ᒨᓯᓯ ᐂᑉᐸᖏᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᖃᑎᒧᑦ ᓈᒻᒪᓈᕐᑐᒥᒃ ᐱᓇᓱᐊᕐᓂᖅ ᐱᑦᓯᐊᕐᓂᕐᓗ

¹ “ᓱᓕᖏᑦᑐᒥᒃ ᐅᖃᐅᓯᖃᕐᓗᓯ ᐃᓅᖃᑎᑦᓯᓐᓄᑦ ᓯᐊᒻᒪᕐᑎᑦᓯᔪᒃᓴᐅᓐᖏᓚᓯ, ᐸᓯᔭᒃᓴᐅᔪᒥᒡᓗ ᐃᑲᔪᕐᑐᕐᑐᒃᓴᐅᓐᖏᓚᓯ, ᓱᓕᖏᑦᑐᒥᒃ ᖃᐅᔨᓯᒪᓂᕋᕐᓂᑦᓯᓐᓄᑦ.

² ᐃᓄᒋᐊᖕᓂᕐᓮᑦ ᐅᓄᕐᓂᕐᓴᐅᓂᑐᐃᓐᓇᖏᓐᓄᑦ ᒪᓕᒃᓴᕐᑐᒃᓴᐅᓐᖏᓚᓯ ᓈᒻᒪᖏᑦᑐᒧᑦ ᐱᓇᓱᐊᕐᐸᑕ; ᐅᕝᕙᓘᓐᓃᑦ ᓇᓗᓁᕐᓯᓕᕐᐸᑕ ᐃᓅᖃᑎᒧᑦ ᓈᒻᒪᓈᖏᑦᑐᒥᒃ ᐱᓇᓱᐊᓕᕐᓗᑎᒃ;

³ ᐅᕝᕙᓗ ᐃᓔᓐᓇᕐᓯᐅᕐᓂᕐᒧᑦ ᐃᑲᔪᕐᑐᖏᓐᓂᕐᓴᐅᔪᒃᓴᐅᓐᖏᓚᓯ ᐊᖑᑦ ᐊᔪᕐᓴᕐᑐᖅ ᐃᖅᑲᕐᑐᕐᑕᐅᓕᕐᐸᑦ.

⁴ “ᐊᑭᕋᕐᑐᕐᑎᕕᑦ ᐆᒪᔪᖁᑎᖓᓂᒃ ᑕᑯᒍᕕᑦ ᐃᒻᒧᒃᓯᐅᒐᖁᑎᖓᓂᒃ ᓯᐅᑎᖅᑯᕐᑐᔪᖁᑎᖓᓂᒡᓘᓐᓃᑦ ᐃᐱᕐᓯᒪᖏᑦᑐᒥᒃ, ᑕᕝᕙ ᐅᑎᕐᑎᑕᒃᓴᕆᕙᑦ ᐃᓄᐊᓄᑦ.

⁵ ᖀᒥᒋᔨᕕᑦ ᓯᐅᑎᖅᑯᕐᑐᔪᖁᑎᖓᓂᒃ ᑕᑯᒍᕕᑦ ᓇᖕᒪᒡᓗᓂ ᐅᖁᒤᒃᓴᕐᓂᕐᒧᑦ ᐹᓪᓚᒃᓯᒪᔪᒥᒃ, ᒪᑭᑎᑕᒃᓴᕆᕙᑦ ᐃᑲᔪᕐᓗᒍ; ᓴᓂᖅᑯᑐᐃᓐᓇᖏᓪᓗᒍ.

⁶ “ᐃᓅᖃᑎᑦᓯᓐᓄᑦ ᓈᒻᒪᓈᖏᓐᓇᓱᐊᕐᑐᒃᓴᐅᓐᖏᓚᓯ ᐊᔪᕐᓴᕐᓂᖓ ᐱᑦᔪᑎᒋᓗᒍ ᐃᖅᑲᕐᑐᐃᕕᖕᒦᑎᑕᐅᓕᕐᐸᑦ.

⁷ “ᓱᓕᖏᑦᑐᒥᒃ ᐸᓯᔭᒃᓴᓐᖑᕐᑎᑦᓯᓇᓱᐊᕐᓂᖅ ᐃᓕᑦᓯᓐᓂᑦ ᐅᖓᓯᒡᓕ, ᐸᓯᔭᒃᓴᐅᖏᑦᑐᒥᒃ ᓈᒻᒪᓈᕐᓯᒪᔪᒥᒡᓗ ᑐᖁᑕᐅᑎᑦᓯᔪᒃᓴᐅᓐᖏᓚᓯ, ᓇᓪᓕᐊᓐᓂᑐᐃᓐᓇᖅ ᓯᕗᓂᕐᓗᓕᕐᑎᑦᓯᓂᐊᕐᐳᖓ ᑍᒫᒃ ᐱᐅᖏᑦᑐᒥᒃ ᐱᔪᖃᕐᐸᑦ.

⁸ ᓯᓔᕐᕆᒃᓯᓇᓱᐊᕐᑐᓂᒃ ᐃᓚᓕᐅᕐᓯᔪᒃᓴᐅᓐᖏᓚᓯ, ᓯᓔᕐᕆᒃᓯᓂᖅ ᓈᒻᒪᓈᕐᑐᒥᒃ ᑕᑯᓐᓇᕈᓐᓃᕐᑎᑦᓯᖕᒪᑦ ᐸᓯᔭᒃᓴᐅᖏᑦᑐᓪᓗ ᐃᓅᓯᖏᓐᓂᒃ ᓯᖁᒥᑦᓯᓪᓗᓂ.

⁹ “ᓄᓇᒋᓐᖏᑕᒥᓃᑦᑐᒥᒃ ᐅᖁᒤᒃᓴᕐᑎᑦᓯᔪᒃᓴᐅᓐᖏᓚᓯ; ᐃᒃᐱᒋᔭᖓᓂᒃ ᖃᐅᔨᒪᒐᑦᓯ, ᓄᓇᒋᓐᖏᑕᑦᓯᓐᓃᓚᐅᕐᒥᒐᑦᓯ ᓄᓇᒥ ᐄᑦᔨᑉᑎᒥ.”

ᐊᕐᕌᒎᑉ 7ᖓᑦ ᐅᓪᓗᐃᓪᓗ 7ᖓᑦ

¹⁰ “ᐊᕐᕌᒍᓂᒃ ᐱᖓᓲᔪᕐᑐᓂᒃ ᓄᓇᖁᑎᑦᓯᓐᓂ ᐱᕈᕐᓰᔪᒃᓴᐅᕗᓯ ᐱᕈᕐᑎᑕᖏᓐᓂᒡᓗ ᑕᕝᕙᓐᖓᑦ ᑲᑎᕐᓱᐃᕙᒡᓗᓯ.

¹¹ ᐊᕐᕌᒍᓪᓕ 7ᖓᓐᓂ ᓄᓇ ᐱᕈᕐᓰᕕᒃ ᑕᕾᕐᓯᕐᑎᑕᒃᓴᕆᕙᓯ ᑕᕝᕙᓂᓗ ᐱᕈᕐᑐᑦ ᑲᑎᕐᓱᖏᓪᓗᒋᑦ, ᐃᓄᐃᓪᓕ ᐊᔪᕐᓴᑐᑦ ᑕᕝᕙᓐᖓᑦ ᐱᕈᕐᑐᓂᒃ ᓂᕆᔪᓐᓇᕐᐳᑦ, ᑖᒃᑯᐊᓗ ᐊᒥᐊᒃᑯᒋᔭᖏᓐᓂᒃ ᐆᒪᔪᑦ ᓄᔪᐊᕐᑐᑦ ᓂᕆᔪᓐᓇᕆᕗᑦ. ᕔᓂᓕᒃᓴᖁᑎᓯᑦᑕᐅᖅ ᓇᐹᕐᑐᓪᓗ ᐅᕐᓱᒃᓴᓖᑦ ᑍᒪᑦᓮᓐᓇᖅ ᐱᓇᓱᐊᕐᕕᒋᔭᒃᓴᕆᕙᓯ.

¹² “ᐅᓪᓗᓂᒃ ᐱᖓᓲᔪᕐᑐᓂᒃ ᓴᓇᔭᒃᓴᑦᓯᓐᓂᒃ ᓴᓇᔪᒃᓴᐅᕗᓯ, ᐅᓪᓗᓪᓕ 7ᖓᓐᓂ ᑕᕾᕐᓯᕐᑐᒃᓴᐅᕗᓯ; ᐆᒪᔪᖁᑎᓯᓗ ᐊᖑᓴᓪᓗᐃᑦ ᓯᐅᑎᖅᑯᕐᑐᔪᓪᓗ ᑕᕾᕐᓯᕐᑐᒃᓴᐅᒋᕗᑦ, ᓯᐊᓛᓯᓗ ᕿᑐᕐᖓᖏᓪᓗ ᓄᓇᑐᖃᒥᓃᖏᑦᑐᓪᓗ, ᑕᕾᕐᓯᕐᑐᐃᓐᓇᐅᔪᒃᓴᐅᕗᑦ.

¹³ “ᑕᒪᒃᑯᐊ ᐃᓕᑦᓯᓐᓄᑦ ᐅᖃᐅᓯᕆᔭᓕᒫᒃᑲ ᓈᓚᒃᓯᒋᒃ; ᐊᓯᓐᓂᒃ ᒎᑎᐅᓂᕅᔪᒃᓴᐅᓐᖏᓚᓯ ᑐᒃᓯᐊᕐᕕᖃᕐᓂᐊᕋᓯᓗ ᑍᒤᑦᑐᓂᒃ, ᐊᑎᖏᓐᓂᒃ ᐊᒡᓛᑦ ᐅᖃᕐᑐᖃᕐᑐᒃᓴᐅᓐᖏᓚᖅ ᖃᓂᑦᓯᒍᑦ.”

ᓇᓪᓕᐅᓐᓂᕐᓯᐅᕐᕖᑦ ᐱᖓᓱᑦ ᐊᖏᓂᕐᐹᑦ

¹⁴ “ᐊᕐᕌᒍᒥ ᐊᑕᐅᓯᕐᒥ ᐱᖓᓱᐃᕐᑐᕐᓗᓯ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐅᕙᓐᓂᒃ ᐅᐱᒍᓲᑎᒃᓴᐅᔪᓂᒃ.

¹⁵ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᓐᓂᕐᓯᐅᕐᑕᒃᓴᕆᕙᓯ; ᑍᒤᖃᑦᑕᖁᓚᐅᕋᑦᓯ, ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᒥᒃ ᓂᕆᔪᒃᓴᐅᕗᓯ ᐅᓪᓗᓂᒃ 7ᓂᒃ ᓇᓪᓕᐅᓐᓂᖓ ᓇᓪᓕᐅᑎᔭᕌᖓᑦ ᑕᖅᑭᒥ ᐊᐱᑎᒥ, ᑕᕝᕙᓂ ᓇᓪᓕᐅᓐᓂᕐᒥ ᐄᑦᔨᑉᑎᒥᑦ ᐊᓂᑎᑕᐅᓚᐅᕋᑦᓯ. ᓇᓪᓕᐊᓐᓂᒡᓘᓐᓃᑦ ᐅᕙᓐᓄᑦ ᑐᒃᓯᐊᕆᐊᕐᑐᖃᕐᑐᒃᓴᐅᓐᖏᓚᖅ ᑐᓂᕐᕈᑎᒃᓴᖃᖏᓪᓗᓂ.

¹⁶ “ᐱᕈᕐᑐᓄᑦ ᑲᑎᕐᓱᐃᕕᖕᒥᒃ ᓇᓪᓕᐅᓐᓂᕐᓯᐅᕐᕕᒃ ᓇᓪᓕᐅᓐᓂᕐᓯᐅᖃᑦᑕᒐᒃᓴᕆᕙᓯ; ᐱᕈᕐᓯᐊᑦᓯᓐᓂᑦ ᓯᕗᓪᓕᕐᐹᒥᒃ ᐱᕈᕐᑐᓂᒃ ᑲᑎᕐᓱᐃᓕᕈᑦᓯ. “ᐅᑭᐊᒃᓵᒃᑯᓪᓗ ᓇᓪᓕᐅᓐᓂᕐᓯᐅᕐᑐᒃᓴᐅᕗᓯ ᐊᕐᕌᒎᑉ ᓄᖑᓕᕐᓂᖓᓂ, ᑲᑎᕐᓱᐃᓕᕈᑦᓯ ᐱᕈᕐᓰᕕᒧᑦ ᑲᓐᖓᕐᓲᑎᒋᓚᕐᑕᑦᓯᓐᓂᑦ.

¹⁷ ᐊᕐᕌᒍᒥ ᐊᑕᐅᓯᕐᒥ ᐱᖓᓱᐃᕐᑐᕐᓗᑎᒃ ᐊᖑᑎᓕᒫᑦ ᑐᒃᓯᐊᕆᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ ᒎᑎᒧᑦ.

¹⁸ “ᐅᕙᓐᓄᑦ ᑐᓂᕐᕈᓯᐅᑎᒋᔭᕕᑦ ᐊᐅᖓᓂᒃ ᑐᓂᓯᓕᕐᑎᓪᓗᑎᑦ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᕐᑐᒥᒃ ᑐᓂᕐᕈᓯᖃᓯᐅᑦᔨᔪᒃᓴᐅᓐᖏᓚᑎᑦ, ᐅᕙᓐᓄᓪᓗ ᓇᓪᓕᐅᓐᓂᕐᓯᐅᕐᓇᐅᑎᓪᓗᒍ ᑐᓂᕐᕈᑕᐅᔫᑉ ᑐᓐᓄᖓᓂᒃ ᐊᒥᐊᒃᑯᑕᖃᕐᑐᒃᓴᐅᓐᖏᓚᖅ ᖃᐅᑎᓪᓗᒍ ᐅᓪᓛᒃᑯᑦ.

¹⁹ “ᐱᕈᕐᓰᕕᖁᑎᕕᑦ ᐱᕈᕐᑎᑕᖏᑕ ᓯᕗᓪᓕᕐᐹᖏᓐᓂᒃ ᑐᓂᓯᔪᒃᓴᐅᕗᑎᑦ ᐊᑕᓂᕐᒧᑦ ᒎᑎᖕᓄᑦ. “ᓰᐱᐅᑉ ᒎᑦᓯᐅᓪᓘᓐᓃᑦ ᓄᕐᕋᖓᓂᒃ ᐆᔪᓕᐅᕐᑐᒃᓴᐅᓐᖏᓚᑎᑦ ᐊᓈᓇᖓᑕ ᐃᒻᒧᖓᓄᑦ.”

ᐊᖏᕈᑕᐅᔪᑦ ᒪᓕᒃᑕᐅᔭᕆᐊᓖᓪᓗ

²⁰ “ᑕᑯᒋᑦ, ᐂᖏᓕᒥᒃ ᑎᓕᓯᕗᖓ ᓯᕗᓂᕐᓄᑦ, ᑖᑦᓱᒧᖓ ᓴᐳᑎᔭᐅᓯᒪᖁᓪᓗᑎᑦ ᐊᖅᑯᑎᖕᓂ ᓄᓇᒧᓪᓗ ᐃᓕᖕᓄᑦ ᐅᐸᓗᖎᕐᓯᒪᔭᓐᓄᑦ ᑎᑭᑦᓱᓐᓇᖁᓪᓗᑎᑦ.

²¹ ᑖᓐᓇ ᑲᒪᒋᑦᓯᐊᕐᓯᐅᒃ ᐅᖃᐅᓯᖓᓗ ᓈᓚᒡᓗᒍ, ᐊᑭᕋᕐᑐᕐᓂᐊᕋᓯᐅᒃ, ᑎᓕᓯᒪᒐᒃᑯ, ᐊᑭᕋᕐᑐᕈᑦᓯᐅᒃ ᐊᔪᕐᑐᓕᓂᓯ ᐃᓱᒪᒋᔪᓐᓁᕐᓂᐊᖏᒻᒪᒋᑦ.

²² ᓈᓚᖕᓂᐊᕈᑦᓯᐅᒡᓕ ᐅᖃᓯᕆᔭᒃᑲᓗ ᑖᑦᓱᒨᓇ ᐱᓇᓱᐊᕈᑎᒋᓂᐊᕈᑦᓯᐅᒃ, ᑕᕝᕙ ᐊᑭᕋᕐᑐᑎᓯ ᐊᑭᕋᕐᑐᕐᑎᒋᓂᐊᕆᕙᒃᑲ ᐅᓇᖕᒥᔨᓯᓗ ᐅᓇᖕᒥᔨᒋᓗᒋᑦ.

²³ ᐂᖏᓕᖁᑎᒐ ᓯᕗᓂᑦᓯᓐᓄᑦ ᑎᓕᓂᐊᕐᐸᕋ, ᑖᑦᓱᒪ ᑕᓯᐅᕐᓂᐊᕐᐹᓯ ᐊᒧᕅᑎᒥᐅᓄᑦ, ᕼᐃᑍᑎᒥᐅᓄᓪᓗ, ᐱᕆᔧᑎᒥᐅᓄᓪᓗ, ᑬᓇᓂᒥᐅᓄᓪᓗ, ᕼᐃᕔᑎᓄᓪᓗ, ᔨᐳᓮᑎᒥᐅᓄᓪᓗ, ᑖᒃᑯᐊᓗ ᓄᖑᑎᓐᓂᐊᕐᐸᒃᑲ.

²⁴ ᑖᒃᑯᐊᓗ ᒎᑎᒋᔭᖏᓐᓄᑦ ᐹᒻᒪᒃᑎᕐᑐᒃᓴᐅᓐᖏᓚᓯ, ᑐᒃᓯᐊᕐᕕᒋᓇᒋᓪᓗ, ᐅᒃᐱᕆᔭᖏᓪᓗ ᒪᓕᖏᓪᓗᒋᑦ, ᐊᑕᖏᓪᓚᕆᒃᑐᒥᒡᓕ ᒎᑎᓐᖑᐊᖁᑎᒋᔭᖏᑦ ᐲᔭᕐᑕᒃᓴᕆᕙᓯ ᓇᐸᔪᖁᑎᒋᔭᖏᓪᓗ ᐅᔭᕅᑦ ᐅᕐᕈᑎᓪᓗᒋᑦ ᓯᖁᒥᑕᒃᓴᕆᕙᓯ.

²⁵ ᐊᑕᓂᖅ ᒎᑎᓯ ᐱᔨᑦᓯᒐᒃᓴᕆᕙᓯ, ᑕᕝᕙ ᓂᕿᒃᓴᓯ ᐃᒥᒃᓴᓯᓗ ᓮᒻᒪᕐᑎᓐᓂᐊᕐᐸᒃᑲ; ᖃᓂᒪᓇᕐᑐᓪᓗ ᐃᓕᑦᓯᓐᓂᑦ ᐲᔭᕐᓂᐊᕐᐸᒃᑲ.

²⁶ ᓄᓇᖕᓂ ᐊᕐᓁᑦ ᑕᒪᐅᓁᓐᓇᖅ ᐃᕐᓂᔪᖃᕐᓂᐊᓐᖏᓚᑦ, ᕿᑐᕐᖏᓱᐃᑦᑐᕐᑕᖃᕐᓂᐊᕋᓂᓗ, ᐊᑯᓂᓗ ᐃᓅᑯᑖᒃᑎᓐᓂᐊᕐᐸᑦᓯ.

²⁷ “ᐊᑭᕋᕐᑐᕐᑎᓯ ᐅᕙᓐᓂᒃ ᑲᑉᐱᐊᓱᓕᕐᑎᓐᓂᐊᕐᐸᒃᑲ, ᐅᓇᑕᖃᑎᒋᔭᓕᒫᓯᓗ ᓇᓗᓕᕐᓇᕐᑐᒧᑦ ᑎᑭᑕᐅᑎᓐᓂᐊᕐᐸᒃᑲ, ᐊᑭᕋᕐᑐᕐᑎᓯᓗ ᐃᓕᑦᓯᓐᓂᑦ ᕿᒫᑎᓪᓗᒋᑦ.

²⁸ ᐅᐃᒻᒪᖕᓇᕐᑐᐊᓗᖕᒧᑦ ᓇᓗᓕᕐᓇᕐᑐᒧᓪᓗ ᑎᑭᑕᐅᑎᓐᓂᐊᕐᐸᒃᑲ, ᑕᒪᑐᒧᖓᓗ ᕼᐃᕔᑎᒥᐅᑦ ᓄᓇᒥᖕᓂᑦ ᐊᐅᓪᓚᕐᑎᑕᐅᓂᐊᕐᐳᑦ, ᑬᓇᓂᒥᐅᓪᓗ, ᕼᐃᑍᑎᒥᐅᓪᓗ, ᕿᒪᒃᓯᓗᑎᒃ ᐃᓕᑦᓯᓐᓂᒃ.

²⁹ ᐃᓕᑦᓯᓐᓂᓪᓕ ᐊᐅᓪᓚᕐᑎᓐᓂᐊᓐᖏᓚᒃᑲ ᐊᕐᕌᒍᒥ ᐊᑕᐅᓯᕐᒥ, ᓄᓇ ᑕᒪᓐᓇ ᓇᔪᕐᑕᖓ ᐃᓄᖃᕈᓐᓃᕈᓂ ᐆᒪᔪᖃᓗᐊᓕᖁᓇᒍ ᓄᔪᐊᕐᑐᓂᒃ ᐃᓕᑦᓯᓐᓄᑦ ᐊᒡᕕᐊᕋᔭᕐᑐᓂᒃ.

³⁰ ᓱᒃᑬᑦᑐᒥᒃ ᐱᕙᓪᓕᐊᒐᓛᐱᒡᓗᑎᒃ ᐊᐅᓪᓚᕐᑎᑉᐸᓪᓕᐊᓂᐊᕐᐸᒃᑲ ᐃᓕᑦᓯᓐᓂᑦ, ᐃᓕᑦᓯᓗ ᐅᓄᕐᓯᕙᓪᓕᐊᓂᓯ ᒪᓕᒡᓗᒍ ᓄᓇᑖᕈᓐᓇᕐᓯᕙᓪᓕᐊᖁᓪᓗᓯ.

³¹ ᓄᓇᒋᓂᐊᕐᑕᑦᓯᓗ ᑭᒡᓕᖃᕐᑎᓐᓂᐊᕐᐸᕋ ᐃᒪᕐᒥᑦ ᐊᐅᐸᓗᒃᑕᒥᑦ ᐱᒋᐊᕐᓗᒍ ᐱᓕᔅᑍᓂᐅᑉ ᐃᒪᖓᓄᑦ ᑎᑭᓪᓗᒍ, ᐃᓄᖃᖏᑦᑐᒥᓪᓗ ᐱᒋᐊᕐᓗᒍ ᐃᕗᕅᑎᐅᑉ ᑰᖓᓄᑦ ᑎᑭᓪᓗᒍ; ᑕᒫᓂᓗ ᓄᓇᖃᕐᑐᑦ ᐃᓕᑦᓯᓐᓄᑦ ᑐᓂᓂᐊᕐᐸᒃᑲ, ᐃᓕᑦᓯᓪᓗ ᑕᒫᓐᖓᑦ ᓄᓇᒥᑦ ᐊᓂᑎᓐᓂᐊᕐᐸᓯ.

³² ᑖᒃᑯᓂᖓ ᓱᓇᑐᐃᓐᓇᕐᒧᑦ ᐊᖏᖃᑎᒌᒍᑎᖃᕆᐊᖃᓐᖏᓚᓯ ᐅᕝᕙᓗ ᒎᑎᖏᓐᓄᑦ.

³³ ᓄᓇᒋᔭᑦᓯᓐᓂ ᓄᓇᖅᑲᑎᒋᔭᒃᓴᕆᓐᖏᓚᓯ, ᑖᒃᑯᓇᓐᖓᑦ ᐊᔪᕐᑐᓕᑎᑕᐅᖁᓇᓯ ᐅᕙᓐᓄᑦ; ᒎᑎᓐᖑᐊᖏᓐᓂᒃ ᑐᒃᓯᐊᕐᕕᖃᓕᕈᑦᓯ, ᑕᒪᓐᓇ ᖁᓚᕐᓇᒋᑦᓯᐊᕐᑐᒥᒃ ᐃᓕᑦᓯᓐᓄᑦ ᓂᒐᕐᑎᑦᓯᔪᑎᑎᑐᑦ ᑍᒤᓐᓂᐊᕐᐳᖅ.”