ᒨᓯᓯ ᐂᑉᐸᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᕕᒃ ᐊᓪᑕᕆ

¹ “ᑐᓂᕐᕈᓯᕐᕕᓕᐅᕐᑐᒃᓴᐅᕗᑎᑦ ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ. ᑖᓐᓇᓗ ᑐᓂᕐᕈᓯᕐᕕᒃ ᓯᒃᑭᑕᓪᓗᐊᖑᔪᒃᓴᐅᕗᖅ ᑕᑭᓂᖃᕐᓗᓂ 2.2ᓂᒃ ᒦᑕᓂᒃ ᓯᓕᖕᓂᖃᕐᓗᓂᓗ 2.2ᓂᒃ ᒦᑕᓂᒃ, ᐳᕐᑐᓂᖃᕐᓗᓂᓗ 1.3ᓂᒃ ᒦᑕᓂᒃ.

² ᑎᕆᖅᑯᖏᑕᓗ ᖄᖏᑎᒍᑦ ᓯᑕᒪᑎᒍᑦ ᓇᒡᔪᓕᐅᕐᑕᒃᓴᕆᕙᑦ; ᑖᒃᑯᐊᓕ ᑐᓂᕐᕈᓯᕐᕕᐅᑉ ᐊᓪᑕᕆᐅᑉ ᐃᓚᒋᔭᒃᓴᕆᕔᑦ ᐃᓕᐅᕋᕐᓯᒪᖏᓪᓗᑎᒃ, ᑖᓐᓇᓗ ᓯᓚᑉᐱᐊᕐᑕᒃᓴᕆᕙᑦ ᐊᑕᖏᕐᓗᒍ ᑲᓐᓄᔭᒥᒃ.

³ ᐊᓪᓕᕋᒃᓴᓕᐅᕐᑐᒃᓴᐅᒋᕗᑎᑦ ᑐᓐᓄᕕᓃᑦ ᐊᕐᔭᓕᓂᖏᓐᓄᑦ ᐊᓪᓕᕋᒃᓴᒥᒃ, ᑖᒃᑯᓄᖓᓗ ᖃᓗᓯᑦᔪᑎᒃᓴᒥᒃ ᓴᓇᔪᒃᓴᐅᕗᑎᑦ, ᐴᒍᑕᓂᒡᓗ, ᓂᒃᓯᒐᐅᑎᓂᒡᓗ, ᐃᑯᒪᓂᒡᓗ ᐊᒡᔭᕐᓯᑦᔪᑎᒃᓴᓂᒃ; ᑕᒪᒃᑯᐊᓕᒫᓪᓗ ᑲᓐᓄᔭᐅᔪᒃᓴᐅᕗᑦ.

⁴ ᑐᓂᕐᕈᓯᕐᕕᐅᑦᑕᐅᖅ ᕿᔪᖃᕐᕕᒃᓴᖓᓂᒃ ᓄᓗᐊᓐᖑᐊᓕᐊᕆᓯᒪᔪᒥᒃ ᓴᓇᔪᒃᓴᐅᕗᑎᑦ ᑲᓐᓄᔭᒥᒃ; ᑖᓐᓇᓗ ᑎᕆᖅᑯᖏᑎᒍᑦ ᓯᑕᒪᓂᒃ ᓂᒃᓯᒡᕕᓕᐅᕐᑕᒃᓴᕆᕙᑦ ᓄᕐᓗᓂᒃ.

⁵ ᑖᓐᓇᓗ ᕿᔪᖃᕐᕕᒃ ᓄᓗᐊᓐᖑᐊᓕᐊᕆᓯᒪᔪᖅ ᑐᓂᕐᕈᓯᕐᕕᐅᑉ ᖁᓛᑕ ᐊᑖᓃᑦᑐᒃᓴᐅᕗᖅ, ᑖᑦᓱᒪ ᑐᓂᕐᕈᓯᕐᕕᐅᑉ ᐃᓗᖔᖓᓃᓪᓗᓂ ᖁᓛᑕᓗ ᓇᑎᖓᑕᓗ ᐊᑯᓐᓂᖓᓂ ᐃᓂᖃᕐᓗᓂ.

⁶ ᕿᔪᑯᑖᖕᓂᒡᓗ ᓴᓇᔪᒃᓴᐅᕗᑎᑦ ᐊᑭᕋᐅᑎᒃᓵᖕᓂᒃ ᑐᓂᕐᕈᓯᕐᕕᖕᒥᒃ ᑎᓴᒃᑕᓂᒃ ᐊᑬᑦᓯᐊᒥᑦ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ ᑲᓐᓄᔭᒥᒃ,

⁷ ᐊᑭᕋᐅᑎᖏᒡᓗ ᑐᓂᕐᕈᓯᕐᕕᐅᑉ ᓄᕐᓗᖏᑎᒍᑦ ᑲᐅᑎᓯᒪᔪᒃᓴᐅᕗᒃ, ᑐᓂᕐᕈᓯᕐᕕᐅᑉ ᐊᕙᑖᒍᑦ ᐃᒡᓗᒃᑐᑦ ᐊᑭᕋᐅᑎᐅᔪᓐᓇᖁᓪᓗᒋᒃ, ᑐᓂᕐᕈᓯᕐᕕᒃ ᐊᒡᔭᕐᑕᐅᔭᕆᐊᖃᓕᕌᖓᑦ.

⁸ ᑖᓐᓇᓗ ᑐᓂᕐᕈᓯᕐᕕᒃ ᐊᓪᑕᕆ ᓴᓇᓯᒪᔪᒃᓴᐅᕗᖅ ᓵᑦᑐᔮᓂᑦ ᐃᓗᐊ ᐃᓗᓕᖃᖏᓪᓗᒍ, ᐃᓕᖕᓄᑦ ᑕᑯᑎᑦᓯᓯᒪᓂᕋ ᖃᖅᑲᒥ ᒪᓕᒡᓗᒍ ᓴᓇᔭᒃᓴᕆᕙᑦ.”

ᐊᑕᓂᐅᑉ ᐃᓂᒃᓴᖓ ᑐᐱᐅᑉ ᐃᓗᐊᓃᓐᓂᕐᓴᖅ

⁹ “ᑐᐱᕐᒥ ᐃᓂᒃᓴᕆᓂᐊᕐᑕᓐᓂᒃ ᐃᒡᓗᐊᕈᓯᓕᐅᕐᑐᒃᓴᐅᕗᑎᑦ ᑲᓪᓗᓈᕐᑕᑦᓯᐊᕙᖕᓂᒃ ᓵᑦᑐᓂᒃ ᑖᓗᑕᖃᕐᓗᒍ. ᑐᐱᕐᒥ ᓯᕿᓂᐅᑉ ᓇᓛᓃᑦᑐᒃᑯᑦ ᐋᖅᑭᒃᓱᐃᔪᒃᓴᐅᕗᑎᑦ ᑖᓗᑕᕐᒥᒃ ᓴᓂᒧᑐᓂᖃᕐᓗᒍ 50ᓂᒃ ᐆᒃᑑᑎᓂᒃ,

¹⁰ ᓇᐸᔪᖃᕐᓗᓂ 20ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᑐᒃᓴᐅᕗᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᖕᒥᓗᑎᒃ.

¹¹ ᑍᒫᑦᓮᓐᓇᕐᑕᐅᖅ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓐᓂᕐᓴᖅ ᑖᓗᑕᖅ ᐃᒡᓗᐊᓃᑦᑐᑎᑐᑦ ᐋᖅᑭᒃᓯᒪᔪᒃᓴᐅᒋᕗᖅ; ᓇᐸᔪᖃᕐᓗᓂ 20ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ 20ᓂᒃ ᐊᑐᓂᑦ ᑲᓐᓄᔭᐅᓗᑎᒃ, ᓇᐸᔪᖏᓪᓕ ᓂᒃᓯᖃᕐᑐᒃᓴᐅᕗᑦ ᓯᐅᓪᕕᕆᓂᒃ ᓂᒃᓯᒡᕕᖏᓪᓗ ᐃᑳᖓᔪᑦ ᓯᐅᓪᕕᕆᐅᖕᒥᓗᑎᒃ.

¹² ᓯᕿᓂᐅᓪᓕ ᓂᐱᕕᐊᑕ ᓇᓛᓃᑦᑐᖅ ᑖᓗᑕᖅ ᓴᓂᒧᑐᓂᖃᕆᐊᖃᕐᐳᖅ ᐆᒃᑑᑎᓂᒃ 25ᓂᒃ, ᓇᐸᔪᖃᕐᓗᓂᓗ 10ᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ ᐊᑐᓂᑦ 10ᓂᒃ.

¹³ ᓯᕿᓂᐅᓪᓕ ᓄᐃᕕᐊᑕ ᓇᓛᓃᑦᑐᖅ, ᐃᒡᓗᐊᕈᓯᐅᑉ ᐃᑎᕐᑕᕐᕕᒃᓴᖓ, ᓴᓂᒧᑐᓂᖃᕆᐊᖃᕐᐳᖅ ᐆᒃᑑᑎᓂᒃ 25ᓂᒃ.

¹⁴ ᐃᑎᕐᑕᕐᕕᖓᓕ ᑖᓗᑕᖃᕐᑐᒃᓴᐅᕗᖅ ᐊᕙᒻᒧᑦ ᒪᑐᐃᕐᑕᕐᑐᒥᒃ ᐃᒡᓗᐊ ᓴᓂᒧᑦ ᓯᓕᖕᓂᖃᕐᓗᓂ ᐆᒃᑑᑎᓂᒃ 7ᓂᒃ ᐊᕝᕙᕐᒥᒡᓗ, ᑖᒃᑯᐊᓗ ᓇᐸᔪᖃᕐᓗᑎᒃ ᐱᖓᓱᓂᒃ ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ.

¹⁵ ᐃᒡᓗᐊᑦᑕᐅᖅ ᑍᒫᓪᓗᐊᖅ ᐊᖏᓂᖃᕐᑐᒃᓴᐅᒋᕗᖅ ᓯᓕᖕᓂᖃᕐᓗᓂ ᐆᒃᑑᑎᓂᒃ 7ᓂᒃ ᐊᕝᕙᕐᒥᒡᓗ, ᑖᒃᑯᐊᓗ ᓇᐸᔪᖃᕐᓗᑎᒃ ᐱᖓᓱᓂᒃ; ᐊᑐᓂᓪᓗ ᑐᓐᖓᕕᖃᕐᓗᑎᒃ ᐱᖓᓱᓂᒃ.

¹⁶ ᐃᑎᕐᑕᕐᕕᓪᓚᕆᖓᓕ ᑖᓗᑕᖃᕐᑐᒃᓴᐅᒋᕗᖅ ᓴᓂᒧᑐᓂᖃᕐᑐᒥᒃ ᐆᒃᑑᑎᓂᒃ 10ᓂᒃ, ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᖃᕐᓗᓂ, ᐊᐅᐸᓪᓚᕆᒃᑐᖃᕐᓗᓂᓗ, ᐊᐅᐸᕐᑐᖃᕐᓗᓂᓗ ᓄᕕᕐᓵᒃᓴᒥᒃ, ᑖᒃᑯᐊᓗ ᑕᕐᓯᕐᓱᕐᓯᒪᓗᑎᒃ ᒥᕐᓱᕐᓯᒪᔪᓂᒃ, ᓇᐸᔪᖃᕐᑐᒃᓴᐅᕗᕐᓕ ᓯᑕᒪᓂᒃ ᑖᒃᑯᐊᓗ ᑐᓐᖓᕕᖃᕐᓗᑎᒃ ᓯᑕᒪᓂᒃ.

¹⁷ ᑕᒪᒃᑯᐊᓗ ᓇᐸᔪᐃᑦ ᐃᑦᔪᕐᓁᑦᑐᕕᖕᒦᑦᑐᑦ ᑲᓱᕐᓯᒪᐅᑎᔪᒃᓴᐅᕗᑦ ᐃᑳᖓᔪᖃᕐᓗᑎᒃ ᓯᐅᓪᕕᕆᓂᒃ, ᓂᒃᓯᖏᓪᓗ ᓯᐅᓪᕕᕆᐅᖕᒥᓗᑎᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ.

¹⁸ ᐃᑦᔪᕐᓁᑦᑐᕕᒡᓕ ᑐᑭᒧᑦ ᑕᑭᓂᖃᕐᑐᒃᓴᐅᕗᖅ ᐆᒃᑑᑎᓂᒃ 50ᓂᒃ, ᓴᓂᒧᑐᓂᖃᕐᓗᓂᓗ ᐆᒃᑑᑎᓂᒃ 25ᓂᒃ, ᐳᕐᑐᓂᖃᕐᓗᑎᒡᓗ ᐆᒃᑑᑏᖕᓂᒃ ᒪᕐᕉᖕᓂᒃ ᐊᕝᕙᕐᒥᒡᓗ. ᑖᓗᑕᖏᓪᓗ ᖃᓪᓗᓈᕐᑕᑦᓯᐊᕙᐅᔪᒃᓴᐅᕗᑦ ᓵᑦᑑᓗᑎᒃ ᑐᓐᖓᕕᖃᕐᓗᑎᒡᓗ ᑲᓐᓄᔭᓂᒃ.

¹⁹ ᓱᓇᑐᐃᓐᓇᓕᒫᑦ ᐊᑐᕐᑕᐅᔪᑦ ᑐᐱᕐᒥ, ᑐᐱᐅᓪᓗ ᓄᖃᕐᕕᖏᑦ ᑕᒪᕐᒥᒃ, ᐃᑦᔪᕐᓁᑦᑐᕕᐅᓪᓗ ᐱᑐᒡᕕᓕᒫᖏᑦ ᑲᓐᓄᔭᐅᔪᒃᓴᐅᕗᑦ.”

ᓇᓂᕈᐊᑦ ᑲᒪᒋᔭᐅᔭᕆᐊᖃᕐᓂᖏᑦ

²⁰ “ᐃᓴᕆᐊᓕᒥᐅᑦ ᐱᖁᔭᒃᓴᕆᕙᑎᑦ ᐃᓕᖕᓄᑦ ᕾᑦᓯᖁᓗᒋᑦ ᓇᐹᕐᑑᑉ ᐅᕐᓱᖏᓐᓂᒃ ᐱᐅᓂᕐᐹᓂᒃ ᓇᓂᕈᐊᒧᑦ ᐅᕐᓱᒃᓴᐅᓂᐊᕐᑐᓂᒃ, ᓇᓂᕈᐊᑦ ᐋᖅᑭᒃᓱᕐᑕᐅᔪᓐᓇᖁᓪᓗᒋᑦ ᑍᒪᓐᖓᓪᓗ ᐃᑯᒪᓕᖁᓪᓗᒋᑦ ᑕᕝᕙᓂ.

²¹ ᑐᐱᕐᒥ ᑲᑎᒪᓕᕐᑎᓪᓗᓯ, ᑖᑦᓱᒪ ᐃᑦᔪᕐᓁᓐᓂᕐᐹᑉ ᐱᖁᔭᓂᒃ ᑎᑎᕋᕐᕕᒋᓯᒪᔪᕐᑕᓕᐅᑉ ᓯᓚᑖᓂ, ᐂᕉᓂᐅᑉ ᐃᕐᓂᖏᑕᓗ ᑖᒃᑯᐊ ᓇᓂᕈᐊᑦ ᐋᖅᑭᒃᑕᒃᓴᕆᕔᑦ ᐃᑯᐊᓪᓚᒡᓗᒋᓪᓗ ᐊᑕᓂᐅᑉ ᓵᖓᓂ. ᐃᑯᒪᓕᖁᓪᓗᒋᑦ ᐅᓐᓄᒥᑦ ᐅᓪᓛᒧᑦ ᑎᑭᓪᓗᒋᑦ. ᑕᒪᓐᓇᓗ ᐱᖁᔨᑦᔪᑎᒋᔭᕋ ᑍᒪᓐᖓᑦ ᐊᑐᕐᑕᐅᖏᓐᓇᕆᐊᖃᕐᐳᖅ ᐃᓴᕆᐊᓕᒥᐅᓄᑦ ᑭᖑᕚᖏᓐᓄᓪᓗ.”