ᒨᓯᓯ ᐂᑉᐸᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᖃᖅᑲᒥ ᓮᓁᒦᓐᓂᖓᑦ

¹ ᐃᓴᕆᐊᓕᒥᐅᑦ ᑕᖕᒫᕐᓯᒪᕕᒋᔭᑎᒃ ᕌᐱᑎ ᕿᒪᒃᐹᑦ. ᑕᖅᑮᓪᓗ ᐱᖓᔪᐊᑦᑕ ᐅᓪᓗᖏᑕ ᓯᕗᓪᓖᕐᐸᖓᓐᓂ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᓂᕆᔭᖓᑦᑕ ᑭᖑᓂᖓᓂ ᖃᖅᑲᐅᑉ ᓮᓁᑉ ᓯᐅᕅᓐᓇᐅᓂᖓᓄᐊᕐᐳᑦ.

² ᐃᓴᕆᐊᓕᒥᐅᑦ ᕆᐱᑎᒥᑦ ᐊᐅᓪᓚᕋᒥᒃ ᖃᖅᑳᓘᑉ ᓮᓁᑉ ᐊᑖᓄᑦ ᑕᖕᒫᕐᑎᕐᐳᑦ,

³ ᒨᓯᓯᓗ ᖃᖅᑳᓗᖕᒧᑦ ᒪᔪᕋᕐᐳᖅ ᒎᑎᒥᒃ ᑲᑎᓯᔭᕐᑐᕐᓗᓂ. ᖃᖅᑲᒥᓪᓗ ᐊᑕᓂᐅᑉ ᒨᓯᓯ ᐅᖃᕐᕕᒋᕚ ᐅᖃᖁᓪᓗᒍ ᐃᓴᕆᐊᓕᒥᐅᓄᑦ ᔧᑰᑉ ᑭᖑᕚᖏᓐᓄᑦ ᐅᖃᐅᑎᓪᓗᒍᓗ:

⁴ “ᑕᑯᓚᐅᕐᐳᓯ ᐄᑦᔨᑉᑎᒥᐅᓄᑦ ᖃᓄᐃᓕᐅᓚᐅᕐᓂᓐᓂᒃ, ᖃᓄᕐᓗ ᑕᓯᐅᓚᐅᕐᒪᖔᑦᓯ ᓇᒃᑐᕋᓕᐅᑉ ᐃᓴᕈᕐᒥᓄᑦ ᕿᑐᕐᖓᒥᓂ ᑕᓯᐅᕐᓯᕙᖕᓂᖓᑎᑐᑦ, ᑕᒪᐅᖓᓗ ᑎᑭᐅᑎᑎᓯᒪᓪᓗᓯ ᐅᕙᓐᓄᑦ.

⁵ ᒫᓐᓇᓕ ᑕᕝᕙ, ᐅᕙᓐᓂᒃ ᓈᓚᖕᓂᐊᕈᑦᓯ ᐊᖏᕈᑎᒋᓯᒪᔭᓐᓂᒡᓗ ᒪᓕᒡᓗᓯ, ᑕᕝᕙ ᐅᕙᓐᓄᑦ ᐃᓄᖁᑕᐅᓂᐊᓕᕐᐳᓯ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ; ᓄᓇᕐᔪᐊᖅ ᐃᓘᓐᓇᓂ ᐱᖁᑎᒋᒐᒃᑯ,

⁶ ᐊᑕᓂᐅᕕᓐᓂᓗ ᑐᓂᕐᕈᓯᕐᑎᑦᓯᔨᖁᑎᒋᓂᐊᕐᐸᑦᓯ ᐃᓅᖃᑎᒌᒡᔪᐊᖑᓗᓯ ᐃᑦᔪᕐᓁᓪᓗᓯ. ᑕᒪᒃᑯᐊᓗ ᐅᖃᐅᓰᑦ ᐃᓴᕆᐊᓕᒥᐅᑦ ᕿᑐᕐᖓᖏᓐᓄᑦ ᐅᖃᐅᓯᕆᔭᒃᓴᕆᕙᓯ.”

⁷ ᒨᓯᓯᓗ ᐅᑎᕋᒥ ᐃᓄᐃᑦ ᐊᖓᔪᖅᑳᖏᓐᓂᒃ ᕾᖁᔨᕗᖅ, ᑕᒪᒃᑯᐊᓗ ᐅᖃᐅᓰᑦ ᐅᖃᐅᑦᔭᐅᒍᑎᓕᒫᓂ ᐅᖃᐅᓯᕆᕔᑦ, ᐊᑕᓂᐅᑉ ᑍᒫᒃ ᐱᖁᓚᐅᕐᒪᒍ.

⁸ ᐃᓄᐃᑦ ᑕᕝᕙ ᐊᑕᐅᑦᓯᒃᑯᑦ ᑭᐅᕗᑦ ᐅᖃᕐᓗᑎᒡᓗ, “ᐊᑕᓂᐅᑉ ᐅᖃᐅᓯᕆᔭᓕᒫᖏᑦ ᐱᓇᓱᐊᕐᓂᐊᕐᐸᕗᑦ.” ᒨᓯᓯᐅᓪᓗ ᐃᓄᐃᑦ ᐅᖃᐅᓯᕆᔭᖏᑦ ᐊᑕᓂᕐᒧᑦ ᐅᖃᐅᓯᕆᕔᑦ.

⁹ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᑕᑯᒋᑦ ᐃᓕᖕᓄᑦ ᕾᓂᐊᕐᐳᖓ ᓄᕗᔭᒥ ᐃᓛᒃᑰᕐᑐᒦᓪᓗᖓ, ᐃᓄᐃᑦ ᑐᓵᔪᓐᓇᖁᓪᓗᒋᑦ ᐃᓕᖕᓄᑦ ᐅᖃᓪᓚᒃᑎᓪᓗᖓ, ᐃᓕᖕᓂᒡᓗ ᐅᒃᐱᕈᓱᓕᖁᓪᓗᒋᑦ ᑍᒪᓐᖓᑦ.” ᒨᓯᓯᐅᓪᓗ ᐃᓄᐃᑦ ᐅᖃᐅᓯᖏᑦ ᐊᑕᓂᕐᒧᑦ ᐅᖃᐅᓯᕆᕔᑦ.

¹⁰ ᐊᑕᓂᕐᓗ ᐅᖃᕐᐳᖅ ᒨᓯᓯᒧᑦ, “ᐃᓄᐃᑦ ᐅᐸᒡᓗᒋᑦ ᐅᖃᐅᑎᒃᑭᑦ ᐅᓪᓗᒥ ᖃᐅᒃᐸᓪᓗ ᐅᐸᓗᖎᔭᖁᓪᓗᒋᑦ ᐃᒻᒥᖕᓂᒃ ᑐᒃᓯᐊᕐᓂᒃᑯᑦ ᓴᓗᒻᒪᕐᓴᕐᓗᑎᒃ, ᐊᓐᓄᕌᒥᖕᓂᒡᓗ ᐅᐊᓴᕐᓗᑎᒃ,

¹¹ ᐅᓪᓗᓪᓗ ᐱᖓᔪᒋᓕᕐᐸᒍ ᐅᐸᓗᖎᕐᓯᒪᔪᒃᓴᐅᕗᑦ; ᐅᓪᓗᒥ ᑕᕝᕙᓂ ᖃᖅᑲᒧᑦ ᓮᓁᒧᑦ ᐊᑕᓂᖅ ᐊᖅᑲᕐᓂᐊᕐᒪᑦ, ᐃᓄᓕᒫᑦ ᑕᑯᓐᓇᕐᑎᓪᓗᒋᑦ.

¹² ᐃᓄᐃᑦ ᐅᐸᒍᓐᓇᕐᑕᖏᑕ ᑭᒡᓕᒃᓴᖓᓂᒃ ᓇᓗᓁᕐᓯᓯᒪᔪᒃᓴᐅᕗᑎᑦ, ᐅᖃᐅᑎᓗᒋᓪᓗ, ‘ᐃᒃᐱᒍᓱᑦᓯᐊᕆᑦᓯ ᖃᖅᑲᒧᑦ ᒪᔪᕋᖁᓇᓯ ᐅᕝᕙᓗ ᖃᖅᑲᐅᑉ ᑭᒡᓕᖓ ᐊᒃᑐᕐᑕᐅᔪᒃᓴᐅᓐᖏᓚᖅ; ᓇᓪᓕᐊᓪᓗ ᖃᖅᑲᒥᒃ ᓇᓗᓁᒃᑯᓯᕐᓯᒪᔫᑉ ᐅᖓᑖᓃᑦᑐᒥᒃ ᐊᒃᑐᕐᓯᔪᖅ ᑖᓐᓇ ᑐᖁᑕᐅᔪᒃᓴᐅᕗᖅ;

¹³ ᓇᓪᓕᐊᑦᑕᓘᓐᓃᑦ ᐊᒡᒐᖏᓐᓂᒃ ᐊᒃᑐᕐᑕᐅᔪᖃᕐᑐᒃᓴᐅᓐᖏᓚᖅ ᓇᓗᓁᒃᑯᓯᕐᓯᒪᔫᑉ ᐅᖓᑖᓅᑐᐊᕐᐸᑦ, ᒥᓪᓗᕐᑕᐅᓗᓂᓕ ᑐᖁᑕᐅᔪᒃᓴᐅᕗᖅ ᐅᕝᕙᓗ ᐱᓯᒃᑕᐅᓗᓂ; ᐃᓅᒐᓗᐊᕐᐸᑦ ᐆᒪᔫᒃᐸᓪᓘᓐᓃᑦ, ᓇᓗᓁᒃᑯᓯᕐᓯᒪᔫᑉ ᐅᖓᑖᓄᐊᕐᑐᕕᓂᕐᒥᒃ ᐆᒪᔪᖃᕐᑐᒃᓴᐅᓐᖏᓚᖅ.’ ᑎᑦᑐᓚᐅᑎᒥᒃ ᓂᓪᓕᐊᑯᑖᒃᑐᖃᕐᐸᑦ ᑕᕝᕙ ᐃᓄᐃᑦ ᖃᖅᑲᐅᑉ ᑭᒡᓕᖓᓄᑦ ᐅᐸᒍᑎᔪᒃᓴᐅᕗᑦ.”

¹⁴ ᑕᕝᕙ ᒨᓯᓯ ᖃᖅᑲᒥᑦ ᐊᑎᕐᐳᖅ ᐃᓄᖕᓄᐊᕐᓗᓂᓗ, ᐅᖃᐅᑎᕔᑦ ᑐᒃᓯᐊᕐᓂᒃᑯᑦ ᓴᓗᒻᒪᕐᓴᖁᓪᓗᒋᑦ ᐊᓐᓄᕌᒥᖕᓂᒡᓗ ᐅᐊᓴᓕᕐᐳᑦ,

¹⁵ ᐃᓄᖕᓄᓪᓗ ᐅᖃᕐᐳᖅ, “ᐅᓪᓗᑦ ᐱᖓᔪᐊᓐᓂ ᐊᑐᐃᓐᓇᐅᔪᒃᓴᐅᕗᓯ; ᒫᓐᓇᒥᑦ ᐱᒋᐊᕐᓗᒍ ᐊᕐᓇᒥᒃ ᐊᒃᑐᐃᔪᒃᓴᐅᓐᖏᓚᓯ.”

¹⁶ ᐅᓪᓗᓪᓕ ᐱᖓᔪᖓᑦᑕ ᐅᓪᓛᕆᔭᖓᓂ ᑲᓪᓕᕐᐳᖅ ᖃᐅᒻᒪᓪᓛᓪᓗᓂᓗ, ᓄᕗᔭᓗ ᐃᒻᒥᒎᕐᑐᖅ ᓴᖅᑭᑉᐳᖅ ᖃᖅᑳᓘᑉ ᖄᖓᒍᑦ. ᑎᑦᑐᓚᐅᑎᐅᓪᓗ ᓂᐱᖓ ᓂᐱᑑᓪᓗᓂ ᑐᓴᕐᑕᐅᕗᖅ, ᐃᓄᓕᒫᓪᓗ ᓄᓇᓕᖕᓃᑦᑐᑦ ᑲᑉᐱᐊᓱᓕᕐᐳᑦ ᖁᐊᕐᓵᕐᓗᑎᒡᓗ.

¹⁷ ᒨᓯᓯᐅᓪᓗ ᐃᓄᐃᑦ ᑕᕝᕙᓐᖓᑦ ᑕᖕᒫᕐᓯᒪᕕᖕᒥᖕᓂᑦ ᓅᑎᑉᐰᑦ ᒎᑎᒥᒃ ᑲᑎᓯᔭᕐᑐᖁᓪᓗᒋᑦ, ᖃᖅᑳᓘᓪᓗ ᐊᑖᓂ ᑭᒡᓕᖓᓃᓕᕐᐳᑦ.

¹⁸ ᖃᖅᑳᓘᓪᓗ ᓮᓁᑉ ᖄᖓ ᐳᔪᕐᒧᑦ ᐅᓕᒃᓯᒪᕗᖅ ᐊᑕᓂᐅᑉ ᐊᖅᑲᕐᕕᒋᖕᒪᒍ ᐃᑯᐊᓚᔪᒧᑦ. ᐳᔪᖓᓗ ᖁᒻᒧᐊᒃᐳᖅ ᐃᒐᐅᑉ ᐳᔪᖓᑎᑐᑦ, ᐃᓄᐃᓪᓗ ᓴᔪᒃᐳᑦ ᐊᖏᔪᒥᒃ.

¹⁹ ᑎᑦᑐᓚᐅᑎᐅᓪᓗ ᓂᐱᖓ ᓂᐱᖅᑯᕐᑐᓯᕙᓪᓕᐊᓚᐅᕐᐳᖅ. ᒨᓯᓯᓗ ᐅᖃᕐᒪᑦ ᒎᑎᐅᑉ ᑭᐅᕚ ᑲᓪᓕᕐᒧᑦ.

²⁰ ᐊᑕᓂᕐᓗ ᐊᖅᑲᕋᒥ ᖃᖅᑳᓘᑉ ᖄᖓᓄᐊᕐᐳᖅ ᓮᓁᒧᑦ. ᒨᓯᓯᓗ ᖃᖅᑳᓘᑉ ᖄᖓᓄᑦ ᕾᖁᕚ, ᒨᓯᓯᓗ ᒪᔪᕋᕐᐳᖅ ᖃᖅᑲᐅᑉ ᖄᖓᓄᑦ.

²¹ ᐊᑕᓂᐅᓪᓗ ᒨᓯᓯ ᐅᖃᐅᑎᕚ, “ᐃᓄᐃᑦ ᐊᖅᑲᕐᕕᒋᒍᕕᒋᑦ ᐅᖃᐅᑎᓂᐊᕐᐸᑎᑦ ᖄᖏᕆᐊᖃᓐᖏᑕᒥᖕᓂᒃ ᖄᖏᕐᓯᑦᑍᓕᖁᓗᒋᑦ ᐅᕙᓐᓂᒃ ᑕᑯᔭᕐᑐᕋᓱᒡᓗᑎᒃ. ᖄᖏᕆᐊᖃᓐᖏᑕᒥᖕᓂᒃ ᖄᖐᒃᐸᑕ ᑕᕝᕙ ᐅᓄᕐᑐᑦ ᑐᖁᓂᐊᕐᐳᑦ.

²² ᑐᓂᕐᕈᓯᕐᑎᑦᓯᔩᓪᓘᓐᓃᑦ ᐊᑕᓂᕐᒧᑦ ᖃᒡᓕᓂᐊᕈᑎᒃ ᐃᒻᒥᖕᓂᒃ ᓴᓗᒻᒪᕐᓴᕐᑐᒃᓴᐅᕗᑦ, ᑍᒤᓕᐅᖏᑉᐸᑕ ᑕᕝᕙ ᐊᑕᓂᐅᑉ ᓱᒋᐊᕐᓂᐊᕐᐰᑦ.”

²³ ᒨᓯᓯᓗ ᐅᖃᕐᐳᖅ ᐊᑕᓂᕐᒧᑦ, “ᐃᓄᐃᑦ ᖃᖅᑲᒧᑦ ᓮᓁᒧᑦ ᒪᔪᕋᕈᓐᓇᓐᖏᓚᑦ, ᐃᕝᕕᑦ ᓇᖕᒥᓂᖅ ᐅᖃᓚᐅᕋᕕᑦ, ᐃᒫᒃ; ‘ᖃᖅᑲᐅᑉ ᐅᐸᒃᑕᐅᓂᒃᓴᖓᑕ ᑭᒡᓕᒃᓴᖓᓂᒃ ᓇᓗᓁᒃᑯᓰᔪᒃᓴᐅᕗᑎᑦ, ᐃᑦᔪᕐᓁᑎᓪᓗᒍᓗ.’”

²⁴ ᐊᑕᓂᐅᓪᓗ ᑭᐅᕚ, “ᑕᐅᓄᖓ ᐊᒻᒧᐊᓚᐅᕆᑦ, ᐂᕉᓂ ᐱᖃᑎᒋᓕᕐᓗᒍ ᒪᔪᐊᕐᓂᐊᕋᑦᓯᒃ; ᑐᓂᕐᕈᓯᕐᑎᑦᓯᔩᓪᓕ ᐃᓄᐃᓪᓗ ᐅᐸᒃᑕᐅᔪᓐᓇᕐᑑᑉ ᐅᖓᑖᓄᐊᕐᑐᖃᕐᑐᒃᓴᐅᓐᖏᓚᑦ ᐅᐸᒍᑎᓇᓱᐊᕐᓗᑎᒃ ᐊᑕᓂᕐᒧᑦ, ᓱᒋᐊᕐᑕᐅᔪᒃᓴᐅᖁᓇᒋᑦ.”

²⁵ ᑕᕝᕙ ᒨᓯᓯ ᖃᖅᑲᒥᑦ ᐊᒻᒧᐊᒃᐳᖅ ᐃᓄᖕᓄᑦ ᐅᖃᐅᑎᓪᓗᒋᓪᓗ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᓐᓂᒃ.