ᒨᓯᓯ ᐂᑉᐸᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔭᑦ ᐊᑭᓖᔭᕆᐊᖃᕐᓂᕐᒧᑦ

¹ “ᐃᓄᒃ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᓰᐱᒥᒡᓘᓐᓃᑦ ᑎᒡᓕᒃᐸᑦ, ᑎᒡᓕᒑᓂᓗ ᑐᖁᑉᐸᒍ ᐅᕝᕙᓗ ᓂᐅᕐᕈᑎᒋᒃᐸᒍ, ᑕᕝᕙ ᐊᑭᓖᔭᕆᐊᖃᕋᔭᕐᐳᖅ ᐊᖑᓴᓪᓗᕐᓂᒃ ᑕᓪᓕᒪᓂᒃ ᐊᖑᓴᓪᓗᕐᒧᑦ ᐊᑕᐅᓯᕐᒧᑦ, ᓰᐱᓂᒡᓗ ᓯᑕᒪᓂᒃ ᓰᐱᒧᑦ ᐊᑕᐅᓯᕐᒧᑦ. ᑎᒡᓕᒑᕕᓂᕐᒥᓂᒃ ᐊᑭᓖᔭᕆᐊᖃᕐᐳᖅ; ᐊᑭᓕᐅᑎᒃᓴᖃᖏᑉᐸᓪᓕ, ᑕᕝᕙ ᓂᐅᕐᕈᑎᒋᔭᐅᒐᔭᕐᐳᖅ ᓯᐊᓛᕐᑕᕆᔭᐅᓗᓂ ᑎᒡᓕᖕᓂᕕᓂᕐᒥᓄᑦ.

² ᐆᒪᔪᖅ ᑎᒡᓕᒑᕕᓂᖅ ᐆᒪᑎᓪᓗᒍ ᓇᓂᔭᐅᒃᐸᑦ ᑎᒡᓕᒃᑐᕕᓂᐅᑉ ᐱᖁᑎᖏᓐᓂᑦ, ᐃᒻᒧᒃᓯᐅᒐᐅᑉ ᐊᖑᓴᓪᓗᕆᒃᐸᒍ ᐅᕝᕙᓗ ᓯᐅᑎᖅᑯᕐᑐᔫᒃᐸᑦ ᐅᕝᕙᓗ ᓰᐱᐅᒃᐸᑦ, ᑕᕝᕙ ᐊᑭᓖᔭᕆᐊᖃᕋᔭᕐᐳᖅ ᑎᒡᓕᒃᑕᕕᓂᖏᑕ ᒪᕐᕈᕕᓪᓗᐊᕐᑕᖏᓐᓂᒃ.

³ “ᑎᒡᓕᒐᓱᒃᑐᖅ ᐊᖑᔭᐅᒃᐸᑦ ᐃᓵᕋᓱᐊᓕᕐᑎᓪᓗᒍ ᐅᓐᓄᒃᑯᑦ, ᐱᒋᐊᕐᑕᐅᓗᓂᓗ ᑐᖁᑕᐅᒃᐸᑦ, ᑖᓐᓇ ᑐᖁᑦᓯᔪᖅ ᐸᓯᔭᒃᓴᐅᒐᔭᓐᖏᓚᖅ ᑐᖁᑦᓯᓂᕐᒥᓄᑦ.

⁴ ᑭᓯᐊᓂᓕ ᐅᓪᓗᒃᑯᑦ ᑎᒡᓕᒐᓱᐊᕐᑐᒥᒃ ᑍᒫᒃ ᑐᖁᑕᐅᔪᖃᕐᐸᑦ, ᑕᕝᕙ ᑐᖁᑦᓯᔪᖅ ᐸᓯᔭᒃᓴᐅᓕᕋᔭᕐᐳᖅ.

⁵ “ᐊᖑᓪᓕ ᐆᒪᔪᖁᑎᒥᓂᒃ ᐃᓱᒪᕐᓱᕐᑎᑦᓯᓗᓂ ᐱᕈᕐᓰᕕᖕᒥ ᐅᕝᕙᓗ ᕔᓂᒃᓴᓕᐅᕐᕕᖕᒥ ᑖᒃᑯᐊᓗ ᐆᒪᔪᖁᑎᖏᑦ ᐃᓅᑉ ᐊᓯᐊᓄᑦ ᐱᕈᕐᓰᕕᖁᑎᒋᔭᐅᔪᒥᑦ ᓂᕆᒃᐸᑕ, ᑕᕝᕙ ᑖᓐᓇ ᐆᒪᔪᖁᑎᓕᒃ ᐊᑭᓖᔭᕆᐊᖃᕋᔭᕐᐳᖅ ᐱᕈᕐᓰᕕᖁᑎᓕᖕᒧᑦ ᐱᕈᕐᓰᕕᖁᑎᖓᑕ ᐱᐅᓂᕐᐹᕆᔭᖓᓂᑦ ᐅᕝᕙᓗ ᕔᓂᒃᓴᓂᒃ ᐱᕈᕐᓰᕕᖁᑎᒋᔭᒥᓂᑦ.

⁶ “ᐊᖑᓪᓕ ᐱᕈᕐᓰᕕᖁᑎᒥᓂ ᐃᑯᐊᓚᑦᓯᓗᓂ ᑕᒪᓐᓇ ᐃᑯᐊᓚᑎᑕᖓ ᓯᐊᒻᒪᕐᐸᑦ ᐅᕐᐱᒐᕐᑎᒍᑦ ᐊᖑᑎᐅᑉ ᐊᓯᐊᑕ ᐱᕈᕐᓰᕕᖁᑎᖓᓄᑦ; ᓂᐊᖂᔭᒃᓮᓪᓗ ᓇᑲᑎᕐᑕᐅᓯᒪᔪᑦ ᑲᑎᑕᐅᓯᒪᓕᕐᑐᓪᓗ ᓇᑉᐸᕐᑎᑕᐅᓯᒪᔪᑦ ᐃᑯᐊᓪᓚᒃᐸᑕ, ᑕᕝᕙ ᐱᕈᕐᓰᕕᖁᑎᒥᓂ ᐃᑯᐊᓪᓔᓚᐅᕐᑐᖅ ᐊᑭᓖᔭᕆᐊᖃᓕᕋᔭᕐᐳᖅ ᐊᑭᓕᕆᐊᖃᕐᑕᒥᓂᒃ.

⁷ “ᐃᓄᒡᓕ ᑮᓇᐅᔭᒥᓂᒃ ᐱᖁᑎᒥᓂᒡᓘᓐᓃᑦ ᐃᓅᖃᑎᒥᓄᑦ ᐱᓯᒪᔭᐅᖁᔨᒃᐸᑦ ᑲᒪᒋᔭᐅᖁᓗᓂᒋᓪᓘᓐᓃᑦ, ᑖᒃᑯᐊᓗ ᑲᒪᒋᔭᐅᖁᔭᖏᖅ ᑎᒡᓕᒐᐅᓐᓂᕐᐸᑕ ᐱᓯᒪᒃᓯᕐᑑᑉ ᐃᒡᓗᖓᓂᑦ, ᑎᒡᓕᒃᑐᕕᓂᕐᓗ ᖃᐅᔨᔭᐅᒃᐸᑦ, ᑖᓐᓇ ᑎᒡᓕᒃᑐᕕᓂᖅ ᐊᑭᓖᔭᕆᐊᖃᓕᕋᔭᕐᐳᖅ ᒪᕐᕈᕕᓪᓗᐊᕐᑐᓂᒃ.

⁸ ᑎᒡᓕᒃᑐᕕᓂᕐᓕ ᖃᐅᔨᔭᐅᖏᑉᐸᑦ, ᑕᕝᕙ ᐊᖏᕐᕋᓕᒃ ᐱᖁᑎᓂᒃ ᐱᓯᒪᑎᑕᐅᔪᕕᓂᖅ ᒎᑎᒧᑦ ᐂᑎᑕᐅᔪᒃᓴᐅᕗᖅ, ᑕᕝᕙᓂ ᓇᓗᓁᕐᓯᖁᓪᓗᒍ ᓱᓕᓪᓗᓂ ᐱᓯᒪᔭᒥᓂᒃ ᑎᒡᓕᓚᐅᖏᓐᓂᕐᒥᓂᒃ.

⁹ “ᑲᒪᑎᑕᐅᒍᑎᒥᓂᒡᓕ ᑲᒪᑦᓯᐊᖏᓐᓂᕅᔪᖃᕐᓗᓂ ᐂᕙᐅᑎᔪᖃᓕᕐᐸᑦ, ᓇᓪᓕᐊᓐᓄᑐᐃᓐᓇᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓄᑦ, ᐅᕝᕙᓗ ᓯᐅᑎᖅᑯᕐᑐᔪᒧᑦ, ᐅᕝᕙᓗ ᓰᐱᒧᑦ, ᐅᕝᕙᓗ ᐊᓐᓄᕌᓄᑦ, ᐅᕝᕙᓗ ᓱᓇᑐᐃᓐᓇᕐᒧᑦ ᐊᓯᐅᔨᔭᐅᓯᒪᔪᒧᑦ, ᐃᓅᒃ ᒪᕐᕉᒃ ᐊᑐᓂᑦ ᐱᖃᕐᑐᐃᓐᓇᐅᓂᕋᕐᐸᑎᒃ ᑕᕝᕙ ᑖᒃᑯᐊᒃ ᒎᑎᒧᑦ ᐱᑎᑕᐅᔪᒃᓴᐅᕘᒃ. ᑕᕝᕙᓂᓗ ᒎᑎᐅᑉ ᐊᖑᑦ ᐸᓯᔭᒃᓴᐅᓂᕋᕐᑕᖓ ᑖᓐᓇ ᐊᑭᓖᔪᒃᓴᐅᕗᖅ ᒪᕐᕈᕕᓪᓗᐊᕐᑐᓂᒃ ᐂᕙᖃᑎᒋᓚᐅᕐᑕᒥᓄᑦ.

¹⁰ “ᐊᖑᓪᓕ ᐃᓅᖃᑎᒥᓄᑦ ᐱᖁᑎᒥᓂᒃ ᐰᕆᔭᐅᖁᔨᓗᓂ ᑐᓂᓯᒃᐸᑦ ᓯᐅᑎᖅᑯᕐᑐᔪᒥᒃ ᐃᒻᒧᒃᓯᐅᒐᐅᓪᓘᓐᓃᑦ ᐊᖑᓴᓪᓗᖓᓂᒃ ᓰᐱᒥᒡᓘᓐᓃᑦ ᐆᒪᔪᑦ ᓇᓪᓕᐊᓐᓂᑐᐃᓐᓇᖅ, ᑖᓐᓇᓗ ᑲᒪᒋᔭᐅᖁᔭᖓ ᑐᖁᒃᐸᑦ ᐋᓐᓂᕐᐸᓪᓘᓐᓃᑦ ᐊᐅᓚᕈᑦᔭᐅᓐᓂᕐᐸᓪᓘᓐᓃᑦ, ᑭᓇᒧᑦ ᐱᔭᐅᖕᒪᖔᑦ ᑕᑯᔭᐅᓚᐅᖏᓪᓗᓂ,

¹¹ ᑕᕝᕙ ᐊᖑᑦ ᐰᕆᒃᓯᓚᐅᕐᑐᖅ ᑐᒃᓯᐊᕐᕕᖕᒧᐊᕐᓗᓂ ᐊᑕᓂᐅᑉ ᓵᖓᓂ ᓱᓕᓪᓚᕆᖕᓂᕐᒥᓂᒃ ᓇᓗᓁᕐᓯᔭᕆᐊᖃᕋᔭᕐᐳᖅ ᑎᒡᓕᓚᐅᖏᓐᓂᕐᒥᓂᒃ; ᑕᒪᓐᓇᓗ ᑖᑦᓱᒪ ᐱᖁᑎᓕᐅᑉ ᐊᖏᕆᐊᖃᕋᔭᕐᐹ, ᑖᓐᓇᓗ ᐊᖑᑦ ᐱᓯᒪᒃᓯᓚᐅᕐᑐᖅ ᐊᑭᓖᔭᕆᐊᖃᕋᔭᓐᖏᓚᖅ ᑖᑦᓱᒧᖓ ᐱᖁᑎᓕᖕᒧᑦ.

¹² ᑭᓯᐊᓂᓕ ᐱᓯᒪᒃᓯᔪᖅ ᑎᒡᓕᒐᐅᔨᐊᖃᕐᓂᕐᐸᑦ, ᑕᕝᕙ ᐱᖁᑎᓕᖕᒧᑦ ᐊᑭᓖᔭᕆᐊᖃᓕᕋᔭᕐᐳᖅ.

¹³ ᐆᒪᔪᒧᓪᓕ ᐅᒋᐊᕐᑕᐅᓐᓂᕐᐸᑦ, ᑕᕝᕙ ᑐᖁᑕᐅᓯᒪᖕᓂᖓᓂᒃ ᓇᓗᓁᕐᓯᔭᕆᐊᖃᕋᔭᕐᐳᖅ; ᐊᖑᓪᓗ ᐱᓯᒪᒃᓯᓚᐅᕐᑐᖅ ᐆᒪᔪᖁᑎᓕᖕᒧᑦ ᐊᑭᓖᔭᕆᐊᖃᕋᔭᓐᖏᓚᖅ.

¹⁴ “ᐊᖑᓪᓕ ᐃᓅᖃᑎᖓᑕ ᐆᒪᔪᖁᑎᖓᓂᒃ ᐊᑦᑕᑐᕐᐸᑦ, ᑖᓐᓇᓗ ᐊᑦᑕᑐᕐᑕᖓ ᐋᓐᓂᕐᐸᑦ ᑐᖁᒃᐸᓪᓘᓐᓃᑦ, ᐆᒪᔪᖁᑎᓕᒃ ᓇᔫᑎᑎᓐᓇᒍ, ᑕᕝᕙ ᐊᑦᑕᑐᕐᑐᖅ ᐊᑭᓖᔭᕆᖃᕐᐳᖅ ᐃᓘᓐᓇᖓᓂᒃ ᐊᑦᑕᑐᕐᕕᒋᓚᐅᕐᑕᒥᓄᑦ.

¹⁵ ᑭᓯᐊᓂᓕ ᐆᒪᔪᖁᑎᓕᒃ ᓇᔫᑎᑎᓪᓗᒍ ᑍᒤᓕᔪᖃᕐᐸᑦ, ᑕᕝᕙ ᐊᖑᑦ ᐊᑦᑕᑐᕐᑐᖅ ᐊᑭᓖᔭᕆᐊᖃᕋᔭᓐᖏᓚᖅ. ᐊᑦᑕᑐᕐᑕᐅᓗᓂ ᑍᒤᓕᒃᐸᑦ ᐊᑦᑕᑐᕐᑕᐅᓂᖓᓄᑦ ᐊᑭᓕᐅᑎᔪᓄᑦ ᑕᒪᓐᓇ ᐃᓚᓕᐅᑎᑐᐃᓐᓇᕋᔭᕐᐳᖅ.”

ᐃᓅᓯᕐᒧᑦ ᐅᒃᐱᕐᓂᕐᒧᓪᓗ ᐱᖁᔧᑦ

¹⁶ “ᐊᖑᓪᓕ ᑲᔪᖏᕐᓮᓗᓂ ᐊᕐᓇᒥᒃ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᒥᒃ ᐃᓇᖓᖃᑎᒋᒃᐸᒍ, ᐊᖑᒻᒥᒃ ᐅᐃᒃᓴᖃᕐᓂᕐᒧᑦ ᐊᖏᖃᑎᖃᕐᓯᒪᖏᑦᑐᒥᒃ, ᑕᕝᕙ ᓄᓕᐊᕐᑖᕈᒪᒃᔪᑎᒥᓂᒃ ᐊᖓᔪᖅᑳᖏᓐᓄᑦ ᐊᑭᓖᓗᓂ, ᐊᕐᓇᖅ ᓄᓕᐊᕐᑖᕆᔭᒃᓴᕆᕚ.

¹⁷ ᑭᓯᐊᓂᓕ ᐊᑖᑕᖓᑕ ᐊᖑᒻᒧᑦ ᑖᑦᓱᒧᖓ ᓄᓕᐊᕐᑖᕆᔭᐅᖁᖏᑉᐸᒍ, ᑕᕝᕙ ᓄᓕᐊᕐᑖᕋᓱᐊᕐᑐᑎᑐᑦ ᐊᑭᓖᔪᒃᓴᐅᕗᖅ ᐊᑖᑕᖓᓄᑦ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᒥᒃ ᐱᖃᑎᖃᕐᓂᕐᒥᓄᑦ ᐊᑭᓖᑦᔪᑎᖃᕐᓗᓂ.

¹⁸ “ᐊᖓᒃᑰᓇᓱᐊᕐᑐᓂᒃ ᐊᕐᓇᓂᒃ ᐃᓅᑎᑦᓯᔪᒃᓴᐅᓐᖏᓚᓯ.

¹⁹ “ᐊᖑᑎᑦ ᓇᓪᓕᐊᓐᓂᒃ ᐆᒪᔪᒥᒃ ᓄᓕᐊᕐᑐᖃᕐᐸᑦ ᑖᓐᓇ ᐊᖑᑦ ᑐᖁᑕᐅᔪᒃᓴᐅᕗᖅ.

²⁰ “ᓇᓪᓕᐊᑦ ᐊᑕᓂᐅᑉ ᐊᓯᐊᓄᑦ, ᒎᑎᒋᔭᐅᔪᓄᑦ ᑐᓂᕐᕈᑎᒃᓴᒥᒃ ᑐᓂᕐᕈᓯᕐᑐᖅ, ᑖᓐᓇ ᑐᖁᑕᐅᓪᓚᕆᒋᒋᐊᖃᕐᐳᖅ.

²¹ “ᓂᐅᕐᕈᐊᒥᒃ ᐱᑦᓯᐊᖏᑦᑐᒃᓴᐅᓐᖏᓚᓯ ᐅᑯᒤᒃᓴᕐᑎᑦᓯᓇᓯᓗ; ᐃᓕᑦᓯᑦᑕᐅᖅ ᓂᐅᕐᕈᐊᖑᓚᐅᕐᒥᒐᑦᓯ ᐄᑦᔨᑉᑎᒥ.

²² “ᐅᐃᒡᒐᕐᓂᕐᒥᒃ ᐃᓕᐊᕐᔪᖕᒥᒡᓘᓐᓃᑦ ᓱᓇᐅᓐᖏᑎᑦᓯᔪᒃᓴᐅᓐᖏᓚᓯ.

²³ ᑍᒤᑦᑐᓂᒃ ᓱᓇᐅᓐᖏᑎᑦᓯᓗᐊᑐᐊᕈᑦᓯ, ᐅᕙᓐᓄᓪᓗ ᐃᑲᔪᕐᑕᐅᔪᒪᓗᑎᒃ ᓂᓪᓕᐊᓕᕐᐸᑕ, ᑕᕝᕙ ᖁᓚᕐᓇᖏᑦᑐᒥᒃ ᓂᓪᓕᐊᓂᖏᑦ ᑐᓴᕋᔭᕐᐸᒃᑲ.

²⁴ ᓂᓐᖓᖕᓂᕋᓗ ᐃᑯᐊᓪᓚᓕᕐᑐᑎᑐᑦ ᑍᒤᒐᔭᕐᐳᖅ, ᐅᓇᑕᕐᑐᓂᓗ ᑐᖁᑕᐅᑎᒐᔭᕐᐸᑦᓯ, ᓄᓕᐊᓯᓗ ᐅᐃᒡᒐᕐᓂᓐᖑᕐᓗᑎᒃ ᕿᑐᕐᖓᓯᓗ ᐊᑖᑕᖃᕈᓐᓃᕐᓗᑎᒃ.

²⁵ “ᐃᓄᖁᑎᒪ ᓇᓪᓕᐊᓐᓄᑦ ᐊᔪᕐᓴᕐᑐᒧᑦ ᑮᓇᐅᔭᒥᒃ ᐊᑐᕐᑕᐅᑎᑦᓯᒍᑦᓯ, ᐊᑐᕐᑐᐊᕐᕕᓪᓚᕆᒃᑎᑐᑦ ᐱᓇᓱᐊᕐᑐᒃᓴᐅᓐᖏᓚᓯ, ᐊᑐᕐᑕᐅᔪᕕᓃᓪᓗ ᕿᑐᕐᖏᐅᕐᑎᑕᒃᓴᕆᓐᖏᓚᓯ.

²⁶ ᐃᓅᖃᑎᕕᑦ ᐊᓐᓄᕌᑐᐊᖓᓂᒃ ᐊᕐᓵᕐᓯᒍᑦᓯ ᐊᑭᓕᕐᑕᐅᔪᒪᓂᑦᓯᓐᓄᑦ ᐱᑦᔪᑎᖃᕐᓗᓯ, ᑕᕝᕙ ᐅᑎᕐᑎᑕᒃᓴᕆᕙᓯ ᓯᕿᓂᖅ ᓂᐱᓚᐅᕐᑎᓐᓇᒍ;

²⁷ ᑖᑦᓱᒪ ᐊᓐᓄᕌᑐᐊᕆᒐᒥᐅᒃ ᐅᖅᑰᑦᔪᑎᒃᓴᑐᐊᕆᖕᒪᒍ, ᓯᓂᒐᓱᐊᓕᕈᓂᓕ ᓱᓇᒥᒃ ᕿᐱᒃᓴᖃᓕᕋᔭᕐᐹ? ᐅᕙᓐᓄᑦ ᐃᑲᔪᕐᑕᐅᔪᒪᓗᓂ ᓂᓪᓕᐊᓕᕐᐸᑦ, ᑕᕝᕙ ᑐᓴᕋᔭᕐᐸᕋ, ᓂᑲᒍᓱᒃᑑᒐᒪ.

²⁸ “ᒎᑎᒥᒃ ᐅᖃᕐᓂᕐᓘᑎᖃᕐᑐᒃᓴᐅᓐᖏᓚᓯ, ᐃᓅᖃᑎᑦᓯᓐᓄᓪᓗ ᐊᖓᔪᖅᑳᖑᔪᒥᒃ ᓯᕗᓂᕐᓗᖁᔨᔪᒃᓴᐅᓐᖏᓚᓯ.

²⁹ “ᐱᕈᕐᑐᕕᓂᕐᓂᑦ ᑲᑎᕐᓱᐃᓕᕈᑦᓯ ᓯᕗᓪᓕᕐᐹᒥᒃ ᑲᑎᕐᓱᕐᑕᕕᓂᑦᓯ ᐱᐅᓂᕐᐹᖏᓐᓂᒃ ᑐᓂᕐᕈᓯᕐᓇᓵᕐᑐᒃᓴᐅᓐᖏᓚᓯ ᓇᓪᓕᐊᓐᓂᑐᐃᓐᓇᖅ ᐱᕈᕐᑐᕕᓂᕐᓂᑦ. “ᐃᕐᓂᐊᖑᖅᑳᕐᑐᑦ ᐃᕐᓂᓯ ᐅᕙᓐᓄᑦ ᑐᓂᔭᒃᓴᕆᕙᓯ.

³⁰ ᑍᒫᑦᓮᓐᓇᕐᑕᐅᖅ ᐱᔪᒃᓴᐅᕗᓯ ᐃᒻᒧᒃᓯᐅᒐᐅᑉ ᐊᖑᓴᓪᓗᖏᓐᓂᒃ ᓰᐱᖁᑎᑦᓯᓐᓂᒡᓗ: ᐊᖑᑎᑦ ᐃᕐᓂᐊᖑᖅᑳᕐᑐᑦ ᐅᓪᓗᓂᒃ 7ᓂᒃ ᐊᓈᓇᒥᓂᑦ ᐊᒫᒪᒃᑐᒃᓴᐅᕗᑦ; ᐅᓪᓗᓪᓕ 8ᖓᓐᓂ ᐅᕙᓐᓄᑦ ᑐᓂᔭᒃᓴᕆᕙᓯ.

³¹ “ᐅᕙᖓ ᐃᓄᖁᑎᒋᒐᑦᓯ ᐃᑦᔪᕐᓁᑦᑐᒃᓴᐅᕗᓯ, ᑍᒤᒻᒪᑦ ᐱᕈᕐᓰᕕᖕᒥ ᐆᒪᔪᓄᑦ ᓄᔪᐊᕐᑐᓄᑦ ᐅᒋᐊᕐᑕᐅᔪᕕᓂᕐᓂᒃ ᐆᒪᔪᓂᒃ ᓂᕆᔪᒃᓴᐅᓐᖏᓚᓯ; ᑍᒤᑦᑐᓪᓕ ᕿᒻᒥᓄᑦ ᑐᓂᔭᒃᓴᕆᕙᓯ.”