ᒨᓯᓯ ᐂᑉᐸᖏᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᐱᖅ ᐊᑕᓂᐅᑉ ᐃᓂᒃᓴᖓ

¹ “ᑐᐱᓕᐅᕐᑐᒃᓴᐅᕗᑎᑦ ᐃᓗᐊᒍᑦ ᐃᑦᔪᕐᓁᑦᑐᒃᑯᕕᖃᕐᑐᒥᒃ, ᐅᕙᓐᓄᑦ ᐃᓂᒃᓴᐅᖁᓪᓗᒍ ᑖᓐᓇ ᐃᑦᔪᕐᓁᑦᑐᒃᑯᕕᒃ, ᑐᐱᒃᓴᓂᑦ ᖁᒻᒧᑦ 10ᓂᒃ ᓴᓇᓯᒪᓗᓂ ᖃᓪᓗᓈᕐᑕᓕᐊᕆᓯᒪᔪᓂᑦ ᐱᐅᓂᕐᐹᓂᑦ ᑐᖑᔪᕐᑐᓂᒃ, ᐊᐅᐸᓪᓚᕆᒃᑐᓂᒃ, ᐊᐅᐸᕐᑐᓂᒡᓗ ᓄᕕᕐᓵᒃᓴᓂᒃ; ᑖᒃᑯᐊᓗ ᐊᑐᓂᑦ 10 ᒥᕐᓱᕐᓯᒪᔪᓂᒃ ᑕᕐᓴᓕᐅᕐᑕᐅᓯᒪᔪᒃᓴᐅᕗᑦ ᓯᕈᐲᒻᖑᐊᓂᒃ ᓴᓇᑦᓯᐊᕈᓐᓇᕐᑐᒧᑦ ᓴᓇᔭᐅᓯᒪᔪᓂᒃ ᓴᓇᔪᒃᓴᐅᕗᑎᑦ.

² ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᐊᖏᓂᖃᕐᑐᒃᓴᐅᕗᑦ, ᑐᑭᒧᑦ ᑕᑭᓂᖃᕐᓗᑎᒃ 14ᓂᒃ ᐆᒃᑑᑎᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ.

³ ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑕᐅᔪᒃᓴᐅᕗᑦ; ᐂᑉᐸᖏᓪᓗ ᑕᓪᓕᒪᑦᑕᐅᖅ ᑍᒫᒃ ᒥᕐᓱᕐᓗᒋᑦ ᑲᑎᒻᒥᓗᒋᑦ.

⁴ ᐳᑐᓕᖕᓂᒡᓗ ᓴᓇᔪᒃᓴᐅᕗᑎᑦ ᑐᖑᔪᕐᑐᓂᒃ ᓯᓈᒍᑦ ᓯᓚᑎᖔᖓᒍᑦ ᓂᕕᖓᓂᐊᕐᑑᑉ ᑖᓗᑕᐅᑉ; ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ ᐳᑐᓕᖕᓂᒃ ᓯᓈᒍᑦ ᓴᓇᔪᒃᓴᐅᒋᕗᑎᑦ.

⁵ ᓂᕕᖓᓂᐊᕐᑐᒥ ᑖᓗᑕᕐᒥ ᐊᑕᐅᓯᕐᒥ 50ᓂᒃ ᐳᑐᓕᖕᓂᒃ ᓴᓇᔪᒃᓴᐅᕗᑎᑦ, ᑍᒫᑦᓮᓐᓇᕐᑕᐅᖅ ᓂᕕᖓᓂᐊᕐᑑᑉ ᑖᓗᑕᐅᑉ ᐂᑉᐸᖓ 50ᓂᒃ ᐳᑐᓕᐅᕐᑕᒃᓴᕆᒋᕙᑦ ᓯᓈᒍᑦ; ᑖᒃᑯᐊᓗ ᐳᑐᖏᑦ ᐊᑐᓂᑦ ᐊᑭᓕᕇᒃᑐᒃᓴᐅᕗᑦ.

⁶ ᓂᒃᓯᖕᓂᒡᓗ ᒎᓗᓂᒃ 50ᓂᒃ ᓴᓇᔪᒃᓴᐅᕗᑎᑦ, ᑖᒃᑯᐊᓗ ᑖᓗᑕᕐᓂᒃ ᓂᕕᖓᔪᒃᓵᖕᓂᒃ ᒪᕐᕉᖕᓂᒃ ᑲᓱᕐᓯᒪᑦᔪᑕᐅᔪᒃᓴᐅᕗᑦ, ᑖᓐᓇ ᑐᐱᖅ ᑲᑎᓐᖓᓗᓂ ᐊᑕᐅᓯᐅᓕᖅᑲᖓᔪᓐᓇᕐᓯᖁᓪᓗᒍ.

⁷ “ᑐᐱᐅᑉ ᓯᓚᑉᐱᐊᒃᓴᖓᓂᒃ ᓴᓇᔪᒃᓴᐅᒋᕗᑎᑦ ᒎᑦᓯᐅᑉ ᒥᖅᑯᕕᓂᖏᓐᓂᒃ ᑐᐱᒃᓴᓕᐊᕆᓯᒪᔪᒥᒃ; ᑖᒃᑯᐊᓗ ᑲᑎᓯᒪᔪᑦ 11ᐅᔪᒃᓴᐅᕗᑦ.

⁸ ᑖᒃᑯᐊᓗ ᐊᑦᔨᒌᓂᒃ ᐊᖏᓂᖃᕐᑐᒃᓴᐅᕗᑦ ᑐᑭᒧᑦ ᑕᑭᓂᖃᕐᓗᑎᒃ ᐆᒃᑑᑎᓂᒃ 15ᓂᒃ ᓴᓂᒧᓪᓗ ᓯᓕᖕᓂᖃᕐᓗᑎᒃ ᐆᒃᑑᑏᖕᓂᒃ ᒪᕐᕉᖕᓂᒃ.

⁹ ᑖᒃᑯᐊᓗ ᑕᓪᓕᒪᑦ ᐃᒻᒥᖕᓄᑦ ᒥᕐᓱᕐᓗᒋᑦ ᑲᑎᑕᐅᔪᒃᓴᐅᕗᑦ, ᐂᑉᐸᖏᓪᓗ ᑲᑎᓪᓗᒋᑦ 6ᐅᓗᒋᑦ ᐃᒻᒥᖕᓄᑦ ᒥᕐᓱᕐᑕᐅᔪᒃᓴᐅᒋᕗᑦ. ᐱᖓᓲᔪᕐᑐᖓᓪᓕ ᐱᕆᓪᓗᒍ ᑕᐱᑕᕇᓕᓯᒪᔪᒃᓴᐅᕗᖅ ᑐᐱᐅᑉ ᓯᕗᕌᓃᑦᑐᒃᓴᖅ.

¹⁰ ᓯᓈᒍᑦ 50ᓂᒃ ᐳᑐᓕᖕᓂᒃ ᓴᓇᔪᒃᓴᐅᕗᑎᑦ ᑕᕝᕘᓇ ᑭᖑᓪᓕᕐᐸᐅᔪᒃᑯᑦ, ᑍᒫᑦᓮᓐᓇᕐᑕᐅᖅ ᐂᑉᐸᖓ 50ᓂᒃ ᐳᑐᓕᐅᕐᑕᒃᓴᕆᒋᕙᑦ ᓯᓈᒍᑦ.

¹¹ ᑲᓐᓄᔭᓂᒃ 50ᓂᒃ ᓂᒃᓯᓕᐅᕐᑐᒃᓴᐅᕗᑎᑦ, ᑖᒃᑯᐊᓗ ᑐᐱᐅᑉ ᓯᓚᑉᐱᐊᖓᑕ ᐳᑐᖏᓐᓄᑦ ᐋᖅᑭᒃᑕᒃᓴᕆᕙᑎᑦ, ᑖᒃᑯᐊᒃ ᒪᕐᕉᒃ ᑲᑎᓪᓗᒋᒃ ᐊᑕᐅᓯᐅᓕᓗᓂ ᑐᐱᕐᒧᑦ ᓯᓚᑉᐱᐊᒃᓴᐅᓕᖁᓪᓗᒍ.

¹² ᑐᐱᐅᓪᓕ ᐅᓕᖓᑕ ᐃᓚᖓ ᐊᖏᓗᐊᕈᑎᓂᕆᔭᖓ, ᐱᕆᓯᒪᔫᑉ ᐊᕝᕙᖓ ᑐᐱᐅᑉ ᑐᓄᐊᓄᑦ ᐊᑭᑦᔪᑎᓯᒪᔪᒃᓴᐅᕗᖅ.

¹³ ᑐᐱᐅᓪᓗ ᐊᕙᑎᓕᒫᖓ ᐆᒃᑑᑎᐅᑉ ᐊᕝᕙᖓᓂᒃ ᐊᖏᓗᐊᕈᑎᓂᖓ ᑐᐱᐅᑉ ᓯᓚᑖᓄᑦ ᐊᕙᑖᓄᑦ ᐊᑭᑦᔪᑎᓯᒪᔪᒃᓴᐅᕗᖅ ᑐᐱᕐᒥᒃ ᐅᓕᒃᓯᓯᒪᑦᓯᐊᕈᓐᓇᖁᓪᓗᒍ.

¹⁴ “ᒪᕐᕉᖕᓂᒡᓕ ᓱᓕ ᐅᓕᒃᓴᓕᐅᕐᑐᒃᓴᐅᕗᑎᑦ, ᐂᑉᐸᖓ ᐅᓕᒃᓴᖅ ᓰᐱᐅᑉ ᐊᖑᓴᓪᓗᖓᑕ ᐊᒥᖓ ᕿᑐᒻᒪᒃᓴᕐᓯᒪᔪᖅ ᓴᓇᔭᒃᓴᕆᕙᑦ, ᐂᑉᐸᖓᓕ ᒎᑦᓯᐅᑉ ᐊᒥᖓ ᓵᑦᑑᓗᓂ ᕿᑐᒻᒪᒃᓴᕐᓯᒪᔪᖅ ᓴᓇᔭᒃᓴᕆᒋᕙᑦ ᐅᓕᒃᓴᐅᔪᓐᓇᖁᓪᓗᒋᒃ ᑐᐱᕐᒧᑦ.

¹⁵ “ᕿᔪᖕᓂᒃ ᓇᑉᐸᕐᓯᒪᔪᓂᒃ ᑎᓴᒃᑕᓂᒃ ᑐᐱᐅᑉ ᐊᕙᓗᒃᓴᖏᓐᓂᒃ ᓴᓇᔪᒃᓴᐅᕗᑎᑦ ᐊᑬᑦᓯᐊᓂᒃ ᐊᑎᓕᖕᓂᒃ.

¹⁶ ᑖᒃᑯᐊᓗ ᐊᕙᓗᒃᓮᑦ ᑐᑭᒧᑦ ᑕᑭᓂᖃᕐᑐᒃᓴᐅᕗᑦ ᓯᑕᒪᓂᒃ ᒦᑕᓂᒃ, ᓴᓂᒧᓪᓗ ᓯᓕᖕᓂᖃᕐᓗᑎᒃ 66ᓂᒃ ᓯᓐᑎᒦᑕᓂᒃ,

¹⁷ ᑖᒃᑯᐊᓗ ᐊᑐᓂᑦ ᐊᑦᔨᒌᒥᒃ ᑲᐱᒃᑎᕝᕕᓕᐅᕐᑕᒃᓴᕆᕙᓯ, ᑖᒃᑯᐊ ᐊᕙᓗᒃᓮᑦ ᐃᒻᒥᖕᓄᑦ ᑲᓱᑦᓯᐊᕈᓐᓇᖁᓪᓗᒋᑦ ᑲᐱᒃᑎᓯᒪᑦᓯᐊᕐᓗᑎᒃ. ᑖᒃᑯᐊᓗ ᕿᔪᐃᑦ ᐊᕙᓗᒃᓮᑦ ᑍᒫᒃ ᑲᐱᒃᑎᕝᕕᓕᐅᕐᓯᒪᔪᒃᓴᐅᕗᑦ.

¹⁸ ᑐᐱᕐᓗ ᑖᓐᓇ ᐊᕙᓗᒃᓴᖃᕐᑐᒃᓴᐅᕗᖅ: 20ᓂᒃ ᓯᕿᓂᐅᑉ ᓇᓛᓃᑦᑐᒃᓴᓂᒃ;

¹⁹ ᑖᒃᑯᐊᓗ 20ᐅᔪᑦ ᐊᕙᓗᒃᓮᑦ ᑐᓐᖓᕕᒃᓴᖏᓐᓂᒃ ᑐᓐᖓᕕᒃᓴᓕᐅᕐᑐᒃᓴᐅᕗᓯ ᓯᐅᓪᕕᕆᓂᒃ 40ᓂᒃ, ᐊᑐᓂᑦ ᐊᕙᓗᒃᓴᖅ ᐊᑕᐅᓯᖅ ᒪᕐᕉᖕᓂᒃ ᑐᓐᖓᕕᖃᖁᓪᓗᒍ ᑲᐱᒃᑎᓯᒪᓂᖏᖕᓄᑦ ᑖᒃᑯᐊᒃ ᑐᓐᖓᕕᖏᒃ ᐋᖅᑭᑦᓯᐊᕐᓯᒪᐅᑎᒋᔭᐅᖁᓪᓗᒋᒃ.

²⁰ ᐊᒻᒪᑦᑕᐅᖅ ᑐᐱᐅᑉ ᐃᒡᓗᐊ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐊᕙᓗᖃᕐᑐᒃᓴᐅᕗᖅ 20ᓂᒃ,

²¹ ᑖᒃᑯᐊᓗ ᑐᓐᖓᕕᖃᕐᑐᒃᓴᐅᕗᑦ ᓯᐅᓪᕕᕆᓂᒃ 40ᓂᒃ, ᐊᑕᐅᓯᖅ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕐᑐᒃᓴᐅᕗᖅ, ᐊᓯᐊᓗ ᐊᕙᓗᒃᓴᖅ ᒪᕐᕉᖕᓂᒃ ᑐᓐᖓᕕᖃᕐᒥᓗᓂ;

²² ᑐᐱᐅᓪᓕ ᑐᓄᐊ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ ᐊᕙᓗᓕᐅᕐᑕᒃᓴᕆᕙᑦ ᐊᕙᓗᒃᓴᓂᒃ 6ᓂᒃ.

²³ ᑐᐱᐅᓪᓗ ᑎᕆᖅᑯᐊ ᑐᓄᐊᓃᑦᑐᖅ ᒪᕐᕉᖕᓂᒃ ᐊᕙᓗᓕᐅᒐᒃᓴᕆᕙᑦ;

²⁴ ᑖᒃᑯᐊᒡᓗ ᐊᕙᓗᒃᓵᒃ ᑎᕆᖅᑯᒃᓴᓕᐊᕆᔭᓯ ᐊᑖᒍᑦ ᑲᓱᕐᑎᑕᒃᓴᕆᕙᓯ ᑕᑉᐸᐅᖓ ᖁᓛᓄᑦ ᑎᑭᑐᐃᓐᓇᕐᓗᒋᒃ. ᐊᑐᓂᑦ ᐊᕙᓗᒃᓵᒃ ᑎᕆᒃᑯᒃᓴᓕᐊᕆᔭᓯ ᑍᒫᑦᓮᓐᓇᖅ ᐋᖅᑭᒃᓯᒪᔪᒃᓴᐅᕘᒃ.

²⁵ ᑍᒫᒃ ᑕᕝᕙ 8ᓂᒃ ᐊᕙᓗᒃᓴᖃᕆᐊᖃᕐᐳᓯ, ᑐᓐᖓᕕᒃᓴᖃᕐᓗᑎᒃ 16ᓂᒃ ᓯᐅᓪᕕᕆᓂᒃ; ᒪᕐᕉᖕᓂᒃ ᑐᓐᖓᕕᖃᖃᑦᑕᕐᓗᓂ ᐊᕙᓗᒃᓴᖅ ᐊᑕᐅᓯᖅ.

²⁶ “ᕿᔪᑯᑖᓂᒃ ᕿᕋᑦᑕᖅᑯᑎᒃᓴᓂᒃ ᓴᓇᔪᒃᓴᐅᕗᓯ 15ᓂᒃ ᕿᔪᖕᓂᒃ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ, ᑐᐱᐅᑉ ᐊᕙᓗᐊ ᐃᒡᓗᐃᓐᓇᖅ ᑕᓪᓕᒪᓂᒃ ᕿᕋᑦᑕᖅᑯᓯᕐᓗᒍ,

²⁷ ᑕᓪᓕᒪᐅᖕᒥᓗᑎᒃ ᑐᐱᐅᑉ ᐃᒡᓗᐊᒍᑦ ᕿᕋᑦᑕᖅᑯᓯᐅᑎᔭᓯ ᐊᕙᓗᖏᑎᒍᑦ, ᐊᒻᒪ ᑐᐱᐅᑉ ᑐᓄᐊᒍᑦ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᒃᑯᑦ ᑕᓪᓕᒪᐅᖕᒥᓗᑎᒃ ᐊᕙᓗᖏᑎᒍᑦ ᕿᕋᑦᑕᖅᑯᓯᐅᑎᔭᓯ.

²⁸ ᐊᕙᓗᖏᑕᓕ ᕿᑎᖓᒍᑦ ᕿᕋᑦᑕᖅᑯᓯᕆᐊᖃᕆᕙᓯ, ᖁᒻᒧᖓᔫᑉ ᓇᐸᔪᖓᑕ ᕿᑎᖓᒎᕐᑐᒥᒃ, ᑐᐱᐅᑉ ᐃᓱᐊᓂᑦ ᐃᓱᐊᓄᑦ ᓯᕗᒧᖓᔪᒥᒃ.

²⁹ ᐊᕙᓗᒃᓮᓪᓗ ᓯᓚᑉᐱᐊᕐᑕᒃᓴᕆᕙᓯ ᒎᓗᒥᒃ, ᓱᓪᓗᓕᖕᓂᒡᓗ ᒎᓗᓂᒃ ᕿᕋᑦᑕᖅᑯᑎᖏᓐᓄᑦ ᓇᔪᒻᒪᖅᑯᑎᒃᓴᓂᒃ ᐋᖅᑭᒃᓯᔪᒃᓴᐅᕗᓯ; ᑖᒃᑯᐊᓗ ᕿᕋᑦᑕᖅᑯᑎᒃᓮᑦ ᓯᓚᑉᐱᐊᕐᑕᒃᓴᕆᒋᕙᓯ ᒎᓗᒥᒃ.

³⁰ ᑐᐱᕐᓗ ᓇᑉᐸᕐᑎᑕᒃᓴᕆᕙᑦ ᑕᕝᕙᓂ ᖃᖅᑲᒥ ᐃᓕᖕᓄᑦ ᐃᒤᓕᐅᕆᐊᖃᕐᓂᖓᓂᒃ ᖃᐅᔨᑎᑦᓯᑦᔪᑎᒋᓯᒪᔭᕋ ᒪᓕᒡᓗᒍ.

³¹ “ᑖᓗᑕᒃᓴᒥᒡᓗ ᓴᓇᔪᒃᓴᐅᕗᑎᑦ ᕿᐱᓯᒪᔪᒥᒃ ᖃᓪᓗᓈᕐᑕᑦᓯᐊᕙᖕᒥᒃ ᑐᖑᔪᕐᑐᒥᒃ ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ; ᓴᓇᑦᓯᐊᕈᓐᓇᕐᑐᒧᓪᓗ ᓴᓇᔭᐅᔪᒃᓴᐅᕗᑦ ᓯᕈᐲᒻᖑᐊᖅ ᐃᓴᕈᖃᕐᑐᖅ,

³² ᑖᒃᑯᐊᓗ ᓂᕕᓐᖓᕐᑕᒃᓴᕆᕙᑎᑦ ᓯᑕᒪᓄᑦ ᕿᔪᖕᓄᑦ ᑎᓴᒃᑕᓄᑦ ᐊᑬᑦᓯᐊᓂᒃ ᐊᑎᓕᖕᓄᑦ ᒎᓗᓂᒃ ᓯᓚᑉᐱᐊᓕᕐᓯᒪᔪᓄᑦ, ᓂᒃᓯᖕᓄᑦ ᒎᓗᓄᑦ ᖃᖓᑕᑦᔪᑎᖃᕐᓗᑎᒃ, ᑐᓐᖓᕕᖃᕐᓗᑎᒃ ᓯᑕᒪᓄᑦ ᓯᐅᓪᕕᕆᓄᑦ.

³³ ᑖᓗᑍᓪᓗ ᑖᒃᑯᐊ ᓂᕕᓐᖓᕐᑕᒃᓴᕆᕙᑎᑦ ᑐᐱᐅᑉ ᖁᓛᖓᑕ ᐊᑎᑦᑎᐊᖓᒍᑦ ᓂᒃᓯᖕᓂᒃ ᖃᖓᑕᑦᔪᑎᖃᕐᓗᑎᒃ, ᑕᕝᕗᓐᖓᐅᑎᔭᒃᓴᕆᕙᓪᓗ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᐱᖁᔭᓂᒃ ᑎᑎᕋᕐᕕᒋᓯᒪᔫᖕᓂᒃ ᒪᕐᕉᖕᓂᒃ ᐅᔭᕌᖕᓂᒃ ᐃᓗᓕᓕᒃ ᑕᕝᕙᓂ ᑖᓗᑕᐅᑉ ᐅᖓᑖᓂ ᐃᓂᖃᖁᓪᓗᒍ; ᐃᑦᔪᕐᓁᑦᑐᕕᒡᓗ ᐃᑦᔪᕐᓁᓐᓂᕐᐹᕐᓗ ᐊᕕᒃᑕᐅᓯᒪᖁᓪᓗᒋᒃ ᑕᒪᑐᒧᖓ ᑖᓗᑕᕐᒧᑦ.

³⁴ ᑕᕝᕙᓂᓗ ᐃᑦᔪᕐᓁᓐᓂᕐᐹᒥ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ ᐃᓂᖃᕐᑐᒃᓴᐅᕗᖅ ᒪᑐᓯᒪᓗᓂ.

³⁵ ᐃᑦᔪᕐᓁᓐᓂᕐᐹᓪᓕ ᓯᓚᑖᓄᑦ ᓵ ᐃᓕᔭᒃᓴᕆᕙᑦ ᑐᐱᐅᑉ ᐅᓐᓄᐊᓪᓗᐊᖓᑕ ᓇᓛᓃᓪᓗᓂ ᓇᓂᕈᐊᖃᕐᕕᒡᓗ ᐃᓕᓗᒍ ᓯᕿᓂᐅᑉ ᓇᓛᓃᖔᕐᑐᒧᑦ.

³⁶ “ᑐᐱᐅᓪᓕ ᐃᑎᕐᑕᕐᕕᖓ ᑖᓗᑕᓕᐅᕐᑕᒃᓴᕆᕙᑦ ᖃᓪᓗᓈᕐᑕᑦᓯᐊᕙᖕᒥᒃ ᓵᑦᑐᒥᒃ ᑐᖑᔪᕐᑐᒥᒃ, ᐊᐅᐸᓪᓚᕆᒃᑐᒥᒡᓗ, ᐊᐅᐸᕐᑐᒥᒡᓗ ᓄᕕᕐᓵᒃᓴᒥᒃ; ᑕᕐᓯᕐᓱᕐᓯᒪᓗᓂᓗ ᒥᕐᓱᕐᓯᒪᔪᓂᒃ.

³⁷ ᑖᒃᑯᐊ ᑖᓗᑍᑦ ᓇᑉᐸᖅᑯᑕᓕᐅᕐᑕᒃᓴᕆᕙᑎᑦ ᕿᔪᖕᓂᒃ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ ᑖᒃᑯᐊᓗ ᓯᓚᑉᐱᐊᕐᓯᒪᓗᑎᒃ ᒎᓗᒥᒃ ᓂᒃᓯᖕᓄᓪᓗ ᒎᓗᓄᑦ ᖃᖓᑕᓗᑎᒃ; ᑖᒃᑯᐊᓗ ᓇᐸᔪᐃᑦ ᑐᓐᖓᕕᓕᐅᕐᓗᒋᑦ ᐊᑐᓂᑦ ᑲᓐᓄᔭᓂᒃ ᑕᓪᓕᒪᓂᒃ.”