ᒨᓯᓯ ᐂᑉᐸᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᓂᕿᒃᓴᕐᑖᕐᑎᑕᐅᓂᖏᑦ ᒫᓇᓂᒃ ᐊᕿᒡᒋᐅᔭᓂᒡᓗ ᕿᓚᖕᒥᑦ ᑲᑕᒃᑐᓂᒃ

¹ ᑕᕝᕙᓐᖓᓪᓗ ᐃᓴᕆᐊᓕᒥᐅᓕᒫᑦ ᐊᐅᓪᓚᕐᐳᑦ ᐃᓕᒻᒥᒃ ᐊᑎᓕᖕᒥᑦ, ᐅᓪᓗᐃᓪᓗ 15ᖓᓐᓂ ᑕᖅᑭᐅᑉ ᐂᑉᐸᖓᓂ ᐄᑦᔨᑉᑎᒥᑦ ᐊᐅᓪᓚᕐᕕᒋᓚᐅᕐᑕᖓᓐᓂᑦ. ᓄᓇᒧᑦ ᓯᓐᒧᑦ ᑎᑭᑉᐳᑦ ᐃᓄᖃᖏᑦᑐᒧᑦ, ᓄᓇᐅᑉ ᐃᓕᒻᒥᐅᑉ ᓮᓁᓪᓗ ᐊᑯᓐᓂᖓᓐᓃᑦᑐᒧᑦ.

² ᑕᕝᕙᓂᓗ ᐃᓄᖃᖏᑦᑐᒥ ᓄᓇᖃᓕᕐᓗᑎᒃ ᐃᓴᕆᐊᓕᒥᐅᓕᒫᑦ ᓈᒻᒪᒃᓴᖏᑦᔪᑎᒥᖕᓂᒃ ᐅᖃᓕᕐᐳᑦ ᒨᓯᓯᒧᑦ ᐂᕉᓂᒧᓪᓗ.

³ ᐅᖃᕐᓗᑎᒡᓗ, “ᐄᑦᔨᑉᑎᒦᑎᓪᓗᑕ ᐊᑕᓂᐅᑉ ᑐᖁᑎᓐᓂᕐᐸᑎᒍᑦ ᐊᑲᐅᓂᕐᓴᐅᑲᓴᖕᓂᕐᐳᖅ, ᑍᑲᓂᓕ ᓂᕿᑐᕈᓐᓇᖃᑦᑕᓚᐅᕋᑦᑕ ᐊᓯᖏᓐᓂᒡᓗ ᓂᕆᔪᒪᔭᓕᒫᑦᑎᓐᓂᒃ, ᒪᐅᖓᓕ ᓯᐅᕅᓐᓈᓗᖕᒧᑦ ᑕᒪᑦᑕ ᑳᖕᓂᕐᒧᑦ ᐱᕐᓕᕐᑎᒋᐊᕐᑐᕐᓂᕐᐱᑎᒎᑦ?”

⁴ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᓂᕿᒃᓴᑦᓯᓐᓂᒃ ᕿᓚᖕᒥᑦ ᑲᑕᒐᕐᑎᑦᓯᓂᐊᕋᒪ ᓯᓚᓗᒃᑐᑎᑐᑦ. ᐃᓄᐃᑦ ᖃᐅᑕᒫᑦ ᐅᓪᓗᒧᑦ ᐊᑕᐅᓯᕐᒧᑦ ᓂᕿᒃᓴᒥᖕᓂᒃ ᑲᑎᑦᓯᔭᕐᑐᖃᑦᑕᕆᐊᖃᕐᓂᐊᕐᐳᑦ, ᑍᒤᓕᐅᕐᑎᓪᓗᒋᑦ ᖃᐅᔨᓴᕈᓐᓇᕐᓂᐊᕐᐸᒃᑲ ᐱᖁᔭᓐᓂᒃ ᐊᑐᕐᓯᔪᓐᓇᕐᓂᐊᕐᒪᖔᑕ.

⁵ ᐅᓪᓗᑦ 6ᖓᓐᓂ ᒪᕐᕈᐊᕐᑎᓪᓗᐊᕐᑐᒥᒃ ᑲᑎᑦᓯᔭᕆᐊᖃᖃᑦᑕᕐᓂᐊᕐᐳᑦ ᐱᐅᓯᕐᒥᒃᑐᓪᓗ ᑖᓐᓇ ᐅᐸᓗᖎᔭᕐᓗᒍ.”

⁶ ᒨᓯᓯᓗ ᐂᕉᓂᓗ ᐃᓴᕆᐊᓕᒥᐅᓂᒃ ᐅᖃᐅᑦᔨᓕᕐᐴᒃ, “ᐅᓐᓄᒃ ᒫᓐᓇ ᖃᐅᔨᓂᐊᓕᕐᐳᓯ ᐊᑕᓂᕐᒧᑦ ᑭᓯᐊᓂ ᐊᐅᓪᓚᕐᑎᑕᐅᓯᒪᓂᑦᓯᓐᓂᒃ ᐄᑦᔨᑉᑎᒥᑦ.

⁷ ᐅᓪᓛᒃᑯᑦ ᐊᑕᓂᐅᑉ ᓇᔫᑎᓂᖓᑕ ᖃᐅᒪᓂᖓ ᑕᑯᓂᐊᕐᐸᓯ, ᓈᒻᒪᒃᓴᖏᑦᔪᑎᒋᔭᓯ ᑖᑦᓱᒪ ᑐᓴᕐᒪᒋᑦ, ᓱᖕᒪᑦ ᓈᒻᒪᒃᓴᖏᑦᑐᒃᓴᐅᕕᑖ? ᑕᑦᓱᒪ ᒪᓕᒃᑕᐅᖁᔭᖏᓐᓂᒃ ᒪᓕᒃᑎᑐᐃᓐᓇᐅᕗᒍᑦ.”

⁸ ᒨᓯᓯ ᐅᖃᓕᕆᕗᖅ, “ᐊᑕᓂᐅᑉ ᑭᓯᐊᓂ ᓂᕿᒥᒃ ᓂᕆᓂᐊᕐᑕᑦᓯᓐᓂᒃ ᑐᓂᓯᕕᒋᓂᐊᕐᐹᓯ ᐅᓐᓄᒍᒻᒥᑕᒃᓴᑦᓯᓐᓂᒃ, ᐅᓪᓛᕈᒻᒥᑕᕆᓂᐊᕐᑕᑦᓯᓐᓂᒡᓗ ᓂᐊᖂᔭᒥᒃ ᐱᔪᒪᔭᓕᒫᑦᓯᓐᓂᒃ ᐱᑎᓐᓂᐊᕆᕚᓯ, ᓈᒻᒪᒃᓴᖏᓐᓂᓯ ᑐᓴᕐᒪᒍ, ᐅᕙᑦᑎᓐᓄᑦ ᓈᒻᒪᒃᓴᖏᑦᔪᑎᒋᔭᑦᓯᓐᓂᒃ ᐅᖃᕌᖓᑦᓯ ᐅᕙᑦᑎᓐᓄᑐᐃᓐᓇᖅ ᐅᖃᕐᕕᖃᕐᐸᖏᓐᓇᑦᓯ ᐊᑕᓂᕐᒧᓪᓕ ᓈᒻᒪᒃᓴᖏᓐᓂᕋᕐᐸᒃᐳᓯ.”

⁹ ᒨᓯᓯᓗ ᐂᕉᓂᒧᑦ ᐅᖃᕐᐳᖅ, “ᓄᓇᖅᑲᑎᒌᓕᒫᑦ ᐃᓴᕆᐊᓕᒥᐅᑦ ᑲᑎᖁᓚᐅᒃᑭᑦ ᐊᑕᓂᐅᑉ ᓵᖓᓄᑦ, ᓈᒻᒪᒃᓴᖏᓐᓂᖏᑦ ᑐᓴᕐᓯᒪᖕᒪᒋᑦ.”

¹⁰ ᐂᕉᓂᓗ ᐅᖃᓪᓚᓕᕐᑎᓪᓗᒍ ᑖᒃᑯᓄᖓ ᓄᓇᖅᑲᑎᒌᓕᒫᓄᑦ ᐃᓴᕆᐊᓕᒥᐅᓄᑦ, ᓄᓇᒧᓪᓗ ᐃᓄᖃᖏᑦᑐᒧᑦ ᑕᑯᓴᕋᒥᒃ ᐊᑕᓂᐅᑉ ᖃᐅᒪᓂᖓ ᓴᖅᑭᑉᐳᖅ ᓄᕗᔭᒥᑦ.

¹¹ ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ,

¹² “ᐃᓴᕆᐊᓕᒥᐅᑦ ᓈᒻᒪᒃᓴᖏᓐᓂᖓᑦ ᑐᓴᕐᓯᒪᕙᕋ, ᐅᖃᐅᑎᒃᑭᑦ ᐅᓐᓄᓕᓵᕐᑎᓪᓗᒍ ᑖᕐᓯᓕᕐᐸᑦ ᓂᕿᒥᒃ ᓂᕆᔭᒃᓴᖃᕐᓂᐊᕐᐳᑦ, ᐅᓪᓛᓐᖑᕐᐸᓪᓗ ᓂᐊᖂᔭᕐᑐᕈᒪᔭᓕᒫᒥᖕᓂᒃ ᐱᔪᓐᓇᕐᓂᐊᕆᕗᑦ, ᑍᒫᒡᓗ ᖃᐅᔨᓂᐊᕐᐳᑦ ᐅᕙᖓ ᐊᑕᓂᖅ ᑖᒃᑯᓄᖓ ᒎᑎᒋᔭᐅᓂᓐᓂᒃ.”

¹³ ᐅᓐᓄᓕᕐᑎᓪᓗᒍᓗ ᑎᖕᒥᐊᓂᒃ ᑲᑎᓐᖓᔪᐊᓗᖕᓂᒃ ᑎᑭᑦᑐᖃᕐᐳᖅ ᐅᓄᕐᓂᖏᓐᓄᓪᓗ ᑖᒃᑯᐊ ᓄᓇᓖᑦ ᐅᓕᒃᑕᐅᓗᐊᕐᐳᑦ ᑕᒪᒃᑯᓄᖓ. ᐅᓪᓛᒃᑯᓪᓗ ᓄᓇ ᖃᑯᐊᕐᑎᖓᓚᐅᕐᐳᖅ ᓄᓇᓕᖕᓂ.

¹⁴ ᓄᓇᓗ ᑕᒪᓐᓇ ᐸᓂᕋᒥ ᓄᓇᐅᑉ ᖄᖓ ᖃᑯᕐᑕᒥᒃ ᐱᑕᖃᓚᐅᕐᐳᖅ ᓯᖃᓕᖕᒥᒃ ᓵᑦᑐᔮᖑᑎᑯᓗᖕᓂᒃ ᒥᑭᔫᑎᓂᒃ, ᐸᑐᒃᑎᑐᑦ ᐊᕿᑎᒋᓪᓗᓂ.

¹⁵ ᐃᓴᕆᐊᓕᒥᐅᓪᓗ ᑕᑯᒐᒥᑦᔪᒃ ᑭᓲᖕᒪᖔᑦ ᓇᓗᕚᑦ, ᐃᒻᒥᖕᓄᓪᓗ ᐊᐱᕆᖃᑦᑕᐅᑎᓕᕐᐳᑦ, “ᓱᓇ ᒪᓐᓇ?” ᒨᓯᓯᐅᑉ ᐅᖃᐅᑎᕔᑦ, “ᑕᒪᑦᔭ ᐊᑕᓂᐅᑉ ᑐᓂᓯᒪᔭᖓ ᓂᕿᒃᓴᕆᔭᐅᖁᓪᓗᓂᐅᒃ ᐃᓕᑦᓯᓐᓄᑦ.

¹⁶ ᐊᑕᓂᖅ ᐱᖁᔨᓯᒪᕗᖅ ᐃᓕᑦᓯᓐᓂᒃ ᐊᑐᓂᑦ ᑲᑎᑦᓯᖁᓪᓗᓯ ᓂᕆᔪᓐᓇᕐᑕᑦᓯᓐᓂᒃ ᐃᒡᓗᒥᐅᖃᑎᒌᑦ ᐃᓄᖏᑕ ᐅᓄᕐᓂᖏᑦ ᒪᓕᒡᓗᒋᑦ, ᒪᕐᕉᖕᓂᒃ ᖃᑦᑕᓪᓗᐊᖕᓂᒃ ᐱᖁᓪᓗᒋᑦ.”

¹⁷ ᐃᓴᕆᐊᓕᒥᐅᓪᓗ ᑍᒫᒃ ᐱᕗᑦ, ᐃᓚᖏᑦ ᑲᑎᑦᓯᓪᓗᐊᕐᓂᕐᓴᐅᕗᑦ ᐃᓚᖏᓪᓗ ᑲᑎᑦᓯᓂᑭᓐᓂᕐᓴᐅᓪᓗᑎᒃ ᐊᓯᒥᖕᓂᑦ.

¹⁸ ᐆᒃᑐᕋᕐᑕᐅᖕᒪᑕᓕ ᑖᒃᑯᐊ ᑲᑎᑦᓯᓂᕐᓴᐅᔫᒐᓗᐊᑦ ᐱᓂᕐᓴᐅᓐᖏᓚᑦ ᑖᒃᑯᐊᓗ ᑲᑎᑦᓯᖏᓐᓂᕐᓴᐅᔫᒐᓗᐊᑦ ᐱᖏᓐᓂᕐᓴᐅᖏᒃᑭᓪᓗᑎᒃ, ᐊᑐᓂᑦ ᓈᒻᒪᒋᔭᒥᖕᓂᒃ ᑲᑎᑦᓯᓚᐅᕐᒪᑕ.

¹⁹ ᒨᓯᓯᐅᓪᓗ ᐅᖃᐅᑎᕔᑦ, “ᓇᓪᓕᐊᑦ ᖃᐅᒃᐸᑦ ᐱᓂᐊᕐᑕᒥᓂᒃ ᐱᓯᒪᔭᕆᐊᖃᓐᖏᓚᖅ.”

²⁰ ᐃᓚᖏᓪᓕ ᒨᓯᓯᒥᒃ ᓈᓚᖏᓪᓗᑎᒃ ᐃᓚᖓᓂᒃ ᐊᒥᐊᒃᑯᕗᑦ, ᖃᐅᑎᓪᓗᒍᓕ ᖁᐱᕐᕈᓂᒃ ᑕᑕᓚᐅᕐᐳᑦ ᐃᒍᓇᕐᓂᓕᕐᓗᓂᓗ. ᒨᓯᓯᓗ ᑖᒃᑯᓂᖓ ᐊᑲᐅᒃᓴᓚᐅᓐᖏᓚᖅ.

²¹ ᐅᓪᓛᑕᒫᑦ ᐊᑐᓂᑦ ᑲᑎᑦᓯᕙᓚᐅᕐᐳᑦ ᓈᒻᒪᒋᔭᒥᖕᓂᒃ. ᓯᕿᓂᕐᓗ ᐆᓇᕐᓯᔭᕌᖓᑦ ᒪᓂᖅᑲᒥ ᐊᒥᐊᒃᑰᔪᕕᓃᑦ ᐊᐅᒃᐸᓚᐅᕐᐳᑦ.

²² ᐅᓪᓗᐃᓪᓕ ᐱᖓᓲᔪᕐᑐᖓᓐᓂ ᓂᕿᒃᓴᓂᒃ ᑲᑎᑦᓯᓚᐅᕐᐳᑦ ᑲᑎᑉᐸᒃᑕᖏᑕ ᒪᕐᕈᐃᕐᓱᓪᓗᐊᕐᑕᖏᓐᓂᒃ, ᐃᓄᖕᒧᑦ ᐊᑕᐅᓯᕐᒧᑦ ᖃᓪᓗᑎᓪᓗᐊᒥᒃ ᑲᑎᑦᓯᓪᓗᑎᒃ. ᑕᓯᐅᕐᑎᒋᔭᐅᔪᓕᒫᓪᓕ ᑕᒪᓐᓇ ᐅᖃᐅᓯᕆᕚᑦ ᒨᓯᓯᒧᑦ,

²³ ᒨᓯᓯᐅᓪᓕ ᐅᖃᐅᑎᕔᑦ, “ᐊᑕᓂᐅᑉ ᐱᑯᓯᒪᖕᒪᑎᒍᑦ ᖃᐅᒃᐸᑦ ᑕᕾᕐᓯᕐᕕᐅᓂᐊᕐᒪᑦ ᑭᓱᓕᕆᕕᐅᖏᑦᓯᐊᕐᓗᓂ, ᑖᓐᓇ ᐊᑕᓂᐅᑉ ᓴᐸᑎᖁᑎᒋᖕᒪᒍ ᐃᑦᔪᕐᓁᑦᑐᖅ; ᑕᕝᕙᓂ ᐅᓪᓗᒥ ᐆᑎᕆᒋᑦᓯ ᐆᑦᑕᕆᐊᖃᕐᑕᑦᓯᓐᓂᒃ ᐆᔪᓕᐅᕐᓗᓯᓗ ᐆᔪᓕᐅᕆᐊᖃᕐᑕᑦᓯᓐᓂᒃ, ᐊᒥᐊᒃᑯᒋᔭᓯᓗ ᖃᐅᒃᐸᒧᑦ ᖁᒥᐅᑎᒋᓗᒋᑦ.”

²⁴ ᒨᓯᓯᒧᑦ ᑍᒫᒃ ᐱᖁᔭᐅᓯᒪᒐᒥᒃ, ᐊᒥᐊᒃᑯᒋᔭᒥᖕᓂᒃ ᖃᐅᒃᐸᒧᑦ ᖁᒥᐅᕗᑦ, ᖃᕐᕈᑎᒐᓗᐊᕐᒪᒋᓪᓕ ᓱᒃᑯᑦᑐᖃᓚᐅᓐᖏᓚᑦ ᖁᐱᕐᕈᕐᑕᐅᓯᒪᒐᑎᒡᓗ.

²⁵ ᑕᕝᕙ ᒨᓯᓯ ᐅᖃᕐᐳᖅ, “ᐅᓪᓗᒥ ᑕᒪᒃᑯᐊ ᓂᕆᓯᒋᒃ, ᐅᓪᓗᒥ ᐊᑕᓂᐅᑉ ᓴᐸᑎᒋᖕᒪᒍ; ᐅᓪᓗᒥ ᓇᑎᕐᓇᒥ ᑕᒪᒃᑯᓂᖓ ᓇᓂᓯᓂᐊᖏᓐᓇᑦᓯ.

²⁶ ᐅᓪᓗᓂᒃ ᐱᖓᓲᔪᕐᑐᓂᒃ ᑕᒪᒃᑯᓂᖓ ᑲᑎᑦᓯᔪᒃᓴᐅᕗᓯ; ᐅᓪᓗᓪᓕ 7ᖓᓂ ᓴᐸᑎ ᓇᓪᓕᐅᑎᕗᖅ, ᑕᕝᕙᓂ ᐅᓪᓗᒥ ᑕᒪᒃᑯᓂᖓ ᓴᖅᑭᑦᑐᖃᕐᓂᐊᓐᖏᓚᖅ.”

²⁷ ᐅᓪᓗᑦ 7ᖓᓐᓂ ᐃᓄᐃᑦ ᐃᓚᖏᑦ ᑲᑎᑦᓯᔭᕐᑐᕋᓱᐊᓚᐅᕐᐳᑦ, ᑭᓯᐊᓂᓕ ᓇᓂᓯᔪᖃᓚᐅᓐᖏᓚᑦ.

²⁸ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᖃᓄᖅ ᐊᑯᓂᐅᑎᒋᔪᖅ ᐱᖁᔭᓐᓂᒃ ᒪᓕᒃᑍᓕᒪᓂᐊᕐᐱᓰ?

²⁹ ᐃᖅᑲᐅᒪᓚᐅᕆᑦᓯ, ᐅᕙᖓ ᐊᑕᓂᐅᔪᖓ ᑕᕾᕐᓯᕐᕕᒃᓴᑦᓯᓐᓂᒃ ᑐᓂᓯᕕᒋᓚᐅᕋᑦᓯ, ᑍᒤᒻᒪᑦ ᐅᓪᓗᑦ ᐱᖓᓲᔪᕐᑐᖓᓐᓂ ᓂᕿᒃᓴᓂᒃ ᐅᓪᓘᖕᓄᑦ ᒪᕐᕉᖕᓄᑦ ᓈᒻᒪᒃᑐᒥᒃ ᑐᓂᓯᕕᒋᕙᑦᓯ; ᑍᒤᒻᒪᑦ ᐃᓄᓕᒫᑦ ᐃᓂᒥᖕᓂᑦ ᓅᑦᑐᖃᕐᑐᒃᓴᐅᓐᖏᓚᑦ ᐊᓂᔪᖃᖏᓪᓗᑎᒡᓗ ᐃᒡᓗᒥᖕᓂᑦ ᐅᓪᓗᑦ 7ᖓᓐᓂ.”

³⁰ ᑍᒤᒻᒪᑦ ᐅᓪᓗᐃᑦ 7ᖓᓐᓂ ᐃᓄᐃᑦ ᕿᑲᓚᐅᕐᐳᑦ ᓴᓇᔪᖃᕋᑎᒃ.

³¹ ᐃᓴᕆᐊᓕᒥᐅᓪᓕ ᑕᒪᒃᑯᐊ ᓂᕿᒃᓴᑦ ᐊᑎᖃᕐᑎᓚᐅᕐᐰᑦ ᒫᓇᒥᒃ; ᑰᕆᐊᓐᑐᕆᐅᑉ ᐱᕈᕐᓯᐊᒃᓴᐅᑉ ᑲᓐᖓᕐᓲᑎᒃᓴᖓᑐᑦ ᑍᒤᑦᑑᕗᖅ ᖃᑯᕐᑕᑯᓘᓪᓗᓂ, ᑎᐱᖃᕐᓗᓂᓗ ᓂᐊᖂᔭᑎᑐᑦ ᓵᑦᑐᑯᓘᓪᓗᑎᒃ ᐸᓂᕐᓯᒪᔪᑎᑐᑦ ᕼᐊᓂᒥᒃ ᐃᓚᓯᒪᔪᑎᑐᑦ.

³² ᒨᓯᓯᓗ ᐅᖃᕐᐳᖅ, “ᐃᒫᒃ ᑕᕝᕙ ᐊᑕᓂᐅᑉ ᐱᖁᓯᒪᕚᑎᒍᑦ: ᒫᓇᐅᑉ ᐃᓚᖓᓂᒃ ᖃᓪᓗᑎᐅᑉ ᐊᕝᕙᖓᑐᑦ ᐊᖏᑎᒋᔪᒥᒃ ᐱᐅᓕᒃᓯᓯᒪᖁᓪᓗᑕ, ᑭᖑᕚᑦᑎᓐᓄᑦ ᑕᑯᔭᐅᖃᑦᑕᕐᑐᒃᓴᒥᒃ ᖃᓄᐃᑦᑐᒥᒃ ᓂᕿᖃᕐᑎᑕᐅᓚᐅᕐᒪᖔᑦᑕ ᐃᓄᖃᖏᑦᑐᒥ ᐄᑦᔨᑉᑎᒥᑦ ᐊᐅᓪᓚᕐᑎᑕᐅᓯᒪᓕᕐᑎᓪᓗᑕ.”

³³ ᒨᓯᓯᓗ ᐅᖃᕐᐳᖅ ᐂᕉᓂᒧᑦ, “ᐃᒥᖃᐅᑎᒥᒃ ᑎᒍᓯᓕᕆᑦ, ᖃᓪᓗᑎᐅᓪᓗ ᓇᑉᐸᖓᑐᑦ ᐊᖏᑎᒋᔪᒥᒃ ᒫᓇᒥᒃ ᐃᓗᓪᓕᕐᓗᒍ, ᐊᑕᓂᕐᒧᑦ ᑐᓂᕐᕈᑎᒋᓕᕈᒃ, ᐱᓯᒪᔭᐅᖁᓪᓗᒍ ᑭᖑᕚᑦᑎᓐᓄᑦ.”

³⁴ ᐊᑕᓂᐅᑉ ᑍᒫᒃ ᒨᓯᓯ ᐱᖁᓚᐅᕐᒪᒍ, ᑕᕝᕙ ᐂᕉᓂᐅᑉ ᐃᓕᓚᐅᕐᐹ ᐊᖏᖃᑎᒌᖕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓄᑦ, ᑕᕝᕙᓂ ᐱᐅᓕᐊᖑᓯᒪᖁᓪᓗᒍ.

³⁵ ᐃᓴᕆᐊᓕᒥᐅᓪᓗ ᓂᕿᖃᓚᐅᕐᐳᑦ ᒫᓇᒥᒃ ᐊᕐᕌᒍᓂᒃ 40ᓂᒃ, ᓄᓇᒧᑦ ᐱᕈᕐᑐᓕᖕᒧᑦ ᑎᑭᓚᐅᖏᓐᓂᕐᒥᖕᓂ; ᓂᕿᖃᓚᐅᕐᐳᑦ ᒫᓇᒥᒃ, ᑬᓇᓂᐅᑉ ᓄᓇᖓᓄᑦ ᑎᑭᓚᐅᖏᓐᓂᕐᒥᖕᓂ.

³⁶ (ᖃᓪᓗᑎᐅᑉ ᓇᑉᐸᖓ ᐸᓂᕐᓯᕐᓯᒪᔪᓄᑦ ᐊᑐᕐᑕᐅᕙᓚᐅᕐᑐᖅ ᐊᑦᔨᖃᐸᓗᒍᓐᓇᕐᑐᖅ ᖃᓪᓗᑎᓂᒃ ᑕᓪᓕᒪᓂᒃ.)