ᒨᓯᓯ ᐂᑉᐸᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᓂᖅ ᐃᑦᔪᕐᓁᑦᑐᒥ ᑐᐱᕐᒥ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ,

² “ᐃᓴᕆᐊᓕᒥᐅᑦ ᐅᖃᐅᑎᓚᐅᒃᑭᑦ, ᑐᓂᕐᕈᓯᖁᓪᓗᒋᑦ ᐅᕙᓐᓄᑦ; ᐃᓄᐃᑦ ᐊᑐᓂᑦ ᓇᖕᒥᓂᖅ ᐱᔪᒪᓂᕐᒥᖕᓂᒃ ᒪᓕᒡᓗᑎᒃ, ᑐᓂᕐᕈᑎᖏᓪᓗ ᖃᓄᐃᑦᑐᑐᐃᓐᓇᐅᒐᓗᐊᕐᐸᑕ ᐃᓚᓕᐅᕐᓂᐊᕐᐸᑎᑦ ᐅᕙᖓ ᐱᑦᔪᑎᒋᓗᖓ.

³ ᒪᑯᐊ ᑕᕝᕙ ᑐᓂᕐᕈᑎᒃᓴᐅᔪᑦ ᐃᓚᓕᐅᕐᑕᒃᓴᕆᔭᑎᑦ ᑖᒃᑯᓇᓐᖓᑦ: ᒎᓗᐃᑦ, ᓯᐅᓪᕕᕇᑦ, ᑲᓐᓄᔧᓪᓗ,

⁴ ᐅᕕᓂᕈᒃᓴᔧᓪᓗ ᓵᑦᑐᑦ; ᑐᖑᔪᕐᑐᐃᑦ ᐊᐅᐸᓪᓚᕆᒃᑐᓪᓗ ᐊᐅᐸᕐᑐᓪᓗ ᓄᕕᕐᓵᒃᓮᑦ; ᐊᓐᓄᕌᓕᐊᕆᓯᒪᔪᓪᓗ ᒎᓯᐅᑉ ᒥᖅᑯᖏᓐᓂᑦ.

⁵ ᓰᐱᐅᓪᓗ ᐊᖑᓴᓪᓗᖏᑕ ᐊᒥᖏᓐᓂᒃ ᕿᑐᒻᒪᒃᓴᕐᓯᒪᔪᓂᒃ ᐊᐅᐸᕐᑐᓂᒃ, ᐊᒥᕐᓂᒡᓗ ᕿᑐᒻᒪᒃᓴᕐᓯᒪᔪᓂᒃ, ᕿᔪᖕᓂᒡᓗ ᑎᓴᒃᑕᓂᒃ ᐊᑬᑦᓯᐊᓂᒃ ᐊᑎᓕᖕᓂᒃ,

⁶ ᓇᓂᕈᐊᓪᓗ ᐅᕐᓱᒃᓴᖏᓐᓂᒃ, ᓇᐹᕐᑑᓪᓗ ᐅᕐᓱᖓᑕ ᒥᖑᐊᕐᓯᒍᑎᐅᑉ ᑎᐱᑦᓯᐊᕆᒃᓴᐅᑎᖓᓂᒃ, ᑎᐱᑦᓯᐊᕆᒃᑐᓂᒡᓗ ᐃᓯᕐᓗᐊᕐᓂᑎᑦᓯᒍᑎᒃᓴᓂᒃ,

⁷ ᐅᔭᕋᖕᓂᒡᓗ ᐊᑭᑐᔪᒃᓴᔭᓂᒃ ᐊᑎᖃᕐᑐᓂᒃ ᑳᕐᓂᓕᐊᓂᒃ, ᐊᓯᖏᓐᓂᒡᓗ ᐅᔭᕋᖕᓂᒃ ᐱᐅᓴᐅᑎᒋᔭᐅᔪᒃᓴᓂᒃ, ᑐᓂᕐᕈᓯᕐᑎᑦᓯᔩᑦ ᓴᒡᕕᖕᒥᐅᑕᖏᓐᓂ ᐃᐹᑎᓂᒃ ᐊᑎᓕᖕᓂᒃ ᓴᒡᕕᖕᒥᐅᑕᖏᓐᓂᓗ.

⁸ ᑖᒃᑯᓇᓂ ᐃᑦᔪᕐᓁᓐᓂᕐᐹᒥᒃ ᐃᓂᒃᓴᒥᒃ ᓴᓐᓇᔪᖃᕐᑐᒃᓴᐅᕗᖅ, ᐃᓂᒃᓴᖃᖁᓪᓗᖓ ᐊᑯᕐᖓᓐᓂ.

⁹ ᑐᐱᕐᒥᒃ ᓴᓇᔪᒃᓴᐅᕗᑎᑦ ᐃᓕᖕᓄᑦ ᓇᓗᓁᕐᓂᐊᕐᑕᓐᓂᒃ, ᐃᓗᓕᒃᓴᓕᒫᖏᓪᓗ ᐋᖅᑭᒃᓯᒪᓂᒃᓴᖓᓗ, ᐃᓱᒪᒋᓯᒪᔭᒃᑲ ᒪᓕᒡᓗᒋᑦ.”

ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓ

¹⁰ “ᐃᒃᓯᕐᕕᖕᒥᒃ ᓴᓇᔪᒃᓴᐅᕗᑎᑦ ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᓂᒃ ᐊᑎᓕᖕᒥᒃ; ᑕᑭᓂᖃᕐᓗᒍ 110ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍ 66ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ.

¹¹ ᑖᓐᓇᓗ ᖄᓕᕐᑕᒃᓴᕆᕙᑦ ᒎᓗᓪᓚᕆᖕᒥᒃ, ᐃᓗᐊ ᓯᓚᑖᓗ ᖄᐹᕐᓗᒍ ᒎᓗᒥᒃ, ᓯᓇᕐᔪᓕᐅᕐᓗᒍᓗ ᒎᓗᒥᒃ.

¹² ᓯᑕᒪᓂᒡᓗ ᒎᓗᓂᒃ ᑎᒍᒥᐊᕐᕕᓕᐅᕐᓗᒍ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᑖᒃᑯᐊᓗ ᓂᐅᖏᓐᓄᑦ ᐃᓕᓗᒋᑦ, ᒪᕐᕉᒃ ᐃᒡᓗᐊᓃᓪᓗᑎᒃ, ᒪᕐᕉᒡᓗ ᐃᒡᓗᐊᓃᒻᒥᓗᑎᒃ.

¹³ ᑕᑭᔪᑯᑖᖕᓂᒃ ᕿᔪᖕᓂᒃ ᓴᓇᓕᕆᑦ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ ᒎᓗᒥᒃ.

¹⁴ ᓱᓪᓗᖏᑎᒍᓪᓗ ᑲᐅᑎᓪᓗᒋᒃ ᑍᒫᒃ ᐊᑭᕋᐅᑎᓕᐅᒐᒃᓴᕆᕙᑦ ᐃᒃᓯᕐᕕᐅᑉ ᓴᓂᕌᒍᑦ, ᑕᒪᐅᓇ ᐊᑭᕋᕐᑕᐅᖃᑦᑕᖁᓪᓗᒍ.

¹⁵ ᑖᒃᑯᐊᓗ ᕿᔪᑯᑖᑦ ᐊᑭᕋᐅᑎᖏᑦ ᐃᒃᓯᕐᕕᐅᑉ ᐳᑐᖏᑎᒎᖓᔪᑦ; ᑕᕝᕙᓐᖓᑦ ᐃᓂᖏᓐᓂᑦ ᐲᕐᑕᐅᔪᒃᓴᐅᓐᖏᓚᑦ.

¹⁶ ᑕᕝᕗᖓᓗ ᐃᒃᓯᕐᕕᖕᒧᑦ ᐃᓕᔪᒫᕐᐹᒃᑭᒃ ᐅᔭᕌᒃ ᒪᕐᕉᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᒃ ᐃᓕᖕᓄᑦ ᑐᓂᔪᒫᕐᑖᒃᑲᒃ.

¹⁷ “ᒪᑐᓕᐅᕐᑕᒃᓴᕆᕙᓪᓗ ᓂᑲᒍᓱᖕᓂᐅᑉ ᐃᒃᓯᕙᐅᑕᖓᓂᒃ ᑍᔭᐅᔪᒥᒃ ᒎᓗᐃᓐᓇᐅᓗᒍ; ᑕᑭᓂᖃᕐᓗᒍ 110ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 66ᓯᓐᑎᒦᑕᓂᒃ.

¹⁸ ᑖᑦᓱᒪᓗ ᒪᑑᑉ ᖄᖓᒍᑦ ᐃᓱᖏᒃᑎᒃᑯᑦ ᐃᒡᓗᒌᖕᓂᒃ; ᐃᓴᕈᓐᖑᐊᓖᖕᓂᒃ ᓴᓇᔪᒃᓴᐅᕗᑎᑦ ᓯᕈᐲᓂᒃ ᑍᔭᐅᔪᖕᓂᒃ; ᑖᒃᑯᐊᒡᓗ ᒎᓘᔪᒃᓴᐅᕘᒃ ᑲᐅᒐᕐᓗᒋᒃ ᓴᓇᓯᒪᓗᑎᒃ.

¹⁹ ᓴᓇᔪᒃᓴᐅᕗᑎᑦ ᐊᑕᐅᓯᖅ ᓯᕈᐲᒻ ᒪᑑᑉ ᐃᓱᐊᓃᓪᓗᓂ, ᐂᑉᐸᖓᓗ ᓯᕈᐲᒻ ᐃᒡᓗᐊᓃᓪᓗᓂ; ᑕᕝᕙᓂ ᒪᑐᒥ ᐃᓛᒃᑰᖏᓪᓗᑎᒃ ᓴᓇᓯᒪᖁᓪᓗᒋᒃ, ᓯᕈᐲᒻᓂᒃ ᒪᕉᖕᓂᒃ ᐃᒡᓗᒌᖕᓂᒃ ᖄᒥᐅᑕᖃᖁᓪᓗᒍ.

²⁰ ᑖᒃᑯᐊᒡᓗ ᓯᕈᐲᒻ ᐃᓴᕈᖏᒃ ᐃᓯᕕᖓᔪᒃᓴᐅᕘᒃ, ᑖᓐᓇ ᒪᑐ ᐃᓴᕈᒥᖕᓄᑦ ᖁᓚᖏᐊᕐᓗᒍ, ᑖᒃᑯᐊᒡᓗ ᓯᕈᐲᒻ ᐃᒻᒥᖕᓄᑦ ᓵᓐᖓᖃᑦᑕᐅᑎᔪᒃᓴᐅᕘᒃ ᒪᑑᑉ ᖄᖓᓂ.

²¹ ᐃᒃᓯᕐᕕᒡᓗ ᑕᑦᓱᒧᖓ ᒪᑐᒧᑦ ᒪᑐᔭᒃᓴᕆᕙᑦ; ᐅᔭᕌᒡᓗ ᒪᕐᕉᒃ ᐱᖁᔭᓂᒃ ᑎᑎᕋᕐᕕᒋᓯᒪᔫᒃ ᐃᒃᓯᕐᕕᐅᑉ ᐃᓗᐊᓄᐊᕐᓗᒋᒃ ᐃᓕᖕᓄᑦ ᑐᓂᔪᒫᕐᑖᒃᑲᒃ.

²² ᑕᕝᕙᓂᓗ ᐃᓕᖕᓄᑦ ᓴᖅᑭᕈᒫᕐᐳᖓ, ᑖᑦᓱᒪᓗ ᒪᑑᑉ ᖄᖓᓂ ᓯᕈᐲᒻᖑᐊᒃ ᐊᑯᓐᓂᖓᓂᑦ ᐱᖁᔭᓕᒫᓐᓂᒃ ᑐᓂᓯᕕᒋᔪᒫᕐᐸᒋᑦ, ᐃᓴᕆᐊᓕᒥᐅᓕᒫᓄᑦ ᑐᕌᖓᓂᐊᕐᑐᓂᒃ.”

ᒎᑎᒧᑦ ᑐᓂᕐᕈᑎᐅᔪᑦ ᓂᐊᖂᔧᑦ ᐃᓂᒃᓴᖓ

²³ “ᕿᔪᖕᒥᒃ ᑎᓴᒃᑕᒥᒃ ᐊᑬᑦᓯᐊᒥᒃ ᐊᑎᓕᖕᒥᒃ ᓵᓕᐅᕐᑐᒃᓴᐅᕗᑎᑦ; ᑕᑭᓂᖃᕐᓗᒍ 88ᓂᒃ ᓯᓐᑎᒦᑕᓂᒃ, ᓯᓕᖕᓂᖃᕐᓗᒍᓗ 44ᓂᒃ ᓯᓐᑎᒦᑕᓂᒃ, ᐳᕐᑐᓂᖃᕐᓗᒍᓗ 66ᓂᒃ ᓯᓐᑎᒦᑕᓂᒃ.

²⁴ ᑖᓐᓇᓗ ᓯᓚᑉᐱᐊᕐᑕᒃᓴᕆᕙᑦ ᒎᓗᓪᓚᕆᖕᒥᒃ, ᓯᓇᕐᔪᓕᐅᕐᓗᒍᓗ ᐊᕙᓕᐊᕈᑕᒃᓴᖓᓂᒃ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ.

²⁵ ᑖᓐᓇᓗ ᓯᓇᕐᔪᒃᓯᐅᓯᕐᑕᒃᓴᕆᕙᑦ ᐊᕙᑎᓕᒫᖓ ᐊᒡᒊᑦ ᓴᓂᒧᑐᓂᖓᑎᑐᑦ ᓯᓕᒃᑎᒋᔪᒥᒃ, ᓯᓇᕐᔪᖓᓗ ᓯᓚᑉᐱᐊᓕᒃᑲᓐᓂᕐᓗᒍ ᓴᖑᐃᐱᓗᒃᓯᒪᔪᒥᒃ ᒎᓗᒥᒃ.

²⁶ ᑕᕝᕙᓂᓗ ᒎᓗᓂᒃ ᐊᖕᒪᓗᕐᑐᓂᒃ ᓱᓪᓗᓕᖕᓂᒃ ᓴᓇᔪᒃᓴᐅᕗᑎᑦ, ᑖᒃᑯᐊᓗ ᐊᖕᒪᓗᕐᑐᑦ ᓱᓪᓗᓖᑦ ᐃᓕᓗᒋᑦ ᓂᐅᖏᒃᑕ ᑎᕆᖅᑯᖏᓐᓄᑦ ᓯᑕᒪᓄᑦ.

²⁷ ᓯᓇᕐᔪᐊᑕ ᑭᒡᓕᖓᓃᑦᑐᒃᓴᐅᕗᑦ ᐊᖕᒪᓗᕐᑐᑦ ᓱᓪᓗᓖᑦ, ᑕᑭᔪᑯᑖᖕᓄᑦ ᑲᐅᑎᑦᓯᕕᐅᓗᑎᒃ ᐊᑭᕋᐅᓯᕐᕕᒃᓴᐅᖁᓪᓗᒋᑦ ᑖᑦᓱᒧᖓ ᓵᒧᑦ.

²⁸ ᑕᑭᔪᑯᑖᖕᓂᒃ ᕿᔪᖕᓂᒃ ᓴᓇᓕᕆᑦ ᑎᓴᒃᑖᖕᓂᒃ ᐊᑬᑦᓯᐊᒥᒃ ᐊᑎᓕᖕᒥᒃ, ᑖᒃᑯᐊᒡᓗ ᓯᓚᑉᐱᐊᕐᓗᒋᒃ ᒎᓗᒥᒃ, ᑕᒪᒃᑯᖕᓄᖓ ᑖᓐᓇ ᓵ ᐊᑭᕋᕐᑕᐅᔪᓐᓇᖁᓪᓗᒍ.

²⁹ ᐊᓪᓕᕋᓕᐅᕐᑐᒃᓴᐅᒋᕗᑎᑦ ᒥᑭᓐᓂᕐᓴᓂᒡᓗ ᐊᓪᓕᕋᒃᓴᓂᒃ ᐃᓯᕐᓗᐊᕐᓂᑎᑦᓯᑦᔪᑎᒧᑦ ᐊᑐᕐᑐᒃᓴᓂᒃ, ᐃᒥᖃᐅᑎᓂᒡᓗ ᐴᒍᑕᓂᒡᓗ ᐃᒥᖃᐅᑎᒃᓴᓂᒃ; ᑖᒃᑯᐊᓗ ᒎᓗᐃᓐᓇᐅᑎᓪᓗᒋᑦ ᓴᓇᔭᒃᓴᕆᕙᑎᑦ.

³⁰ ᑖᓐᓇᓗ ᓵ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓃᑦᑐᒃᓴᐅᕗᖅ, ᓵᓪᓗ ᖄᖓᓂ ᑍᒪᓐᖓᑦ ᓂᐊᖂᔭᕐᑕᖃᕐᑐᒃᓴᐅᕗᖅ ᐅᕙᓐᓄᑦ ᑐᓂᕐᕈᑎᐅᔪᕕᓂᕐᓂᒃ.”

ᓇᓂᕈᐊᑉ ᓇᐸᕕᖓ

³¹ “ᓴᓇᔪᒃᓴᐅᕗᑎᑦ ᓇᓂᕈᐊᑉ ᓇᐸᕕᖓᓂᒃ ᒎᓗᐃᓐᓇᐅᓗᒍ. ᐊᓪᓕᕋᖓᓕ ᓇᐸᔪᖓᓗ ᒎᓘᔪᒃᓴᐅᕗᖅ ᑲᐅᒐᕐᓯᒪᓗᓂᓗ ᓴᓇᔭᐅᓯᒪᔪᒃᓴᐅᕗᖅ; ᓇᓂᕈᐊᖃᕐᕕᖓ, ᑕᑯᒥᓇᕐᓴᐅᑎᖏᓪᓗ ᐱᕈᕐᓯᐊᖑᐊᑦ, ᐱᕈᕐᕕᓐᖑᐊᖏᓪᓗ ᐊᑕᐅᓯᕐᒥ ᐃᓗᐃᑦᑑᓗᑎᒃ ᓴᓇᓯᒪᔪᒃᓴᐅᕗᑦ;

³² ᕿᑎᖓᓃᑦᑑᓪᓗ ᓇᓂᕈᐊᖃᕐᕕᐅᑉ ᐊᕙᑎᖏᒃᑎᒍᑦ 6ᓂᒃ ᓇᓂᕈᐊᖃᕐᕕᖃᕐᑐᒃᓴᐅᕗᖅ ᓇᐹᕐᑑᑉ ᐊᕙᓚᖓᔪᖏᑎᑐᑦ, ᕿᑎᖓᓃᑦᑑᑉ ᐃᒡᓗᐊᒍᑦ ᐱᖓᓱᑦ ᓇᓂᕈᐊᖃᕐᕕᐅᓗᑎᒃ ᐃᒡᓗᐊᒍᓪᓗ ᐱᖓᓱᑦ ᓇᓂᕈᐊᖃᕐᕕᐅᖕᒥᓗᑎᒃ;

³³ ᑖᒃᑯᐊᓗ ᐱᖓᓱᑦ ᓇᓂᕈᐊᖃᕐᕖᑦ ᕿᑎᖓᑕ ᐊᕙᑖᓃᑦᑐᑦ ᐊᑐᓂᑦ 6 ᓴᓇᓯᒪᔪᒃᓴᐅᕗᑦ ᐊᕙᑎᖏᒃᑎᒃᑯᑦ ᖁᖁᖓᔪᒥᒃ ᖃᖅᑯᐊᒐᑎᑐᑦ ᓇᓂᕈᐊᖃᕐᕕᖃᕐᓗᑎᒃ, ᐃᒻᒥᒍᓪᓗ ᐊᑐᓂᑦ ᓇᐸᔪᖏᑦ ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ, ᑍᒤᓕᖓᓗᑎᒃ ᑕᕝᕙ ᑖᒃᑯᐊ 6ᐅᔪᑦ ᓇᓂᕈᐊᖃᕐᕕᐅᔪᒃᓴᐅᕗᑦ;

³⁴ ᑕᕝᕙᓂᓕ ᓇᓂᕈᐊᖃᕐᕕᐅᑉ ᓇᐸᔪᖓᓂ ᓯᑕᒪᓂᒃ ᐊᕙᒻᒧᑦ ᖁᖁᖓᔪᓂᒃ ᑕᕐᓴᖃᕐᑐᒃᓴᐅᕗᖅ, ᐱᕈᕐᑐᖃᕐᕕᓐᖑᐊᖃᕐᓗᑎᒃ ᐱᕈᕐᑐᖏᓪᓗ ᐅᖃᐅᔭᓐᖑᐊᖃᕐᓗᑎᒃ,

³⁵ ᑖᒃᑯᐊᓗ 6ᐅᔪᑦ ᓇᓂᕈᐊᖃᕐᕖᑦ ᐊᑐᓂᑦ ᐃᓱᐊᒍᑦ ᓇᓴᓐᖑᐊᖑᔮᕐᑐᒥᒃ ᓇᓂᕈᐊᖃᕐᕕᖃᕐᑐᒃᓴᐅᕗᑦ ᑕᕝᕙᓐᖓᑦ ᓇᓂᕈᐊᖃᕐᕕᖕᒥᑦ ᕿᑎᖓᓃᑦᑐᒥᑦ ᐊᕙᓚᖓᔪᑎᑐᑦ ᑍᒤᓕᖓᓗᑎᒃ.

³⁶ ᑭᓯᐊᓂᓕ ᑖᒃᑯᐊ ᓇᓂᕈᐊᖃᕐᕖᑦ ᓇᓴᓐᖑᐊᑦ ᐊᕙᓚᖓᔪᓐᖑᐊᕆᔭᖏᓪᓗ ᑕᒪᕐᒥᒃ ᐊᑕᐅᓯᐅᓗᓂ ᐃᓗᐃᑦᑑᔪᒃᓴᐅᕗᖅ, ᑕᒪᓐᓇ ᓇᓂᕈᐊᖃᕐᕕᐅᔪᖅ ᐃᓗᐃᑦᑑᓗᓂ ᐃᓛᕐᑐᕐᓯᒪᖏᓪᓗᓂᓗ ᑲᐅᒐᕐᑕᐅᓯᒪᓗᓂ ᓴᓇᓯᒪᔪᒃᓴᐅᕗᖅ ᒎᓗᐃᓐᓇᐅᓗᓂ.

³⁷ ᓇᓂᕈᐊᖃᕐᕕᒃ ᑖᓐᓇ 7ᓂᒃ ᑲᑎᓪᓗᒋᑦ ᓇᓂᕈᐊᖃᕐᕕᖃᕐᑐᒃᓴᐅᕗᖅ; ᐃᓕᓯᒪᔭᐅᔪᒃᓴᐅᕗᕐᓗ ᑕᑉᐹᓂ ᓯᕗᕌᓂ ᖃᐅᒪᑎᑦᓯᖁᓪᓗᒍ.

³⁸ ᐃᑯᒪᖏᓐᓄᑦ ᖃᒥᑦᓯᑦᔪᑎᖓ ᐊᓪᓕᕋᖓᓗ ᒎᓗᓪᓚᕆᐅᔪᒃᓴᐅᕘᒃ.

³⁹ ᒎᓗᐃᓐᓇᐅᔪᒥᒃ 75ᐸᐅᒥᒃ ᐅᖁᒤᓐᓂᖃᕐᓗᓂ ᓇᓂᕈᐊᖃᕐᕕᓕᐅᕐᑐᒃᓴᐅᕗᑎᑦ, ᐊᓯᖏᓪᓗ ᐃᓚᒋᔭᕆᐊᓕᖏᑦ ᐱᖃᓯᐅᑎᑎᓪᓗᒋᑦ.

⁴⁰ ᑲᒪᑦᓯᐊᕐᓗᑎᑦ ᐃᒫᖎᓚᑦᔪᑎᒋᔭᓐᓂᒃ ᓴᓇᔪᒃᓴᐅᕗᑎᑦ, ᐃᓕᖕᓄᑦ ᑕᑯᑎᑦᔪᑎᒋᓚᐅᕐᑕᓐᓂᒃ ᖃᖅᑲᒥ ᒪᓕᒡᓗᑎᑦ.”