ᒨᓯᓯ ᐂᑉᐸᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖏᖃᑎᒌᖕᓂᐅᑉ ᑍᒤᓕᖓᓂᐊᕐᓂᖓᑕ ᓇᕿᑦᔪᓯᕐᑕᐅᓂᖓ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᖃᖅᑳᓗᖕᒧᑦ ᒪᔪᕋᕐᓗᑎᑦ ᐅᕙᓐᓄᐊᕆᑦ ᐂᕉᓂ ᐱᖃᑎᒋᓗᒍ, ᓁᑖᑉᓗ ᐊᐱᕼᐅᓗ, ᐃᓴᕆᐊᓕᒥᐅᓪᓗ ᐊᖓᔪᖅᑳᖏᓐᓂᒃ 70ᓂᒃ ᐅᖓᓯᒃᑐᒦᓪᓗᓯ ᓱᓕ ᐅᑯᔪᒃᓴᐅᕗᓯ ᑐᒃᓯᐊᕐᕕᒋᓗᖓ.

² ᒨᓯᓯᑐᐊᖅ ᑭᓯᒥ ᐊᑕᓂᕐᒧᑦ ᖃᒡᓕᔪᓐᓇᕐᑐᑑᓂᐊᕐᐳᖅ ᐊᓯᖏᓪᓕ ᖃᒡᓕᔪᒃᓴᐅᓐᖏᓚᑦ. ᐃᓄᑐᐃᓐᓁᓪᓗ ᖃᖅᑲᒧᑦ ᒪᔪᐊᕐᑐᒃᓴᐅᓐᖏᓚᑦ.”

³ ᒨᓯᓯᐅᓪᓗ ᐃᓄᐃᑦ ᐅᖃᕐᕕᒋᕔᑦ, ᐊᑕᓂᐅᑉ ᐊᑐᕐᑕᐅᖁᔭᖏᓐᓂᒃ ᒪᓕᒐᕆᔭᐅᖁᔭᖏᓐᓂᒡᓗ. ᐃᓄᐃᓪᓗ ᐊᑕᐅᑦᓯᒃᑯᑦ ᑭᐅᕗᑦ, “ᐊᑕᓂᐅᑉ ᐅᖃᐅᓯᕆᔭᓕᒫᖏᓐᓂᒃ ᒪᓕᖕᓂᐊᕐᐳᒍᑦ.”

⁴ ᒨᓯᓯᐅᓪᓗ ᑎᑎᕋᕐᐰᑦ ᐊᑕᓂᐅᑉ ᐱᓂᐊᕐᑕᐅᖁᔭᓕᒫᖏᑦ, ᖃᐅᑎᓪᓗᒍᓗ ᐅᓪᓛᕋᕐᔪᒃᑯᑦ ᑐᓂᕐᕈᓯᕐᕕᒃᓴᒥᒃ ᓴᓇᕗᖅ ᖃᖅᑳᓘᑉ ᐊᑖᓂ. ᓴᓇᕕᒋᓪᓗᓂᐅᒃ ᐅᔭᖅᑲᓂᒃ 12ᓂᒃ ᐅᔭᕋᒃ ᐊᑕᐅᓯᖅ ᑐᕌᖓᑎᓪᓗᓂᐅᒃ ᐃᓅᖃᑎᒌᑦ ᐃᓴᕆᐊᓕᒥᐅᑦ 12ᓕᖅᑲᖓᓂᖏᑦ ᒪᓕᒡᓗᒋᑦ.

⁵ ᐃᓅᓱᒃᑐᓂᒡᓗ ᐃᓴᕆᐊᓕᒥᐅᓂᒃ ᑎᓕᓯᕗᖅ, ᑖᒃᑯᐊᓗ ᐃᑯᐊᓚᑦᓯᕗᑦ ᑐᓂᕐᕈᑎᓂᒃ ᐊᑕᓂᕐᒧᑦ. ᐃᒻᒧᒃᓯᐅᒐᕐᓂᒡᓗ ᑐᓂᕐᕈᓯᕆᓪᓗᑎᒃ ᒎᑎᒥᒃ ᐃᓚᖃᑦᓯᐊᕐᓂᖅ ᐱᑦᔪᑎᒋᓪᓗᒍ.

⁶ ᒨᓯᓯᐅᓪᓗ ᐆᒪᔪᑦ ᐊᐅᖏᑕ ᐃᓚᖏᑦ ᐴᖅᑲᕐᐰᑦ ᐴᒍᑕᕐᓄᑦ, ᐃᓚᖏᓪᓗ ᑐᓂᕐᕈᓯᕐᕕᖕᒧᑦ ᓯᕐᐸᕐᓴᐅᑎᒋᓪᓗᓂᒋᑦ.

⁷ ᐊᖏᖃᑎᒌᖕᓂᐅᓪᓗ ᑎᑎᕋᕐᓯᒪᔪᖁᑎᖏᑦ ᒨᓯᓯᐅᑉ ᐱᕔᑦ, ᑖᒃᑯᓇᓂ ᒎᑎᐅᑉ ᐱᓂᐊᕐᑕᐅᖁᔭᖏᑦ ᑎᑎᕋᕐᓯᒪᖕᒪᑕ. ᓂᐱᖃᕐᓗᓂᓗ ᐃᓄᖕᓄᑦ ᐅᖃᓕᒫᕐᐰᑦ, ᐃᓄᐃᓪᓗ ᐅᖃᕐᐳᑦ, “ᐊᑕᓂᖅ ᓈᓚᖕᓂᐊᕐᐸᕗᑦ ᐱᖁᔭᓕᒫᖏᓪᓗ ᐊᑐᕐᓗᑎᒍ.”

⁸ ᒨᓯᓯᐅᓪᓗ ᐊᐅᒃ ᐴᒍᑕᕐᒦᑦᑐᖅ ᐱᓪᓗᓂᐅᒃ ᐃᓄᐃᑦ ᓯᕐᐸᕐᓴᕐᕕᒋᕔᑦ, ᐅᖃᕐᓗᓂᓗ, “ᑕᑯᒋᑦ ᑕᒪᓐᓇ ᐊᐅᒃ ᓇᓗᓁᒃᑯᑕᐅᕗᖅ ᐊᖏᖃᑎᖃᕐᓯᒪᓂᑦᑕ ᑍᒤᓕᖓᓂᐊᓕᕐᓂᖓᓂᒃ. ᐊᑕᓂᐅᑉ ᐊᖏᖃᑎᒋᓚᐅᕐᒪᓯ ᐱᖁᔭᒥᓂᒃ ᑐᓂᓯᕕᒋᒐᒥᓯ.”

⁹ ᑕᕝᕙ ᒨᓯᓯᓗ ᐂᕉᓂᓗ, ᓁᑖᑉᓗ, ᐊᐱᕼᐅᓗ, ᐃᓴᕆᐊᓕᒥᐅᓂᓗ ᐊᖓᔪᖅᑳᑦ 70 ᖃᖅᑲᒧᑦ ᒪᔪᐊᕐᐳᑦ,

¹⁰ ᑖᒃᑯᐊᓗ ᑕᑯᕚᑦ ᐃᓴᕆᐊᓕᒥᐅᑦ ᒎᑎᖓᑦ; ᑖᑦᓱᒪᓗ ᐃᑎᒐᖏᑕ ᐊᑖᒍᑦ ᐅᔭᕋᒃᑕᖃᕐᐳᖅ ᓴᓇᓯᒪᔫᔮᕐᑐᒥᒃ ᓴᐰᕋᑎᑐᑦ ᑕᑯᒥᓇᕐᑐᐊᓗᒃᑎᑐᑦ ᑍᒤᑦᑐᒥᒃ, ᐅᔭᖅᑲᑎᑐᑦ ᓯᓚᑎᑐᑦ ᑕᑯᒃᓴᐅᓇᑦᓯᐊᕐᑐᒥᒃ ᑐᖑᔪᑦᓯᐊᕐᑎᒋᔪᒥᒃ.

¹¹ ᒎᑎᐅᓪᓗ ᑖᒃᑯᐊ ᐃᓴᕆᐊᓕᒥᐅᓂ ᑕᓯᐅᕐᑎᐅᔪᑦ ᖃᓄᐃᓕᑎᓚᐅᓐᖏᓔᑦ; ᑖᑦᓱᒥᖓ ᑕᑯᒐᓗᐊᕐᑎᓪᓗᒋᑦ, ᓂᕆᖃᑎᒌᒃᓗᑎᒡᓕ ᐃᒥᖃᑎᒌᓕᕐᐳᑦ ᑕᕝᕙᓂ.

ᒨᓯᓯᐅᑉ ᖃᖅᑲᒥ ᓮᓁᒦᓐᓂᖓ

¹² ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᖃᖅᑲᒧᑦ ᒪᔪᐊᓚᐅᕆᑦ ᐅᕙᓐᓄᑦ, ᑕᕝᕙᓂᓗ ᐅᑕᖅᑭᓗᑎᑦ; ᑐᓂᓯᓂᐊᕋᒃᑭᑦ ᐅᔭᕋᒃᑯᑦ ᑎᑎᕋᕐᓯᒪᔫᖕᓂᒃ ᒪᕐᕉᖕᓂᒃ, ᐱᖁᔭᓂᒃ ᑎᑎᕋᕐᕕᒋᓯᒪᔭᓐᓂᒃ ᐃᓄᖕᓄᑦ ᒪᓕᒃᑕᐅᔭᕆᐊᖃᕐᑐᓂᒃ.”

¹³ ᑕᕝᕙ ᒨᓯᓯ ᐸᕐᓇᓕᕐᐳᖅ ᐱᔨᓂ ᔮᓱᐊ ᐃᓚᒋᓪᓗᒍ, ᒨᓯᓯᓗ ᖃᖅᑲᒧᑦ ᒪᔪᕋᕐᐳᖅ ᒎᑎᐅᑉ ᖃᖅᑲᖁᑎᖓᓄᑦ.

¹⁴ ᐅᖃᕐᐳᕐᓗ ᐊᖓᔪᖅᑲᐅᔪᓄᑦ, “ᑕᕝᕙᓂ ᐅᑕᖅᑭᓚᐅᕆᑦᓯ ᐅᕙᑦᑎᓐᓂᒃ, ᐅᑎᓚᐅᖅᑳᕐᑎᓐᓇᑕ; ᑕᑯᒋᑦ ᐃᓚᖃᕐᐳᓯ ᐂᕉᓂᒥᒃ ᕼᐊᕐᒥᒡᓗ; ᓇᓪᓕᐊᓐᓂᒃ ᐊᑲᐅᓐᖏᓕᐅᕈᑎᔪᖃᕐᐸᑦ, ᑕᕝᕙ ᑖᒃᑯᓄᖓ ᐅᐸᒍᑎᔪᖃᕈᓐᓇᕐᓂᐊᕐᐳᖅ.”

¹⁵ ᑕᕝᕙ ᒨᓯᓯ ᖃᖅᑲᒧᑦ ᒪᔪᐊᕐᒪᑦ, ᖃᖅᑲᖅ ᓄᕗᔭᒧᑦ ᐅᓕᒃᑕᐅᕗᖅ.

¹⁶ ᐊᑕᓂᐅᓪᓗ ᓂᕐᑐᕐᓇᕐᓂᕐᔪᐊᖓ ᖃᖅᑲᐅᑉ ᖄᖓᓃᓕᕐᐳᖅ ᓮᓁᒥ, ᓄᕗᔭᒧᓪᓗ ᐅᓕᒃᑕᐅᓯᒪᓪᓗᓂ ᐅᓪᓗᓂᒃ 6ᓂᒃ; ᐅᓪᓗᓪᓕ 7ᖓᓐᓂ ᒎᑎᐅᑉ ᒨᓯᓯ ᐅᖃᕐᕕᒋᓕᕐᐹ ᓄᕗᔭᒥᑦ.

¹⁷ ᐊᑕᓂᐅᓪᓕ ᓂᕐᑐᕐᓇᕐᓂᕐᔪᐊᖓᑕ ᓴᖅᑭᔮᕐᓂᖓ ᐃᑯᐊᓚᔪᑎᑐᑦ ᑍᒤᓚᐅᕐᐳᖅ ᖃᖅᑲᐅᑉ ᖄᖓᓂ ᐃᓄᐃᑦ ᐃᓴᕆᐊᓕᒥᐅᑦ ᑕᑯᓐᓇᕐᑕᖏᑎᒍᑦ.

¹⁸ ᒨᓯᓯᓗ ᓄᕗᔭᒧᑦ ᐃᑎᕐᐳᖅ, ᖃᖅᑲᐅᑉ ᖄᖓᓃᑦᑐᒧᑦ. ᑕᕝᕙᓃᑉᐳᕐᓗ ᐅᓪᓗᓂᒃ ᐅᓐᓄᐊᓂᒡᓗ 40ᓂᒃ.