ᒨᓯᓯ ᐂᑉᐸᖏᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᓇᓐᖑᐊᕐᑏᑦ ᐊᑕᓂᐅᑉ ᑐᐱᖁᑎᖓᑕ ᓇᔪᕐᑕᖓᓂ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

² “ᓂᕈᐊᕐᓯᒪᕗᖓ ᐊᑎᖓ ᑍᓪᓗᒍ ᐱᔭᓕᐅᓪᒥᒃ, ᐅᕆᐅᑉ ᐃᕐᓂᖓᓂᒃ ᕼᐊᕐᓗ ᐃᕐᖑᑕᖓᓂᒃ, ᔫᑕᐅᑉ ᑭᖑᕚᖏᓐᓂᑦ ᐱᓯᒪᔪᒥᒃ,

³ ᐃᓗᒻᒥᕐᑎᑉᐸᕋᓗ ᐊᓂᕐᓂᓐᓂᒃ, ᖃᐅᔨᒪᓂᕐᒥᒃ ᑐᓂᓯᕕᒋᓯᒪᕙᕋ, ᓴᓇᔪᓐᓇᕐᓂᕐᒥᒡᓗ, ᐱᓇᓱᐊᕈᓐᓇᕐᓂᕐᒥᒡᓗ ᖃᓄᐃᑦᑐᑐᐃᓐᓇᕐᓂᒃ ᓴᓇᓐᖑᐊᕈᓐᓇᕐᓂᕐᒥᒃ,

⁴ ᐃᓱᒪᒃᓴᕐᓯᐅᑦᓯᐊᕈᓐᓇᕐᓂᕐᒥᒃ ᐋᖅᑭᒃᓱᐃᑦᓯᐊᕈᓐᓇᕐᓂᕐᒥᒡᓗ ᓴᓇᓂᐊᕐᑕᒥᓂᒃ, ᒎᓗᒥᒡᓗ ᐱᓇᓱᐊᕈᓐᓇᕐᓂᕐᒥᒃ, ᓯᐅᓪᕕᕆᒥᒡᓗ, ᑲᓐᓄᔭᒥᒡᓗ,

⁵ ᐅᔭᕋᖕᓂᒃ ᓇᑲᑎᕆᔪᓐᓇᕐᓂᕐᒥᒃ ᐃᕕᕐᑎᑎᐅᕅᔪᓐᓇᕐᓂᕐᒥᒡᓗ; ᕿᔪᖕᓂᒃ ᓴᓇᓐᖑᐊᕈᓐᓇᕐᓂᕐᒥᒃ; ᖃᓄᐃᑦᑐᑐᐃᓐᓇᑦᓯᐊᓂᒡᓗ ᓴᓇᔪᓐᓇᕐᓂᕐᒥᒃ.

⁶ ᐊᒻᒪᑦᑕᐅᖅ ᓂᕈᐊᕐᓯᒪᒋᕙᕋ ᐅᕼᐅᓕᐊᑉ ᐊᕼᐃᓴᒪᑭᐅᑉ ᐃᕐᓂᖓ, ᑖᓂᐅᑉ ᑭᖑᕚᖏᓐᓂᑦ ᐱᓯᒪᔪᖅ, ᐃᑲᔪᕐᑎᒃᓴᐅᖁᓪᓗᒍ ᑖᑦᓱᒧᖓ ᐱᓇᓱᐊᖃᑕᐅᖁᓪᓗᒍᓗ. ᐊᓯᖏᑦᑕᐅᖅ ᐊᖑᑎᑦ ᑐᓂᓯᕕᒋᓯᒪᕙᒃᑲ ᐱᔪᓐᓇᑦᓯᐊᕐᓂᕐᓂᒃ, ᓴᓇᔪᓐᓇᖁᓪᓗᒋᑦ ᐃᓕᖕᓄᑦ ᐱᖁᔨᑦᔪᑎᒋᓯᒪᔭᓐᓂᒃ.

⁷ ᒪᑯᓂᖓ ᑐᐱᕐᒥᒃ ᑲᑎᒪᕕᖕᒥᒃ, ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᒃᓴᖓᓂᒃ ᒪᑐᒃᓴᖓᓂᒡᓗ, ᑐᐱᐅᓪᓗ ᐃᓗᐊᓃᑦᑐᒃᓴᓕᒫᑦ ᓱᓇᑐᐃᓐᓇᒃᓴᓕᒫᖏᑦ,

⁸ ᓵᒃᓴᒥᒃ ᓱᓇᑐᐃᓐᓇᒃᓴᖏᓐᓂᒡᓗ, ᓇᓂᕈᐊᑦ ᓇᐸᕕᒃᓴᖏᑦ ᒎᓗᓪᓚᕇᑦ ᐃᓚᓯᒪᖏᑦᑐᑦ ᓱᓇᑐᐃᓐᓇᒃᓴᓕᒫᖏᓪᓗ, ᑐᓂᕐᕈᓯᕐᕕᒃᓴᖅ ᐃᓯᕐᓗᐊᕐᓂᑎᑦᓯᕕᒃᓴᕐᓗ,

⁹ ᑐᓂᕐᕈᓯᕐᕕᒃᓴᕐᓗ ᑐᓂᕐᕈᑎᒃᓴᓄᑦ ᐃᑯᐊᓚᑎᑕᒃᓴᓄᑦ ᓱᓇᑐᐃᓐᓇᒃᓴᖏᓪᓗ, ᐅᐊᓴᕐᕕᒃᓴᕐᓗ ᐴᒍᑕᖅ ᐊᓪᓕᕋᒃᓴᖓᓗ,

¹⁰ ᑕᑯᒥᓇᕐᑐᓪᓗ ᓴᓇᔭᐅᑦᓯᐊᕐᓯᒪᔪᑦ ᐊᓄᕌᒃᓮᑦ, ᐃᑦᔪᕐᓁᑦᑐᑦ ᐊᓐᓄᕌᒃᓴᑦ ᐂᕉᓂᒧᑦ ᑐᓂᕐᕈᓯᕐᑎᑦᓯᔨᒧᑦ ᐃᕐᓂᖏᑕᓗ ᐊᓐᓄᕌᒃᓴᖏᑦ, ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᓇᓱᐊᕐᓗᑎᒃ ᐊᑐᒐᒃᓴᖏᑦ,

¹¹ ᒥᖑᐊᕐᓯᒍᑎᒃᓴᕐᓗ ᐅᕐᓱᖅ, ᑎᐱᑦᓯᐊᕆᒃᑐᖅ ᐃᓯᕐᓗᐊᕐᓂᑎᑦᓯᒍᑎᒃᓴᖅ ᐃᑦᔪᕐᓁᑦᑐᕕᖕᒥ ᐊᑐᕐᑕᐅᔪᒃᓴᖅ. ᑕᒪᒃᑯᐊᓕᒫᑦ ᓴᓇᔭᐅᔪᓐᓇᖁᓪᓗᒋᑦ, ᐃᓕᖕᓄᑦ ᐱᖁᔨᑦᔪᑎᒋᓯᒪᔭᕋ ᒪᓕᑦᓯᐊᕐᓗᒍ ᓴᓇᔪᒃᓴᐅᕗᑦ ᑖᒃᑯᓄᖓ.”

ᓴᐸᑎ ᑕᕾᕐᓯᕐᕕᒃᓴᐅᕗᖅ

¹² ᐊᑕᓂᐅᑉ ᒨᓯᓯ ᐅᖃᐅᑎᕚ,

¹³ ᐃᓴᕆᐊᓕᒥᐅᑦ ᐃᓄᖏᓐᓄᑦ ᐅᖃᖁᓪᓗᒍ, “ᓴᐸᑎ ᐃᒃᐱᒋᑦᓯᐊᕐᓯᐅᒃ, ᑖᓐᓇ ᐅᓪᓗᕆᒐᒃᑯ ᑕᕾᕐᓯᕐᕕᒐ, ᑖᓐᓇ ᓇᓗᓁᒃᑯᑕᐅᖕᒪᑦ ᐅᕙᓐᓄᑦ ᐃᓕᑦᓯᓐᓄᓪᓗ, ᑭᖑᕚᑦᓯᓐᓂᓪᓗ ᑍᒪᓐᖓᑦ ᑲᒪᒋᔭᐅᑦᓯᐊᕐᑐᒃᓴᐅᒋᕗᖅ, ᖃᐅᔨᓕᖁᓪᓗᓯ ᐅᕙᖓ, ᐊᑕᓂᐅᔪᖓ, ᐃᑦᔪᕐᓁᑎᑦᓯᒐᒪ ᐃᓕᑦᓯᓐᓂᒃ.

¹⁴ ᓴᐸᑎ ᐃᒃᐱᒋᑦᓯᐊᒐᒃᓴᕆᕙᓯ, ᑖᓐᓇ ᐅᓪᓗᖅ ᐃᑦᔪᕐᓁᑦᑑᖕᒪᑦ ᐃᓕᑦᓯᓐᓄᑦ; ᓇᓪᓕᐊᑦ ᑖᑦᓱᒥᖓ ᐅᓪᓗᒥᒃ ᐃᒃᐱᒍᓱᖏᑦᑐᖅ, ᑕᕝᕙᓂᓗ ᐅᓪᓗᒥ ᐱᓇᓱᐊᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ.

¹⁵ ᐅᓪᓗᓂᒃ ᐱᖓᓲᔪᕐᑐᓂᒃ ᐱᓇᓱᐊᕐᑐᒃᓴᐅᕗᓯ, ᐅᓪᓗᓪᓕ 7ᖓᓐᓂ ᓴᐸᑎ ᓇᓪᓕᐅᑎᕗᖅ ᓱᓇᓕᒫᓂᑦ ᑕᕾᕐᓯᕐᕕᒃᓴᖅ, ᐃᑦᔪᕐᓁᑦᑐᖅ ᐊᑕᓂᕐᒧᑦ; ᓇᓪᓕᐊᑦ ᑕᕝᕙᓂ ᐅᓪᓗᒥ ᐱᓇᓱᐊᕐᑐᖅ ᑖᓐᓇ ᑐᖁᑕᐅᔪᒃᓴᐅᕗᖅ.

¹⁶ ᑍᒤᒻᒪᑦ ᐃᓴᕆᐊᓕᒥᐅᑦ ᐃᓄᖏᑦ ᐅᓪᓗᒥᒃ ᓴᐸᑎᒥᒃ ᑲᒪᑦᓯᐊᕐᑐᒃᓴᐅᕗᑦ, ᑭᖑᕚᕇᖑᔪᓕᒫᓪᓗ ᑲᒪᑦᓯᐊᕐᑐᒃᓴᐅᕗᑦ ᓴᐸᑎᒥᒃ, ᓇᓗᓁᒃᑯᑕᐅᖁᓪᓗᒍ ᐊᖏᖃᑎᒌᖕᓂᕐᒧᑦ.

¹⁷ ᑖᓐᓇ ᓇᓗᓁᒃᑯᑕᐅᓂᐊᕐᒪᑦ ᐃᓱᖃᖏᑦᑐᒧᑦ ᐅᕙᓐᓄᑦ ᐃᓴᕆᐊᓕᒥᐅᓪᓗ ᐃᓄᖏᓐᓄᑦ, ᐅᕙᖓ ᐊᑕᓂᐅᔪᖓ, ᕿᓚᖕᒥᒃ ᓄᓇᒥᒡᓗ ᓴᓇᓚᐅᕋᒪ ᐅᓪᓗᓂᒃ ᐱᖓᓲᔪᕐᑐᓂᒃ, ᐅᓪᓗᓪᓕ 7ᖓᓐᓂ ᓴᓇᔭᓕᒫᓐᓂᑦ ᓄᖅᑲᓚᐅᕐᐳᖓ, ᑭᖑᓂᖓᒍᓪᓗ ᑕᕾᑦᓯᐊᓚᐅᕐᐳᖓ.”

¹⁸ ᒎᑎᓗ ᒨᓯᓯᒧᑦ ᐅᖃᓪᓚᒌᕋᒥ ᖃᖅᑲᐅᑉ ᓮᓁᑉ ᖄᖓᓂᑦ, ᒨᓯᓯ ᑐᓂᕚ ᐅᔭᕌᖕᓂᒃ ᒪᕐᕉᖕᓂᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᒎᑎᐅᑉ ᓇᖕᒥᓂᖅ ᑎᑎᕋᕐᕕᒋᓯᒪᔭᖏᖕᓂᒃ.