ᒨᓯᓯ ᐂᑉᐸᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᐊᓛᕆᔭᐅᔪᑦ ᐱᓂᐊᕐᕕᐅᓂᖏᑦ

¹ “ᐅᑯᐊ ᑕᕝᕙ ᐃᓴᕆᐊᓕᒥᐅᓄᑦ ᒪᓕᒃᑕᐅᔪᒃᓴᐅᔪᑦ ᐅᖃᐅᓯᕆᔭᒃᓴᕆᕙᑎᑦ ᑖᒃᑯᓄᖓ.

² ᐄᑉᕉᒥᐅᑕᒥᒃ ᓂᐅᕕᐊᕆᓗᒍ ᓯᐊᓛᕐᑖᕈᕕᑦ, ᑖᑦᓱᒪ ᐱᔨᑦᓯᕐᑕᒃᓴᕆᕚᑎᑦ ᐊᕐᕌᒍᓂᒃ ᐱᖓᓲᔪᕐᑐᓂᒃ, ᐊᕐᕌᒍᓪᓕ 7ᖓᓐᓂ ᓯᐊᓛᖑᔪᓐᓃᕐᑐᒃᓴᐅᕗᖅ, ᐊᑭᓕᕐᑕᐅᓂᒃᑰᖏᓪᓗᓂ.

³ ᐂᑉᐸᖃᖏᓪᓗᓂ ᐱᒋᐊᓚᐅᕈᓂ, ᐊᐅᓪᓚᕆᐊᖃᕋᔭᕆᕗᖅ ᐂᑉᐸᖃᖏᓪᓗᓂ; ᓄᓕᐊᖃᕐᓗᓂᓕ ᐱᒋᐊᕐᓯᒪᒃᐸᑦ, ᑕᕝᕙ ᓄᓕᐊᖓᑕ ᐊᐅᓪᓚᖃᑎᒋᔭᒃᓴᕆᕚ.

⁴ ᐊᖓᔪᖅᑳᖓᑕᓕ ᓄᓕᐊᓂᒃᑎᓯᒪᒃᐸᒍ ᓯᐊᓛᕆᓕᕐᓗᓂᐅᒃ ᑖᑦᓱᒨᓇᓗ ᕿᑐᕐᖓᕐᑖᕐᓯᒪᒃᐸᑦ ᐊᖑᒻᒥᒃ ᐊᕐᓇᒥᒡᓘᓐᓃᑦ, ᑕᕝᕙ ᑖᓐᓇ ᓄᓕᐊᖓ ᕿᑐᕐᖓᖏᓪᓗ ᐊᖓᔪᖅᑳᖓᑕ ᐱᒋᒐᔭᕐᐰᑦ, ᓯᐊᓛᖑᔪᖅ ᐊᐅᓪᓚᓕᕈᓂ ᑖᒃᑯᐊᓕᒫᑦ ᕿᒪᒡᓗᒋᑦ ᐊᐅᓪᓚᕐᑐᒃᓴᐅᕗᖅ.

⁵ ᓯᐊᓛᖑᔪᕐᓕ ᐅᖃᕐᐸᑦ ‘ᐊᖓᔪᖅᑳᕋ ᐅᖓᓕᕋᒃᑯ, ᓄᓕᐊᕋᓗ, ᕿᑐᕐᖓᒃᑲᓗ; ᐊᐅᓪᓚᕐᑎᑕᐅᔪᒪᔪᓐᓃᕐᐳᖓ ᓯᐊᓛᖑᔪᓐᓃᕐᓂᒃᑯᑦ.’

⁶ ᑕᕝᕙ ᐊᖓᔪᖅᑳᖓᑕ ᒎᑎᒧᑦ ᐂᑎᑕᒃᓴᕆᕚ, ᐃᑎᕐᑕᕐᕕᐊᓂᓗ ᓇᖏᕐᑎᓪᓗᓂᐅᒃ ᐅᕝᕙᓗ ᐃᑎᕐᑕᕐᕕᐊᑕ ᓇᐸᔪᖓᑕ ᓴᓂᐊᓂ; ᑕᕝᕙᓂᓗ ᐊᖓᔪᖅᑳᖓᑕ ᑖᓐᓇ ᓯᐊᓛᓂ ᓯᐅᑎᖓᒍᑦ ᐳᑐᔭᒃᓴᕆᕚ ᐳᑐᓯᑦᔪᑎᒧᑦ; ᑕᕝᕙᓗ ᐃᓅᓯᓕᒫᒥᓂ ᓯᐊᓛᖑᓕᕋᔭᕐᐳᖅ ᑖᑦᓱᒧᖓ.

⁷ “ᐊᖑᓪᓕ ᐸᓂᖕᒥᓂᒃ ᓂᐅᕐᕈᑎᖃᕐᐸᑦ ᓯᐊᓛᖑᓂᕐᒧᑦ, ᑖᓐᓇ ᐊᖑᑎᑎᑐᑦ ᓯᐊᓛᑎᑐᑦ ᐊᓂᑎᑕᐅᔭᕆᐊᖃᕋᔭᓐᖏᓚᖅ.

⁸ ᓂᐅᕐᕈᑎᒋᔭᐅᓯᒪᒃᐸᓪᓕ ᓂᐅᕕᕐᑐᒧᑦ ᓄᓕᐊᕐᑖᕆᔭᐅᓂᐊᕐᓗᓂ, ᑖᑦᓱᒪᓗ ᐊᖑᑎᐅᑉ ᓈᒻᒪᒋᖏᒃᑯᓂᐅᒃ, ᑕᕝᕙ ᐊᑖᑕᖓᓄᑦ ᐅᑎᕐᑎᒋᐊᖃᕐᐹ ᐊᑭᓕᕐᑕᐅᑎᓪᓗᒍ; ᓂᐅᕕᕐᓯᒪᔪᕐᓕ ᑖᑦᓱᒥᖓ ᐊᕐᓇᒥᒃ ᓂᐅᕐᕈᑎᖃᕆᐊᖃᓐᖏᓚᖅ ᓄᓇᖃᑎᑐᖃᕆᓐᖏᑕᒥᓄᑦ, ᑖᑦᓱᒪ ᐊᖑᑎᐅᑉ ᓇᕐᕈᒋᓯᒪᖕᒪᒍ.

⁹ ᐊᖑᓪᓕ ᐊᕐᓇᒥᒃ ᓯᐊᓛᒃᓴᒥᒃ ᓂᐅᕕᕐᓯᒪᒍᓂ ᐃᕐᓂᕐᒥᓄᑦ ᑐᓂᔪᒪᓗᒍ, ᑕᕝᕙ ᐸᓂᖕᒥᑐᑦ ᐱᓂᐊᕐᕕᒋᔭᒃᓴᕆᕚ.

¹⁰ ᐊᖑᓪᓕ ᓄᓕᐊᓂᒃᑲᓐᓂᕈᓂ, ᓄᓕᐊᕆᖅᑳᕐᓯᒪᔭᓂ ᓱᓕ ᑲᒪᒋᑦᓯᐊᕆᐊᖃᕐᐹ ᓂᕿᒃᓴᑎᒍᑦ ᐊᓐᓄᕌᒃᓴᑎᒍᓪᓗ, ᓄᓕᐊᕆᔭᐅᔫᓪᓗ ᑲᒪᒋᔭᐅᑦᔪᑎᒋᔭᕆᐊᖃᕐᑕᖏᑎᒍᑦ ᓱᓕ ᑕᒤᑎᒍᑦ ᑲᒪᒋᑦᓯᐊᕐᓗᓂᐅᒃ.

¹¹ ᑕᒪᒃᑯᓂᖓᓕ ᑲᒪᒋᔭᕆᐊᖃᕐᑕᒥᓂᒃ ᐱᖓᓲᓕᖅᑲᖓᔪᓂᒃ ᐱᓇᓱᐊᕐᕕᒋᖏᑉᐸᒍ, ᑕᕝᕙ ᐊᕐᓇᖅ ᐃᓱᒪᕐᓱᕐᓗᓂ ᐊᐅᓪᓚᕐᑐᒃᓴᐅᕗᖅ ᐊᖑᑎᐅᑉ ᑮᓇᐅᔭᕐᑖᕈᑎᒋᖏᓪᓗᓂᐅᒃ.”

ᐱᖁᔭᑦ ᒪᓕᒃᑕᐅᔭᕆᐊᓖᑦ ᐱᑦᓯᐊᖏᑦᑐᓄᑦ

¹² “ᓇᓪᓕᐊᓪᓕ ᐃᓅᖃᑎᒥᓂᒃ ᐊᓇᐅᓯᓗᓂ ᑐᖁᑦᓯᒃᐸᑦ ᑖᓐᓇ ᑐᖁᑕᐅᔪᒃᓴᐅᕗᖅ.

¹³ ᑭᓯᐊᓂᓕ ᐱᔮᕆᖏᓪᓗᓂ ᑐᖁᑦᓯᒃᐸᑦ, ᑖᓐᓇ ᕿᒫᔪᓐᓇᕐᐳᖅ ᐅᕙᖓ ᕿᒫᕕᐅᖁᔭᓐᓄᑦ, ᑕᕝᕙᓂᓗ ᖃᓄᐃᓕᔭᐅᒐᔭᓐᖏᓚᖅ.

¹⁴ ᑭᓯᐊᓂᓕ ᐃᓄᒃ ᓂᓐᖓᐅᒪᓗᓂ ᐱᔮᕆᓗᓂᓗ ᐃᓅᖃᑎᒥᓂᒃ ᑐᖁᑦᓯᒃᐸᑦ, ᑖᓐᓇ ᑐᖁᑕᐅᔪᒃᓴᐅᕗᖅ, ᐊᒡᓛᑦ ᑐᓂᕐᕈᓯᕐᕕᖁᑎᓐᓄᑦ ᖃᓄᐃᓕᔭᐅᔪᒪᖏᓪᓗᓂ ᕿᒫᒐᓗᐊᕐᐸᑦ.

¹⁵ “ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᐊᓇᐅᓯᒃᐸᑦ ᑖᓐᓇ ᑐᖁᑕᐅᔪᒃᓴᐅᕗᖅ.

¹⁶ “ᓇᓪᓕᐊᑦ ᐃᓅᖃᑎᒥᓂᒃ ᐃᓱᒪᓯᐅᕆᖏᓪᓗᓂ ᑎᒍᓯᑐᐃᓐᓇᕐᐸᑦ, ᓂᐅᕐᕈᑎᖃᕋᓱᐊᕐᓂᕐᒧᑦ ᐅᕝᕙᓗ ᓯᐊᓛᕐᑖᕆᔪᒪᓗᓂᐅᒃ, ᑖᓐᓇ ᑐᖁᑕᐅᔪᒃᓴᐅᕗᖅ.

¹⁷ “ᓇᓪᓕᐊᑦ ᐊᑖᑕᒥᓂᒃ ᐊᓈᓇᒥᓂᒡᓘᓐᓃᑦ ᓯᕗᓂᕐᓗᖁᔨᓗᓂ ᐅᖃᕐᓂᕐᓘᑎᓕᒃ ᑖᓐᓇ ᑐᖁᑕᐅᔪᒃᓴᐅᕗᖅ.

¹⁸ “ᐃᓅᒃ ᐂᕙᖃᑎᒌᒃᐸᑎᒃ ᐂᑉᐸᖓᑕᓗ ᐱᒋᐊᕐᐸᒍ ᐅᔭᕋᖕᒧᑦ ᐊᒡᒐᖕᒥᓄᓪᓘᓐᓃᑦ, ᑐᖁᑕᐅᖏᓪᓗᓂᓕ, ᑖᓐᓇ ᑍᒤᓕᓯᔪᖅ ᓱᒋᐊᕐᑕᐅᔪᒃᓴᐅᓐᖏᓚᖅ, ᐋᓐᓂᕐᑕᖓ ᐃᒡᓕᕐᒦᒋᐊᖃᓕᓚᕿᒃᐸᑦ,

¹⁹ ᑭᖑᓂᖓᒍᓪᓕ ᒪᑭᑦᑐᓐᓇᕐᓯᖕᒥᒃᐸᑦ ᐊᓂᔪᓐᓇᕐᓯᓗᓂᓗ ᐊᔭᐅᑉᐱᐊᕐᓗᓂ, ᑖᓐᓇ ᑍᒤᓕᑎᑦᓯᔪᕕᓂᖅ ᑖᑦᓱᒪ ᐃᒡᓕᕐᒦᑦᔪᑎᖓᓂᒃ ᐊᑭᓖᔭᕆᐊᖃᕐᐳᖅ ᑲᒪᒋᑦᓯᐊᕆᐊᖃᕐᓗᓂᐅᒡᓗ ᐋᖅᑭᓚᐅᖏᓐᓂᓕᒫᖓᓂ.

²⁰ “ᐃᓄᒡᓕ ᐊᓇᐅᓕᕐᓯᒃᐸᑦ ᓯᐊᓛᒥᓂᒃ, ᐊᖑᒻᒥᒃ ᐊᕐᓇᒥᒡᓘᓐᓃᑦ, ᑖᓐᓇᓗ ᓯᐊᓛᖓ ᑕᕝᕙᓂ ᑐᖁᑲᐅᑎᒋᒃᐸᑦ, ᑖᓐᓇ ᑍᒤᓕᐅᕆᔪᖅ ᓱᒋᐊᕐᑕᐅᔪᒃᓴᐅᕗᖅ.

²¹ ᓯᐊᓛᖓᓕ ᐊᓐᓇᒃᐸᑦ ᐅᓪᓗᕐᒥᒃ ᒪᕐᕉᖕᓂᒡᓘᓐᓃᑦ ᐊᓂᒍᐃᓗᓂ, ᑖᓐᓇ ᑍᒤᓕᐅᕆᔪᖅ ᓱᒋᐊᕐᑕᐅᔪᒃᓴᐅᓐᖏᓚᖅ. ᑖᓐᓇ ᐱᖁᑎᓕᒃ ᐃᓚᓐᖓᕐᓯᒪᓂᕐᒥᓄᑦ ᓱᒋᐊᕐᑕᐅᓂᕆᔭᕇᕐᒪᒍ.

²² “ᐊᖑᑏᒃ ᐅᓇᑕᕐᓗᑎᒃ, ᐊᕐᓇᒥᒃ ᓄᑕᕋᒃᓴᓕᖕᒥᒃ ᐋᓐᓃᑐᐊᕐᐸᑎᒃ ᐊᕐᓇᕐᓗ ᑖᓐᓇ ᑕᒪᐅᓁᓐᓇᖅ ᐃᕐᓂᓱᓕᕐᓗᓂ ᓄᑕᕋᒃᓴᖓ ᓱᕋᒃᑕᐅᒃᐸᑦ, ᐊᕐᓇᖅ ᓇᖕᒥᓂᖅ ᐋᓐᓂᖏᒃᑲᓗᐊᕐᓗᓂ, ᑖᓐᓇ ᐋᓐᓃᔪᖅ ᐊᑭᓖᑎᑕᐅᔭᕆᐊᖃᕐᐳᖅ ᐊᕐᓇᐅᑉ ᐅᐃᖓᑕ ᐊᑭᓕᐅᑎᒋᔭᐅᖁᔭᖓᓂᒃ; ᐃᓅᖃᑎᒥᖕᓂᒃ ᐋᖅᑭᒃᓱᐃᔨᐅᔪᓄᑦ ᓈᒻᒪᒋᔭᐅᑐᐊᕐᐸᑕ ᐊᑭᓕᐅᑎᒋᔭᐅᖁᔭᐅᔪᑦ.

²³ ᑭᓯᐊᓂᓕ ᐊᕐᓇᖅ ᐋᓐᓂᕐᑕᐅᖃᑕᐅᒃᐸᑦ, ᑕᕝᕙ ᐊᑭᓕᕐᑕᐅᔭᕆᐊᖃᕐᐳᖅ ᐃᓅᓯᕐᒥᒃ ᐃᓅᓯᕐᒧᑦ.

²⁴ ᐃᔨ ᐃᔨᒧᑦ, ᑭᒍᑎ ᑭᒍᑎᒧᑦ, ᐊᒡᒊᑦ ᐊᒡᒐᓄᑦ, ᐃᑎᒊᑦ ᐃᑎᒐᖕᓄᑦ,

²⁵ ᐆᓐᓂᖅ ᐆᓐᓂᕐᒧᑦ, ᐃᑭᓕᕐᑕᐅᓂᖅ ᐃᑭᓕᕐᑕᐅᓂᕐᒧᑦ, ᑎᒡᓘᔭᕐᓂᖅ ᑎᒡᓘᔭᕐᓂᕐᒧᑦ.

²⁶ “ᐊᖑᑦ ᓯᐊᓛᒥᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ ᐊᓇᐅᓯᓗᓂ ᐃᔨᖓᓂᒃ ᖄᕐᓯᒃᐸᑦ, ᑕᕝᕙ ᑖᓐᓇ ᓯᐊᓛᖅ ᓯᐊᓛᖑᔪᓐᓃᕆᐊᖃᕐᐳᖅ ᐃᔨᖓᓄᑦ ᐊᑭᓕᐅᑎᓗᓂ.

²⁷ ᐊᒻᒪᑦᑕᐅᖅ ᓯᐊᓛᒥᓂᒃ ᐊᖑᒻᒥᒃ ᐊᕐᓇᒥᒡᓘᓐᓃᑦ ᑭᒍᑍᕐᓯᔪᖃᕐᐸᑦ, ᑕᕝᕙ ᑖᓐᓇ ᓯᐊᓛᖅ ᓯᐊᓛᖑᔪᓐᓃᕆᐊᖃᕐᐳᖅ ᑭᒍᑎᖓᓄᑦ ᐊᑭᓕᐅᑎᓗᓂ.”

ᐱᖁᑎᓕᐅᑉ ᑲᒪᒋᔭᒃᓴᖃᕐᓂᖓ

²⁸ “ᐃᒻᒧᒃᓯᐅᒐᐅᑉ ᐊᖑᓴᓪᓗᖓᑕ ᐊᖑᑦ ᐊᕐᓇᕐᓘᓐᓃᑦ ᓇᒡᔪᖕᒥᒡᓗᓂᐅᒃ ᑐᖁᑉᐸᒍ, ᑕᕝᕙ ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᒥᓪᓗᕐᑕᐅᓗᓂ ᑐᖁᑕᐅᔭᕆᐊᖃᕐᐳᖅ, ᓂᕿᖓᓕ ᓂᕆᔭᐅᔭᕆᐊᖃᓐᖏᓚᖅ; ᑭᓯᐊᓂᓕ ᐊᖑᓴᓪᓗᕐᒥᒃ ᐱᖁᑎᓕᒃ ᑕᒪᑐᒧᖓ ᐸᓯᔭᒃᓴᐅᔪᒃᓴᐅᓐᖏᓚᖅ.

²⁹ ᐃᒻᒧᒃᓯᐅᒐᐅᓪᓕ ᐊᖑᓴᓪᓗᖓ ᐃᓄᖕᓂᒃ ᐱᒋᐊᕐᑕᖃᑦᑕᕐᓯᒪᒃᐸᑦ, ᑖᑦᓱᒪᓗ ᐃᓄᐊ ᐅᖃᐅᑦᔭᐅᓯᒪᒐᓗᐊᕐᓗᓂ ᐃᐱᕐᓯᒪᖏᑉᐸᒍ, ᑭᖑᓂᖓᒍᓪᓕ ᓇᒡᔪᖕᒥᒃᓯᓗᓂ ᐊᖑᒻᒥᒃ ᐊᕐᓇᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐊᖑᓴᓪᓗᖅ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ, ᐃᓄᐊᓗ ᑐᖁᑕᐅᔪᒃᓴᐅᒋᕗᖅ.

³⁰ ᑭᓯᐊᓂᓕ ᐊᖑᓴᓪᓘᑉ ᐃᓄᐊ ᐊᑭᓖᖁᔭᐅᒃᐸᑦ ᑐᖁᑕᐅᖁᓇᒍ, ᑕᕝᕙ ᐊᑭᓕᐅᑎᒋᖁᔭᐅᔪᓕᒫᓂᒃ ᖃᑦᓯᐅᒐᓗᐊᕐᐸᑕ ᐊᑭᓖᔪᒃᓴᐅᕗᖅ.

³¹ ᐊᖑᓴᓪᓗᕐᓕ ᓇᒡᔪᖕᒦᓗᓂ ᓄᑲᑉᐱᐊᒥᒃ ᓂᕕᐊᕐᓯᐊᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐱᓇᓱᐊᕐᕕᐅᔭᕆᐊᖃᕋᔭᕆᕗᖅ ᑕᒪᒃᑯᐊ ᐱᖁᔭᐅᔪᑦ ᒪᓕᒃᑕᐅᓗᑎᒃ.

³² ᐊᖑᓴᓪᓗᕐᓕ ᓇᒡᔪᖕᒥᒃᓯᓗᓂ ᓯᐊᓛᕆᔭᐅᔪᒥᒃ, ᐊᖑᒻᒥᒃ ᐊᕐᓇᒥᒡᓘᓐᓃᑦ ᑐᖁᑦᓯᒃᐸᑦ, ᑕᕝᕙ ᐊᖑᓴᓪᓘᑉ ᐃᓄᐊ ᓯᐊᓛᖃᕐᑐᒧᑦ ᐊᑭᓖᔭᕆᐊᖃᕐᐳᖅ ᓯᐅᓪᕕᕆᓂᒃ 30ᓂᒃ, ᐊᖑᓴᓪᓗᕐᓗ ᒥᓪᓗᕐᑕᐅᓗᓂ ᑐᖁᑕᐅᔪᒃᓴᐅᕗᖅ.

³³ “ᐊᖑᓪᓕ ᐃᑎᕐᓴᓕᐅᕐᓯᒪᔪᒥᒃ ᒪᑐᐃᕐᓯᓗᓂ ᒪᑐᐃᖎᓐᓇᕐᑎᑉᐸᒍ, ᐅᕝᕙᓗ ᓄᓇᒥᒃ ᐃᑎᕐᓴᓕᐅᕆᓗᓂ ᒪᑐᖏᑉᐸᒍ, ᐊᖑᓴᓪᓗᕐᓕ ᓯᐅᑎᖅᑯᕐᑐᔪᕐᓘᓐᓃᑦ ᑕᕝᕗᖓ ᐃᔪᒃᑲᕐᐸᑦ,

³⁴ ᑖᓐᓇ ᐃᑎᕐᓴᓕᐅᕆᓯᒪᔪᖅ ᐆᒪᔪᖁᑎᓕᖕᒧᑦ ᐊᑭᓖᔪᒃᓴᐅᕗᖅ; ᑮᓇᐅᔭᓂᒃ ᐊᑭᓕᕐᓗᓂᐅᒃ, ᑖᓐᓇᓕ ᐆᒪᔪᖅ ᑐᖁᖓᓕᕐᑐᖅ ᐱᑖᕆᒐᔭᕐᐹ.

³⁵ ᐊᖑᑎᐅᓪᓕ ᐊᖑᓴᓪᓗᖁᑎᖓ ᐊᓯᐊᑕ ᐊᖑᓴᓪᓗᖁᑎᖓᓂᒃ ᐋᓐᓂᕐᓯᓗᓂ ᑐᖁᑦᓯᒃᐸᑦ, ᑕᕝᕙ ᑖᓐᓇ ᑐᖁᑦᓯᔪᖅ ᓂᐅᕐᕈᑎᒋᔭᐅᓗᓂ ᐊᑭᖏᑦ ᑖᒃᑯᓄᖓᑦ ᐊᖑᑎᓄᑦ ᐊᒡᒍᕐᑕᐅᔪᒃᓴᐅᕗᑦ; ᑖᓐᓇᓗ ᑐᖁᑕᐅᔪᖅ ᐊᖑᓴᓪᓗᖅ ᑖᒃᑯᓄᖓ ᐊᕕᒃᑕᐅᖕᒥᓗᓂ.

³⁶ ᐃᒻᒧᒃᓯᐅᒐᐅᓪᓕ ᐊᖑᓴᓪᓗᖓ ᖃᐅᔨᔭᐅᖃᑦᑕᕐᓯᒪᒃᐸᑦ ᐱᒋᐊᖃᑦᑕᕐᓯᒪᓂᖓᓂᒃ, ᐃᓄᐊᑕᓗ ᐃᐱᕐᓯᒪᖏᑉᐸᒍ, ᑕᕝᕙ ᐊᑭᓖᔭᕆᐊᖃᕐᐳᖅ ᐊᖑᓴᓪᓗᖁᑎᒥᓂᒃ ᐊᖑᓴᓪᓗᖁᑎᖃᓚᐅᕐᑐᒧᑦ, ᑖᓐᓇᓗ ᐊᖑᓴᓪᓗᖅ ᑐᖁᑕᐅᓯᒪᔪᖅ ᐱᑖᕆᖔᕐᓗᓂᐅᒃ.”