ᒨᓯᓯ ᐂᑉᐸᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᔭᕅᑦ ᑎᑎᕋᕐᕕᒋᓯᒪᔪᑦ ᐂᑉᐸᕆᓕᕐᑕᖏᑦ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᐅᔭᕌᖕᓂᒃ ᒪᕐᕉᖕᓂᒃ ᐲᕐᓯᓗᑎᑦ ᓴᓇᔪᒃᓴᐅᕗᑎᑦ ᓯᕗᓪᓕᕐᒥ ᓴᓇᓚᐅᕐᑕᕐᑐᑦ, ᑖᒃᑯᑎᒎᓇᕐᓗ ᑎᑎᕋᕐᓂᐊᕐᐳᖓ ᐅᖃᐅᓯᕐᓂᒃ ᓯᕗᓪᓕᕐᒥ ᑎᑎᕋᕐᓯᒪᓚᐅᕐᑐᑎᑐᑦ, ᑖᒃᑯᑎᑐᓇᖅ ᓯᖁᒥᓚᐅᕐᑕᕐᑐᑦ.

² ᖃᐅᒃᐸᑦ ᐅᓪᓛᒃᑯᑦ ᐊᑐᐃᓐᓇᐅᓛᕐᐳᑎᑦ, ᖃᖅᑲᒧᑦ ᓮᓁᒧᑦ ᒪᔪᕋᕐᓗᑎᑦ ᖃᖅᑲᐅᑉ ᖄᖓᓂ ᐅᕙᓐᓂᒃ ᑲᑎᓯᔭᕐᑐᓛᕐᐳᑎᑦ.

³ ᓇᓪᓕᐊᓐᓂᒡᓘᓐᓃᑦ ᒪᓕᒃᑕᐅᔪᒃᓴᐅᓐᖏᓚᑎᑦ ᒪᔪᕋᕐᑎᓪᓗᑎᑦ; ᑕᕝᕙᓂᓘᓐᓂᑦ ᖃᖅᑲᒥ ᓱᓇᑐᐃᓐᓇᕐᒥᒃ ᑕᑯᒃᓴᐅᔪᖃᕐᑐᒃᓴᐅᓐᖏᓚᖅ; ᓰᐱᓂᒡᓗ ᐃᒻᒧᒃᓯᐅᒐᓂᒡᓗ ᓂᕆᓇᓱᐊᕐᑐᖃᕐᑐᒃᓴᐅᓐᖏᓚᖅ ᑕᕝᕙᓂ ᖃᖅᑲᐅᑉ ᑭᒡᓕᖓᓂ.”

⁴ ᑍᒤᒻᒪᑦ ᒨᓯᓯ ᐅᔭᕌᖕᓂᒃ ᒪᕐᕉᖕᓂᒃ ᐲᕐᓯᓕᕆᕗᖅ ᓯᕗᓪᓕᕐᑎᑐᑦ ᑍᒤᑦᑐᓂᒃ, ᖃᐅᑎᓪᓗᒍᓗ ᐅᓛᒻᒪᕆᒃᑯᑦ ᑖᒃᑯᐊᒃ ᐅᔭᕌᒃ ᓇᒃᓴᕐᓗᒋᒃ ᖃᖅᑲᒧᑦ ᓮᓁᒧᑦ ᒪᔪᕋᓕᕐᐳᖅ, ᑍᒫᒃ ᐊᑕᓂᐅᑉ ᐱᖁᓚᐅᕐᒪᒍ.

⁵ ᑕᕝᕙ ᐊᑕᓂᖅ ᓄᕗᔭᒦᓪᓗᓂ ᐊᖅᑲᕐᐳᖅ, ᒨᓯᓯᓗ ᓇᖏᖃᑎᒋᓕᕐᓗᒍ, ᑕᕝᕙ ᐊᑎᓂ ᐃᑦᔪᕐᓁᑦᑐᖅ ᐅᖃᐅᓯᕆᕚ ᑖᑦᓱᒧᖓ.

⁶ ᑕᕝᕙ ᐊᑕᓂᖅ ᒨᓯᓯᐅᑉ ᓵᖓᒎᕐᐳᖅ ᐅᖃᕐᓗᓂᓗ, “ᐅᕙᖓ ᐊᑕᓂᖅ, ᒎᑎᐅᕗᖓ ᓂᑲᒍᓱᒃᑐᖅ ᐱᑦᓯᐊᕐᓗᓂᓗ, ᓂᓐᖓᒃᓴᕅᖏᑦᑐᖅ, ᓇᒡᓕᒍᓱᖕᓂᕐᔪᐊᒥᓂᒃ ᓴᖅᑭᑎᑦᓯᔪᖅ ᓱᖁᓯᔪᐃᑦᑑᓪᓗᓂᓗ.

⁷ ᐊᖏᕈᑎᒋᓯᒪᔭᓐᓂᒃ ᓇᒡᓕᖕᓂᒃᑯᑦ ᑲᔪᓯᑎᑦᓯᕙᒃᐳᖓ ᑭᖑᕚᕇᑦ 1,000ᐃᑦ ᑎᑭᓪᓗᒋᑦ ᐃᓱᒪᒋᔪᓐᓁᕐᓯᔪᓐᓇᕐᓗᖓᓗ ᓈᒻᒪᖏᑦᑐᓕᓂᕐᓂᒃ ᐱᖁᔭᓂᒃ ᓈᓚᖏᓐᓂᕐᓂᒃ ᐊᔪᕐᑐᓕᓂᕐᓂᒡᓗ, ᑭᓯᐊᓂᓕ ᐸᓯᔭᒃᓴᐅᔪᓂᒃ ᐊᔪᕐᑐᓕᔪᓂᒡᓗ ᓱᒋᐊᕐᓯᖏᑦᑑᓂᐊᓐᖏᓚᖓ ᕿᑐᕐᖓᖏᑦ ᐃᕐᖑᑕᖏᓪᓗ ᑭᖑᕚᕇᑦ ᐱᖓᔪᖏᑦ ᓯᑕᒪᖏᓪᓘᓐᓃᑦ ᑎᑭᓪᓗᒋᑦ.”

⁸ ᒨᓯᓯᓕ ᑕᕝᕔᓐᓇᖅ ᓄᓇᒧᑦ ᐹᒻᒪᒃᑎᕐᐳᖅ ᑐᒃᓯᐊᕐᕕᒋᓪᓗᒍᓗ.

⁹ ᐅᖃᕐᐳᖅ, “ᐊᑕᓃᖅ ᐅᕙᓐᓂᒃ ᖁᕕᐊᓲᑎᖃᓪᓚᕆᒃᑯᕕᑦ, ᑐᒃᓯᐊᕐᕕᒋᕙᒋᑦ ᐅᕙᑦᑎᓐᓄᑦ ᐃᓚᐅᖁᓪᓗᑎᑦ, ᐅᑯᐊ ᐃᓄᐃᑦ ᓯᑎᔪᐊᓘᒐᓗᐊᕐᑎᓪᓗᒋᑦ, ᓈᒻᒪᖏᑦᑐᓕᓂᑦᑎᓐᓂᑦ ᐊᔪᕐᑐᓕᓂᑦᑎᓐᓂᓪᓗ ᐃᓱᒪᒋᔪᓐᓁᕐᕕᒋᓚᐅᕐᑎᒍᑦ, ᐃᓚᓕᐅᕐᓗᑕᓗ ᐃᓕᖕᓄᑦ ᐃᓄᖁᑎᒋᔭᐅᔪᑎᑐᑦ.”

ᐊᖏᖃᑎᒌᖕᓂᐅᑉ ᓄᑖᓐᖑᕆᐊᕐᑎᑕᐅᓂᖓ

¹⁰ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑕᑯᒋᑦ ᒫᓐᓇ ᐃᓴᕆᐊᓕᒥᐅᑦ ᐃᓄᖏᓐᓄᑦ ᐊᖏᖃᑎᒌᒍᑎᓕᐅᕐᓂᐊᕐᐳᖓ. ᑖᒃᑯᐊᓗ ᑕᒃᑯᐊᓂ ᑲᒪᓇᕐᑐᓕᔪᒫᕐᐳᖓ ᑕᒪᑐᒪ ᓯᕗᓂᖓᓂ ᓇᓂᑐᐃᓐᓇᖅ ᓯᓚᕐᔪᐊᕐᒥ ᐃᓅᖃᑎᒌᒡᔪᐊᓪᓗ ᐊᓯᖏᓐᓂ ᐊᑐᕐᑕᐅᓚᐅᕐᓯᒪᖏᑦᑐᒥᒃ. ᐃᓄᓕᒫᑦ ᖃᓄᖅ ᐊᖏᑎᒋᔪᒥᒃ ᐅᕙᖓ ᐊᑕᓂᐅᔪᖓ ᐱᓇᓱᐊᕈᓐᓇᕐᒪᖔᕐᒪ ᑕᑯᓂᐊᕐᐳᑦ, ᐱᓇᓱᐊᕐᓂᐊᕋᒪ ᑲᒪᓇᕐᑐᐊᓗᖕᓂᒃ ᐃᕝᕕᑦ ᐊᖅᑯᑎᒋᓗᑎᑦ.

¹¹ ᐅᓪᓗᒥ ᐱᖁᔧᑦ ᐃᓕᖕᓄᑦ ᑐᓂᔭᒃᑲ ᒪᓕᖕᓂᐊᕐᐸᑎᑦ. ᐃᓅᖃᑎᒌᑦ ᐊᐅᓪᓚᕐᑎᓐᓂᐊᕐᐸᒃᑲ ᒪᑯᐊ ᐊᒧᕅᑎᒃᑯᑦ, ᑬᓇᓂᒥᐅᓪᓗ, ᕼᐃᑍᑎᒥᐅᓪᓗ, ᐱᕆᔧᑎᒥᐅᓪᓗ, ᕼᐃᕔᑎᒥᐅᓪᓗ, ᔨᐳᓮᑎᒥᐅᓪᓗ, ᐃᕝᕕᑦ ᐊᖅᑯᑎᒋᓗᑎᑦ.

¹² ᐃᓅᖃᑎᒌᓂᒃ ᑕᒫᓂ ᐅᐸᖕᓂᐊᕐᑕᑦᓯᓐᓂ ᓄᓇᖃᕐᑐᓂᒃ ᐃᒤᓕᐅᕐᓂᐊᕈᑦᓯ ᐃᒤᓕᐅᕐᓂᐊᕐᐳᒎᕐᓗᓯ ᐊᖏᖃᑎᖃᕋᓱᐊᕐᑐᒃᓴᐅᓐᖏᓚᓯ, ᑍᒤᒐᓱᐊᑐᐊᕈᑦᓯ ᓯᓔᕐᕆᔭᐅᑐᐃᓐᓇᕆᐊᖃᕋᑦᓯ.

¹³ ᑐᓂᕐᕈᓯᕐᕕᖁᑎᖏᓪᓕ ᓯᖁᒥᑕᒃᓴᕆᕙᓯ, ᓇᐸᔪᖁᑎᖏᓪᓗ ᐱᓪᓚᕆᑯᑎᖏᑦ ᐅᔭᕅᑦ ᓄᖑᑎᓪᓗᒋᑦ, ᒎᑎᓐᖑᐊᕆᔭᖏᓪᓗ ᐊᕐᓇᓐᖑᐊᑦ ᐊᓯᕋᒥᒃ ᐊᑎᓖᑦ ᓯᖁᒥᓪᓗᒋᑦ.

¹⁴ “ᒎᑎᒋᔭᐅᔪᓂᒃ ᓇᓪᓕᐊᓐᓂᒡᓘᓐᓃᑦ ᑐᒃᓯᐊᕐᕕᖃᕐᑐᒃᓴᐅᓐᖏᓚᓯ, ᐅᕙᖓ ᐊᑕᓂᐅᔪᖓ, ᐊᓯᓐᓂᒃ ᑲᒪᒋᔭᐅᖁᔨᖏᓐᓇᒪ ᓯᖕᓇᑐᔫᓪᓗᖓᓗ.

¹⁵ ᐃᓅᖃᑎᒌᓂᒃ ᑕᒫᓂ ᓄᓇᖃᕐᑐᓂᒃ ᐃᒤᓕᐅᕐᓂᐊᕈᑦᓯ ᐃᒤᓕᐅᕐᓂᐊᕐᐳᒎᕐᓗᓯ ᐊᖏᖃᑎᖃᕋᓱᐊᕐᑐᒃᓴᐅᓐᖏᓚᓯ, ᒎᑎᓐᖑᐊᒥᖕᓄᑦ ᑐᒃᓯᐊᓕᕐᑎᓪᓗᒋᑦ ᑐᓂᕐᕈᓯᓕᕐᑎᓪᓗᒋᓪᓗ ᑖᒃᑯᓄᖓ, ᑖᒃᑯᓇᓐᖓᑦ ᐃᓇᑕᐅᓂᐊᕋᑦᓯ ᐱᖃᑕᐅᖁᔭᐅᓗᓯ, ᓂᕿᓂᒡᓗ ᑐᓂᕐᕈᑕᐅᓯᒪᔪᓂᒃ ᒎᑎᓐᖑᐊᒥᖕᓄᑦ ᐊᑐᐃᓐᓇᕈᐃᕕᐅᒍᑦᓯ ᐃᒃᓯᒍᓱᓕᑐᐃᓐᓇᕆᐊᖃᕋᑦᓯ.

¹⁶ ᐃᕐᓂᓯᓗ ᑖᒃᑯᓇᓐᖓᑦ ᓄᓇᖃᑎᒃᓴᔭᕆᓐᖏᑕᑦᓯᓐᓂᑦ ᓄᓕᐊᓂᑐᐃᓐᓇᕆᐊᖃᕐᒪᑕ, ᓄᓕᐊᒥᓄᓪᓗ ᑕᓯᐅᕐᑕᐅᓕᕋᔭᕐᓗᑎᒃ ᐅᕙᓐᓂᒃ ᑲᒪᔪᓐᓃᕐᑎᑕᐅᓗᑎᒃ ᒎᑎᓐᖑᐊᖏᓐᓄᑦ ᑐᒃᓯᐊᕐᕕᖃᖔᓕᕐᓗᑎᒃ.

¹⁷ “ᒎᑎᓐᖑᐊᓂᒃ ᓴᕕᕋᔭᖕᓂᒃ ᓴᓇᔪᒃᓴᐅᓐᖏᓚᓯ ᑐᒃᓯᐊᕐᕕᖃᕐᑐᒃᓴᐅᓇᓯᓗ.

¹⁸ “ᓂᐊᑰᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓇᓪᓕᐅᓐᓂᕐᓯᐅᕐᕕᒃ ᑲᒪᒋᓯᐊᖏᓐᓇᕋᒃᓴᕆᕙᓯ, ᑕᒪᓐᓇ ᐃᓕᑦᓯᓐᓄᑦ ᐊᑐᕐᑕᐅᖁᓯᒪᒐᒃᑯ, ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᕿᖃᕐᑐᒃᓴᐅᕗᓯ ᐅᓪᓗᓂᒃ 7ᓂᒃ ᑕᖅᑭᖅ ᐊᐱᑉᒥᒃ ᐊᑎᓕᒃ ᐊᑐᕐᑎᓪᓗᒍ; ᑕᕝᕙᓂ ᑕᖅᑭᒥ ᐊᐱᑉᒥ ᐄᑦᔨᑉᑎᒥᑦ ᐊᐅᓪᓚᓚᐅᕋᑦᓯ.

¹⁹ “ᐊᖑᑏᑦ ᓯᕗᓪᓕᕐᐹᒥᒃ ᐊᓈᓇᒥᖕᓂᑦ ᐃᕐᓂᐊᖑᔪᑦ ᐆᒪᔪᖁᑎᑦᓯᓐᓂᓗ ᐃᕐᓂᐊᕆᔭᐅᖅᑳᕐᓯᒪᔪᑦ ᐊᖑᑎᓕᒫᑦ ᑕᒪᒃᑯᐊ ᐱᖁᑎᒋᕙᒃᑲ,

²⁰ ᓯᐅᑎᖅᑯᕐᑐᔫᓪᓕ ᐃᕐᓂᐊᕆᖅᑳᕐᑕᖏᑦ ᑕᐅᕐᓯᐅᑎᔪᓐᓇᕐᐸᓯ ᓰᐱᐅᑉ ᓄᕐᕋᖓᓂᒃ ᑐᓂᕐᕈᓯᖔᕐᓗᓯ ᑖᑦᓱᒥᖓ ᐃᓇᖐᑎᖔᕐᓗᒍ, ᑭᓯᐊᓂᓕ ᑕᐅᕐᓯᐅᑎᓂᐊᖏᒃᑯᑦᓯᐅᒃ, ᖁᖓᓯᖓ ᓇᑲᑕᒃᓴᕆᕙᓯ, ᐊᖑᑎᓕᒫᑦ ᐃᕐᓂᐊᖑᖅᑳᕐᑐᑦ ᑕᐅᕐᓯᒐᒃᓴᕆᕙᓯ. “ᓇᓪᓕᐊᓐᓂᒡᓘᓐᓃᑦ ᑐᓂᕐᕈᓯᖏᑦᑐᒥᒃ ᓵᓐᓄᑦ ᓴᖅᑭᑦᑐᖃᕐᑐᒃᓴᐅᓐᖏᓚᖅ.

²¹ “ᐅᓪᓗᓂᒃ ᐱᖓᓲᔪᕐᑐᓂᒃ ᐱᓇᓱᐊᒐᒃᓴᑦᓯᓐᓂᒃ ᓴᓇᔪᒃᓴᐅᕗᓯ, ᐅᓪᓗᓪᓕ 7ᖓᓐᓂ ᑕᕾᕐᓯᕐᑐᒃᓴᐅᕗᓯ; ᐊᒡᓛᑦ ᓄᓇᒥᒃ ᐱᕈᕐᓰᕕᒃᓴᒥᒃ ᒪᒃᐱᑎᕆᔭᕆᐊᖃᕋᓗᐊᕈᕕᑦ ᐱᕈᕐᑐᓂᒡᓗ ᑲᑎᕐᓱᐃᒋᐊᖃᕋᓗᐊᕈᕕᑦ.

²² “ᐱᕈᕐᑐᓂᒃ ᑲᑎᕐᓱᐃᕕᖕᒥᒃ ᓇᓪᓕᐅᓐᓂᕐᓯᐅᕐᕕᑦᓯᓐᓂᒃ ᑲᒪᑦᓯᐊᕐᑐᒃᓴᐅᕗᓯ ᓂᐊᖂᔭᒃᓴᓂᒃ ᐱᕈᕐᓰᕕᑦᓯᓐᓂᑦ ᓯᕗᓪᓕᕐᐹᒥᒃ ᐱᕈᕐᑎᑕᕕᓂᑦᓯᓐᓂᒃ ᑲᑎᕐᓱᐃᕕᒃᓯ ᓇᓪᓕᐅᓐᓂᖓ ᓇᓪᓕᐅᑎᓯᒪᑎᓪᓗᒍ, ᐅᑭᐊᒃᓵᒃᑯᓪᓗ ᓇᓪᓕᐅᓐᓂᕐᓯᐅᕐᕕᒃ ᑐᐱᑐᐃᓐᓇᖃᕐᑎᓪᓗᓯ ᐱᕈᕐᑐᓂᒃ ᑲᑎᕐᓱᐃᕕᓯ ᓇᓪᓕᐅᑎᕕᖓᓂ.

²³ “ᐊᕐᕌᒍᒥ ᐊᑕᐅᓯᕐᒥ ᐊᖑᑎᓕᒫᑦ ᐱᖓᓱᐃᕐᑐᕐᓗᑎᒃ ᑐᒃᓯᐊᕆᐊᕐᑐᒃᓴᐅᕗᑦ ᐅᕙᓐᓄᑦ, ᐊᑕᓂᕐᒧᑦ, ᐃᓴᕆᐊᓕᒥᐅᑦ ᒎᑎᖓᓐᓄᑦ.

²⁴ ᐃᓅᖃᑎᒌᒡᔪᐊᑦ ᓯᕗᓂᑦᓯᓐᓂ ᐊᐅᓪᓚᕐᑎᓐᓂᐊᕐᐸᒃᑲ ᓄᓇᒋᔭᓯ ᑭᒡᓕᖓ ᐊᖏᓂᕐᓴᐅᔪᓐᓇᖁᓪᓗᒍ, ᓇᓪᓕᐊᓐᓄᓪᓘᓐᓃᑦ ᐃᓅᖃᑎᒌᒡᔪᐊᓄᑦ ᐅᓇᖕᒥᔭᐅᓂᐊᓐᖏᓚᓯ ᓄᓇᒋᔭᓯ ᐱᓪᓗᒍ ᐊᕐᕌᒍᒥ ᐱᖓᓱᕕᒡᓗᓯ ᐊᑕᓂᕐᒧᑦ ᒎᑎᒧᑦ, ᐃᓴᕆᐊᓕᒥᐅᑦ ᒎᑎᖓᓄᑦ, ᑐᒃᓯᐊᕆᐊᖃᑦᑕᕐᓂᑦᓯᓐᓂᒃ ᑲᒪᑦᓯᐊᑐᐊᕈᑦᓯ.

²⁵ “ᓂᐊᖂᔭᒥᒃ ᐳᕙᓪᓚᕐᓴᐅᑎᓕᖕᒥᒃ ᑐᓂᕐᕈᓯᕐᑐᒃᓴᐅᓐᖏᓚᓯ ᐆᒪᔪᒥᒃ ᐊᐅᓕᖕᒥᒃ ᑐᓂᕐᕈᓯᓕᕐᑎᓪᓗᓯ ᐅᕙᓐᓄᑦ, ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᑎᓯᒪᑎᓪᓗᒍ ᐆᒪᔫᑉ ᑐᓂᕐᕈᑎᕕᓂᐅᑉ ᐃᓚᖓᓂᒃ ᐅᓪᓛᒧᑦ ᑎᑭᓪᓗᒍ ᐊᒥᐊᒃᑯᖃᕐᑐᒃᓴᐅᓐᖏᓚᓯ.

²⁶ “ᐱᕈᕐᓰᕕᖁᑎᕕᑦ ᓯᕗᓪᓕᕐᐹᒥᒃ ᐱᕈᕐᑎᑕᖏᑦ ᑲᑎᕐᓱᓕᕈᕕᖏᑦ ᐊᕐᕌᒍᑕᒫᑦ ᐊᑕᓂᐅᑉ ᒎᑎᕕᑦ ᐃᒡᓗᖓᓄᑦ ᑐᓂᕐᕈᑎᒋᔭᒃᓴᕆᕙᑎᑦ. “ᓰᐱᐅᑉ ᓄᕐᕋᖓᓂᒃ ᐅᕝᕙᓗ ᒎᑦᓯᒥᒃ ᐆᔪᓕᐅᕐᑐᒃᓴᐅᓐᖏᓚᑎᑦ ᐊᓈᓇᖓᑕ ᐃᒻᒧᖓᓄᑦ.”

²⁷ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑕᒪᒃᑯᐊ ᐅᖃᐅᓰᑦ ᑎᑎᕋᕐᑕᒃᓴᕆᕙᑎᑦ, ᑕᒪᒃᑯᐊ ᐅᖃᐅᓰᑦ ᑐᓐᖓᕕᒋᓗᒋᑦ ᐊᖏᖃᑎᒌᖕᓂᕐᒥᒃ ᐋᖅᑭᒃᓯᓂᐊᕋᒪ ᐃᓕᖕᓄᑦ ᐃᓴᕆᐊᓕᐅᒥᐅᓄᓪᓗ.”

²⁸ ᒨᓯᓯᓗ ᑕᕝᕙᓃᑉᐳᖅ ᐊᑕᓂᕐᒥ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ, ᓂᕆᓚᐅᕋᓂ ᐃᒥᓚᐅᕋᓂᓗ. ᐅᖃᐅᓰᓪᓗ ᐊᖏᖃᑎᒌᒍᑏᑦ ᑎᑎᕋᓚᐅᕐᐰᑦ ᐅᔭᕋᒃᑯᑦ, ᐱᖁᔭᑦ ᖁᓕᑦ.

ᒨᓯᓯᐅᑉ ᐊᖅᑲᕐᓂᖓ ᖃᖅᑲᒥᑦ ᓮᓁᒥᑦ

²⁹ ᒨᓯᓯᓕ ᖃᖅᑲᒥᑦ ᓮᓁᒥᑦ ᐊᖅᑲᓕᕐᐳᖅ ᐅᔭᕋᒃᑯᑦ ᑎᑎᕋᕐᓯᒪᔫᖕᓂᒃ ᒪᕐᕉᖕᓂᒃ ᓇᒃᓴᕐᓗᓂ, ᒨᓯᓯᓕ ᖃᐅᔨᒪᓚᐅᓐᖏᓚᖅ ᑮᓇᖓᑕ ᐅᕕᓂᖓ ᖃᐅᒻᒪᒃᓯᒪᓂᖓᓂᒃ, ᒎᑎᒥᒃ ᐅᖃᖃᑎᖃᕐᓯᒪᓂᕐᒥᓄᑦ.

³⁰ ᐂᕉᓂᓕ ᐃᓴᕆᐊᓕᒥᐅᓪᓗ ᐃᓄᖏᑦ ᑕᑯᒐᒥᒃ ᒨᓯᓯᒥᒃ, ᑕᑯᓚᐅᕐᐳᑦ ᑮᓇᖓᑕ ᖃᐅᒻᒪᒃᓯᒪᓂᖓᓂᒃ, ᑖᑦᓱᒧᖓᓗ ᖃᒡᓕᔭᕆᐊᒃᓴᖅ ᑲᑉᐱᐊᓱᓕᕐᓗᑎᒃ.

³¹ ᒨᓯᓯᐅᓪᓕ ᕾᖁᕔᑦ, ᐂᕉᓂᓗ ᓄᓇᓕᖕᓂᓗ ᑕᓯᐅᕐᑎᐅᔪᓕᒫᑦ ᑖᑦᓱᒧᓐᖓᕐᐳᑦ, ᒨᓯᓯᐅᓪᓗ ᐅᖃᕐᕕᒋᓕᕐᐰᑦ.

³² ᑭᖑᓂᖓᒍᓪᓕ ᐃᓴᕆᐊᓕᒥᐅᑦ ᐃᓄᓕᒫᖏᑦ ᑕᕝᕗᓐᖓᓕᕐᐳᑦ, ᒨᓯᓯᐅᓪᓗ ᑐᓂᓯᕕᒋᓕᕐᐰᑦ ᐱᖁᔭᓕᒫᓂᒃ ᐊᑕᓂᐅᑉ ᑐᓂᓚᐅᕐᑕᖏᓐᓂᒃ ᒨᓯᓯᒧᑦ ᖃᖅᑲᒥ ᓮᓁᒥ.

³³ ᒨᓯᓯᓕ ᑖᒃᑯᓄᖓ ᐅᖃᓪᓚᒌᕋᒥ, ᑮᓇᓂ ᒪᑐᐊᕐᒧᑦ ᐅᓕᒃᐹ;

³⁴ ᒨᓯᓯᓕ ᐊᑕᓂᕐᒧᑦ ᐅᖃᓪᓚᒋᐊᕐᑐᓕᑐᐊᕌᖓᒥ ᑮᓇᕐᒥᓄᑦ ᐅᓕᒋᔭᓂ ᐲᖃᑦᑕᕐᐹ, ᑕᕝᕙᓐᖓᑦ ᐊᓂᓚᐅᖏᓐᓂᕐᒥᓂ; ᑕᕝᕙᓐᖓᓪᓕ ᐊᓂᔭᕌᖓᒥ ᐃᓴᕆᐊᓕᒥᐅᑦ ᐃᓄᖏᓐᓄᑦ ᐅᖃᐅᓯᖃᖃᑦᑕᕐᐳᖅ ᐱᖁᔭᐅᑦᔪᑎᓕᒫᒥᓂᒃ,

³⁵ ᐃᓴᕆᐊᓕᒥᐅᓂᓪᓕ ᒨᓯᓯᐅᑉ ᑮᓇᖓ ᑕᑯᔭᐅᓚᐅᕐᐳᖅ, ᑮᓇᖓᑕ ᖃᐅᒪᓂᖓ, ᑕᕝᕙ ᒨᓯᓯᐅᑉ ᑮᓇᓂ ᒪᑐᐊᕐᒧᑦ ᐅᓕᒃᑲᓐᓂᖃᑦᑕᕐᐹ, ᑕᕝᕗᖓ ᐊᑕᓂᕐᒥᒃ ᐅᖃᖃᑎᖃᕆᐊᕐᑐᕐᓗᓂ ᐅᑎᓚᐅᖏᓐᓂᕐᒥᓂ.