ᒨᓯᓯ ᐂᑉᐸᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦᑐᓂᕐᕈᓯᕐᑎᑦᓯᔩᑦ ᐊᓐᓄᕌᕆᔭᕆᐊᖃᕐᑕᖏᑦ ᒨᓯᓯ ᐂᑉᐸᖏᑦ 39:1-7 1 “ᐊᖓᔪᐃᑦ ᐂᕉᓂ ᕾᖁᓚᐅᕈᒃ ᐃᕐᓂᖏᓪᓗ, ᓇᑖᑉ, ᐊᐱᕼᐅ, ᐃᓕᓯᕆ, ᐃᑕᒫᕐᓗ, ᑖᒃᑯᐊᓗ ᐃᓴᕆᐊᓕᒥᐅᑦ ᐃᓄᖏᓐᓂᑦ ᓴᓂᕐᕙᒃᑕᐅᔪᒃᓴᐅᕗᑦ, ᐅᕙᓐᓄᑦ ᐱᔨᑦᓯᖁᓪᓗᒋᑦ ᑐᓂᕐᕈᓯᕐᑎᑦᓯᔨᐅᓂᕐᒥᒃ. 2 ᑐᓂᕐᕈᓯᕐᑎᑦᓯᔨᓄᓪᓗ ᐃᑦᔪᕐᓁᑦᑐᓂᒃ ᐊᓐᓄᕌᓕᐅᕐᑐᒃᓴᐅᕗᑎᑦ ᐊᖓᔪᖕᓄᑦ ᐂᕉᓂᒧᑦ, ᓂᕐᑐᕐᓇᕐᑑᖁᓪᓗᒍ ᑕᑯᒥᓇᖁᓪᓗᒍᓗ. 3 ᓴᓇᑦᓯᐊᕈᓐᓇᕐᑐᓕᒫᓂᒃ ᕾᖁᔨᔪᒃᓴᐅᕗᑎᑦ ᓴᓇᔪᓐᓇᕐᓂᕐᒥᒃ ᑐᓂᓯᕕᒋᓯᒪᔭᓐᓄᑦ, ᑖᒃᑯᐊᓗ ᐅᖃᐅᑎᔭᒃᓴᕆᕙᑎᑦ ᐂᕉᓂᒥᒃ ᐊᓐᓄᕌᒃᓴᓕᐅᖁᓗᒋᑦ, ᑖᓐᓇ ᑐᓂᕐᕈᓯᕐᑎᑦᓯᔨᓐᖑᕐᑎᑕᐅᖁᓪᓗᒍ ᑐᓂᔭᐅᓗᓂ ᐅᕙᓐᓄᑦ. 4 ᐃᒫᒃ ᑕᕝᕙ ᐊᓐᓄᕌᓕᐅᕐᑕᐅᔪᒃᓴᐅᕗᑦ; ᓴᒡᕕᖕᒥᐅᑕᖃᕐᓗᑎᒃ ᓯᒃᑭᑕᒥᒃ, ᑭᐊᑎᒥᒍᑦ ᐊᓐᓄᕌᖃᕐᓗᑎᒃ ᑍᔭᐅᔪᒥᒃ ᐃᐹᑦᒥᒃ, ᐊᓐᓄᕌᖃᕐᓗᑎᒡᓗ ᑕᑭᔪᓂᒃ, ᓯᓚᓪᓕᕐᓂᒡᓗ ᑕᕐᓯᕐᑐᕐᓯᒪᔪᓂᒃ ᓴᓇᓐᖑᐊᕐᓯᒪᔪᓂᒃ ᐅᕕᓂᕈᖃᕐᓗᑎᒃ, ᓂᐊᖁᖓᓗ ᐃᒻᒧᓯᕐᓯᒪᓗᓂ ᓇᓴᐅᔮᕐᑐᒥᒃ, ᖃᓪᓗᓈᕐᑕᒥᒡᓗ ᑕᑦᓯᕈᑎᖃᕐᓗᑎᒃ. ᑍᒫᒃ ᑕᕝᕙ ᐊᖓᔪᐃᑦ ᐂᕉᓂ ᐊᓐᓄᕌᓕᐅᕐᑕᐅᔪᒃᓴᐅᕗᖅ ᑐᓂᕐᕈᓯᕐᑎᑦᓯᔩᑦ ᐊᓐᓄᕌᒃᓴᖏᓐᓂᒃ ᐃᑦᔪᕐᓁᑦᑐᓂᒃ ᑖᑦᓱᒪᓗ ᐃᕐᓂᖏᑦ, ᑖᒃᑯᐊ ᐅᕙᓐᓂᒃ ᐱᔨᑦᓯᖁᓪᓗᒋᑦ ᑐᓂᕐᕈᓯᕐᑎᑦᓯᔨᐅᓂᕐᒧᑦ. 5 ᐊᓐᓄᕌᓕᐅᕐᑐᓪᓗ ᐊᓐᓄᕌᓕᐅᕐᑐᒃᓴᐅᕗᑦ ᒎᓗᒥᒃ, ᑐᖑᔪᕐᑐᒥᒡᓗ ᐊᐅᐸᓪᓚᕆᒃᑐᒥᒡᓗ, ᓄᕕᕐᓵᒃᓴᒥᒡᓗ ᐊᐅᐸᕐᑐᒥᒃ, ᒎᓗᒥᒡᓗ ᐃᕙᓗᖃᕐᓗᑎᒃ, ᓵᑦᑐᓂᒡᓗ ᖃᓪᓗᓈᕐᑕᓂᒃ ᐊᑐᕐᓗᑎᒃ. 6 “ᑭᐊᑎᒥᒃ ᐊᓐᓄᕌᓕᐅᕐᑐᒃᓴᐅᕗᑦ ᑍᔭᐅᔪᒥᒃ ᐃᐹᑦᒥᒃ ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥᒡᓗ, ᓄᕕᕐᓵᒃᓴᒥᒡᓗ ᐊᐅᐸᕐᑐᒥᒃ, ᒎᓗᒥᒃ ᐃᕙᓗᖃᕐᓗᑎᒃ, ᓵᑦᑐᒥᒃ ᖃᓪᓗᓈᕐᑕᒥᒃ ᐊᑐᕐᓗᑎᒃ, ᑕᕐᓯᕐᑐᕐᓯᒪᓗᑎᒡᓗ ᓴᓇᓐᖑᐊᕐᓯᒪᔪᓂᒃ. 7 ᐅᔭᑦᓯᐅᑎᖃᕐᑐᒃᓴᐅᕗᕐᓗ ᐃᒡᓗᒃᑐᑦ, ᓴᒡᕕᖕᒥᐅᑕᐅᑉ ᓯᓈᓄᑦ ᐊᑕᓗᑎᒃ, ᐊᑕᑦᔪᑎᒃᓴᐅᖁᓪᓗᒋᒃ ᐊᕙᒻᒧᑦ ᐊᑐᓂᑦ. 8 ᖃᓪᓗᓈᕐᑕᑦᓯᐊᒥᒡᓗ ᑕᑦᓯᕈᑎᓕᐅᕐᓯᒪᔪᒃᓴᐅᕗᑦ ᑖᒃᑯᓇᓐᖓᑦᓮᓐᓇᖅ ᓴᓇᓯᒪᔪᒥᒃ, ᑖᓐᓇ ᑭᐊᑎ ᐊᓐᓄᕌᓕᐊᕆᓯᒪᔪᖅ ᐊᑎᖃᕐᑐᖅ ᐃᐹᑦᒥᒃ ᐊᑕᔪᓐᓇᖁᓪᓗᒍ ᑍᒤᑦᑐᒥᒃ ᐊᑕᐅᓯᐅᓕᖅᑲᖓᑦᔪᑎᒋᓗᓂᐅᒃ. 9 ᐅᔭᕌᖕᓂᒡᓗ ᐱᐅᓂᕐᐹᓂᒃ ᒪᕐᕉᖕᓂᒃ ᐱᔪᒃᓴᐅᕗᑎᑦ, ᑕᕝᕘᓇᓗ ᐃᓴᕆᐊᓕᐅᑉ ᑭᖑᕚᖏᑦ ᑎᑎᕋᕐᓗᒋᑦ. 10 ᓄᑲᕇᓪᓗ ᐊᑎᖏᑦ 6ᐅᓗᑎᒃ ᑎᑎᕋᕐᓯᒪᔪᒃᓴᐅᕗᑦ ᐅᔭᕋᖕᒥ ᐊᑕᐅᓯᕐᒥ, ᐊᓯᖏᓪᓗ 6ᐅᖕᒥᔪᑦ ᐅᔭᕋᐅᑉ ᐂᑉᐸᖓᒍᑦ ᑎᑎᕋᕐᒥᓗᒋᑦ, ᐃᕐᓂᐊᖑᓯᒪᓂᖏᑕ ᑐᖏᓕᕇᒃᐸᓪᓕᐊᓂᖏᑦ ᒪᓕᒡᓗᒋᑦ. 11 ᐅᔭᕋᖕᓂᒃ ᓴᓇᓐᖑᐊᕈᓐᓇᕐᑐᓂᒃ ᑎᓕᓯᔪᒃᓴᐅᕗᑎᑦ ᐃᓴᕆᐊᓕᐅᑉ ᑭᖑᕚᖏᑦ ᑎᑎᕋᕐᑕᐅᖁᓪᓗᒋᑦ ᐅᔭᕋᒃᑯᑦ, ᐃᑎᕐᓴᓕᐅᕐᓯᒪᔪᓪᓗ ᐅᔭᕋᒃᑯᑦ ᖄᓕᕐᓗᒋᑦ ᒎᓗᓂᒃ. 12 ᑖᒃᑯᐊᒡᓗ ᐅᔭᑦᓯᐅᑎᖓᖕᓄᑦ ᐃᓕᔭᒃᓴᕆᕙᑎᑦ ᑭᐊᑎᒧᑦ ᐃᐹᑦᓯᒥᒃ ᐊᑎᓕᖕᒧᑦ ᐃᓚᓕᐅᑎᓯᒪᖁᓪᓗᒋᒃ, ᐃᓴᕆᐊᓕᐅᑉ ᑭᖑᕚᖏᓐᓄᑦ ᐃᖅᑲᐅᒪᑦᔪᑎᒃᓴᐅᖁᓪᓗᒋᒃ. ᐂᕉᓂᓗ ᐊᒡᔭᕐᓯᖃᑦᑕᖁᓪᓗᒍ ᑭᖑᕚᕇᖑᔪᑦ ᐊᑎᖏᓐᓂᒃ ᐊᑕᓂᐅᑉ ᓵᖓᓂ ᑖᒃᑯᐊ ᐃᖅᑲᐅᒪᔭᐅᑦᔪᑎᒃᓴᖏᓐᓄᑦ. 13 ᑖᒃᑯᐊᓗ ᐃᑎᕐᓴᓕᐅᕐᓯᒪᔪᑦ ᖄᓕᕐᑕᐅᔪᒃᓴᐅᕗᑦ ᒎᓗᓂᒃ, 14 ᒎᓗᓂᒡᓗ ᐃᓚᓯᒪᖏᑦᑐᓂᒃ ᕿᐱᓯᒪᔪᓂᒃ ᐊᒃᓱᓈᑎᑐᑦ ᐊᕐᓵᕐᑑᔭᖃᕐᑐᒃᓴᐅᕗᒃ ᒪᕐᕉᖕᓂᒃ ᑖᒃᑯᐊᒡᓗ ᐊᕐᓵᕐᑑᔮᒃ ᑕᕝᕗᖓ ᐅᔭᕋᖕᓄᑦ ᐊᑦᓱᖏᕐᓯᒪᔪᒃᓴᐅᕗᒃ.” ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᒃᓴᖏᑦ ᒨᓯᓯ ᐂᑉᐸᖏᑦ 39:8-21 15 “ᓴᒡᕕᖕᒥᐅᑕᓕᐅᕐᑐᒃᓴᐅᕗᓯ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ ᐊᑐᕐᑕᐅᖃᑦᑕᕐᓂᐊᕐᑐᒥᒃ ᖃᐅᔨᓇᓱᐊᕐᕕᖕᒥ ᒎᑎᐅᑉ ᐱᔪᒪᔭᖓᓂᒃ, ᓴᓇᓯᒪᑦᓯᐊᕐᑐᒃᓴᐅᕗᖅ; ᑭᐊᑎᒃᓴᐅᔪᑎᑐᑦ ᑐᓂᕐᕈᓯᕐᑎᑦᓯᔨᓄᑦ ᐃᐹᑦᑎᒥᒃ ᐊᑎᓕᒃᑎᑐᑦ; ᓴᓇᔭᐅᔪᒃᓴᐅᕗᖅ ᒎᓗᒥᑦ, ᑐᖑᔪᕐᑐᒥᓪᓗ ᐊᐅᐸᓪᓚᕆᒃᑐᒥᓪᓗ ᓄᕕᕐᓵᒃᓴᒥᓪᓗ ᐊᐅᐸᕐᑐᒥᑦ, ᖃᓪᓗᓈᕐᑕᑦᓯᐊᒥᒡᓗ ᓵᑦᑐᒥᑦ ᓴᓇᓯᒪᓗᓂ ᑍᒫᒃ ᓴᓇᓯᒪᔪᒃᓴᐅᕗᖅ. 16 ᑖᓐᓇᓗ ᓯᒃᑭᑕᓪᓗᐊᖑᔪᒃᓴᐅᕗᖅ ᑕᐱᖅᑯᐊᕇᖑᓗᓂ, ᑕᑭᓂᖃᕐᓗᓂ ᑐᑭᒧᑦ ᐊᒡᒊᑦ ᐃᓵᒡᓗᒋᑦ ᑕᑭᓂᖏᑎᑐᑦ ᓴᓂᒧᑐᓂᖃᕐᓗᓂᓗ ᑍᒫᑦᓮᓐᓇᖅ. 17 ᑕᕝᕙᓂᓗ ᓴᒡᕕᖕᒥᐅᑕᕐᒥ ᓯᑕᒪᐅᓕᖅᑲᖓᔪᓂᒃ ᑐᑭᓕᕇᓂᒃ ᐅᔭᕋᖕᓂᒃ ᐱᐅᓂᕐᐹᓂᒃ ᐃᓂᒃᓴᓕᐅᕐᓯᒪᔪᒃᓴᐅᕗᓯ; ᓯᕗᓪᓕᕐᐹᒥ ᑐᑭᓕᕇᓂᒃ ᐃᓕᓯᒪᔪᖃᕐᑐᒃᓴᐅᕗᖅ ᐅᔭᕋᖕᓂᒃ ᐃᒤᑦᑐᓂᒃ ᕉᐱᒥᒃ, ᑑᕐᐸᑦᔨᒥᒃ, ᒑᕐᓂᑎᒥᒡᓗ; 18 ᐂᑉᐸᖓᓂ ᑐᑭᓕᕇᓂ ᐃᓕᓯᒪᔪᖃᕐᑐᒃᓴᐅᕗᖅ ᐃᒤᑦᑐᓂᒃ ᐃᒪᕈᓪᒥᒃ, ᓴᐰᕆᒥᒃ, ᑍᒪᓐᒥᒡᓗ; 19 ᐱᖓᔪᖓᓐᓂᓕ ᑐᑭᓕᕇᓂ ᐃᓕᓯᒪᔪᖃᕐᑐᒃᓴᐅᕗᖅ ᐃᒤᑦᑐᓂᒃ ᑑᑯᐃᓯᒥᒃ, ᐊᒡᒍᐃᑦᒥᒃ, ᐊᒥᓮᑎᒥᒡᓗ; 20 ᓯᑕᒪᖓᓐᓂ ᑐᑭᓕᕇᓂ ᐃᓕᓯᒪᔪᖃᕐᑐᒃᓴᐅᕗᖅ ᐃᒤᑦᑐᓂᒃ ᐱᕅᐅᓪᒥᒃ, ᑳᕐᓃᓕᐊᓐᒥᒃ, ᔮᔅᐱᕆᒥᒡᓗ. ᑕᒪᒃᑯᐊᓗ ᐃᓕᓯᒪᔪᒃᓴᐅᕗᑦ ᒎᓗᓂᒃ ᑐᓐᖓᕕᖃᕐᓗᑎᒃ. 21 ᑖᒃᑯᐊᓗ ᐅᔭᕅᑦ 12ᖑᔪᑦ ᐊᑐᓂᑦ ᔧᑰᑉ ᐃᕐᓂᖏᑕ ᐊᑎᖏᓐᓂᒃ ᐊᑎᓕᐅᕐᕕᒋᓯᒪᔪᒃᓴᐅᕗᑦ, ᐃᓴᕆᐊᓕᒥᐅᑦ ᑭᖑᕚᕇᖏᑦ ᐱᓪᓗᒋᑦ ᑭᖑᕚᕇᖕᓂᖏᓐᓂᒃ ᐃᖅᑲᐅᒪᑦᔪᑎᒃᓴᐅᖁᓪᓗᒋᑦ. 22 ᑖᓐᓇᓗ ᓴᒡᕕᖕᒥᐅᑕᖅ ᒎᓗᓂᒃ ᐃᓚᓯᒪᖏᑦᑐᓂᒃ ᐊᕐᓵᕐᑑᔭᖃᕐᑐᒃᓴᐅᕗᖅ, ᐊᒃᓱᓈᑎᑐᑦ ᕿᐱᓯᒪᔪᓂᒃ. 23 ᓴᒡᕕᖕᒥᐅᑕᕐᓗ ᖁᓕᖔᖓᒍᑦ ᓂᕕᖓᑦᔪᑎᓕᐅᕐᓯᒪᔪᒃᓴᐅᕗᖅ ᒎᓘᖕᓂᒃ ᓄᕐᓗᓖᖕᓂᒃ ᒪᕐᕉᖕᓂᒃ, ᐊᑐᓂᑦ ᖁᓛᓃᑦᑑᑉ ᑎᕆᖅᑯᖏᑎᒍᒃ. 24 ᑕᕝᕗᖓᓗ ᓄᕐᓗᓖᖕᓄᑦ ᒪᕐᕉᖕᓄᑦ ᐊᕐᓵᕐᑑᔮᖕᓂᒃ ᐃᓕᓯᔪᒃᓴᐅᕗᓯ ᓂᕕᖓᑦᔪᑎᒃᓴᖏᓐᓂᒃ; 25 ᓂᕕᖓᑦᔪᑎᖏᒃᑕᓕ ᐃᓱᖏᒃ ᒎᓗᒥᒃ ᑐᓐᖓᕕᓕᖕᒧᑦ ᐊᑦᓱᖏᕐᓯᒪᔪᒃᓴᐅᕘᒃ ᐊᑐᓂᑦ, ᑖᑦᓱᒪᓗ ᑭᐊᑎᐅᑉ ᐃᐹᑦᒥᒃ ᐊᑎᓕᐅᑉ ᑐᐃᖏᖕᓄᑦ ᓯᕗᕌᓃᑦᑑᖕᓄᑦ ᐊᑦᓱᖏᕐᓯᒪᔪᒃᓴᐅᕘᒃ. 26 ᓄᕐᓗᓖᖕᓂᒃ ᒪᕐᕉᖕᓂᒃ ᒎᓘᖕᓂᒃ ᓴᓇᔪᒃᓴᐅᒋᕗᓯ ᑖᑦᓱᒪ ᓴᒡᕕᖕᒥᐅᑕᐅᑉ ᐊᑖᓄᑦ ᐃᓗᖔᖓᓄᑦ ᐃᓕᓯᒪᓂᐊᕐᑑᖕᓂᒃ, ᑕᕝᕗᖓ ᑭᐊᑎᒧᑦ ᐃᐹᑦᒥᒃ ᐊᑎᓕᖕᒧᑦ ᐊᑦᑐᖏᕐᓯᒪᑦᔪᑎᐅᓂᐊᕐᑐᒥᒃ. 27 ᓱᓕᓕ ᒪᕐᕉᖕᓂᒃ ᓄᕐᓗᓖᖕᓂᒃ ᒎᓘᖕᓂᒃ ᓴᓇᔪᒃᓴᐅᒋᕗᓯ, ᑖᑦᓱᒪᓗ ᓴᒡᕕᖕᒥᐅᑕᐅᑉ ᐊᑖᓄᑦ ᐃᓕᔭᒃᓴᕆᕙᓯ ᑕᕝᕗᖓ ᑭᐊᑎᒧᑦ ᐃᐹᑦᒧᑦ ᐊᑦᓱᖏᕐᓯᒪᐅᑎᐅᖁᓪᓗᒋᒃ, ᖁᓛᓃᑦᑑᑉ ᐅᔭᑦᓯᐅᑎᖏᒃᑕ ᐃᓚᒋᓗᓂᒋᒃ ᑕᕝᕗᖓ ᑭᐊᑎᐅᑉ ᐃᐹᑎᐅᑉ ᐅᔭᑦᓯᐅᑎᖏᖕᓄᑦ ᐃᓚᓕᐅᑎᓯᒪᖁᓪᓗᒋᒃ ᓴᓇᓯᒪᑦᓯᐊᕐᓗᑎᒃ. 28 ᓴᒡᕕᖕᒥᐅᑕᖅ ᓄᕐᓗᖏᑎᒍᑦ ᕿᓚᒃᓯᒪᔪᒃᓴᐅᕗᖅ ᑭᐊᑎᐅᑉ ᐃᐹᑎᐅᑉ ᓄᕐᓗᖏᓐᓄᑦ ᑐᖑᔪᕐᑐᒥᒃ ᕿᓚᕈᑎᖃᕐᓗᑎᒃ, ᑖᓐᓇ ᓴᒡᕕᖕᒥᐅᑕᖅ ᑭᐊᑎᒥᑦ ᐃᐹᑎᒥᒃ ᐊᑎᓕᖕᒥᑦ ᑲᑕᖁᓇᒍ. 29 “ᐂᕉᓂ ᐃᑦᔪᕐᓁᑦᑐᕕᖕᒧᑦ ᐃᑎᓕᕈᓂ, ᐃᓴᕆᐊᓕᒥᐅᑦ ᑭᖑᕚᕇᖏᑕ ᐊᑎᖏᓐᓂᒃ ᓴᒡᕕᖕᒥᐅᑕᕐᒥ ᐊᑐᕐᑕᖓᓂᒃ ᑎᑎᕋᕐᓯᒪᔪᓂᒃ ᐃᑎᕈᑦᔨᖃᑦᑕᖁᓪᓗᒍ, ᑍᒤᑉᐸᑦ, ᑕᕝᕙ ᐅᕙᖓ ᐊᑕᓂᖅ, ᐃᓄᖁᑎᒃᑲ ᑍᒪᓐᖓᑦ ᐃᖅᑲᐅᒪᖃᑦᑕᕐᓂᐊᕐᐸᒃᑲ. 30 ᑕᕝᕗᖓ ᓴᒡᕕᖕᒥᐅᑕᕐᒧᑦ ᐃᓕᓯᔪᒃᓴᐅᕗᓯ ᖃᐅᔨᓇᓱᐊᕈᑎᒃᓵᖕᓂᒃ ᒪᕐᕉᖕᓂᒃ ᑍᔭᐅᔫᖕᓂᒃ ᔪᕆᒻ ᐊᒻᒪᓗ ᑕᐅᒪᒻᒥᒃ, ᐂᕉᓂ ᐃᑎᓕᕈᓂ ᐃᑦᔪᕐᓁᑦᑐᕕᖕᒧᑦ ᐊᑕᓂᐅᑉ ᓵᖓᓄᑦ, ᑖᒃᑯᓂᖓ ᓇᒃᓴᖃᑦᑕᖁᓪᓗᒍ ᑕᕝᕗᖓ; ᑍᒪᓐᖓᑦ ᑖᒃᑯᐊ ᐊᑐᕐᑕᒃᓴᕆᓂᐊᕐᐰᑦ, ᐱᔭᐅᖁᔭᓐᓂᒃ ᖃᐅᔨᓇᓱᒋᐊᖃᓕᕈᓂ ᐃᓴᕆᐊᓕᒥᐅᓄᑦ ᖃᐅᔨᔪᓐᓇᖁᓪᓗᒍ ᑕᒪᒃᑯᓄᖓ ᐊᑕᓂᐅᑉ ᓵᖓᓂ.” ᑐᓂᕐᕈᓯᕐᑎᑦᓯᔩᑦ ᐊᓐᓄᕌᕆᔭᕆᐊᖃᕐᒥᔭᖏᑕ ᐃᓚᖏᑦ ᒨᓯᓯ ᐂᑉᐸᖏᑦ 39:22-31 31 “ᐅᕕᓂᕈᖅ ᑭᐊᑎᐅᔫᑉ ᐃᐹᑎᐅᑉ ᐃᓗᐊᓃᑦᑐᖅ ᓴᓇᓯᒪᔪᒃᓴᐅᕗᖅ ᓄᕕᕐᓵᒃᓴᒥᑦ ᑐᖑᔪᕐᑍᓐᓇᕐᒥᑦ. 32 ᑖᓐᓇᓕ ᐊᖕᒪᕐᓯᒪᔪᒃᓴᐅᕗᖅ ᓂᐊᖂᑉ ᓄᐃᕕᒃᓴᖓᓂᒃ, ᑕᒪᓐᓇᓗ ᐊᖕᒪᔪᖓᑕ ᓯᓂᖓ ᑕᐱᖅᑯᐊᕇᒡᓗᒍ ᐋᖅᑭᒃᓯᒪᔪᒃᓴᐅᕗᖅ ᐊᓕᔭᑦᑑᖁᓇᒍ. 33 ᑖᑦᓱᒪ ᓄᐃᔭᒐᐅᑉ ᐊᑖᒍᑦ ᐸᐅᕐᖓᓐᖑᐊᓕᐅᕐᓯᒪᔪᒃᓴᐅᕗᖅ ᐹᒻᒥᕐᒍᓁᑎᒥᒃ ᑍᔭᐅᔪᑎᑐᑦ ᐃᒤᑦᑐᓂᒃ ᑕᕐᓴᖃᕐᓗᒍ ᑐᖑᔪᕐᑐᓂᒃ ᐊᐅᐸᓪᓚᕆᒃᑐᓂᒃ ᓄᕕᕐᓵᒃᓴᓂᒡᓗ ᐊᐅᐸᕐᑐᓂᒃ, ᑕᒪᒃᑯᐊᓗ ᐊᑯᓐᓂᖏᑎᒍᑦ ᒎᓗᓂᒃ ᓯᕙᓂᐅᑎᑯᓗᖃᕐᓗᓂ. 34 ᑕᒪᒃᑯᐊ ᓯᕙᓂᐅᑎᑯᓗᐃᑦ ᒎᓗᐃᑦ ᐹᒻᒥᕐᒍᓁᑎᓐᖑᐊᓪᓗ ᑕᕐᓴᓕᐊᕆᓯᒪᔪᑦ ᑖᑦᓱᒪ ᓄᐃᔭᒐᐅᑉ ᑭᒡᓕᓕᒫᖓᓃᑦᑐᒃᓴᐅᕗᑦ. 35 ᐂᕉᓂᐅᓪᓗ ᓄᐃᔭᒐᖅ ᐊᑐᒐᒃᓴᕆᕚ ᐱᓇᓱᐊᕆᐊᓕᖕᒥᓂᒃ ᐱᓇᓱᐊᓕᑐᐊᕈᓂ, ᐊᑕᓂᐅᑉ ᓵᖓᓄᑦ ᐃᑎᓕᕈᓂ ᐃᑦᔪᕐᓁᑦᑐᕕᖕᒧᑦ ᑕᕝᕙᓐᖓᓪᓗ ᐊᓂᓕᑐᐊᕈᓂ ᑐᓴᕐᓴᐅᑎᑦᓯᔪᓐᓇᖁᓪᓗᒍ ᐊᐅᓚᓂᕐᒥᓄᑦ, ᑐᖁᑕᐅᖁᓇᒍ. 36 “ᖃᐅᕐᒥᐅᑕᒃᓴᒥᒃ ᑕᑯᒥᓇᕐᑐᒥᒃ ᓴᓇᔪᒃᓴᐅᕗᑎᑦ ᒎᓗᒥᒃ ᐊᓯᐊᓂᒃ ᐃᓚᖃᖏᑦᑐᒥᒃ ᑕᕝᕘᓇᓗ ᑎᑎᕋᕐᕕᒋᓯᒪᓗᒍ ᓲᕐᓗ ᐊᑎᓕᐅᕈᑎᑐᑦ ᓇᕿᑦᔪᑎᑐᑦ ‘ᐊᑕᓂᕐᒧᑦ ᐃᑦᔪᕐᓁᑦᑎᑕᐅᓯᒪᔪᖅ.’ 37 ᓂᐊᑯᕐᒧᑦ ᐃᒻᒧᑎᐅᑉ ᓇᓴᐅᔮᕐᑑᑉ ᓯᕗᕌᓃᑦᑐᒧᑦ ᐃᓕᔭᒃᓴᕆᕙᑦ ᑐᖑᔪᕐᑐᒥᒃ ᕿᓚᕈᑎᖃᕐᓗᒍ ᓂᐊᑰᑉ ᓯᕗᕌᓃᖁᓪᓗᒍ. 38 ᐂᕉᓂᐅᑉ ᐊᑐᕆᐊᖃᕐᐹ ᖃᐅᖓᓂ ᐃᓕᓯᒪᓗᒍ, ᑍᒤᑉᐸᑦ ᑕᕝᕙ ᐅᕙᖓ ᐊᑕᓂᐅᔪᖓ, ᑐᓂᕐᕈᑎᒋᔭᓕᒫᖏᑦ ᐃᓚᓕᐅᕐᓂᐊᕐᐸᒃᑲ ᐃᓴᕆᐊᓕᒥᐅᑦ ᐃᑦᔪᕐᓁᑎᓯᒪᔭᖏᑦ ᐅᕙᓐᓄᑦ, ᐊᒡᓛᑦ ᐃᓄᐃᑦ ᑐᓂᕐᕈᓯᕐᓂᕐᒥᒍᑦ ᑕᒻᒪᕋᓗᐊᕐᐸᑕ. 39 “ᐂᕉᓂᐅᑉ ᐅᕕᓂᕈᖓ ᓄᕕᕐᓴᕐᓯᒪᔪᒃᓴᐅᕗᖅ ᖃᓪᓗᓈᕐᑕᑦᓯᐊᕙᐅᓗᓂ ᓂᐊᖁᖓᑕᓗ ᐃᒻᒧᑎᖓ ᖃᓪᓗᓈᕐᑕᑦᓯᐊᕙᐅᔪᒃᓴᐅᒋᕗᖅ, ᑕᑦᓯᕈᑎᒋᔭᖓᓗ ᖃᓪᓗᓈᕐᑕᖅ ᑕᕐᓯᕐᑐᕐᓯᒪᓗᓂ ᐊᒡᓚᒃᓯᒪᔪᒃᓴᐅᕗᖅ. 40 “ᐂᕉᓂᐅᑉ ᐃᕐᓂᖏᓐᓄᑦ ᐅᕕᓂᕈᓕᐅᕐᑐᒃᓴᐅᕗᓯ, ᑕᑦᓯᕈᑎᓕᐅᕐᓗᓯᓗ ᖃᓪᓗᓈᕐᑕᓂᒃ, ᓇᓴᓕᐅᕐᓗᓯᓗ; ᐋᖅᑭᒃᓯᒪᑦᓯᐊᖁᓪᓗᒋᑦ ᑕᑯᒥᓇᖁᓪᓗᒋᓪᓗ. 41 ᐂᕉᓂ ᐊᖓᔪᐃᑦ ᐊᓐᓄᕌᕐᑕᒃᓴᕆᕙᑦ ᐃᕐᓂᖏᓪᓗ ᐃᓚᒋᓗᒋᑦ, ᓇᐹᕐᑑᓪᓗ ᐅᕐᓱᖓᓄᑦ ᒥᖑᐊᕐᓗᒋᑦ ᑐᓂᕐᕈᓯᕐᑎᑦᓯᔨᓐᖑᕐᑎᑕᒃᓴᕆᕙᑎᑦ, ᐃᑦᔪᕐᓁᑎᑕᒃᓴᕆᕙᑎᑦ ᑖᒃᑯᐊ ᐅᕙᓐᓂᒃ ᐱᔨᑦᓯᖁᓪᓗᒋᑦ ᑐᓂᕐᕈᓯᕐᑎᑦᓯᔨᐅᓂᒃᑯᑦ. 42 ᖃᓪᓗᓈᕐᑕᒥᒃ ᖃᕐᓕᓕᐅᕐᑕᒃᓴᕆᕙᓯ, ᕿᑎᖏᓐᓂᑦ ᐱᒋᐊᕐᓗᒍ ᖁᒃᑐᕋᖓᓄᑦ ᑎᑭᐅᒪᔪᓂᒃ, ᑲᓐᖑᓇᕐᓂᖏᑦ ᑕᑯᔭᐅᖁᓇᒋᑦ. 43 ᑕᒪᒃᑯᐊᓗ ᐂᕉᓂᐅᑉ ᐃᕐᓂᖏᑕᓗ ᑍᒪᓐᖓᑦ ᐊᑐᕐᑕᒃᓴᕆᕔᑦ ᑐᐱᖁᑎᓐᓄᑦ ᓇᔪᒐᓐᓄᑦ ᐃᑎᕐᓂᐊᑐᐊᕈᑎᒃ, ᑐᓂᕐᕈᓯᕐᕕᖕᒥᓗ ᐱᓇᓱᐊᕐᓂᐊᑐᐊᕈᑎᒃ ᑐᓂᕐᕈᓯᕐᑎᑦᓯᓂᕐᒥᒃ ᑕᕝᕙᓂ ᐃᑦᔪᕐᓁᕐᑐᕕᖕᒥ; ᑐᖁᑕᐅᔪᒃᓴᐅᖁᓇᒋᑦ ᑲᓐᖑᓇᕐᓂᕐᒥᖕᓂᒃ ᓴᖅᑭᑎᑦᓯᓂᕐᒥᖕᓄᑦ. ᑕᒪᓐᓇᓗ ᓱᖁᓯᔪᐃᑦᑑᓗᓂ ᒪᓕᒐᕆᔭᐅᓂᐊᕐᐳᖅ ᐂᕉᓂᒧᑦ ᑭᖑᕚᓕᒫᖏᓐᓄᓪᓗ.” |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society