ᒨᓯᓯ ᐂᑉᐸᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᑐᕉᑉ ᐳᓛᕆᐊᕐᓂᖓ ᒨᓯᓯᒧᑦ

¹ ᒨᓯᓯᐅᑉ ᓴᑭᖓ ᔨᑐᕉ, ᑐᓂᕐᕈᓯᕐᑎᑦᓯᔨᐅᔪᖅ ᒥᑎᐊᓂᒥ, ᑐᓴᕋᒥ ᖃᓄᖅ ᒎᑎᐅᑉ ᐱᓇᓱᐊᕐᓯᒪᓂᖓᓂᒃ ᒨᓯᓯᒧᑦ ᐃᓴᕆᐊᓕᒥᐅᓪᓗ ᐃᓄᖏᓐᓄᑦ, ᖃᓄᕐᓗ ᐊᑕᓂᖅ ᐃᓴᕆᐊᓕᒥᐅᓂᒃ ᐄᑦᔨᑉᑎᒥᑦ ᐊᐅᓪᓚᕐᑎᑦᓯᓚᐅᕐᓂᖓᓂᒃ.

² ᑕᕝᕙ ᒨᓯᓯᐅᑉ ᓴᑭᖓ, ᔨᑐᕉ ᐸᕐᓇᓕᕐᐳᖅ, ᓯᐴᕋ ᒨᓯᓯᐅᑉ ᓄᓕᐊᖓ ᓇᒃᓴᕐᓗᓂᐅᒃ, ᑖᒃᑯᐊ ᕿᒪᒃᑕᐅᓯᒪᓚᐅᕐᒪᑕ,

³ ᐃᕐᓂᖏᒃ ᒪᕐᕉᒃ ᐃᓚᒋᓪᓗᒋᒃ, ᐊᑎᖃᕐᑑᒃ ᒌᕐᓲᒻ ᐊᒻᒪᓗ ᐃᓕᓵ, (ᒌᕐᓲᒥᒃ ᐊᑦᑎᕋᒥᐅᒃ ᒨᓯᓯ ᐅᖃᓚᐅᕐᐳᖅ, “ᓄᓇᖃᕋᒪ ᐃᓅᖃᑎᑐᖃᕆᓐᖏᑕᓐᓂ”),

⁴ ᐂᑉᐸᖓᑕᓕ ᐊᑎᖓ ᐃᓕᓵᐅᕗᖅ, (ᐃᓔᓯᕆᒥᒃ ᐊᑦᑎᕋᒥᐅᒃ ᒨᓯᓯ ᐅᖃᓚᐅᕐᐳᖅ, “ᓯᕗᓕᕆᓚᐅᕐᑕᒪ ᒎᑎᖓ ᐃᑲᔪᕐᑎᒋᕙᕋ, ᑖᑦᓱᒪᓗ ᓴᐳᑎᓪᓗᖓ ᐰᕉᑉ ᓴᕕᒃᔪᐊᖓᓂᑦ”).

⁵ ᑕᕝᕙ ᔨᑐᕉ ᒨᓯᓯᐅᑉ ᓴᑭᖓ, ᒨᓯᓯᐅᑉ ᐃᕐᓂᖏᖕᓂᒃ ᓄᓕᐊᖓᓂᒡᓗ ᐃᓚᖃᕐᓗᓂ ᑎᑭᓕᕐᐳᖅ ᒨᓯᓯᒃᑯᑦ ᐃᓄᖃᖏᑦᑐᒥ ᑕᖕᒫᕐᓯᒪᑎᓪᓗᒋᑦ ᒎᑎᐅᑉ ᖃᖅᑲᖁᑎᖓᑕ ᑭᒡᓕᖓᓂ.

⁶ ᔨᑐᕉᓕ ᑎᓕᓯᓚᐅᕐᐳᖅ ᒨᓯᓯ ᐅᖃᐅᑦᔭᐅᖁᓪᓗᒍ, “ᓴᑮᑦ ᔨᑐᕉ ᑎᑭᓕᕐᒪᑦ ᐃᓕᖕᓄᑦ ᓄᓕᐊᑦ ᐃᕐᓂᖏᓪᓗ ᒪᕐᕉᒃ ᐃᓚᒋᓪᓗᒋᑦ.”

⁷ ᒨᓯᓯᐅᓪᓗ ᓴᑭᓂ ᐸᕐᕆᐊᕐᐹ, ᓵᖓᓄᓪᓗ ᐅᑯᓪᓗᓂ, ᒪᑭᓐᓇᒥ ᐃᕿᓪᓗᒍ ᑯᓂᒃᐹ, ᐃᒻᒥᖕᓄᓪᓗ ᖃᓄᐃᖏᒻᒪᖔᕐᒥᖕᓂᒃ ᐊᐱᕐᓱᖃᑦᑕᐅᑎᓚᐅᕐᓗᑎᒃ, ᑐᐱᕐᒧᑦ ᐃᑎᓕᕐᐳᑦ.

⁸ ᒨᓯᓯᐅᓪᓗ ᓴᑭᓂ ᐅᓂᒃᑲᐅᑎᓕᕐᐹ ᐊᑕᓂᐅᑉ ᐱᓇᓱᐊᓚᐅᕐᑕᓕᒫᖏᓐᓂᒃ ᐰᕉᒧᑦ ᐄᑦᔨᑉᑎᒥᐅᓄᓪᓗ ᐃᓴᕆᐊᓕᒥᐅᑦ ᐱᑦᔪᑎᒋᓪᓗᒋᑦ, ᐅᓂᒃᑲᐅᑎᒋᓪᓗᓂᐅᒡᓗ ᐃᓴᕆᐊᓕᒥᐅᑦ ᖃᓄᖅ ᐅᖁᒤᑦᑐᒃᑰᕐᓯᒪᓂᖏᓐᓂᒃ ᐃᖏᕐᕋᓕᕐᑎᓪᓗᒋᑦ ᖃᓄᕐᓗ ᐊᑕᓂᕐᒧᑦ ᓴᐳᑎᔭᐅᓯᒪᓂᕐᒥᖕᓂᒃ.

⁹ ᔨᑐᕉᓗ ᖁᕕᐊᓱᒻᒪᕆᓕᕐᐳᖅ ᐊᑕᓂᐅᑉ ᐱᐅᔪᐊᓗᖕᒥᒃ ᐱᓇᓱᐊᕐᓯᒪᓂᖓᓂᒃ ᐃᓴᕆᐊᓕᒥᐅᓄᑦ, ᐄᑦᔨᑉᑎᒥᐅᓂᓪᓗ ᐊᓂᑎᑕᐅᓯᒪᓂᖏᓐᓂᒃ.

¹⁰ ᔨᑐᕉᓗ ᐅᖃᕐᐳᖅ, “ᐊᑕᓂᖅ ᓂᕐᑐᕐᑕᐅᓕ, ᐄᑦᔨᑉᑎᒥᑦ ᐊᓂᑎᑦᓯᓚᐅᕐᑐᖅ ᐰᕉᓪᓗ ᐱᔪᓐᓇᕐᓂᖓᓂᑦ!

¹¹ ᒫᓐᓇᓗ ᖃᐅᔨᕗᖓ ᐊᑕᓂᖅ ᐊᖏᓂᕐᓴᐅᖕᒪᑦ ᒎᑎᒋᔭᐅᔪᓕᒫᓂᑦ, ᐃᓄᐃᑦ ᐊᓂᑎᓚᐅᕐᒪᒋᑦ ᐄᑦᔨᑉᑎᒥᐅᑦ ᐱᔪᓐᓇᕐᓂᖏᓐᓂᑦ, ᑖᒃᑯᐊᓗ ᓂᑲᒋᔭᐅᖏᑦᑐᒻᒪᕆᐊᓘᑎᓪᓗᒋᑦ.”

¹² ᔨᑐᕉᓗ ᒨᓯᓯᐅᑉ ᓴᑭᖓ, ᑐᓂᕐᕈᑎᒃᓴᓂᒃ ᐃᑯᐊᓚᔭᒃᓴᓂᒡᓗ ᑐᓂᕐᕈᓯᓚᐅᕐᐳᖅ ᒎᑎᒧᑦ; ᐂᕉᓂᓗ ᕾᓚᐅᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᖏᑦ ᐃᓚᒋᓪᓗᒋᑦ ᓂᕆᖃᑕᐅᓪᓗᑎᒃ ᑐᓂᕐᕈᑎᐅᔪᓂᒃ ᑕᒪᓐᓇᓗ ᑐᒃᓯᐊᕐᓂᕐᒧᑦ ᐃᓚᒋᔭᐅᑎᓪᓗᒍ ᐱᓂᐊᕐᓂᐅᓚᐅᐳᖅ ᒎᑎᐅᑉ ᓵᖓᓂ.

ᐋᖅᑭᒃᓱᐃᔨᓂᒃ ᑎᓕᓯᓂᖅ

¹³ ᖃᐅᑎᓪᓗᒍ ᒨᓯᓯ ᐃᒃᓯᕙᓕᕐᐳᖅ ᐃᓄᖕᓂᒃ ᐋᖅᑭᒃᓱᐃᓂᕐᒥᒃ ᐱᓇᓱᐊᕐᓗᓂ, ᐃᓄᓕᕆᓚᐅᕐᐳᕐᓗ ᐅᓪᓛᒥᑦ ᐱᒋᐊᕐᓗᓂ ᐅᓐᓄᒧᑦ ᑎᑭᓪᓗᒍ.

¹⁴ ᔨᑐᕉᓕ ᑕᑯᒐᒥ ᒨᓯᓯᐅᑉ ᐃᓄᖕᓄᑦ ᐱᓇᓱᐊᕆᐊᖃᕐᑕᖏᓐᓂᒃ, ᐊᐱᕆᓕᕐᐳᖅ, “ᖃᓄᐃᓕᐅᕋᓱᓕᕐᐱᑦ ᐃᓄᖕᓄᑦ? ᓱᖕᒪᑦ ᐃᓄᑑᓪᓗᑎᑦ ᑕᒪᑐᒥᖓ ᐱᓕᕆᕖᑦ? ᐃᓄᐃᑦ ᐅᓪᓛᒥᑦ ᐱᒋᐊᕐᓗᑎᒃ ᐅᓐᓄᒧᑦ ᑎᑭᓪᓗᒍ ᓇᖏᑐᐃᓐᓇᕐᐳᑦ ᐅᑕᖅᑭᓪᓗᑎᒃ ᐅᖃᖃᑎᖃᕈᒪᓪᓗᑎᒃ ᐃᓕᖕᓂᒃ?”

¹⁵ ᒨᓯᓯᐅᑉ ᑭᐅᕚ, “ᑍᒤᓕᐅᕆᐊᖃᕋᒪ ᐃᓄᐃᑦ ᐅᕙᓐᓄᐊᖃᑦᑕᕐᒪᑕ ᖃᓄᖅ ᒎᑎᒧᑦ ᐱᖁᔭᐅᖕᒪᖔᕐᒥᒃ ᑐᑭᓯᔪᒪᓪᓗᑎᒃ;

¹⁶ ᐊᑲᐅᖏᑦᔪᑎᒃᓴᖃᕐᑑᖕᓄᓪᓗ ᐃᓅᖕᓄᑦ ᒪᕐᕉᖕᓄᑦ ᐅᐸᒃᑕᐅᔭᕌᖓᒪ ᑐᑭᑖᕆᐊᖃᖃᑦᑕᕐᐳᖓ ᖃᓄᐃᓕᐅᕆᐊᖃᕐᒪᖔᑎᒃ, ᑐᑭᓯᑎᓪᓗᒋᓪᓗ ᖃᓄᖅ ᒎᑎᐅᑉ ᐱᖁᔭᖏᓐᓂᒃ ᒪᓕᒃᑕᐅᖁᔭᖏᓐᓂᒡᓗ.”

¹⁷ ᒨᓯᓯᐅᓪᓕ ᓴᑭᖓᑕ ᔨᑐᕉᑉ ᐅᖃᐅᑎᕚ, “ᑕᒪᓐᓇ ᐱᓇᓱᐊᕐᓂᕆᔧᑦ ᓈᒻᒪᓈᕐᓯᒪᓐᖏᓚᖅ.

¹⁸ ᑍᒤᓕᐅᕐᓂᐊᕈᕕᑦ ᐃᓕᖕᓂᒃ ᓱᒃᑯᑎᑐᐃᓐᓇᕐᓂᐊᕐᐳᑎᑦ, ᐃᓄᐃᓪᓗᑦᑕᐅᖅ. ᑕᒪᓐᓇ ᐃᓄᑑᑎᓗᒍ ᐃᓕᖕᓄᑦ ᐅᖁᒤᓗᐊᕐᐳᖅ, ᐃᓄᑑᓗᑎᓪᓗ ᑕᒪᑐᒥᖓ ᐱᓇᓱᐊᕈᓐᓇᑦᔮᓇᑎᑦ.

¹⁹ ᒫᓐᓇᓕ ᐅᖃᐅᓯᕆᔭᓐᓂᒃ ᓈᓚᑦᓯᐊᓚᐅᕆᑦ ᐃᓱᒪᑖᑦᓯᐊᖁᓪᓗᑎᑦ, ᒎᑎᐅᓪᓗ ᐃᓚᒋᓂᐊᕐᐹᑎᑦ. ᓈᒻᒪᓈᑦᓯᐊᕐᐳᑎᑦ ᐃᓄᖕᓂᒃ ᐱᓇᓱᐊᕈᑦᔨᔨᐅᓗᑎᑦ ᒎᑎᐅᑉ ᓵᖓᓂ, ᐊᑲᐅᖏᑦᔪᑎᒋᔭᖏᓪᓗ ᒎᑎᒧᑦ ᑐᓂᖃᑦᑕᕐᓗᒋᑦ;

²⁰ ᐱᖁᔭᓂᒡᓗ ᐊᔪᕆᕐᑐᕐᑕᒃᓴᕆᕙᑎᑦ ᑐᑭᓯᑎᓪᓗᒋᓪᓗ ᖃᓄᖅ ᐃᓅᔪᒃᓴᐅᖕᒪᖔᑕ, ᖃᓄᐃᓕᐅᕐᑐᒃᓴᐅᖕᒪᖔᑕᓗ.

²¹ ᐃᓄᖕᓂᓪᓕ ᓂᕈᐊᕐᑐᒃᓴᐅᕗᑎᑦ ᐱᔪᓐᓇᑦᓯᐊᕐᑐᓂᒃ, ᒎᑎᒥᒡᓗ ᓈᓚᑦᓯᐊᕐᑐᓂᒃ, ᐅᒃᐱᕆᔭᒃᓴᐅᑦᓯᐊᕐᑐᓂᒃ ᓯᓔᕐᕆᔭᐅᔭᖏᑦᑐᓂᒡᓗ; ᑍᒤᑦᑐᑦ ᑕᓯᐅᕐᑎᓐᖑᕐᑎᓚᐅᒃᑭᑦ ᐃᓄᖕᓄᑦ 1,000ᓄᑦ, ᐃᓚᖏᑦ 100ᓄᑦ, ᐃᓚᖏᓪᓗ 50ᓄᑦ, ᐃᓚᖏᓪᓗ 10ᓄᑦ.

²² ᑖᒃᑯᐊᓗ ᑍᒤᑦᑐᑦ ᐃᓄᖕᓂᒃ ᐋᖅᑭᒃᓱᐃᔨᓐᖑᕐᑎᓚᐅᒃᑭᑦ ᑍᒤᖏᓐᓇᓕᕐᓗᑎᒡᓗ ᑍᒪᓐᖓᑦ, ᐃᕝᕕᓪᓕ ᐱᔭᕐᓂᕆᔭᐅᖏᑦᑐᓂᒃ ᑭᓯᐊᓂ ᑐᓂᓯᕕᐅᖃᑦᑕᓕᕐᓗᑎᑦ, ᑕᒪᒃᑯᐊᓕ ᐱᔭᕆᐊᑭᓐᓂᖏᑦ ᐃᒻᒥᖕᓂᒃ ᐱᓕᕆᐊᕆᔭᒃᓴᕆᕔᑦ; ᑕᒪᓐᓇ ᐃᓕᖕᓄᑦ ᐅᕿᓐᓂᕐᓴᐅᓕᖁᓪᓗᒍ, ᐅᖁᒤᑦᑐᓕᕆᓂᕐᒥᒡᓗ ᐃᓕᖕᓄᑦ ᐱᓇᓱᐊᖃᑕᐅᓕᕋᔭᕐᐳᑦ ᐃᑲᔪᕐᑎᒋᓕᕐᓗᒋᓪᓗ.

²³ ᑍᒤᓕᐅᕈᕕᑦ ᑕᕝᕙ, ᒎᑎᒧᑦ ᐱᖁᔭᐅᓯᒪᓂᕐᓂᒃ ᐱᓕᕆᑦᓯᐊᕈᓐᓇᕐᓂᐊᕐᐳᑎᑦ, ᐃᓕᖕᓂᒡᓗ ᓱᒃᑯᑎᑐᐃᓐᓇᖏᓪᓗᑎᑦ, ᐅᑯᐊᓗ ᐃᓄᓕᒫᑦ ᓮᒻᒪᑦᓯᐊᕐᓗᑎᒃ ᐊᖏᕐᕋᖃᑦᑕᕐᓂᐊᕐᐳᑦ.”

²⁴ ᒨᓯᓯᐅᓪᓗ ᓴᑭᒥ ᐅᖃᐅᓯᕆᔭᖏᑦ ᐃᓚᓕᐅᕐᐰᑦ, ᐱᓇᓱᐊᕈᑎᒋᓕᕐᓗᒋᓪᓗ ᐃᓱᒻᒥᕐᑐᐃᑦᔪᑎᒋᔭᖏᑦ.

²⁵ ᒨᓯᓯᓗ ᓂᕈᐊᕐᐳᖅ ᐊᖑᑎᓂᒃ ᐱᔪᓐᓇᑦᓯᐊᕐᑐᓂᒃ ᐃᓴᕆᐊᓕᒥᐅᓂᑦ, ᐃᓄᖕᓄᓪᓗ ᑕᓯᐅᕐᑎᓐᖑᕐᑎᓪᓗᒋᑦ, ᐃᓚᖏᑦ 1,000ᓄᑦ, ᐃᓚᖏᓪᓗ 100ᓄᑦ, ᐃᓚᖏᓪᓗ 50ᓄᑦ ᐃᓚᖏᓪᓗ 10ᓄᑦ.

²⁶ ᑖᒃᑯᐊᓗ ᐃᓄᖕᓄᑦ ᐋᖅᑭᒃᓱᐃᔨᒋᔭᐅᓕᓚᐅᕐᐳᑦ ᑍᒤᓕᐅᖏᓐᓇᓕᕐᓗᑎᒡᓗ ᑍᒪᓐᖓᑦ; ᐊᑲᐅᖏᑦᔪᑎᐅᔪᓪᓕ ᐱᔭᕐᓂᖏᑦᑐᑦ ᒨᓯᓯᒧᑦ ᑐᓂᖃᑦᑕᕐᐰᑦ, ᐱᔭᕆᐊᑭᓐᓂᕐᓮᓪᓕ ᐃᒻᒥᖕᓂᒃ ᐱᓇᓱᐊᖃᑦᑕᕐᓗᒋᑦ.

²⁷ ᑕᕝᕙ ᒨᓯᓯᐅᑉ ᓴᑭᓂ ᔨᑐᕉ ᐊᐅᓪᓚᕈᒪᓕᕐᒪᑦ ᑕᕝᕙᐅᕗᑏᕐᐹ, ᔨᑐᕉᓗ ᓄᓇᒥᓄᑦ ᐅᑎᓕᕐᐳᖅ.