ᒨᓯᓯ ᐂᑉᐸᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔭᑦ ᖁᓕᑦ ᑐᓂᔭᐅᓕᕐᓂᖏᑦ

¹ ᒎᑎᐅᓪᓗ ᐅᖃᐅᓰᑦ ᐅᑯᐊ ᐅᖃᐅᓯᕆᓚᐅᕐᐰᑦ, ᐅᖃᕐᓗᓂ,

² “ᐅᕙᖓ ᐊᑕᓂᐅᕗᖓ ᒎᑎᓯ, ᐅᕙᖓ ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐸᑦᓯ ᑕᕝᕙᓐᖓᑦ ᓱᒃᑯᔨᐊᖑᕕᒋᓚᐅᕐᑕᑦᓯᓐᓂᑦ.

³ “ᐊᓯᓐᓂᒃ ᒎᑎᖃᕐᑐᒃᓴᐅᓐᖏᓚᓯ.

⁴ “ᓱᓇᑐᐃᓐᓇᕐᒥᒃ ᓴᓇᔪᒃᓴᐅᓐᖏᓚᓯ ᐊᑦᔨᓕᐅᕆᓗᓯ ᕿᓚᖕᒥᐅᑕᕐᒥᒃ ᓄᓇᒥᐅᑕᒥᒡᓘᓐᓃᑦ, ᐃᒪᕐᒥᐅᑕᕐᒥᒃ ᓄᓇᐅᑉ ᐊᑖᓂᕐᒥᐅᑕᒥᒡᓘᓐᓃᑦ.

⁵ ᐹᒻᒪᒃᑎᕐᕕᖃᕐᑐᒃᓴᐅᓐᖏᓚᓯ ᒎᑎᓐᖑᐊᓕᐊᕆᓯᒪᔪᒥᒃ ᑐᒃᓯᐊᕐᕕᖃᕋᓱᐊᕐᑍᓕᓗᓯᓗ ᑍᒤᑦᑐᓂᒃ, ᐅᕙᖓ ᐊᑕᓂᖅ ᒎᑎᒋᕙᑦᓯᓐᖓ ᐊᓯᓐᓂᒃ ᐱᑕᖃᖏᒻᒪᑦ. ᓱᒋᐊᕐᓯᓂᐊᕐᐳᖓ ᐅᕙᓐᓂᒃ ᐆᒥᓱᒃᑐᓂᒃ ᑭᖑᕚᖏᓐᓂᒡᓗ, ᑭᖑᕚᕇᑦ ᐱᖓᔪᖏᑦ ᓯᑕᒪᖏᓪᓘᓐᓃᑦ ᑎᑭᓪᓗᒋᑦ.

⁶ ᐅᕙᓐᓂᒡᓕ ᓇᒡᓕᒍᓱᒃᑐᓄᑦ ᓇᒡᓕᒍᓱᖕᓂᓐᓂᒃ ᑕᑯᑎᑦᓯᓂᐊᕐᐳᖓ ᐱᖁᔭᓐᓂᒡᓗ ᓈᓚᒃᑐᓄᑦ ᑭᖑᕚᕇᑦ 1,000ᓗᐊᕐᑐᑦ ᑎᑭᓪᓗᒋᑦ.

⁷ “ᐊᑕᓂᐅᑉ ᒎᑎᕕᑦ ᐊᑎᖓᓂᒃ ᐊᑐᕐᓂᕐᓗᒃᑐᒃᓴᐅᓐᖏᓚᑎᑦ; ᐊᑕᓂᐅᑉ ᓱᒋᐊᕐᑍᓕᓂᐊᓐᖏᓛ ᓇᓪᓕᐊᑦ ᐊᑎᖓᓂᒃ ᐊᑐᕐᓂᕐᓗᒃᑐᖅ.

⁸ “ᐅᓪᓗᖅ ᓴᐸᑎᐅᔪᖅ ᑲᒪᒋᑦᓯᐊᕈᒃ, ᐃᑦᔪᕐᓁᑎᓪᓗᒍᓗ.

⁹ ᐅᓪᓗᓂᒃ ᐱᖓᓲᔪᕐᑐᓂᒃ ᐱᓇᓱᐊᒐᒃᓴᕐᓂᒃ ᐱᓇᓱᐊᕐᑐᒃᓴᐅᕗᑎᑦ,

¹⁰ ᐅᓪᓗᓪᓕ 7ᖓᓐᓂ ᐅᓪᓗᖅ ᑕᕾᕐᓯᕐᕕᒃᓴᖅ ᓇᓪᓕᐅᑎᕗᖅ ᐊᑕᓂᕐᒧᑦ ᒎᑎᖕᓄᑦ ᑐᕌᖓᔪᖅ. ᐅᓪᓗᒥ ᑕᕝᕙᓂ ᑭᓇᓘᓐᓃᑦ ᓴᓇᔪᒃᓴᐅᓐᖏᓚᖅ ᕿᑐᕐᖓᑎᑦ, ᐱᔨᑎᓪᓗ ᐆᒪᔪᖁᑎᑎᓪᓘᓐᓃᑦ, ᓂᐅᕐᕈᐊᓪᓘᓐᓃᑦ ᓄᓇᑦᓯᓐᓄᑦ;

¹¹ ᐅᓪᓗᓂᒃ ᐱᖓᓲᔪᕐᑐᓂᒃ ᐊᑕᓂᐅᑉ ᓄᓇᕐᔪᐊᖅ ᕿᓚᒡᓗ ᓴᓇᓚᐅᕐᒪᒍ, ᐃᒪᕐᔪᐊᕐᓗ ᐃᒪᕐᒥᐅᑕᓕᒫᓪᓗ, ᐅᓪᓗᓪᓕ 7ᖓᓐᓂ ᑕᕾᕐᓯᓚᐅᕐᐳᖅ. ᑍᒤᒻᒪᑦ ᐊᑕᓂᐅᑉ ᓴᐸᑎ ᐅᓪᓗᓄᑦ ᐊᑦᔨᐅᑎᓐᓇᒍ ᓇᓗᓁᓚᐅᕐᐹ ᐃᑦᔪᕐᓁᑎᓪᓗᒍᓗ.

¹² “ᐊᑖᑕᖕᓂᒃ ᐊᓈᓇᖕᓂᒡᓗ ᑲᒪᑦᓯᐊᕐᑐᒃᓴᐅᕗᑎᑦ ᐊᑯᓂ ᐃᓅᖁᓪᓗᑎᑦ ᓄᓇᒥ ᐊᑕᓂᐅᑉ ᒎᑎᕕᑦ ᑐᓂᔭᖓᓂᒃ ᐃᓕᖕᓄᑦ.

¹³ “ᐱᔮᕆᓗᑎᑦ ᐃᓄᐊᕐᑐᒃᓴᐅᓐᖏᓚᑎᑦ.

¹⁴ “ᓄᓕᐊᕇᖕᓂᕐᒥᒃ ᐊᓯᓐᓂᐊᕐᑐᒃᓴᐅᓐᖏᓚᑎᑦ.

¹⁵ “ᑎᒡᓕᒃᑐᒃᓴᐅᓐᖏᓚᑎᑦ.

¹⁶ “ᐃᓅᖃᑎᖕᓂᒃ ᓱᓕᖏᑦᑐᒧᑦ ᐅᖃᐅᓯᖃᕐᑐᒃᓴᐅᓐᖏᓚᑎᑦ.

¹⁷ “ᐃᓅᖃᑎᕕᑦ ᐃᒡᓗᖓᓂᒃ ᐃᒃᓯᒎᕐᑐᒃᓴᐅᓐᖏᓚᑎᑦ, ᓄᓕᐊᖓᓂᒡᓘᓐᓃᑦ ᐃᒃᓯᒎᕐᑐᒃᓴᐅᓐᖏᓚᑎᑦ, ᐱᔨᖓᓂᒡᓘᓐᓃᑦ, ᐆᒪᔪᖁᑎᖓᓂᒡᓘᓐᓃᑦ, ᓯᐅᑎᖅᑯᕐᑐᔪᖁᑎᖓᓂᒡᓘᓐᓃᑦ ᓱᓇᑐᐃᓐᓇᕐᒥᒡᓘᓐᓃᑦ ᐃᓅᖃᑎᕕᑦ ᐱᒋᔭᖓᓂᒃ ᐱᔪᒪᕕᒡᔪᐊᕐᑐᒃᓴᐅᓐᖏᓚᑎᑦ.”

ᐃᓄᐃᑦ ᑲᑉᐱᐊᓱᖕᓂᖓᑦ

¹⁸ ᐃᓄᐃᓪᓗ ᑲᓪᓕᖅ ᑎᑦᑐᓚᐅᓪᓗ ᓂᓪᓕᕐᑐᖅ ᑐᓴᕋᒥᑦᔪᒃ, ᖃᐅᒻᒪᓪᓚᒃᑐᕐᓗ ᑕᑯᓪᓗᒍ, ᖃᖅᑳᓗᒡᓗ ᐳᔫᕐᑐᖅ ᓴᔪᓕᕐᐳᑦ ᑲᑉᐱᐊᓱᖕᓂᕐᒧᑦ ᐅᖓᓯᒋᔮᓂᓗ ᓇᖏᕐᓗᑎᒃ.

¹⁹ ᒨᓯᓯᒧᓪᓗ ᐅᖃᕐᐳᑦ, “ᐅᕙᑦᑎᓐᓄᑦ ᐅᖃᕈᕕᑦ ᓈᓚᖕᓂᐊᕐᐳᒍᑦ, ᑭᓯᐊᓂᓕ ᓯᕘᕋᕗᒍᑦ ᒎᑎᐅᑉ ᐅᖃᕐᕕᒋᒃᐸᑎᒍᑦ ᑐᖁᑐᐃᓐᓇᕆᐊᖃᕋᑦᑕ.”

²⁰ ᒨᓯᓯᐅᓪᓗ ᑭᐅᕔᑦ, “ᑲᑉᐱᐊᓱᖏᓪᓗᓯ, ᒎᑎ ᑕᒪᐅᓐᖓᕐᓯᒪᕗᖅ ᓱᖅᑯᐃᕐᓯᑦᓯᐊᖁᓪᓗᓯ, ᑖᑦᓱᒥᖓᓗ ᓯᕘᕋᓂᕐᒧᑦ ᐊᔪᕐᑐᓕᖁᓇᑦᓯ.”

²¹ ᐃᓄᐃᓪᓕ ᓱᓕ ᐅᖓᓯᒃᑐᒥ ᓇᖏᑐᐃᓐᓇᓕᕐᐳᑦ, ᒨᓯᓯᓕ ᑭᓯᒥ ᓄᕗᔮᓗᖕᒧᑦ ᕿᕐᓂᕐᑕᒧᑦ ᒎᑎᐅᑉ ᓇᔪᕐᑕᖓᓄᑦ ᖃᒡᓕᔪᓐᓇᕐᑐᑑᓚᐅᕐᐳᖅ.

ᐱᖁᔭᑦ ᑐᓂᕐᕈᓯᕐᕕᒃ ᐊᓪᑕᕆ ᐱᓪᓗᒍ

²² ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐃᓴᕆᐊᓕᒥᐅᓄᑦ ᐃᒫᒃ ᐅᖃᕐᑐᒃᓴᐅᕗᑎᑦ: ‘ᐃᓕᑦᓯ ᓇᖕᒥᓂᖅ ᑕᑯᓚᐅᕐᐳᓯ ᐅᖃᓪᓚᒃᑎᓪᓗᖓ ᕿᓚᖕᒥᑦ.

²³ ᑍᒤᒻᒪᑦ ᓴᓂᓐᓃᑦᑐᒃᓴᒥᒃ ᒎᑎᓐᖑᐊᓕᐅᕐᑐᒃᓴᐅᓐᖏᓚᓯ ᓯᐅᓪᕕᕆᒥᒃ, ᒎᓗᒥᒡᓘᓐᓃᑦ ᓴᓇᔪᒃᓴᐅᖏᓐᓂᕗᓯ ᒎᑎᒃᓴᑦᓯᓐᓂᒃ.

²⁴ ᓄᓇᒥᓕ ᑐᓂᕐᕈᓯᕐᕕᖕᒥᒃ ᓴᓇᓕᕆᑦᓯ ᐅᕙᓐᓄᑦ; ᑕᕝᕙᓂᓗ ᑐᓂᕐᕈᓯᕐᓗᓯ ᑐᓂᕐᕈᑎᓂᒃ ᐆᑕᒃᓴᓂᒃ ᑐᓂᕐᕈᑎᓂᒡᓗ ᖁᔭᓕᑦᔪᑎᒃᓴᓂᒃ, ᓰᐱᓂᒃ ᐃᒻᒧᒃᓯᐅᒐᓂᒡᓗ ᑐᓂᕐᕈᓯᕐᑐᒃᓴᐅᕗᓯ; ᓇᓂᑐᐃᓐᓇᖅ ᐊᑎᕐᒪ ᐃᖅᑲᐅᒪᔭᐅᑦᔪᑎᒃᓴᖓᓂᒃ ᐱᑎᑦᓯᑐᐊᕈᒪ ᑕᕝᕙ ᑕᕝᕗᖓ ᕾᓂᐊᕐᐳᖓ ᓮᒻᒪᕐᑎᓪᓗᓯᓗ.

²⁵ ᐅᔭᖅᑲᓂᒃ ᑐᓂᕐᕈᓯᕐᕕᓕᐅᕐᓂᐊᕈᕕᑦ ᐅᕙᓐᓄᑦ, ᐃᓚᓐᖔᓯᒪᔪᓂᒃ ᐅᔭᖅᑲᓂᒃ ᑐᓂᕐᕈᓯᕐᕕᓕᐅᕐᑐᒃᓴᐅᓐᖏᓚᑎᑦ; ᓴᓇᕐᕈᑎᒥᒃ ᐃᓚᓐᖔᓯᑦᔪᑎᒥᒃ ᐊᑐᓕᕈᕕᑦ ᐅᔭᖅᑲᓄᑦ ᑕᕝᕙ ᐅᕙᓐᓄᑦ ᓇᕐᕈᓇᕐᓯᓗᓂ ᐊᑐᕐᑐᒃᓴᐅᔪᓐᓃᕐᐳᖅ.

²⁶ ᑐᓂᕐᕈᓯᕐᕕᖕᒥᒃ ᓴᓇᔪᒃᓴᐅᓐᖏᓚᑎᑦ ᒪᔪᕋᐅᑎᓕᖕᒥᒃ, ᒪᔪᕋᕆᐊᓕᒃᑰᓕᕈᕕᑦ ᐊᓐᓄᕌᖃᖏᓐᓃᑦ ᓴᖅᑭᖁᓇᒍ.’”