ᒨᓯᓯ ᐂᑉᐸᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᕾᕐᑐᒥᑦ ᐃᒥᕐᑎᑕᐅᓂᖏᑦ

¹ ᐃᓴᕆᐊᓕᒥᐅᑦ ᓄᓇᖅᑲᑎᒌᓕᒫᑦ ᓄᓇᒋᔭᕋᓗᐊᑎᒃ ᓯᓐᓂ ᕿᒪᒃᐹᑦ, ᐊᐅᓪᓛᕐᓗᑎᒡᓗ ᐊᓯᐊᓄᑦ. ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ. ᑕᖕᒫᕐᐳᓪᓗ ᕆᐱᑎᒥᒃ ᐊᑎᓕᖕᒧᑦ, ᑕᕝᕙᓂᓗ ᐃᒥᕐᑕᖃᓐᖏᓚᖅ ᐃᒥᕐᕕᒃᓴᒥᒃ.

² ᒨᓯᓯᒧᓪᓗ ᓈᒻᒪᒃᓴᖏᑦᔪᑎᒥᖕᓂᒃ ᐅᖃᕆᐊᕐᑐᕐᐳᑦ ᐅᖃᕐᓗᑎᒡᓗ, “ᐃᒥᒐᒃᓴᑦᑎᓐᓂᒃ ᑐᓂᓯᕕᒋᓚᐅᕐᑎᒍᑦ.” ᒨᓯᓯᐅᓪᓗ ᑭᐅᕔᑦ, “ᓱᖕᒪᑦ ᓈᒻᒪᒃᓴᓐᖏᓚᓰ? ᓱᖕᒪᑦ ᐊᑕᓂᖅ ᐆᒃᑐᕐᐱᓯᐅᒃ?”

³ ᐃᓄᐃᓪᓗ ᐃᒥᕈᕕᒡᔪᐊᕋᒥᒃ ᒨᓯᓯᒧᑦ ᐊᑲᐅᒃᓴᖏᑦᔪᑎᒥᖕᓂᒃ ᐅᖃᐅᓯᕾᓐᓇᕐᐳᑦ ᐅᖃᕐᓗᑎᒡᓗ, “ᖃᓄᐃᒻᒪᑦ ᐄᑦᔨᑉᑎᒥᑦ ᐊᐅᓪᓚᕈᑎᓚᐅᕐᐱᑎᒎᑦ? ᕿᑐᕐᖓᕗᓪᓗ ᐆᒪᔪᖁᑎᕗᓪᓗ ᖀᓐᓂᕐᒧᑦ ᑐᖁᑦᓱᒪᓪᓗᑖ?”

⁴ ᒨᓯᓯᓗ ᐃᓗᖏᕐᑐᕐᓗᓂ ᑐᒃᓯᐊᓕᕐᐳᖅ ᐊᑕᓂᕐᒧᑦ ᐅᖃᕐᓗᓂᓗ, “ᖃᓄᕐᓕᐅᑯᐊ ᐃᓄᐃᑦ ᐱᓇᓱᐊᕐᕕᒋᓂᐊᓕᕐᑕᒃᑲ? ᑖᒃᑯᓄᖓᑦ ᒥᓪᓗᕐᑕᐅᑐᐃᓐᓇᕆᐊᖃᓕᕋᒪ.”

⁵ ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ, “ᐃᓴᕆᐊᓕᒥᐅᑦ ᐊᖓᔪᖅᑳᖏᑕ ᐃᓚᖏᓐᓂᒃ ᒪᓕᒃᑎᖃᕐᓗᑎᑦ ᐃᓄᐃᑦ ᖄᖏᕐᓗᒋᑦ ᓯᕗᓂᖓᓐᓂ ᐅᐸᒃᑕᖓᓄᓐᖓᐅᒋᑦᓯ. ᕿᔪᒡᓗ ᓇᒃᓴᕐᓗᒍ ᑰᖕᒥᒃ ᓁᐅᓪᒥᒃ ᐊᓇᐅᓯᑦᔪᑎᒋᓚᐅᕐᑕᑦ.

⁶ ᐱᖃᑎᒋᓂᐊᕐᐸᒋᓪᓗ ᕾᕐᑐᒑᕐᒦᓕᕐᑎᓪᓗᑎᑦ ᖃᖅᑲᒥ ᕼᐆᕆᑉᒦᑦᑐᒥ, ᕾᕐᑐᕐᓗ ᐊᓇᐅᒍᕕᐅᒃ ᐃᒥᖅ ᑯᕕᓕᕐᓂᐊᕐᐳᖅ ᑕᕝᕙᓐᖓᑦ ᐃᓄᐃᑦ ᐃᒥᕈᓐᓇᖁᓪᓗᒋᑦ.” ᒨᓯᓯᓗ ᑍᒫᒃ ᐱᓂᐊᕐᐳᖅ ᐃᓴᕆᐊᓕᒥᐅᑦ ᐊᖓᔪᖅᑳᖏᑕ ᑕᒃᑯᐊᓂ.

⁷ ᑖᓐᓇᓗ ᐊᑦᓯᕐᑕᐅᕗᖅ ᒫᓴᒥᒃ ᒥᕆᐸᒥᒡᓗ. ᐃᓴᕆᐊᓕᒥᐅᑦ ᓈᒻᒪᒃᓴᓚᐅᖏᒻᒪᑕ, ᐊᑕᓂᕐᓗ ᐆᒃᑐᓚᐅᕐᒪᑦᔪᒃ ᐅᖃᕐᓗᑎᒃ, “ᐊᑕᓂᐅᑉ ᐃᓚᒋᕚᑎᒎᑦ? ᐃᓚᖏᓐᖏᓛᑎᒍᓪᓘᓐᓃᑦ?”

ᐊᒫᓕᑬᑎᒥᐅᓂᒃ ᐅᓇᑕᕐᓂᖅ

⁸ ᐊᒪᓕᖕᒥᐅᓪᓕ ᐃᓴᕆᐊᓕᒥᐅᓄᑦ ᑎᑭᓐᓇᒥᒃ ᐅᓇᑕᓕᕐᐳᑦ ᑖᒃᑯᓄᖓ ᓄᓇᒥ ᕆᐱᑎᒥ.

⁹ ᒨᓯᓯ ᐅᖃᕐᐳᖅ ᔮᓱᐊᒧᑦ, “ᐊᖑᑎᓂᒃ ᓂᕈᐊᓚᐅᕆᑦ, ᑖᒃᑯᐊᓗ ᐃᓚᒋᓗᒋᑦ ᐊᒪᓕᒃᒥᐅᑦ ᖃᐅᒃᐸᑦ ᐅᓇᑕᕆᐊᓛᕐᐸᓯ; ᖃᐅᒃᐸᑦ ᖃᖅᑲᐅᑉ ᖄᖓᓂ ᓇᖏᓛᕐᐳᖓ ᒎᑎᐅᑉ ᐊᔭᐅᑉᐱᐊᖁᑎᐊ ᑎᒍᒥᐊᕐᓗᒍ.”

¹⁰ ᔮᓱᐊᓗ ᑍᒤᓕᐅᕐᐳᖅ ᒨᓯᓯᒧᑦ ᐱᖁᔭᐅᓂᕐᒥᑐᑦ ᐅᓇᑕᕆᐊᕐᓗᓂᓗ ᐊᒪᓕᖕᒥᐅᓂᒃ, ᒨᓯᓯᓕ ᐂᕉᓂᓗ ᕼᐊᕐᓗ ᖃᖅᑲᐅᑉ ᖄᖓᓄᑦ ᒪᔪᕋᕐᐳᑦ.

¹¹ ᒨᓯᓯᐅᓪᓕ ᑕᓖᖕᓂ ᖁᒻᒧᖓᑎᓕᑐᐊᕅᖕᒪᒋᒃ ᐃᓴᕆᐊᓕᒥᐅᑦ ᓵᓚᖃᓕᖃᑦᑕᕐᐳᑦ; ᑕᓕᖏᒡᓕ ᐊᒻᒧᓕᑐᐊᕌᖓᑎᒃ ᐊᒪᓕᖕᒥᐅᑦ ᓵᓚᖃᖔᓕᖃᑦᑕᕆᓪᓗᑎᒃ.

¹² ᒨᓯᓯᐅᓪᓕ ᑕᓕᖏᒃ ᑕᖃᓕᕐᒪᑎᒃ; ᐅᔭᕋᖕᒥᒃ ᐃᒃᓯᕙᐅᑦᑎᕐᑕᐅᕗᖅ, ᑕᕝᕗᖓᓗ ᐃᒃᓯᕚᓕᕐᓗᓂ, ᑕᕝᕙ ᐂᕉᓂᐅᑉ ᕼᐊᕐᓂᐅᓪᓗ ᒨᓯᓯᐅᑉ ᑕᓕᖏᒃ ᖁᒻᒧᖓᑎᓕᕐᐹᒃ ᑎᒍᒥᐊᕐᓗᒋᒃ, ᐊᑐᓂᑦ ᐃᒡᓗᒌᒃᓱᑎᒃ, ᑍᒫᒡᓗ ᒨᓯᓯᐅᑉ ᑕᓕᖏᒃ ᖁᒻᒧᖓᑎᑕᐅᖏᓐᓇᓕᓚᐅᕐᐴᒃ ᓯᕿᓂᖅ ᓂᐱᓚᐅᖏᓐᓂᖓᓂ.

¹³ ᑍᒫᒡᓗ ᑕᕝᕙ ᔮᓱᐊᑉ ᐊᒪᓕᒃᒥᐅᑦ ᓵᓚᒋᒻᒪᕆᓚᐅᕐᐰᑦ ᓴᕕᒡᔪᐊᒧᑦ.

¹⁴ ᑕᕝᕙ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, “ᑕᒪᓐᓇ ᓵᓚᖃᕐᓂᕆᔭᓯ ᑎᑎᕋᓚᐅᕈᒃ, ᐃᖅᑲᐅᒪᔭᐅᔪᓐᓇᖁᓪᓗᒍ. ᔮᓱᐊᓗ ᐅᖃᐅᑎᓂᐊᕐᐸᑦ ᐊᒪᓕᒃᒥᐅᑦ ᓄᖑᑦᓯᐊᕐᑕᐅᖁᒐᒃᑭᑦ ᐊᒥᐊᒃᑯᖃᖏᑦᓯᐊᓕᕐᓗᑎᒃ.”

¹⁵ ᒨᓯᓯᓗ ᑐᓂᕐᕈᓯᕐᕕᒃᓴᒥᒃ ᐋᖅᑭᒃᓱᐃᕗᖅ ᐊᑦᑎᕐᓗᓂᐅᒡᓗ, “ᐊᑕᓂᐅᑉ ᓇᓗᓁᒃᑯᑕᖓ.”

¹⁶ ᐅᖃᕐᓗᓂ, “ᖁᒻᒧᑦ ᐃᓴᐅᑎᓯᒪᒍᒃ ᐊᑕᓂᐅᑉ ᓇᓗᓁᒃᑯᑕᖓ! ᐊᑕᓂᖅ ᑕᕝᕙ ᐅᓇᑍᓐᓇᕐᓂᐊᕐᐳᖅ ᐊᒪᓕᖕᒥᐅᓂᒃ ᐃᓱᖃᖏᑦᑐᒧᑦ.”