᕐᕈᓯᖃᑦᑍᓐᓇᓚᐅᕐᐳᑦ.

⁴ ᑕᕝᕙ ᓴᓇᔪᓐᓇᑦᓯᐊᕐᑐᑦ ᐊᖑᑎᑦ ᐊᑐᓂᑦ ᑐᐱᐅᑉ ᓱᓇᑐᐃᓐᓇᒃᓴᖏᓐᓂᒃ ᓴᓇᔭᕐᑐᕐᓗᑎᒃ ᕾᕗᑦ,

⁵ ᒨᓯᓯᒧᓪᓗ ᐅᖃᕐᓗᑎᒃ, “ᐃᓄᐃᑦ ᑐᓂᕐᕈᓯᓕᕐᐳᑦ ᐊᑐᕆᐊᖃᕐᑕᑦᑕ ᐅᖓᑖᓄᓗᐊᒻᒪᕆᒃ ᑐᐱᓕᐅᕈᑎᒃᓴᓄᑦ ᐊᖏᓗᐊᒻᒪᕆᓕᕐᑐᓂᒃ ᐊᑕᓂᐅᑉ ᓴᓇᔭᐅᖁᓚᐅᕐᑕᖓᓂᒃ.”

⁶ ᑕᕝᕙ ᒨᓯᓯ ᐱᖁᔨᓪᓗᓂ ᑎᓕᓯᓕᕐᐳᖅ ᓄᓇᓕᓕᒫᑦ ᐅᖃᐅᑦᔭᐅᖁᓪᓗᒋᑦ ᓇᓪᓕᐊᓐᓂᒡᓘᓐᓃᑦ ᑐᓂᕐᕈᓯᕐᑐᖃᕐᑐᒃᓴᐅᔪᓐᓁᕐᐳᖅ ᑐᐱᒃᓴᒧᑦ ᐃᑦᔪᕐᓁᑦᑐᒧᑦ ᑐᕌᖓᓂᐊᕐᑐᓂᒃ; ᑕᕝᕙ ᐃᓄᐃᑦ ᑐᓂᕐᕈᓯᕐᑐᖃᒃᑲᓐᓁᕈᓐᓃᕐᐳᑦ.

⁷ ᑕᒪᒃᑯᐊ ᑐᓂᔭᐅᓯᒪᔪᑦ ᓈᒻᒪᓗᐊᒻᒪᕆᓕᓚᐅᕐᐳᑦ ᓴᓇᔭᐅᔭᕆᐊᓖᑦ ᐱᓇᓱᐊᕐᑕᐅᑦᔪᑎᒃᓴᖏᓐᓄᑦ ᐱᔭᕇᕐᑕᐅᔪᓐᓇᕈᑎᒃᓴᖏᓐᓄᓪᓗ.

ᑐᐱᕐᒥᒃ ᓴᓇᓂᖓᑦ ᐊᑕᓂᐅᑉ ᓇᔪᒐᒃᓴᖓᓂᒃ

⁸ ᑖᒃᑯᓇᓐᖓᑦ ᐊᖑᑎᓂᑦ ᓴᓇᑦᓯᐊᕈᓐᓇᕐᓂᕐᐹᓄᑦ ᓴᓇᔭᐅᓚᐅᕐᐳᖅ ᐊᑕᓂᐅᑉ ᓇᔪᒐᒃᓴᖓ ᑐᐱᖅ. ᓴᓇᓚᐅᕐᐳᑦ ᑐᐱᒃᓴᓂᒃ ᖁᒻᒧᑦ 10ᓂᒃ ᓴᓇᓯᒪᓪᓗᑎᒃ ᖃᓪᓗᓈᕐᑕᓕᐊᕆᓯᒪᔪᓂᑦ ᐱᐅᓂᕐᐹᖑᔪᓂᑦ ᑐᖑᔪᕐᑐᓂᒃ, ᐊᐅᐸᓪᓚᕆᒃᑐᓂᒃ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ; ᑖᒃᑯᐊᓗ ᐊᑐᓂᑦ 10 ᒥᕐᓱᕐᓯᒪᔪᓂᒃ ᑕᕐᓴᓕᐅᕐᑕᐅᕗᑦ ᓯᕈᐲᒻᖑᐊᓂᒃ ᓴᓇᑦᓯᐊᕈᓐᓇᕐᑐᒧᑦ ᓴᓇᔭᐅᓯᒪᔪᓂᒃ ᓴᓇᔭᐅᕗᑦ.

⁹ ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᐊᖏᓂᖃᕐᐳᑦ, ᑐᑭᒧᑦ ᑕᑭᓂᖃᕐᓗᑎᒃ 14ᓂᒃ ᐆᒃᑑᑎᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ.

¹⁰ ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑉᐰᑦ; ᐂᑉᐸᖏᓪᓗ ᑕᓪᓕᒪᑦᑕᐅᖅ ᑍᒫᒃ ᒥᕐᓱᕐᓗᒋᑦ ᑲᑎᒃᑭᓪᓗᒋᑦ.

¹¹ ᐳᑐᓕᖕᓂᒡᓗ ᓴᓇᕗᑦ ᑐᖑᔪᕐᑐᓂᒃ ᓯᓈᒍᑦ ᓯᓚᑎᖔᖓᒍᑦ ᓂᕕᖓᓂᐊᕐᑐᓂᒃ, ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ ᓯᓈᒍᑦ ᐳᑐᓕᖕᓂᒃ ᓴᓇᒋᕗᑦ.

¹² ᓂᕕᖓᓂᐊᕐᑐᒥ ᑖᓗᑕᕐᒥ ᐊᑕᐅᓯᕐᒥ 50ᓂᒃ ᐳᑐᓕᖕᓂᒃ ᓴᓇᒋᕗᑦ, ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ 50ᓂᒃ ᐳᑐᓕᐅᕐᐰᑦ ᓯᓈᒍᑦ; ᑖᒃᑯᐊᓗ ᐳᑐᖏᑦ ᐊᑐᓂᑦ ᐊᑭᓕᕇᒃᑎᑦᓱᒋᑦ.

¹³ ᓂᒃᓯᖕᓂᒡᓗ ᒎᓗᓂᒃ 50ᓂᒃ ᓴᓇᒋᕗᑦ, ᑖᒃᑯᐊ ᑖᓗᑕᕐᓂᒃ ᓂᕕᖓᔪᒃᓵᖕᓂᒃ ᒪᕐᕉᖕᓂᒃ ᑲᓱᕐᓯᒪᑦᔪᑕᐅᓪᓗᑎᒃ, ᑖᓐᓇ ᑐᐱᖅ ᑲᑎᓐᖓᓗᓂ ᐊᑕᐅᓯᐅᓕᖅᑲᖓᓕᖁᓪᓗᒍ.

¹⁴ ᐊᒻᒪ ᑐᐱᐅᑉ ᓯᓚᑉᐱᐊᒃᓴᖓᓂᒃ ᓴᓇᒋᕗᑦ ᒎᑦᓯᐅᑉ ᒥᖅᑯᕕᓂᖏᓐᓂᒃ ᑐᐱᒃᓴᓕᐊᕆᓯᒪᔪᒥᒃ; ᑖᒃᑯᐊᓗ ᑲᑎᓯᒪᔪᑦ 11ᐅᓪᓗᑎᒃ.

¹⁵ ᑖᒃᑯᐊᓗ ᐊᑦᔨᒌᓂᒃ ᐊᖏᓂᖃᕐᑎᑉᐰᑦ, ᑐᑭᒧᑦ ᑕᑭᓂᖃᕐᓗᑎᒃ ᐆᒃᑑᑎᓂᒃ 15ᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ.

¹⁶ ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑉᐰᑦ, ᐂᑉᐸᖏᓪᓗ ᑲᑎᓪᓗᒋᑦ 6ᐅᓪᓗᒋᑦ ᐃᒻᒥᖕᓄᑦ ᒥᕐᓱᕐᐰᑦ.

¹⁷ ᓯᓈᒍᑦ 50ᓂᒃ ᐳᑐᓕᖕᓂᒃ ᓴᓇᒋᕗᑦ ᑕᕝᕘᓇ ᑭᖑᓪᓕᕐᐸᐅᔪᒃᑯᑦ, ᑍᒫᑦᓮᓐᓇᕐᑕᐅᖅ ᐂᑉᐸᖓ 50ᓂᒃ ᐳᑐᓕᐅᕐᐰᑦ ᓯᓈᒍᑦ.

¹⁸ ᑲᓐᓄᔭᓂᒃ 50ᓂᒃ ᓂᒃᓯᓕᐅᕆᕗᑦ ᑖᒃᑯᐊᓗ ᑐᐱᐅᑉ ᓯᓚᑉᐱᐊᖓᑕ ᐳᑐᖏᓐᓄᑦ ᐋᖅᑭᒃᑕᐅᓪᓗᑎᒃ, ᑖᒃᑯᐊᒃ ᒪᕐᕉᒃ ᑲᑎᓯᒪᐅᑎᒃᓴᖏᖕᓄᑦ ᐊᑕᐅᓯᐅᓕᓗᓂ ᑐᐱᕐᒧᑦ ᓯᓚᑉᐱᐊᒃᓴᐅᓕᖁᓪᓗᒍ.

¹⁹ ᐅᓕᒃᓵᖕᓂᒃ ᓱᓕ ᒪᕐᕉᖕᓂᒃ ᓴᓇᒋᕗᑦ, ᐂᑉᐸᖓ ᓰᐱᐅᑉ ᐊᖑᓴᓪᓗᖓᑕ ᐊᒥᖓ ᕿᑐᒻᒪᒃᓴᕐᓯᒪᔪᖅ ᐊᐅᐸᕐᑐᖅ ᐂᐸᖓᓕ ᐊᒥᖅ ᕿᑐᒻᒪᒃᓴᑦᓯᐊᕐᓯᒪᓪᓗᓂ, ᑕᒪᓐᓇ ᓯᓚᓪᓕᕐᐹᖑᓗᓂ ᓯᓚᑉᐱᐊᓕᐊᕆᕚᑦ.

²⁰ ᕿᔪᖕᓂᒃ ᑎᓴᒃᑕᓂᒃ ᑐᐱᐅᑉ ᐊᕙᓗᒃᓴᖏᓐᓂᒃ ᓴᓇᒋᕗᑦ ᐊᑬᑦᓯᐊᓂᒃ ᐊᑎᓕᖕᓂᒃ.

²¹ ᑖᒃᑯᐊᓗ ᐊᕙᓗᖏᑦ ᑐᑭᒧᑦ ᑕᑭᓂᖃᕐᐳᑦ ᓯᑕᒪᓂᒃ ᒦᑕᓂᒃ, ᓴᓂᒧᓪᓗ ᓯᓕᖕᓂᖃᕐᓗᑎᒃ 66ᓂᒃ ᓯᓐᑎᒦᑕᓂᒃ,

²² ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᑲᐱᒃᑎᕝᕕᓕᐅᕐᑕᐅᕗᑦ, ᑖᒃᑯᐊ ᐊᕙᓗᒃᓮᑦ ᐃᒻᒥᖕᓄᑦ ᑲᓱᕐᑎᑕᐅᕗᑦ ᑲᐱᒃᑎᓯᒪᑦᓯᐊᕐᓗᑎᒃ. ᑖᒃᑯᐊᓗ ᕿᔪᐃᑦ ᐊᕙᓗᒃᓮᑦ ᑍᒫᒃ ᑲᐱᑎᕝᕕᓕᐅᕐᓯᒪᕗᑦ.

²³ ᑐᐱᕐᓗ ᑖᓐᓇ ᐊᕙᓗᖃᕐᐳᖅ 20ᓂᒃ ᓯᕿᓂᐅᑉ ᓇᓛᓃᑦᑐᓂᒃ;

²⁴ ᑖᒃᑯᐊᓗ 20 ᐊᕙᓗᒃᓮᑦ ᑐᓐᖓᕕᒃᓴᖏᓐᓂᒃ ᑐᓐᖓᕕᓕᐅᕐᐳᑦ ᓯᐅᓪᕕᕆᓂᒃ 40ᓂᒃ, ᐊᑐᓂᑦ ᐊᕙᓗᒃᓴᖅ ᐊᑕᐅᓯᖅ ᒪᕐᕉᖕᓂᒃ ᑐᓐᖓᕕᖃᕐᑎᑉᐹᑦ ᑲᐱᒃᑎᓯᒪᓂᖏᖕᓄᑦ ᑐᓐᖓᕕᖏᒃ ᐋᖅᑭᑦᓯᐊᕐᓯᒪᖁᓪᓗᒋᒃ.

²⁵ ᐊᒻᒪᑦᑕᐅᖅ ᑐᐱᐅᑉ ᐃᒡᓗᐊ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐊᕙᓗᖃᕐᑎᑉᐹᑦ 20ᓂᒃ,

²⁶ ᑖᒃᑯᐊᓗ ᑐᓐᖓᕕᖃᕐᐳᑦ ᓯᐅᓪᕕᕆᓂᒃ 40ᓂᒃ, ᐊᑕᐅᓯᖅ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕐᓗᓂ, ᐊᓯᐊᓗ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕆᓪᓗᓂ.

²⁷ ᑐᐱᐅᓪᓕ ᑐᓄᐊ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᐊᕙᓗᓕᐅᕐᑕᐅᕗᖅ ᐊᕙᓗᒃᓴᓂᒃ 6ᓂᒃ.

²⁸ ᑐᐱᐅᓪᓗ ᑎᕆᖅᑯᐊ ᑐᓄᐊᓃᑦᑐᖅ ᒪᕐᕉᖕᓂᒃ ᐊᕙᓗᓕᐅᑕᐅᒋᕗᖅ.

²⁹ ᑖᒃᑯᐊᒡᓗ ᐊᕙᓗᒃᓵᒃ ᑎᕆᖅᑯᒃᓴᓕᐅᕐᑕᐅᕘᒃ ᐊᑖᒍᑦ ᑲᓱᕐᑎᑕᐅᓪᓗᑎᒃ ᑕᑉᐸᐅᖓ ᖁᓛᓄᑦ ᑎᑭᓪᓗᒋᒃ. ᐊᑐᓂᓪᓗ ᐊᕙᓗᒃᓵᒃ ᑎᕆᒃᑯᒃᓴᓕᐅᕐᑕᐅᕗᑦ ᑍᒫᑦᓮᓐᓇᖅ ᐋᖅᑭᒃᓯᒪᔪᒥᒃ.

³⁰ ᑍᒫᒃ ᑕᕝᕙ 8ᓂᒃ ᐊᕙᓗᒃᓴᓕᐅᕐᐳᑦ, ᑐᓐᖓᕕᖃᕐᓗᑎᒃ 16ᓂᒃ ᓯᐅᓪᕕᕆᓂᒃ; ᒪᕐᕉᖕᓂᒃ ᑐᓐᖓᕕᖃᕐᓗᓂ ᐊᕙᓗᒃᓴᖅ ᐊᑕᐅᓯᖅ.

³¹ ᕿᔪᑯᑖᓂᒃ ᕿᕋᑦᑕᖅᑯᑎᒃᓴᓂᒃ 15ᓂᒃ ᓴᓇᒋᕗᑦ ᕿᔪᖕᓂᒃ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ, ᑐᐱᐅᑉ ᐊᕙᓗᐊᑕ ᐃᒡᓗᐊ ᑕᓪᓕᒪᓂᒃ ᕿᕋᑦᑕᖅᑯᓯᕐᓗᒍ,

³² ᑕᓪᓕᒪᐅᒋᓪᓗᑎᒃ ᑐᐱᐅᑉ ᐃᒡᓗᐊᒍᑦ ᕿᕋᑦᑕᖅᑯᓯᐅᑎᔭᖏᑦ ᐊᕙᓗᖏᑎᒍᑦ, ᐊᒻᒪ ᑐᐱᐅᑉ ᑐᓄᐊᒍᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒃᑯᑦ ᑕᓪᓕᒪᐅᒋᓪᓗᑎᒃ ᐊᕙᓗᖏᑎᒍᑦ ᕿᕋᑦᑕᖅᑯᓯᐅᑎᔪᑦ.

³³ ᐊᕙᓗᖏᑕᓕ ᕿᑎᖓᒍᑦ ᕿᕋᑦᑕᖅᑯᓯᕐᑕᐅᒋᕗᖅ, ᖁᒻᒧᖓᔫᑉ ᓇᐸᔪᖓᑕ ᕿᑎᖓᒎᕐᑐᒥᒃ, ᑐᐱᐅᑉ ᐃᓱᐊᓂᑦ ᐃᓱᐊᓄᑦ ᓯᕗᒧᖓᔪᒥᒃ.

³⁴ ᐊᕙᓗᒃᓮᓪᓗ ᓯᓚᑉᐱᐊᕐᑕᐅᕗᑦ ᒎᓗᒥᒃ, ᓱᓪᓗᓕᖕᓂᒡᓗ ᒎᓗᓂᒃ ᕿᕋᑦᑕᖅᑯᑎᖏᓐᓄᑦ ᓇᔪᒻᒪᖅᑯᑎᒃᓴᓂᒃ ᐋᖅᑭᒃᓯᕗᑦ, ᑖᒃᑯᐊᑦᑕᐅᖅ ᕿᕋᑦᑕᖅᑯᑎᒃᓮᑦ ᓯᓚᑉᐱᐊᕐᑕᐅᒋᕗᑦ ᒎᓗᒥᒃ.

³⁵ ᑖᓗᑕᒃᓴᒥᒡᓗ ᓴᓇᒋᕗᑦ ᕿᐱᐅᕋᕐᓯᒪᔪᒥᒃ ᖃᓪᓗᓈᕐᑕᑦᓯᐊᕙᖕᒥᒃ ᑐᖑᔪᕐᑐᒥᒃ ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ ᓴᓇᑦᓯᐊᕈᓐᓇᕐᑐᒧᓪᓗ ᓴᓇᔭᐅᓯᒪᕗᑦ ᓯᕈᐲᒻᖑᐊᖅ ᐃᓴᕈᖃᕐᑐᖅ.

³⁶ ᑖᒃᑯᐊᓗ ᓂᕕᓐᖓᕐᑕᐅᕗᑦ ᓯᑕᒪᓄᑦ ᕿᔪᖕᓄᑦ ᑎᓴᒃᑕᓄᑦ ᐊᑬᑦᓯᐊᓂᒃ ᐊᑎᓕᖕᓄᑦ, ᒎᓗᓂᒃ ᓯᓚᑉᐱᐊᓕᕐᓯᒪᔪᓄᑦ, ᓂᒃᓯᖕᓄᑦ ᒎᓗᓄᑦ ᖃᖓᑕᑦᔪᑎᖃᕐᓗᑎᒃ, ᑕᕝᕙ ᑐᓐᖓᕕᓕᐅᕆᕗᑦ ᓯᑕᒪᓂᒃ ᓯᐅᓪᕕᕆᓂᒃ ᓇᐸᔪᐃᑦ ᓇᐸᑦᔪᑎᒃᓴᖏᓐᓂᒃ.

³⁷ ᑐᐱᐅᓪᓕ ᐃᑎᕐᑕᕐᕕᖓ ᑖᓗᑕᓕᐅᕐᑕᐅᒋᕗᖅ ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ ᑕᕐᓯᕐᓱᕐᓯᒪᓗᓂᓗ ᒥᕐᓱᕐᓯᒪᔪᓂᒃ.

³⁸ ᑖᒃᑯᐊ ᑖᓗᑍᑦ ᓇᑉᐸᖅᑯᑕᓕᐅᕐᑕᐅᕗᑦ ᕿᔪᖕᓂᒃ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ, ᑖᒃᑯᐊᓗ ᓯᓚᑉᐱᐊᕐᓯᒪᓪᓗᑎᒃ ᒎᓗᒥᒃ ᓂᒃᓯᖕᓄᓪᓗ ᒎᓗᓄᑦ ᖃᖓᑕᑎᑕᐅᓪᓗᑎᒃ; ᓇᐸᔪᐃᓪᓗ ᑐᓐᖓᕕᓕᐅᕐᐹᑦ ᐊᑐᓂᑦ ᑲᓐᓄᔭᓂᒃ ᑕᓪᓕᒪᓂᒃ.