ᒨᓯᓯ ᐂᑉᐸᖏᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᐸᑎᒧᑦ ᒪᓕᒐᕆᔭᐅᔪᒃᓴᑦ

¹ ᒨᓯᓯ ᑕᕝᕙ ᑲᑎᖁᔨᕗᖅ ᐃᓴᕆᐊᓕᒥᐅᑦ ᐃᓄᓕᒫᖏᓐᓂᒃ ᐅᖃᐅᑎᓪᓗᒋᓪᓗ, “ᐃᒫᒃ ᑕᕝᕙ ᐊᑕᓂᖅ ᐃᓕᑦᓯᓐᓂᒃ ᐱᖁᔨᓯᒪᕗᖅ,

² ᐅᓪᓗᓂᒃ 6ᓂᒃ ᐱᓇᓱᐊᒐᒃᓴᑦᓯᓐᓂᒃ ᐱᓇᓱᐊᕐᑐᒃᓴᐅᕗᓯ, ᐅᓪᓗᓪᓕ 7ᖓᓐᓂ ᑕᕾᕐᓯᕐᑐᒃᓴᐅᕗᓯ ᐅᓪᓗᕐᓗ ᑖᓐᓇ ᐃᑦᔪᕐᓁᑎᓪᓗᒍ ᐊᑕᓂᐅᑉ ᐅᓪᓗᕆᖕᒪᒍ; ᓇᓪᓕᐊᑦ ᑕᕝᕙᓂ ᐅᓪᓗᒥ ᐱᓇᓱᐊᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ;

³ ᐃᑯᒪᒥᒡᓘᓐᓃᑦ ᐃᑭᑦᓯᔪᒃᓴᐅᓐᖏᓚᓯ ᓴᐸᑎᐅᑉ ᐅᓪᓗᖓᓂ ᓇᓂᓕᒫᖅ ᐊᖏᕐᕋᑦᓯᓐᓂ.”

ᑐᓂᕐᕈᓯᕐᓂᖅ ᐃᑦᔪᕐᓁᑦᑐᒥ ᑐᐱᕐᒥ

⁴ ᒨᓯᓯ ᐃᓴᕆᐊᓕᒥᐅᓕᒫᓄᑦ ᐅᖃᕐᐳᖅ, “ᐃᒫᒃ ᑕᕝᕙ ᐊᑕᓂᖅ ᐱᖁᔨᓯᒪᕗᖅ:

⁵ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᓯ, ᑭᓇᒃᑯᓕᒫᑦ ᑐᓂᓯᔪᒪᔪᑦ ᑐᓂᕐᕈᓯᕐᑐᒃᓴᐅᕗᑦ; ᒪᑯᐊ ᑕᕝᕙ ᑐᓂᔭᐅᔪᓐᓇᕐᐳᑦ ᒎᓗᐃᑦ, ᓯᐅᓪᕕᕇᑦ, ᐅᕝᕙᓗ ᑲᓐᓄᔧᑦ,

⁶ ᐅᕕᓂᕈᒃᓴᔧᓪᓗ ᓵᑦᑐᑦ; ᑐᖑᔪᕐᑐᐃᑦ ᐊᐅᐸᓪᓚᕆᒃᑐᓪᓗ ᐊᐅᐸᕐᑐᓪᓗ ᓄᕕᕐᓵᒃᓮᑦ; ᐊᓐᓄᕌᓕᐊᕆᓯᒪᔪᓪᓗ ᒎᓯᐅᑉ ᒥᖅᑯᖏᓐᓂᑦ.

⁷ ᓰᐱᐅᓪᓗ ᐊᖑᓴᓪᓗᖏᑕ ᐊᒥᖏᓐᓂᒃ ᕿᑐᒻᒪᒃᓴᕐᓯᒪᔪᓂᒃ ᐊᐅᐸᕐᑐᓂᒃ, ᐊᒥᕐᓂᒡᓗ ᕿᑐᒻᒪᒃᓴᕐᓯᒪᔪᓂᒃ, ᕿᔪᖕᓂᒡᓗ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ,

⁸ ᓇᓂᕈᐊᓪᓗ ᐅᕐᓱᒃᓴᖏᓐᓂᒃ, ᓇᐹᕐᑑᓪᓗ ᐅᕐᓱᖓᑕ ᒥᖑᐊᕐᓯᒍᑎᐅᑉ ᑎᐱᑦᓯᐊᕆᒃᓴᐅᑎᖓᓂᒃ, ᑎᐱᑦᓯᐊᕆᒃᑐᓂᒡᓗ ᐃᓯᕐᓗᐊᕐᓂᑎᑦᓯᒍᑎᒃᓴᓂᒃ,

⁹ ᐅᔭᕋᖕᓂᒡᓗ ᐊᑭᑐᔪᒃᓴᔭᓂᒃ ᐊᑎᖃᕐᑐᓂᒃ ᑳᕐᓂᓕᐊᓂᒃ, ᐊᓯᖏᓐᓂᒡᓗ ᐅᔭᕋᖕᓂᒃ ᐱᐅᓴᐅᑎᒋᔭᐅᔪᒃᓴᓂᒃ, ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᖏᓐᓂ ᐃᐹᑎᒥᒃ ᐊᑎᓕᖕᒥᒃ.”

ᓱᓇᑐᐃᓐᓇᒃᓮᑦ ᐊᑕᓂᐅᑉ ᓇᔪᒐᖓᓄᑦ ᑐᐱᕐᒧᑦ

¹⁰ “ᑕᒪᕐᒥᑦᓯᐊᖅ ᓴᓇᔪᓐᓇᑦᓯᐊᕐᑐᑦ ᐃᓕᑦᓯᓐᓃᑦᑐᑦ ᓴᓇᔪᒃᓴᐅᕗᑦ ᑐᐱᐅᑉ ᐃᓗᐊᓃᑦᑐᒃᓴᓕᒫᓂᒃ ᐊᑕᓂᐅᑉ ᓴᓇᔭᐅᖁᓯᒪᔭᖏᓐᓂᒃ:

¹¹ ᑐᐱᖅ ᓯᓚᑉᐱᐊᖓᓗ, ᓂᒃᓯᖏᓪᓗ ᓯᓇᕐᔪᒃᓯᐅᑎᖏᓪᓗ, ᐃᑳᖓᔪᖏᓪᓗ, ᓇᐸᔪᖏᓪᓗ, ᓇᐸᔪᖏᑕᓗ ᑐᓐᖓᕕᒃᓴᖏᑦ;

¹² ᐊᖏᖃᑎᒌᖕᓂᐅᓪᓗ ᐃᒃᓯᕐᕕᖁᑎᒃᓴᖓ, ᓇᐸᔪᒃᓴᖏᓪᓗ, ᒪᑐᒃᓴᖓᓗ, ᐊᕙᑖᒍᓪᓗ ᑖᓗᑕᒃᓴᖏᑦ;

¹³ ᓵᓗ, ᓂᐅᒃᓴᖏᓪᓗ, ᓱᓇᑐᐃᓐᓇᒃᓴᓕᒫᖏᓪᓗ; ᓂᐊᑰᔭᓪᓗ ᑐᓂᔭᐅᔪᒃᓴᑦ ᒎᑎᒧᑦ;

¹⁴ ᓇᓂᕈᐊᓪᓗ ᑐᓐᖓᕕᒃᓴᖏᑦ ᖃᐅᒻᒪᖅᑯᑎᒃᓮᓪᓗ, ᓱᓇᑐᐃᓐᓇᒃᓴᓕᒫᖏᓪᓗ; ᓇᓂᕈᐊᒃᓮᓪᓗ, ᓇᓂᕈᐊᓪᓗ ᐅᕐᓱᒃᓴᖏᑦ;

¹⁵ ᑐᓂᕐᕈᓯᕐᕕᒃᓮᑦ ᐃᓯᕐᓗᐊᕐᓂᑎᑦᓯᕕᒃᓮᓪᓗ ᓂᐅᒃᓴᖏᓪᓗ; ᓇᐹᕐᑑᓪᓗ ᐅᕐᓱᖏᑦ ᒥᖑᐊᕐᓯᒍᑎᒃᓮᑦ; ᑎᐱᑦᓯᐊᕆᒃᑐᓪᓗ ᐃᓯᕐᓗᐊᕐᓂᑎᑦᓯᒍᑎᒃᓮᑦ; ᐃᑎᕐᑕᕐᕕᖓᑕᓗ ᑖᓗᑕᒃᓴᖓ, ᑐᐱᐅᓪᓗ ᒪᑐᒃᓴᖓ;

¹⁶ ᑐᓂᕐᕈᓯᕐᕕᖕᒥᒃ ᑐᓂᕐᕈᑎᒃᓴᓄᑦ ᐃᑯᐊᓚᑎᑕᒃᓴᓄᑦ, ᐃᑯᐊᓚᑦᓯᕕᒃᓴᖏᓐᓂᒡᓗ ᐃᑳᖓᔪᓂᒃ ᑲᓐᓄᔭᓂᒃ, ᐊᓯᖏᓪᓗ ᓱᓇᑐᐃᓐᓇᒃᓴᓕᒫᖏᑦ, ᐴᒍᑕᕐᓗ ᐅᐊᓴᕐᕕᒃᓴᖅ ᐊᓪᓕᕋᒃᓴᖓᓗ;

¹⁷ ᑐᐱᐅᓪᓗ ᓯᓚᓪᓕᐅᔭᖓᑕ ᐊᕙᓗᒃᓴᖏᑦ, ᓇᐸᔪᒃᓴᖏᑦ ᑐᓐᖓᕕᒃᓴᖏᓪᓗ; ᑐᐱᐅᓪᓗ ᓯᓚᓪᓕᐅᔭᖓᑕ ᐃᑎᕐᑕᕐᕕᖓᑕ ᑖᓗᑕᒃᓴᖏᑦ;

¹⁸ ᑐᐱᐅᓪᓗ ᓄᖃᕐᑑᑎᖏᑕ ᐸᐅᒍᐊᒃᓴᖏᑦ ᓄᖃᕐᑑᑎᒃᓴᖏᓪᓗ; ᑐᐱᐅᓪᓗ ᓯᓚᓪᓕᐅᔭᖓᑕ ᓄᖃᕐᑑᑎᖏᑕ ᐸᐅᒍᐊᒃᓴᖏᑦ ᓄᖃᕐᑑᑎᒃᓴᖏᓪᓗ;

¹⁹ ᑐᓂᕐᕈᓯᕐᑎᑦᓯᔩᓪᓗ ᐊᓐᓄᕌᒃᓴᖏᑦ ᐃᑦᔪᕐᓁᑦᑑᔪᑦ ᐊᑐᖃᑦᑕᕆᐊᓕᖏᑦ ᐱᓇᓱᐊᕐᓂᐊᓕᕅᒍᑎᒃ ᐃᑦᔪᕐᓁᑦᑐᕕᖕᒥ, ᐂᕉᓂᐅᓪᓗ ᐊᓐᓄᕌᒃᓴᖏᑦ ᐃᕐᓂᖏᑕᓗ ᐊᓐᓄᕌᒃᓴᖏᑦ ᐃᑦᔪᕐᓁᑦᑐᑦ ᑐᓂᕐᕈᓯᕐᑎᑦᓯᔨᓯᐅᑎᒃᓮᑦ.”

ᐃᓄᐃᑦ ᑐᓂᕐᕈᑎᒥᖕᓂᒃ ᐋᑦᓯᕐᓂᖏᑦ

²⁰ ᑕᕝᕙ ᐃᓴᕆᐊᓕᒥᐅᑦ ᐃᓄᓕᒫᖏᑦ ᒨᓯᓯᒥᑦ ᕿᒪᕉᑎᕗᑦ.

²¹ ᕾᓚᐅᕐᐳᓪᓗ, ᐆᒻᒪᑎᒥᒍᑦ ᐊᐅᓚᑦᔭᒃᑕᐅᔪᓕᒫᑦ, ᐊᓂᕐᓂᖓᓄᓪᓗ ᐃᒃᐱᒋᑎᑕᐅᔪᑦ, ᑐᓂᕐᕈᓯᕈᒪᓪᓗᑎᒃ ᐊᑕᓂᕐᒧᑦ ᑐᐱᓕᐅᕐᑐᓄᑦ ᑲᑎᒪᕕᒃᓴᒥᒃ ᐊᑐᕐᑕᐅᔪᒃᓴᓂᒃ, ᑐᓂᓯᓚᐅᕐᐳᑦ ᑭᓐᖒᒪᒋᔭᐅᔪᓕᒫᓂᒃ ᑐᒃᓯᐊᕐᓂᕐᒧᑦ ᐊᑐᕐᑕᐅᔪᒃᓴᓕᒫᓂᒃ ᑐᓂᕐᕈᓯᕐᑎᑦᓯᔨᓄᓪᓗ ᐊᓐᓄᕌᒃᓴᓂᒃ ᐃᑦᔪᕐᓁᑦᑐᓂᒃ.

²² ᑍᒤᒻᒪᑦ ᐊᖑᑎᑦ ᐊᕐᓁᓪᓗ ᕾᓚᐅᕐᐳᑦ; ᐆᒻᒪᑎᒥᒍᑦ ᑲᑦᓱᖎᓕᔪᓕᒫᑦ ᑐᓂᕐᕈᓯᓚᐅᕐᐳᑦ ᐱᐅᓴᕐᓯᒪᔪᓂᒃ ᑲᒃᑯᑎᓂᒃ, ᓯᐅᑎᒥᐅᑕᕐᓂᒃ, ᓇᒡᒍᐊᕐᒥᖕᓂᒃ, ᐅᔭᒥᖕᓂᒃ ᖃᓄᐃᑦᑐᑐᐃᓐᓇᓂᒡᓗ ᐱᐅᓴᐅᑎᓂᒃ ᒎᓗᓂᒃ; ᑕᒪᒃᑯᐊᓗ ᒎᓗᐃᑦ ᑐᓂᕐᕈᑕᐅᓚᐅᕐᐳᑦ ᐊᑕᓂᕐᒧᑦ.

²³ ᖃᓪᓗᓈᕐᑕᑦᓯᐊᖁᑎᓕᓕᒫᓪᓗ; ᑐᖑᔪᕐᑕᓂᒃ, ᐊᐅᐸᓪᓚᕆᒃᑐᓂᒃ, ᓄᕕᕐᓵᒃᓴᓂᒡᓗ ᐊᐅᐸᕐᑐᓂᒃ; ᐊᓐᓄᕌᓕᐊᕆᓯᒪᔪᓂᒡᓗ ᒎᑦᓯᐅᑉ ᒥᖅᑯᕕᓂᖏᓐᓂᑦ, ᓰᐱᐅᓪᓗ ᐊᖑᓴᓪᓗᖏᑕ ᐊᒥᖏᓐᓂᒃ ᕿᑐᒻᒪᒃᓴᕐᓯᒪᔪᓂᒃ ᐊᐅᐸᕐᑐᓂᒃ, ᐊᒥᕐᓂᒡᓗ ᕿᑐᒻᒪᒃᓴᑦᓯᐊᕐᓯᒪᔪᓂᒃ, ᑕᒪᒃᑯᐊ ᑐᓂᔭᐅᓚᐅᕐᐳᑦ.

²⁴ ᑐᓂᔭᐅᔪᓐᓇᕐᑐᓕᒫᓂᒡᓗ ᓯᐅᓪᕕᕆᓂᒃ ᑲᓐᓄᔭᓂᒡᓘᓐᓃᑦ ᑐᓂᓯᓚᐅᕐᐳᑦ ᐊᑕᓂᕐᒧᑦ, ᕿᔪᖕᓂᒡᓗ ᑎᓴᒃᑕᓂᒃ ᐱᖁᑎᓖᑦ ᐊᑬᑦᓯᐊᓂᒃ ᐊᑎᓕᖕᓂᒃ ᖃᓄᑐᐃᓐᓇᖅ ᐊᑐᕐᑕᐅᔪᓐᓇᕋᔭᕐᑐᓂᒃ ᐱᓇᓱᐊᕈᑕᐅᔪᓐᓇᕋᔭᕐᑐᓂᒡᓗ ᑕᒤᓐᓂᒃ ᑐᓂᓯᓚᐅᕐᐳᑦ.

²⁵ ᐊᕐᓁᓪᓗ ᑕᒪᕐᒥᒃ ᐱᓇᓱᐊᕈᓐᓇᑦᓯᐊᕐᑐᑦ ᖃᓪᓗᓈᕐᑕᑦᓯᐊᕙᖕᓂᒃ ᐃᕙᓗᒃᓴᔭᓂᒃ ᑐᓂᕐᕈᓯᕐᐳᑦ ᐃᕙᓗᒃᓴᓂᒡᓗ ᑐᖑᔪᕐᑐᓂᒃ, ᐊᐅᐸᓪᓚᕆᒃᑐᓂᒡᓗ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ, ᑕᒪᒃᑯᓂᖓ ᓴᓇᓯᒪᔭᒥᖕᓂᒃ.

²⁶ ᐊᕐᓁᓪᓗ ᑕᒪᕐᒥᒃ ᓄᕕᕐᓵᒃᓴᓕᐅᕈᓐᓇᕐᑐᑦ ᐆᒻᒪᑎᒥᒍᑦ ᐃᒃᐱᒋᑎᑕᐅᔪᑦ ᒎᑦᓯᐅᑉ ᒥᖅᑯᖏᓐᓂᒃ ᓄᕕᕐᓵᒃᓴᓕᐅᓚᐅᕐᐳᑦ.

²⁷ ᐊᖓᔪᖅᑳᖑᔪᓪᓕ ᑐᓂᓯᕗᑦ ᐅᔭᕋᖕᓂᒃ ᐱᐅᔫᑎᐊᓗᖕᓂᒃ ᐅᓂᒃᓯᓂᒃ ᐊᑎᓕᖕᓂᒃ ᐊᓯᖏᓐᓂᒡᓗ ᐅᔭᕋᖕᓂᒃ ᐊᑐᕐᑐᒃᓴᓂᒃ

²⁸ ᑎᐱᑦᓯᐊᕆᒃᓴᐅᑎᓂᒡᓗ ᓇᓂᕈᐊᓪᓗ ᐅᕐᓱᒃᓴᖏᓐᓂᒃ, ᓇᐹᕐᑑᓪᓗ ᐅᕐᓱᖏᑦ ᒥᖑᐊᕐᓯᒍᑎᒃᓮᑦ, ᑎᐱᑦᓯᐊᕆᒃᓴᐅᑎᓪᓗ ᐃᓯᕐᓗᐊᕐᓂᕐᑎᑕᒃᓮᑦ.

²⁹ ᐃᓴᕆᐊᓕᒥᐅᓪᓗ ᐃᓄᖏᑦ ᑕᒪᕐᒥᒃ ᐆᒻᒪᑎᒥᒍᑦ ᐃᒃᐱᒋᑎᑕᐅᔪᓕᒫᑦ ᑐᓂᕐᕈᓯᕆᐊᕐᑐᓚᐅᕐᐳᑦ ᓴᓇᔭᒃᓴᐅᒐᔭᕐᑐᓂᒃ ᐊᑕᓂᐅᑉ ᒨᓯᓯᒧᑦ ᓴᓇᔭᐅᖁᓚᐅᕐᑕᖏᑦ ᒪᓕᒡᓗᒋᑦ.

ᓴᓇᓐᖑᐊᕐᑏᑦ ᑐᐱᕐᒥ ᐊᑕᓂᐅᑉ ᓇᔪᒐᖓᓂ ᓴᓇᔪᒃᓮᑦ

³⁰ ᑕᕝᕙ ᒨᓯᓯ ᐅᖃᕐᐳᖅ ᐃᓴᕆᐊᓕᒥᐅᓄᑦ, “ᐊᑕᓂᖅ ᓂᕈᐊᕐᓯᒪᕗᖅ ᐱᔭᓕᐅᓪᒥᒃ, ᐅᕆᐅᑉ ᐃᕐᓂᖓᓂᒃ ᕼᐊᕆᐅᑉ ᐃᕐᖑᑕᖓᓂᒃ, ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ.

³¹ ᒎᑎᐅᑉ ᐃᓗᒻᒥᕐᑎᓯᒪᖕᒪᒍ ᐱᔪᓐᓇᕐᓂᕐᒥᒃ ᓴᓇᒃᑲᐅᓂᕐᒥᒡᓗ, ᐱᓇᓱᐊᕈᓐᓇᕐᓂᕐᒥᒡᓗ, ᖃᐅᔨᒪᓂᕐᒥᒡᓗ ᖃᓄᑐᐃᓐᓇᖅ ᐃᓱᒪᒐᓱᒍᓐᓇᕐᓂᕐᒥᒃ ᖃᓄᐃᓕᐅᕆᐊᒃᓴᒥᒃ,

³² ᐋᖅᑭᑦᓯᐊᕐᓯᒪᔪᐊᓗᖕᓂᒡᓗ ᐃᓱᒪᒃᓴᕐᓯᐅᕈᓐᓇᕐᓂᕐᒥᒃ, ᒎᓗᓂᒃ ᓯᐅᓪᕕᕆᓂᒡᓗ ᑲᓐᓄᔭᓂᒡᓗ ᐱᓇᓱᐊᕈᓐᓇᕐᓂᕐᒥᒃ;

³³ ᐅᔭᕋᖕᓂᒡᓗ ᑕᑯᒥᓇᕐᓴᐅᑎᓕᐅᕈᓐᓇᕐᓂᕐᒥᒃ; ᕿᔪᖕᓂᒡᓗ ᓴᓇᓐᖑᐊᕈᓐᓇᕐᓂᕐᒥᒃ; ᐊᓯᓕᒫᖏᓐᓂᒡᓗ ᖃᓄᐃᑦᑐᑐᐃᓐᓇᕐᓂᒃ ᓴᓇᔭᒃᓴᓂᒃ ᐋᖅᑭᑦᓯᐊᕐᓯᔪᓐᓇᕐᓂᕐᓂᒃ.

³⁴ ᑖᓐᓇᓗ ᐊᑕᓂᐅᑉ ᐃᓱᒪᑖᕐᑎᓯᒪᕚ ᐊᓯᒥᓂᒃ ᐃᓕᓮᒍᓐᓇᕐᓂᕐᒥᒃ ᐃᑲᔪᕐᑎᖃᕐᓗᓂ ᐅᕼᐅᓕᐊᑉᒥᒃ ᐊᕼᐃᓴᒪᑭᐅᑉ ᐃᕐᓂᖓᓂᒃ, ᑖᓐ ᑭᖑᕚᖏᓐᓂᑦ ᐱᓯᒪᔪᒥᒃ.

³⁵ ᑖᒃᑯᐊᓗ ᐃᓗᒻᒥᕐᑎᓯᒪᕔᑦ ᓱᓇᑐᐃᓐᓇᓕᒫᓂᒃ ᓴᓇᔪᓐᓇᕐᓂᕐᓂᒃ ᓴᓇᓐᖑᐊᕈᓐᓇᕐᓂᕐᓂᒡᓗ, ᐃᒤᓕᖓᓂᒃᓴᖏᓐᓂᒡᓗ ᐋᖅᑭᒃᓱᐃᔪᓐᓇᕐᓂᕐᓂᒃ, ᖃᓪᓗᓈᕐᑕᑦᓯᐊᓂᒡᓗ ᓄᕕᓴᕈᓐᓇᕐᓂᕐᓂᒃ; ᑐᖑᔪᕐᑐᓂᒃ, ᐊᐅᐸᓪᓚᕆᒃᑐᓂᒃ, ᓄᕕᕐᓵᒃᓴᓂᒡᓗ ᐊᐅᐸᕐᑐᓂᒃ; ᐊᓯᖏᓐᓂᒡᓗ ᖃᓪᓗᓈᕐᑕᓂᒃ. ᑖᒃᑯᐊᓗ ᓴᓇᔪᓐᓇᕐᐳᑦ ᖃᓄᐃᑦᑐᑐᐃᓐᓇᑦᓯᐊᓂᒃ ᐋᖅᑭᑦᓯᐊᕐᓯᒪᔪᐊᓗᖕᓂᒃ ᐃᒤᓕᖓᓂᒃᓴᖏᓐᓂᒃ ᐋᖅᑭᒃᓱᐃᔪᓐᓇᕐᓗᑎᒃ.”