ᒨᓯᓯ ᐂᑉᐸᖏᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᒻᒧᒃᓯᐅᒐᓐᖑᐊᖅ ᒎᓗ

¹ ᐃᓄᐃᓪᓗ ᖃᐅᔨᓕᕋᒥᒃ ᒨᓯᓯ ᓱᓕ ᖃᖅᑲᒥᑦ ᐊᖅᑲᓚᐅᖏᓐᓂᖓᓂᒃ, ᐊᑯᓂᓗ ᑕᑉᐹᓃᓕᕐᒪᑦ ᐂᕉᓂᐅᑉ ᐊᕙᑖᓄᐊᕐᓗᑎᒃ ᐅᖃᕐᕕᒋᓕᕐᐹᑦ, “ᐃᓐᓇ ᒨᓯᓯ ᓇᓗᓇᕐᓯᖕᒪᑦ ᖃᓄᐃᓕᖓᓕᕐᒪᖔᑦ ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ, ᒎᑎᓕᐅᓚᐅᕆᑦ ᐅᕙᑦᑎᓐᓂᒃ ᑕᓯᐅᕐᓯᓂᐊᕐᑐᒥᒃ.”

² ᐂᕉᓂᐅᑉ ᐅᖃᐅᑎᕔᑦ, “ᓄᐊᑦᓯᓕᕆᑦᓯ ᓄᓕᐊᑦᓯ, ᐃᕐᓂᑦᓯ, ᐸᓂᑦᓯᓗ ᓯᐅᑎᒥᐅᑕᖏᓐᓂᒃ ᒎᓗᓂᒃ, ᑕᒪᒃᑯᐊᓗ ᐲᔭᕐᓗᒋᑦ ᐅᕙᓐᓄᐊᕈᑎᓯᒋᒃ.”

³ ᑕᕝᕙ ᐃᓄᓕᒫᑦ ᓯᐅᑎᒥᐅᑕᒥᖕᓂᒃ ᒎᓗᓂᒃ ᐲᔧᕗᑦ, ᐂᕉᓂᒧᐊᕐᓗᒋᓪᓗ.

⁴ ᐂᕉᓂᐅᓪᓗ ᓯᐅᑎᒥᐅᑍᑦ ᐱᒐᒥᒋᑦ ᐊᐅᒃᑎᑉᐰᑦ, ᑯᕕᓪᓗᒋᓪᓗ ᐋᖅᑭᒃᓯᕕᖕᒧᑦ, ᓄᕐᕋᓐᖑᐊᒥᒡᓗ ᓴᓇᕗᖅ. ᐃᓄᐃᓪᓗ ᐅᖃᕐᐳᖅ, “ᐃᓴᕆᐊᓕ, ᐅᓇ ᑕᕝᕙ ᒎᑎᕗᑦ, ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ!”

⁵ ᑕᕝᕙ ᐂᕉᓂ ᑐᓂᕐᕈᓯᕐᕕᒃᓴᒥᒃ ᐋᖅᑭᒃᓱᐃᕗᖅ ᐊᖑᓴᓪᓗᓐᖑᐊᑉ ᒎᓘᑉ ᓯᕗᕌᓂ ᐅᖃᕐᓗᓂᓗ, “ᖃᐅᒃᐸᑦ ᓇᓪᓕᐅᓐᓂᕐᓯᐅᕐᓂᐊᕐᐳᒍᑦ ᐊᑕᓂᖅ ᓂᕐᑐᕐᑕᐅᖁᓪᓗᒍ.”

⁶ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᒪᑭᑉᐳᑦ ᐆᒪᔪᓂᒃ ᑐᓂᕐᕈᑎᒃᓴᓂᒃ ᐆᑕᒃᓴᓂᒃ ᓇᒃᓴᕐᓗᑎᒃ ᐃᓚᖏᓪᓕ ᑐᓂᕐᕈᑎᒃᓴᓂᒃ ᓂᕆᔭᒃᓴᓂᒃ ᓇᒃᓴᕐᓗᑎᒃ. ᐃᓄᐃᓪᓗ ᐃᖏᑉᐳᑦ ᓂᕆᖃᑎᒌᓕᕐᓗᑎᒃ ᐃᒥᖃᑎᒌᓕᕐᐳᓪᓗ ᐋᖓᔮᓕᕐᓗᑎᒃ, ᐃᓚᖏᑦ ᑖᓂᓯᓕᕐᐳᑦ ᐃᓚᖏᓪᓗ ᓄᓕᐊᕐᓗᑎᒃ.

⁷ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᒫᓐᓇᑦᓴᐅᑎᒋ ᐃᓅᖃᑎᖕᓄᑦ ᐊᑎᕐᓵᓕᕆᑦ, ᐃᓅᖃᑎᑎᑦ, ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᑕᑎᑦ, ᐊᔪᕐᑐᓕᓕᕐᒪᑕ ᕿᒤᓪᓗᑎᒡᓗ ᐅᕙᓐᓂᒃ.

⁸ ᑖᒃᑯᓄᖓ ᐊᑐᕐᑕᐅᖁᓚᐅᕐᑕᓐᓂᒃ ᒪᓕᒃᑕᐅᖁᓚᐅᕐᑕᓐᓂᒡᓗ ᕿᒤᓯᒪᓕᕇᕐᒪᑕ; ᒎᓗᒥᒃ ᐊᐅᒃᑎᑦᓯᓪᓗᑎᒃ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓᓂᒃ ᓴᓇᓯᒪᓕᕐᐳᑦ ᑖᓐᓇᓗ ᑐᒃᓯᐊᕐᕕᒋᓪᓗᒍ ᑐᓂᕐᕈᓯᕐᕕᒋᓯᒪᓕᕐᐹᑦ. ᐅᖃᕐᓗᑎᒡᓗ ‘ᑖᒃᑯᐊ ᑕᕝᕙ ᒎᑎᓯ, ᐃᓴᕆᐊᓕᒥᐅᖑᔪᓯ ᐄᑦᔨᑉᑎᒥᑦ ᐊᐅᓪᓚᕈᑦᔨᔨᒋᓚᕐᑕᓯ.’”

⁹ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᖃᐅᔨᕙᒃᑲ ᐃᓄᐃᑦ ᑖᒃᑯᐊ ᓯᑎᔪᐊᓘᓂᖏᑦ.

¹⁰ ᒫᓐᓇ ᐅᕙᓐᓂᒃ ᓄᖅᑲᕐᑎᑦᓯᓇᓱᐊᕐᓂᐊᕐᓇᒃ, ᐃᓄᐃᑦ ᑖᒃᑯᐊ ᓂᓐᖓᐅᑎᒻᒪᕆᒐᒃᑭ, ᐊᓯᕈᕐᓂᐊᓕᕐᐸᒃᑲ. ᐃᕝᕕᓪᓕ ᑭᖑᕚᒃᓴᑎᓪᓗ ᐃᓅᖃᑎᒌᒡᔪᐊᓐᖑᕐᑎᓐᓂᐊᕐᐸᒃᑲ.”

¹¹ ᒨᓯᓯᓕ ᐃᓗᖏᕐᓱᕐᓗᓂ ᑐᒃᓯᐊᓕᕐᐳᖅ ᐊᑕᓂᕐᒧᑦ ᒎᑎᒥᓄᑦ ᐅᖃᕐᓗᓂᓗ, “ᐊᑕᓃᖅ, ᓱᖕᒪᑦ ᐃᓄᖁᑎᖕᓄᑦ ᑍᒫᕌᓗᒃ ᓂᓐᖓᐅᒪᔪᒃᓴᐅᕖᑦ? ᑖᒃᑯᐊ ᓴᐳᑎᓚᐅᕋᕕᒋᑦ ᐄᑦᔨᑉᑎᒥᑦ ᐊᔪᒐᖃᖏᓐᓂᕐᓄᑦ ᐱᔪᓐᓇᕐᓂᕐᔪᐊᕐᓄᓪᓗ.

¹² ᓱᖕᒪᑦ ᐄᑦᔨᑉᑎᒥᐅᑦ ᐅᖃᕈᓐᓇᕐᓯᔪᒫᓕᕐᐹᑦ ᐃᓄᖁᑎᑎᑦ ᐊᐅᓪᓚᕈᑦᔭᐅᓚᐅᕐᓂᕋᕐᓗᒋᑦ ᐄᑦᔨᑉᑎᒥᑦ, ᑐᖁᑦᓴᕐᑐᕈᒪᓪᓗᒋᑦ ᖃᖅᑲᓕᖕᒥ ᐊᓯᕈᕆᐊᕐᑐᕈᒪᓪᓗᒋᓪᓗ ᓄᖑᑦᓯᐊᕐᓗᒋᑦ? ᓂᓐᖓᐅᒪᔪᓐᓁᓚᐅᕆᑦ; ᐃᓱᒪᒋᔧᑦ ᓴᖑᑎᓚᐅᕈᒃ ᐊᓯᕈᕐᑕᐅᓂᕐᓗ ᑕᒪᓐᓇ ᐃᓄᖁᑎᖕᓄᑦ ᑎᑭᑎᓐᓂᐊᕐᓇᒍ.

¹³ ᐱᔨᒋᓚᐅᕐᑕᑎᑦ ᐃᖅᑲᐅᒪᓚᐅᒃᑭᑦ, ᐂᑉᕋᕼᐋᒻ, ᐂᓴᑭᓗ, ᔧᑯᓗ, ᑖᒃᑯᓄᖓ ᐊᖏᒻᒪᕆᓚᐅᕋᕕᑦ ᑭᖑᕚᖃᕈᒫᕐᓂᕋᕐᓗᒋᑦ ᐅᓪᓗᕆᐊᑎᑐᑦ ᐅᓄᕐᑎᒋᔪᓂᒃ ᑭᖑᕚᖏᓪᓗ ᓄᓇᒥᒃ ᐊᖏᕈᑎᒋᓯᒪᔭᕐᓂᒃ ᑐᓂᓯᕕᒋᓂᐊᕐᓂᕋᕐᓗᒋᑦ ᓄᓇᒋᓂᐊᕐᑕᖏᓐᓂᒃ ᐃᓱᖃᖏᑦᑐᒧᑦ.”

¹⁴ ᑕᕝᕙ ᐊᑕᓂᐅᑉ ᐃᓱᒪᒋᓚᐅᕐᑕᓂ ᓴᖑᑎᓕᕐᐹ ᐃᓄᖁᑎᒥᓄᓪᓗ ᐊᓯᕈᕐᑕᐅᓇᕐᑐᒥᒃ ᑎᑭᑎᑦᓯᔪᒪᔪᓐᓁᕐᐳᖅ.

¹⁵ ᒨᓯᓯ ᑕᕝᕙ ᖃᖅᑲᒥᑦ ᐊᖅᑲᓕᕐᐳᖅ, ᑎᒍᒥᐊᕐᓗᓂ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᐅᔭᕌᖕᓂᒃ ᒪᕐᕉᖕᓂᒃ ᑖᒃᑯᐊᒡᓗ ᐃᒡᓗᒃᑐᑦ ᑎᑎᕋᕕᒋᓯᒪᕘᒃ ᐊᑐᓂᑦ.

¹⁶ ᒎᑎᐅᓪᓗ ᓇᖕᒥᓂᖅ ᑖᒃᑯᐊᒃ ᓴᓇᓚᐅᕐᐰᒃ ᓇᖕᒥᓂᕐᓗ ᑎᑎᕋᕐᕕᒋᓪᓗᓂᒋᑦ ᐱᖁᔭᓂᒃ.

¹⁷ ᔮᓱᐊᓗ ᑐᓵᓕᕋᒥ ᐃᓄᖕᓂᒃ ᓂᐱᖅᑯᕐᑐᓪᓗᑎᒃ ᕾᒐᓛᕐᑐᓂᒃ ᒨᓯᓯᒧᑦ ᐅᖃᕐᐳᖅ, “ᓂᐱᕐᔪᐊᖃᓕᕐᐳᖅ ᑕᖕᒫᕐᓯᒪᕕᖕᒥ ᐅᓇᑕᕐᑐᑦ ᓂᐱᖏᑎᑐᑦ.”

¹⁸ ᒨᓯᓯᓕ ᐅᖃᕐᐳᖅ, “ᐅᓇᑕᕐᓂᕐᒥ ᓵᓚᖃᕐᑐᑎᑐᑦ ᓂᐱᖃᓐᖏᓚᑦ ᐅᕝᕙᓗ ᓵᓚᐅᔪᑎᑐᑦ ᓂᐱᖃᕐᒥᓇᑎᒃ; ᐃᓐᖏᕐᕙᓗᒃᑐᓂᒡᓕ ᑐᓵᔪᖓ.”

¹⁹ ᒨᓯᓯᓕ ᑕᖕᒫᕐᓯᒪᕕᖕᒧᑦ ᖃᒡᓕᒐᒥ ᑕᑯᓕᕐᐳᖅ ᓄᕐᕋᓐᖑᐊᒥᒃ ᐃᓄᖕᓂᒡᓗ ᑖᓂᓯᕐᑐᓂᒃ, ᐃᓗᐃᓪᓕᓂᕐᒧᑦ ᓂᓐᖓᒃᑐᐊᓘᕗᖅ. ᑕᒫᓂᓗ ᖃᖅᑲᐅᑉ ᑭᒡᓕᖓᓂ, ᑎᒍᒥᐊᕐᑖᖕᓂ ᐅᔭᕌᒃ ᓂᓐᖓᖕᓂᕐᒧᑦ ᒥᓗᕆᐅᑎᕚᒃ ᓯᖁᒥᓪᓗᒋᒡᓗ.

²⁰ ᓄᕐᕋᓐᖑᐊᕐᓗ ᓴᓇᔭᐅᓯᒪᔪᖅ ᑎᒍᕚ, ᐃᑯᒪᒧᓪᓗ ᐊᐅᒃᑎᑉᐹ, ᓯᖃᓪᓕᑦᓯᐊᕐᓗᒍᓗ ᐳᔪᕋᕐᑎᑐᑦ ᑍᒤᓕᕐᑎᑉᐹ, ᐃᒥᕐᒥᒡᓗ ᐃᓚᓪᓗᓂᐅᒃ. ᐃᓴᕆᐊᓕᒥᐅᑦ ᑕᒪᑐᒥᖓ ᐃᒥᕐᑎᑉᐰᑦ.

²¹ ᒨᓯᓯᓗ ᐅᖃᕐᐳᖅ ᐂᕉᓂᒧᑦ, “ᐃᓄᒋᐊᒃᑐᕐᔪᐊᓂᑦ ᖃᓄᐃᓕᐅᕐᑕᐅᓐᓂᕋᕕᑦ, ᑍᒫᒃ ᐱᐅᖏᑦᑐᐊᓗᖕᒥᒃ ᐊᔪᕐᑐᓕᑎᑦᓯᓚᐅᕐᐲᑦ?”

²² ᐂᕉᓂᐅᑉ ᑭᐅᕚ, “ᓂᓐᖓᐅᑎᑦᑍᓕᓐᖓ; ᐅᑯᐊ ᐃᓄᒐᓴᒡᔪᐊᑦ ᖃᐅᔨᒪᔭᑎᑦ ᐱᐅᖏᑦᑐᒥᒃ ᑲᔪᖏᕐᑐᐊᓘᓂᖏᑦ.

²³ ᑖᒃᑯᓄᖓ ᐅᖃᐅᑦᔭᐅᓚᐅᕋᒪ, ‘ᐃᓐᓇ ᒨᓯᓯ ᓇᓗᓇᕐᓯᖕᒪᑦ ᖃᓄᐃᓕᖓᓕᕐᒪᖔᑦ ᐄᑦᔨᑉᑎᒥᑦ ᐊᐅᓪᓚᕈᑦᔨᓚᐅᕐᑐᖅ ᐅᕙᑦᑎᓐᓂᒃ, ᒎᑎᓕᐅᓚᐅᕆᑦ ᐅᕙᑦᑎᓐᓂᒃ ᑕᓯᐅᕐᓯᓂᐊᕐᑐᒥᒃ.’

²⁴ ᐅᖃᐅᑎᓚᐅᕐᐸᒃᑲᓕ, ‘ᓇᓪᓕᐊᑦ ᒎᓗᖁᑎᖃᕐᑐᖅ ᐲᔧᓚᐅᕐᓕ’; ᑕᕝᕙ ᑐᓂᔭᐅᓚᐅᕐᐳᖓ ᑖᒃᑯᓇᓐᖓᑦ, ᐃᑯᒪᒧᐊᕐᓗᒋᓪᓕ ᐊᐅᒃᑎᓚᐅᕐᐸᒃᑲ, ᑕᕝᕙᓐᖓᓪᓗ ᑕᕝᕙ ᓄᕐᕋᓐᖑᐊᒥᒃ ᓴᖅᑭᑦᑐᖃᓕᓚᐅᕐᐳᖅ.”

²⁵ ᒨᓯᓯᓕ ᖃᐅᔨᒐᒥ ᐂᕉᓂᐅᑉ ᐃᓄᖕᓂᒃ ᑕᓯᐅᕐᓯᓯᒪᓂᖓᓂᒃ ᑐᑮᕈᑎᓂᕐᒧᑦ ᐃᒻᒥᖕᓂᒡᓗ ᓯᓔᕐᕆᓯᒪᓂᖏᓐᓂᒃ ᑲᓐᖑᓲᑎᒃᓴᐅᓕᕐᓗᑎᒡᓗ ᐊᑭᕋᕐᑐᕐᑎᖏᑕ ᓯᕗᕌᓂ.

²⁶ ᑕᕝᕙ ᒨᓯᓯ ᑕᖕᒫᕐᓯᒪᕕᐅᑉ ᐃᑎᕐᑕᕐᕕᖓᓂ ᓂᑯᕕᑉᐳᖅ ᕾᒐᓛᓕᕐᓗᓂᓗ, “ᐊᑕᓂᕐᒥᒃ ᒪᓕᒍᒪᔪᑦ ᒪᐅᖓ ᐅᕙᓐᓄᑦ ᕾᓚᐅᕐᓕᑦ!” ᑕᕝᕙ ᓕᕔᑎᓕᒫᑦ ᑕᒪᐅᓐᖓᕐᐳᑦ ᒨᓯᓯᐅᑉ ᐊᕙᑖᓄᑦ,

²⁷ ᐅᖃᐅᑎᕔᓪᓗ, “ᐊᑕᓂᖅ ᐃᓴᕆᐊᓕᒥᐅᑦ ᒎᑎᖓ ᐅᖃᕐᐳᖅ, ‘ᐃᓕᑦᓯ ᐊᑐᓂᑦ ᓴᕕᒡᔪᐊᒥᒃ ᑎᒍᓯᔪᒃᓴᐅᕗᓯ, ᑕᖕᒫᕐᓯᒪᕕᐅᑉ ᐹᖓᓂᑦ ᐱᒋᐊᕐᓗᓯ ᐃᓱᐊᓄᑦ ᑎᑭᓪᓗᓯ ᑐᖁᕅᖁᓪᓗᓯ ᖃᑕᓐᖑᑎᑦᓯᓐᓂᒃ, ᐃᓚᓐᓇᕆᔭᑦᓯᓐᓂᒡᓗ, ᐃᓅᖃᑎᑦᓯᓐᓂᒡᓗ.’”

²⁸ ᓕᕔᑎᓪᓗ ᒨᓯᓯᒧᑦ ᐱᖁᔭᐅᓂᕐᒥᓂᒃ ᓈᓚᒃᐳᑦ, ᑐᖁᑦᓯᓪᓗᑎᒡᓗ ᐃᓄᖕᓂᒃ 3,000 ᖃᓂᒋᔮᓂ ᑕᕝᕙᓂ ᐅᓪᓗᒥ.

²⁹ ᒨᓯᓯᓗ ᐅᖃᕐᐳᖅ ᓕᕔᑎᓄᑦ, “ᐅᓪᓗᒥ ᐃᓕᑦᓯᓐᓂᒃ ᐃᑦᔪᕐᓁᓕᕐᑎᑉᐳᓯ ᐱᑎᑕᐅᓪᓗᓯᓗ ᑐᓂᕐᕈᓯᕐᑎᑦᓯᔨᐅᓂᕐᒥᒃ ᐊᑕᓂᕐᒧᑦ ᑕᒪᓐᓇ ᐱᔨᑦᓯᕈᑕᐅᖁᓪᓗᒍ ᐃᓕᑦᓯᓐᓄᑦ ᑐᖁᑦᓯᓚᐅᕐᓂᑦᓯᓐᓄᑦ ᐃᕐᓂᑦᓯᓐᓂᒃ ᖃᑕᓐᖑᑎᑦᓯᓐᓂᒡᓗ, ᑍᒤᒻᒪᑦ ᐊᑕᓂᐅᑉ ᑐᓂᓯᕕᒋᕚᓯ ᓇᖕᒥᓂᖅ ᓮᒻᒪᕐᑎᑦᓯᓂᕐᒥᓂᒃ.”

³⁰ ᖃᐅᑎᓪᓗᒍ ᒨᓯᓯ ᐃᓄᖕᓄᑦ ᐅᖃᓕᕐᐳᖅ, “ᐊᔪᕐᑐᓕᓚᐅᕐᐳᓯ ᐊᖏᔪᕐᔪᐊᒥᒃ ᐊᔪᕐᑐᓕᓂᕐᒥᒃ. ᒫᓐᓇᓕ ᖃᖅᑲᒧᑦ ᒪᔪᕋᕐᓂᐊᕐᐳᖓ ᐊᑕᓂᕐᒧᑦ; ᖃᐅᔨᔭᕐᑐᕋᓱᐊᕐᓗᖓ ᐃᓱᒪᒋᔪᓐᓁᕐᑕᐅᔪᓐᓇᕐᒪᖔᑦᓯ ᐊᔪᕐᑐᓕᓂᑦᓯᓐᓂᑦ.”

³¹ ᒨᓯᓯᓗ ᖃᖅᑲᒧᑦ ᐅᑎᕋᒥ ᐊᑕᓂᕐᒧᑦ ᐅᖃᕐᐳᖅ, “ᐅᑯᐊ ᐃᓄᐃᑦ ᐊᔪᕐᑐᓕᓯᒪᕗᑦ ᐊᖏᔪᕐᔪᐊᒥᒃ ᐊᔪᕐᑐᓕᓂᕐᒥᒃ. ᒎᑎᓕᐅᕐᓯᒪᖕᒪᑕ ᒎᓗᒥᑦ ᓴᓇᓯᒪᔭᒥᖕᓂᒃ ᑐᒃᓯᐊᕐᕕᒋᓯᒪᓕᕐᓗᓂᑦᔪᒡᓗ.

³² ᒫᓐᓇ ᐃᓱᒪᒋᔪᓐᓁᕐᕕᒋᓚᐅᒃᑭᑦ ᐊᔪᕐᑐᓕᓂᖏᓐᓂᑦ; ᐃᓱᒪᒋᔪᓐᓁᕐᕕᒋᓂᐊᖏᒃᑯᕕᒋᑦ ᐊᔪᕐᑐᓕᓂᖏᓐᓂᑦ, ᑕᕝᕙ ᐊᑎᕋ ᐲᕐᑕᐅᔪᒃᓴᐅᕗᖅ ᑎᑎᕋᕐᓯᒪᔭᕐᓂᑦ ᐃᓄᖁᑎᕕᑦ ᐊᑎᒃᑯᕕᖏᓐᓂᑦ.”

³³ ᐊᑕᓂᐅᓪᓕ ᒨᓯᓯ ᑭᐅᕚ, “ᐅᕙᓐᓄᑦ ᑭᓯᐊᓂ ᐊᔪᕐᑐᓕᓯᒪᔪᑦ ᐊᑎᖏᑦ ᐲᔭᕐᓂᐊᕐᐸᒃᑲ ᐊᑎᒃᑯᕕᖁᑎᓐᓂᑦ.

³⁴ ᒫᓐᓇᓕ ᐅᑎᓕᕆᑦ, ᐃᓄᐃᓪᓗ ᑕᓯᐅᕆᐊᕐᑐᓕᒃᑭᑦ ᑕᕝᕗᖓ ᐃᓕᖕᓄᑦ ᐅᖃᐅᑎᒋᓯᒪᔭᓐᓄᑦ. ᑕᑯᒋᓪᓗ ᐂᖏᓕᖁᑎᒐ ᓯᕗᓂᑦᓯᓐᓄᑦ ᑎᓕᓂᐊᕐᐸᕋ, ᑭᓯᐊᓂᓕ ᖃᖓᑐᐃᓐᓇᖅ ᓱᒋᐊᕐᓯᕕᒃᓴᕋ ᓇᓪᓕᐅᑎᒃᐸᑦ ᐃᓄᐃᑦ ᑖᒃᑯᐊ ᓱᒋᐊᕈᒫᕐᐸᒃᑲ ᐊᔪᕐᑐᓕᓯᒪᓂᖏᑦ ᒪᓕᒡᓗᒋᑦ.”

³⁵ ᐊᑕᓂᕐᓕ ᐃᓄᖕᓄᑦ ᑎᑭᑎᑦᓯᓕᕐᐳᖅ ᖃᓂᒪᓇᕐᑐᒥᒃ, ᐂᕉᓂᒥᒃ ᓴᓇᑎᑦᓯᓚᐅᕐᓂᖏᑦ ᓄᕐᕋᓐᖑᐊᒥᒃ ᒎᓗᒥᒃ ᐱᑦᔪᑎᒋᓪᓗᒋᑦ.