ᒨᓯᓯ ᐂᑉᐸᖏᑦ 29 - ᐊᒡᓔᑦ ᐃᑦᔪᕐᖕᓁᑦᑐᑦ

ᒪᓕᒃᑕᐅᒋᐊᓖᑦ ᐂᕉᓂᐅᑉ ᐃᕐᓂᖏᑕᓗ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᓂᖏᓐᓄᑦ

¹ “ᐃᒫᒃ ᑕᕝᕙ ᐱᔪᒃᓴᐅᕗᑎᑦ ᐂᕉᓂᒧᑦ ᐃᕐᓂᖏᓐᓄᓪᓗ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᖁᓪᓗᒋᑦ ᑐᓂᔭᐅᖁᓪᓗᒋᓪᓗ ᐅᕙᓐᓄᑦ, ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ ᓰᐱᐅᓪᓗ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ ᖃᓄᐃᑦᔪᑎᖃᖏᑦᓯᐊᕐᑐᓂᒃ ᓇᒃᓴᕐᑐᒃᓴᐅᕗᑎᑦ.

² ᓂᐊᖂᔭᒃᓴᓂᓪᓗ ᐱᐅᓂᕐᐹᓂᑦ ᐱᓯᒪᔪᓂᒃ ᐳᕙᓪᓚᕐᓴᐅᑎᖃᖏᑦᑐᓂᒃ ᓂᐊᖂᔭᓂᒃ ᓇᒃᓴᕐᑐᒃᓴᐅᕗᑎᑦ, ᓂᐊᖂᔭᓂᒃ ᓇᒃᓴᕐᑐᒃᓴᐅᒋᕗᑎᑦ ᓇᐹᕐᑑᑉ ᐅᕐᓱᖓᓂᒃ ᐃᓚᓯᒪᔪᓂᒃ, ᓯᕙᓂᒡᓗ ᐸᓂᕐᑎᓯᒪᔪᓂᒃ ᐅᕐᓱᒧᑦ ᒥᖑᐊᕐᓯᒪᔪᓂᒃ.

³ ᑕᒪᒃᑯᐊᓗ ᐃᕕᐅᔭᒧᑦ ᐴᕐᓗᒋᑦ ᑐᓂᔭᒃᓴᕆᕙᑎᑦ ᐅᕙᓐᓄᑦ ᑐᓂᕐᕈᓯᓕᕐᑎᓪᓗᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᓰᐱᐅᓪᓗ ᐊᖑᓴᓪᓗᖏᖕᓂᒃ ᒪᕐᕉᖕᓂᒃ.

⁴ “ᐂᕉᓂᒃᑯᓪᓗ ᐃᕐᓂᕇᑦ ᕾᖁᔭᒃᓴᕆᕙᑎᑦ ᑐᐱᐅᑉ ᓇᔪᒐᕆᔭᒪ ᐃᑎᕐᑕᕐᕕᖓᑕ ᐹᖓᓄᑦ, ᑕᕝᕙᓂᓗ ᐃᒥᕐᒧᑦ ᐅᐊᓴᖁᔭᒃᓴᕆᕙᑎᑦ ᑎᒥᓕᒫᒥᖕᓂᒃ ᐅᒃᐱᕐᓂᒃᑯᑦ ᓴᓗᒻᒪᕐᑕᐅᖁᓪᓗᒋᑦ.

⁵ ᑕᕝᕙ ᐂᕉᓂ ᑐᓂᕐᕈᓯᕐᑎᑦᓯᔨᓯᐅᑎᓂᒃ ᑕᕝᕙᓂ ᐊᓐᓄᕌᕐᑎᑕᒃᓴᕆᕙᑦ; ᐱᒋᐊᕐᑎᓪᓗᒍ ᐃᓗᓪᓕᕐᒥᒃ ᐅᕕᓂᕈᕐᒥᒃ, ᑕᑭᔪᒥᒡᓗ ᐅᓕᒡᔪᐊᒥᒃ ᐊᑎᑎᓪᓗᒍ, ᑭᐊᑎᒥᒡᓗ ᐃᐹᑎᒥᒃ ᐊᑎᓕᖕᒥᒃ, ᓴᒡᕕᖕᒥᐅᑕᒥᒡᓗ, ᑕᑦᓯᕈᓯᕐᑎᓪᓗᒍᓗ ᖃᓪᓗᓈᕐᑕᒥᒃ.

⁶ ᓇᓴᕐᓗᒍᓗ ᓂᐊᖁᖓᓄᑦ ᓂᒥᐅᑎᓯᒪᔪᒥᒃ, ᑕᕝᕗᖓᓗ ᕿᓚᒡᓗᒍ ᖃᐅᕈᑎᒃᓴᖓ ᓇᓗᓁᒃᑯᑕᖅ ᐃᑦᔪᕐᓁᑎᑕᐅᓂᕐᒧᑦ ᑎᑎᕋᕐᕕᒋᓯᒪᓗᓂ ‘ᐊᑕᓂᕐᒧᑦ ᑐᓂᕐᕈᑕᐅᓯᒪᔪᖅ.’

⁷ ᑕᕝᕙ ᓇᐹᕐᑑᑉ ᐅᕐᓱᖓ ᑎᒍᓗᒍ, ᓂᐊᖁᖓᓄᑦ ᑯᕕᔭᒃᓴᕆᕙᑦ, ᒥᖑᐊᕐᓗᒍᓗ ᑕᒪᑐᒧᖓ.

⁸ “ᐃᕐᓂᖏᑦᑕᐅᖅ ᑕᕝᕗᓐᖓᕐᑎᓪᓗᒋᑦ ᐅᕕᓂᕈᕐᑎᑕᒃᓴᕆᕙᑎᑦ;

⁹ ᑕᑦᓯᕈᓯᕐᓗᒋᓪᓗ ᓇᓴᕐᓗᒋᓪᓗ ᓂᒥᕐᓗᒋᑦ. ᑍᒫᒃ ᑕᕝᕙ ᐂᕉᓂᒃᑯᑦ ᐃᕐᓂᕇᑦ ᑐᓂᕐᕈᓯᕐᑎᑦᓯᔨᓐᖑᕐᑎᑕᒃᓴᕆᕙᑎᑦ, ᑖᒃᑯᐊᓗ ᑭᖑᕚᖏᓪᓗ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐱᔨᑦᓯᖁᓪᓗᒋᑦ ᐅᕙᓐᓂᒃ ᑍᒪᓐᖓᑦ ᐃᓱᖃᖏᑦᑐᒧᑦ.

¹⁰ “ᑕᕝᕙ ᐃᒻᒧᒃᓯᐅᒐᐅᑉ ᐸᖕᓂᖓ ᑕᕝᕗᓐᖓᕐᑎᑕᒃᓴᕆᕙᑦ ᑐᐱᐅᑉ ᐃᑎᕐᑕᕐᕕᖓᑕ ᐹᖓᓄᑦ ᐂᕉᓂᓗ ᐃᕐᓂᖏᓪᓗ ᐅᖃᐅᑎᔭᒃᓴᕆᕙᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᑕ ᓂᐊᖁᐊᓂᒃ ᐸᑎᒻᒥᓯᖁᓗᒋᑦ.

¹¹ ᑕᕝᕙᓂᓗ ᐃᒻᒧᒃᓯᐅᒐᐅᑉ ᐸᖕᓂᖓ ᑐᖁᑕᒃᓴᕆᕙᑦ ᐊᑕᓂᐅᑉ ᓵᖓᓂ, ᑐᐱᐅᑉ ᓇᔪᒐᕆᔭᒪ ᐃᑎᕐᑕᕕᖓᓂ.

¹² ᐸᖕᓂᐅᓪᓗ ᐊᐅᖓᑕ ᐃᓚᖓᓂᒃ ᐱᓗᑎᑦ ᑐᓂᕐᕈᓯᕐᕕᐅᑉ ᓇᒡᔪᖏᑦ ᐊᐅᒃᑎᕐᑕᒃᓴᕆᕙᑎᑦ ᐊᒡᒐᖕᓄᑦ, ᐊᐅᓪᓕ ᐊᒥᐊᒃᑯᖓ ᑯᕕᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᑭᒡᓕᖓᓄᑦ.

¹³ ᐃᕐᕋᕕᖏᑕ ᐃᓗᓕᒫᖏᑦ ᐲᔭᕐᑕᒃᓴᕆᕙᑎᑦ, ᑭᒃᓴᐅᑎᖓᓗ ᑎᖒᑉ ᖄᖓᓃᑦᑐᖅ, ᑕᕐᑐᖏᒃᑕᓗ ᐃᒡᓗᒃᑐᑦ ᑕᕐᑐᕈᑎᖏᑦ, ᑕᒪᕐᒥᒃ ᐃᑯᐊᓪᓚᒐᒃᓴᕆᕙᑎᑦ ᑐᓂᕐᕈᓯᕐᕕᖕᒥ ᑐᓂᕐᕈᑎᒋᓗᒋᑦ.

¹⁴ ᐃᒻᒧᒃᓯᐅᒐᐅᓪᓕ ᓂᕿᖓ ᐃᑯᐊᓪᓚᒐᒃᓴᕆᕙᑦ, ᐊᒥᖓ ᐱᖃᓯᐅᑎᓗᒍ, ᐃᕐᕋᕕᖏᓪᓗ ᐱᖃᓯᐅᑎᓗᒋᑦ ᓄᓇᓖᑦ ᓯᓚᑖᓂ. ᑕᒪᒃᑯᐊ ᑐᓂᕐᕈᑎᒃᓴᐅᖕᒪᑕ ᑐᓂᕐᕈᓯᕐᑎᑦᓯᔩᑦ ᐊᔪᕐᓂᖏᑦ ᐱᓪᓗᒋᑦ.

¹⁵ “ᓰᐱᐅᑉ ᐊᖑᓴᓪᓗᖓᑕ ᐂᑉᐸᖓ ᑕᒪᐅᓐᖓᐅᑎᓗᒍ, ᐂᕉᓂᒃᑯᑦ ᐃᕐᓂᕇᑦ ᐅᖃᐅᑎᔭᒃᓴᕆᔭᕙᑎᑦ ᓂᐊᖁᐊᓂᒃ ᐸᑎᒻᒥᒃᓯᖁᓗᒋᑦ.

¹⁶ ᑕᕝᕙᓂᓗ ᑐᖁᑕᒃᓴᕆᕙᑦ, ᐊᐅᖓᓂᓪᓗ ᐱᓗᑎᑦ ᑯᕝᕕᕐᓴᐅᑎᒋᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᐊᕙᓗᖏᓐᓄᑦ ᓯᑕᒪᓄᑦ.

¹⁷ ᓂᕿᖓᓗ ᑕᕝᕙᓂ ᐊᕕᒃᑐᕋᒃᓴᕆᕙᑦ ᓯᖁᑦᑎᕐᓗᒍ, ᐃᕐᕈᕐᑐᒐᓴᕆᕙᑎᓪᓗ ᐃᕐᕋᕕᖏᑦ ᓂᐅᖏᓪᓗ, ᓂᐊᖁᖓᑕᓗ ᖄᖓᓄᑦ ᐃᓕᓗᒋᑦ ᐊᒡᒍᕐᓯᒪᔪᓪᓗ ᐊᓯᖏᑦ ᑕᕝᕗᓐᖓᖃᓯᐅᑎᓗᒋᑦ,

¹⁸ ᑕᕝᕙ ᑐᓂᕐᕈᓯᕐᕕᖕᒥ ᐃᑯᐊᓪᓚᒃᑕᒃᓴᕆᕙᑎᑦ; ᐃᑯᐊᓚᑎᑕᐅᓂᒃᑯᑦ ᑐᓂᕐᕈᑎᐅᖕᒪᑦ ᐊᑕᓂᕐᒧᑦ; ᑎᐱᖓᓗ ᒪᒪᕐᑑᓪᓗᓂ ᐊᑕᓂᕐᒧᑦ, ᐃᑯᐊᓪᓚᒃᑕᐅᓪᓗᓂ ᑐᓂᕐᕈᑕᐅᖕᒪᑦ ᐊᑕᓂᕐᒧᑦ.

¹⁹ “ᑖᑦᓱᒪᓕ ᐂᑉᐸᖓ ᓰᐱᐅᑉ ᐊᖑᓴᓪᓗᖓ ᑕᒪᐅᓐᖓᕐᑎᑕᒃᓴᕆᒋᕙᑦ; ᐂᕉᓂᒃᑯᑦ ᐃᕐᓂᕇᑦ ᑖᑦᓱᒥᖓ ᓂᐊᖁᐊᒍᑦ ᐸᑎᒻᒥᓯᔪᒃᓴᐅᕗᑦ,

²⁰ ᑕᕝᕙᓂᓗ ᑖᓐᓇ ᑐᖁᑕᒃᓴᕆᕙᑦ, ᐊᐅᖓᑕᓗ ᐃᓚᖓᓂᒃ ᑕᕝᕙᓐᖓᑦ ᐱᓗᑎᑦ ᐂᕉᓂᐅᑉ ᓯᐅᑎᖓᑕ ᑕᓕᕐᐱᐊᑕ ᐳᕝᕙᖓ ᐊᐅᒃᑎᕐᑕᒃᓴᕆᕙᑦ ᐃᕐᓂᖏᑕᓗ ᓯᐅᑎᖏᑕ ᑕᓕᕐᐱᖏᑕ ᐳᕝᕙᖏᑦ ᑍᒤᓕᐅᕐᒥᓗᒋᑦ, ᑕᓕᕐᐱᖏᑕᓗ ᑯᓪᓗᖏᑦ ᐊᐅᒃᑎᕐᒥᓗᒋᑦ, ᑕᓕᕐᐱᖏᑕᓗ ᐳᑐᒍᖏᑎᒍᑦ ᐊᐅᒃᑎᕐᑕᒃᓴᕆᒋᕙᑎᑦ, ᐊᐅᓪᓕ ᐊᒥᐊᒃᑯᖓ ᑯᕝᕕᕐᓴᐅᑎᒋᔭᒃᓴᕆᕙᑦ ᑐᓂᕐᕈᓯᕐᕕᐅᑉ ᓴᓂᕋᖏᓐᓄᑦ ᓯᑕᒪᓄᑦ.

²¹ ᐊᐅᓪᓕ ᐃᓚᖓ ᑐᓂᕐᕈᓯᕐᕕᖕᒦᑦᑐᖅ ᐱᔭᒃᓴᕆᕙᑦ; ᓇᐹᕐᑑᓪᓗ ᐅᕐᓱᖓᓂᒃ ᒥᖑᐊᕐᓯᒍᑎᒃᓴᒥᒃ ᐃᓚᓗᒍ, ᓯᕐᐸᕐᓴᐅᑎᒋᔭᒃᓴᕆᕙᑦ ᐂᕉᓂᒧᑦ ᐊᓐᓄᕌᖏᓐᓄᓪᓗ ᐃᕐᓂᖏᓐᓄᓪᓗ ᐃᕐᓂᖏᑕᓗ ᐊᓐᓄᕌᖏᓐᓄᑦ. ᑕᕝᕙ ᑖᒃᑯᐊᓕᒫᑦ ᐊᓐᓄᕌᖏᓪᓗ ᐱᖃᓯᐅᑎᓗᒋᑦ ᐃᑦᔪᕐᓁᕐᑎᑕᐅᓂᐊᕐᐳᑦ ᐊᑕᓂᕐᒧᑦ.

²² “ᓰᐱᐅᑉ ᐊᖑᓴᓪᓗᖓᑕ ᑐᓐᓄᖏᑦ ᐲᕐᑕᒃᓴᕆᕙᑎᑦ, ᐸᒥᐊᓪᓗᐊᑕᓗ ᑐᓐᓄᖏᒃ, ᐃᕐᕋᕕᖏᑕᓗ ᐃᓗᖏᑦ, ᑎᖑᖓᑕᓗ ᐱᐅᓂᖓ, ᑕᕐᑐᖏᒡᓗ ᐃᒡᓗᒃᑐᑦ ᑕᕐᑐᕈᑎᖏᑦ ᐱᖃᓯᐅᑎᓗᒋᑦ, ᒥᒥᖓᓗ ᑕᓕᕐᐱᐊ. (ᑎᓕᔭᐅᓂᕐᒧᑦ ᑖᓐᓇ ᓰᐱ ᑐᓂᕐᕈᑎᒋᔭᐅᖕᒪᑦ).

²³ ᐃᕕᐅᔭᕐᒥᑦ ᓂᐊᖂᔭᒃᑯᕕᖕᒥᑦ ᐳᕙᓪᓚᕐᓴᐅᑎᖃᖏᑦᑐᓂᒃ ᑐᓂᕐᕈᑕᐅᓯᒪᔪᓂᑦ ᐊᑕᓂᕐᒧᑦ; ᐱᔪᒃᓴᐅᕗᑎᑦ ᓂᐊᖂᔭᒥᒃ ᐊᑕᐅᓯᕐᒥᒃ, ᐆᓯᒪᔪᒥᒡᓗ ᓵᑦᑐᒥᒃ ᐅᕐᓲᑎᓕᖕᒥᒃ, ᓯᕙᒥᒡᓗ ᐸᓂᕐᑎᓯᒪᔪᒥᒃ;

²⁴ ᑕᒪᒃᑯᐊᓕᒫᓪᓗ ᐂᕉᓂᒧᑦ ᐃᕐᓂᖏᓐᓄᓪᓗ ᑐᓂᔭᒃᓴᕆᕙᑎᑦ, ᑖᒃᑯᐊ ᑎᒍᓯᓗᑎᒃ ᑖᒃᑯᓂᖓ ᐃᓴᐅᑎᓗᒋᑦ ᓄᓗᕋᕈᑎᒋᓗᒋᓪᓗ ᑐᓂᓯᖁᓪᓗᒋᑦ ᐊᑕᓂᕐᒧᑦ.

²⁵ ᑕᕝᕙ ᑭᖑᓂᖓᒍᑦ ᑖᒃᑯᓇᓐᖓᑦ ᑎᒍᓗᒋᑦ, ᑐᓂᕐᕈᓯᕐᕕᖕᒥ ᐃᑯᐊᓪᓚᒃᑎᑕᒃᓴᕆᕙᑎᑦ ᑐᓂᕐᕈᓯᐅᑎᒋᓗᒋᑦ ᐃᑯᐊᓚᑦᓯᓂᒃᑯᑦ ᑐᓂᕐᕈᑎᐅᔪᓄᑦ ᐃᓚᓕᐅᑎᖁᓪᓗᒋᑦ, ᑕᒪᒃᑯᐊ ᑎᐱᖏᑦ ᒪᒪᕐᑑᖕᒪᑕ ᐊᑕᓂᕐᒧᑦ; ᑐᓂᕐᕈᓯᕈᑎᐅᓪᓗᑎᒡᓗ ᐃᑯᐊᓚᑦᓯᓂᒃᑯᑦ ᐊᑕᓂᕐᒧᑦ.

²⁶ “ᑖᑦᓱᒪᓕ ᑐᓂᕐᕈᑕᐅᔫᑉ ᓰᐱᐅᑉ ᐊᖑᓴᓪᓗᖓᑕ ᓴᑭᐊᖏᑦ ᐲᕐᓗᒋᑦ ᑐᓂᕐᕈᑎᒋᔭᒃᓴᕆᕙᑎᑦ ᐊᑕᓂᕐᒧᑦ ᐃᓴᐅᑎᓗᒋᑦ ᓄᓗᕋᐅᑎᒋᓗᒋᓪᓗ; ᑖᒃᑯᐊᓕ ᐃᕝᕕᑦ ᓂᕿᒃᓴᕐᑖᕆᔭᒃᓴᕆᕙᑎᑦ.

²⁷ “ᑖᒃᑯᐊᓗ ᓰᐱᐅᑉ ᐊᖑᓴᓪᓗᖓᑕ ᓴᑭᐊᖏᑦ ᑐᒃᓯᐅᑎᔭᒃᓴᕆᕙᑎᑦ ᐃᑦᔪᕐᓁᑎᑕᐅᖁᓪᓗᒋᑦ, ᒥᒥᖏᓪᓗ ᓂᕿᒃᓴᕆᔭᐅᖁᓪᓗᒋᑦ ᑐᓂᕐᕈᓯᕐᑎᑦᓯᔨᓄᑦ, ᐃᓴᐅᑎᔭᐅᓪᓗᑎᒃ ᓄᓗᕋᐅᑕᐅᓪᓗᑎᒡᓗ ᑐᓂᔭᐅᓯᒪᖕᒪᑕ, ᑐᓂᕐᕈᑎᐅᓯᒪᓪᓗᑎᒡᓗ ᑎᓕᔭᐅᓂᕐᒧᑦ, ᑕᒪᒃᑯᐊ ᓴᓂᕐᕙᒃᑕᐅᔪᒃᓴᐅᕗᑦ ᐂᕉᓂᐅᑉ ᐃᕐᓂᖏᑕᓗ ᓂᕿᒃᓴᕆᔭᕆᐊᖃᕐᒪᒋᑦ.

²⁸ ᑕᒪᓐᓇᓗ ᑍᒪᓐᖓᑦ ᓱᖁᓯᔪᐃᑦᑐᒥᒃ ᐂᕉᓂᒃᑯᑦ ᐃᕐᓂᖏᑕᓗ ᒪᓕᒐᕆᔭᒃᓴᕆᕚᑦ ᐃᓴᕆᐊᓕᒥᐅᑦ ᐃᓄᖏᑕ ᑐᓂᕐᕈᓯᖃᑦᑕᕐᓂᒃᓴᖓᑦ, ᑕᒪᓐᓇ ᑍᒤᑦᑐᖅ ᑐᓂᕐᕈᓯᕐᓂᖅ ᑐᓂᕐᕈᓯᕐᑎᑦᓯᔨᓄᑦ ᓂᕿᒃᓴᕆᔭᐅᔪᒃᓴᐅᕗᖅ ᐃᓴᕆᐊᓕᒥᐅᑦ ᐃᓄᖏᓐᓄᑦ ᑐᓂᔭᐅᖃᑦᑕᕆᐊᓕᒃ; ᐃᓚᒌᑦᓯᐊᓕᕐᓂᕐᒧᑦ ᑐᓂᕐᕈᓯᕐᓂᐅᖕᒪᑦ ᐊᑕᓂᕐᒧᑦ.

²⁹ “ᐂᕉᓂᐅᓪᓕ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᐊᓐᓄᕌᖏᑦ ᐃᑦᔪᕐᓁᑎᑕᐅᓯᒪᔪᑦ ᐃᕐᓂᖏᓐᓄᑦ ᐱᔭᐅᔭᕆᐊᖃᕈᒫᕐᐳᑦ ᐂᕉᓂᐅᑉ ᑭᖑᓂᖓᓂ, ᒥᖑᐊᕐᑕᐅᓂᒃᑯᑦ ᑎᓕᔭᐅᓂᒃᑯᓪᓗ ᐱᒋᐊᕐᓂᖃᕐᓗᑎᒃ.

³⁰ ᐂᕉᓂᐅᑉ ᐃᕐᓂᖓ ᑐᓂᕐᕈᓯᕐᑎᑦᓯᔨᖑᕐᑐᖅ ᐂᕉᓂᒧᑦ ᐃᓇᖏᐅᑎᓗᓂ ᑐᐱᕐᒧᑦ ᑲᑎᒪᕕᐅᔪᒧᑦ ᐃᑦᔪᕐᓁᑦᑐᕕᖕᒧᑦ ᐱᔨᑦᓯᕆᐊᕐᑐᕐᓗᓂ ᐃᑎᕐᑐᒃᓴᖅ ᑖᓐᓇ ᐊᓐᓄᕌᓂᒃ ᐃᑦᔪᕐᓁᑎᑕᐅᓯᒪᔪᓂᒃ ᑖᒃᑯᓂᖓ ᐊᑐᕆᐊᖃᕐᐳᑦ ᐅᓪᓗᓂᒃ 7ᓂᒃ.

³¹ “ᓰᐱᐅᑉ ᐊᖑᓴᓪᓗᖓᑕ ᓂᕿᖓ ᑎᓕᓯᓂᕐᒧᑦ ᑐᓂᕐᕈᑕᐅᔫᑉ ᐆᔪᓕᐊᖑᔪᒃᓴᐅᕗᖅ ᑕᕝᕙᓂ ᐃᑦᔪᕐᓁᑦᑐᕕᖕᒥ;

³² ᐂᕉᓂᐅᓪᓗ ᐃᕐᓂᓂ ᐃᓚᒋᓗᒋᑦ ᓰᐱᐅᑉ ᐊᖑᓴᓪᓗᖓᑕ ᓂᕿᖓ ᓂᕆᔭᒃᓴᕆᕚᑦ ᓂᐊᖂᔭᓪᓗ ᐃᕕᐅᔭᕐᒦᑦᑐᑦ ᑐᓂᕐᕈᑎᒋᔭᐅᓯᒪᔪᑦ, ᑐᐱᐅᑉ ᐃᑎᕐᑕᕐᕕᖓᓂ.

³³ ᑖᒃᑯᐊ ᓂᕆᔪᒃᓴᐅᕗᑦ ᐃᓱᒪᒋᔪᓐᓁᕐᑕᐅᓂᒃᓴᒧᑦ ᑐᓂᕐᕈᑕᐅᓯᒪᔪᓂᒃ ᑎᓕᔭᐅᓕᕐᑎᓪᓗᒋᑦ ᐃᑦᔪᕐᓁᑎᑕᐅᓕᕐᑎᓪᓗᒋᓪᓗ ᑐᓂᕐᕈᑕᐅᓯᒪᔪᑦ, ᑐᓂᕐᕈᓯᕐᑎᑦᓯᔨᓄᓪᓕ ᑭᓯᐊᓂ ᓂᕆᔭᐅᔪᒃᓴᐅᕗᑦ ᐃᑦᔪᕐᓁᑎᑕᐅᓯᒪᖕᒪᑕ.

³⁴ ᓂᕿᓂᒡᓕ ᓂᐊᖂᔭᓂᒡᓗ ᑎᓕᓯᓂᕐᒧᑦ ᑐᓂᕐᕈᑕᐅᔪᑦ ᓱᓕ ᐊᒥᐊᒃᑯᖃᕐᑐᖃᕐᐸᑦ ᐅᓪᓛᖑᓕᑎᓪᓗᒍ, ᑕᕝᕙ ᑕᒪᒃᑯᐊ ᐃᑯᐊᓪᓚᒃᑕᐅᔪᒃᓴᐅᕗᑦ ᓄᖑᑕᐅᓗᑎᒃ; ᓂᕆᔭᐅᔪᒃᓴᐅᓐᖏᓚᑦ, ᐃᑦᔪᕐᓁᑦᑑᖕᒪᑕ.

³⁵ “ᑍᒫᒃ ᑕᕝᕙ ᑐᓂᕐᕈᓯᕐᑎᑦᓯᔨᐅᓂᕐᒧᑦ ᑎᓕᓯᔪᒃᓴᐅᕗᑎᑦ ᐂᕉᓂᒥᒃ ᐃᕐᓂᖏᓐᓂᒡᓗ; ᐱᖁᔨᓯᒪᓂᕋ ᒪᓕᒡᓗᒍ; ᐅᓪᓗᓂᒃ 7ᓂᒃ,

³⁶ ᖃᐅᑕᒫᑦ ᑐᓂᕐᕈᓯᕐᑐᒃᓴᐅᕗᑎᑦ ᐃᒻᒧᒃᓯᐅᒐᐅᑉ ᐸᖕᓂᖓᓂᒃ ᐊᔪᕐᓃᑦ ᐃᓱᒪᒋᔪᓐᓁᕐᑕᖁᓪᓗᒋᑦ, ᑐᓂᕐᕈᓯᕐᕕᐅᓪᓗ ᓴᓗᒻᒪᕐᑕᐅᓂᒃᓴᖓᓄᑦ, ᑭᖑᓂᖓᒍᑦ ᑕᕝᕙ ᒥᖑᐊᕐᑕᒃᓴᕆᕙᑦ ᓇᐹᕐᑑᑉ ᐅᕐᓱᖓᓄᑦ ᐃᑦᔪᕐᓁᑦᑕᐅᓕᖁᓪᓗᒍ.

³⁷ ᑍᒤᓕᐅᕐᑐᒃᓴᐅᕗᑎᑦ ᖃᐅᑕᒫᑦ ᐅᓪᓗᓂᒃ 7ᓂᒃ, ᑕᕝᕙ ᑕᒪᑐᒪ ᑭᖑᕐᖓᒍᑦ ᑐᓂᕐᕈᓯᕐᕕᒃ ᐃᑦᔪᕐᓁᑎᑕᐅᒻᒪᕆᖕᓂᐊᕐᐳᖅ, ᓱᓇᑐᐃᓐᓇᕐᓗ ᑐᓂᕐᕈᓯᕐᕕᖕᒧᑦ ᐊᒃᑑᑎᔪᖅ ᑕᕝᕙ ᐃᑦᔪᕐᓁᓕᕐᓂᐊᕐᐳᖅ.”

ᖃᐅᑕᒫᑦ ᑐᓂᕐᕈᑕᐅᔭᕆᐊᓖᑦ

³⁸ “ᑐᓂᕐᕈᓯᕐᕕᒥ ᐃᒤᑦᑐᓂᒃ ᑕᕝᕙ ᑐᓂᕐᕈᓯᕐᑐᒃᓴᐅᕗᑎᑦ; ᓰᐱᐅᑉ ᓄᕐᕋᖏᖕᓂᒃ ᒪᕐᕉᖕᓂᒃ ᐊᑕᐅᓯᕐᒥᒃ ᐊᕐᕌᒍᓖᖕᓂᒃ ᑐᓂᕐᕈᓯᖃᑦᑕᕐᑐᒃᓴᐅᕗᑎᑦ ᖃᐅᑕᒫᑦ ᑍᒫᓐᖓᓕᒫᖅ.

³⁹ ᐅᓪᓛᒃᑯᑦ ᓰᐱᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ ᑐᓂᕐᕈᓯᕐᑐᒃᓴᐅᕗᑎᑦ, ᐂᑉᐸᖓᓕ ᓰᐱᐅᑉ ᓄᕐᕋᖓ ᐅᓐᓄᒃᑯᑦ ᑐᓂᕐᕈᑎᒋᔭᒃᓴᕆᕙᑦ;

⁴⁰ ᓯᕗᓪᓕᖅ ᓰᐱᐅᑉ ᓄᕐᕋᖓ ᑐᓂᕐᕈᑎᒋᓕᕈᕕᐅᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐅᖁᒤᓐᓂᖃᕐᑐᒥᒃ 1ᑭᓗᒍᕌᒻᒥᒃ ᐃᓚᔭᒃᓴᕆᕙᑦ ᓇᐹᕐᑑᓪᓗ ᐅᕐᓱᖓᓂᒃ ᐃᓚᓗᒍ 1ᓖᑕᒥᒃ. ᐸᐅᕐᖎᓪᓗ ᐃᑦᑎᖓᓂᒃ 1ᓖᑕᒥᒃ ᐊᖏᓂᓕᖕᒥᒃ ᖄᖓᒍᑦ ᑯᕝᕕᕆᔭᒃᓴᕆᕙᑦ.

⁴¹ ᐂᑉᐸᖓᓕ ᓰᐱᐅᑉ ᓄᕐᕋᖓ ᑐᓂᕐᕈᑎᒋᔭᒃᓴᕆᕙᑦ ᐅᓐᓄᒃᑯᑦ, ᑐᓂᕐᕈᑎᒋᓕᕈᕕᐅᒃ ᑍᒫᑦᓮᓐᓇᖅ ᓂᐊᖂᔭᒃᓴᒥᒃ ᓯᖃᓪᓕᕐᓯᐊᕐᓯᒪᔪᒥᒃ ᐃᓚᔭᒃᓴᕆᕙᑦ, ᓇᐹᕐᑑᓪᓗ ᐅᕐᓱᖓᓂᒃ ᑍᒫᑦᓮᓐᓇᖅ, ᐸᐅᕐᖎᓪᓗ ᐃᑦᑎᖓᓂᒃ ᑍᒫᑦᓮᓐᓇᖅ ᐅᓪᓛᒃᑯᑦ ᑐᓂᕐᕈᑎᒋᖅᑲᐅᔭᕐᑐᑦ, ᑕᒪᑐᒪ ᑎᐱᖓ ᒪᒪᕐᑑᕗᖅ ᐊᑕᓂᕐᒧᑦ ᑐᓂᕐᕈᑕᐅᔪᖅ ᐃᑯᐊᓚᑎᑕᐅᓪᓗᓂ.

⁴² ᑕᒪᓐᓇᓗ ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕐᓂᖅ ᑍᒫᓐᖓᑦ ᑲᔪᓯᑎᑕᐅᔪᒃᓴᐅᕗᖅ ᑭᖑᕚᓯᓐᓄᑦ ᑐᐱᐅᑉ ᐃᑎᕐᑕᕐᕕᖓᓂ ᐊᑕᓂᐅᑉ ᓵᖓᓂ, ᑕᕝᕙᓂ ᐃᓕᖕᓄᑦ ᕾᔪᒪᕗᖓ, ᑕᕝᕙᓂᓗ ᐅᖃᖃᑎᒋᓗᑎᑦ.

⁴³ ᑕᕝᕙᓂ ᐃᓴᕆᐊᓕᒥᐅᑦ ᐃᓄᖏᑦ ᑲᑎᔪᒪᕙᒃᑲ, ᑖᓐᓇᓗ ᐃᑦᔪᕐᓁᑎᑕᐅᓂᐊᕐᐳᖅ ᓇᔫᑎᓂᕐᒪ ᖃᐅᒻᒪᕆᖕᓂᖓᓄᑦ.

⁴⁴ ᑐᐱᕐᓗ ᑐᓂᕐᕈᓯᕐᕕᓕᒫᓪᓗ ᐃᑦᔪᕐᓁᑦᑐᓐᖑᕐᑎᓐᓂᐊᕐᐸᒃᑲ; ᐂᕉᓂᓗ ᐃᕐᓂᖏᓪᓗ ᐃᑦᔪᕐᓁᑦᑐᓐᖑᕐᑎᓪᓗᒋᑦ ᓴᓂᕐᕙᒃᑕᐅᑎᓐᓂᐊᕐᐸᒃᑲ ᑐᓂᕐᕈᓯᕐᑎᑦᓯᔨᐅᓕᖁᓪᓗᒋᑦ ᐅᕙᓐᓄᑦ.

⁴⁵ ᐃᓴᕆᐊᓕᒥᐅᓪᓗ ᐃᓄᖏᓐᓂ ᐃᓂᖃᕈᒪᕗᖓ ᑖᒃᑯᓄᖓᓗ ᒎᑎᒋᔭᐅᔪᒪᓪᓗᖓ.

⁴⁶ ᖃᐅᔨᓂᐊᕐᐳᓪᓗ ᐅᕙᖓ ᐊᑕᓂᐅᒐᒪ ᒎᑎᒋᔭᖓᑦ, ᑖᓐᓇ ᑖᒃᑯᓂᖓ ᐊᓂᑎᑦᓯᓚᐅᕐᑐᖅ ᐄᑦᔨᑉᑎᒥᐅᓂᑦ ᑖᒃᑯᓇᓂ ᐃᓂᖃᕈᓐᓇᖁᓪᓗᖓ; ᐅᕙᖓ ᐊᑕᓂᐅᒐᒪ ᒎᑎᒋᔭᖓᑦ.”